Junib 

Nē mîmâis ge kaise apostelga ge ǀgaiǀgai. ǁÎgu ge nēsa ǀoasase ge ǁnâuǃā tama hâ i. ǁÎgu ǂGaeǂgui-aob di ûib ǀgūǁae nî ǀam xawe gu ge huib ose ge hâ tama hâ i. Jehovab ge ǁîgu ǀgorede ge ǁnâu-am îgu ǁîgu mîmās Gaosib ǃgâiǂhôasa aoǁnâs disa dī hō. Tsî gu ge nēsa ǁaerob ǃkharu hâse ge hōǃâ ǁîgu ǀgoredi ge ǁnâu-amhe o. (ǃNǃkh. 4:29, 31) ǁNās tsîn ge nētsē a ama. ǂÛtanis ǃnâ da ra mâǀgai khami da ge Jesub ǀkha da ūhâ ǀhōsagusisa xu ǃgâiba nî hō. Tsî da ge ǂgomǃgâsib tsîna a ūhâ ǁkhā Jehovab sida ǀgorede nî ǁnâu-amsa Gaosib ǃgâiǂhôasa da ra aoǁnâ hîna nē ǃgom ǁaegu ǃnâ. (Fil. 4:13) Kai ǀkhaeb ge sida ǀgorede ǁnâu-amhesa tsî Jesuba sida ǀhōsase ūhâsa. Nē ǀkhaeb hîna Jehovaba xu ra hāb ge ra ǀgaiǀgai da ǂûtani da ga o.—Jak. 1:17. w18.05 21 ¶17-18

Koro kurigu khaoǃgân ge Jodeǁî Xristeǁîna Jerusalems ǃnâ gere hâna ‘ǃKhūb di kai tsēsa’ ge mû tsî nēs ǀkha Jesub ge mî mîde ge mûǂan în ǁnā ǃāsa xu ǃkhoe. (ǃNǃkh. 2:19, 20; Luk. 21:20-22) “ǃKhūb di kai tsēs” ge 70ǁî kuri ge hā, Romeǁîn ge Jerusalems ǃnâ hâ khoena gere ǀgoraǃgâ ǁaeb ai. Nētsē da ge ra ǂgom “kai tsî kaise ǃaoǃaosa” tsēs Jehovab dis ǃgôaxasa. (Joe. 2:11) Sefanjab ge ge mî: “Kaitsēs ǃKhūb dis ge a ǀgū, ǁîs ge a ǀgū tsî kaise a ǃhae.” (Sef. 1:14) Nē kēbos ge sida tsēdi ǃoas tsîna ra ǁnaeǁgau. Jehovab kai tsēs xab ge Pauluba ge mî: “Î da kōǃgâ ǀnammi tsî ǃgâi sîsengu hōhōǃnâgu ǃoa.” (Heb. 10:24) Nēs ge ra ǂâibasen nau ǃgâsan ǃnâ da ge ǃgâiǃgâibasensa nî ūhâ tsî ǁîna nî ǂkhâǃnâ. w18.04 20 ¶1-2

Jehovab ge Josuaba a mā ǁkhaeǂgaos ǁîb khoenab mîmâisa ǃhūb ǃnâ ni ǂgâ-ūs aiǃâs ge ge ǂoaǂamsa i. Jehovab ge khoena ǂkhâǃnâs ǀguisa ge dī tama hâ i xaweb ge ǁîna ǁkhaeǂgaos mîde gere mā. Nēs ge Jodeǁîn hîna ge Babilons ǃnâ ǃkhōsis ǃnâ hâ îna ǁkhaeǂgaos ase ge ība i. Jehovab ge ge mî: “Tā ǃao, tita ge sa ǀkha hâ xuige; tā sau, tita ge a sa Elo xuige. Tita ge ra ǀgaiǀgai tsi, tita ge ǁkhāti ra hui tsi; tita ge ǁkhāti ra mâǃgâ tsi amǀkhābǁôab ti ǂhanu-aisib dib ǀkha.” (Jes. 41:10) ǃKharu ge ǁaeb Xristeǁîn ge nē ǃâubasensa ge ūhâ i tsî sida tsîna nētsē. (2Kor. 1:3, 4) Jesub tsîn ge ǁîb ǁGûb xa gere ǁkhaeǂgaohe. ǁÎb ǁāǁnâs tawab ge Jesuba domma ge ǁnâu, mî rase: “Nēb ge ti ǀgôab, ǀnam ta aba, ǃgâiǃgâibasensa ta ūǃnâ hâba.” (Mat. 3:17) Nē mîdi ge Jesuba ǃhūbaib aib ge hâ io gere ǁkhaeǂgao. w18.04 16 ¶3-5

Jehovab ge Adamma a mā mîmāsa khomai tsîn ge khoena ra mî Jehovab ge Adammi ǃnorasasiba a ūbē di. Nēs ǀkhan ge khoena aitsama ǁhûibasens, ǃgâin tsî tsūn ǁaegu mîǁguis ǃnâ ra are. Adammi tsî Evas tsîn ge ǃnorasasiba ge ūhâ i Eloba ǁnâuǀnamsa tamas ka io ǁnâuǀnamoǃnâsa. Xawe nēn hoan ǃnâb ge Jehovab ǀguiba a ǂan tae-i a ǃgâis tamas ka io a tsūsa. Tsî nēsab ge “hais ǃgâib tsî ǂkhabab tsîkha ǂans” dis ǃnâ-ū Edenni ǃhanab ǃnâ ge ǁgau. (Gen. 2:9) ǁNā mîmās ǃnâ-ūb ge Jehovaba Adammi tsî Evas tsîna ge ǁgau îra ama ǃnorasasiba ūhâ. ǁGauhe ras ǃoagu ra ge sada ǂguro ǂgûra ge ǁnâuǀnamoǃnâ. Adammi tsî Evas tsîna ǁîra di ǃnorasasiba aitsama ge āxū tama hâ i? ǁÎra ge di ge dī. Aitsama ra ge ǂgomǃgâsen ǃkhais ǃgao ra ge ǃnorasasiba ge ǂoaǃnâ. w18.04 5-6 ¶9-12

