Aprili

O sida? Elob ǂâi ǀgauba da ūhâ tamas ka io ǁGâuab diba? Ama as ge sida tanisen ǀgauba da ge Elob ǂgaoǀkhādi ǀkha a ǀguiǃnâxa kaisa. O sada ǂâi ǀgaub? Sada ǂâi ǀgaub tsî tsâ ǀgaub tsîna a ǀguiǃnâxa Jehovab dib ǀkha? Nēsa dīs ge kai ǁguiǂgāsens tsî ǁgūtsâs tsîna ǂhâ hâ. ǁGūtsâ tama da ga ra io, o da ge Jehovaba ǃoaba tama hâ khoen di ǂâi ǀgauba a ūǃoa ǁkhā. Nē khoen di ǀgaugu ge sada ǂnamipe hoaǁae hâ. (Efe. 2:2) Nē ǀgaugu ge sada xa ǀgui ǂâisa ra ǁgau tsî ǁnās ǀkha a ǃâitsâ da ǁkhā. Kaise î ge a ǃgom Jehovab ǂâi ǀgauba ūhâ tsî nauǀkhāb ais tsîna Jehovaba ǃoaba tama hâ khoen di ǂâi ǀgauba ūhâ tama isa. Jehovaba ǃoaba tama hâ khoen di ǂâi ǀgauba da ga ra ūǃoa o, o da ge a ǂgaeǂhapuhe ǁkhā tsî ǁî-aitsama ǀnamsens ǀgaugu tsî ǃnorasasiba ūhâ ǂgaos di ǀgauga a ǃomaǃkhō ǁkhā. (Mrk. 7:21, 22) ǁNās ǀkha da ge nî dītsâ î da ‘Elob dina ǂâi’ tsî tā ‘khoen dina ǂâi.’ w18.11 18 ¶1; 19 ¶3-4

Matikōseb ge Jesuba ǂkhâǃnâhe hâse tsâ Jehovab ge ǃnona ǁaxasigu ai ǀhomma xu ǁîb ǀkha a ǃhoa o. Jesub di ǁāǁnâs Jordanǃāb tawab ge Jehovaba ǀgapiga hâ mîde ge mî. Johaneb ǁĀǁnâ-aob ǀguib ge ǁnā mîde ge a ǁnâu. Jesub ǁōb aiǃâ gu ge ǃnona apostelga Jehovab domma ge ǁnâu mî rase: “Nēb ge ti ǀnamǀnamsa ǀGôab, ǃgâiǃgâibasensa ta ūǃnâ hâba; ǁîba ǁnâu!” (Mat. 17:5) Tsî ǀams aib ge Jehovaba ǁîb ǀgôab ǀkha ge ǃhoa ǀhomma xu ǁōb nîs aiǃâ. (Jhn. 12:28) Jesub ge ge ǂan i taotaosaseb nî ǁō ǃkhaisa tsî nî ǀhapiǂgā-amhesa ǃkhāǃkhā-aob ase. Xaweb ge ge ǀgore îs Jehovab ǂâisa dīhe, ǁîb dis ose. (Mat. 26:39, 42) “ǃGâuhaiba ge tsâb, taosiba ǃgôa tama i” tsî ǁîb ǂanǃgâsiba ge ôa tama hâ i, nē ǃhūbaiba xu. Xawe ǁîb ǁGûb ǂanǃgâsiba gere ôa.—Heb. 12:2. w18.07 10-11 ¶15-16

Jesub ge ǃuiǂûsab ge ǂûiǂgās khaoǃgâ kai ǁkhoaǂgaosiba ge ǁgau. Mâ ǀgaub ǃnâ? Jesub ge ǁîb ǁGûb di ǂâisa ge ūǃoa ǂan i ge i xawe mâǃoahe tsîb nî ǃgam-esa. (Mat. 26:65, 66) Jesub ge ǁkhoaǂgaosiba ge ūhâ i Jehovab ǀonsa ǁkhaubas tsî khoen hîna ra ǃhōbasena ǀamo ûiba mās tsîn ǃgao. Tsîb ge ǁîb saosaben tsîna hānîǁaeb ǃgao gere aiǂhomi. Jesub ge ǁkhoaǂgaosiba ge ǁgau ūb ge hâ i ǂâiǂhansendi xa ǂâi tama is ǃnâ-ū tsî ǁîb ǂgomǂgomsa apostelgu di ǂhâsigu xa gere ǂâi. ǁÎb ge ǂnûiǂgā ǀguiǃgupu ǂûǀhaos Judabab ge ǂoa kais khaoǃgâs ge ǁîb ǂkhauhesa saobasena nî ǂâiǂâiǃnâ Jesub ǀaob tsî ǀasa ǃgaeǀhaos tsîna xun mati nî ǀamasa.—1Kor. 10:16, 17. w19.01 22 ¶7-8

Jesub ǁGûb ge ǀhomma xu ǃeream tsî ge mî: “ǂKhaiǂkhai si ta go, tsî ta ge ǁkhawa nîra ǂkhaiǂkhai si.” Jesub ge kaise gere ǂâiǂhansen kai ǃereams hînab ge ūhâ is xa Jehovab ǃoagu ǂgomǂgomsase hâsa. Jesub ge ge ǂan i ǀgaisaseb nî mâǃoahe tsî tsûtsûsa ǁōba nî ǁō ǃkhaisa. (Mat. 26:38) ǁÎb ǁGûb di ǀonsa ǂkhaiǂkhais ge Jesuba kaise ge ǂhâǂhâsaba i. Jesub ge Elob xa ǁgai xūna ra ǃhoa khoeb ase gere mûhe tsî ǁnās ǀkha gere ǂâiǂhansen ǁîb ǁōb Eloba ǁgaise nî mûsen kaisa. Jesub khami da ge sada tsîna ra ǂâiǂhansen Jehovab ǀonsa ǃkhāǃkhāhesa. Jesub khami da ge sada tsîna ǀnîsi ǃgâi tama ǀgaugu ǃnâ ra hâ-ūhe. Tamas ka io da ge mâǃoa-aon sada xa ra mî ama tama xūn xa ra ǂhansen. Nēs Jehovab ai ra hau ǁgai ǀons xa da ge ra ǂâi. Nē ǁaeb ǃnâ i ge Jehovab mîde kai ǁkhaeǂgaosa ra mā da. Jehovab ge hoaǁae ǁîb ǀonsa nî ǂkhaiǂkhai.—Psa. 94:22, 23; Jes. 65:17. w19.03 11-12 ¶14-16

