Julib

“ǀUni tsēdi” hîna a “ǃgom” di ǃnâ da ge ûi hâ tsî i ge ûiba ǁgaiǂoas ǀguisa nî dī ǂkhîb nî hās kōse. (2Tim. 3:1) Dîsen da ge nî, ‘mâpa ta huib tsî daoǁgaus tsîna ra ôa?’ Kurigu ǃkharu hâseb ge psalmdi xoa-aoba ge ǁgau tae-i ǃaroma î a ǂhâǂhâsasa Jehovaba ǃoa kōsa. (Psa. 123:1-4) ǁÎb ge sida Jehovaba ǃoa kōsa, ǃgā-i hîna ǁî-i ǀhonkhoeba ǃoa ra kō i ǀkha ge ǀgopeǀnō. Nē psalmdi xoa-aoba tae-e gere ǂâibasen? ǃGā-i ge ǁî-i ǀhonkhoeba ǂû-i tsî ǁkhaubahes ǃgao ǀgui kō tama hâ xawe hoaǁae ǀhonkhoeb tae-e ǁî-e xu ra ǂgaosa mûǂan tsî ǁnāsa ra dī. ǁNās ǁkhās khami da ge sida tsîna Elobmîsa hoaǁae nî ôaǃnâ tsî Jehovab ǂâis a taesa nî ǂan tsî ǁÎb daoǁgausa nî sao. ǁNās ǀkhab ge Jehovaba sida ǃnâ ǃgâiǃgâibasensa nî ūhâ ǃgomsiga da ga ra hōǃâ o. w18.07 12 ¶1-2

Jesub ge ‘ǁoreb’ ǃkhōsisa xu khoesib hoaba ǃnora kais xa gere ǃhoa. ǁOreb ge tsūna dīs ǃnâ ǀgui ǂgaeǂhapu da tama hâ. (Jhn. 8:34) Xawe tsū a di da a ǂan xū-e dīs ǃnâs tsîna ra ǂgaeǂhapu da. Sada ge a ǁoreb di ǃgā tsî da ge nēs ǀkha ǁaib, tsûb, ǃgomsigu tsî ǁōb tsîna ra hōǃâ. (Rom. 6:23) ǁOreb ga ra ūbēhe o, o ǀgui da ge ama ǃorasasîb ǃâubasensa a uhâ ǁkha sada ǁgûn ge uhâ i khami. Jesub mîdi “ti mîs ǃnâ du ga hâhâo” di hâs ge ra ǂâibasen ǂgaoǀkhādi hâsa ǃnora kaihe ǂgao da ga ra o ǁîb xa. (Jhn. 8:31) Māǁnâsen hâ Xristeǁîn ase da ge ǀūxūsen tsî ge ǁhûi î da Xristub di ǁkhāǁkhādi ǃoagu ûi ǁîb di ǁkhāǁkhāsabese. (Mat. 16:24) Jesub ge mîmâi khami da ge nî ǃnora khaihe xoremariba da ga ra ǃgôaǃgâ o. w18.04 7 ¶14-16

Jehovab ge ǁîb khoenab ra tsâba ǃkhaisa ra ǁgau, ǁîn ǂâi ǀgaub ga ǂhanu tama i xawe. Jonab aiǁgaus xa ǂâi re. Elob ge ǁîb kēbo-aoba Nineveǁîna ǃoa ge sî îb sī ǀgoraǃgâs haisi-amsa mā nî. ǁÎn ǁgai ǀgaugan ge ǀû o, ob ge Jehovaba ge sâu nî. Xaweb ge Jonaba nēs xa ge ǂkhîǂâixa tama hâ i. “Tsîb ge ge ǁaixa” ǁîb di ǀgoraǃgâs haisi-ams ge dīǀoaǀoahe tama i amaga. Xaweb ge Jehovaba Jonab ǀkha ge ǃnūǃnâxa i tsî ge hui bi îb ǁîb ǂâi ǀgauba ǀkharaǀkhara. (Jonab 3:10–4:11) Jonab ge nēsa ega ge ǁnâuǃā tsîb ge Jehovaba Jonaba ǁîb aiǁgausa sada ǃaroma ge xoa kai. (Rom. 15:4) Jehovab ge ǁîb khoen ǀkha gere hâ ǀgaus ge ra hui da mûǂansa ǁîb ge ǁîn tsâsiga gere ǃgôaǃgâsa. ǁÎb ge mâ khoe-i hoa-i di tsûb tsî ǃgomsigu tsîna a ǂan. ǁÎb ge sada ǂâidi, tsâsigu tsî ǂkhabusasigu tsîna ra ǁnâuǃā. Tsî “ǁkhā du as ǂamai ǃâitsâ du tide.” (1Kor. 10:13) Nēs ge ǃgâi ǂansa. w19.03 16 ¶6-7

Moseb ǂhanub ǃnāga i ge ǁgaumâisa aoga Jehovab ǃoabas xa hâ xūn ǀguina ge ǀgoraǃgâ tama hâ i xawe ǁnâusāgu di tsî ǁore-aon tsîna gere ǀgoraǃgâ. Sao ra aiǁgaudi xa ǂâi re. Israelǁî-i ge khoe-e gere ǃgam o, o i ge ǁî-e ǁnā ǃkhais ai ge ǁkharahe tama hâ i. ǁNā ǃās ǁgaumâisa aogu ge nē ǃnaeǃkhaisa gere ôaǃnâ khoe-i ǁî-i ǁkharaba nî hōs aiǃâ. (Deu. 19:2-7, 11-13) ǁGaumâisa-aogu ge tsēkorobe ûib xūn, om ǁamaxūs tsî ǃgameb ǃnâ hâ ǃgomsin ǀkhas tsîna gere hui. (Eks. 21:35; Deu. 22:13-19) ǁGaumâisa-aogu ge ǃgâi ǀgaub ǃnâ gere ǀgoraǃgâ tsî Israelǁîn ge ǂhanuba gere ǁnâuǀnam o, on ge hoa khoena gere ǀama tsî Jehovaba gere ǃgâiaǂgao kai. (Lev. 20:7, 8; Jes. 48:17, 18) Nēsa xu da ge ra mû sida ûib ǃâ-i hoa-i ge Jehovaba a ǂhâǂhâsaba. ǁÎb ge ra ǂgao i da ǂhanu-aisiba ūhâ tsî nau khoen ǀkha ǀnamxaǃnâ ǀgaub ǃnâ hâ. ǁÎb ge mî tsî da ra dī xūn hoana ra ǃgaoǃgâ, ǀguri da ga oms ai hâs tsîna. w19.02 23 ¶16-18