Jehovab ge ǁîb ǃoaba-aon hîna ǃgomsina ra tsâna tsâbaǁhaos ǀguisa hî tama hâ. Xaweb ge xū-e ra dī ǁîna huisa. Aiǁgause, Israelǁaes ge Egipteb ǃnâ ǃgoma gere tsâ o, ob ge Jehovaba ǁîn ǃgomsiga gere ǁnâuǃā tsî ge ǁgari-e ǁîna huisa. Jehovab ge Moseb ǃoa ge mî: “Tita ge go mû ti ǁaes Egipteb ǃnâ hâs di ǁgâiǀāba, tsî ta ge ǁîn di ǃausa go ǁnâu . . . ǁîn di tsûga ta ge a ǂan. ǁNā-amaga ta ge tita go ǁgôaxa, Egipteǁîn di ǃomǁaeba xu ta nî ǁîna orega.” (Eks. 3:7, 8) Jehovab ge ǁîb khoenab gere tsâba amaga ǁîna ǃgāsisa xu ge ǃnoraǃnora. ǂGui kurin ǃkharu hâses ge Israelǁaesa mîmâisa ǃhūb ǃnâ gere ǁgâiǀāhe ǁîn saoǃgōn-aon xa. Jehovaba tae-e ge dī? “ǃKhūb ge ge ǃhausen ǁîn di ǀhâimâinǀoms, ǁnān, ǁîna ge ǁgari tsî ǁgâin xan ra ǀhâimâinǀoms ǃaroma.” Tsâbaǁhaos ge Jehovaba ge tsâǀkhā îb ǁîb khoena hui. ǁÎb ge ǀgoraǃgâ-aoga ge sî în Israelǁîna ǁîn khākhoena xu sâuhe.—ǂHǂh. 2:16, 18. w19.03 15 ¶4-5

ǂGuro ǀgam mîmāra disi mîmādi di ra ge ra ǂgaoǀkhā în Israelǁîna Jehovab ǀguiba ǃoaba tsî nau eloga ǃoabasa xu ǂgōsen. (Eks. 20:3-6) Nē mîmādi ge Jehovab ǃgâib ǃgao ge hâ tama hâ i. Xawe khoen di ǃgâib ǃgao ge hâ i. Tsî nau elogan gere ǃoaba o, on ge ǃgomsina gere hōǃâ. Jehovab ge ǁîb khoena ge ǀkhae ǁîb ǃoa-ain ge ǂhauǃnâse a hâ amaga tsî ǃgâi ǀgaub ǃnâ gere hâ-ūgu o. (1Gao. 10:4-9) Jehovab ge a ǀhapi-o ǁnān hîna ǁîban ra ǃoaba di ra mîn ga ǁîb ǁgaraga ǁnâuǀnam tama i tsî ǁîb khoena ga ra tsûtsû o. Jehovab ge a ǀnam da tsî a ǂan ǃgomsina da ga ra hōǃâ o. ǁÎb ge sida tsûga ra tsâ ǁgûs ǁîs ǀgôa-i tsûba ra tsâs xa ǃnāsase. Xū-eb nēsi dī tama hâ xaweb ge ǀgūǁae tsūdī-aona ǁîn ǃgâi tama hâ dīgu ǃgao nî ǀgoraǃgâ. w19.02 22 ¶13-15

Jesub ǁōb ǂâiǂâisens aisi hâ wekhegu ǃnâ da ge Jesub ǃgamǃgamsenxasib aiǁgaude ǃoa ra kō hîna ge ǁgari bi de ǁîb ûiba mâs ǃnâ. ǁÎb di ǃgamǃgamsenxasiba ǁgaesa da ge ra dītsâ ǃgom-i ga xawe. ǁKhoaǂgaosib hîna da ǁîb ǁōb ǂâiǂâisens tsēdi aiǃâ ra ǁgaub xa da ge ra ǂâi. ǁÎb ge ge ǂan i ǁîb khākhoen nî taotao bi, ǂnau bi tsî ǀgoraǃgâ bi ǃkhaisa. (Mat. 20:17-19) Xaweb ge noxoba māsenxase ge ǁō. ǁAeb ge mâtoa o, ob ge ǁîb di ǂgomǂgomsa apostelgu ǃoa ge mî: “Khâi î go ǃgû; kō, tita ra ǀapexūb a ǀgū xuige.” (Mat. 26:36, 46) Tsî ǁnā ǂnubis khoen ge ǃkhō bi ǃgû ǀkhī ob ge aisǀkhāb ǀkha ge ǂoaxa tsî ǂnubisa ge mîba îgu ǁîb apostelga ǃgû kaihe. (Jhn. 18:3-8) Jesub ge mâǂoa ra ǁkhoaǂgaosiba ge ǁgau. Nētsēn ge ǂkhauhesan tsî nau gūn tsîna Jesub ǁkhoaǂgaosiba ra ǁgae. w19.01 27-28 ¶7-8

Khoe-i ai-īsiga ra ǀhaoǀhao î-i îsa khami da ge sida tsîna ǂgui ǀgauga nî ǀhaoǀhao i da tsamtsiǃnâsiba omkhâi. Nē ǀgaugu ǀnîgu ge ǃgamǃgamsenxasib, ǁnâuǀnamxasib, tsaurasib tsî ǀgaib tsîna. ǃGamǃgamsenxa khoen ǀguin ge Elob ǂâisa dīsa ra ūǃoa. Elob ǂâis ge i da tsaura. (Mat. 5:5; Gal. 5:23) Elob ǂâisa da ga dī o, o da ge ǁGâuaba ra ǁaixa kai. ǃGamǃgamsenxa tsî da ga tsaura xawen ge ǂgui khoen hîna ǁGâuab ǃhūbaib dina ǃhui da hâ. (Jhn. 15:18, 19) ǁNās ǀkha da ge ǀgaiba ǂhâ hâ ǁGâuaba mâǃoasa. Tsamtsiǃnâ tama hâ khoe-i ge ǃhaese ra ǁaixa tsî Jehovaba ǁnâuǀnam tama hâ. Nēs ge ǁGâuaba ǃgâise ra ǁguiǃā. ǁNā-amagab ge ǁîba tsamtsiǃnâ khoena ǃhui hâ. ǁÎn ge ǁîb a ǁgai ǀgausa ra ǁgau ǁîn ǃgâi ǀgaugu hînab ǁîba ūhâ tama hâga ǁgaus ǃnâ-ū. Tsîn ge ǁîb a ǂhumi-ao ǃkhaisa ra ǁgau. Tae-i ǃaroma? Dīb ga ra xūn hoan ǃnâb ge tsamtsiǃnâ khoena a ǀû kai ǁoa Jehovaba ǃoabasa.—Job. 2:3-5. w19.02 8-9 ¶3-5