Jesub di ǁkhāǁkhāsaben ge ǁnâun go xū-e ǂgom ǂgao tama hâ. Jesub hîna Israelǁaes di gaosisa nî ûikhâib ge ra mî ǀgūǁaeb ge ǃgomsiba hōǃâ tsî nî ǁō di. Tsîb ge apostel Petruba xū-e nēs xa ge mî. ǁÎb ge ge mî: “ǀKhomsen re, ǃKhūtse.” “Îs tā nēsa ība tsi re!” Ob ge Jesuba ge ǃeream: “Bē ti khaoǃgâ, Satantse, ǁgonǁgonxaba tets a, Elob dinats ǂâi tama, tsî khoen dinats ra ǂâi xuige.” (Mat. 16:22, 23; ǃNǃkh. 1:6) Nē mîdi ǃnâ-ūb ge Jesuba Elob ra ǂâi ǀgaub tsî Satanni ra ǂâi ǀgaub tsîna gere ǀgopeǀnō. (1Jhn. 5:19) Xaweb ge Petruba ǀkhomsenxa gagab hîna nē ǃhūbaib ai hâb xa gere ǃhoa. Jesub ge ǁîb ǁGûb di ǂâi ǀgaub a ǀgarasa ge ǂan i. Tsî Petrubab ge ǃeream ǀgaub ǃnâb ge Jesuba ge ǁgau ǁîb Jehovaba ǃoaba tama hâ khoen di ǂâi ǀgauba ūǃoa tama hâsa. w18.11 18 ¶1-2

ǂÂi re Jehovab tae-e ra mûsa ǂgui khoen Jesub ǁōba ra ǂâiǂâisensab ra mû o ǃhūbaib ǂhawase. ǁÎb ge ǁnā ǂgui khoen ǀguina mû tama xawe mâ ǀguiǀguibi-i hoa-e ra ǂanǃgâ. Aiǁgauseb ge ǁîba ǁnān hîna mâ kurib hoaba ǂgomǂgomsase ra ǀkhīna ra mû. Nē khoen ǁaegun ge ǀnîna hâ ǃgomsinan ūhâ xawe ra ǀkhīna. ǀNîn ge hoaǁae ǀhaode ǁhaoǃnâ tama xawen ge Jesub ǁōb ǂâiǂâisensa hoaǁae ǂgomǂgomsase ra hâǃnâ. Jehovab ge ǁnān tsîna a ǂan hîna ǂguro ǃnāsa Jesub ǁōb ǂâiǂâisensa ra ǁhaoǃnâna ǂanǂui ǂgaos ǃaroma. Jehovab ge kaise a ǂkhî nētikō ǂgui khoen Jesub ǁōb ǂâiǂâisensa ra ǁhaoǃnâ ǃkhaisa. (Luk. 22:19) Xaweb ge nē khoen ra hāba ǃaromadi ǃnâ ǃgâiǃgâibasensa ūhâ. Jehovab tsî ǁîb ǀapeǂhomis xa daoǁgauhes ǃnâ da ǃgâiǃgâibasensa ūhâ?—Jes. 30:20; Jhn. 6:45. w19.01 26 ¶1-3

Jesub ge māsenxase ǀgui ǁîb ǁkhāǁkhāsabega ge ǁōba tama hâ i xawe tsēkorobe ǁîgu ǂhâsiga aisi gere mâi. ǁÎb ge ǁîb ǁkhāǁkhāsaben ǀkha tsaub hâ xawe gere ǀhao. (Luk. 22:39-46) Tsîb ge nau khoenab a dība ǁkhā xūna ǃoa gere kō khoena xūb a hōǁkhā xūna ǃoas ose. (Mat. 20:28) Sadu ge ǀgui ama Xristeǁî ǃgâsan ǃâ tsî da ge ǁaeba ra ǁamaǂui nau khoena nēsa ǃoa ǁkhausa. Xawe da ge ǃgōsase “ǂgoms horesana” ra hui ǂgao hîna ge ǁnāǁgôana. (Gal. 6:10) Sada ǀnamma da ge ǁîn ǃoa-ai ra ǁgau ǁîna ǂkhâǃnâs ǃnâ-ū ǀhaode ǁhaoǃnâs tsî ǃgōsase Jesub ǁōb ǂâiǂâisensa ǃoa. Jehovab tsî Jesub tsîkha khami da ge kaise ra ǃgâiaǂgao ǁnāǁgôa hâ khoe-i ga Jehovaba ǃoa oaǀkhī o.—Mat. 18:14. w19.01 29 ¶12, 14; 30 ¶15

ǁÎb ǁōb ǂâiǂâisensab ge ǂûiǂgā ob ge Jesuba Pasxaba xu ge ǃau xūna ge sîsen-ū. ǁÎb ge ǀnai ge ǁnāpa hâ i ǀkhuruǀkhuruhe tama peregu tsî ǂauxûi-i tsîna ge sîsen-ū. Jesub ge ǁîb ǁkhāǁkhāsabega ge mîba nē ǀgam xūn ge ǁîb soros tsî ǀaob tsîna ra ǂnûǁkhaeba tsî nēsab ge ǀgūǁae ǁîn ǃgao nî mā. Apostelgu ge ge buru tama hâ i nē ǃuiǂûs a supu ǀgaub xa. Tae-i ǃaroma? ǁKhâga ǂkharu hâseb ge Jesuba, ǁîb ǀhōsan Lasarub, Martas tsî Marias oms ai ge ǁkhāǁkhā tsoatsoa. Jesub ge nē ǃnomsa ǃkhais ai ge aoǁnâ tsoatsoa. Martas tsîn ge ge hâ i xawes ge ǁîsa ǂûna ǁîs ǃhaokhoeba dības ǀkha ge ǀhape i. Jesub ge nēsa a mû o, ob ge ǁîba Martasa ge mûǂan kai ǂgui ǂû-i ge hoaǁae ǂhâbasa tama hâ. (Luk. 10:40-42) Jesub ge ǁîb ge mî xū-e aitsama ge dī ǁîb ǁōb aiǃâ. ǁÎb ge nē ǂâiǂâisensa ǀguiǃgupu ǀgaub ǃnâ ge dī. w19.01 20-21 ¶3-4

