Ahoana no Fiheveran’i Jesosy ny Anaran’i Jehovah?

1-2. a) Inona no nataon’i Jesosy ny alina talohan’ny hamonoana azy? b) Inona avy ny fanontaniana hodinihintsika ato?

ALAKAMISY alina, 14 Nisana taona 33, tamin’izay ary kely sisa i Jesosy dia hisy hamadika, hotsaraina, homelohina, hampijalijalina, ary hovonoina ho faty. Miara-mihinana sakafo manokana amin’ny apostoliny tsy mivadika izy, ao amin’ny efitra ambony rihana iray. Nanafatrafatra ny apostoliny izy avy eo sady nampahery an-dry zareo. Nanao vavaka lalina i Jesosy, taloha kelin’ny nialan-dry zareo tao amin’ilay efitra. Noraketin’ny apostoly Jaona an-tsoratra io vavaka io, ary ao amin’ny Jaona toko faha-​17 ilay izy.

² Inona no nampiasa saina an’i Jesosy tamin’io fotoana io rehefa jerena ilay vavaka? Nahoana io vavaka io no manampy antsika hamantatra an’izay zava-dehibe indrindra tamin’i Jesosy nandritra ny fanompoany teto an-tany? Hojerentsika ny valin’ireo fanontaniana ireo.

“EFA NAMPAHAFANTARIKO AZY NY ANARANAO”

3. Inona no nolazain’i Jesosy momba ny anaran’i Jehovah, ary inona no tiany hotenenina? (Jaona 17:6, 26)

³ Izao no nolazain’i Jesosy rehefa nivavaka izy: “Efa nampahafantariko azy ny anaranao.” Indroa mihitsy i Jesosy no niteny hoe nampahafantariny ny mpianany ny anaran’i Jehovah. (Vakio ny Jaona 17:6, 26.) Inona no tiany hotenenina? Hoe tsy fantatry ny mpianany ve ilay anarana dia nampahafantariny an-dry zareo? Efa fantatr’ireo mpianatra ireo hoe Jehovah no anaran’Andriamanitra satria Jiosy ry zareo. Miverimberina inarivony ao amin’ny Soratra Hebreo mantsy io anarana io. Tsy ilay anaran’Andriamanitra àry no tiany hampahafantarina, fa hoe hoatran’ny ahoana marina Ilay mitondra an’io anarana io. Nampahafantariny, ohatra, ny fikasan’i Jehovah sy ny zavatra nataony ary ny toetrany. I Jesosy irery no tena mahay mampahafantatra an’izany.

4-5. a) Hazavao amin’ny ohatra ny dikan’ny hoe lasa mahafantatra ny anaran’ny olona iray. b) Nahoana ny mpianatr’i Jesosy no lazaina hoe lasa nahafantatra ny anaran’i Jehovah?

⁴ Eritrereto hoe dokotera mpandidy ny anti-panahy iray ao aminareo. I Davida no anarany. Efa ela ianao no nahafantatra azy. Marary be tampoka anefa ianao indray andro, dia nalefa tany amin’ny hopitaly iasan’io rahalahy io. Izy no nandidy anao dia avotra ihany ianao. Lasa misy heviny kokoa aminao ny anaran’io rahalahy io, sa tsy izany? Tsy hoe anti-panahy ao aminareo fotsiny no ahafantaranao an’i Davida izao, fa izy koa ilay dokotera mpandidy namonjy ny ainao.

⁵ Efa nahalala ny anaran’i Jehovah koa ny mpianatr’i Jesosy. Lasa nisy heviny kokoa tamin’izy ireo anefa io anarana io noho ny fanompoan’i Jesosy. Fa nahoana? Satria nanahaka tanteraka ny toetran’ny Rainy i Jesosy tamin’izay nolazainy sy nataony. Lasa ‘nahafantatra’ kokoa an’i Jehovah àry ny apostoliny rehefa nandinika ny fomba fampianaran’i Jesosy sy ny fomba nifandraisany tamin’ny olona.​—Jaona 14:9; 17:3.