Jehovab ge Babilons ǃnâ hâ khoen nî ǃaosa ge ǂan i. Babilons ge nî ǁnāǂamhe Medo-Persiab toroǃkham-aogu xa. Jehovab ge ǁîb khoena ge hui în ǃkhōsisa xu Babilonsa ǃoa ī. (Jes. 41:2-4) Babilonǁîn tsî ǀnî hâ ǃhaos khoen tsîn ge ǁnâu o ǁîn khākhoeb hās ge go ǀgū di, on ge ǁkhoaǂgaosiba gere omkhâi: “ǀGai re” di mîbagus ǃnâ-ū. ǁÎn ge noxoba ǀnî hâ eloga gere kuru, nē elogu ǁîna nî ǁkhauba di ǂâi tsî. (Jes. 41:5-7) Xaweb ge Jehovaba Jodeǁîn ǂgaoga gere ǃnomǃnom sao ra mîdi ǃnâ-ū: “Xawe sats Israelts, ti ǃgāts . . . tā sau, tita ge a sa Elo xuige.” (Jes. 41:8-10) Mû re nēpab ge Jehovaba “tita ge a sa Elo” di ge mî. Jehovab ge nē mîdi ǃnâ-ū ǁîb ǃoaba-aona gere ǁgau ǁîb ǁîna ǀuru tama hâ ǃkhaisa tsîn ǁîna noxoba a ǁîb khoesa. ǁÎnab ge ge mîba: “Tita ge sado nîra ūkhâi, tsî tita ge sado nîra . . . ore.” Nē ǁkhaeǂgao tsî ra ǂkhâǃnâ mîdi ge Jodeǁîn hîna ge ǃkhōsis ǃnâ hâ ina gere ǀgaiǀgai.—Jes. 46:3, 4. w19.01 4 ¶8

Markub 1:9-11 ge ǂguro ǃnās ǃnona ǃnādi dis Jehovab ge ǀhomma xu a ǃhoas xa ra ǃhoa. Jehovab ge ge mî: “Sats ge ti Ôats ǀnam ta ats, ǃgâiǃgâibasensa ta ūǃnâ hâtsa.” Jesub ge kaise ge tsâǀkhāhe hâ i ǁîb ǁgûb dommab ge ǁnâu o ǀnammi tsî ǂgomǃgâsib tsîna ǁîb ǃnâ ra ǁgause. Jehovab mîdi ge ǃnona xūna Jesub xa ge ǁgau. ǂGurose Jesub ge a ǁîb ǀGôa. ǀGamǁîse, Jehovab ge Jesuba a ǀnam. Tsî ǃnonaǁîse, Jehovab ge ǁîb ǀGôaba ge ūǃoa. ‘Sats ge ti Ôatsa’ di hâ mîdi ǃnâ-ūb ge Jehovaba ge ǁgau ǁîb ǀnamǀnamsa ǀGôab Jesub ge ǁîb ǀkha ǀasa ǀhōsagusisa ge kuru di. Jesub ge ǀhommi ǃnâb ge hâ io, o ge Elob gagasi ǀGôa i. Xaweb ge ǁîb ǁāǁnâs tawa ǃanu gagab ǀkha ge ǂkhau-e. Nē ǁaeb ǃnâb ge Eloba ge ǁgau Jesub a ǁîb ǂkhauhesa ǀGôa ǃkhaisa tsîb Gao-ao tamas ka io nî ǀGapi prister kaisa. (Luk. 1:31-33; Heb. 1:8, 9; 2:17) ǁNās ǀkha î ge a ǃgāsa Jesub ǁāǁnâs tawab ge ǁîb ǁgûba tae-i ǃaroma: “Sats ge a ti Ôa” di a mîsa.—Luk. 3:22. w19.03 8 ¶3-4

Tsū mîǁguigu ge khoen tsoatsoas ǃnâ ǃgâi tama ǀamǂoasa ge ūhâ i ǁGâuab ge ǁnâs ǃnâ ǃâ-i amaga. ǀGapi ǃgôasen aob ǁGâuab ge Evas tsî ǁîs aob tsîna ge mîba ǂkhîba ra ge nî ūhâ aitsama ra ga ǁhûibasen o. (Gen. 3:1-6) ǁGâuab ge ǁîb ǃgâib xa ǀgui gere ǂâi. ǁÎb ge Adammi, Evas—tsî ǁîra surib—tsîn ǁîba Elob ǃoa-ai nî ǀgoreǀî ǃkhaisa ge ǂhâba hâ i. Jehovab ge khoena ǂhân hâ xūn hoana ge a mā—ǁî-aogu ra tsî îsa ǃhanab tsî ǀoasa sorodi ǀamose nî ûi di. Xawe ra ge Adammi tsî Evas tsîra Elob ǃoa-ai ge ǁnâuǀnamoǃnâ. ǀAmǂoas ge ǂan da ase ge ǃoaxa i. Hais hîna ǁhâǁnâhe hâs khami ra ge ǁîra ǂaub ǀkha ge ǁō tsoatsoa. ǁÎra surib tsîn ge nēs xa ge tsâǀkhāhe. (Rom. 5:12) Xawen ge ǂgui khoena noxoba ra ǁhûi Eloba ǃoaba tama isa. ǁÎn ge ǁîn ûiga ǁîn ǂhâba hâ khami ra ûi ǂgao. (Efe. 2:1-3) ǀAmǂoas ge nētsēs xoas di amaba ra ǁgau. w18.12 20 ¶3-4

