Februarib

Jesub ge khoexaǃnâsiba nau khoen ǃoagu gere ǁgau. Khoen ge ǁîb ǀnamma gere hōǃâ tsîn ge khoena ǁnās ǀkha Gaosib ǃgâiǂhôasa gere ūǃoa. Sida tsîn ge ǁnā tsâsiga khoena a ǁgau ǁkhā, nēs nî hui da amaga î da sida aoǁnâ sîsenni ǃnâ ǃgâise dī. Tae-e nî hui da khoexaǃnâ tsâsiba ǁîn hîna da ra aoǁnâbana ǁgaus ǃnâ? ǁÎn hîna da aoǁnâ sîsenni ǃnâ ra ǀhao-ūn di mâsib ǃnâ da ge ra mâisen ǂgao tsî sada ga hâ-ūhe hâ ǀgaub ǂûb ǃnâ ǁîn ǀkha ra hâ ǂgao. (Mat. 7:12) Mâ khoe-i hoa-i ǂhâsiga ǂâis ǃnâ ūhâ re. Mâ khoe-i hoa-i di mâsigu tsî ǂâi ǀgaub tsîna da ge ǂâis ǃnâ nî ūhâ. Khoe-i di ǂâi ǀgauba du nî hōse dîde dî re. (ǂKhm. 20:5) Dîna da ga dî o, o da ge khoena ǃēsa ra mā în mîba da tae-i ǃaroman ǃgâiǂhôasa ǂhâ hâsa. Nēsa da ga ǂan o, o da ge nî ǂan ǁîna da mati khoexaǃnâsiba nî ǁgausa tsî ǁîna ǂhâban hâ huiba nî mā, Jesub ge dī khami.—ǀGopeǀnō re 1Kor. 9:19-23. w19.03 20 ¶2; 22 ¶8-9

Adammi tsî Evas tsîn ge ǀnamoǃnâ ǁnâuǀnamoǃnâsiba ge ǁgau Jehovab ge dība ra ǃgâi xūn hoan ǃoa-ai. Hoa da ge aiǂhanuba ūhâ ǁgausa ǁîra di mîǁguiba da ūǃoa tama hâsa. ǁĀǁnâ kaisens ǃnâ-ū da ge Jehovaba ra mîba ǁîb aiǂhanuba ūhâsa mîǁguis diba tae-i a tsūs tsî tae-i a ǃgâis tsîna. Tsî da ge sada ǁGûba da a ǀnam tsî ǁîb ǃnâ ra ǂgomǃgâsa ra ǁgau. ǃGomsib hîna da ǁāǁnâs khaoǃgâ ra hōǃâb ge tsēkorobe Jehovab ǁgaraga saos diba sada ǁgaragu ose. ǂGui khoen ge nē ûi ǀgauba mâ kurib hoaba ra sao. Sada tsîn ge nē khoen khami a dī ǁkhā sada di ǁnâuǃāba da ga Elobmîs ǃnâ ǀāǀā, ǃgâsan ǀkha hâǀhao tsî sada ǀnamxa ǁGûb xa da ra ǁkhāǁkhāsen xūna nau khoen ǀkha ǀgoragu o. (Heb. 10:24, 25) Mîǁguiga da ga dī o, o da ge Jehovab ǁîb mîs tsî ǀapeǂhomis ǃnâ-ū ra mā daoǁgaude nî sao. (Jes. 30:21) Nēsa da ga dī o, o da ge nî ǃgâiǃō.—ǂKhm. 16:20. w19.03 7 ¶17-18

Jehovab ge ǂgui gagasi ǂûna ra mā da. Aiǁgause sada di ǀhaodi, ǂkhanin tsî internets ǂhaweb ǃnâ-ū da ge ǃgâi daoǁgaude ra mā-e. ǃHoa-e ǁnâu, khomai ǃâ-e khomai tamas ka io broadcastingsa kō tsî du ge mûǂan ‘nēs ge ǂhanu ǁaeb ai ǀgui go ǂoaxa di’? Mati du sadu ǃgôaǃgâsiba Jehovaba a ǁgau ǁkhā? (Kol. 3:15) ǀGui ǀgaub ge ǀgores ǃnâ-ū gangan bisa nē ǃgâi xūn ǃaroma. Sada ǃoabas ǃkhaiga ǃanuse ūhâs ǃnâ-ūs tsîna da ge Jehovaba ǃgôaǃgâsiba a ǁgau ǁkhā. Hoaǁae da ge ǀhû-omga ǃanu tsî ra kōǃgâ tsî ǁnān hîna ǀōb xūn ǀkha ra sîsen an ge nî ǂanbasen în tā nē xūna khôa kai. Sada ǀhû-omga da ga hoaǁae ǃanu o, os ge nēsa nî hui in ǀoro dī-ūnu sîsenga hâ. Nēs ǀkha da ge marina ǃgâi ǀgaub ǃnâ a sîsen-ū ǁkhā ǀhû-omga ǃhūbaib ǂhawase oms tsî dī-ūnus ǃaroma. w19.02 18 ¶17-18

