Maarti

Genesis di ǂguro ǀgam danaǃâra ǃnâ da ge Adammi tsî Evas tsîn gere hōǃâ ǃnorasasib xa ra khomai. ǁÎra ge ǃao tama i tsî ge ǁgâiǀāhe tama hâ i. Xawen ge khoena ǁnāsa nētsē ūhâ tama. Nē khoe-aogu ra ge ǂû-i, sîsenni, ǀaeb tamas ka io ǁōb ǃaroma ge ǂâiǂhansen tama hâ i. (Gen. 1:27-29; 2:8, 9, 15) ǃNorasasib tawa i ga hā o, o da ge ǂâis ǃnâ nî ūhâ Jehovab ǀguib ge ǀamhe ūhâ tama hâ ǃnorasasiba ūhâ. Tae-i ǃaroma? ǁÎb ǀguib ǀguri a ǀhommi tsî ǃhūbaib di Kuru-ao tsî ǂGaeǂgui-ao amaga. (1Tim. 1:17; J.ǂHa. 4:11) ǃHūbaib tsî ǀhommi ǃnâ hâ kurusaben hoan ge ǀgui ǀgaub ǃnâ ǃnorasasiba ūhâ. ǁÎn ge ra ǂanǃgâ Jehovab ǀguib ǀguri aiǂhanuba ūhâsa mîsa tae-i a ǂhanus, ǂhâbasa tsî a ǃgâisa. Nēsab ge Jehovaba ǂguro kurub ge khoe-aogu ra ge ǁgau. w18.04 4 ¶4, 6

Nē ǁaeb hîna da ûiǃnâ hâb ǃnâ da ge Jehovab huib ǀkha ǀgui a mâǁapo ǁkhā. (2Kor. 4:7, 8) Xawe ǁnān xa ǂâi re hîna nē ǃhūbaib ǃnâ ǃgâi ǀhōsagusisa Jehovab ǀkha ūhâ tama hâna. Jesub khami da ge ra ǀkhom nî tsî ǁnās ǀkha ‘ǃgâi ǂhôa-e ra’ mā nî ǂgao. ǃNūǃnâxa re ǁnān hîna du ra ǁkhāǁkhān ǃoagu. ǂÂis ǃnâ ūhâ re ǁîn ge amaba ge ǁnâu tama hâ i tsîn ge ǁîna nēsa a ǀū. Tsîn ge ǂguina noxoba ǁîn di ǂgom ǀgauba a ǀnam. ǁÎn ge ǁîn ǂgomsa ǂhâǂhâsase ra mûǂan hîna ǁîna ra ǀguiǃnâxa kaisa omaris, ǃhaos tsî ǀhûhâsib ǁanin ase. Khoena da ǁîn ‘ǀoro’ ǀgauga xu nî ǂgō kais aiǃâ da ge aibe ǁîna nî hui în ‘ǀasa’ Elobmîs tsoatsoadi hînan ǁîna a ǀū de ǂan tsî ǀnam. Nē ǀkharaǀkharana dīs ge ǁaeba a ūǁkhā.—Rom. 12:2. w19.03 23 ¶10, 12; 24 ¶13

Jehovab aiǁgaus ǀnammi tsî ǁîb ǀGôaba ūǃoas tsîn dis ge ra hōhōǃnâ da î da nau khoena ǃēsa da ga hō o, o ǂkhâǃnâ. (Jhn. 5:20) Kaise da ge ra ǃgâiaǂgao ǀnam da a khoe-i ga ǀnamma ga ra ǁgau da tsî ǃgâi xūn hîna da ra dīn ǃgao koa da o. ǁNās ǁkhās khami î ge sida ǃgâsan hîna ǀhaohâb ǃnâ hâna sida ǀnammi tsî ǂkhâǃnâs tsîna ǂhâ hâ. Nau ǃgâsana da ga koa o, o da ge ǁîn ǂgomsa ra ǀgaiǀgai tsî ǁîna ra hui în Jehovaba ǂgomǂgomsase ǃoaba. ǁGûn ge ǃgōsase ǁîn ǀgôana nî ǂkhâǃnâ. ǁGûn ga ǁîn ǀgôana ga ra koa o tsî ǀnamma ǁgau o, on ge ǀgôana ra ǀgai. “ǃGâiǃgâibasensa ta ūǃnâ hâtsa.” di hâ mîdi ge ra ǁgau Jehovab ge ǂgomǃgâsiba ūhâ isa Jesub ǂgomǂgomsase ǁîb ǁGûb ǂâisa nî dīsa. Jehovab ge ǁîb ǀGôab ǃnâ ǂgomǃgâsiba ūhâ ǁnās ǀkha da ge sida tsîna Jesuba nî ǂgomǃgâ Jehovab mîmâideb nî dīǀoaǀoasa. (2Kor. 1:20) Jesub aiǁgausa da ra kō o, o da ge ra ǂkhâǃnâ-e ǁîba xu ǁkhāǁkhāsen tsî ǁîb ǂaidi ǃnâ ǃgûsa.—1Pet. 2:21. w19.03 8 ¶3; 9 ¶5-6

ǀKhaehe da go xū-i ra ǂgan marisa da ga ǂan o, o da ge mā-ao-e ra gangan. Israelǁaes ge Jehovab ge ǁîna a mā ǃnorasasiba ge ǃgôaǃgâ tama hâ i, Egipteba xun ge ǃnora kaihe o. ǂGui ǁkhâgu tsîn ǃkharu tama hâ hînan ge Egipteb ǃnân gere ǂû tsî ā xūna ge ǁkhore tsoatsoa. Tsî Jehovab ge mā nî xūna ge ǃgôaǃgâ tama hâ i tsî Egipteba ǃoa gere oa ǂgao. ǁÎn ge ‘ǁaun, komkommer an, waatlemun an, tsuibel an tsî knoffel an’ tsîna Elob ge ǁîna a mā ǃnorasasib ǁîba ǃoabas dib ǂamai ge mâi. Buruxa-e Jehovab ge nē ǁaes ǀkha a ǁaixa ǃkhaisa? (Num. 11:5, 6, 10; 14:3, 4) Tae-e da go nēpa xu ǁkhāǁkhāsen? Apostel Paulub ge Xristeǁîna ge ǂkhâǃnâ în tā Jehovab ge Jesub ǃnâ-ū a mā nî ǃnorasasiba ǁause ǃgôa.—2Kor. 6:1. w18.04 9-10 ¶6-7