Apostel Paulub ge ge gā-ai khoe-i, ǁîb ge kai ǂansa ge ūhâ i tsî ǀgam gowakha tsîna gere ǃhoa. (ǃNǃkh. 5:34; 21:37, 39; 22:2, 3) Xaweb ge ǁîba tsoatsoadi tawa î gere hā o, o ǃhūbaib di ǂâi ǀgauba gere ǂhābē. ǁÎb ge Xoadi ai gere kō. (ǃNǃkh. 17:2; 1Kor. 2:6, 7) Tsî nēs xa ǃaromahe hâseb ge Pauluba ǁkhoaxa aoǁnâ ǁaeba ge ūhâ i tsî hānî ǀkhaeba ǃoa gere mûǂui. (2Tim. 4:8) Nē ǃhūbaib di ǂâi ǀgaub xab ge Elob di ǂâi ǀgauba a ǀgapi. Elob di ǂâi ǀgaub ǃoagu ûis ge ǃgâiaǂgaob tsî ǃgâiǃōb tsîna nî mā da. Xaweb ge Jehovaba ǁîb di ǂâi ǀgauba sida ai ǁgari tide. Tsî “ǂgomǂgomsa tsî gā-ai ǃgāb” tsî ǀhaohâb ǃûi-aogu tsîn ge sida ai gaoǂam tama hâ. (Mat. 24:45; 2Kor. 1:24) Xawe î ge mā Xristeǁî-i hoa-e ǁnā ǃereamsa ra tani, ǁî-i ǂâi ǀgauba Elob dib ǀkha ǀguiǃnâxa kaisa. w18.11 20-21 ¶12-13

Elob ge Jesajab ǃnâ-ū ǁîb khoena ge mîba omsa ǃoan ga oa o, on ge ǃgâi mâsiba nî hōǃâ tsî xamanin tsî ǁkhōǁkhōsa khoen tsîna ǃao tide. ǂKhaman tsî kairan hoan ge ǃnōrasasib ǃnâ nî hâ. (Jes. 11:6-9; 35:5-10; 51:3) Jesajab tsîn ge ge mî ǃhūbaib ge “ǃKhūb di ǂans xa nîra ǀoa xui-ao, ǁgamgu huriba ra ǃgū-ais ǁkhās khami.” Jesajab ge noxoba ge ǁgau oasī ga khoen ge xamanin tsî khoen tsîna ǃao tide. ǁÎn ǃhūb ge nî ǂûtani, nēs ge ǂgui ǁgammi hîna hâ i xa nî ǃaromahe Edenni ǃhanas ge ǃgâise gere ǂnâhe khami. (Gen. 2:10-14; Jer. 31:12) Nēs ǀguisa ge dīǀoaǀoahe? ǁGauǁgau î ge a ǀkhai ǁgau ra-e khoen hîna ge ǃkhōsisa xu a hān ge a ǂgauǂgauhesa. Aiǁgause ǂgī hân ge ge mû tsoatsoa tama hâ i. Elob ge gere ǂâibasen nē xūn ge noxoba nî ī di. w18.12 5 ¶11-12

Amab ǃnâ ǃgûs ge ǀû tama hâ nēb ge ǀamosib kōse da ra ǃgû ǃnâ ǂgao daoba. Xawe mati da a mîǁgui ǁkhā î da amab ǃnâ ǃgû ǀgara? Aiǃgû re Elobmîsa ǂōrisase ôaǃnâ tsî ǂâiǃgâs tsîna. Îo, amase da ge amaba nî ǁama hoaǁae ǁaeba ǁamaǂui tsî Elobmîs amaba ôaǃnâs ǃnâ. Nēs ge nî hui du î du ǃgôaǃgâsiba amaba ǁgau tsî mîǁgui ǁîba du ǁamaxū tidesa. Amaba ǁamas tawa î ga ra hā o, os ge ǂKhoamîdi 23:23 sa ra mî î da “gā-aisib tsî ǂgōǀaus tsî ǁnâuǃāb” tsîna ǁama. ǂAns ge ǀguri ǂhâbasa tama hâ. Amaba da ūhâsa da ge sida ûib ǃnâ nî ǁgau. ǁNâuǃāb ge nî hui da î da Jehovab ǂâiǀgauba mûǂan. Tsîb ge gā-aisiba ra hui da î da ǂans ǃoagu ûi. Amab ge ra daoǁgau da î da mû mâ ǃâb sîda ûib dib ǃnâ da ǀkharaǀkharana nî dīsa. A da nē daoǁgaus ǃoagu ǃgû re. Nēb ge kaise ǀō-aisa ǀgauba ǃhuniǀurib ǃgâ-ai.—ǂKhm. 8:10. w18.11 9 ¶3; 11 ¶13-14   

Tae-e sado kaise a ǀō-aisaba? Māsenxase du nēsa ǀnî hâ xū-i ǃgao nî mābe? Jehovab di ǃoaba-aon ǃgao di ge ǁnā dîde kaise a supu ǃereamsa. Sida kaise a ǀō-aisaba xū-i ge Jehovab ǀkha da ūhâ ǀhōsagusisa tsî da ge nēsa tātsēs tsîna mābe tide. Elobmîs amab tsîna da ge ra ǃgôaǃgâ hîna ra huiba î da sida ǁGûb ǀkha ǃgâi ǀhōsagusisa ūhâ. (Kol. 1:9, 10) Sida ǀGapi ǂoaǂamsa ǁgauǃnâ-aob ǁîb Mîsa xu ra ǁkhāǁkhā da xūn xa ǂâi re. ǁÎb ge ǁîb ǀons ǂâibasens tsî ǁîb mâǂoa ra ǀgaugu tsîna ge ǁkhāǁkhā da. Tsîb ge Xoremarib xas tsîna ge mîba da, hînab ge ǁîb ǀGôab Jesub ǃnâ-ū a ǁguibab xa. Jehovab ge ǁîb di Gaosib xas tsîna ge mîba da ǃhūbaib ai ǀamosib kōse ûisa. ǁÎb ge ra ǁkhāǁkhā da mati da nî tanisen ǀgauba. Sida ge nē amaba kaise ra ǃgôaǃgâ nēs sida Kuru-aob ǃoa ra ǂgae da amaga. Tsîs ge nēs tsîna sida ûiba ǂâibasensa ra mā. w18.11 3 ¶1-2