Jobi ge ǁaeba gere ǁamaǂui Jehovab buruxa kurusa ǂâiǃgâs ǃnâ-ū. (Job. 26:7, 8) ǁÎb ge kaise gere buru ǃhūbaib, ǀhommi, ǃâudi tsî ǃgūrub tsîn xab gere ǂâi o xaweb ge ge mûǂan ǀoro ǂansab kurus xa ūhâsa. Jehovab buruxa ǀgaugu xas tsînab ge nēti gere tsâ: “Mîdi ǁîb di ams dide ta ge ti ǂhanub ǃgâ-ai ge sâubasen.” Nēsab ge Joba Jehovab xa ge mî. (Job. 23:12) Jobi di buruxa ǃgôasib hînab Jehovaba ūba hâb ge ge ǁgari bi, îb ǁîb ǁGûba ǀnam tsî ǂkhîǂkhî ǂgao. Jobi ge ǁîb mîs ai ge mâǀgara tsî ǁîb ǂhauǃnâsiba ge ǀgaiǀgai. Jobi khami du ge sadu tsîna nî dī. Sadu ge Kurus xa ǂgui xūna a ǂan Jobi ǁaeb ǃnâ ge ûi hâ i khoen xa. Tsî du ge ǀoasa Elobmîsa ūhâ Jehova Elob xa hoa xūna ǂans ǃaroma. Hoa xūn hîna du ra ǁkhāǁkhāsenan ge nî hui du sadu ǂgaoga burugâb ǀkha ǀoaǀoasa. Sadu buruxa ǃgôaǃgâsib Jehovaba du ūba hâb ge nî hui du ǀnamma omkhâis ǃnâ tsî ǁîba ǁnâuǀnamsa tsî nēs ǃnâ-ū sadu ǂhauǃnâsiba ǃkhōǀgarasa.—Job. 28:28. w19.02 5 ¶12

ǃHūbaib ǂgaeǂgui-aogu ge Jehovab ǃoaba-aona ra mâǃoa. ǁÎgu ge ǂgui xūn ǃgao ra mâǃoa da xawe da ge ‘Eloba khoen ǃgâ-ai ra ǁnâuǀnam.’ (ǃNǃkh. 5:29) ǀNîsi da ge mîǁgaiǁgai-e, ǃkhōsis ǃnâ ū-e tamas ka io a ǂnau-e ǁkhā. Jehovab huib ǀkha da ge mîǃoa tide xawe ǃnomsase nî hâ. ǂÂihō re ǃnona Hebreǁîgu hîna ge ǃkhōsis ǃnâ hâ îgu di aiǁgaus xa, Hananjab, Misaeli tsî Asariab tsîna. ǁÎgu ge tsaura ǀgaub ǃnâ gao-aoba ge mîba tae-i ǃaroma gu ǁîb ge kuru ai-īsiba ǃoaba tidesa. ǁÎgu ge Jehovab ge dī xū-i hoa-e ga ūǃoa hâ. (Dan. 3:1, 8-28) Sida ǂgomǃgâsib ga Elob ǃoa-ai ǃâitsâhe o, o da mati ǃnona Hebreǁîga nî ǁgae? Jehovab nî kōǃgâ da ǃkhaisa da ge ra ǂgom. (Psa. 118:7) Sida a tsūdī-ao di ra mî khoena da ge tsaura ǀgaub ǃnâ ra ǃeream. (1Pet. 3:15) Tsî da ge sida ǀhōsagusisa Jehovab ǀkha ǁgaiǁgai ǂgao tama hâ. w19.02 10-11 ¶11-13

Sida ǁkhoaǂgaosiba da ge a ǀgaiǀgai ǁkhā xoremarib ge mā da ǃâubasens xa ǂâiǃgâs ǃnâ-ū. (Jhn. 3:16; Efe. 1:7) Jesub ǁōb ǂâiǂâisens aiǃâ da ge ǃēsa ūhâ sida ǃgôaǃgâsiba xoremarib ǃgao ǁgausa. Nē ǁaeb ǃnâ da ge nē ǂâiǂâisens ǃgao a māsa Elobmîs xoade nî khomai tsî Jesub ǁōb aiǃâ gere ī xūn xa nî ǂâiǃgâ. ǁNās ǀkha da ge ǃuiǂûsa da ga hâǃnâ o, o ǂhâǂhâsasib pereb tsî ǂauxûi-i tsîn disa nî ǁnâuǃā tsî ǁîn tae-e ra ǂâibasensa. Jehovab tsî Jesub tsîkha ge dība da xūna da ga ǁnâuǃā tsî mû o nēsa xu da mati ra ǀamasa, os ge sida ǃâubasensa ra ǀgai tsî da ge ra ǂkhâǃnâ-e ǀams kōse ǁkhoaǂgaosiba ǁgausa. (Heb. 12:3) Kaise da ge ra ǃgâiaǂgao Jesub sida ǀgapi pristeri ase noxoba ǃgamǃgamsen tsî ǁkhoaǂgaosib ǀkha ǀhommi ǃnâ sida ra ǀkhomaba o. (Heb. 7:24, 25) ǃGôaǃgâsiba ǁgaus ǃgao da ge Jesub ǁōb ǂâiǂâisensa nî hâǃnâ, ǁîb ge mî khami.—Luk. 22:19, 20. w19.01 22 ¶8; 23-24 ¶10-11

Jehovab ge hoa da aiǂhanuba ra mā ǁîba ǃoabasa. Sada ǃereamdi ǀhaodi tawa di ge sada di “ǁguibas di koa” tsî ǀnî hâ khoe-i ge nēsa a dība da ǁoa. (Heb. 13:15) Jehovaba ǀgui ǃnôa ǁguibas tamas ka io ǃereamde sada xu ra ǂgaoǀkhā? Hî-i, di tamas ge. ǀHaohâb ǀhaode ǀhōsan ǀkha du ūhâ ǃgâi ǂûǀhaos ase mû re. ǀHaohâb khoen ūhâ ǁaxasi-e ǃoa du ga ǁkhauhe tsî ǂû-e dī kaihe o. O du mati nî tsâ? ǂKharirose du ge a ǃao ǁkhā xawe du ge ǃgâi ǂû-e nî aiǂhomi ǂgao hoa khoena nî ǃgâiba-e ǂûn ga o. Jehovab hîna sado ǁkhau hâb ge ǂgui ǃgâi xūn mâ-ai tafelsa aiǂhomiba du hâ sada ǀhaodi tawa. (Psa. 23:5; Mat. 24:45) Tsîb ge sadu ga ǀkhae xūro-e hau o nēsa kaise ra ǃgôaǃgâ. ǁNā-amaga ǃgâise aiǂhomisen tsî hoaǁae ǃeream re. ǁNā ǀgaub ǃnâ du ge Jehovab tafels ai ǀgui ǂû tide xawe ǀkhae xū-e nî hau ǀhaohâb ǀkha du nî ǀgoragu-e. w19.01 8 ¶3; 13 ¶20