Hoa da ge ra ǀnam-e ǂgao. Tsî ǃgâi ǀgaub ǃnâ ra hâ-ūhe ǂgao. Hoaǁae da ga ǀnamma ǁgau-e tama io tsî ǂhanu-aisib tsîna, o da ge xū-ose a tsâ ǁkhā. Jehovab ge a ǂan ǀnammi tsî ǂhanu-aisib tsîna da ra ǂgaosa. (Psa. 33:5) ǂAn da ge nî sida Elob a ǀnam da ǃkhaisa tsî ra ǂgaosa i da ǃgâi ǀgaub ǃnâ hâ-ūhe. Nēs ge Jehovab ge Israelǁaesa Moseb ǃnâ-ū a mā ǂhanub ǃnâ-ū ra mû-e. Moseb ǂhanub xa da ga ǁkhāǁkhāsen o, o da ge sida ǀnamǀnamxa Elob Jehovab tsâsigu xa ra ǁkhāǁkhāsen. (Rom. 13:8-10) Mî ǁkhā da ge a Moseb ǂhanub ge ǀnammi ai ge ǃgaoǃgaosa i di, Jehovab ra dī xūn hoan ǀnammi xa ra ǂkhâǃnâ-e amaga. (1Jhn. 4:8) Jehovab ge nē ǂhanuga ǀgam mîmāra ai ge ǃgaoǃgao—Eloba ǀnams tsî ǀgūkhoena ǀnams. (Lev. 19:18; Deu. 6:5; Mat. 22:36-40) Mâ 600 xa ǃnāsa mîmādi ǂhanub didi ge Jehovab ǀnammi xa ra ǁkhāǁkhā da. w19.02 20-21 ¶1-4

Jobi ge ǁîb tara tama tarekhoede xu gere ǂgōsen. (Job. 31:1) ǁÎb ge ge ǂan i ǂhanu tama i hâsa ǁîb tara tama tarekhoedi ǀkha ǂhâbasa tama ǂgui ǁaeba ūhâsa. Nētsēs ǃhūbaib ge ǁgoe-ūgub di ǃâitsân ǀkha ra ǃâitsâ da. Jobi khami da ǃgame tama da hâ khoe-e ǃoa tā kōsa nî mîǁgui. (Mat. 5:28) Nē xūna xu du ga ǂgōsen o, o du ge sadu ǂhauǃnâsiba nî ǀgaiǀgai tsî nî ūhâ ǀgara. Jobi tsîn ge Jehovaba ge ǁnâuǀnam ǃkhūsibab ra mû ǀgaub ǃnâ. Jobi ge ge mûǂan ǁîb ǂgomǃgâsibab ga ǃkhūsis ǃnâ mâi o, ob ǁōb ǀkha a ǁkharahe ǁkhā ǃkhaisa. (Job. 31:24, 25, 28) Nētsē da ge ǃkhū ǂgaos ǀguisa ra hî khoen xa ǀoahe hâ ǃhūbaib ǃnâ ǁan hâ. Elobmîs ǂâi ǀgauba du ga mari-i tsî ǃhūbaib xūn ai ūhâ o, o du ge ǀgaiǀgaisen tsî sadu ǂhauǃnâsiba a ūhâ ǀgara ǁkhā.—ǂKhm. 30:8, 9; Mat. 6:19, 20. w19.02 6 ¶13-14

Jesub ge Jehovab sida ūba hâ ǀnamma dīb gere xūn hoan ǃnâ gere ǁgau. (1Jhn. 4:8-10) Jesub ge ǁîb ǂgaoba xu ǁîb ûiba sida ǃgao ge mā. ǂKhauhesan ǀgui tamas ka io da ga “nau gūn” ǀgui-i xawe da ge hoa da Jehovab tsî ǁîb ǀgôab tsîn ge nē ǁguibas ǃnâ-ū a ǁgau da ǀnamma xu ra ǀama. (Jhn. 10:16; 1Jhn. 2:2) Jesub ǁōb ǂâiǂâisens tawa gere sîsen-ūhe ǀkhuruǀkhuruhe tama pereb tsî ǂauxûi-i tsîn xa ǂâi re, nēs ge Jesub ǀnammi tsî ǁîb ǁkhāǁkhāsabegu ǃnâb ūhâ ǃgâiǃgâibasens tsîna gere ǁgau. Mâ ǀgaub ǃnâ? Jesub ge ǁîb ǂkhauhesa saosabenab a ǀnam ǃkhaisa ge ǁgau supu tsî ǀguiǃgupu ǃuiǂûsa ǂnûiǂgās ǃnâ-ū. ǁAeb ra ī khamin ge nē ǂkhauhesa ǁkhāǁkhāsabena nē ǂâiǂâisensa kurib hoaba ge tsēdī tsoatsoa, nēsan ge ǃgom ǁaegu ǃnâs tsîna ra dī. (J.ǂHa. 2:10) ǁÎna Jesuba gere ǁnâuǀnam? Îo, ǁîn ge gere ǁnâuǀnam. Nētsēs kōsen ge ama Xristeǁîna ra ǁgūtsâ Jesub ǁōba ǂâiǂâisensa. w19.01 24 ¶13-15

Nē ǃnorasasib ge ama tama ǂgomde xu ǃnora kaihesa ǃkhōǂgā hâ. Tsî ǃnāsa xūn tsîna noxoba ǃkhōǂgā hâ. Nēs ge ‘Elob ôan ǂkhaisib di ǃnorasib’ tsîna ǃkhōǂgā hâ. (Rom. 8:21) Nē ǃnorasasiba nēsis tsîna tsâ re Xristub mîs tsî ǁkhāǁkhādi ǃnâ hâ hâs ǃnâ-ū. (Jhn. 8:31) Nē ǀgaub ǃnâts ge “amaba nî ǁnâuǃā” tsî nēs ǃoagu nî ûi. Nētsē î ge ǃgâi ǁaeba ūhâsa ǀhape ǁaeba hâ tama hâ. ǁAris tae-e nî hausa da ge a ǀū. (Jak. 4:13, 14) ǁNās ǀkha ‘ǀamo ûiba’ ǃoa ra ī daob ai hâ re. (1Tim. 6:19) Elob ge ǁgari tsi tama hâ nē daoba saosa. Sats ge aitsama nî mîǁgui. Jehovaba sa “ǃhana” kai re. (Psa. 16:5) ǁÎb ge mā tsi “ǃgâi xūn” ǂguina ǃgôaǃgâ re. (Psa. 103:5) Tsî ǂgomsa ūhâ re ǁîb “ǀoasasib ǃgâiaǂgaob” tsî ǂkhîba “ǀamos kōse” nî mā tsi ǃkhaisa.—Psa. 16:11. w18.12 28 ¶19, 21

