Meib 

!Kharu ge kurigu !nâ i ge ǂgui !hūga ǃhūsaben xa ge ǀoa. Tae-i !aroma du khoen di gowaba ǁkhāǁkhāsen tama hâba? Aiǁgause ǁîna tawedesa. Tamas ka io du tae-i !aroma khoen hoa!nâ-aixase ǁîn gowab !nâ ra sîsen-ū mîde ǁkhāǁkhāsen tama hâba? Nēs !nâ-ū du ge ǀnîsi ǁîna jw.org’s !oa a ǁnaeǁgau ǁkhā în ǂgui!nâgu vidiogu tsî ǂkhanin tsîna ǁîn gowab !nâ mû. Jehovab ge Sida Xristeǁî ûib tsî aoǁnâ sîsenni ǀhaosa ūhâs aiǂhanuba ge mā. Nē ǀhaos ge ra hui da î da ǁkhoaǂgaose aoǁnâ ǁkhā. Nē ǀhaos tawa da ra hō !gâi ǀapemādi ge ra hui da î da ǂgom!gâsens ǀkha khoena ǁkhawa sari tsî Elobmîs ǁkhāǁkhāsa ūhâ. ǁGûdo sadu ǀgôana hui re în ǁîn !nâba !nâ kai aitsama ǀhaodi !ereamde aiǂhomis !nâ-ū. ǁÎn di !gâi !ereamdi ge ǀasase ǀhaodi tawa ra sī khoena kaise ra hui în nēb a amasa mûǂan.—1Kor. 14:25. w18.06 22-23 ¶7-9

Kaise î ge a ǃgâi ǂâi oasa hoa da ge “ǃhaokhoese” tamas ka io ǃhūsabe īsa Elob aiǃâ. (Efe. 2:12) Xaweb ge Jehovaba sida “ǀnammi di tsurigu ǀkha” ge ǃgae. (Hos. 11:4; Jhn. 6:44) Xristub ge sida ge ǁkhoreǁhare. ǁÎb ge dao-amsa ge ǁkhowa-am î da Elob omaris ǁani kai. Jesub tsîn ge ǀoasa kurusa da ūhâ tama hâ xawe sada ǀnammi ǃnâ ge ǃkhōǃoa, ǁnās ǁkhās khami da ge khoena tā nî ǂhābē. ǃHaoǃnâbe ǀgoras tsî ǁaib tsîn ge ǃhūbaib ǃnâ nî ǀoa ǀams ra ǀgū khami. (Gal. 5:19-21; 2Tim. 3:13) Jehovab ǃoaba-aon ase da ge ǀgapiseba xu ra hā gā-aisiba ra ôa tsî ǃhaoǃnâbe ǀgorasa xu ra ǂgōsen. (Jak. 3:17, 18) ǂKhî da ge ra ǀhōsagusisa da ǀnî hâ ǃhūga xu ra hā khoen ǀkha ra omkhâi o tsî ǁîn gowab tsîna ra ǁkhāǁkhāsen o. Nēsa da ga ra dī o, o da ge ǂkhîba ra hōǃâ tsî ǂhanu-aisib hîna hurib ǃgabigu khami īb tsîna.—Jes. 48:17, 18. w18.06 12 ¶18-19

Romeǁî toroǃkham-aob hîna ge ǁîb ǁharona ana tama hâ îb ge ǃkhams ǃgao ge aiǂhomisen tama hâ i. ǁÎb ǁharon ge khōba xu ge kuruhe hâ i tsî nēs ge gere hui bi îb ǃgâise mâ hōǁkhā. Tsî ǂaide gere ǀgai kai. Romeǁî toroǃkham-aogu gere ana ǁharodi ge ǁîga ǃkhams ǃnâ gere hui. Xawe Xristeǁîn ra ana ǁharon ge ǁîna ra hui în ǂkhîb di ǂhôasa khoen ǃoa ī-ū. (Jes. 52:7; Rom. 10:15) Xawes ge nēsa ǁkhoaǂgaosiba ǂhâ hâ. “Ti ǀhōsan ǀkha skoli ai ǃhoasa ta ge gere ǃao.” Dib ge Bo di ǀon hâ ǃgâsab hîna a 20 kurixaba ra mî. “Tita ge gere tao. Kō-oa ta ra o, o ta ge a ǀū tae-i ǃaroma ta gere taosa. Nēsi ta ge ti ǀhōsana ra aoǁnâba.” ǂGui ǂkhamkhoen ge ra mî aoǁnâ sîsenni ǃgaon ga ra aiǂhomisen o, on ge tao tama hâ khoen ǀkha ǃhoasa. w18.05 29 9-11

Jesub ge ǁōb nî ǃuis aiǃâ ge mî: ‘ǂKhîba ta ra mā go.’ (Jhn. 14:27) ǂKhîb di ǀkhaeba mati ra hui da î da ǂûtani? Mâǁapo da ra khami da ge sada ǂgaob ǃnâ ǂkhîba ra hōǃâ, Jehovab tsî Jesub tsîn mā-amsa da ūhâ amaga. (Psa. 149:4; Rom. 5:3, 4; Kol. 3:15) Jesub ge ǁîb di apostelga ge mîba îgu ǁîb di ǂkhîba ‘ǀoasase’ hōǃâ. Tsî ǁnās khaoǃgâ ǁîga aitsama māsenxa ǀnammi di ǂhâǂhâsasiba ge ǁguiǃāba. (Jhn. 15:11-13) Tsîb ge ǁîga “khoego [ǀhōsago] ti ge ǂgai.” Nēb ge kaise ge ǀō-aisa i aiǂhanuba, Jesub ǀhōsase ǃgôahesa. Xawe apostelga tae-e nî dī ǁÎb ǀhōsase gu ga ra hâhâ ǂgao o? ǁÎgu ge ‘ǃgû tsî  . . . nî ǂûtani.’ (Jhn. 15:14-16) ǀGam kurigu aiǃâb ge Jesuba ǁîb apostelga ge mîba: “ǃGû ǁnâi, î aoǁnâ, î go mî: Gaosib ǀhommi dib ge ǀgūse hā hâ.” (Mat. 10:7) ǁÎb ǀuniga ǃui ǁōb nîs aiǃâb ge ǁîga ge mîba îgu mâǀgai nē sîsenni ǃnâ.—Mat. 24:13; Mrk. 3:14. w18.05 20-21 ¶15-16