Elobmîs ǁaegu ǃnâ î ge ama tama ǃoabade ǁgauoǃnâsiba ge ǃkhōǂgā hâ i. (Hos. 4:13, 14) Nēs ge sorosi ǁoreba gere ǃaroma. Xawe hâ hâ nî ǂkhîba ge mā tama hâ i. ‘ǁNān hîna ǀnî hâ eloga ra ǃoaban ge ǁîn tsûga gere ǂguiǂgui’ dib ge Daviba ge mî. Tsî ǂgui ǀgôan ǃgaos tsîna tsûaǂgaoba gere hau. (Jes. 57:5) Jehovab ge nēsa ge ǃhui hâ i. (Jer. 7:31) Nētsēs tsîna î ge ama tama ǃoabade ǁgauoǃnâsiba ra mā-am. Xawe nē ǀgaub ǀamǂoas ge ǃgâi tama hâ tsî ǃkharu ge ǁaeba xu dawa tama hâ. (1Kor. 6:18, 19) Khoen “tsûn” ge ‘ǂguis’ ǀguisa ra dī ǀnîsits ra ǃgaoǃgâ khami. ǁNās ǀkha ǂkhamkhoedo sa ǀhomsi ǁGûba ǃgâ re. Tsî ǂan ǁîba ǁnâuǀnams sa ǃgâib ǃnâ hâ ǃkhaisa. Sa ǂgaob ǃnâ mîǁgui re tsū xūna dīs ge ǁaerob di turaba ra ǃaroma.—Gal. 6:8. w18.12 27-28 ¶16-18

ǀGui î ga ra ǀai o, o î ge nau î hîna xū-e dī tama hâ-e mîǁguiba nî dī. Jesub ge ge mî ǀai tama hâ i ge ǃgameba a khôa ǁkhā tsî ǁkhawa a ǃgame ǁkhā. (Mat. 19:9) Tamas ka io î ge noxoba a ǀûba ǁkhā. Nēs ge tsū tama hâ. Hoseab ge Gomersa ǁkhawa ge ū-oa. Gomers ge Hoseaba ǃoa a oa sī o, os ge nau khoegu ǀkha ǂharugusa ge mā-amhe tama hâ i. Hoseab ge ǁîs ǀkha gaxūse sorosise ge ǂharugu tama hâ-i. (Hos. 3:1-3) Nēs ge Elob ǀgauba ge ǁgau ǁîb khoenab ǀûba tsî ǁkhawa ǁîn ǀhōsagusisa ra ǃgâiǃgâisa. (Hos. 1:11; 3:4, 5) Nēsa nētsē hâ ǃgamega mati ra tsâǀkhā? Xū-e dī tama khoe-i ga nau khoe-i ǀkha ǁkhawa ga ra ǂharugu o, os ge nēsa ra ǁgau ǁî-i go a ǀûba ǃkhaisa. (1Kor. 7:3, 5) Nēs ge ǃgamekhôasa ga ǃaroma tama hâ. ǁNās khaoǃgâ ra ge ǁîra ǃgameba Elob mûǁae nî ǃgâiǃgâi. w18.12 13 ¶13

Elobmîsa da ga ra ǁkhāǁkhāsen ǁaeb ai da ge a ǂâiǃgâ ǁkhā ǁnās mati hānîǁaeb ǃnâ a hui da ǁkhāsa. ǁNā ǀgaub ǃnâ da ge mîǁgui-e da nî dīs ga ra io, o ǁaeb ai a dī ǁkhā, ǃgomsib ǃnâ ǂgâ tamase. Joseb ge Potifari taras gere ǁgoe-ū bi ǂgao o, o ǃhaese ge ǂkhā. Nēsa dīs ǃnâ-ūb ge Joseba ge ǁgau ǁîb Jehovab ǂâi ǀgauba ūhâsa ǃgameb xa. (Gen. 39:8, 9) Tsîb ge ǁîba Potifari tarasa ge ǃeream: “Mati ta kha ǁnâi nēti ī kai ǂkhaba-e dī tsî nî Elob ǃoagu ǁore?” ǁnās ǃnâ-ūb ge Elob ǂâi ǀgauba ge ūǃoabasen. O sada nētsē? Aiǁgause î ga sîsen-ū du ra khoe-e sadu ǀkha ga ra ǁâǁâsen os? Tamas ka io smsan hîna ǁgoe-ūguba ūhâna ga ra sîba du o? Kaise î ge nî supu nē ǀgauba mâǃoasa ǀnai da ga ǁaeb aiǃgâ ga ra ǂhomisen o tsî Jehovab ǂâi ǀgauba ga ra ūhâ o nēti i mâsib ǃnâ. w18.11 25 ¶13-14

ǀNî khoen ge ǂâi hâ nē ǁaraǃās sao rase ra ǂâibasen di, “ǃgâiaǂgaob ǀkha ta ge Eloba ǃoa nî ūri.” Nēs ge sida ra ǁkhaeǂgao. Jehovab ge ǀō-aisa mîmâidi ǀguite mā da tama hâ xawe ra mîba da ǁîb ǂâibasensa ǃgâi ǀgaub ǃnâ ra dīǀoaǀoa di. Habakuki haisi-ams ge ra ǁgau î da Jehovab ai ǂgomaiǂnûi. (Hab. 2:4) ǂGomǃgâsiba da ge sao ra ǀgaugu ǃnâ a ǀgaiǀgai ǁkhā (1) ǀgores ǃnâ-ū da ge Jehovaba sida ǃgomsigu tsî ǂâiǂhansendi tsîna nî mîba; (2) Jehovab ǀapeǂhomisa xu da ra hō daoǁgaude ǂōrisase nî sao tsî (3) ǂgomǂgomsases tsî ǃnūǃnâxasib ǀkha Jehovab ai nî ǃâu. Habakuki ge nēsa ge dī. ǁÎb ǂkhanisab ge ǃoab ǀkha a tsoatsoa xaweb ge ǂgomǃgâsib tsî ǃgâiaǂgaob tsîn ǀkha ge ǀam. Nē aiǁgausa da ge ǂōrisase nî sao î da Jehovab ǁkhaeǂgaosa hōǃâ. Mâ ǁkhaeǂgaosa da nē eloxoresa ǃhūbaib ǃnâ a hō ǁkhā? w18.11 17 ¶18-19