ǂHumixa khoen ge ǂâis ǃnâ nî ūhâ Jehovab aiǃâ i kurusabe-i xare-e “mûheǁoasa” tama hâsa. (Heb. 4:13) Aiǁgause Ananiab tsî Safiras tsîn ge ǁîra ǂgaob ǃnâ ge mîǁgui ǁîra apostelga nî gaxaǃnâsa. ǁÎra ge ǃhanaba ra ge ǁamaxū toa o, o ǃhare maris ǀguisa apostelga ge mā. ǁÎra ge ǀhaohâb ǃnâ māxa khoera ase gere mûmûsen ǂgao. Xaweb ge Jehovaba ge mû ǁîra ge tae-e a dīsa tsî ǁnās ǀkha ǁîra ge ǁkhara. (ǃNǃkh. 5:1-10) Jehovaba mati ra tsâ ǂhumib xa? Satanni, ǃhōbasen tama hân tsî gaxaǃnâ ǂhumi-aon tsîn ge “ǀaes” ǃnâ nî aoǂgāhe. (J.ǂHa. 20:10; 21:8; Psa. 5:6) ǂAn da ge a Jehova ‘Elob khoe tama hâsa’ hîna ra ǂhumiba. ǁNās ra ǁgaus ge Elob ‘amab’ ǀguiba ra ǃhoasa. (Num. 23:19; Heb. 6:18) ‘[Jehovab, NW] ge ǂhumi namsa ǃhui hâ.’ (ǂKhm. 6:16, 17) ǁÎb xa da ga ra ūǃoahe ǂgao o, o da ge ǁîb di ǁgaragu ǃoagu nî ûi. w18.10 8 ¶10-13

Sadu ǀhonkhoe-i ga ǀnîsi ga ra ǂgan du o, i du Jehovab xa ūǃoahe tama hâ ǁaxasib ǃgao mari-e mā. Tae-e du nî dī? ǁNāti i mâsib nî hā tsēsa du nî ǃnâus xa du tae-i ǃaroma ǀnai nēsi Jehovab ǁnās xa ra tsâ ǀgauba ôaǃnâ tama hâ? O du ge ǁnāti ī mâsib ga ra hā ǁaeb ai nî ǂhomisa ī tsî supuse nî ǃeream ǁkhā. ǀNîsi du ga ǁaeb aiǃâ ǀaeb mâsigu hîna ǂgomǂgomsasiba Jehovab aiǃâ nî ǃâitsâgu xa ga ra ǂâi o, o î ge nî supu ǃgâi mîǁguiga dīsa. Mîǁgui da ge nî ǀao-e da ūǂgā tama hâsa tamas ka io ǁî-i di ǂkhari 4 ǃâgu tsîna. ǀAo-e ūǂgā tama is ǃgao hâ ǀgaugu ge aitsama mîǁguiba ūsa ra ǂgaoǀkhā tsîs ge nēsa Elobmîs tsoatsoadi ǃoagu nî dīhe Jehovab ǂâi ǀgauba ra ǁgause. (ǃNǃkh. 15:28, 29) ǂHanu ǁaeb nēti ī ǀgauga ǃhoaǃgaos dib ge oms ai nî dīhe ǀaesen tama da hâ hîna, mîǁguiga da ge ǀaeǃkhō-oms ai sī a dī ǁoa. Nēb ge ǁaeb hîna da ǂkhanina ôaǃnâ, medise ǂkhaniba xoaǃgao tsî sida ǀaeǃkhō-aob ǀkha nî ǃhoaba. w18.11 24 ¶5; 26 ¶15-16

Jehovab ge ǀnamxaǃnâ ǃûi-aoba, ǁîb ge ǁîb khoena ǃgâi ǀgaub ǃnâ kōǃgâ tsî ǁîna ǁîn khākhoena xu ra ǁkhauba. Nēs ge kaise sida ra ǁkhaeǂgao nē ǃhūbaib ǀams ra ǀgū khami. Jehovab ge hoaǁae nî kōǃgâ da ǁîb ge nēsa dīs ǀkha nî aiǃgû kai ǁgâiǀāb ra ǀgū khami. (J.ǂHa. 7:9, 10) ǂKhaman tsî kairan, ǃhoran tsî ǃhora taman hoan hîna Eloba ra ǃoaban ge ǃao tide kai ǁgâiǀāb ǃnâ. ǁÎn ge ǀnî hâ xū-e nî dī. ǁÎn ge Jesub mîde nî ǂâiǃgâ hîna ra mîde: “ǃNubai ǃgapakhâi, î danadi âdo ǃhâkhâi, sadu ores go ǀgū xuige.” (Luk. 21:28) Tsî ǂgomǂgomsasiba nî ūhâ ǀgara Gogi ga ra mâǃoa xawe ǃhaodi hîna ǀgaiba ūhâ di xa. (Ese. 38:2, 14-16) Elob khoena tae-i ǃaroma ǂgomǂgomsase nî hâ? ǁÎn ge a ǂan Jehovab dawa tama hâsa. ǁÎb ge hoaǁae nî kōǃgâ nî tsî ǁîn tsâsigu xa nî ǂâi.—Jes. 26:20. w18.09 26 ¶15-16