ǂKhamkhoedo sa ǂâisa Jehovab ǂâisa dīs ai mâi. Nēs tsîn ra ǂâibasens ge sa ûiba gagasi mîǁguiga dīs ai mâisa. Sats khami a ǂkham an ge ǁkhoaxa ǁaeba ūhâs xa a ǃgâibahe. Tsîn ge ǁîna satsa a ǁkhau ǁkhā îts ǁîn ǀkha sī ǁkhoaxa ǁaeba ūhâ. Xawets ge sa mîǁguiba dī tsî ǁîna nî mîba sats ǁîn ǀkha ǁkhoaxa ǁaeba ūhâs ǃnâ ǁhao ǂgao tama hâsa. Tā nēs xa ǂgaeǂhapuhe re. ǂGui ǃnâgu ǀgaugu ge hâ ǂkhamkhoena xu ra hā ǁgâiba mâǃoasa. Aiǁgause, ǃâitsâde a ǃaroma ǁkhā mâsiba xu ǂgōsen re. (ǂKhm. 22:3) Tsî ǁgâib ǃnâ māǁnâsens a ǃaroma ǁkhā tsûb xas tsîna ǂâi re. Huiba nauna xu ūǃoa re. ǃGamǃgamsenxa ǀgaub ge nî hui tsi îts sa ǁgûn tsî gagasise a ǀgaisa Xristeǁîna xu huiba ūǃoa. (1Pet. 5:5, 6) ǃGamǃgamsenxa ǀgaubats ūhâ ǃgâi ǀapemāde ūǃoas diba? w18.04 28-29 ¶14-16

ǂKhariro Asiab ǃgâsan ǃoa-aib ge Jesuba ǃgôaǃgâsiba ǁîn sîsengu ǃaroma gere ǁgau. ǁÎb haisi-amsab ge Tiatirasa ǃoa nēti ge tsoatsoa: “Sa sîsenga ta ge a ǂan, tsî sa ǀnammi tsî ǃoabas tsî ǂgoms tsî taniǀnamxasib tsîna, tsî sa sîsengu di ǀunigagu ǂgurogu xa a ǂgui ǃkhaisa.” (J.ǂHa. 2:19) Jesub ge ǁîn ǂgui ǁaxasigu ǀguiga ge mî tama hâ i xawe ǁîn ǃgâi ǀgaugu hîna ge nē sîsen-e a ǂkhâǃnâ gu xas tsîna ge koa nî. Paulub ge Tiatiras ǃnâ hâ ǃgâsana gere ǁnama xaweb ge ǁîb haisi-ams tsoatsoas tsî ǀunis tsîn ǃnâ ǁîna gere ǂkhâǃnâ. (J.ǂHa. 2:27, 28) ǂÂi re Jesub mâ ǀgaiba ūhâsa ǀhaohâb di danab ase. ǁÎb ge sida gangan tide sîsenni hîna da ra dī-i ǃgao. Xaweb ge hoaǁae ra ǁgūtsâ ǃgôaǃgâsiba ǁgausa. ǁÎb ge ǂoaǂamsa aiǁgausa ǀhaohâb ǃûi-aoga ra mā. w19.02 16 ¶10

ǃKharu ge ǁaeb ǂgaeǂguira soros ge ǀhaohâb ǃûi-aogu ǀguiga ge ǁkhaeǂgao tama hâ i xawe hoa Xristeǁîna gere ǁkhaeǂgao. ǂGaeǂguira soros ge Petrub tsî Johaneb tsîna ge sî îgu ǃgâsana sī ǀgoreba în ǃanu gagaba hō. (ǃNǃkh. 8:5, 14-17) Filipub tsî nau ǃgâsan tsîn ge nē ǂkhâǃnâs hînan ge ǂgaeǂguira sorosa xu a hōs xa ge ǁkhaeǂgaohe. Nētsēs ge ǂGaeǂguira soros Jehovab di ǀHûǀguitimî-aon disa Betels omaris ǁanin, ǀō-aisa aimâba-aon, sîsaben tsî ǃhūbaib ǂhawase hâ ǃgâsan hoan tsîna ra ǁkhaeǂgao. Tsî ǀamǂoas ge ǃkharu ge ǁaeb ǀkha a ǀgui, ǃgâsan ge ǁkhaeǂgaohes khaoǃgâ ra ǃgâiaǂgao. 2015ǁÎ kurib ǃnâs ge ǂGaeǂguira sorosa Oa hā re Jehovaba ǃoa di hâ ǂkhaniba ge māǂui, nē ǂkhanib ge ǂgui khoena ge ǁkhaeǂgao. w18.04 19 ¶18-20

Khoen ge ra ǂâi ǃnorasasiban ga ra ūhâ o, on ge ǂhâban hâ khami a dī ǁkhā di. Xawe i ge ǀam-e ūhâ tama ǃnorasasiba ǀāgôab khami i. Xaweb ga ǃhūbaiba ǁgaraga ūhâ tama hâ o, os ge ǁnāsa ga ǃgâi tama hâ. The World Book Encyclopedias [mîdi ǂkhanis] ge ra mî: “ǀHûhâsib ǃnâ hâ ǂhanugu ge mâ xū-i hoa-i ǃgâise nî ǃgûǁnâ ǃkhais ǃgao hâ. Tsî ǃnorasasib ge ǀnōsa ǀgaub ai a sîsen-ūhe ǁkhā.” “ǀHomaxa” di hâ mîs ge nēba a sîsen-ūhe ǁkhā. Nētsē i ge khoesi ǂhanuga kaise a ǂgui. ǁNâuǃgâ ǃkhaib tawa ra sîsen khoen tsîn ge nē ǂhanuga mîǃās ǀkha ra hui. Jesub daoǁgaus, ama ǃnorasasiba hōs dis ǃgao da ge sao ra ǀgam xūna nî dī: ǂGurose da ge ǁîb ge ǁkhāǁkhā da amaba nî ūǃoa tsî ǀgamǁîse nî ǁîb ǁkhāǁkhāsabe kai. Nēs ge ama ǃnorasasiba nî mā da. Xawe nē ǃnorasasiba a tae? Jesub ge ge ǁguiǃā: “ǁOreba ra dī-i hoa-i ge a ǁoreb di khobo [ǃgā]. . . . ǀGôab ga ǁnâi ǃnoraǃnora duo, o du ge a amase ǃnorasa.”—Jhn. 8:34, 36. w18.04 6-7 ¶13-14