ǂÂiǂhansen da ga ra o, o i ge kaise a ǃgom tsamtsiǃnâsiba ūhâsa. ǃGâi tama xūna da ge nau khoena ǃoa a mî ǁkhā. ǀNîsi du ga ra ǂâiǂhansen o, o Jesub di aiǁgaus xa ǂâi re. ǁÎb ǀuniga ǁkhâgu ǁōb nîs aiǃâb ge Jesuba kaise gere ǂâiǂhansen. ǁÎb ge ge ǂan i mâǃoahe tsîb nî kai ǃgomsiba tsâ ǃkhaisa. (Jhn. 3:14, 15; Gal. 3:13) ǁKhâga ǁîb ǁōb aiǃâb ge Jesuba ge mî tsûaǂgaob ge ra di. (Luk. 12:50) Tsēde ǁōb nîs aiǃâb ge Jesuba ge mî: Ti loms ge “ǁgonǁgonǃnâhe” hâ di. ǁÎb mîdi hînab ge ǀgoreb ge o, o gere sîsen-ū di ge ra ǁgau ǁîb ge Eloba gere ǁnâuǀnam tsî ǃgôaǃgâ ǃkhaisa. (Jhn. 12:27, 28) ǁAeb ge hā o, ob ge Jesuba Elob khākhoen ǃoagu ge māsen tsî gu ge ǁîba tsûtsûsa ǀgaub ǃnâ ge ǃgam. ǂÂiǂhansendi tsî ǃgomsigu tsîn ǂam-aib ge Jesuba Elob ǂâisa gere dī. Jesub ge a ǀō-aisa aiǁgau, khoe-i hîna ge ǂâiǂhansendi ǂam-ai tsamtsiǃnâsiba gere ǁgauba.—Jes. 53:10. w19.02 11 ¶14-15

ǀHaode hoaǁae ǁhaoǃnâs ǃaroma da ge ǁkhoaǂgaosiba ǃgomsina da ga ūhâ ǁaeb ǃnâ nî ǁgau. Sada ǃgâsan ǀnîn ge ǁgâiǀāgu tsî ǀaeb ǃgomsinan ūhâ xawe ǀhaode ra ǁhaoǃnâ. ǀNîn ge kai ǁgâiǀāgan omaridi khoen tsî ǂhanuba xū ra hō xawe ǀhaode ra ǁhaoǃnâ. ǁAeroba ǂâi re sadu aiǁgaudi mati sadu ǃgâsan hîna ǃkhō-omdi ǃnâ ǁîn ǂgoms ǃaroma ǂganam ǂgāhe hâna ra hui ǀgausa. (Heb. 13:3) ǁÎn ga ǁnâu o sadu ǃgomsin ǁaegu Jehovaba ra ǃoaba ǃkhaisa on ge ra ǂkhâǃnâ-e ǁîn ǁkhoaǂgaosib tsî ǂgoms tsîn ǃnâ mâǀgaibesa. Paulub ge Romes ǃnâ ǃkhōsis ǃnâ hâ io, ob ge ǁîb ǃgâsan ge ǂgomǂgomsase Eloba ra ǃoaba dib gere ǁnâu o, o gere ǃgâiaǂgao. (Fil. 1:3-5, 12-14) ǁAerob ǁîb ǁnāxūhes khaoǃgâb ge Pauluba ǁîb sîǂkhanisa Hebreǁîna ǃoa ge xoa. ǁÎb sîǂkanis ǃnâb ge ǁnā ǂgomǂgomsa ǃgâsana ge ǂkhâǃnâ în ǁîn ǀhaode xū tā hâbē.—Heb. 10:25. w19.01 28 ¶9

Satanni ge ǁîb khami da nî ī ǃkhaisa ra ǂhâba. ǁÎb ge Jehovab ǂgaoǀkhādi ǃoa-ai ûi tama tsî Jehovaba ra mâǃoa. ǁÎb xa ǀnai ǂgaeǂhapuhe hâ khoen ǁaegu hâ tsî da ǁîn dīgu tsî tanisen ǀgaugu xa “ǁgaiǁgaihe” ǃkhaisab ge ra ǂhâba. (1Kor. 15:33) ǁGâuab ge sida ǂgaoba a ǁgaiǁgai ǁkhā khoen gā-aisib ai ǂgomaiǂnûi kai das ǃnâ-ū tsî Jehovab di gā-aisib ais ose. (Kol. 2:8) ǀGui ǂâi ǀgaub ǁGâuab ge māb xa ǂâi re—ǁîb ge ge mî ǃkhūsis ge ǂgurose sida ûib ǃnâ nî hā di. Khoen hîna nēti ra ǂâin ge a ǃkhū ǁkhā tamas ka io a ǀgâsa ǁkhā. ǁÎn ge ǁkhōǁkhōsa mâsib ǃnâ a ǂgâ ǁkhā. Tae-i ǃaroma? ǁÎn ge ǁnātikōse mari-i ai ra ǂgomaiǂnûi tsoatsoa tsî ǁîn ǂurusib, omaris tsî Elob ǀkhan ūhâ ǀhōsagusis tsîna nēs ǃgao ra māǁnâ. (1Tim. 6:10) Kaise da ge ra ǃgôaǃgâ sida ǀhomsi ǁGûb ge gā-aisiba a mā dasa î da ǀnōsa mûǂuiba mari-i ǃoa-ai ūhâ.—Aoǁn. 7:12; Lukab 12:15. w19.01 15 ¶6; 17 ¶9