Matikōse i ge Israelǁaesa ǂkhâǃnâ ǀgapiga hâ mîdi Jehovab dide ǁnâusa. Jehovab ǃoaba-ao-i ase du ge sadu tsîna a ǂgomǃgâ ǁkhā ǁîb ǀnamxaǃnâ ǀgaub ǃnâ a ǀnam dusa. Elobmîs ge sao ra-e ra mîmâi ǁnān hîna ama ǃoaba ǀgauba ra saon xa: “ǁÎb ge sa ǂama nîra ǃgâiaǂgao dâb ǀkha.” (Sef. 3:16, 17) Jehovab ge ge mîmâi ǁîb ǃoaba-aonab ge kōǃgâ tsî nî ǁkhaeǂgao ǃgomsigan ga ra hōǃâ o. “O du ge ǁîs di ǂhoweb ai nîra tanihe, . . . ǀGui-i ǁgûs xa ra ǁkhaeǂgaohe-i axase ta ge tita sado nîra ǁkhaeǂgao.” (Jes. 66:12, 13) Kaise ǃgâi ai-īsib ge nēpa, ǁgûs ge ǁîs ǀgôaro-e ǁîs ǂhowes ai ra tani. ǁKhā ǀgaub ǃnâb ge Jehovaba nē ǂkhōs ǃnâ-ū ǁîb ǀaexa ǀnamma ǁîb ǃoaba-aona ra ǁgau. Jehovab ǃoa-ai da ge a ǀō-aisa tsî ǀnamǀnamsa, tā ǁnāsa ǀuru re.—Jer. 31:3. w18.09 13 ¶6-7

ǃKharagaǃnâgu ǁaxasigu ǃnâ i ge Israeli ǃnâ māsenxa sîsen-aona ge ǂhâhe hâ i. (Eks. 36:2; Neh. 11:2) Nētsēs tsîna da ge ǃēde ūhâ sida ǁaeb, ū da hâ xūn tsî sida ǁkhāsib hoaba sida ǃgâsan ǃgao māsa. Kaise ǃgâise du ge nî tsâ tsî ǂgui ǀkhaega nî hō. ǁÎn hîna māsenxase gagasi ǁaxasigu ǃnâ ra ǁhaon ge hoaǁae ǀasa ǀhōsana ra hō. Margies aiǁgaus xa ǂâi re hîna Gaosib ǀhûǃnâ-omga oms ǃnâ 18 kuriga ra ǁhaosa. ǁÎs ge hoaǁae ǂkham ǃgâsade ǁîs ǀgôadi ase ra ūbasen ǁîdes ra ǁkhāǁkhā hîna. ǁÎs ge kaise nēs xa a ǁkhoaxabahe, gagasise di hoaǁae ra ǂkhâǃnâgu amaga. (Rom. 1:12) ǃGomsigas ra hōǃâ ǁaeb ais ge Margiesa nē ǂkhâǃnâdi xas ra ǂâi o, o kaise ra khoakhoahe tsî nēs ge om sîsengu tawas ge omkhâi ǀhōsana xu hâ. Sadu tsîna māsenxase nē om sîsengu ǁaxasib tawa ǁhao tsâ hâ? w18.08 25 ¶9, 11

Paulub ge nē mîde a xoa ǁaeb ǃnâb ge Timoteuba ǁîb 30 di ǃnâ ge hâ i. Xaweb ge Pauluba ǁîba ǂgui ǁgaumâide ge mā. Nē ǁnamas ge kaise a ǂhanu. ǂKham ǃgâsaga da ge tā ǁîgu kurigu ǃoagu nî ǀgoraǃgâ. ǂÂis ǃnâ da ge nî ūhâ Jesub tsîn ge ǁîb ǃhūbaise ǁgaumâisa ǁîb 30 di ǃnâb hâ hîna gere dī. ǀNîsi da ge ǃhaosa xu ra hā hîna ǂkhamkhoega ra ǃgôaǁnâsa. ǁNās ǀkha gu ge ǂkham ǃgâsaga ra ǃao ǀhaohâb ǃûi-aogu tamas ka io ǀhaohâb hui-aogu ase ǁgaumâihesa. Hoa ǀhaohâb ǃûi-aogu ge ǂâis ǃnâ nî ūhâ kurigu ǂganhe tama hâsa ǃgâsaga ǀhaohâb ǃûi-aogu tamas ka io ǀhaohâb hui-aogu ase ǁgaumâihesa.—1Tim. 3:1-10, 12, 13; Tit. 1:5-9. w18.08 11-12 ¶15-16

ǃGâi mîǁguiba dīs ǃgao da ge aibe amaba nî ǂan. ǁNās ǀkha da ge kaise ǂōrisase nî ôaǃnâ tae-e da ra khomai tsî ǂgomsa. (Fil. 4:8, 9) Tā da ge sada ǁaeba ama tama xūna khomais ai nî ǁaeǁore, ǁnās ge emailna khomais tsîna ǃkhōǂgā hâ. ǂAnbasen da ge nî î da tā ǁnāǁgôa hâ khoen ra dī internets ǂhawegu ai hâ xūna sī khomai. ǁÎn ra ǂhâbas ge în Elob khoena amaba xū tsî ǁîna sao. Ama tama ǂhôana khomais ge a ǃaroma ǁkhā î da ǃgâi tama mîǁguiga dī. Ama tama ǂhôan ge ǃgâi tama ǀgaub ǃnâ ǂanbasen tama da ga ra io a tsâǀkhā da ǁkhā. Tsî sida ǂgaob tsî ǂâis tsîna a ǂgaeǂhapu ǁkhā. Aiǁgause Moseb ǁaeb ǃnâ ge ī xū-i xa ǂâi re. Moseb ǁaeb ǃnâ gu ge 12 ǃkhē-aoga ge sî-e îgu mîmâisa ǃhūba sī kō, xawe gu ge 10 ga ǃgâi tama ǂhôana ge hau. (Num. 13:25-33) ǁÎgu di ǃhoa ǀgaub ge ǃās ǃgâi tama hâ tsî a ǁgai di ge ǁnâusen. Tsîs ge nēsa Jehovab ǁaesa kaise ge ǃao kai. (Num. 14:1-4, 6-10) Amaban ôa ǃgao tsî Jehovab ai nî ǂgomaiǂnûis xan ge ǁîna ǂhanu tama ǂhôa-e ǃgâsa ge ǁhûi. Nēb ge kaise ge gâre i ǀgauba. w18.08 4 ¶4-5