Kaise da ge ra ǂkhî khoen hîna sada tsâsigu tsî ǂurusib tsîn ǃnâ ǃgâiǃgâibasensa ūhân ǁaegu hâsa. ǁÎn ge sada ǂaidi ǃnâ ra mâisen tsî ra dītsâ sada ra tsâ tsî ǂâi ǀgausa ǁnâuǃāsa. ǁÎn ge sada ǃgomsina mûǂan tsî huiba ra mā tsî ǀnî ǁaegu ai nēsa ǂgans tsîna da hî tama hâ hîna ra dī. ǃGâsan hîna ‘ǃgâsaǀnamxasiba’ ra ǁgauna da ge ra ǃgôaǃgâ. Xristeǁîn ase da ge hoa da tsâbaǁhaos tamas ka io ǃgâsaǀnamxasiba ra ǁgau ǂgao. Xawe da ge nēsa nî sîsenǂam. Tae-i ǃaroma? ǀOasa kurusa da ūhâ tama hâ amaga. (Rom. 3:23) ǁNās ǃaroma da ge ǁî aitsama ǁaeǁaesens tsâsiba nî ǃkham ǃoa. ǀNî da ge tsâbaǁhaosa ǁgaus ǀkha ǃgomsiba a ūhâ ǁkhā. Sada ge kai ǀgaus xa ǃaroma-e hâse tamas ka io sada khaoǃhūb xa. Tamas ka io da ge sada ǂnamipe hâ khoen ǂâi ǀgauba ge ūǃoa. Nē ǀuni tsēdi ǃnân ge khoena nau khoen tsâsiga ǃgôaǃgâ tama hâ. Xawe a “ǁîǀnamsenxa.” (2Tim. 3:1, 2) Xawe da ge Jehovab tsî Jesub tsîkha di aiǁgaude saos ǃnâ tsâbaǁhaosa ǃgâi ǀgaub ǃnâ ǃgâsan ǃoa-ai a ǁgau ǁkhā. w19.03 14 ¶1-3

ǀUniga mîmās ge nau khoen di xūna turasa ra ǂkhā. (Deu. 5:21; Rom. 7:7) Jehovab ge nē ǂhanuba ge mā îb ǂhâǂhâsa xū-e ǁkhāǁkhā, ǁîb khoen ge ǁîn ǂgaoga nî ǁkhauba nēs ge ǁîn ǂâidi tsî tsâsigu tsîna ǃkhōǂgā hâ. ǁÎb ge a ǂan ǃgâi tama dīgu ge ǃgâi tama ǂâidi tsî tsâsigu tsîn ǀkha ra tsoatsoa. Gao-aob Davib ge aiǁgause nē turaba ge omkhâi. ǁÎb ge ge ǃgâi khoe-i. Xaweb ge ǀgui ǃnās ai ǀnî hâ kaikhoeb di tarasa ge tura. ǁÎb turab ge ge ǁore kai bi. (Jak. 1:14, 15) Davib ge ge ǀai, kaikhoes aoba gere gaxaǃnâ tsî ega ǁîba ge ǃgam. (2Sam. 11:2-4; 12:7-11) Jehovab ge khoe-i ǃaugab īsiba kō tama hâ. ǁÎb ge khoe-i ǂganaga ī ǀgauba ra kō, ǁî-i ǂgaob ǃnâ. (1Sam. 16:7) ǂÂidi, tsâsigu tsî dīgu tsîn ge Jehovaba xu a sâuhe ǁoa. ǁÎb ge sida ǃgâina dīs ǃgao ra ǂkhâǃnâ. Xaweb ge ra ǂhâba i da ǃgâi tama ǂâide mûǂan tsî sîsenǂam, ǃgâi tama xū-e da nî dīs aiǃâ.—2Kro. 16:9; Mat. 5:27-30. w19.02 21 ¶9; 22 ¶11

Elobmîs ge Moseb xa sao ra-e ra mî: “Moseb ge kaise tsamtsiǃnâ ge i, khoen, ǃhūbaib ai hân hoan ǃgâ-ai.” (Num. 12:3) Nēsa ra ǂâibasen ǁîb ge ǂkhabusa, mîmâi-e dī ǁoa i tsî ǁkhaubasen ǁoa i di? ǀNîn ge tsamtsiǃnâ khoe-e nē ǀgaub ǃnâ a ǀgoraǃgâ ǁkhā. Xawe nē ǂâi ǀgaub ge ama tama hâ. Moseb ge ge ǀgaisa mîmâina ra dī ǁkhoaǂgao Elo ǃoaba-ao i. Jehovab huib ǀkhab ge Egipteb 3 000 000 toro ǃkham-aoga ge mâǃoa tsî Israelǁaesa ge hui ǁîna ǃkhamǃoas ǃnâ. Moseb ge ǃkharu ǃnâ ǃgomsiga da ge ǃkharu ǃnâ tama hâ xawe da ge tsēs hoasa khoen tsî ǃgomsin hîna tsamtsiǃnâsiba ǁgausa ra ǃgom kaina ūhâ. ǃGâi ǃaromasa da ge ūhâ nē ǀgauba omkhâisa. Jehovab ge ra mîmâi “tsamtsiǃnân ge ǃhūbaiba nîra ǀumi” di. (Psa. 37:11) Sadu tsîna a tsamtsiǃnâ? ǀNî hâ khoena tsamtsiǃnâ khoe-i ase ra mû du? w19.02 8 ¶1-2