Jehovab ǀGôab ǃhūbaib ai nî hā tsî aiǁgausa nî mās aiǃgân ge Jehovab ǂgomǂgomsa ǃoaba-aona ǀnai gere ǁgūtsâ ǁkhaeǂgaogusa. Asiriaǁîn xan gere ǃkham ūhe ǂgao o, ob ge Hiskiaba toroǂamsagu tsî Judab khoen tsîna ge ǀhaoǀhao îb ǁîna ǁkhaeǂgao. “Tsî ǁaes ge mîdi Hiskiab, Judab gao-aob didi ai ge ǂgomaiǂnûi.” (2Kro. 32:6-8) Jobi tsîn ge ǁkhaeǂgaosa ge ǂhâ hâ i xaweb ge ‘ǂkhabusa ǁkhaeǂgao-aoga’ ge ǁkhāǁkhā mati gu nî ǁkhaeǂgaosa. ǁÎb ge ‘ams ǀkha ǀgaiǀgai gu tsî  . . . ge ǁkhaeǂgao gu.’ (Job. 16:1-5) Jobi ge Elihub tsî Jehovab tsîn xa ge ǁkhaeǂgaohe.—Job. 33:24, 25; 36:1, 11; 42:7, 10. w18.04 16 ¶6; 17 ¶8-9   

Jesajab ge ǀnai ge mîmâi hâ i matib Jehovaba ǁîb khoena nî huisa mî rase: “ǃKhūb ge ǀgaisab ase nîra hā, tsî ǁôab âb ge nîra gao.” (Jes. 40:10) Elobmîs ge “ǁôa” di hâ mîsa ra sîsen-ū ǀgaiba ǁguiǃās ǃaroma. ǁNā mîdi “ǁôab” ge nî ǂgaeǂgui di hâ di ge ra hui da mûǂansa Jehovab a ǀgaisa ǂgaeǂgui-aosa. ǁÎb ge ǁîb ǀgaiba ǃkharu ge ǁaeb ǃnâ gere sîsen-ū ǁîb ǃoaba-aona ǁkhaubas ǃgao. Nētsēs tsînab ge noxoba ǁîb ai ra ǂgomaiǂnûi khoena ra ǀgaiǀgai tsî ǁkhauba. (Deu. 1:30, 31; Jes. 43:10) Sida khākhoen ra mâǃoa da ǁaeb aib ge Jehovaba ra mî: “Tita ge ra ǀgaiǀgai tsi.” ǀNî ǃhūgu ǃnân ge sida khākhoena ǃgarise ra dītsâ sida sîsen-e ǀû kaisa. Xawe da ge sida nē mâǃoasa ǃao tama hâ. Jehovab ge ge mîmâi ǁîb ge nî ǀgaiǀgai da tsî hui da di. ǁÎb ge ge mî: “Sîsenūxūs sa ǃoagu ga ǁāǁāhes hoas ge ǃgâiǃgâ tide.”—Jes. 54:17. w19.01 5-6 ¶12-13

Xamanina xu da ge a ǀkhara gagasi ǂhâsiga da ūhâ amaga. (Mat. 4:4) ǃGâi ǂgaob ǀkhats ga Eloba ǃgâ o, ots ge gā-aisib tsî ǂkhîb tsîna nî hō. Elob ge sa gagasi ǂhâsiga ǁîb mîs tsî “ǂgomǂgomsa tsî gā-ai ǃgāb” ra mā ǂû-i ǃnâ-ū ra dīǀoaǀoa. (Mat. 24:45) Nē ǂû-i ge kaise a ǀō-aisa. (Jes. 65:13, 14) Eloba xu ra hā gagasi ǂû-i ge gā-aisib tsî ǃgâi ǂâi ǀgaub tsîna ra mā, nēs ge ǂgui ǀgaugu ǃnâ a ǁkhauba tsi ǁkhā. (ǂKhm. 2:10-14) Aiǁgause, nēs ge ǂhumi ǁkhāǁkhān Kuru-ao î ge a ǀkhai di ra mîs tsîna ra mûǂan kai da. Mari-i tsî ǃkhūsis tsîn ge ǂkhîba ra mā di ra mî ǂhumib tsîna xu ra ǁkhauba tsi. Nēs ge ra hui îts ǃgâi tama tanisen ǀgaub tsî turagu tsîna mûǂan tsî ǁîga xu ǂgōsen. Elosi gā-aisib tsî ǂâi ǀgaub tsîna ôa tsî nēna ǀō-aisase mû re. w18.12 20 ¶6-7

ǁAeba hâ î nî sida tsēdi ‘tsēdi hais didi khami nîra īsa?’ ǀNî haidi ge ǀoadisi kuriga ra ûi. Khoesib ge ǂurusiba ǂhâ hâ ǁnātikō gaxuse ûisa. ǁÎn ga Jesajab ge mîmâi mâsigu ǃnâ ûi hâ o, os ge ǁnāsa ǁhapos khami ga ī hâ. Nē kēbos ge nî dīǀoaǀoahe. ǂÂi re nē mîmâidi mati hānî paradaisa ǃoa ra ǁnaeǁgau ǀgausa: Khoen hoan ge ǃhūbaib ai Elob xa nî ǀkhaehe. Khoen ge xamanin tsî ǁkhōǁkhōsa khoen tsîna ǃao tide. ǂGī hâ khoen, ǃgomen tsî ǃhora hân tsîn ge nî ǂgauǂgauhe. Khoen ge ǁîn omde nî om tsî ǂûtani ra ǃhanaga nî ūhâ. ǁÎn ge haidi xa gaxuse nî ûi. Elobmîs ǃnâ da ge ǁgauǁgaude ra mû hîna ra ǁgaude nē ǁaeb ge a ǀgū di. ǀNîn ge ra mî nē kēbodi xa da ge ǃnāsase ra khomai di. Mâ ǃaromasa du ūhâ paradais ǃhūbaiba ǃoa mûǂuisa? Khoexaǃnâ khoeb ge ǃaromasa ge mā.—Luk. 23:43. w18.12 5 ¶13-15

Xawe ǂkhûs ge a ǃhae tsî dawas ǀguisa ra dī. Tsî nē ǀkharaǀkharan ge sada ǂkhûs ǃnâ da ra mā-am xūn tsî ǂâi xūn tsîn ai ǃgaoǃgaosa. Jehovab di ǂâi ǀgaub xa ǂâiǃgâs ǃnâ-ū da ge ǁîb ra tsâ ǀgauba nî mû. Tsîs ge ǁnās tsîna nî hui da î da sada ǂâi ǀgauba ǁÎb dib ǀkha ǀguiǃnâxa kai. Xawe ǂâis ǃnâ ūhâ re, Jehovab ǂâi ǀgauba da ga ra ūǃoa o, o da ge ‘tā nē ǃhūbaib ǀkha ǀguiti nî dīsen.’ Tā da ge Elob ǃoagu hâ ǂâi ǀgauba nî omkhâi. Nēs ge ǂûn ǀkha a ǀgopeǀnōhe ǁkhā. Khoe-i ge ǀnîsi sorosa ǀgaiba ra mā ǂûna ra ǂû tsoatsoa. Xawe tae-e hui hâ ǁî-i ga nauǀkhāb ais tsîna ǁgai hâ ǂûna ga ra ǂû o? ǁNās ǁkhās khami da ga Jehovab ǂâi ǀgauba ūǃoa o, o da ge tā nē ǃhūbaib ǀgauba ni uǃoa. w18.11 21 ¶14-15