Hoa Xristeǁîn ge ǃgameba nî ǃgôaǃgâ Jesub tsî Jehovab tsîn khami. ǀNî khoen ge nēsa dīhō tama hâ, ǀoasa kurusa da ūhâ tama hâ amaga. (Rom. 7:18-23) ǃKharu ge ǁaeb ǃnân ge ǀnî Xristeǁîna ǃgameb ǃnâ ǃgomsina ūhâ i ǃkhais ge buru kai da tide. Paulub ge ge xoa “taras aoba xu ǀgora tidesa” xawes ge nēsa ǀnî ǁaeb ai ra ī. (1Kor. 7:10) Paulub ge ge ǁguiǃā tama hâ i nē ǀgoras ge tae-i xa a ǃaromahesa. ǃGomsib ge aob tawa ge hâ tama hâ i, hîna ge ǂhauǃnâ tama hâ îba. Paulub ge ge mî taras hîna ǁîs aoba xu ra ǀgoras ge “ǃgame tamase hâ, tsî ǁnā tamas ka io, as aob ǀkha ǂkhîbagusa dī.” ǁÎra ge Elob mûǁae noxoba ǃgame hâ. Paulub ge ge ǀapemā ǀaib ga ra ǀkhai io, o ra ge nî ǀûbagu di. ǁÎra ge huiba ǀhaohâb ǃûi-aoga xu nî hō. w18.12 13 ¶14-15

Nētsēb ge Eloba ra ǂgao în ǁîb ǃoaba-aona ǁîb ǀkha ǃgâi ǀhōsagusisa ūhâ tsî ǁîb sîsenni ǃnâ ǃnāsase ǁhao. (Mat. 28:19, 20; Jak. 4:8) Khoen ge nēsa xu a ūbe da ǁkhā. Aiǁgause, î ge ǀnîsi sadu ǀhōnkhoe-e ǀgapi ǃharosa sîsenni tawa go mā du hîna sadu gagasi ǁaxasigu ǁaeba nî ūsa? Tamas ka io du ge ǀnîsi skoli ǃnâ hâ tsî go ǂganhe î du ǀnî hâ skola ǃoa ī hîna ǀgapi ǁkhāǁkhāsa ūhâba. ǁNā ǁaeb ǃnâ du ge ǀgore hâse nî ôaǃnâ tsî ǀnî hâ khoen tsîn ǀkha nēs xa nî ǃhoa. Tae-i ǃaroma du nēsi Jehovab ǂâi ǀgauba nēs xa nî ūhâ? Tsî du ga nēti ī mâsib xa ga ra hāǂāmhe o, o du ge a ǂan nēs ǃâitsâ tama hâsa. Sadu gagasi mîǁguiga du ge dī hâ tsî sadu ǂgaob tsîn ge a ǂhomisa, nēn hoan ge nî ǃaroma î du ǃgâi mîǁguiga dī. w18.11 27 ¶18

Salomob ge axaros ǀguisab i hîna ge Isrealǁaes di gao-ao kai. ǁÎb ǂgaeǂguis di tsoatsoas ǃnâb ge ǁhawosa ge ūhâ i: “ǂGaoǀkhā te re, tare xū-e ta nî mā tsi ǃkhaisa.” Ob ge Salomoba ge mî: “Tita ge a ǂkham ǀgôa, tsî ta ge ǂgâs kas, ǂoas kas hoasa a ǀū. . . . Sa ǃgāta ǁnâi ǁnâuǃāxa ǂgaoba mā, sa ǁaesa ta nî ǂhanuǂhanu ǁkhāse.” (1Gao. 3:5-10) “ǁNâuǃāxa ǂgaoba”—ǃGâi xū-eb ge ge ǂgan. Nēs ǃaromab ge Jehovaba Salomoba, ge ǀnam i. (2Sa. 12:24) Elob ge nē ǂkham gao-aob di ǃereams ǀkha kaise ge ǂkhî i tsî Salomoba, “gā-ai tsî ǁnâuǃāxa ǂgaoba” ge mā. (1Gao. 3:12) ǁNâuǀnamxaseb ge hâ amagab ge Salomoba ǂgui ǀkhaega ge ǃkhōǃoa. ǁÎb ge aiǂhanuba ge ūhâ i omma “ǃKhūb, [Jehovab, NW] Israeli di Eloba” ombasa. (1Gao. 8:20) ǁÎb ge ǁîb gā-aisib ǃgao ge ǂansa i. Elob xab gere daoǁgauhe o, ob gere ǃhoa xūn ge ǃnona ǂkhanidi Elobmîs didi ǃnâ a xoasa. Nē ǂkhanidi ǀguis ge ǂKhoamîdi ǂkhanisa. w19.01 14 ¶1-2

ǀNî khoen ge nau khoe-e ǁî-i ǂâi ǀgauba ǀkharaǀkharas tamas ka io ǂgaeǂhapusa mā-am tama hâ. ǁÎn ge ra mî “tita ge aitsama a ǂâibasen ǁkhā.” ǁÎn ge nēs ǀkha ǀnîsi ra ǂâibasen ǁîn aitsama mîǁguiga a dībasen ǁkhāsa. ǁÎn ge ǂgao tama hâ nau khoe-i xa ǂgaeǂguihesa tsîn ge nēs ǀkha aitsama ra mâbasen ǂgao. ǂÂis ǃnâ da nî ūhâs ge sida ǂâi ǀgauba da ga Jehovab dib ǀkha ga ra ǀguiǃnâxa kai o, os ǁnāsa ǂâibasen tama hâsa sida ra tsâ ǀgaub tamas ka io ra ǂâi ǀgauba da nî dawa di. 2 Korinteǁîn 3:17 ge ra ǁgau, “ǃKhūb di Gagab hâpa, ǁnāpab ǃnorasiba” hâsa. Sada ge ǁnā aiǂhanuba ūhâ ǂgao da ra ǀgauga omkhâisa. Sada ge ǁkhoaxabahe da a xūna ǃnorasase ǁhûi ǁkhā. Jehovab ge di a kuru da amaga. Xawe da ge aitsama ǁhûibasens ǃnorasasiba ǃgâi ǀgaub ǃnâ nî sîsen-ū. (1Pet. 2:16) ǃGâin tsî tsūn ǁaegu ǁhûis tawa î ga ra hā o, o da ge Jehovab ǂâi ǀgaub xa ra daoǁgauhe ǂgao ǁîb mîsa xu. w18.11 19 ¶5-6