Khoen ge ǃgâiǂâisa khoen ge ǃhūbaib ai a hâ tsoatsoa ǁaeba xu ūhâ. Adammi tsî Evas tsîn ge Jehovaba ǁnâuǀnamoǃnâ o, o ra ge aitsama ge sâusen. Nēs ge ra ǂâibasen, ǁîra ge ǁîra ǃgâiǂâis xa gere ǂhanihe di. ǁNān hîna ǂkhabusa ǃgâiǂâisa ūhân ge a ǀgopeǀnōhe ǁkhā ǂgaub hîna ǂkhabusa kompasa ūhâb ǀkha. ǃGâise sîsen tama hâ kompas ǀkha hurib ai ǃnaris ge a ǁkhōǁkhōsa ǁkhā. ǂOab mâsib ge ǂgauba ǀnî hâ ǀkhā-e ǃoa a ī kai ǁkhā. Xawe ǃgâise ra sîsen kompas ge ǂgaub ǃnari-aoba a hui ǁkhā îb ǂgauba ǁîb ra ǂgaoba ī kai. Sida ǃgâiǂâis ge kompas ǀkha a ǀnōhe ǁkhā. Nēb ge sada ǃnâ hâ xū-i hîna ǂhanu daoba ǃoa ra daoǁgau daba. Xawe sida ǃgâiǂâisa ǃamkuse sîsen kais ǃgao da ge ǃgâise nî ǃamǂgāsi. Khoe-i di ǃgâiǂâis ga ǃgâise sîsen tama io, o i ge ǁnā khoe-e tsūba xu a ǂgōsen ǁoa. (1Tim. 4:1, 2) ǁNāti i ǃgâiǂâis ge a ǂgom kai da ǁkhā ‘ǂkhabab a ǃgâi’ ǃkhaisa. w18.06 16 ¶1-3

Mûǂan tsî da ge ǁgai ǂâi ǀgauga xū nî ǂgōsen nēsi î ga ǃgâise ga ra mûsen xawe. Aiǁgause, hoaǃnâ-aixa ǂhôa-i ge ǀnîsi ǀkhāga ǂgīǂgōsi ǃnandi ǁaegu ra ūse ra ǁgauhe. Khoesiba ra tsâǀkhā ǀgaub xa î ge ra ǃhoa-e, ǁnās ge ǃkhūsib tsî xū kais tsîna ra khâikhâi ǃnâ. ǀNî muvin tsî ǂkhanin tsîn ge “tita ǂgurose” tsî “ti omaris ǂgurose” di hâ ǀgauga ra ǁgauǂûi. ǁÎn ge nē xūna ǃgâi ǀgaub ǃnâ ra ǁgauǂûi. Nē ǀgauga Elobmîs di ǁkharagu ǃoagu hâ tama hâ, hîna ra ǁgauga omaris tsî aitsama ǀgapiǀgapisen ǁnātikōse ǂhâǂhâsa tama hâsa. (Mat. 22:36-39) Nēs ge ǂâibasen tama hâ î da ǁkhoaxa ǁaeba tā ūhâ. Xawe da ge a dîsen ǁkhā: ‘Jehovaba ǃoaba tama hâ khoen di ǀgauga ǀnî hâ ǀgaub ǃnâ gu ga ra ǁgauǂûihe o, os tsîna ra mâǂoa? ǁKhā da as kōse da ra dītsâ omaris ase ǁgai ǁaxasiga xu hâbesa? ǁGai ǂâi ǀgaugu hîna da ra mûgu tamas ka io ra ǁnâugu tsîna da Jehovab di ǂâi ǀgaub ǀkha ra ǀgopeǀnō?’ w18.11 22 ¶18-19

Jehovab ge ǁîb ǀnammi ǃnâ-ū ra ǁgau da ǁîb sida ǀkha hâsa. Mû re matib ǁîb ǀnamma ra ǁgau ǀgausa. “ǃGomǀgausats ge ti mûǁae” dib ge Jehovaba ra mî. ‘ǂKhaisats ge ge tsî ta ge ge ǀnam tsi.’ (Jes. 43:4) Xū-i xare i hîna ǃhūbaib ǃnâ hâ i ge Jehovab sida ūba hâ ǀnamma ūbē tide. (Jes. 54:10) Jehovab ge ûiba ra ǃgom kai xūna ūbē tama hâ xawe ‘ǃāgu’ khami kai ǃgomsina mā-am tide tsî ǁîba da nî ǃoaba ǀûs tsîna mā-am tide. Jehovab ge ra mîǁgui ǁîb ge nî hui da ǃgomsina da ga ra hōǃâ ǁaeb ǃnâ di, î da nē ǃgomsina mâǃoa ǁkhā. Jehovaba tae-e nî dī? ǁÎb ge nî hui da î da tā ǃao tsî ǁîb ai hoaǁae ǂgomaiǂnûi ǁōb kōse. (Jes. 41:13; 43:2) Elob mîmâis hîna “tita ge sa ǀkha hâ” di ra mîs ai da ga ǂgomaiǂnûi o, o da ge nî ǁkhoaǂgaoxa tsî nî ǀgai ǃgomsina da ra hōǃâ ǁaeb ǃnâ. w19.01 3 ¶4-6

ǂKhamkhoets ga ra o, ots ge ǁgauǃnâ-aon, ǀapemā-aon, tamas ka io ǀnî khoen xa ra ǂkhâǃnâhe îts ǀgapi ǁkhāǁkhāsa ôa tsî ǂgui mari-ets nî hō xu sîsenni tsîna. Xawe Jehovab ge ra ǂkhâǃnâ tsi îts ǀnî hâ daoba sao. ǃGâi ûiba ūhâs ǃaromab ge ǁîba ra ǂhâba its sa skol sîsen-e ǂhâǂhâsase ū. Skoli ǀkhats ga toa ots ǃgâi sîsen-e nî hōse. (Kol. 3:23) Xawe sa ûibats ga ǀguiǀgui o, ob ge ra ǂkhâǃnâ tsi its huitsi nî ǁgaragu xa daoǁgauhe. Nēs ge ǁîb ǂâibasens tsî ǁîb ǂâis tsîna ǃkhōǂgā hâ nē ǀuni tsēdi ǃnâ. (Mat. 24:14) Jehovab ge hānîǁaeb xa a ǂan tsî mâǁaeb nē ǃhūbaiba nî ǀams tsîna. (Jes. 46:10; Mat. 24:3, 36) ǁÎb ge hoa da a ǂan—tae-i ama ǂkhîba ra mā das tsî tae-i ra tsûaǂgao tsî ǂkhîoǃnâ kai das tsîna. ǁNā-amaga matikōse di ga khoen ǀapemāde a ǃgâi xawe di ga Elobmîs ǀkha ǃgûǀhao tama io, o i ge gā-aisiba a ǀkhai. w18.12 19 ¶1-2