Sida tsîn ge ǃaromasa ūhâ Elob di ǀnammi xa ǂgaehesa: “ǁNātikōseb ge Eloba ǃhūbaiba ge ǀnam, ob ge ǁîb di ǀguise ǃnae hâ ǀGôaba ge mā, ǁîb ǃnâ ra ǂgomn hoan kāǁō tidese, xawen nî ǀamo ûiba ūhâse.” (Jhn. 3:16) Jesuba mâ ǀnamma ge ǁgau, ǁîb ûibab ge sida ǃgao a mā o? Tsî ǁnā ǀnammi ge kai ǁkhaeǂgaos ase sida ība. Elobmîs ge ra mîmâi “ǂōǂōsib tsî ǁgâiǀāb” tsîkha ge Xristub ǀnamma “xu a ǀgora” da ǁoa. (Rom. 8:35, 38, 39) Sorosises, emosioneelses tsî gagasises tsîna ra khôaǁnā da xūna ǃkham ǃoas ge Xristub ǀnammi xa ra īǁkhā kaihe î da mâǀgai ǁkhā. (2Kor. 5:14) Jesub ǀnammi ge ǀgaiba ūhâ kōǃgâ das diba tsî ra hui da î da tā ǀûsen. Tsūkēǃgâgu, ǁgâiǀāgu, khoexaǃnâ tsûaǂgaogu tsî ǀû tamase ǂâiǂhansens tsîn hoan ǂam-aib ge nî hui da. w18.09 14 ¶8-9

Amab ǃnâ da ga ra hâhâ ǂgao o, o da ge Jehovab ra mîn hoana nî ūǃoa tsî nî ǁnâuǀnam. Amaba da ge ǂgurose sada ûib ǃnâ nî mâi tsî Elobmîs tsoatsoadi ǃoagu nî ûi. Davib khami da ge sada nî mîǁgui Eloba ǃoaba ǀgarasa. Mîǁgui tama da ga ra io, o da ge sada tsîna a ǂâiǃgâ tsoatsoa ǁkhā tae-e da ge a dīsa î da amaba ǁama tsîs ge ǁnāsa a ǃaroma ǁkhā î da ǃâitsâhe tsî Eloba ǃoaba ǀû. ǁNās ǀkha da ge amaba nî ǃkhōǀgara. Mûǂan da ge nî amagu ǁaegu da a ǁhûi ǁoasa, amab ge amas ǀguisa ī. Nēn hoan ǂam-ai da ge “hoaraga amab” ǃnâ nî ǃgû. (Jhn. 16:13) Amaba xu da ga ǂgaeǂhapuhe ǂgao tama ga ra io, o da ge sida ǁaeba ǃgâise nî sîsen-ū. ǂKhaikari tama da ga ra io, o da ge sida ǁaeba ǂanapegase ǁkhoaxa ǁaeba ūhâs, ǁnaetib ase da ra dī xūn, internetsa sîsen-ūs tsî ai-īsiǂhôaǂgares tsîna kōs ai a ǂkhôa ǁkhā. Nē xūn hîna da ǁnaetib ase ra dīn ge tsū tama hâ xawe da ga ǃnāsa ǁaeba ǁîn ai ga ra ǂkhôa o, o da ge Elobmîs khomais tsî ǀnî hâ gagasi ǁaxasigu tsîna a ǂkhābē ǁkhā. w18.11 10 ¶7-8

Sida ûib mâsib ga ra dawa o, o î ge ǀkharaǀkharan hîna da ra hōǃâna emosioneelse nî tsâǀkhā da. (ǂKhm. 12:25) ǁNā ǀkharaǀkharana ūǃoas ge nî ǃgom i. Nēti i ga ra ī o, o da mati ‘sâsa tsî ǃnōsa’ ûiba nî ūhâ? (Psa. 131:1-3) Sida tsîn ge nētsē ǀkharaǀkharan ga ra hâ xawe ‘Elob di ǂkhîba’ a hōǃâ ǁkhā. (Fil. 4:6, 7) Tsûaǂgao da ga ra ǁaeb ǃnâ da ga Jehovaba ǃoa ga ra kō o, o î ge Elob ǂkhîba sida gagasi mîǁguiga nî daoǁgau î da tā ǀûsen. Sâsa tsâsiba mā da tsîb ge Elob gagaba xoadi hîna gagasi xūna ǂgurose mâis ǀkha nî huida di xa ra ǂâiǂâiǃnâ da.—Jhn. 14:26, 27. w18.10 27 ¶2; 28 ¶5, 8

Tae ǃnôa xū-e nētsē sada ǃnāsase ra tsâǀkhā? Nēb ge ǂhumiba. ǁNās ge xū-i hîna ama tama hâ-e mîsa nau khoe-e gaxaǃnâs ǃgao. Tsî ham-e ǂguro ǂhumiba ge ǃhoa? Jesub Xristub ge “ǁGâuaba” “ǂhumib di ǁgûb” di ge ǂgai. (Jhn. 8:44) Mâǁaeb ge ǂguro ǂhumiba ǃhoa? Nēs ge duisend kuriga ǃkharu hâse Edenni ǃhanab ǃnâ ge ī. ǂGuro khoe-aogu ra Adammi tsî Evas tsîn ge, ǁkhoaxase gere ûi Paradais ǃhūbaib hînab ge Kuru-aoba a mā rab ǃnâ. Tsîb ge ǁGâuaba ge sī. ǁGâuab ge ge ǂan-i Elob ge khoe-aogu ra a mîbasa î ra tā “ǁnā hais ǃgâib tsî ǂkhabab tsîkha ǂans dis” xa ǂû xawe ra ge ǁîra ǁnâuǀnamoǃnâsib xa ǃaromahe hâse ge ǁō. Nē ǀaob ge Evasa ge mîba: “Tātsē ro kom ǁō tideo; xawe Elob ge a ǂan, ǁîs xa ro ga ǂû tsēsa xu di saro di mûde nî khowahe ǃkhaisa, o ro ge Elob ǁkhāb khami nî ī, tsî ro ge nî ǂan mâ-i a ǃgâi tsî mâ-i a ǂkhaba ǃkhaisa.”—Gen. 2:15-17; 3:1-5. w18.10 6 ¶1-2

