Augustub

ǀHaodi tawa da ge hoaǁae Jehovab tsî Jesub tsîkha ge dība da xū-i xa ra ǂâiǂâiǃnâ-e. ǃGôaǃgâsib ǃgao da ge Jesub ûiǀgauba sada ûigu ǃnâ ra ûiǂui. (2Kor. 5:14, 15) ǁNā-amaga gu ge sada ǂgaoga ra ǁgari da î da Jehovaba koa xoremarib hînab ge mādab ǃgao. ǀGui ǀgaub hîna da a koa bi ǁkhās ge ǂgaoba xu hâ ǃereamde ǀhaodi tawa māsa. Sadu ge sadu ǃgôaǃgâsiba Jehovab tsî Jesub tsîkha a ǁgau ǁkhā sadu māsenxa ǁguibadi hîna du ra dī di ǃnâ-ū. ǀNî ǁaeb-ai da ge ǃkharagagu ǃgomsina da ūhâ xawe ǀhaode noxoba ra ǁhaoǃnâ. ǂGui ǀhaohâgu ge sîsenni khaoǃgâ ǀhaode ra ūhâ kaise da tsau hâ ǁaeb-ai. Tsî ǀnî ǀhaodi ge wekheb ǀams ai ǂgui ǃgâsan sâǁaeb ai ra hâ. Jehovaba ra mû tsau da hâ xawe da ǀhaode ra ǁhaoǃnâsa? ǁÎb ge ra mû. ǂGui ǃgomsin hîna da ūhân ǃnâ da ra ǁgūtsâ ǃkhaisab ga mû o, ob ge Jehovaba nēsa kaise ra ǃgôaǃgâ.—Mrk. 12:41-44. w19.01 29 ¶12-13

Jesub tsîn ge nē ǃgomsin khoen ge ǃkharu ǃnâna ǁîb tsîna ge ǃkharu ǃnâ. Aiǁgauseb ge Jesuba ǀgâsa omaris ǃnâ ge kai. ǁÎb dadab Joseb ǀkha sîsens ǃnâ-ūb ge Jesuba ǃgarise sîsensa ge ǁkhāǁkhāsen. (Mat. 13:55; Mrk. 6:3) Joseb ge Jesub di aoǁnâ sîsenni nî ǀams aiǃâ ge ǁō. Nēs ǀkhab ge Jesuba ǀgūkhoe-e ǁōb ǃnâ ǂoaǃnâs di tsûba ge hōǃâ. Jesub tsîn ge ge ǂan i ǃkharagagu ǂgomdi ǃnâ ra ǂgom omaris khoen ǀkha hâs mati tsâsa. (Jhn. 7:5) Nē mâsigu tsî ǀnîn tsîn ge Jesuba ge hui îb khoen di ǃgomsigu tsî tsâsigu tsîna ǁnâuǃā. Jesub di khoexaǃnâsib ge buruburuxa dīgab gere dī o, o ǃgāsase gere mûsen. Jesub ge buruburuxa dīga ǁgui-ais ase ge dī tama hâ i. ǁÎb ge khoenab ūba hâ ‘ǀkhomxasib’ ǃaroma ǁnāsa gere dī. (Mat. 20:29-34; Mrk. 1:40-42) Jesub ge khoena gere tsâba tsî ǁîna gere hui ǂgao.—Mrk. 7:32-35; Luk. 7:12-15. w19.03 16 ¶10-11

Jesub ǀuniga ǃuis ge ge i ǃhūbaib ai. ǂÂi re Jesub ge mati gere tsâsa. ǁÎba ǁōb nîs kōse ge ǂgomǂgomsa i? ǁÎb ga ǂgomǂgomsa tama hâ o, o i ge ǂgui khoena ǃâubasensa ga ūhâ tama hâ ûiba hōsa. (Rom. 5:18, 19) ǁÎb tanisen ǀgaub ge ǁîb ǁGûb ǀonsa ga ǁgaiǁgai tamas ka io ga ǀgapiǀgapi hâ. (Job. 2:4) ǁÎb ǀuniga ǃui gu ge ǁîb apostelga gere ǂnoagu “tarib âgu ga hoagu xa kaib ase ǃgôahe ǃkhaisa.” ǂGomǃgâsaseb ge Jesuba ǁnā tsēs ais tsîna ge ǁaixa tama hâ i. Xaweb ge tsaurase ge ǃeream. Tsaurase xawe ǁnâuǃā-e nîseb ge Jesuba ge ǁguiǃā matigu nî tanisensa. Tsîb ge ǁnāpaxū ge gangangu ǁîb ǀkha gu ge nē ǁaeb hoaba a hâsa. (Luk. 22:24-28; Jhn. 13:1-5, 12-15) Jesub aiǁgausa saos ǃnâ du ge ǂâiǂhansendi ǃnâ ǃnomsase a hâ ǁkhā mûǂan du ga o hoada mîs tsî dīb tsîn ǃnâ nau khoena ra ǁaixa kai ǃkhaisa. (ǂKhm. 12:18; Jak. 3:2, 5) Dītsâ re nau khoen ǃnâ du ra mû ǃgâi xūn ǃgao koa nîsa.—Efe. 4:29. w19.02 11-12 ¶16-17