Amab ǃnâ da ga ra ǃgû ǀgara ǂgao o, o da ge ǃkhūsisa ǀnōsa ǀgaub ǃnâ nî ūhâ. Amab xa da ge ǁkhāǁkhāsen o, o da ge ǃkhūsisa ǀgamǁîse ge mâi tsoatsoa tsî gagasi xūna ǂgurose. Kaise da ge ra ǂkhî ǃkhū ǂgaos di turaba xū tsî da amab ǃnâ ra ǃgû ǀgarasa. Xawe da ge ǀnîsi ǁaeba xu ǁaeb ǀkha ra mû nau khoen ra ǁama îsa elektronise xūn tsî matin ǁîn ǃkhūsisa xū ra ǀama ǀgaub tsîna. Tsîs ge nēsa a dī ǁkhā î da ǂâi ǁkhoaxa xū-e da ra ǂoaǃnâsa. Tsî î ge a ī ǁkhā î da gagasi xūna ǁnāǃgâ tsî ǃkhūsisa ǀhaoǀhaobasen tsoatsoa. Nē ǀgaub ge Demab di aiǁgaus xa ra ǂâi kai da. ǁÎb ge ‘nē ǃhūbaiba’ kaise ge ǀnam tsîb ge nēs ǀkha apostel Paulub ǀkhab gere dī aoǁnâ sîsen-e ge ǁnāxū ǃnâ. Tae-i ǃaromab ge Demaba Pauluba ǁnāxū ǃnâ? Elobmîs ge mî tama hâ ǁîb ge ǃkhūsisa gagasi xūn xa ǃnāsase ǀnam isa tamas ka iob ge Paulub ǀkha māsenxase a ǃoaba ǀûsa. ǁNās ǀkha da ge ǃkhū ǂgaos di turaba ûiûi kai ǂgao tama hâ tsî mā-am tide îb ǁnā ǃkhūsis di turaba amaba da ūba hâ ǀnamma ǃkhai kai. w18.11 10 ¶9

ǁGâuab ǂhumib ge ge ǁgauoǃnâ i, ǁîb ge ǂan i amaga Evas ga ǁîba ǂgom tsî ǁnā ǂûsa ga ra ǂû o, os nî ǁō ǃkhaisa. Evas tsî Adammi tsîn ge Jehovaba ge ǁnâuǀnamoǃnâ tsî nēs ǀkha ge ǁō. (Gen. 3:6; 5:5) Tsî ǁnās tsîn ge ge ǃaroma îb ‘ǀgui khoeba xu ǁoreba ǃhūbaib ai hā.’ Tsîb ge “ǁōba . . . , gere gaosîsen, ǁnān tsîn ǂama, ǁkhā ǃûǂams ǀkha ǁore taman Adammi khami.” (Rom. 5:12, 14) Khoesib ge ǀoasa kuriga ǃhūbaib ai ǀamosib kōse ga uî hâ xawe nētsē “hûdisi kuriga . . . khoe-i ga kaise ǀgaisao” tamas ka io ǁkhaisadisi kuriga. Xawes tsînab ge ûiba noxoba “ǀhupub tsî ǃoab tsîkha” xa ǀoahe hâ. (Psa. 90:10) Nēs ge ǁGâuab di ǂhumib xa ge ǃaromahe. Jesub ge ǁGâuab di dīga sao rase ge ǁguiǃā: “Tsîb ge amab ǃnâ mâhō tama ge i; ama-i xare-i ǁîb ǃnâ hâ tama hâ xui-ao.” (Jhn. 8:44) Tsîb ge amaba noxoba ǁGâuab ǃnâ hâ, ǁîb noxoba ra aiǃgû amaga ‘ǃhūbaib hoaragaba ǂgaeǂhapus’ ǃnâ. (J.ǂHa. 12:9) Xawe da ge sada ǁGâuab xa ǂgaeǂhapuhe ǂgao tama hâ. w18.10 6-7 ¶1-4

ǁÎn hîna ǂgurose hoaǁae ǂkhîba ra sauruǃgon ge a ǂkhî. Jakobub ge ge xoa: “Tsîb ge nē ǂûtanib ǂhanu-aisib diba ǂkhîbagusa ra dīna ǂkhîb ǃnâ ra tsorobahe.” (Jak. 3:18) ǀNîsi da ga sada ǃgâsa-i tamas ka io omaris ǁani-i ǀkha ga ra ǁnâusāgu o, o da ge Elob ǃoa ǀgore tsî nî ǂgan bi îb hui da î da ǂkhîb kuru-ao kai. Jehovab ǃanu gagab, ǂhanu tanisen ǀgaub tsî ǂkhîb tsîn ge nî ǂgaeǂgui da. Jesub ge ǂkhîba kurus ǃgao sao rana ge mî: “Sa māsats ga altars ǃoa sī-ū, tsîts ga ǁnāpa ǂâihō, ǃgâsa-i âts sa ǃoagu ǀauxū-e ūhâsa, ǁnâi mās âtsa altars aiǃâ ǁnāxū î ǃgû, î aibe ǃgâsa-i âts ǀkha ǀûbagusa dī, îts ǁnāǃnubai sa māsa hā ǁguiba.”—Mat. 5:23, 24. w18.09 21 ¶17