Mîǁgui da ge nî ǁaeb hoaba ǀguiǃnâxase amab ǀkha ûisa. Kamanab âdo amab ǀkha ǃgaeǂnami re. Elobmîs ǁaeb ǃnâb ge soldaba beltsa gere ǃgae îb ǁîb kamanab tsî ǃnāb xūn tsîna ǁkhauba ǁkhā. ǁÎb ga belts xa ga ra ǁkhaubahe ǂgao o, ob ge ǁîba ǁîsa ǃgarise nî ǃgae. ǃGariseb ga beltsa ǃgae tama io, os ge nēsa ǁîba a hui ǁoa. Sida gagasi beltsa mati ra ǁkhauba da? ǁÎsa da ga ǃgarise ga ra ǃgae o, os ge ǁîsa ǂhumi ǃhoa ǀgauba xu nî ǁkhauba da tsî nî hui da î da ǃgâi mîǁguiga dī. ǃÂitsâhe tamas ka io da ga ǃgomsiga hōǃâ o, ob ge Elobmîs amaba sida nî ǀgaiǀgai tsî nî hui î da ǃgâina dīsa mîǁgui. Soldab ǁîb belts ose torob ǃnâ ǁhao ǁoa khami da ge sada tsîna nî mîǁgui î da tā sida amab beltsa ūǁnâ. Elobmîs ǁaeb ǃnâb ge soldaba beltsa gere ǃgae îb ǁîb kamanab tsî ǃnāb xūn tsîna ǁkhauba. w18.11 12 ¶15

Elobmîs ǃnâ hâ amaba da ge ǁgūtsâ da ga ra o, o ǀgui nî hō. ǁKhā da an hoana da ge nî dītsâ nē amaba hōs ǃgao. ǀNî ǂanǂansa ǂkhoamîdi xoa-aob ge ge mî, “ǁama” tamas ka io da ga xū-e “hōǂgā” o, o da ge nî dītsâ î da tā ǁî-e “ǁamaxū” tamas ka io ǂoaǃnâ. Xū-i hîna marioǃnâ î tsîn ge kaise a ǂgan ǁkhā. Hebregowab mîs tsîn ge ǂKhoamîdi 23:23 tawa “ǁama” di ra ǂnûiǃkhunihe xawe “hō” dis tsîna ra ǂâibasen. Nē ǀgam mîra ge dītsâ tsî xū-e hōs tamas ka io xū-e ǀnî hâ xū-i ǀkha mādawas ǃgaos tsîna ra sîsen-ūhe. Amaba ǁamas di ǀgauba da ge sao rase a ǂkhō ǁkhā. ǁAmaxū ǃkhaib tawa î ge “marioǃnâ bananagu” di a xoasa. Nē banana ga sadu oms tawa aitsâma nî sī? Hî-î. Sada ge aitsâma ǁama ǃkhaiba ǃoa ǃgû tsî nē banana ga sī nî ū. O nē banana ga a marioǃnâ? Î, xawe da ge sada nî dītsâ ǁaeba ǁamaǂui tsî ǁama ǃkhaiba ǃoa īsa. ǁNās ǁkhas khami da ge sada tsîna mari-e ǂhâ tama hâ amaba ǁamas ǃgao. Xawe da ge nî dītsâ ǁî-e hōsa. w18.11 4 ¶4-5

Jesub ge Petrub, Jakobub tsî Johaneb tsîna ge ǁkhau îgu ǀgapi ǃhomma ǃoa ī. ǁNāpa gu hâ hîna gu ge ǀō-aisa xū-e ge mû. Jesub ais tsî saran tsîn ge gere ǂkhai. ǀGam xoaǂgā-aira ge ge ǂhai hîna Moseb tsî Eliab tsîkha ra ǂnûǁkhaeba ra hîna ge Jesub ǁōb tsî khâis tsîn xa gere ǃhoa ra. (Lukab 9:29-32) Sao rase î ge ǃnâ ra ǃâusa ǁîgu ǂam-ai ge hā tsî gu ge dom-e ǃâusa xu ge ǁnâu—Elob domma. Nē kēbos ge Jesub tae-e hānîǁaeb ǃnâ ǁîb ǀgaib ǀkha nî dīsa ra ǁgau Elob Gaosib di Gao-aose. Jesub ge ge ǂkhâǃnâhe hâ i ǃgomsin hînab nî tsân tsî tsûtsûsa ǁōb hînab nî ǁōb ǃgao. Nē kēbos ge ǁkhāǁkhāsabegu ǂgoms tsîna ge ǀgaiǀgai ǃgomsin hîna gu nî hōǃân ǃgao tsî sîsenni hîna gu nî dī i ǃgaos tsîna. 30 Kuriga ǃkharu hâseb ge apostel Petruba nē kēbos xa gere ǃhoa nēs ge gere ǁgau ǁîb noxoba Jesub ǀkharaǀkharahes xa gere ǂâisa.—2Pet. 1:16-18. w19.03 10 ¶7-8