“Xawe tsamtsiǃnân ge ǃhūbaiba nîra ǀumi, tsî kai ǂkhîb ǃnâ nîra ǃgâiǃgâisen.” Davib tsîn ge ge ǂkhâǃnâhe îb xoa: “ǂHanu-ain ge ǃhūbaiba nîra ǀumi, tsî ǀamose ǁîb ai nîra ǁan.” (Psa. 37:11, 29; 2Sam. 23:2) Nēsa khoen hîna ge Elob di ǂâisa gere dī ǂgaona mati ge tsâǀkhā? ǁÎn ge ga ǂgom hâ ǂhanu-ai khoen ǀguin ga ǃhūbaib ai hâ hâ o, o î ge paradais hîna Edenni ǃhanab khami īsa ga hâ hâ. ǂGui Israelǁîn hîna ge Jehovaba gere ǃoaban ge ega ǁîba ge ǃoaba ǀû. Elob ge Babilonǁîna ge mā-am în ǁîb ǃoaba-aona mâǃoa, ǁîn xūna ū tsî ǂguina ǃkhōsis ǃnâ ū. (2Kro. 36:15-21; Jer. 4:22-27) Elob kēbo-aogu ge ge mî 70 kurigu khaoǃgân ge ǁÎb khoena ǁîn omde ǃoa nî oa. Nē kēbodi ge ge dīǀoaǀoahe. Xawe sida ǃgaos tsîna ǂâibasensa ūhâ hānî paradaisa ǃhūbaib ai. w18.12 4 ¶9-10

ǂGui ǀapemādi ǃhūbaib didi ge Elobmîs ǀkha ǀguiǃnâxa tama hâ. Xawe ǀnî ǀapemāde sada ûiǃnâ hâ ǁaeb ǃgao a ǃgâi? “Gā-aisiba ǁîb di ôan[sîsengu] xa ǂhanu-ai kaihe hâ” dib ge Jesuba ge mî. (Mat. 11:19) ǃHūbaib ge texnologib ǀkha ra aiǃgû, xawe î ge tātsēs tsîna hâ a kai ǃgomsiga a ǀamǀam ǁoa hîna ǂkhîba ra ūbeba. Aiǁgause torogu, ǃhao ǀgoras tsî ǂkhabadīb. O ǁîn khoesib tsoatsoade ra mû ǀgaub? ǂGuin ge ge mûǂan, nēs omaride ra ǀgora tsî ǀaegu tsî ǀnîhâ ǃgomsigu tsîna ra ǃaromasa. Tsîn ge nau ǀkhāb ai Xristeǁîn hîna Elob di ǂâi ǀgauba ra ūǃoana omaris ǂkhîb tsî ǀaegu hînan ra hōǃâgan a ǃkham ǃoa ǁkhā ǀgaub tsîna ra ǁkhāǁkhāsen. Tsî ǁnās tsîn ge ǀguiǃnâxasib tsî ǂkhîb tsîna Elob ǃoaba-aon ǁaegu ǃhūbaib ǂhawase ra aiǃgû kai. (Jes. 2:4; ǃNǃkh. 10:34, 35; 1Kor. 6:9-11) ǁNāsa amabes ǃnâ ǁgau tama hâ Jehovab ǂâi ǀgaub a ǀgapisa ǃhūbaib dib xa? w18.11 20 ¶8-10

Nēsi da ga ǃgâi ǀhōsagude omaris ǁanin ǀkha ga ra ūhâ tsî ǁîna khoexaǃnâ ǀgaub ǃnâ ga ra hâ-ū xawe da ge tā amaba nî ǁnāǃgâ ǁîna ǂkhîǂkhîs ǃaroma. Sida omaris ǁanin ǀkha da ǃgâi ǀhōsagusisa ǁkhā da as kōse ra ūhâ ǂgao, xawe da ge Jehovaba a ǀnam khoen ǀkha ǀgui ǀgū ǀhōsagusisa nî ūhâ. ǁÎn hîna amab ǃnâ ra ǃgûn ge nî ǃanu. (Jes. 35:8; 1Pet. 1:14-16) Amaba da ge ūǃoa o, o da ge hoada ǀkharaǀkharana ge dī i da Elobmîs ǁgaragu ǀkha ǀguiǃnâxase ûi. ǀNîn ge amase kai ǀkharaǀkharana ge dī. Mati ǀgui î ga ra ī xawe da ge tā sada ǃanu ǀgauba nē ǃhūbaib di ǀurixa ǀgaub ǀkha nî mādawa-am. Tae-e da a dī ǁkhā î da tā nē ǀurixa ǃhūbaib di ǀgaugu ǃnâ māǁnâsen? Jehovab ge a māda kai ǀkhaeb xa da ge nî ǂâiǃgâ, ǁnāb ge ǁîb di ǀgôab Jesub Xristub di ǀaoba. (1Pet. 1:18, 19) ǃAnuse da ga Jehovab aiǃgâ ga ra mûhe ǂgao o, o da ge Xoremarib a ǂoaǂamsa ǀgaub xa nî ǂâiǃgâ. w18.11 11 ¶10-11

ǂGui ǃgâsan hîna ǀoasase ra ǃoaban ge ra mî aoǁnâ sîsenni ǃnâ ǃnāsase dīs ge ǁîna ra hui ǀkharaǀkharan ga ra hâ ǁaeb ǃnâ. ǁÎn aiǁgaudi go ǁgau khami da ga sida tsîna sida mâsib ǃnâ ǃgâina ga ra mû o tsî Jehovab ai ǃnūǃnâxase ga ra ǃâu o, o da ge ǃgâiaǂgaoba nî hōǃâ. Tsî da ge nî mûǂan gagasise da nî ǀamasa nē ǀkharaǀkharan ǃnâ-ū. Sida mâsib ga gagasi ǁgaumâi-i, ǀaeb mâsib tamas ka io omaris mâsib xa ga ra dawa o, o da ge ǂâis ǃnâ nî ūhâ Jehovab sida ra kōǃgâsa tsîb ǂhanu ǁaeb ai nî hui dasa. (Heb. 4:16; 1Pet. 5:6, 7) ǁNās ǀkha nēsi sadu mâsib ǃnâ ǃgâina mû re. Jehovab ǃoa ǀgores ǃnâ-ū ǀgū re tsî sadu ǃgomsiga ǁîb ǃomdi ǃnâ xu re. Nē ǀgaub ǃnâ da ge ǀkharaǀkharana da ga ra hōǃâ xawe nî ǃgâiaǂgao. w18.10 30 ¶17; 31 ¶19, 22    