Jehovab ge Jesuba ǁîb ǃâubasen tama hâ ǂanǃgâsa khâis ǃnâ-ū ge mā ‘kaise ge ǀgapi’ īsa. ǁÎb ge ǁkhawa ǁō tide gagasi ûiba ge māhe ǀamosib kōse. (Fil. 2:9; 1Tim. 6:16) ǁNās ge kaise ǂoaǂamsa ǂanǃgâsa Jesub ǂgomǂgomsa ǃoabas ǃgao. Tae-e nî hui da î da ǃhūbaib ǂanǃgâsiba xu ǂgōsen? ǂÂis ǃnâ ūhâ re Jehovab hoaǁae ǁîb di ǂgomǂgomsa ǃoaba-aona ra ǂanǃgâ ǃkhaisa ǃâubasen taman hâ hîna. Ham-e a ǂan mâ ǃâubasen tama da hâ ǀkhaega da hānîǁaeb ǃnâ nî ǃkhōǃoa ǃkhaisa? Xawe nēsis ǃaroma da noxoba ǃgomsin tsî ǃâitsâgu nē ǃhūbaib dina ra hōǃâ hîna da ge nî mâǀgai. Nē ǃhūbaib ge nî ǃgû-ī. (1Jhn. 2:17) Sida ǀnamxaǃnâ ǁGûb Jehovab ge ‘ǂhanuoǃnâ tama hâ tsî sida sîsenni tsî ǀnammi tsîna ǀuru tide, ǁîb ǀons ǃnâ da ge ǁgauba.’—Heb. 6:10. w18.07 11 ¶17-18

Jesub ge ǀguiǃnâxasib xa gere ǂâiǂhansen ǁîb ǀuniga ǃuiǂûs ai ǁîb apostelgu ǀkha. ǁÎb ge ǁîgu ǀkhab gere ǀgore o, o ge mî ǁîb ra ǂgaosa îgu ǁîga ǀgui ǁîb tsî Jehovab tsîn a ǀgui khami. Apostelgu di ǀguiǃnâxasib ge ga ǁgau hâ Jehovab ge Jesuba ǃhūbaiba ǃoa a sî ǃkhaisa îb ǁîb ǂâisa hā dī. ǀNammi ge Jesub di ǁkhāǁkhāsaben di saosa hîna ǀguiǃnâxasiba ra aiǃgû kaisa. (Jhn. 13:34, 35) Jesub ge ǀguiǃnâxasiba ge ǁguiǃgâ, mûǂan nî ge o ǁîb apostelgu nēsa ūhâ tama hâsa. Nēsab ge ǀuniga ǂûǀhaos tawa ge mû. ǁÎgu ge ǀnairo gere ǂnoagu ham-i “hoagu xa kaib ase” nî ǃgôahesa. (Luk. 22:24-27; Mrk. 9:33, 34) ǀNî hâ ǁaxasib aib ge Johaneb tsî Jakobub tsîkha ge ǂgan î kha ǂhâǂhâsa ǃharode Jesub Gaosib ǃnâ māhe.—Mrk. 10:35-40. w18.06 8 ¶1-2

Jehovab ge ra ǂhâba in ǃgame hâ khoena ǀgaisase ǀnamgu tsî i ǁîn ǀnamma ǀamosib kōse hâ. (Mat. 19:3-6) ǀAib ge kaise a ǁgai xū hîna i khoe-e a dī ǁkhā-e. ǃGâi ǂâis ǀkha i ge hûǁî mîmās, disi mîmādi disa nē ǀgauba ra ǂkhā. (Deu. 5:18) Nēs ǀkhats ge “Elob ǃoagu” ra ǁore tsî nēs ge nau khoe-e kaise ǁgaise ra khôa. (Gen. 39:7-9) Nē khoe-i ge ǂgui kuriga nî tsûaǂgao. Jehovab ge ǀgôan di ǂurusib xa ǁae hâ. Jehovab ge ǁgûna ge mîmā in ǁîn ǀgôana sorosise ǀguis ose xawe gagasises tsîna kōǃgâ. ǁGûn ge mâ ǃēs hoasa nî sîsen-ū ǁîn ǀgôana huisa in Jehovab ǂhanuga ǃgôaǃgâ tsî ǁîba ǀnam. (Deu. 6:6-9; 7:13) ǁGûn ge ǁîn ǀgôana xūn ase mû tide hîna ǃgâi tama ǀgaub ǃnâ nî hâ-ūhena xawe Jehovaba xu ra hā ǀkhaeb ase hîna nî ǀnam-ena.—Psa. 127:3. w19.02 21 ¶5, 7