Mâ ǀgaub ǃnân Jehovab ǃoaba-aona ǂhumi ǂgomde xu ra ǀkhara? Sida ge hoaǁae “amaba” ra ǃhoa. (Sax. 8:16, 17) Sida ge amaba mâǁaeb hoaba nî ǃhoa, hoa khoen ǃoagu. O sadu ga ra ǂkham khoe-i o hîna sadu ǀhōsan xa ra ǁgâihe do? ǁGūtsâ re, î du tā sadu omaris ǁanin tsî ǀhaohâb ǃgâsan ǁaegu ǀnî hâ ti tanisen tsî sadu ǀhōsan ǁaegu ǁkhawa ǀnî hâ ǀgâub ǃnâ tanisen. ǁNās ge ǂhumi ûiǀgauba ûisa, sadu omaris ǁanin, ǀhaohâb ǃgâsan tsî Elob ǃoa-ai. (Psa. 26:4, 5) Jehovab ge a ǂan, sida ga ‘amǁgaugu ǀkha ǀgui ga ra ǃgôabi, xawe ǂgaob âb ga ǁîba xu ga ra ǃnū o.’ (Mrk. 7:6) ǁNās ǀkha da ge ǂkhoamîdi ǃnâ xoasa mîde ra dī ǂgao: “Ab sa ǂgaoba tā suri ǁore-aon ǂama, îts mâ tsēs hoasa ǃaoǃgâb ǃKhūb dib ǃnâ hâ.”—ǂKhm. 23:17. w18.10 9 ¶14-15

Elob khoen ge ǀgui gagasi omarisa ra kuruǂui tsî ǀnammi xa ra sao-e. (1Jhn. 4:21) ǁNā ǀnammi ge mûmûsens ǃnâ-ū dīhe tama hâ. Xawe ǂgui ǂkhariro xūn ǃnâ ra ǁgauhe, aiǁgause, omkhâi ra mîdi tsî ǃgâi dīb ǃnâ-ūs tsîna. Khoen xa da ga ra ǂâi o, o da ge a “Elob di ǁgaeǁgae-ao ǀnamǀnamsa ǀgôan axase.” (Efe. 5:1) Jesub ge ǁîb ǁGûba ǃamkuse gere ǁgae. “Tita ǃoa hā re ǀhupu hâdu tsî ǃnaohe hâdu hoado,” dib ge Jesuba ge mî, ‘o ta ge tita nî khoakhoa du . . . tsamtsiǃnâ tsî ta ǂgaob ǃnâ a ǃgamǃgamsenxa’ amaga. (Mat. 11:28, 29) Xristub khami da ga ‘ǀgâsa-i xa ǂâi’ o, o da ge sida ǀhomsi ǁGûb mā-amsa nî ǃkhōǃoa tsî kai ǂkhîba nî ūhâ. (Psa. 41:1) Hā re, î da sida ǀnamma ǁgau sida omaris ǁanin, sida ǃgâsan ǀhaohâb ǃnâ hân tsî aoǁnâba da ra khoen tsîn ǃoagu. w18.09 28 ¶1-2

Tsūkeǃgâgu ga ra hâ ǁaeb ain ge Elob ǃoaba-aona ǁnā ǃēsa ra sîsen-ū ǃgâsan hîna ǂhâsib ǃnâ hâna huisa. Aiǁgausen ge ǁîna marisise ǁîn hîna ǂhâsib ǃnâ hâna ra hui. (Jhn. 13:34, 35; ǃNǃkh. 11:27-30) ǀNî hâ ǀgaub ge ǃanus tsî omde oms ǃnâs tsîna huisa. Gabriela di ǀon hâ ǃgâsas hîna Polanda xu ra hās ge ǁîs omsa ǁgammi dâus ǃnâ ge ǂoaǃnâ xawe kaise ge ǂkhî ǁîs ǃgâsan ge ǃkharagagu ǀhaohâga xu hā tsî gere hui sī o. ǁÎs ge ra mî, “tita ge ǂoaǃnâ ta ge xūn xa ǃhoa ǂgao tama hâ.” “Xawe ta ge hō ta ge xūn xa ra ǃhoa ǂgao. Nē huib hîna ta ge hōǃâb ge ge ǁgaute tita ǀō-aisa Xristeǁîn ǀhaohâba xu hâsa.” ǂGuin hîna ge nē tsūkeǃgâga xu a hui-en ge ra mî ǁîn kaise ǃkhū hâse ra tsâsa nē ǃnaeǃkhais khaoǃgâ. Tsî ǁîn hîna ge Jehovab ǀkha ǀguiba gere sîsenǀhaon tsūkeǃgâb ǃnâ hâna huis ǃnân ge kaise ge ǂkhî i.—ǃNǃkh. 20:35; 2Kor. 9:6, 7. w18.08 26 ¶12

Sida ǂgaoba ǁkhaubas ǃnâ da ga ǃgâiǃō ǂgao o, o da ge ǁkhōǁkhōsa mâsiga nî mûǂan tsî nēs ǃoagu nî ǁkhaubasen. Mîs “sâu” di hâs ge ǃûi-aob xa ra ǂâi kai da. Gao-aob Salomob tsēdi ǃnâb ge ǃûi-aoba ǃauga ǃās mîrgu ai gere mâ tsî ǀō-e gere dī ǁkhōǁkhōsasibab gere mû o. Nēs ge ra ǁnâuǃā kai da tae-e da nî dīsa îb ǁGâuaba tā sida ǂâi ǀgauba ǁgaiǁgai. Elobmîs ǁaegu ǃnâ gu ge ǃûi-aoga dao-amdi ǃûi-aogu ǀkha ǀguiba gere sîsen. (2Sam. 18:24-26) ǁÎgu ge ǀguiba gere sîsen tsî dao-amde gere ǂganam kākhoen ga ǀgūse hâ o. (Neh. 7:1-3) Sida ǃgâiǂâis ge sida ǃûi-ao-i ase a sîsen ǁkhā, ǁGâuab ga sida ǂgaoba ga ra ǁgaiǁgai ǂgao o. ǀNî mîdi ǃnâb ga sida tsâsigu, ǂâibasendi tsî turagu tsîna ga ra ǁgaiǁgai ǂgao ǁaeb ai. Sida ǃgâiǂâis ga nē ǃkhâikhomsa mā da o, o da ge nî ǃgâ tsî ǁkhā da an hoana nî dī nēsa xu ǂgōsensa. w19.01 17 ¶10-11