“ILAY ANARANAO NOMENAO AHY”

6. Nahoana no lazaina hoe nomen’i Jehovah an’i Jesosy ny anarany? (Jaona 17:11, 12)

⁶ Izao koa no nangatahin’i Jesosy ho an’ny mpianany, tao amin’ilay vavaka: “Arovy izy ireo noho ilay anaranao nomenao ahy.” (Vakio ny Jaona 17:11, 12.) Midika ve izany hoe lasa Jehovah ny anaran’i Jesosy? Tsy izany mihitsy! Mariho fa “ilay anaranao” no nilazan’i Jesosy ny anaran’i Jehovah. Tsy hoe niova ho Jehovah izany ny anaran’i Jesosy. Inona àry no tian’i Jesosy hotenenina rehefa nilaza izy hoe nomena azy ny anaran’Andriamanitra? Voalohany, hoe solontenan’i Jehovah izy sady Mpitondra Teniny. Tonga tamin’ny anaran’ny Rainy izy sady nanao fahagagana tamin’ny anaran’ny Rainy. (Jaona 5:43; 10:25) Ankoatra izay, ilay anarana hoe Jesosy dia midika hoe “I Jehovah dia Famonjena.” Tena mifandray akaiky amin’ny anaran’Andriamanitra àry ny anaran’i Jesosy.

7. Hazavao amin’ny ohatra hoe nahoana i Jesosy no afaka niteny tamin’ny anaran’i Jehovah.

⁷ Intỳ misy ohatra: Afaka miteny amin’ny anaran’ny mpitondra ao amin’ny taniny ny ambasadaoro iray satria solontenany. Manan-kery hoatran’ny tenin’ilay mpitondra ihany àry ny tenin’ilay ambasadaoro. Nisolo tena an’i Jehovah koa i Jesosy. Rehefa niteny tamin’ny olona àry izy dia niteny tamin’ny anaran’i Jehovah.​—Mat. 21:9; Lioka 13:35.

8. Nahoana no lazaina hoe ‘tao amin’i’ Jesosy ny anaran’i Jehovah, talohan’ny nahatongavany tetỳ an-tany? (Eksodosy 23:20, 21, f.a.p.)

⁸ Nantsoina hoe Teny i Jesosy satria nitondra ny tenin’i Jehovah izy rehefa nampita fanazavana sy toromarika ho an’ny anjely hafa sy ho an’ny olombelona. (Jaona 1:1-3) Azo inoana hoe i Jesosy ilay anjely nirahin’i Jehovah mba hikarakara ny Israelita rehefa niala tany Ejipta ry zareo. Izao no nolazain’i Jehovah rehefa nasainy nankatò an’io anjely io ny Israelita: “Satria ao aminy ny anarako.”a (Vakio ny Eksodosy 23:20, 21 sy ny fanamarihana ambany pejy.) Nahoana no nolazaina hoe ‘ao amin’i’ Jesosy ny anaran’i Jehovah? Satria misolo tena an’i Jehovah izy, ary izy no tena miaro sy manamasina ny anaran’ny Rainy.

“RAY Ô, OMEO VONINAHITRA NY ANARANAO”

9. Ahoana no ahitana hoe zava-dehibe tamin’i Jesosy ny anaran’i Jehovah?

⁹ Araka ny hitantsika teo, dia tena zava-dehibe tamin’i Jesosy ny anaran’i Jehovah, na dia tamin’izy mbola tsy teto an-tany aza. Tsy mahagaga raha nisy ifandraisany tamin’ny anaran’i Jehovah daholo ny zavatra nataon’i Jesosy tetỳ an-tany. Rehefa hifarana ny fanompoany dia nilaza i Jesosy hoe: “Ray ô, omeo voninahitra ny anaranao.” Tonga dia namaly tamin’ny feo mafy avy tany an-danitra ny Rainy hoe: “Efa nanome voninahitra azy aho, ary mbola hanome voninahitra azy indray.”​—Jaona 12:28.

10-11. a) Ahoana no nanomezan’i Jesosy voninahitra ny anaran’i Jehovah? (Jereo koa ny sary.) b) Nahoana no nila nohamasinina sy nohamarinina ny anaran’i Jehovah?

¹⁰ Nanome voninahitra ny anaran’ny Rainy koa i Jesosy. Nampahafantariny ny olona, ohatra, hoe mahafinaritra be ny toetran’ny Rainy sy ny zavatra nataon’io Rainy io ho an’ny olona. Tsy izay ihany anefa no tafiditra amin’ny hoe manome voninahitra an’ilay anarana. Nila nohamasinina sy nohamarinina koa ny anaran’i Jehovah.b Nasehon’i Jesosy hoe tena zava-dehibe izany, tamin’izy nampianatra ny mpanara-dia azy an’ilay vavaka modely. Hoy izy: “Rainay izay any an-danitra, hohamasinina anie ny anaranao!”​—Mat. 6:9.