ǁŌb nî ǃuis aiǃâb ge Jesuba ǁîb ǁkhāǁkhāsabegu ǀkhab ge hâ i o, ǁaubexa 30 ǃnāde ǀnam di hâ mîsa gere sîsen-ū. Jesub ge ǁîb ǁkhāǁkhāsabega ge mîba îgu “ǀnamgu.” (Jhn. 15:12, 17) ǁÎgu ūba gu hâ ǀnammi ge nî mâǂoa tsî ǁîga nî ǀgora ǁÎb ǁkhāǁkhāsabegu ase. (Jhn. 13:35) Nē ǀnammi ge ǃkhāǃkhā tama hâ. Jesub ge ǀō-aisa tsî māsenxa ǀnamma ǃoa gere ǁnaeǁgau. ǁÎb ge ge mî: ‘Nē-i ǃgâ-ai kai ǀnam-e i ge khoe-e ūhâ tama, khoe-i nî ǁî-i khoen ǃaroma ǁî-i ûiba mā, di. Sago ge a ti khoe [ǀhōsa], tita ra mîmā gona go kara dīo.’ (Jhn. 15:13, 14) Aitsama māsenxa ǀnammi tsî khôahe ǁoasa ǀguiǃnâxasib ge Jehovab ǃoaba-aona ra mâǂoa kai nētsē. (1Jhn. 3:10, 11) Matikōse da Jesub gere ǁgau ǀnamma ra ǃgôaǃgâ hîna Jehovab ǃoaba-aon ǁaegu hâba, ǃkharagaǃnâgu ǁaedi, ǃhaodi, gowagu tsî khaoǃhūga xu da ga hâ xawe. w18.09 12 ¶1-2

Jehovab ge ra ǂhâba î da sida omaris ǁanina kōǃgâ. Aiǁgause, da ge nî sîsen î da sida omaris ǁanina marisise kōǃgâ. ǂGui ǁgûdi ge omdi ai ra hâ, ǁîdi ǀgôana kōǃgâs ǃgao. Kai ǀoa hâ ǀgôan ge kaira hâ ǁgûna ra kōǃgâ. Nēn ge ǂhâbasa xūna. ǁNāti i ǃereamsa da ga ra tani o, o i ge kaise a ǃgom ǁkhā elosi xūn ǃnâ ǀoasase ǁhaosa. Xawe mâǀgai re. Jehovab ge ra ǂkhî sida omaris ǁanina da ga ra kōǃgâ o. (1Kor. 10:31) ǀNîsi da ga omaris ǃeream i hîna ǁgâi da tama-e ūhâ tama io, o da ge sida ǃgâsana a hui ǁkhā hîna kaira tsî ǃhora hâna. Tae-i xa da ǀhaohâb ǃnâ kō mâ tama hâ, ham-i huiba ǂhâ hâ ǃkhaisa? ǁNāti dīs ǃnâ-ū da ge Jehovab ǀkha ra sîsenǀhao îb ǀgore-e ǃeream ǁkhā.—1Kor. 10:24. w18.08 24 ¶3, 5

Joseb ge ge 17 kurixa i ǁîb ǃgâsagu ge surib xa a ǁamaxū bi o. Nēs ǂam-aib ge Joseba ǁîb ǁgûb xa ǃnāsase ge ǀnamhe i. (Gen. 37:2-4, 23-28) ǁÎb ge 13 kuriga ǃgāb ase Egipteb ǃnâ ge hâ i, ǁîb ǁgûb Jakoba xu ǃnūse. Tae-e Joseba ge hui îb tā ǁgai tanisen ǀgauba omkhâi? Joseb ge ǃkhōsis ǃnâb hâ hîna ǁîb ǂâisa Jehovab nî mā bi ǀkhaegu ai gere mâi. (Gen. 39:21; Psa. 105:17-19) Joseb ge ǂkhamsis ǃnâ gere hō kēbodi ge ǁîba ge ǁgau Jehovab ǁîb ǃnâ ǃgâiǃgâibasensa ūhâsa. (Gen. 37:5-11) ǁÎb ge ǀgui ǃnās xa ǃnāsase ǁîb tsûaǂgaoba Jehovab aiǃâ gere ǁgui. (Psa. 145:18) Jehovab ge Joseba ge mîba ‘ǁîb ǀkhab’ hoaǁae nî hâ ǃkhaisa ǃgomsigab ga ra hōǃâs tsîna. w18.10 28 ¶3-4

ǃKhūsib ge ǀgaub hîna sida khoena ra mû ǀgauba a tsâǀkhā ǁkhāba. Xawe khoe-i ǃkhūsib tamas ka io ǀgâsasiba ǁî-e da ra mû ǀgauba mati nî tsâǀkhā? ǃAnu gagab ge Salomoba ge ǂkhâǃnâ îb amaba ǀoasa kurusa ūhâ tama khoen xa xoa nētsēs xoas ǃnâ i ra ǁgau-e khami. Nē ǂkhoamîsa tae-e ra ǁkhāǁkhā da? ǂAn tama da ga ra io, o da ge ǃkhū hâ ǃgâsan ǀkha ǀhōsagusisa ūhâsa nî tura tsî ǀgâsana nî ǂkhābē. Tae-i ǃaroma i a ǁkhōǁkhōsa khoena ǁîn ūhâ xūn ǃoagu ǀgoraǃgâsa? Nēsa da ga dī o, o da ge ǀgorasa ǀhaohâb ǃnâ a kuru tsoatsoa ǁkhā. Jakobub ge ge ǃkhâikhom nēs ge ǂgui ǀhaohâga ǃkharu ge ǁaeb ǃnâ gere ǀgora amaga. (Jak. 2:1-4) ǂKhaikari da ge nî hâ î-i nē ǂâi ǀgauba tā sida ǀhaohâb ǃnâ nētsē hâ tsî da ge khoe-e ai-īsib ai ǀgoraǃgâsa xu nî ǂgōsen. w18.08 10 ¶8-10

Sida ǀhōsagusis Jehovab ǀkha da ūhâsa gangans ge nau ǃgâsan ǀkha da ra hâ ǀgaub ǃnâ-ū ra ǁgauhe. ǁÎn tsîn a Jehovab di amaga. Nēsa da ga ǀuru tama ga ra io, o da ge hoaǁae sida ǃgâsana khoexaǃnâ tsî ǀnammi ǃnâ nî hâ ū. (1Tes. 5:15) Jesub ge ǁîb saosabena ge mîba: “Nēs tawan ge hoana nî mûǂan, ti ǁkhāǁkhāsabe go asa, ǀnamguba go ga sago ǃnâ ūhâo.” (Jhn. 13:35) Kaise a ǂûǂûxa ǃkhais ge Maleaxib ra mîsa Jehovab ‘ǃgaoǃgâ tsî ra ǁnâu’ ǃkhaisa mati da ra hâ ūgu ǀgausa. (Mal. 3:16) Jehovab ge “ǁîb dina a ǂan.” (2Tim. 2:19) ǁÎb ge sida ra dī tsî mî xūn hoana a ǂan. (Heb. 4:13) Jehovab ge sida ǃgâsan ǀkha da ga ǃgâi tama ǀgaub ǃnâ ga ra hâ o, ‘ǃgaoǃgâ tsî ra ǁnâu.’ ǃHaokhoeǃkhōǃoaxa, māxa, ǀûbaxa tsî da ga ra khoexaǃnâ io, o da ge nî ǂan Jehovab ge hoa xūna ra mû di.—Heb. 13:16. w18.07 26 ¶15, 17