Sida ǂgaoga ǃanuse ūhâs ǃgao da ge ǂganagaba nî ǃanu tsî ǃgâi tsâsigu tsî turagu tsîna nî ūhâ. Sida ǂâide da ge ǃanuse nî ūhâ î da tā gagasise ǀurixa, Jehovab ai da māǁnâsen hâ amaga. (2Kor. 4:2; 1Tim. 1:5) Xawe matin ǁîn hîna ǂgaob ǃnâ a ǃanuna mûhe ‘ǁoasa Elob aisa’ ra ‘mû’? (Eks. 33:20) Grikegowab mîs ‘mû’ di hâs ge “ǂâis ǀkha mûs” di ra ǂâibasen. ǁÎn hîna Eloba ‘ǂgaob di mûs ǀkha ra mûn’ ge ǁîba ama khoeb ase ra mûǂan tsî ǁîb ǀgauga ra ǁgae. (Efe. 1:18) Elob ǀgauga ǂans ǃgaon ge ama Xristeǁîna ǁÎba, ǁîn ǃgaob ra dī xūn ǃnâ-ū nî ‘mû’. (Job. 42:5) Tsîn ge ǁîna ǁîn ǂâidi ǀkha ‘ǂgaob di mûs ǀkha’ Elob mîmâi hâ buruxa ǀkhaega ra mû tsî ǂgomǂgomsase ǁîba ra ǃoaba ǀgara. w18.09 20 ¶13, 15-16

ǂHanu a ti da a ǂan xū-e da ga ra dī o, o da ge kai ǀkhaega nî hōǃâ. Gā-aisib ge ǂans ai a ǃgaoǃgaosa xawes ge nēsa mîǁguigu hîna da hoana da a ǂan o, o ra dīga xu hâ. ǂGoberugu tsîn ge gā-aisiba ūhâ. ǂGoberugu ge gā-aisib ǂansa ūhâ tama hâ, ǁîgu dīgu ge ra ǁgau ǁîgu hānîǁaeb ǃaroma ra aiǂhomisensa. (ǂKhm. 30:24, 25) Xristub ge ‘Elob di gā-aisib’ ǀkha ǀguiǃnâxase ra tanisen tsî ǁnās ǀkha hoaǁae ǁGûba ra ǂkhîǂkhî xūna ra dī. (1Kor. 1:24; Jhn. 8:29) Elob ge ǃkharagagusiba ǃgâi mîǁguiga dī tsî ǁîgu ǃoagu sîsensa a ǂan. Tsîb ge ǁÎba ǁîn hîna ǃgamǃgamsenxase ra mâǀgain tsî amaba ra ûiǂuin tsîna ra ǀkhae. (Mat. 7:21-23) ǁNās ǀkha ǃgarise sîsen re î du sadu gagasi mâsiba ǃgamǃgamsenxasib ǀkha aiǃgû kai. ǂAn da a xūna sîsenǂûis ge ǁaeb tsî ǃgūǃnâxasib tsîna ǂhâ hâ, xawes ge nēsa a ǃgamǃgamsenxasib ǁgauǁgau tsî kai ǂkhîb tsîna ra mā da. w18.09 7 ¶18

Kuru-aob ge ra ǂhâba în ǀoasa kurusa ūhâ tama hâ khoena ǁÎb ǀkha sîsenǀhao tsî ǁÎb ǂâibasensa dīǀoaǀoa. Khoen hoan nēsi ǀoasa kurusa ūhâ tama hâ xawen ge ǂgomǂgomsa khoena noxoba Jehovab ǀkha a sîsenǀhao ǁkhā. Aiǁgause, da ge hoa da “Elob di ǀhaosîsenao” ǃgâiǂhôas Gaosib disa da ga aoǁnâ tsî ga ra ǁkhāǁkhāsabedī o. (1Kor. 3:5-9) Xawe ǂâis ǀguisa dī re, tae-i aiǂhanuba da ūhâsa, Hoaǀgaixa Kuru-aob ǀkha sîsenǀhaosa. Xawe aoǁnâ tsî ǁkhāǁkhāsabedīs ǃnâ-ū ǀgui da ge Jehovab ǀkha sîsenǀhao tama hâ. ǀNî ǀgaugu nēsa da a dīǁkhā gu ge, sida omaris ǁanin tsî ǃgâsan tsîna huis, ǃhaokhoeǃkhōǃoaxasib tsî om sîsengu ǃnâ māsens tsî sida ǃoabasa khoraǂuisa. (Kol. 3:23) Tā sadu Jehovaba a dība ǁkhā xūna ǀnî hâ ǃgâsan dī ǁkhān ǀkha ǀgopeǀnō re. ǂÂis ǃnâ ūhâ re kurigu, ǂurusib, mâsib tsî khoe-i ǁkhāsib tsîn ge khoe-e xu khoe-i ǀkha a ǃkharagagu di. w18.08 23 ¶1-2