Elobmîs ge ǂgui aiǁgaude ūhâ hîna ra ǁgaude Jehovab mati ǁîb ǃoaba-aon xa ra ǂâisa. Mû re Jehovab ge mati Samuela a huisa îb ǀgoraǃgâs haisi-amsa ǀgapi pristeri Eliba sī mîba hîna 1 Samueli 3:1-18 ǃnâ mâ de. Jehovab ge ǀgôana ge mîmā în kaira khoena ǃgôasiba ǁgau. (Eks. 22:28; Lev. 19:32) ǂÂi re Samueli ga Eliba ǃoa ǁgoaga ī tsî Elob ǀgoraǃgâs haisi-amsa mîba hâ o? ǁNās ge ga ī tama hâ. Nē ǃnaeǃkhais ge ra mî ‘Samueli ge nē ǁhaposab Eliba ǂanǂansa ge ǃao’ di. Elib ge nēsa mûǂan tsî Samuela ge mîba îb ǃhoa tsî tā ǀgui ‘mîs’ tsîna sâu. Samueli ge “ǁnā mîdi hoade ge ǂanǂan.” Nē haisi-ams ge ‘Elob ao-i’ [ǀhōsa-i] hîna ge ǀgapi pristeri ǀkha a ǃhoab di haisi-ams ǀkha ge ǀgui-i. (1Sam. 2:27-36) Nē ǃnaeǃkhais ge ra ǁgau da Jehovab mati khoen tsâsigu xa ra ǂâi ǀgaus tsî matib a gā-ai ǀgaus tsîna. w18.09 23 ¶2; 24 ¶4-5

Ama tama xūna ǃhoa mās ge tsū tama hâ nētsēs ûib ǃnâ. “Why We Lie” di hâ ǂkhanis hîna Y. Bhattacharjeeb xa xoahe hâs ge ra mî, “ǂhumib ge khoe-i ǀgaub di ǀguib ase ra mûǂanhe di.” Khoen ge ra ǂhumi în xū-e xu ǁkhaubasen ǁkhā tamas ka io ǀgapiǀgapisen. Tsîn ge ǀnîna ra ǂhumi în ǁîn dīsāde ǃū-ai tsî tsūdin go xū-e xu ǃnora ǁkhā. Tamas ka io marihe hōs tsî aitsama ǀgapiǀgapisens ǃgao. Khoen ǁîn ǀgūkhoen, ǁanǁare-aon tsî ǀhōsan tsîna ra “ǂhumibas ge kai tamas ka io ǂkhariro ǀgaub ǃnâ ra mûhe.” Nēsa tae-i ǀamǂoasa ūhâ? ǂGomǃgâgus ge ra toa tsî î ge ǀhōsagusis tsîna ra ǀam. Psalmdi xoa-aob Davib ge Jehovab ǃoa ge ǀgore: “Sats ge turaba ūhâ ǃnāb ǃnâ hâ amab ǃnâ.” (Psa. 51:6) Davib ge ge ǂan-i ǂhauǃnâsib ǂgaob ǃgamsiba xu ra hāsa. Xristeǁîn ge mâǁaeb hoaba “amaba” ra ǃhoa.—Sax. 8:16. w18.10 7 ¶4; 8 ¶9-10; 10 ¶19

Israelǁaes ge Egipteba xu 1513ǁî kuri a ǃnora kaihe o, on ge 3 miliuns xa ge ǃnāsa i. ǁNāpa î ge ǀgôan, kaira khoen tsî ǃhora hân tsîna ge hâ i. Nē khoena Egipteba xu ǂgaeǂguis ge gā-aisib tsî khoen tsâsigu xa ǂâis tsîna ge ǂhâ hâ i. Jehovab ge Moseb ǃnâ-ū nēti i ǀgauba ge ǁgau. Israelǁaes ge kaise ǃnorasase gere tsâ ǁîn omsa xun gere ī o. (Psa. 78:52) Jehovaba mati ǁîb khoena ǃnorasa tsî ǁapoǁaposase gere tsâ kai? ǁÎb ge ǁîna Egipteba xu ǃamku ǀgaub ǃnâ “garu daob ǃgaroǃhūb” dib ǀkha ge daoǁgau. (Eks. 13:18) Nēs ge Israelǁaesa ge ǁgau Elob ra ǂgaeǂgui ǃkhaisa. Jehovab ge “tsēa ǀnanus ǀkha gere ǂgaeǂgui, tsî tsuxub hoaba ǀaes di ǃnâb ǀkha” tsî nēs ǃnâ-ū ge ǂhaiǂhaisen. (Psa. 78:14) Tsî nēs ǃnâ-ūb ge Jehovaba ge mî: “Tā ǃao re. Tita ge sa ǀkha hâ tsî nî daoǁgau tsî kōǃâ du.” w18.09 26 ¶11-12

Elobmîs ǁaegu ǃnâs tsînan ge Eloba gere ǃoaba khoena ǁîn mâsib xa gere ǂkhabuǂâi tsî gere ǁō ǂgao. Aiǁgause, Jobi ge tsûb xa gere ǃgae: “Tita ge ǀamose ûi ǂgao tama hâ” dib ge ge mî. (Job 7:16) Jonab ge ge tsûaǂgao xūn ge ǁîb ǁgaumâis ǃnâ ǃgâise ǃgû tama io tsîb ge ge mî: “Tsî nēsi ǃKhūtse, ti ǀomsa ūxu te, ǁōs ûis xa a ǃgâiba te xuige.” (Jon. 4:3) ǂGomǂgomsa kēbo-aob Eliab tsîn ge ǁîb mâsib xa kaise tsâǀkhāhe tsî gere ǁō ǂgao. ǁÎb ge ge mî: “ǂÂu go nēsi, ǃKhūtse, îts ǁnâi ti ǀomsa ū.” (1Gao. 19:4) Xawe Jehovab ge ǁnā ǃoaba-aogu nî ûi ǃkhaisa gere ǂhâba. ǁÎga ǀgoraǃgâs xab ge Jehovaba ge huigu îgu ǁō ǂgaos tsâsiba dan tsî ǁîga ǀnammi ǃnâ ge omkhâi îgu ǁÎba ǃoaba ǁkhā. w18.09 13 ¶4    