ǂKham ǃgâsagu ge ǁîgu ǃhaos ǃoagu ǁgaumâihe tide xawe matikōse gu Elobmîsa ra saos kōse. (2Tim. 3:16, 17) Elobmîs ai ǃgaoǃgaosa tama hâ ǂâiǀgaugu ge ǃgâsaga a ǃkhō-oa ǁkhā. ǀNî ǃhūb ǃnâ î ge ǀhaohâb hui-aoba ǂgui ǁgaumâide ge māhe. ǀHaohâb ǃûi-aogu ge ge ǂan i nē ǃgâsab ge Elobmîs tsoatsoade ūhâ di xaweb ge ge ǁgaumâihe tama hâ i. ǀNî kaira ǀhaohâb ǃûi-aogu ge gere tsâ nē ǃgâsab ge noxoba a ǂkham ǀhaohâb ǃûi-aob ase ǁgaumâihesa di. Nē ǃgâsab ge ge ǁgaumâi-e tama hâ i, ǁîb a ǂkham amaga. Nē ǂâi ǀgaub ge ǂgui khoena, ǂgui ǃhūgu ǃnâ tsâǀkhā hâ. Kaise i ge a ǂhâǂhâsa Elobmîs tsoatsoadi ai ǂgomaiǂnûisa sida ǂâiǀgaugu ais ose. Nē ǀgaub ǃnâ da ge Jesuba ra ǁnâuǀnam tsî khoena ai-īsib ai ǀgoraǃgâ tide.—Johaneb 7:24. w18.08 12 ¶16-17

ǁKhōǁkhōsa xū-i ge noxoba hâ ǂâi tamase emails tamas ka io smsa sîsa. ǀNî ǃhūgu ǃnâ i ge sida aoǁnâ sîsen-e mā-am-e tama hâ. Sida mâǃoa-aon ge ǁnās ǀkha ama tama xūna a xoa ǁkhā tsîs ge ǁnāsa sida a ǃao kai ǁkhā tsî ǂhauǃnâxasiba ǃgâsan ǁaegu a khôa ǁkhā. Soviet Unions ǃnâ ge ī xū i xa ǂâi re. KGB di a ǂansa ǀapaǃnamgu ge gere ǂhôa Jehovab di khoen ǁaegu î ge ǀnî ǃgâsana a gaxaǃnâsa. ǂGuin ge nē ǂhôan ǃnâ ge ǂgom tsî nēs ǀkha Jehovab di ǀapeǂhumisa xu ge doe. Nēs ge ge tsûsa i. Xawe nēn hoan ǂam-ain ge ǀnîna ǀapeǂhumisa ǃoa ge oaǀkhī naun ge hâbe xawe. ǁÎn ǂgoms ge ge ǂkhabu. (1Tim. 1:19) Nēti i tsūtsūsa mâsiba xu da mati a ǂgōsen ǁkhā? ǁGai xūna ra ǃhoa tamas ka io ra ǂhôa xūna xu da ge nî ūbēsen. Tā gârese tanisen re. Hoaǁae hoa amaba ǂan ǃhoa du nîs aiǃâ. w18.08 4 ¶8

ǃKharu ge ǁaeb ǃnâ î ge Grike manuscriptka khomaisaoǂnûide ǁnātikōse ge sîsen-ū tama hâ i. Dîs ge hâ: Jesuba ge mî “Mîba tsi ta ra, nētsēts ge tita ǀkha paradais ǃnâ nîra hâ?” Tamas ka iob gere mî, “nētsē ta ra mîba tsi tita ǀkhats ge paradais ǃnâ nîra hâ”? Jesub ge ǁîb saosabena ge mîba: ‘Khoen Ôab ge ǃnona tsēdi tsî ǃnona tsuxugu tsîna ǃhūb di ǂgaob ǃnâ nî hâ.’ (Mat. 12:40; 16:21; 17:22, 23; Mrk. 10:34; ǃNǃkh. 10:39, 40) Jesub tsî ǁîb xōǀkhā ge mâ i khoeb tsîn ge Paradaisa ǃoa ge ī tama hâ i ǁō kha ge o. Jesub ge “ǀhobas ǃnâ” ge hâ i Elob ge khâisa a mā bi tsēs kōse. (ǃNǃkh. 2:31, 32) ǁNā khoeb ge ge ǀū i Jesub ge ǁîb ǁkhāǁkhāsabega a mîmâisa ǁîb ǀkha gu ge ǀhommi Gaosib ǃnâ nî hâ di. (Luk. 22:29) ǁNā khoeb ge ge ǁāǁnâhe tama hâ i. (Jhn. 3:3-6, 12) Jesub mîmâis ge ǃhūbaib paradaisa ǃoa ra ǁnaeǁgau hînab hānîǁaeb ǁaeb ǃnâ nî dīǀoaǀoasa. w18.12 6 ¶17-18, 20-21

Xawe ǃhae ǁaeb ǃnân ge Israelǁîna tsâuba ge ǃoaba tsoatsoa. Nēti i ǃgāsa ǁnâuǀnamoǃnâsiba ǁgaus ǃnâ-ūs ge nē ǁaesa ge ǂâi hâ i, noxoban Jehovab ǀkhāb ai hâ di. Aronni tsîn ge nē tsâuba ǃoabasa “kai tsē-i ǃKhūb [Jehovab, NW]” di-i di ge ǂgai. Jehovaba mati ge tsâ? ǁÎb ge ǀapexūheb hâ khami ge tsâ. Jehovab ge Moseba ge mîba nē khoen ge “ǁgao hâ” di ‘tsîn ge ǃhaese go ǁnā ǁgôa daob, tita ge ǁîna mîmāba xu.’ ǁÎb “khau ra ǁaib” ǃnâb ge Jehovaba nē ǁaesa gere dīkākā ǂgao. (Eks. 32:5-10) Xawe Jehovab ge ge mîǁgui îb tā nē ǁaesa dīkākā. (Eks. 32:14) Aronni ge ǁnā tsâuba kurus ǀkha a hui xaweb ge ǃhobasen tsî Levib ôaga ge ǁhao tsî Jehovab ǀkhāb ai ge mâ. ǀOadisidi ǃnâ hâ khoen ge ǁîn ûiga ge ǂoaǃnâ ǁnā tsâuba ǃoabas ǃgao. ǁNān hîna ge Jehovab ǀkhāb ai a mân ge ǀkhaega ge mîmâibahe.—Eks. 32:26-29. w18.07 20 ¶13-16