Jehovab ge Habakuka ge ǁkhaeǂgao, ǁîba ǃâubasens ǁîb dîde ǃereams disa mās ǃnâ-ū. ǁÎb ǃgomsin ge ǁaeb ǃkharu tama hâse ge ǀam. Elob ge kēbo-aoba ǃoa ge mî: “ǃNūǃnâxa tsî tita ai ǂgomaiǂnûi re. Ti ǃereams ge nî hā ǁaeba i ga ra ū xawe.” Jehovab ge ǁîba ge ǂâiǂâiǃnâ ǁîb ge ǁîb ǁaeb ai mîmâide nî dīǀoaǀoa di. Elob ge Habakuka ge ǀapemā îb ǁîb mîmâide nî dīǀoaǀoa ǁaeba ǃâu. Nēs ge ge ǃaroma îb ǁîba tā tsûaǂgao. ǃNūǃnâxasib ǀkha Elob ai ǃâu tsî ǁîb ra mî xūna ǂōrisase ǃgaoǃgâs ge ǂgomǃgâsiba nî mā da, nēs ge nî hui da î da tsaura ǂgaoba omkhâi ǃgomsina da ga ra hōǃâ xawe. Jesub ge ge mî Jehovab ai da ge ǁaeb Kōǃgâ-aob ase a kō ǁkhā ǁîb “ǁaegu tsî kamagu” hînab noxoba ǂhaiǂhai tama hâgu ai kō tama i tsi. (ǃNǃkh. 1:7) ǁNās ǀkha da ge ǀûsen tide xawe ǃnūǃnâxasib tsî ǂgoms tsîn ǀkha nî ǃâu, sida ǁaeb tsî ǁkhāsib tsîna Jehovaba ǃoabas ǃnâ ra sîsen-ūse.—Mrk. 13:35-37; Gal. 6:9. w18.11 16 ¶13-14

ǂGui Jodeǁîn khamib ge Petruba ge ǂgom tsoatsoa Jodeǁî tama khoen ǃanu tama hâ di. Xaweb ge Petruba xūna ge hōǃâ hîna ge ǁîb ǂâi ǀgauba a dawana. Aiǁgauseb ge Petruba buruburuxa ǁhaposa ge hō. (ǃNǃkh. 10:9-16) Petrub khami da ge nî ôaǃnâsen tsî māsenxase hō da ra huiba nî ǃkhōǃoa î da ǃhaoǃnâbe ǀgorasa sida ǂgaoga xu ǃkhomǂûi. Xawe tae-i tsîna da noxoba a dī ǁkhā? Sida ǂgaoba da ga ra ǁkhowa-am o, o î ge ǀnamma ǃhaoǃnâbe ǀgorasa nî ǃkhōǃkhuni. (2Kor. 6:11-13) Sadu ǃhaos, ǃhūb tsî gowab tsîna ra ǃhoa khoen ǀkha ǀgui du ra hâ? ǁNāti î ga ra ī o ǀnî hâ ǀhōsana ôa re. ǀNî hâ khaoǃhūba xu hâ khoena aoǁnâ sîsen-e ǃoa ǁkhau re tamas ka io sadu omsa ǃoa în sadu ǀkha ǂûǀhao. (ǃNǃkh. 16:14, 15) Nēsa du ga ra dī o, o du ge ǀnammi xa nî ǀoa sadu ǂgaob ǃnâ tsî ǃhaoǃnâbe ǀgorasa ūhâ tide. w18.08 9 ¶3, 6; 10 ¶7

ǀNî ǀgaugu ǃnâs tsînan ge Jehovab di ǀHûǀguitimî-aona ǃhūbaib khoen tanisen ǀgauba ra ǁgae. ǁÎn ǂnā ǀgaub ge Xristeǁî-i nî ī khami ī tama hâ. ǁÎn ge ǁîn ai-īsigu tsî ǃgâi tama xūn tsîna internets ai ra ǃnao. Tsîn ge ǁgai sîsenǂuiba nau ǃgâsan ai a ūhâ ǁkhā hîna ra dītsâna în ǃgâi tanisen ǀgauba ūhâ. (1Pet. 2:11, 12) ǃHūbaib ge ‘ǁgansi turab, mûdi di turab tsî ûib di kaikaisens’ tsîna ra ǂkhâǃnâ. (1Jhn. 2:16) Jehovab di da a amaga da ge ‘eloxoresasib tsî ǃhūbaib di turagu tsîna ǀūxū [ǁnāxū] tsî ǂhanu-aise tsî eloǃaoǃgâxase nē ǃhūbaib ai nî ûi.’ (Tit. 2:12) Sida ǃhoa ǀgaub, ǂû tsî da ra ā xūn, ana da ra xūn tsîn ge khoena nî ǁgau Jehovab ai da māǁnâsen hâsa. w18.07 25 ¶13-14    

Jehovab ai da ga ra kōǀgara o, o da ge nau khoen dīsāde tā nî mā-am în ǁaixa kai da tamas ka io sida ǀhōsagusis Jehovab ǀkha da ūhâsa ǁgaiǁgai. Nēs ge kaise a ǂhâǂhâsa ǀō-aisase da ga Moseb khami aiǂhanuga Jehovab di ǀapeǂhumis ǃnâ ga ra ūhâ o. Xawe ama as ge hoa da ge ‘ǃaob tsî ǀkhūb tsîkha ǀkha sida ǃgâiǃōsiba nî sîsenǂam.’ ǂÂis ǃnâ da ge nî ūhâ Jehovab ge karoǂgaoxa tsî ǃgaridana ǀgaub ǃnâ ǀgoraǃgâ da tama hâ. (Fil. 2:12) ǂGui aiǂhanuga da ga ra ūhâ o, os ge sida ǃereamsa ra kai. (Luk. 12:48) Xawe Jehovaba da ga ra ǀnam o, o î ge xū-e sida Jehovab ǀnamma xu ūbē tide. (Psa. 119:165; Rom. 8:37-39) Nē ǃgom ǁaeb ǃnâ da ge ‘ǀhommi ǃnâ ǂnôab ǃoa’ nî kō, î da ǁîb ǂâis a taesa ǂan. (Psa. 123:1) Sida ǀhōsagusis Jehovab ǀkha da ūhâsa da ge tā nau khoen dīsādi ǃgao nî ǁgaiǁgai. w18.07 16 ¶19-20