Jobi ge Elob di ǀkhaeb hînab nî mā dawa-am bis dis ai ǁîb ǂâisa ge ǂnûi. ǁÎb ge ǂgomǃgâsiba ge ūhâ i Elob ǁîb ǂhauǃnâsiba ra ǃgôaǃgâsa. ǁÎb ǃâitsâgu hoagu ǃnâb ge Joba ǂgomǃgâsiba ge ūhâ i Jehovab ǀams ai nî ǀkhae bisa. Nē ǂgomǃgâsib ge ge hui bi îb ǂhauǃnâse hâ. Jehovab ge Jobi di ǂhauǃnâsib ǀkha ge ǂkhîǂâixa i tsî ǁîba ǂgui xūn ǀkha ge ǀkhae ǀoasa kurusab ge ūhâ tama hâ i xawe. (Job. 42:12-17; Jak. 5:11) Tsî nēs xa kai ǀkhaegu ge noxoba aiǃâ ǃâu bi hâ. Sada ǃKhūb ge ǀkharaǀkharasen tama hâ. (Mal. 3:6) ǂAnǃgâ du ga o ǁîb sadu ǂhauǃnasiba ra ǃgôaǃgâsa, o du ge sadu ǂgaogu ǃnâ hānîǁaeba a ǃâubasen ǁkhā. (1Tes. 5:8, 9) ǀNî ǁaegu ai du ge a ǀguri tsâsen ǁkhā nē ǃnôa ǃgomsin ǃgao xawe du ge tātsē ǀguri hâ tama hâ. ǂGui khoen ǂhauǃnâsiba ra ūhâ ǀgaran ǀkha du ge ǃhūbaib ǂhawase hâ. Tsî du ge ǂgui aogu tsî taradi hîna Elobmîs ǁaegu ǃnâ ǁîn ǂhauǃnâsiba ǁōb ǀkhan gere ǁgari-e xawe a ūhâ ǀgaran tsîna ūhâ.—Heb. 11:36-38; 12:1. w19.02 7 ¶15-16

Jesub ǁōb ǂâiǂâisens ra ǃkharu khami da ge sao ra dîde nî dîsen: ‘Mati da Jesuba ǀnamma ǁgaus ǃnâ nî ǁgae? Ti ǃgâsan di ǃgâiba ta tib ǂam-ai ra mâi? Ti ǃgâsana xu ta ǁîn ǁkhāsib ǃnâ hâ tama hâ xū-e ra ǃâubasen?’ Jesuba da ge hoaǁae nî ǁgae tsî nî “ǀguiǂâixa.” Jesub ǁōba tsēdīs ge ǀhapese hâ tide. Jesub ga ra hā o, ob ge ǂkhauhesan hîna noxoba ǃhūbaib-ai hâna nî ǀhaoǀhao ǀhomma ǃoa tsî î ge Jesub ǁōba ǁkhawa tsēdī-e tide. (1Kor. 11:26; Mat. 24:31) Jesub ǁōb ga ra tsēdī-e ǀû xawen ge Jehovab khoena noxoba nē tsēsa nî ǂâihō Jesub ge ǁgau ǃgamǃgamsenxasib, ǁkhoaǂgaosib tsî ǀnammi tsîn ase. w19.01 25 ¶17-19

ǂÂi re sida ǂurusib mati ǂganaga da ī ǀgaub ǂhâǂhâsasiba ra ǁgausa. ǂGurose, ǂuruse da ga hâ ǂgao o, o da ge ǃgâi ǂû-e nî ǂû tsî sida ǀkhāsa ǃgâi mâsib ǃnâ nî ūhâ. ǁNās ǁkhās khami da ga gagasise ǀgaisase ga ra hâ ǂgao o, o da ge ǁaeb hoaba Elobmîsa ǂōrisase nî khomai tsî Elobmîs ai ǃgaoǃgoasa ǂkhanin tsîna nî khomai. Nēs ǃnâ-ū da ge Jehovab ǃnâ da ra ǂgomsa ra ǁgau. Nēsa da ge ǁkhāǁkhāsen da ra xūna ûiǂuis tsî sida ǂgoms xa ǃhoas ǃnâ-ūs tsîna a dī ǁkhā. (Rom. 10:8-10; Jak. 2:26) ǀGamǁîse, ǃauga da ra mûsen ǀgaub ge a mî ǁkhā ǂuru da ge a di xawe da ǂganaga ǀaesen hâ hîna. Sida gagasi ǁaxasigu ǃnâ ra ǁhao amaga da ge a mî ǁkhā noxoba da ge ǂgoms ǃnâ a ǀgaisa di xawe i ge ǃgâi tama tsâsiga sida ǃnâ a khâi ǁkhā. (1Kor. 10:12; Jak. 1:14, 15) ǂÂis ǃnâ da ge nî ūhâ ǁGâuab ǁîb ǂâi ǀgauba da nî ūhâsa ra ǂgao ǃkhaisa. w19.01 15 ¶4-5

ǀNîsi da ge a dîsen ǁkhā: ‘Tita tsîna Samariaǁîb ge ǁgau ǀkhomxaǃnâsiba ra ǁgau?’ (Luk. 10:30-35) ‘Tita tsîna khoexaǃnâsiba ǁîn hîna ǃgomsiba ra hōǃân ǃoagu a ǁgau ǁkhā? Aiǁgause ta hoaǃnâ-aixa huiba Xristeǁîn, ǃoa taradi tsî ǁgûna amab ǃnâ ūhâ tama hân ǃoagu a ǁgau ǁkhā? Tita tsîna ǁîn hîna ‘ǂkhabuǂâi hâna ǁkhaeǂgao tsî ǂkhabusana a ǂkhâǃnâ’ ǁkhā?’ (1Tes. 5:14; Jak. 1:27) Naun ǃoagu da ga ǀkhomxaǂgaosiba ga ra ǁgau o, os ge ǁnāsa ǂkhîba ra mā da ǁîna da ra hui amaga. Tsî da ge a ǂan, nēs Jehovaba ra ǂkhîǂkhî ǃkhaisa. (ǃNǃkh. 20:35; Heb. 13:16) ǁÎn hîna naun xa ra ǂâin xab ge Gao-aob Daviba ge mî: “ǃKhūb ge ǁîba ǂkhaba tsēs ai nîra ore. ǃKhūb ge ǁîba nîra sâu tsî nîra ûi kai.” (Psa. 41:1, 2) Sada ga hoaǁae ǀkhomxaǂgaosiba ga ra ǁgau o, ob ge Jehovab tsîna sada nî ǀkhom tsî da ge ǁnās ǀkha ǀamo ǂkhîba nî hōǃâ.—Jak. 2:13. w18.09 19 ¶11-12