Tae-e a ǃgâi ǀgau ǂanǃgâhes diba, sada nî ôaba? Nē ǂanǃgâs ge ǀgapi ǁkhāǁkhās, ǃkhūsib tsî ǁkhoaxasib nē ǃhūbaib dib tsîna ǃoa ǁnaeǁgau tama hâ. Xawe ǂâi re, Paulub ge ǁguiǃāba da ǂanǃgâsa sao ra xoas ǃnâ: “Eloba du a ǂan ǃnubai, ā nēs ǃgâ-ai kais: Elob xa du mûǂanhe hâ ǃnubai, mati du kha ǁkhawa ra ǃhoba ǁnā ǂkhabusa tsî ǁkhoatsama tsoatsoa-ain, ǀasa-ame du ǁkhawa ra sîsenba ǂgaon ǃoa?” (Gal. 4:9) Kaise buruxa aiǂhanub ge ū da hâba. ‘Elob xa da mûǂanhe hâ ǃnubai’ ǀhommi tsî ǃhūbaib ǂgaeǂgui-aoba. ǁÎb ge māsenxa sida ǀkha ǀhōgusa. ǀGui Elobmîs ôaǃnâ-aob ge ge mî, “ǁÎb ge sida ǃnâ ǃgâiǃgâibasensa ra ôa.” Jehovab ga sida ǁîb ǀhōsan ase ga ra ǂanǃgâ o, o da ge ǃaromasa ūhâ ûib ǃnâ.—Aoǁn. 12:13, 14. w18.07 8 ¶3-4

Elob ǂhanuga xu ǃgâiba hōs ǃaroma da ge nē ǂhanuga ǀnam tsî ǃgôasiba nî ūhâba. (Amo. 5:15) Xawe mati da ǁnāsa a dī ǁkhā? ǁKhāǁkhāsen da ge nî î da Jehovab xūna ra mû khami mû. Hā re, î da nēti ǂkhō: ǂÂi re, ǀnîsi du ge ǃgâise a ǁom ǁoa. Xaweb ge sadu ǀaeǃkhō-aoba ra ǀapemā du î du ǂuruse ǂû tsoatsoa, ǃâisen tsî sadu ûi ǀgaub tsîna ǀkharaǀkhara. Nē xūna dī tsî du ge ra mû sîsen-i ra ǃkhaisa. Sadu ǀaeǃkhō-aoba du ge kaise nî gangan, sadu ûibab ge huib ase ība ǃkhais ǃgao. ǁNās ǁkhās khamib ge sida Kuru-aoba ǂhanuga mā da hâ îgu ǁkhauba da, ǁoreb ūhâ sîsenǂuiba xu tsî sida ûiba ǃgâiǃgâis ǃgao. ǂÂi re, mati gu Elobmîs ǂhanuga sao ra xūna xu a hui da ǁkhāsa ǂhumib, ǀhôakaosib, ǃnaris, ǀaib, ǂkhabadīb tsî ǃgaidība xus tsîna. (ǂKhm. 6:16-19; J.ǂHa. 21:8) Jehovab ra ǂgao khami da ga xūna ga ra dī o, o da ra hōǃâ ǀkhaeb ge ra ǃaroma îb sida ǂgaoba ǀnammi ǃnâ kai. Tsî Jehovab ǂhanuga ǃgôaǃgâsiba ūhâba. w18.06 17 ¶5-6

Pilatub ge ǀnîsi gere ǃao Jesub ǂgīǂgōsib xūna nî ǀû kai ǃkhaisa, nēs ge Pilatuba kaise gere ǂâiǂhansen kai. Jesub ge ǃeream tsî ge mî: “Ti gaosib ge nē ǃhūbaiba xu hâ tama hâ.” (Jhn. 18:36) ǁÎb ge ǂgīǂgōsi xūn ǀkha ge ǁaeǁaesen tama hâ i, ǁîb Gaosib a ǀhommi di Gaosi amaga. Jesub ge Pilatuba ge mîba ǁîb sîsenni ǃhūbaib ai hâb ge ‘amabab nî ǃkhō-ambase’ hâ. (Jhn. 18:37) Sada ǁgaumâisa da ga ra ǁnâuǃā o Jesub ge ǁîb disa a ǁnâuǃā khami, o da ge sada tsîna xū-e dī tamase nē ǃhūbaib ǂgīǂgōsi xūn ǃnâ ǁhao tide. Nēs ge supu tide. “Khoen ge sida ǂharis ǃnâ ǁgai ǂoas ǀguisa ra dī,” dib ge ǀnî ǃnarimâra sari-aoba ra mî. “ǀGui ǃhaosa nau ǃhaos ǀgapise ūhâs ge nētsē a ǀgapi. Tsîn ge ǀnîna ra ǂâi ǃhūb ǃnorasasib ǁîn ûiba nî ǀkharaǀkhara di. Kai gangans ǃgâsana ǃoa hîna Xristeǁîn ǀguiǃnâxasib tsî ǃGâiǂhôasa aoǁnâs ǀkha ǁkhoaǂgaose ra aiǃgûna. Tsîn ge ǁîna Eloba ǃoa ra kō, ǁîb ǁîn ǃgomsina nî ǀam kaise.” w18.06 4-5 ¶6-7

ǃNona Hebre ǂkhanidi 1 Kroniks, Jobi tsî Saxariab tsîn ǀguin ge Satanni ǀons xa ra ǃhoa. Nē ǀons ge “mâǃoa-aob” di ra ǂâibasen. Tae-i ǃaromas ge nē ǀonsa kaise sîsen-ūhe tama hâ i Mesiab hās aiǃâ? Jehovab ge Satanna ǂhâbasa tama hâ ǂanǂansasiba Hebre xoadi ǃnâ ge mā ǂgao tama hâ i. Jehovab ǂâibasen ge îs ge î di xoade Mesiaba ǂanǂan tsî Elob khoena ǁîb ǃoa daoǁgau. (Luk. 24:44; Gal. 3:24) Mesiab ge hā o, ob ge Jehovaba ǁîba ge sîsen-ū. Tsî Jesub ǁkhāǁkhāsabegu ge Satanni xa da a ǂan xūna ge ǃgāǃgāba da tsî ǀhomǃgāgu tsîn ge nēs ǃnâ ge ǁhao. Jehovab ge Jesub tsî ǂkhauhesan tsîna nî sîsen-ū Satanni tsî ǁîb saosaben tsîna dīkākās ǃnâ. (Rom. 16:20; J.ǂHa. 17:14; 20:10) ǂÂis ǃnâ ūhâ re ǁGâuab ge ǁnātikōse ǀgaisa tama hâ. Jehovab, Jesub tsî ǂgomǂgomsa ǀhomǃgāgu tsîn ge ra mâǃgâ da. ǁÎgu huib ǀkha da ge nē khākhoeba a mâǃoa ǁkhā. w18.05 22-23 ¶2-4