Kaise da ge ra ǂkhî mûsa matin Jehovab !oaba-aona ra ǀarosen ǀgauba. 2017ǁÎ Kurib !nâ i ge 10 miliuns xa a !nāsa khoena Elobmîsa gere ǁkhāǁkhā-e. Nēs ra ǁgaus ge Elob !oaba-aon ǁîn !nâba ra !nâ kaisa. Tsî ǂgui khoen hîna da ge Jesub ǁōb ǂÂiǂâisensa !oa a ǁkhaun xas tsîna ǂâi re. ǁÎn ge Elob ge xoremarib ǁguibas !nâ-ū a ǁgau kai ǀnammi xas tsîna ge ǁkhāǁkhāsen. (1Jhn. 4:9) Jehovab !oaba-aon ge !hūbaib ǂhawase !kharaga!nâgu gowaga ra !hoa. Xawes ge nēsa ǁîna ǀgui!nâxasib !nâ Jehovaba !oabas !nâ ǀgora tama hâ. (J.ǂHa. 7:9) ǀNî hâ ǁgûsi gowab tamas ka io da ra hâ!khais hoas ǂam-ai da ge “ǃhūbaib di ǃnân ase” ra ǃnâ ǂgao. (Fil. 2:15) !Oaba-aon ra ǀarosen ǀgaub, ǀguiǃnâxasib hîna da ra hō!âb tsî ǂkhaikarise hâs !nâ-ū da ge ra dītsâ Jehovaba ǂkhaisiba ǁgausa. w18.06 21 ¶1-3

Jesub ge a ǃeream ǀgaub ge ge ǁgau gagasi xūn aib ǂgomaiǂnûi hâsa. Aoǁnâs ǃnâ-ūb ge Jesuba ǁîb ǁGûb ǂâisa gere dī tsî Samariaǁî kaikhoesa ge aoǁnâba nēs ge ǁîba ǂû-i khami ge tsâba i. (Jhn. 4:32-34) Jakobub tsî Johaneb tsîn ge nēsa ge ǁnâuǃā tama hâ i. Jesub ǀkha gu ge Samaria ǃhūb ǃnâ hâ io, o gu ge ǁkhāǁkhāsabega ǃuia hâ ǃkhai-e gere ôa. Samariaǁîn ge ǁîga ǃkhōǃoa tama hâ i o, o kha ge Jakobub tsî Johaneb tsîkha Jesuba ge ǂgan î-i ǃāsa ǀaeb ǀkha dīkākāhe. Jesub ge ǁîkha ge ǀâxare. (Luk. 9:51-56) Jakobub tsî Johaneb tsîkha nē tanisen ǀgauba ga ūhâ nēs ga ǁîkha ǃā hâ o Galileab ǃnâ? ǃHaoǃnâbe ǀgoras ge ǁîkha ǃhuiba ge ǀgaiǀgai. Apostel Johaneb ge ǁîb tanisen ǀgaub ǃgao gere tao egab ge Samariaǁîna gere aoǁnâba o.—ǃNǃkh. 8:14, 25. w18.06 10-11 ¶12-13

Amaba da ga sida ǂgaogu ǃnâ ga ra ūhâ o, o da ge nē amab ǃoagu nî ûi tsî hoaǁae amaba nî ǃhoa. Tae-i ǃaroma da ǂhumiba ǃhoa tide? Satanni ge hoaǁae ǂhumib ǃnâ-ū ra ǂgaeǂhapu da. ǂHumiba ra ǃhoa khoe-i tsî ǂhumiba ra ǂgom khoe-i tsîn ge ǂhumib xa a ǁgaiǁgaihe ǁkhā. (Jhn. 8:44) Hoaǁae da ge nî ǁgūtsâ ǂhumiba xu ǂgōsensa. (Efe. 4:25) Xawes ge nēsa a ǃgom dīsa. Abigails hîna a 18 kurixas ge ra mî: “Amaba ǃhoas ge hoaǁae ǃgâise mûsen tama hâ, tsū mâsiba xuts ga ra ǂoa ǂgao o.” Tae-i ǃaroma da amaba nî ǃhoa? Amaba ta ga ǃhoa o, o ta ge Victoria di ǀon hâ ǃgâsas hîna a 23 kurixas ge mî khami nî tsâ: “Amabats ga ǃhoa tsî sa ǂgomsa ga ra ǁkhauba o, ots ge khoen xa ra ǁorehe. Xawets ge nēsa xu a ǀama ǁkhā ǂgomǃgâsibats ge ra omkhâi tsî Jehovaba ǃoa ra ǀgū tsî ǃgôasiba khoen hîna a ǀnam tsîna xu ra hō.” Nēs ge ra ǃaroma î da hoaǁae ‘kamanagu âda amab ǀkha ǃgaeǂnami.’ w18.05 28 ¶3, 5

Nē ǁaeb hîna da ûi ǃnâ hâb ra ǁgaiǂoa amaga da ge ǂkhaikari nî hâ. Jehovab ge ǂhanu ǁaeb ai ǀamsa nî ǀkhī-ū. (Mat. 24:42-44) Xawe da ge nî ǃnūǃnâxa tsî hoaǁae ǂkhaikarise nî hâ. Elobmîsa da ge tsēs hoasa nî khomai tsî ǀgores ǃnâ nî hâhâ. (1Pet. 4:7) ǃGâsan aiǁgaude ǃgaoǃgâ re hîna ǁîn ûib ǃnâ ǂkhîba ra hōǃâna ǂkhaikari hâs ǃnâ tsî ǁîn ǃnâba noxoba ra ǃnâ kaina. Sadu ûiba ǃgâi ǀhōsan tsî ǁkhoaxa ǁaxasib ǀkha omkhâi re. Nēs ge kai ǂkhîba nî mā du tsîb ge ǁaeba ǃhaese nî ǃkharu. (Efe. 5:16) Sida ǂgoms ge ra ǀgai Jehovaba da ǀoasa kurusa da ūhâ tama hâ xawe a ǃoaba ǁkhā ǃkhais ǃgao. Jehovab ge ‘khoega mādi’ ase ge mā ǁnāgu ge ǀhaohâb ǃûi-aoga tsî da ge ǁîga nî ǃgôaǃgâ. (Efe. 4:8, 11, 12) ǁKhawa î ga ǀhaohâb ǃûi-aoga ga ra sari du o, o ǁnā ǃēsa ū tsî ǁîgu gā-aisib tsî ǀapemādi tsîna xu ǃgâiǃō re. w18.06 24-25 ¶15-18