ǂGomǂgomsa Xristeǁî ǃgâsas hîna Yoshiko di ǀon hâs ge ǁgai ǂhôa-e ge ǁnâu. ǁÎs ǀaeǃkhō-aob ge ge mî ǀoro ǁkhâgu ǀguigas ge nî ûi di. ǁÎsa nēs xa mati ge tsâ? Yoshikos ge Elobmîs xoas xa ra ǂâiǃâ, nētsēs xoasa. Tsî ǁîs ǀaeǃkhō-aoba ge mîba ǁîs ge ǃao tama hâ di, Jehovab ǁîs ǃomkha ra ǃkhō amaga. Nē xoas ǃnâ hâ haisi-ams ge nē ǃgâsasa ge hui îs hoase Jehovab ai ǂgomaiǂnûi. Nē xoas ge sida tsîna a hui ǁkhā ǃgomsina da ga ra ūhâ ǁaeb ǃnâ. Jehovab ge Jesajaba nē mîde ge xoa kai îb Jodeǁîn hîna ge Babilons ǃnâ ǃkhōsis ǃnâ gere ūhēna ǂkhâǃnâ. Xawe Jehovab ge nē mîde Jodeǁîn ǃgao ǀgui ge xoa kai tama hâ i xawe hoa khoen hîna ǁîba ra ǃoaban ǃgao nētsēs kōse. (Jes. 40:8; Rom. 15:4) Nētsē da ge ‘ǃgom ǁaegu’ ǃnâ ûi hâ tsî ǁnās ǀkha Jesajab ǂkhanis ǃnâ hâ ǁkhaeǂgaosa ǂhâ hâ.—2Tim. 3:1. w19.01 2 ¶1-2

Nēti i ǀgoras ǃnâ ra ge ǁîra noxoba ǃgame hâ tsî ǀgora hâse ra ga hâ xawe ra ge noxoba ǃgomsina nî hōǃâ. Apostel Paulub ge ǀguiǃnâxase hâs di ǃaromasa ge mā: “ǂGomoǃnâ aob ge taras ǃnâ ǃanuǃanuhe hâ, tsî ǂgomoǃnâ taras ge aob ǃnâ ǃanuǃanuhe hâ amaga. ǁNāti i ga ī tama io, on ga sadu ôana ǃanuoǃnâ hâ; xawe nēsin ge a ǃanu.” (1Kor. 7:14) ǂGui ǂgomǂgomsa Xristeǁîn ge Jehovaba ǃoaba tama hâ khoen hînan ǃgame hân xa ra mâǃoahe xawe ra mâǀgai. Nēs ge kaise a ǃgâi ǁîn ǃgame hâ khoe-i ga Jehovaba ga ra ǃoaba tsoatsoa o. (1Kor. 7:16; 1 Pet. 3:1, 2) ǃHūbaib ǂhawase î ge nētsē Xristeǁî ǀhaohâga ǃgamegu ǃnâ ra ǃgâiǃō. Sadu ǀhaohâb ǃnâs tsîna du ge ǃgameb ǃnâ ra ǃgâiǃō ǃgâsana ǀnîsi ra hō. Nēs ge kaikhoegu hîna ǁîgu tarade a ǀnamgu tsî taradi hîna ǁîdi kaikhoega a ǀnamdi tsîna ǃkhōǂgā hâ.—Heb. 13:4. w18.12 14 ¶18-19

Edenni ge “turaba” ǃoa ra ǁnaeǁgau tsî ǁnā ǃhanab ge amabes ǃnâ kaise ge îsa i. ǂGui ǂûn, îsa mûhe ǁkhā xūn tsî xamanin tsîn ge ge hâ i. (Gen. 1:29-31) Grikegowab mîs hîna Hebregowab mîs “ǃhanab” di hâsa ra ǂnûiǃkhunis ge pa·raʹdei·sos di hâ. Cyclopaedias hîna M’Clintock tsî Strong hâ kha xa xoahe hâs ge pa·raʹdei·sos xa ra mî: “ǂHaba ǃhūbaib hîna tsū khoena ūhâ tamab tsî îsasib âb ǁgaiǁgaihe tideb. Îsa kai haidi ǀkha hîna ǃāb ǁgammi xa ra ǂnâhede tsî nî ǂû tanide tsîn ge gūna ǁnāpa nî ǃgû. Nēs ge ǃnari-aon ǂâidi ǃnâ ge hâ i.” (ǀGopeǀnō re Genesis 2:15, 16.) Elob ge Adammi tsî Evas tsîna nēti ī paradais ǃnâ ge mâi xawe ra ge aitsama ge ǂoaǃnâ kaisen Eloba ǁnâuǀnamoǃnâs ǃnâ-ū. ǁNās ǀkha î ge ǁîra tsî ǁîra surib tsîna paradaisa ge ǂoaǃnâ. (Gen. 3:23, 24) ǁNā ǃhanab ge khoen ge ǀkhai i xawe, kai ǁgammi dâub Noaxi tsēdi dib kōse ge hâ. w18.12 3-4 ¶3-5

ǁGûn ge ra dītsâ ǁîn ǀgôan ǃnâ ǃgâi ǀgauga omkhâisa. ǀGôan ga ra ǁhûi o în ǁîn ǁgûna xūn ge ǁkhāǁkhāsen xūna ūǃoa, os ge nēsa ǁîna nî hui în ǃgâi mîǁguigu hîna tsûba ǃaroma tidena dī. Tsîs ge nēs tsîna nî huin în ǃgomsigu tsî ǂâiǂhansendi tsîna xu ǂgōsen. ǀNamǀnamsa ǁgûb khamib ge Jehovaba ra ǂhâba în ǁîb ǀgôana ǃgâi ǀgaub ǃnâ ûi. (Jes. 48:18) ǁNās ǀkhab ge ǃgâi Elobmîs tsoatsoade ûib tsî nau khoen ǀkha da nî hâ ǀgaub xa ra mā da. Tsîb ge ra mîba da î da ǁîb ǂâi ǀgauba omkhâi tsî ǁîb xūna ra mû ǀgaub tsîna mû. Sida ǁgaris xab ge ǁîba ǃgâiǃgâi, khâikhâiǃnâ tsî sida ǂâi ǀgauba ra khoraǂui. (Psa. 92:5; ǂKhm. 2:1-5; Jes. 55:9) Tsîs ge nēsa ra hui da î da mîǁguigu hîna ǃgâiaǂgaoba ra mā da ga ūhâ, khoe-i ase da ra kai khami. (Psa. 1:2, 3) Jehovab di ǂâi ǀgauba ūhâsa xu da ge kaise ra ǀama. w18.11 19-20 ¶7-8