Kaise i ge a ǁnâuǃāxa Jehovab ǀkhāb ai hâsa. Khoe-i xare-i ge Jehovab khami ǀgaisa, gā-ai tsî ǀnamxaǃnâ tama hâ. Ham-e ǁnâi ǁîb ǀkhāb ai hâ ǂgao tama hâ? (Psa. 96:4-6) Xawen ge noxoba ǀnî ǃoaba-aon Jehovab dina ra ǃao ǁîb ǀkhāb ai hâsa. Kainni xa ǂâi re. ǁÎb ge ǀnî hâ elo-e ge ǃoaba tama hâ i, xawe Jehovab ǀguiba. Xawe Kainni di ǃoabas ge Jehovab xa ge ūǃoahe tama hâ i. ǁGai xūn ge ǁîb ǂgaob ǃnâ gere ǃnomaǃkhō. (1Jhn. 3:12) Jehovab ge Kainna ge mîba: “ǃGâidīts ka ots ra ǀgapiǀgapihe, xawe ǃgâidī tamats ga io, ob ge ǁoreba dao-ams aiǃâ ǁgoe. Turab âb sa ǃoa hâse ī, xawets ge ǁîba nî gaoǂam.” (Gen. 4:6, 7) ǀNî mîdi ǃnâb ge Jehovaba Kainna gere mîba “ǃhobasen tsits ga ti ǀkhāb ai hâ o, o ta ge tita sa ǀkhāb ai nî hâ.” Xawe Kainni ge Jehovab ǁnamasa ge ǃgâ tama hâ i. w18.07 17 ¶1, 3; 18 ¶4

Aoǁnâ sîsenni tsî ǁkhāǁkhāsabedīs !nâ-ū ǀgui da ge sida !nâba ra !nâ kai. (Mat. 28:19, 20) Xawe da ge nēn hoan ǂam-ai sida tanisen ǀgaub !nâ-ū Jehovaba ǂkhaisiba ra mā. Aoǁnâ sisenni !nâ da ra ǀhao-ū khoen ge sida tanisen ǀgauga ra !gao!gâ. Sida ǀnom ǀgaub tsî mati da khoena ra tawede ǀgaub tsîn ge khoena nî ǂan kai, kaise ǃgâi Eloba da ra !oaba !khaisa. “Tsî om-i !nâ go ga ǂgâ o khoena tawede re.” dib ge Jesuba ǁîb ǁkhāǁkhāsabega ge mîba. (Mat. 10:12) Jesub tsî ǁîb ǁkhāǁkhāsabegu tsîn gere aoǁnâ !ādi !nân ge khoena !haokhoena gere ǁkhauǂgā ǁîn omdi !nâ. Xawes ge ǁnāsa nētsē a ī ǁoa. Sida tanisen ǀgaub tsî khoexa!nâsib tsîn ge kaise a ǂhâǂhâsa. ǁNās !aroma da ge khoena sida ra sariba !aromasa nî mîba, nēs ǁîna nî tsaura kai amaga. Anusa ǀnom ǀgaub ge khoena !gâise nî tsâ kai. ǂGae mâ-e ra trollies tawa ra sîsen !gâsan ge nēs a ama !khaisa ge hō!â. Mûǂan du ge nî khoen !gâise ra tsâsa ǁîn ǀkha ǀnom tsîts ga ǂhaisiba dî nî o. w18.06 22 ¶4-5

Apostel Petrub ge Jodeǁî khoen ǀkha ǀgui gere hâ. Elob ge Xristeǁîn ge tā ǃhaoǃnâbe ǀgorasa nî ūhâ di a mîs khaoǃgâb ge Petruba Korneliuba ge aoǁnâba ǁîb ge ge Romeǁî solda i. (ǃNǃkh. 10:28, 35) ǁNās khaoǃgâb ge Petruba Jodeǁî tama khoen ǀkha gere ǂû tsî ǁgamǀhao. Xaweb ge kurigu khaoǃgâ Jodeǁî tama khoen ǀkha ge hâ ǀû Antioxias ǃnâ. (Gal. 2:11-14) ǁNā-amagab ge Pauluba, Petruba ge ǁnama tsîb ge ǁîba nēsa ge ūǃoa. Petrub ge ǁîb ǂguro sîǂkhanisa Jodeǁîn tsî Jodeǁî tama ǃgâsana ǃoa a xoa o ǂkhariro Asiab ǃnâ, ob ge hoa ǃgâsan xa ǃgâise gere ǃhoa. (1Pet. 1:1; 2:17). Apostelgu ge Jesub aiǁgausa xu ge ǁkhāǁkhāsen îgu ‘hoa’ khoena ǀnam. (Jhn. 12:32; 1Tim. 4:10) ǁAeba î ge ū xawe gu ge ǁîgu ǂâi ǀgauba ge dawa. ‘ǀAsa khoeba anas’ ǃnâ-ūn ge ǃkharu ge ǁaeb Xristeǁîna hoa khoena ǀguise gere mû.—Kol. 3:10, 11. w18.06 11 ¶15-16

ǀGui ǁkhaib ǁâsarab hîna ge Romeǁî toroǃkham-aogu xa ǃkharu ge ǁae gere anaheb ge ge ǀgam ǃnâgu i. Nēs ge gere ǃaroma îgu ǃkham-aoga tā ǁnātikōse ǃgû mâ tsî ǁaeba xu ǁaeb ǀkha ǁîgu ǁâsarab ǃgâise hâsa kō tsî ǁâsarab ge ǁîgu ǂgaogu tsîna gere ǁkhauba. Nēs ge kaise ǃgâi ǂkhōs hîna ra ǁgausa Jehovab sida ǂgaoga nî ǁkhaubasa. (ǂKhm. 4:23) Toroǃkham-aogu ǀurib ǀkha a kurusa ǁâsaraba ǃkhōǃkhuni ǁoa khami da ge sida tsîna Jehovab ǁgaragu tae-i a tsūs tsî ǃgâis tsîn diga a ǃkhōǃkhuni ǁoa. Sida ge ǀoasa kurusa ūhâ tama hâ tsî ǁnā-amaga a ǀgoraǃgâsen ǁoa. (ǂKhm. 3:5, 6) Hoaǁae da ge nî ôaǃnâsen î da kō sida ‘ǁâsarab’ ǃgâise hâsa. Tsî amaba da ga ǀnam o, o da ge sada di ǁâsaraba nî ana Elob ǂhanugu ǃoa-ai ûis ǃaroma.—Psa. 111:7, 8; 1Jhn. 5:3. w18.05 28 ¶3-4, 6-7