ǃNāsa khoen ge ǃgâi ǀgauga ūhâ. Tsî ǀnîn hîna ǀhaohâb ǃgauga hân ge ǁgai xūna dī tama hâ. ǁNās ga ra ama o, sadu ǀhōsa-i xa, mî ǁkhā du a ǁî-i a ǃgâi di? Dîsen ǁkhā du ge a, nē khoe-i ǀkha hâsa mati ti ǀhōsasisa Jehovab ǀkha ra omkhâi tsî ǀgaiǀgai? ǁÎ-i ǂgaob ǃnâ tae-e hâ? Aiǁgause, ǁî-e hoaǁae ǀasa saran, marib, ǀasa cell foongu, Tabletgu, ǁkhoaxasib tsî ǀnî hâ xūn xa ǀgui ra ǃhoa? ǁÎn ǁgamǀhaodi ǃnân nau khoen xa ǀgui ra ǃhoa tamas ka io ǃgâi tama xūna ra ǃhoa? Jesub ge ge ǃkhâikhom: “ǀOasib ǂgaob diba xus kom amsa ra gowao.” (Mat. 12:34) Mûǂan du ga ra o, sadu ǀhōsa-i sadu ǀhōsasis Jehovab ǀkha du ūhâsa ǁkhōǁkhōsa mâsib ǃnâ ra mâisa, o xū-e dī re. Īǁkhā i ga ra o, toxoba ǁnā ǀhōsasisa ǀamǀam re.—ǂKhm. 13:20. w18.07 19 ¶11

Moseb 80 kurixa hînab ge Jehovaba ǁîba Israelǁaesa Egipteb ǃkhōsisa xu ge ǃnoraǃnora kai. (Eks. 3:10) ǀGuis xa ǃnāsa ǃnādeb ge Moseba ge mî ǁîn ge ǂgom te tide ti. Xaweb ge Jehovaba hoaǁae ge ǃnūǃnâxa i tsî Moseba ǀgaiba ge mā îb buruxa dīna dī. (Eks. 4:2-9, 21) ǁÎb ge Moseba ga ǁgari hâ îb māsenxase ǁîb ra mî-e dī. Xaweb ge Jehovaba ge ǃnūǃnâxa tsî khoexaǃnâ i tsî ǁîb ǃgâisiba ǁîb ǃgamǃgamsenxa ǃgāba ge ǂanǂan. Nē ǀgauba sîsenǂuiba ū î ge hâ i? Îo. Moseb ge ge ǀō-aisa ǂgaeǂgui-ao i hîna ge nau khoen ǀkha Jehovab ge ǁîb ǀkha gere hâ khami gere hâba. Kai ǃereamsa du ga ūhâ o Jehovaba ǁgae re ǁîb khoen ǀkha ra hâ ǀgaub ǃnâ, ǁîb ge khoexaǃnâsib tsî ǃnūǃnâxasib tsîna ūhâ. (Kol. 3:19-21; 1Pet. 5:1-3) Jehovab, Moseb tsî Jesub tsîna da ga ra ǁgae o, o da ge khoen ǃoa nî ǀgū tsî nî khoakhoa nî.—Mat. 11:28, 29. w18.09 24-25 ¶7-10

Tae-i ǃaroma du ǁgūtsâ tama hâba ǀguiǃnâxasiba ǃgâsan ǁaegu aiǃgû kais ǃnâ? Nēsa du ga ǀnai ga ra dī o, o du ge koahesa anu hâ. O sado a “haraharasen” ǁoa î du nēsa noxoba ǀoasase dī? (2Kor. 6:11-13) Mâ ǀgaub ǃnâ du Elobmîs amaba sadu ǁanǁare-aon ǃoagu a ǃnâ kai ǁkhā? Sadu ǃgâi mîdi tsî tanisen ǀgaub tsîn ge sadu ǁanǁare-aona amaba ǃoa a ǂgae ǁkhā. Dîsen re: ‘Ti ǁanǁare-aona tae ǃnôa khoese a ǂan te? Ti omsa ta ǃamkuse ra ūhâ tsî nēsa mati ti ǁanǁare-aona ra tsâǀkhā? ǂGurose ta aiǂhanuba ū tsî ti ǁanǁare-aona hoaǁae ra hui?’ Nau ǃgâsa-i ǀkha du ga ra ǃhoa o, o du tae-i ǃaroma ǁî-i di ǃgâi ǀgauga ôa tama hâba? Tsî ǁî-i tanisen ǀgaub ge mati ǁî-i omaris ǁanin, ǁanǁare-aon tsî sîsenǀhao-ū i ra khoe-e a tsâǀkhā ǀgaub xas tsîna dî tama hâba? ǃGâi xūn hîna ge īna da ge a ǁnâu ǁkhā.—Efe. 5:9. w18.06 24 ¶13-14

ǁNā ǃkhâikhoms ge ge ama i khoen hîna ge Stefanuba a ǃgam an xa. Nēs tsîn ge a ama ǂguin hîna ǁnāti ī ǂâi ǀgauba ūhân xa. (ǃNǃkh. 6:8, 12; 7:54-60) ǃGams khami ī ǂkhabadīb ge ǁnān hîna ra mîn Eloban ra ǃoaban xa ra dīhe. (Eks. 20:13) ǃGāsa as ge ǁîn ǃgâiǂâis ǃgâise sîsen tama hâsa. Tae-e a ǃaroma ǁkhā îs sida ǃgâiǂâisa sîsen ǀû? ǂHanugu tsî tsoatsoadi Elobmîs ǃnâ a ǃkhōǂgāsadi ge “harebe ǁkhāǁkhās ǃoa, tsî ǂgōǀaus ǃoa, tsî ǀkharaǀkharas ǃoa, tsî ǂhanu-aisib ǃnâ kaikais ǃoa.” (2Tim. 3:16) ǂŌrisase da ga Elobmîsa ôaǃnâ, ǂâiǃgâ tsî ǁîs ra mî xūna sida ûib ǃnâ ga ra ûiǂui o, o da ge sida ǃgâiǂâisa Elob di ǂâi ǀgaub ǀkha a ǃamǀhao ǁkhā. Nēs ge nî ǃaroma îs sida ǃgâiǂâisa ǂgomǂgomsa daoǁgau kai. w18.06 16-17 ¶3-4