Amab ǃnâ da ga ra ǃgû ǀgara ǂgao o, o da ge tā nau khoen di ǁgâib ǃnâ nî māǁnâsen. Amab ǃnâ da ga ra ǃgû tsoatsoa o, o î ge sida ǀhōsagude Jehovaba ǃoaba tama hâ khoen tsî omaris ǁanin tsîn ǀkha ǁnātikōse ǀgaisa tama hâ. ǀNîn ge nēsa ra ūǃoa xawen ge ǀnîna ra mâǃoa tsoatsoa. Omaris ǁanin, sîsenǀhao-aon tsî skol ǀhōsan tsîn ge a ǂgaeǂhapu da ǁkhā î da ǁîn ǀkha tsēdī tsoatsoa. Mati da Jehovab mā-am tama hâ tsēde tsēdīsa xu nî ǂgōsen? Nēsa da ge Jehovab nē tsēdi xa ra ǂâi ǀgauba da ga ǂâis ǃnâ ga ra ūhâ o, o ǀgui nî dīhō. ǁGâisa ǂkhanin ǃnâ xoasa ǁkhāǁkhāǃâde kōǃgâs ge nî ǁgau nē tsēdi ge mâba xu a ǃhuisa. Nēn xa da ga gagasi ǂâi ǀgauba ga ra ūhâ o, o da ge nî mûǂan “mâ xū-i a ǃKhūba ǃgâibasa.” (Efe. 5:10) Jehovab tsî ǁîb Mîs tsîn ai ǂgomaiǂnûis ge nî hui da î da tā ‘khoena ǃao.’—ǂKhm. 29:25. w18.11 11 ¶10, 12

ǀKharaǀkharana da ga ra hōǃâ ǁaeb ǃnâ da ge hānîǁaeb xa a ǂâiǂhansen tsoatsoa ǁkhā. Nēs ge Joseb ǀkha ga ī hâ. ǁÎb ge ǁîb mâsib ǃnâ ǃgâina gere mû tsî ǁnās ǃnâ-ū Jehovaba ǀkhaeb nî xū-e ge mā. ǃKhōsis ǃnâb ge hâ io, ob ge Joseba mā-eb gere ǁgaumâis hoasa gere dī, Potiferab gere sîsenba ob gere dī khami. (Gen. 39:21, 22) Joseb khami da ge sida tsîna xū-e da a dī ǁoa mâsib ǃnâ a hōsen ǁkhā. Xawe da ga ǃnūǃnâxasiba ūhâ tsî ǃgâina ga ra dī o sida mâsib ǃnâ, o da ge Jehovaba ǀkhaeb nî xū-e nî mā. (Psa. 37:5) ǀNî ǁaeb ai da ge ǀnîsi ra “îganǀgē” xawe da ge “huio tama hâ” apostel Paulub ge mî khami. (2Kor. 4:8) Paulub mîdi ge sida ûib ǃnâ ra ama kai, aoǁnâ sîsenni ǃnâ da ga ǃnāsase ga ra dī o. w18.10 29 ¶11, 13

Mati du nî tsâ sadu a ǂan tsî ra ǃgôa khoe-i ga sadu ǀonsa ǀuru o? Tsî ǁnās xōǀkhā sado mûǂan tama io? ǁNās ge kaise a tsûaǂgao kai da ǁkhā. Tae-i ǃaroma? Hoa da ge ra ǁkhore î da ǂanǃgâhe. Sida ra ǂhâba ǂanǃgâhes ge khoe-i xa ǂanhes ǃgâ-ai hâ. Nēs ge ūǃoahe tsî dī da ran ǃgao ǂanǃgâhesa. (Num. 11:16; Job. 31:6) ǂGui ǁkhorega da ge ūhâ ǂanǃgâhes ǃgao xawes ge nēsa ǃgâise ǀnōsa tama hâ, ǀoasa kurusa da ūhâ tama hâ ǃkhais ǃgao. Nēs ge ǃgâi tama ǂanǃgâhesa a tura kai da ǁkhā. Satanni ǃhūbaib ge ǂanǃgâhes turab tsî ūǃoahe ǂgaos tsîna ra kaikai. Nēs ge a dī ǁkhā î da tā sida ǀgoreǀîs tsî ǂanǃgâsa anu hâba ǃoaba, Jehova Eloba.—J.ǂHa. 4:11. w18.07 7 ¶1-2

ǁNās ǀkha da ge buru tama hâ ǁGâuab tsî ǁîb demongu tsîn ǀgapi ǂharode ūhâ khoega ra ǂgaeǂhapusa îgu “ǂhumi.” (1Tim. 4:1, 2) ǂGomdi ǁkhāǁkhā-aon ge a ǀhapixa khoen hîna ǁîn ǂhumiba ra ǂgom an di ûiban ǁkhōǁkhōsa mâsib ǃnâ ra mâi amaga. Khoe-i ga ǁîn ǂhumiba ǂgom tsî ga ra ūǃoa o hînab Eloba ǃhui hâba os ge nēsa ǁî-e ǀamo ûiba hōsa ra ǂoaǃnâ kai. (Hos. 4:9) Jesub ge ge ǂan-i ǂgomdi ǁkhāǁkhā-aogu ge ǁnāsa gere dīsa. Jesub ge ǁîgu xa ge mî: “Tsūba go xoaǂansabego tsî Farisego, sa hînaxaǃnâgo, ǀgui ǂgomhoresa-e nî dīse hurib tsî ǃhūb tsîkha ra ǃgûmaǃnâ go; tsî ī i kao, o go ge ǁî-e sago ǃgâ-ai ǃhonarisase ǀamo ǀaeb ôase ra dī.” (Mat. 23:15) Jesub ge ǁnā ǂgomdi ǁkhāǁkhā-aoga ge mî ǂgāba. ǁÎgu ge ǁîgu ‘ǂhumib di ǁGûb’ ǀkha a ǀgui.—Jhn. 8:44. w18.10 7 ¶5-6