¹¹ Nahoana ny anaran’i Jehovah no mila hamasinina sy hamarinina? Satria nanala baraka sy nanendrikendrika an’i Jehovah Andriamanitra i Satana Devoly tany amin’ny zaridainan’i Edena. Mpandainga, hono, i Jehovah ary nisy zavatra tsara tsy nomeny an’i Adama sy Eva. (Gen. 3:1-5) Te hilaza koa i Satana hoe tsy mety ny fomba fanaovan’i Jehovah zavatra. Ny lazan’i Jehovah, na ny anarany, mihitsy àry no voakitikitika rehefa nanendrikendrika azy i Satana. Nilaza koa i Satana tatỳ aoriana, tamin’ny andron’i Joba, hoe manompo an’i Jehovah, hono, ny olona satria fotsiny hoe mahazo zavatra avy aminy. Angaha izay ihany? Tsy misy olona tena tia an’i Jehovah koa, hono, ka hoe mbola hanompo azy na dia misy fitsapana aza. (Joba 1:9-11; 2:4) Mila fotoana vao ho hita hoe i Jehovah sa i Satana no tena mpandainga.

“MAHAFOY NY AIKO AHO”

12. Vonona hanao inona i Jesosy noho ny fitiavany ny anaran’i Jehovah?

¹² Te hanao an’izay rehetra azony atao i Jesosy mba hanamasinana sy hanamarinana ny anaran’i Jehovah satria tiany i Jehovah. Hoy i Jesosy: “Mahafoy ny aiko aho.” (Jaona 10:17, 18) Vonona ho faty ho an’ny anaran’i Jehovah mihitsy izany izy.c Tsy nankatò an’i Jehovah i Adama sy Eva, olombelona lavorary voalohany, fa naleon-dry zareo nanaraka an’i Satana. I Jesosy kosa te hanaporofo hoe tia an’i Jehovah, ka vonona hanketỳ an-tany ary tsy nivadika mihitsy. (Heb. 4:15; 5:7-10) Tsy nivadika izy mandra-pahafatiny teo amin’ny hazo fijaliana. (Heb. 12:2) Noporofoiny tamin’izany hoe tiany i Jehovah sy ny Anarany.

13. Nahoana i Jesosy no tsara toerana hanaporofo hoe mpandainga i Satana? (Jereo koa ny sary.)

¹³ Noporofoin’i Jesosy tamin’izay rehetra nataony hoe tsy iadian-kevitra fa i Satana no mpandainga fa tsy i Jehovah! (Jaona 8:44) Tsy misy mahafantatra kokoa an’i Jehovah noho i Jesosy, na iza na iza. Raha nisy nitombina ny fiampangan’i Satana an’i Jehovah, dia tsy maintsy hoe fantatr’i Jesosy izany. Matoa anefa izy mbola tapa-kevitra ny hiaro ny lazan’i Jehovah, na ny anarany, dia satria fantany hoe tsy misy marina ilay fiampangana. Izy aza mbola tsy nivadika tamin’io Rainy be fitiavana io ihany fa vonona ny ho faty, na dia tamin’ny fotoana hoatran’ny hoe tsy niraharahian’i Jehovah azy aza.​—Mat. 27:46.d

“VITAKO NY ASA NASAINAO NATAOKO”

14. Inona ny valisoa nomen’i Jehovah an’i Jesosy noho izy tsy nivadika?

¹⁴ Afaka niteny an’izao i Jesosy tao amin’ilay vavaka nataony ny alina talohan’ny nahafatesany: “Vitako ny asa nasainao nataoko.” Natoky izy hoe hamaly soa azy i Jehovah satria tsy nivadika izy. (Jaona 17:4, 5) Tsy diso mihitsy i Jesosy natoky an’io Rainy io. Tsy navelan’i Jehovah hijanona tao am-pasana mantsy izy. (Asa. 2:23, 24) Natsangany tamin’ny maty i Jesosy dia nomeny toerana ambony kokoa tany an-danitra. (Fil. 2:8, 9) Lasa Mpanjakan’ny Fanjakan’Andriamanitra i Jesosy tatỳ aoriana. Inona no hataon’io Fanjakana io? Izao no tohin’ilay vavaka modely: “Ho tonga anie ny Fanjakanao! Hatao etỳ an-tany anie ny sitraponao [sitrapon’i Jehovah], tahaka ny any an-danitra!”​—Mat. 6:10.