Elob sîsenǀhao-aon ge ǃhaokhoeǃkhōǃoaxasib ai a ǂansa. Xristeǁî Grikegowab Xoadi ǃnâs ge mîs “ǃhaokhoeǃkhōǃoaxasib” di hâsa “ǃgâisiba ǃhaokhoe-e” ǁgausa ǃoa ra ǁnaeǁgau. (Heb. 13:2) Elobmîs ǃnâ i ge ǁnāti i ǃnaeǃkhaide ǃkhōǂgāsa tsî ǀnamma ra ǁkhāǁkhā da. (Gen. 18:1-5) Mâ ǃēs hoasa da ge nî ū î da ‘ǃgâsana hoaǁae hui,’ sida ǀaokhoe taman ga i xawe. (Gal. 6:10) ǃHaokhoeǃkhōǃoaxasiba da ge a ǁgau ǁkhā Jehovab ǀkha sîsenǀhaos ǃnâ-ū tsî Jehovaba ǀoasase ra sîsenba ǃgâsana a sari ǁkhā. (3Jhn. 5, 8) ǁNāti i sarigudi ge ‘ǁkhaeǂgaogusa’ ra ǂkhâǃnâ. (Rom. 1:11, 12) Elobmîs ge ra ǂkhâǃnâ î gu aore ǃgâsagu hîna ǀhaohâb ǃnâ hâ ga khoraǂuisen aiǂhanugu ǃaroma. (1Tim. 3:1, 8, 9; 1Pet. 5:2, 3) Nēsa ra dī ǂgaon ge nauna hoaǃnâ-aixases tsî gagasises tsîna nî hui. (ǃNǃkh. 6:1-4) Nē aiǂhanuga ǀnai ūhâ ǃgâsagu ge kaise a ǁkhoaxabahe ǃgâsana huisa. w18.08 24 ¶6-7; 25 ¶10

Timoteub ge kaira ǃgâsagu xa ǀgapi ǃharosa ūhâ i xaweb ge ǁîga khoexaǃnâsib tsî ǃgôasib tsîn ǀkha gere hâ-ū. Xawe nēsa da mās kōse nî ǁnâuǀnam? Aiǁgause, kaira ǃgâsa î ga ǂan î a hîna ga ra ǁore os tamas ka io Jehovab ǃoa ai ǃgâi tama xū-e ga ra dī o? Jehovab ge ai-īsib ǃoagu ǀgoraǃgâ tide tsî khoe-e kaira i a amaga ǀgoraǃgâ tide. Jesajab 65:20 ge ra mî: “ǁOre-aob ǀguikaidisi kurixab” ga ra xawe nî ǁnamahe di. Nē tsoatsoas ge Esegieli kēbos ǃnâs tsîna hâ. (Ese. 9:5-7) Xawe kaise a ǂhâǂhâsas ge Jehova Eloba ǃgôasiba ǁgausa. (Dan. 7:9, 10, 13, 14) Nēsa da ga ra dī o, o da ge ǃao tide nau khoena huisa ǃgâi tama xū-e i ga ra dī o.—Gal. 6:1. w18.08 11 ¶13-14

Ama Xristeǁîn ase da ge ǁnâu da ra xūna ǃgâise ǂōrisase ôaǃnâ tsî ǃgâi ǀamǂoasa nî hō. (ǂKhm. 3:21-23; 8:4, 5) Nēsa da ga dī tama ga ra io, ob ge ǁGâuaba sada ǂâi ǀgauba a ǂgaeǂhapu ǁkhā nē ǃhūbaib di dī xūn ǀkha. (Efe. 5:6; Kol. 2:8) ǁNās ǀkha da ge amaba da ga ra ǁnâu o ǀgui ǃgâi ǀamǂoasa nî ho. Nētsēn ge khoena ǂgui xūna a ǂan. Internets ǂhawegu, ai-īsiǂhôaǂgares tsî ǀnî hâ mediab xūn tsîn ge ǂguiǃnâgu xūna ra ǂhôa. ǂGui khoen ge emailan, sms an tsî ǂhôan ǃkhaiga xus tsîna ǃkharagagu ǂhôana ra hō. Khoen ǁnaetib ase ama tama xūna ra ǀgora ǃkhais ǃgao da ge kaise ǂhaikhari nî hâ tsî ǁnâu da ga xū-e nî ôa ǃgao. w18.08 3 ¶1, 3    

Elob ǀGôab nî ǃnaehe ǁaeb aib ge Jehovaba ǃgamǃgamsen hâ ǂkhamkhoesa ge ǁhûi. ǁÎs ge a Maria, ǀō-aisa ǀgôab di ǁgûsa. Marias ge ǀgâsa ǃās Nasarets ǃnâ gere hâ, kaise ǃnūse Jerusalems tsî kai tempeli tsîna xu. (Luk. 1:26-33) Marias ge ǁîs gagasiba ge ǁgau egas ge Elisabets ǀkha a ǃhoa o. (Luk. 1:46-55) Ama as ge Jehovab ge Mariasa ǃgaoǃgâxase gere kō. Tsîb ge ǁîsa ǃâubasen tamas hâ hîna nē aiǂhanuba ge mā, ǁîs ǂgomǂgomsasib ǃgao. Jesub ge ǃnaehe o, ob ge Jehovaba ǀnî hâ ǂanǂansa khoe-e ge mîba tama hâ i tae-i ge Betlehems ǃnâ a īsa. ǀHomǃgāgu ge ǀgâsa gūre-aogu aiǃâ ge ǂhai hîna ge Betlehems ǃgauga ǁîgu di gūna gere kōǃgâga. (Luk. 2:8-14) Nē gūre-aogu ge nē ǀgôaroba ge sari. (Luk. 2:15-17) Marias tsî Joseb tsîn ge ǀnîsi kaise ge buru Jesub ge nēti i ǀgaub ǃnâ a ǂanǃgâhe o. w18.07 9-10 ¶11-12