Jesuba tae-e gere ǂâibasen? ǁÎb ge ge mî: “ǃGâiaǂgao î du dâ, amǃnâs âdu ǀhommi ǃnâ a kai xuige; ǁnātin kom sada aiǃâ ge hâ i kēbo-aoga gere ǃgôaǃgono.” (Mat. 5:12) Apostelgu ge ǂnauhe tsî a mîmāhe o, îgu tā aoǁnâ, “o gu ge ǁîga ǀapemāǃnans di aisa xu ǃgâiaǂgao hâse ge ǃgû.” Ama as ge ǁîgu ge tsûb ǃaroma ge ǃgâiaǂgao tama hâ i. Xawe gu ge ‘Jesub di ǀons ǃaroma ǃharaxūhe hâse tsâsa gu ge anuǃgôahe ǃkhais ǃaroma’ gere ǃgâiaǂgao. (ǃNǃkh. 5:41) Sida ǁaeb ǃnâ da ge Jehovab khoen ase ra ǃgâiaǂgao Jesub ǀons ǃgao da ǃgomsina ra tsâ o. (Jak. 1:2-4) Apostelgu khami da ge sida tsîna ǃgomsina hōǃâs ǃnâ ǃgâiǃgâibasen-e ūhâ tama hâ. Xawe da ga ǃgomsin ǂama Jehovab ǃoagu ǂgomǂgomsase ga ra hâ o, ob ge ǁÎba hui tsî nî ǀgaiǀgai da. “ǃGâiǃō hâ Elob” mā-amsa ūhâs ge a ǃgâi, ǀnî ǂgomde xu da ra hō ǁgâib, ǀaokhoena xu da ra hō mâǃoas, ǀaeb tsî kairasib ǃgâ-ai.—1Tim. 1:11. w18.09 21 ¶18-20

Nē “ǀuni tsēdi” ǃnâ da kaise ǃgoma ra tsâ amagan ge ǂgui khoena ǀûsen ǂgaos ǀguisa ra dī. (2Tim. 3:1-5) Ôaǃnâ-aon ge ra mî 800 000 xa ǃnāsa khoen ge mâ kurib hoaba ra ǁō aitsama ǃgamsens ǃnâ-ū, nēs ge mâ 40 sekunde gu hoagu ǃnâ ra ī. Kaise tsûtsûsas ge sida ǃgâsan tsîn ge nēs ǃnâ a māǁnâsen ǃkhaisa tsî aitsama a ǃgamsensa. Sida ǃgâsan ga ǀûsen tama i xawen ge ǁgâiba ra ǃaroma mâsiga ra hōǃâ tsî ǀnammi ǃnâ omkhâihesa ǂhâ hâ. ǀNîn ge ǁgâiǀāhes tsî ǃhōhes tsîna ra hōǃâ. ǀNîn ge mîǁgaiǁgaihe tsî ra ǀhoehe sîsen-aib ai. Tamas ka io kaise ǃgarise ra sîsen tsî tsau hâse hoaǁae ra tsâ. ǀNîn ge oms ai ǁîn ǀgaiba ra ūbē ǃgomsiga ra hōǃâ tsî ǀnîsi Jehovaba ǃoaba tama hâ ǃgame i hâ khoe-i xa ra mîǁgaiǁgaihe. Nēs xa ǃaromahe hâsen ge ǂgui ǃgâsana ǀhaohâb ǃnâ sorosises tsî emosioneelses tsîna khôaǁnāsase ra tsâ. w18.09 13 ¶3, 5

Xristeǁî ǁgûn ge Jehovab ǀkha ra sîsenǀhao elosi mîǁguigan ga ǁîn ǀgôan aiǃâ mâi o. ǀNî ǁgûn ǁnāsa ge dīn ge ge mû ǁîn ǀgôan ǀoasase Jehovaba omsa xu ǃnūse ra ǃoaba ǃkhaisa. ǀNîn ge sîsabe sîsenna ra dī, ǀnîn ge aimâba-aose ra sîsen ǂhâsib hâba tsî ǀnîn ge Betels tawa ra sîsen. ǃNūse hâs ge ǀnîsi ra ǂâibasen omaris ǁanin hoaǁae sarigu ǁkhā tidesa, ǂgaon ra khami. Xawe gagasi mûǂuisa ūhâ ǁgûn ge ǁîn ǀgôana ra ǂkhâǃnâ în aiǃgû ǁîn sîsenni ǃnâ. Tae-i ǃaroma? ǁÎn ge kai ǃgâiaǂgaoba ra hō ǁîn ǀgôan Gaosiba ǂgurose ra mâi ǃkhais ǃgao. ǀNîsin ge nē ǁgûna Hannas khami ra tsâ mî ge sa Samuelas ge Jehovaba a “mā” ǃkhaisa. ǁGûn ge ǁnāti i sîsenǀhaosa ǀō-aisa aiǂhanub ase ra mû. ǁÎn ge nēs ǀnî hâ sîsenǂuiba nî ūhâsa ǁkhore tama hâ.—1Sam. 1:28. w18.08 24 ¶4