Romeǁî toroǃkham-aob gere sîsen-ū gôab xab ge Pauluba ra ǁguiǃā, nē gôab ge 50 cm ga ge gaxu i tsî ǃommi ǃnâ ge tanihe ǁkhā i. Romeǁî toroǃkham-aogu ǁîgu ǃkham-ū xūna ǃgâise gere sîsen-ūba ǃaromas ge ǁîgu ge tsēs hoasa nē toroǃkham-ū xūn ǀkha gere ǃâisen. Paulub ge Elobmîsa gôab ǀkha ra ǀgopeǀnō. Sida ǂgoms ǃgao da ga mâǃoahe o, o da ge sida ǂâi ǀgauba nî ǁkhauba, mîsa ǃgâise sîsen-ūs ǃnâ-ū. (2Kor. 10:4, 5; 2Tim. 2:15) Satanni tsî ǁîb demongu tsîna da ge tā nî ǃao. ǁÎgu tanisen ǀgaugu ge kaise a ǃgom ǁnâuǃāsa xawe da ge ǁîga a dan ǁkhā. Tsî ǁîgu ge a ǁō ǁkhā. ǀGūǁae gu ge ǁîga Xristub di ǀoadisi kurigu ǂgaeǂguis ǃnâ khoena ǂgaeǂhapu ǁkhā tide. Tsî gu ge ǁnās khaoǃgâ nî dīkākāhe. (J.ǂHa. 20:1-3, 7-10) Sida khākhoeb di ǀgaugu tsî ǂâibasendi tsîna da ge a ǂan. Jehovab huib ǀkha da ge ǁîba a mâǃoa ǁkhā. w18.05 30 ¶15; 31 ¶19-21

Adammi ge ge ǂan i ǀao-i ǃhoa tama hâsa. ǁNās ǀkhab ge ǀnîsi ge hōǃâ gagasi kurusabeb ge Evas ǀkha a ǃhoasa ǀaob ǃnâ-ū. (Gen. 3:1-6) Adammi tsî Evas tsîn ge gagasi kurusabe-i xa ge ǂan tama hâ i. ǁNāti i ge ī i xaweb ge Adamma ǂanǃgâsase ǁîb di ǀnamxaǃnâ ǀhomsi ǁGûb ǃoagu ge mâ tsî ǁGâuaba ge ǁhao. (1Tim. 2:14) ǁNās ǀkhab ge Jehovaba ǁîb khākhoeb hîna ge Adammi tsî Evas tsîna a ǂgaeǂhapub xa ge ǂanǂan. Jehovab ge ge mîmâi nē khākhoebab nî dīkākā ǃkhaisa. Xawe Jehovab ge ge mî nē gagasi kurusabeb hîna ge ǀaob ǃnâ-ū ǃhoab ǀgaiba ūhâsa Jehovaba a ǀnam khoena mâǃoas diba. (Gen. 3:15) Jehovab ge ǁîb gā-aisib hoab ǃnâ ǁîba ge mâǃoa ǀgôab ǀonsa mîba da tama hâ. Elob ge nē khākhoeb ǀonsa 2 500 kurigu khaoǃgâ ǀgui ge ǂanǂan.—Job. 1:6. w18.05 22 ¶1-2

ǀNîsi du ge ra ǂkhabuǂâi khoen ga amaba ūǃoa tama io. Xawe apostel Paulub tsîn ge di gere tsâ. ǁÎb ge 30 kuriga aoǁnâ sîsenni ǃnâ ǁhao tsî ǂgui khoena ge hui în Xristub di ǁkhāǁkhāsabe kai. (ǃNǃkh. 14:21; 2Kor. 3:2, 3) Xawes tsînab ge ǂgui Jodeǁîna ge hui hō tama hâ i în ama Xristeǁî kai. Khoen ge Pauluba gere ǂhābē tsîn ge ǀnîna gere mâǃoa bi. (ǃNǃkh. 14:19; 17:1, 4, 5, 13) Jodeǁîn tanisen ǀgauba mati Pauluba ge tsâǀkhā? ǁÎb ge ge mî: “Amaba ta ra mî Xristub ǃnâ . . . Kaise ta ǃoa hâ ǃkhaisa, tsî hugaǀgui ta tsûaǂgao hâ ǃkhaisa.” (Rom. 9:1-3) Pauluba tae-i ǃaroma nēti gere tsâ? ǁÎb ge aoǁnâ sîsen-e ge ǀnam i. Jodeǁînab ge ǁînab ra tsâba ǃkhais ǃgao gere aoǁnâba. ǁNā-amagab ge Pauluba kaise ge tsûaǂgao Elob ǀkhoman ge ūǃoa ǂgao tama hâ io. Paulub khami da ge sida tsîna khoena da ra tsâba amaga ra aoǁnâ.—Mat. 22:39; 1Kor. 11:1. w18.05 13 ¶4-5

Paulub ge ge ǁgau khoe-i hîna nau khoena ra ǂkhâǃnâ î ge ǁî-i tsîna ǂkhâǃnâhesa ǂhâ hâ. Romeb ǃnâ hâ Xristeǁîna ǃoab ge ge mî: “Kaise ta ra ǁkhore, mû tsî ta nî sado ǀnî gagasi hō-e ause, ǀgaiǀgaiǃnâhe du nîga; ǁnās ge sadu ǃnâ ta nî ǁkhaeǂgaoǀhaohega, sada ǁaegu hâ ǂgoms, sadu dis tsî tis tsîra xu.” (Rom. 1:11, 12) Paulub hîna ge nau khoena gere ǂkhâǃnâb tsîn ge ǂkhâǃnâhesa ge ǂhâ hâ i. (Rom. 15:30-32) Khoen hîna ǁîn ûib ǃnâ ǁguibade ra dīn ge nî koahe. ǃGâsan hîna “ǃKhūb ǃnâ ǀgui” ǃgame di hâ mîmāsa ra ǁnâuǀnam an tsîn ge ǂkhâǃnâhesa ǂhâ hâ. (1Kor. 7:39) ǃGâsan hîna ra mâ-ǃoahen tsî ǀnîn hîna ǀae hân xawe ǂgomǂgomsase ra ǃoaban tsîn ge ǂkhâǃnâhesa ǂhâ hâ.—2Tes. 1:3-5. w18.04 21 ¶3-5