Jehovab ǁaiba tae-i ǃaroma Salomob ǃoa-ai ge khâi? Elobmîs ge ra mî: “ǂGaob âb ge ǃKhūb [Jehovab, NW], . . . , ǁîb tawa ǀgam ǃnāra ge ǂhaiba xu ge ǂō amaga, tsî nē ǃkhais xab ge ǁîba mîmā xui-ao, ǀkhara elogab saoǃgon tide ǃkhaisa, xaweb ge ǃKhūb [Jehovab, NW] ge mîmā bina ǃkhōǀgaipe tama ge hâ i.” Nēs ge ge ǃaroma îb Jehovaba ǁîb mā-ams tsî ǂkhâǃnâs tsîna Salomoba xu ǃkhō-oa. Salomob ǀumi-aon ge ǀguiǃnâxa gaosiba ge ǂoaǃnâ tsî ǂgui ǃgomsina gere hōǃâ. (1Gao. 11:9-13) Salomob khami i ge gagasise a ǁkhōǁkhōsa Jehovab ǁgaraga ǁnâuǃā tama hâ khoen ǀkha ǀhōsagusisa ūhâsa. ǀNîn ge ǀhaohâb ǃnâ a hâ ǁkhā xawe ǀnîsi gagasise a ǁkhōǁkhōsa Jehovab ǁgaraga ǁnâuǃā tama hâ khoen ǀkha ǀhōsagusisa ūhâ ǃnâ-ū. ǀNîn ge ǀhaohâb ǃnâ a hâ ǁkhā xawe ǀnîsi nēti ǁgausen tama hâ. Mâ hâ ǃkhais ge nē ǀhōsan ga Jehovab ǂhanuga ǃgôasiba ūhâba tama io, on ge sida ǃgâi mâs Jehovab ǀkha da ūhâsa a khôa ǁkhā. w18.07 19 ¶9-10

ǁGâuab ge muvin tsî ai-īsiǂhôaǂgares tsîna ra sîsen-ū ǁîb ǂâi ǀgauba khoraǂuis ǃnâ. ǁÎb ge a ǂan muvin tsî ai-īsiǂhôaǂgares tsîn ǃnâ da ǃgâiǃgâibasensa ūhâsa tsî nēs ǃnâ-ū sida ǂâi ǀgaub tsî tsâsigu tsîna ra ǁgaiǁgai. Jesub tsîn ge ai-īsiga ǁîb ǁkhāǁkhās ǃnâ gere sîsen-ū. ǁÎb di ǂkhōs Samariaǁîb dis tsî ǀgôab hîna ge omsa xu ī tsî ǁîb ǀumisa a hîǀhurub xa ǂâi re. (Mat. 13:34; Luk. 10:29-37; 15:11-32) Khoen hîna ǁGâuab ǂâi ǀgauba ūhân ge nē ǀgauba a sîsen-ū ǁkhā nau khoena ǁgaiǁgais ǃnâ. Xawe sida ge ǀnōsa ǀgauba nî ūhâ. Muvin tsî ai-īsiǂhôaǂgares tsîn ge a ǁkhāǁkhā da ǁkhā ǁgaiǁgai da tama hâse. Xawe da ge nî ǂan. ǁKhoaxa ǁaeba ūhâsa da ga ǁhûi o, o da ge nî dîsen, ‘nē ta ra kō xū-e ra ǁgau ǃgâi i ge a ti sorosi turagu ǃnâ māǁnâsensa di?’ (Gal. 5:19-21; Efe. 2:1-3) Tae-e du nî dī mû du ga o, kō du ra xū-i ge ǁGâuab ǂâi ǀgauba ūhâ di? ǁKhōǁkhōsa ǀaeba xu du nî ǂgōsen khami nēsa xu ǂgōsen re. w19.01 15-16 ¶6-7

ǀGapas ǃkham-aob di ǂkhûsa ra ǁkhauba khami î ge ‘ǃâubasens ǀgapasa’ sida ǂâi ǀgauba ra ǁkhauba. (1Tes. 5:8; ǂKhm. 3:21) Satanna mati a ǂgaeǂhapu da ǁkhā î da sida toroǀgapasa ūǁnâ? ǂÂi re Satanni ge Jesub ǀkha tae-e a dīsa. Satanni ge ge ǂan i Jesub ge ǃhūbaiba ǂgaeǂguis ǃâubasensa ūhâ isa. Xaweb ge Jesuba ga ǃâu hâ Jehovab nî ǁgaumâi bis kōse. ǁNās aiǃâb ge aibe ǃgomsina hōǃâ tsî nî ǁō. Satanni ge ǁnās ǀkha Jesuba ǀnai ǁîb ǃâubasensa gere dīǀoaǀoa kai ǂgao. ǁÎb ge Jesuba ge mîba îb ǁîba ǃoaba, ob ge hoa ǃhūbaiba nî mā bi di. (Luk. 4:5-7) ǁNās ǁkhās khamib ge Satanna a ǂan Jehovab sida ǂhâsiga ra kōǃgâsa. Xawe da ge nî ǃâu ǀgara tsî ǃgomsiga nî hōǃâ. Satanni ge nētsē ra ǃâitsâ da î da ǁkhoaxa ûiba ûi ǁîb mûǂuis ǃoagu. ǁÎb ge ra ǂhâba î da ǃhūbaib di xūna ǂgurose mâi tsî ôa. Tsî Gaosiba ǀgamǁîse mâi.—Mat. 6:31-33. w18.05 30-31 ¶15-17

Jehovab ge ǂhâba hâ în ǂkhamkhoena ǃgâiaǂgao. Sa ǂâisa gagasi mîǁguiga dīs ai mâi re tsî Jehovaba sadu di ǀapedi hoadi ǃnâ ūhâ re. Nēsats ga ǁaeb aiǃâ ga ra dī o, o i ge nî supu Jehovab daoǁgaus, ǁkhaubas tsî ǀkhaeb tsîna mûǂansa. Jehovab mîs ǃnâts ra hō ǁnamasa ūǃoa re, sao ra mîdi ǀkha: “Îts sa Kuru-aob xa ǂâi ǂkhamkhoesis âts di tsēdi ǃnâ.” (Aoǁn. 12:1) ǀHaohâb ǃnâ hâ ǂkhamkhoen ge koahesa anu hâ Jehovaban ǀoasase ra ǃoaba ǂgao amaga. ǂKhamkhoen ge ǃgâi gagasi mîǁguiga dīs tsî aoǁnâ sîsenni ǃnâ ǁhaos ǃnâ-ū nēsa ra dī. ǁÎn ge ra mîǁgui xū-i ǁîna ǃkhō-oa tidesa. ǂKhamkhoen ge ǂâis ǃnâ nî ūhâ ǁîn sîsengu ge tātsēs tsîna ǀuruhe tide. ǁÎn ge ǃgâi huiba ǁîn Xristeǁî ǃgâsana xu nî hō. Tsîn ga Jehovaba ǃoa ga ra kō o ǁîn ûib ǃnâ ob ge ǁîba ǁîn daoga nî ǂhanuǂhanu. w18.04 29 ¶17, 19