15. Inona koa no hataon’i Jesosy?

¹⁵ Kely sisa dia hiady amin’ny fahavalon’Andriamanitra i Jesosy ary handringana ny ratsy fanahy, amin’ny Aramagedona. (Apok. 16:14, 16; 19:11-16) Hatsipiny any amin’ny “lavaka mangitsokitsoka” i Satana, tsy ela aorian’izay, ka tsy ho afaka hanao na inona na inona fa hoatran’ny hoe maty. (Apok. 20:1-3) Hataon’i Jesosy miadana sy lavorary indray ny olombelona mandritra ny Fanjakany Arivo Taona. Hatsangany koa ny maty ary hataony paradisa ny tany manontolo. Ho tanteraka ny sitrapon’i Jehovah amin’izay!​—Apok. 21:1-4.

16. Hanao ahoana ny fiainana, amin’ny faran’ny Fanjakana Arivo Taona?

¹⁶ Hanao ahoana ny fiainana rehefa tapitra ny Fanjakana Arivo Taona? Tsy hisy intsony ny ota sy ny tsy fahalavorariana. Tsy mila mangataka famelan-keloka miorina amin’ny vidim-panavotana intsony ny olombelona, ary tsy hila mpanelanelana na mpisorona. ‘Ho foana ny fahavalo farany, dia ny fahafatesana’ nolovana avy tamin’i Adama. Tsy hisy na inona na inona intsony ny fasana satria efa natsangana ny maty. Ho lavorary ny olona rehetra eto an-tany.​—1 Kor. 15:25, 26.

17-18. a) Inona no hitranga amin’ny faran’ny Fanjakana Arivo Taona? b) Inona no hataon’i Jesosy rehefa tapitra ny fitondrany? (1 Korintianina 15:24, 28) (Jereo koa ny sary.)

¹⁷ Hisy zavatra miavaka koa hitranga amin’ny faran’ny Fanjakana Arivo Taona. Efa milamina mantsy amin’izay ilay adihevitra momba ny fanamasinana ny anaran’i Jehovah. Nahoana? Tadidio ilay tenin’i Satana tany amin’ny zaridainan’i Edena. Nolazainy fa mpandainga i Jehovah sady tsy manam-pitiavana rehefa mitondra ny olombelona. Be dia be anefa ny olona nanome voninahitra sy nanaja an’i Jehovah taorian’izay, ka nohamasinina imbetsaka ny anarany. Ho voamarina tanteraka àry ny anaran’i Jehovah amin’ny faran’ny Fanjakana Arivo Taona. Ho efa voaporofony hoe tsy misy isalasalana fa Ray be fitiavana any an-danitra izy.

¹⁸ Ho voaporofo indray mandeha tsy miverina hoe diso ny tenin’i Satana. Inona no hataon’i Jesosy rehefa tapitra ny fotoana anjakany? Hanao hoatran’i Satana ve izy dia hikomy amin’i Jehovah? Tsy izany mihitsy! (Vakio ny 1 Korintianina 15:24, 28.) Haveriny amin’ny Rainy ny Fanjakana dia hanaiky ny fitondran’i Jehovah izy. Tsy hoatran’i Satana izy fa tena vonona hamoy ny zava-drehetra satria tiany i Jehovah.

19. Ahoana no fiheveran’i Jesosy ny anaran’i Jehovah?

¹⁹ Tsy mahagaga i Jehovah raha vonona hanome ny anarany ho an’i Jesosy. Vitan’i Jesosy tsara mantsy ny nisolo tena an’io Rainy io. Ahoana àry no fiheveran’i Jesosy ny anaran’i Jehovah? Io no zava-dehibe indrindra aminy. Vonona ho faty ho an’io anarana io izy, ary vonona hamerina ny zava-drehetra amin’i Jehovah, amin’ny faran’ny Fanjakana Arivo Taona. Ahoana no anahafantsika an’i Jesosy? Izany no hodinihintsika ao amin’ny lahatsoratra manaraka.