Jehovab ge ǂûtani da ga ra o ǀgui ǁîb ǃoabasaben ase ra mû da. (Mat. 13:23; 21:43) Johaneb 15:1-5 ǃnâ hâ ǂkhōs tawa î ge Xristeǁîn ǂûtanisa ǁkhāǁkhāsaben hînan ra dīna xu hâ tama hâ. (Mat. 28:19) Di î ga ī hâ o, on ge ǂgomǂgomsa Xristeǁîn hîna ǁkhāǁkhāsabena dī tamana ǂûtani tama ǁnâugu xa ra ǂnûǁkhaebahe Jesub ǂkhōs ǃnâ. Xawe nēs ge di ī tama hâ. Tae-i ǃaroma? Sida ge khoena ǁgari tama hâ în ǁkhāǁkhāsabe kai. Jehovab ǀnamma î ge ǁgau tama hâ khoena ǁîn ǁkhāsib ǃnâ hâ tama xū-e dī kai tsî ǀgoraǃgâsa. Jehovab ge sida ǁkhāsib ǃnâ hâ xūn ǀguina ra dī kai da. (Deu. 30:11-14) Tae-e da nî ǂûtani? Nē ǂû-i ge xū-i hîna da hoa da ra dī-e ǃoa ra ǁnaeǁgau. Mâ sîsen-e? ǃGâiǂhôas Elob Gaosib disa aoǁnâsa.—Mat. 24:14. w18.05 14 ¶8-9

ǁKhāǁkhā-aon, prister an, ǂnomdom an, profet an, kēbo-aon tsî rabin tsîn ge ǃhūbaib ǂhawase ǀoa hâ. ǂGurokham ǁaeb khamin ge ǁîna Elobmîs ǃnâ hâ xūna “ǂhanuoǃnâsib ǃnâ ra ǃkhōdawa.” (Rom. 1:18, 25) ǁÎn ge ǂhumiba ra ǁkhāǁkhā “ǀgui ǃnāsa, sâuhes ge hoaǁae sâuhes di ra ǂâibasen” di. Tsî noxoba ra ǁkhāǁkhā khoe-i ǁō î ga ra o, o ǀnî hâba sī ra ûisa tsîb Eloba aore khoeb tsî aore khoeb tamas ka io tare khoes tsî tare khoes tsîna ǃgamesa ra ūǃoasa. ǂGīǂgōsi ǃnandi ge ǂhumib ǃnâ-ū khoena ra ǂgaeǂhapu. Tsî ǀnîhâ ǂhumib hînan noxoba nî mîb ge “ǂkhîb ge hâ tsî tsūǃgâ-i a ǀkhai” di. Hîna î ge “ǃhae ǁgaoǁgaosi-e ǁîn ǂama nîra hā.” A da tā ǁîn xa ǂgaeǂhapuhe tsî ǂâi nē ǃhūbaib di nî hâhâ di. Sida ge amabes ǃnâ a ǂan Jehovab tsēs “ǃnari-aob” ase nî hāsa.—1Tes. 5:1-4. w18.10 7-8 ¶6-8

Jesub ge ǂkhauhesa ǃgâsan tsî ǀhaohâb ǃûi-aogu “gaosagu” tsîn ǃnâ-ū ǃgâsan hîna ra ǂkhabuǂâina ǂkhâǃnâ tsî ra daoǁgau. ǀHaohâb ǃûi-aogu ge ǁîgu ǃgâsan ǂgomsa ‘gaoǂam’ tama hâ xawe ‘sîsenǀhao-aogu’ ase ǀguiba ra sîsen. (Jes. 32:1, 2; 2Kor. 1:24) Paulub ge aiǁgausa ge mā ǁgae da nîse. ǁÎb ge Tesalonikas ǃnâ hâ Xristeǁîna ǃoa ge mî: “ǁNās ǁkhās xase ge ge kaise ǀnam du hâse ge māsenxa i, Elob di ǃgâiǂhôasa ge nî au dus ǀguisa hî tama i, tsî ge nî ǁkhāti sige ǀomdi ǂûde māsa, ǀnam du ge ge hâ i xui-ao.” (1Tes. 2:8) Paulub ge ge ǁgau mîs ǀguisa dīs ǂâu tama hâsa ǁnā-amagab ge Efesus ǃnâ hâ ǀhaohâb ǃûi-aogu nētsēs xoas ǃnâ hâ mîde ge mîba. w18.04 21-22 ¶6-8

ǁNā ǃnorasasiba xu ǃgâiba hōs ǃaroma da ge ‘Jehovab ai nî kō,’ ǁîb ǀkha ǀgaisa ǀhōsagusisa oms ǃnâ-ū. (2Kor. 3:16) Israelǁaes hîna ge ǃgaroǃhūb ǃnâ hâ îs ge gagasi mûǂuisa ge ūhâ tama hâ i, Jehovab ge ǁîna gere hâ ū ǀgaus ǃnâ. ǁÎn di ǂgaob tsî ǂâidi tsîn ge ǃgari tsî ge ǃgū-aisa i. ǁÎn ge Egipteba xun ge ǃnora kaihe o, o nē ǃnorasasiba ǁgansise gere mû. (Heb. 3:8-10) Jehovab gagab ǀkha a ǃkhōǀhaosa ǃnorasasib ge ǁgansi ǃgāsisa xu ǃnora kaihes xa a ǃgâi. Khoesib a dī ǁkhā xūn ǃâ-aib ge Jehovab gagaba ǁoreb tsî ǁōb tsîna xu ra ǃnora kai da. ǁNās xōǀkhā ama tama ǂgoms tsî ǁîs dī xūna xus tsîna ra huiǂui da. (Rom. 6:23; 8:2) ǁNāsa ǂoaǂamsa ǃnorasasi tamasa? Khoe-i ge ǁnā ǃnorasasiba a hōǃâ ǁkhā ǃkhō-oms ǃnâ i ga hâ tamas ka io ǃgā i ga xawe.—Gen. 39:20-23. w18.04 9 ¶3-5