Moseb ge ǂhanu-ai ǀgaub ǃnâ gaxuse gere ǂgaeǂgui xawes ge ǁaesa ǁgammi xa ǀgui ge ǂnoagu tama hâ i xawe Moseb xas tsîna, ǁîn ge ǁîb ǃaromas ge ǁgam-en ge ūhâ tama hâ isa di gere mî. (Num. 20:1-5, 9-11) Moseb ge kaise ge ǁaixa tsî ge tsaura tama hâ i. Jehovab ge mî khamib ge Moseba ǀuis ǀkha ǂgoms ǃnâ ge ǃhoa tama hâ i xawe khoen ǀkha ǃgâi tama ǀgaub ǃnâ ge ǃhoa tsî ge mî ǁîb ge buruxa dība nî dī di. Tsîb ge ǀuisa ge ǂnau tsî i ge ǂgui ǁgam-e ǁnāpaxū ge ǂoaxa. ǀGapiǃgôasens tsî ǁaib tsîn ge ge dī îb tsūdī. (Psa. 106:32, 33) Nēs ǃgaob ge Moseba mîmâisa ǃhūb ǃnâ ge ǂgâ tama hâ i. (Num. 20:12) Nē ǃnaeǃkhaisa xu da ge ǂhâǂhâsa xūna ra ǁkhāǁkhāsen. ǂGurose da ge hoaǁae nî dītsâ tsamtsiǃnâsiba ūhâ ǀgarasa. Nēsa da ga dī tama ga ra io, o da ge nî ǀgapiǃgôasen tsoatsoa tsîs ge nēsa nî dī i da ǃgâi tama ǀgaub ǃnâ ǃhoa tsî tanisen. ǀGamǁîse, ǂâiǂhansen da ga ra o, o da ge tsamtsiǃnâsiba ūhâ tide, ǁnās ǀkha da ge nî dītsâ tsamtsiǃnâsiba ūhâsa ǁgâiǀāhe da ga xawe. w19.02 12-13 ¶19-21

Jesub di mîmās aoǁnâs disa a ǃgom tanisa? Hî-î nēs ge ǃgom tide. Nē ǂkhōsab ge mā toas khaoǃgâb ge Jesuba ge mî, Goasib aoǁnâ-aon ǂkhîba nî hōǃâ ǃkhaisa. (Jhn. 15:11) ǁÎb ge ge mîba da ǁîb ǂkhîba da nî hōǃâ ǃkhaisa. Matib nēsa nî dī? Jesub tsîn ge aitsama ǂauxûiǂûhais ase ge ǂgaisen tsî ǁîb ǁkhāǁkhāsabega ǁnâugu ase. (Jhn. 15:5) ǂAuxûiǂûhais ge ǁnâuga ra ǂkhâǃnâ. ǁNâugu ga ǂauxûiǂûhais tawa ga ra ǂgāmâisens kōse gu ge ǁgam-i tsî ǀgaib tsîna nî hō. ǁNās ǁkhās khami da ga sada tsîna Xristub ǀkha ǀguiǃnâxasib ǃnâ hâ o tsî ǁîba ga ra ǁgae o, o da ge ǂkhîba nî hōǃâ ǁîb khami. (Jhn. 4:34; 17:13; 1Pet. 2:21) Aiǁgause Hannes hîna 40 kuriga aimâba-aose ra sîsens ge ra mî: “Aoǁnâ sîsenni khaoǃgâ ta ra hōǃâ ǂkhîb ge ra ǂkhâǃnâte î ta Jehovaba ǃoaba ǀgara.” Amaseb ge nē ǂkhîba ǀgaiba ra mā da î da aoǁnâ sîsenni ǃnâ da ra mâǃoahe xawe aiǃgû.—Mat. 5:10-12. w18.05 17 ¶2; 20 ¶14

Apostel Paulub ge ǃnāsase ǃgâsana ǃkharu ge ǁaeb ǃnâ gere ǁkhaeǂgao. ǁÎb ge ǃanu gagab xa ge sîhe îb Grikeǁîn tsî Romeǁîn tsîna sī aoǁnâba, khoen ge ǁnāpa ǂgui eloga gere ǃoaba amaga. (Gal. 2:7-9) Paulub ge ǃnū ǃhūga ǃoa gere ī nēsi Turkib, Grikeǃhūb tsî Italiab di a ǂansa ga ǃoa îb Xristeǁî ǀhaohâga sī omkhâi. Nē Xristeǁîn ge ‘ǃgomsiba ǁîn ǁanǁare-aona xu gere hōǃâ’ tsî ǁnā amaga ǁkhaeǂgaosa ge ǂhâ hâ i. (1Tes. 2:14) 50ǁÎ kuri Jesub ge ǀhomma ǃoa a ǃapas khaoǃgâb ge Pauluba Tesalonikaǁîn ǀhaohâba ǃoa ge xoa: “Sige ge mâ ǁaeb hoab ai Eloba sadu ǃaroma ra gangan, tsî ge ge ǀûs ose sadu xa ra ǂâi sige ǀgoredi ǃnâ; tsî ge ge ra ǂâi sadu ǂgoms di sîsenni xa, tsî sadu ǀnammi di xūreb xa, tsî sadu ǃâubasens di sâsasib xa.” (1Tes. 1:2, 3) ǁÎb ge ǁÎna ge ǂkhâǃnâ, mî rase: “ǁNā-amaga ǁnamagu re, î-i nē-e nau-e ǂnubikhâi.”—1Tes. 5:11. w18.04 18-19 ¶16-17