Jesub ge ǁîb ǁkhāǁkhāsabega ge mîba î gu tā ǁîb ǀnammi ǃnâ ǀgui ǃgû xawe ǁîb ǀnammi ǃnâ “hâhâ.” Tae-i ǃaroma? Xristub di ǁkhāǁkhāsabese kuriba xu kurib ǃnâ ǃgûs mâǀgaisa ǂhâ hâ amaga. Jesub ge mâǀgais a ǂhâǂhâsa ǃkhaisa ge ǁguiǃā ǁnās ǃaromab ge “hâhâ” di hâ mîsa Johaneb 15:4-10 ǃnâ ǂgui ǃnāde ge sîsen-ū. Mati da a ǁgau ǁkhā Xristub ǀnammi tsî ǁîb ǃgâib ǃnâ da ra hâhâ ǂgaosa? ǁNās ge ǁîb mîmāde ǁnâuǀnams ǃnâ-ū. Aiǁgauseb ge Jesuba ra mîba da ‘tita ǁnâuǀnam re.’ Jesub ge ǁîb ge dī hō xū-i ǀgui-e ra ǂgan da î da dī tsîb ge ra ǀaro: “Tita ti Îb di mîmāde dī tsî ǁîb di ǀnammi ǃnâ ra hâhâ khami” dī re. Jesub ge amase ǃgâi aiǁgausa ge ǁgau da. (Jhn. 13:15) Jesub mîmās ǃgû ǂoa tsî aoǁnâs disa ǁnâuǀnams ǃnâ-ū da ge ra ǁgau ǁîba da a ǀnamsa. Tsî Jesub mîmās ǃnâ-ū da ge ǁîb ǁGûb ǂâi ǀgauba ra mû. (Mat. 17:5; Jhn. 8:28) Sida ǁîkha ǀnamma ra ǁgaus ǃnâ-ū kha ge Jehovab tsî Jesub tsîna ǁîkha ǀnammi ǃnâ ra ūhâ da. w18.05 18 ¶5-7   

ǂKhamkhoen ge skoli, sîsen-i tsî ǀnî hâ ǃâgu ûib digu ǃnâ mîǁguiga nî dīse i. ǂHanu mîǁguigats ga tsoatsoasa xu ga ra dī o, ots ge ǀunis ai ǃgâi mîǁguiga nî dī. Kaise nî ǃgâis ge ǀnai ǁaeb aiǃâ mîǁguiga dīsa. Sida ǀhaohâgu ǃnâ î ge ǂgui ǂkhamkhoena koahesa anu hâ. ǁÎn Jehovab ǃoa kō tsî ǃgâi gagasi mîǁguiga ra dī amaga. ǁÎn ge ǂkhamsis ǃnâ ǁkhoaxa ǁaeba ra ūhâ xawe nauǀkhāb ais tsîna Jehovab ǃoa ra kō daoǁgauhes ǃgao. Nēs ge omaris ûib tsîna ǃkhōǂgā hâ. Salomob ge ge mî: “ǂGomaiǂnûi ǃKhūb ai sa ǂgaob hoab ǀkha, ǁîba ǂan sa daogu hoagu ǃnâ, ob ge ǁîba daogu âtsa nîra ǂhauǂhau.” (ǂKhm. 3:5, 6) Sadu ǀhaohâb ǃnâ hâ ǂkhamkhoen ge kaise a ǀō-aisa Jehovab mûǁae. Jehovab ge ǁîna kaise a ǀnam ǁnās ǀkhab ge ǁîna ǁkhauba, daoǁgau tsî ra ǀkhae. w18.04 26 ¶7; 27 ¶9

Apostel Johaneb ge ǃkharu ge ǁaeb Xristeǁîna gere ǂkhâǃnâ. ǁÎb ǀō-aisa ǃGâiǂhôas xoadi hînab Jesub aoǁnâ sîsenni xa xoa hâdi ge Xristeǁîna nētsēs kōse ra ǁkhaeǂgao. ǁÎb ǃGâiǂhôas ǂkhanis ge ra ǁgau Jesub ge mîsa ǀnammi ge ama ǁkhāǁkhāsaben ǁgauǁgaus ase nî ī di. (Jhn. 13:35) Johaneb ǃnona ǂkhanidi ge ǀō-aisa amaba ūhâ. ǁOreb xa da ga ǂkhabuǂâi o, ǃgâiaǂgao tama i da hâ khomai da ra o “tsî ǀaob Jesub Xristub . . . dib ge ǁoren hoana xu ra ǃanuǃanu da” di. (1Jhn. 1:7) Sida ǂgaob ga ra ǀgoraǃgâ da o, o da ǃgâiaǂgao tama hâ ‘Elob sada ǂgaob ǃgâ-ai a kai’ di da ra khomai o? (1Jhn. 3:20) Johaneb ge ge xoa “Elob a ǀnam” di. (1Jhn. 4:8, 16) ǁÎb ǀgamǁî tsî ǃnonaǁî ǂkhanidi ge Xristeǁîn hîna ‘amab ǃnâ ra ǃgûna’ ra koa.—2Jhn. 4; 3Jhn. 3, 4. w18.04 18 ¶14-15