Jesub ge ge mî tama hâ i ǁî-i ge a ǂgâ ǁoa di. Xaweb ge ge mî: “ǃGâiǃō hâ du ge sadu ǀgâsado, sadu dib a Elob gaosiba xui-ao.” (Luk. 6:20) Nēs ge ge ǂâibasen tama hâ i hoa ǀgâsa khoen ǀkhae-e hâ tsî Jesub ǁkhāǁkhāsa nî ūǃoa di. ǂGui ǀgâsa khoen ge ge ūǃoa tama hâ i. Hâ a ǃkhais ge khoe-i ǀhōsagusis Jehovab ǀkha i ūhâs ge ǁî-i ūhâ xūna xu hâ tama hâ. ǀKhaesa da ge a ǂgui ǃgâsana da ūhâ ǃkhais ǃgao, ǃkhū hân tsî ǀgâsan hîna Jehovaba a ǀnam tsî ǁîba ǂgaoba xu ra ǃoabana. Xoadi ge ǃkhū hâ ǃgâsan ǃoa ra mî: “În tā ǃguri, în ǁkhāti tā mâǁapo tama ǃkhūsib ai ǂgomaiǂnûi, în ûitsama Elob, ǃkhū hâse hoana ǂûs ǃoa ra mā dab ai ǂgomaiǂnûi.” (1Tim. 6:17-19) Elobmîs ge Elob khoen hoana ra ǃkhâikhom în ǂkhaikari hâ tsî tā mari-e ǀnam. (1Tim. 6:9, 10) Sida mûde da ga ǁkhowa-am tsî sida ǃgâsana Jehovab ra mû nî khami ga ra mû o, o da ge ǁîna ūn hâ xūn ai ǀgoraǃgâ tide. w18.08 10-11 ¶11-12

Hoa da ge Jehovaba ra gangan ǁÎb khoe da a ǃkhais ǃgao. Gā-aisiba da ge ǁÎb di da asa da ra mûǂan tsî māsenxase ra māǁnâsen o ra mû. ǁGai xūna xu da ge hoase ra ǂgōsen. Sida ǃgâsana da ge ǀnam tsî nî ǃgôaǃgâ tsî nî mûǂan ǁîn tsîn a Jehovab di ǃkhaisa. (Rom. 12:10) Elobmîs ge ra mîmâi: “ǃKhūb [Jehovab, NW] ge ǁaes âba ǂhara [ǁnāxūǃnâ] tide xui-ao.” (Psa. 94:14) Nē mîmâis ge nî hâhâ ǃgomsina da ga ra hōǃâ xawe. ǁŌb tsîn ge Jehovab ǀnamma xu a ūbē da ǁoa. (Rom. 8:38, 39) ǁNā-amaga da ge a “ǃKhūb [Jehovab, NW] di, ûi da kas, ǁō da kas hoasa.” (Rom. 14:8) Jehovab ǁîb ǂgomǂgomsa ǀhōsana khâisa nî mā tsēsa ǃoa da ge ra mûǂui. (Mat. 22:32) Nēsis tsîna da ge ǂgui ǀkhaega ra hōǃâ. Elobmîs ge ra mî: “ǃGâiǃōs ge hâ ǁnā ǁaes ǃKhūba ǁîn di Elose ūhâs, ǁnā ǁaes, ǁîb ǀumis âb ase ǁhûiǂuibasen hâsa.”—Psa. 33:12. w18.07 26 ¶18-19

ǀNî khoen ge ra tsâ ǀnî mîǁguigu tawa i ga ra hā o, aiǁgause ǀgapi ǁkhāǁkhāsens tamas ka io mâ ǃnôa sîsen-e i nî dīsa i ge mâ khoe-i hoa-e nî mîǁguibasen. ǁÎ-i di ǃgâiǂâis ga ǁî-i ǃnorasasiba ǁgaiǁgai tama io, os ge ǁnāsa a ǃgâi din ge ra ǂâi. ǀNîn ge Paulub mîde ǂâis ǃnâ a ūhâ ǁkhā Korinteǁî ǀhaohâb ǃoab ge xoasa ǂû-i xa: “Tare xū-i ǃaromab kha ti ǃnorasiba nau-i di ǂâis xa ra ǀgoraǃgâhe?” (1Kor. 10:29) Ama as ge mâ khoe-i hoa-i ge aitsama nē mîǁguiga a dī ǁkhā. Xawe da ge ǂâis ǃnâ nî ūhâ sada ǃnorasasib ge sada xu hâ tama hâ tsî sada mîǁguigu ge ǃaromana a hau ǁkhā. ǁNā ǃkhais ǃgaob ge Pauluba nētsēs xoas ǀkha ǁîb mîde ge tsoatsoa. Nēs ge a hui da ǁkhā î da ǂanǃgâ kaise ǂhâǂhâsa xūn hâsa ǂâis ǃnâ da nî ūhâna, sida di ǃnorasasib xa. w18.04 10 ¶10

Xristeǁî-e i ge ǃgâi tama daoba a sao ǁkhā, Jehovaba i ra ǃoaba hîna. (Jud. 11) ǀUrixa xūn xa ǂâi tsî da ge nau khoen tsîna a ǃhui ǁkhā. (1Jhn. 2:15-17; 3:15) Nē ǂâi ǀgaub ge ǁoreba nî dī kai da. Xawe da ge hoaǁae aoǁnâ sîsenni ǃnâ ǁhao tsî ǀhaode a hâǃnâ ǁkhā. Nau khoen ge sida ǂâidi tsî tanisen ǀgaub tsîna mû tide xaweb ge Jehovaba hoa xūna ra mû tsî a ǂan ǁîb ai da ga hoase mâǁnâsen tama ga ra io. (Jer. 17:9, 10) Jehovab ge sida ai ǃhaese ǀûǃnâsen tama hâ. Khoe-i ga Jehovaba xu ga ra ǃnū o, ob ge Jehovaba ǁî-e ǂkhâǃnâ tsî ra mî: “ǃHobasen tita ǃoa.” ǂKhabusasigu ǀkha da ga ǃgomsiba ga ra ūhâ ǁaeb ǃnâb ge Jehovaba ra ǂhâba î da ǁgai xūna mâǃoa. (Jes. 55:7) Nēsa da ga ra dī o, ob ge Jehovaba sida ǀkhāb ai nî hâ tsî gagasi, emosineel tsî sorosi ǀgaib tsîna nî mā da î da sida di ǁorena “gaoǂam”.—Gen. 4:7. w18.07 18 ¶5-6