ǂKhamkhoe-i hîna Jehovaba ra ǂkhîǂkhî ǂgao i ge ǃnāsase aoǁnâ sîsenni ai ǂâisa nî ǂnûi. Aoǁnâ sîsenni ge kaise a ǂhâǂhâsa, ǁnās ǀkha da ge ǁî-e ǂgurose sida ûib ǃnâ nî mâi. Sats tsîna nēs ǃnâ ǃâ-e ūhâ ǂgao tama hâ? Aimâba-aose sîsen ǁkhā îts a? Xawe tae-e nî ī sa aoǁnâ sîsenni ǃnâts ga ǂkhîoǃnâ o? Matits ǁkhoaǂgaosib ǀkha a aoǁnâ ǁkhā? Sats a dī ǁkhān: ǃGâise aiǂhomisen tsî tā ǃao ǂants a xūna nau khoen ǀkha ǀgoragusa. Kaisets ge nî buru hōǃâ ǁkhāts a ǀkhaeba nēsa dīs ǃnâ-ū. Sats ge ǀnîsi sa skol ǀhōsan hoaǁae ra dî tsi dîs di ǃereamsa a hōǁkhā. Aiǁgause, “tae-i ǃaromats Elob ǃnâ ra ǂgom?” Sida di internets ǂhaweb jw.org’s ai i ge ǁkhāǁkhāǃâde hâ, hîna ǂkhamkhoen hîna ǁnāti i dîde ūhâna ra huide. ǁNāpats ge ǃereamdi ǂkhaniba nî hō hîna “tae-i ǃaroma ta Elob ǃnâ ra ǂgom?” di hâba. Nē ǂkhanib ge nî hui tsi îts ǃgâise sa ǃereamsa aiǂhomi. w18.04 27 ¶10-11

Adammi tsî Evas tsîn ge ǁîra ǃnorasasiba xu gere ǀama xawe ra ge ǂgaoǀkhāde ge ūhâ i. ǀNî ǂgaoǀkhādi ge ǂansa xu gere hā xawe ra ge ǁkhāsib kōse ǀgui gere dī. Aiǁgause ǁîra ge ge ǂan-i ûi ǂgao ra ga o, o ra ǀom, ǂû tsî nî ǁomsa. Nēsa ge ǃaroma ǁkhā i îra ǃnorasasiba ǂoaǃnâ? Hî-î! Jehovab ge nē xūna ra gere tsēs hoasa dī xawe noxoba ge mā-am ra îra ǁkhoaxa ǁaeba ūhâ. (Psa. 104:14, 15; Aoǁn. 3:12, 13) Jehovab ge Adammi tsî Evas tsîna ge mîmā îra ǀgôana hō tsî ǃhūbaiba kōǃgâ. Nē mîmāsa ǁîra ǃnorasasiba ge ūbē? Hî-i. Nēs ge ga ǃaroma hâ în khoena Jehovab di kurus di ǂâibasensa xu ǀama. Tsî nē ǃhūbaib ai ǂguiǂguigu tsî paradais ǃnâ ǀoasa kurusa ūhâ khoen ǀkha ǁan. (Psa. 127:3; Jes. 45:18) Adammi tsî Evas tsîn ge nētsē ǁîra ǃgame ommi ǃnâ ǂkhîba ga ūhâ hâ. w18.04 4-5 ¶7-8

Aoǁnâ sîsenni ǃnâ da ge khoen ǃoagu nî ǃnūǃnâxa. Tsî da ge tā nî ǃâubasen în ǁîna Elobmîs amaba ǁnâuǃā tamas ka io ǁnā ǁaeb ai ūǃoa. Aiǁgause, mati da khoe-e a hui ǁkhā î-i ǀamosib kōse ûis di ǃâubasensa ǂan. ǀNîn ge ra ǂgom ǁōb a ûib di ǀamsa. Tamas ka ion ǃgâi khoen hoana ǀhomma ǃoa ra ī di. ǀGui ǃgâsab aiǁgaus xa ǂâi re, hîna ǃgâise ra sîsensa. ǁÎb ge ǂgurose Genesis 1:28 sa ra khomai. Tsîb ge ǁnās khaoǃgâ oms khoe-e ra dî, mâpa tsî mâ mâsib ǃnân khoena nî ûisab ge Eloba ǂhâba hâ i? ǂGui khoen ge ra ǃeream, “ǃhūbaib ai, ǃgâi mâsib ǃnâ.” Tsîb ge ǁnās khaoǃgâ Jesajab 55:11 sa khomai tsî ra dî Elob ǂâibasens a dawasa ǃkhaisa. ǃNāsa ǁaeban ge oms khoena hî-î di ra ǃeream. Tsîb ge ǁkhawa Psalmdi 37:10 tsî 11 tsîna khomai tsî ra dî khoesib ǀamǂoas mati nî īsa hānîǁaeb ǃnâ. Nē ǀgauba sîsen-ūs ǃnâ-ūb ge ǂgui khoena ge hui în Elob ǂâibasensa ǁnâuǃā tsî mû Elob ra ǂhâbasa khoen ǀamosib kōse nî ûisa paradais ǃhūbaib ai. w19.03 24 ¶14-15; 25 ¶19

Jehovab ge ge ǃgāsa kai ǁîb ra ǂgao ǃkhaisa î da ǁîb ǀGôab mîde ǃgâ tsî ǁnâuǀnam. Jesub ge ǁîb saosabena ǀnamǀnamsa ǀgaub ǃnâ ge ǁkhāǁkhā matin ǃgâiǂhôasa nî aoǁnâ ǀgausa tsîb ge hoaǁae gere mîba nî în ǂkhaikari hâ. (Mat. 24:42; 28:19, 20) ǁÎnab ge gere ǂkhâǃnâ în ǁkhoaǂgaosib ǀkha aiǃgû tsî mâǀgai. (Luk. 13:24) Jesub ge ǁîb saosabena ge ǂkhâǃnâ în ǀnamgu, ǀguiǃnâxasiba ūhâ tsî ǁîb mîmāde ǃkhōǀgara. (Jhn. 15:10, 12, 13) Nē ǂkhâǃnâs ge nētsēs tsîna sîsenǂuiba ūhâ Jesub tsēdi ǃnâ i ge ī-i khami. Jesub ge ge mî: “Amaba xu hâ-i hoa-i ge ti domma ra ǁnâu-e.” (Jhn. 18:37) ǁÎb di domma da ra ǁnâu ǃkhaisa da ge ra ǁgau “tanibagu” tsî da ga ra ‘ǀûbagu’ o. (Kol. 3:13; Luk. 17:3, 4) Tsî ǁkhoaǂgaoxase da ga aoǁnâ sîsenni ǃnâ ga ra ǁhaos tsîna ‘ǃgom tsî au’ ǁaegu ǃnâ.—2 Tim. 4:2. w19.03 10 ¶9-10