Moseb ǂhanub ge ge ǃaroma î-i khoe-e tā ǂhumi xūn ai ǁkharahe. Khoe-i ge aiǂhanuba ūhâ ham-i ǁî-e ra ǂgā-amsa ǂansa. (Deu. 19:16-19; 25:1) Khoe-i nî ǁkharahes aiǃâ i ge ǀgam ǀhûǀguitimî-aora nē khoe-e gere ǂnûǁkhaeba. (Deu. 17:6; 19:15) O Israelǁî-i ga ǀgui khoe-i mûǁae ǀgui ga ra tsūdī os? Tā i ge nî ǂâi nē ǁgai xū-i hîna i go dī-i ǃgao i ǁkharahe tide di. Jehovab ge ǁî-i go dī xū-e go mû. Jehovab ge ǃgâi aiǁgausa ra mā, ǁîb ra dī xūn hoan ge a ǂhanu-ai. ǁÎb ǁgaraga ra ǃkhōǀgara khoenab ge ra ǀkhae xawe ǁnān hîna ǁîn ǀgaiba ǃgâi tama ǀgaub ǃnâ ra sîsen-ūna ra ǁkhara. (2Sam. 22:21-23; Ese. 9:9, 10) ǀNî khoen ge ǂhanu tama ǀgaub ǃnâ ra tanisen tsî ǁkharahen tide di ǂâi hâ xaweb ge Jehovaba ǂhanu ǁaeb-ai ǁîna nî ǀgoraǃgâ. (ǂKhm. 28:13) Tsî ǃhausen taman ga ra io, on ge nî mûǂan ‘ǃaoǃaosa i a ǃkhaisa, ûitsama Elob di ǃomǁae ǁnāsa.’—Heb. 10:30, 31. w19.02 23-24 ¶20-21

Moseb ge hoaǁae Jehovaba ǃoa daoǁgauhes ǃgao gere kō. “Mûheǁoasab tawab ge mû bib ras axase ge ǃkhōǀgaipesen xui-ao.” (Heb. 11:24-27) ǀGam kurigu ǃkharu hâses ge Israelǁaesa Egipteba xu a ǂoa o, on ge ǃgomsiba ge hōǃâ Sinaiǃhommi tawan nî sīs aiǃâ. Khoen ge ǁgammi a ǀkhai ǃkhais ǃgao ge ǁaixa hâ i. ǁÎn ge Moseb ǃoagu ge ǁaixa hâ i tsî î ge nē mâsiba ge ǁgaoǂoa Moseb Jehovaba ǃoa nî ǀgores kōse: “Tare-e ta nî nē ǁaes ǀkha dī? ǂKhari ǁaerob ǀguib kōse, on ge nî ǀuiǁhom [ǀuin ǀkha ǂnoa] te.” (Eks. 17:4) Jehovab ge Moseba ǃamku ǁgaraga mās ǃnâ-ū ge ǃeream. ǁÎb ge ǁîb ǃhôasa Horeb ǃhommi ai ge ǂnau tsî î ge ǁnāpaxū ǁgam-e ge ǂoaxa. Nēti da ge ra khomai: “Ob ge Moseba Israeli kaigu [ǀhaohâb ǃûi-aogu] di ais aiǃâ ǁnāti ge dī.” Israelǁaes ge ǁgamme ge ā tsî î ge ǂkhîba ge hâ.—Eks. 17:5, 6. w18.07 13 ¶4-5

ǀGui ǀgaub Jehovab ǁîb ǀnammi ǃnâ ra omkhâi dab ge ǀhaohâb ǃnâ-ūsa. Hoa da ge sida ǃgâsana ǀnammi ǃnâ a omkhâi ǁkhā gagasise ǀguis ose xawe emosioneelses tsîna. (1Jhn. 4:19-21) Apostel Paulub ge Xristeǁîna sao rase ra ǂkhâǃnâ: “ǁNā-amaga ǁnamagu [ǂkhâǃnâgu] re, î-i nē-e nau-e ǂnubikhâi, ǁkhāti du ra dī khami.” (1Tes. 5:11) Ama as ge nēs ge hoa da xa nî dīhe ǀhaohâb ǃnâ tsî ǀhaohâb ǃûi-aogu xa ǀgui dīhe tide. ǁNās ǀkha da ge Jehovab tsî Jesub tsîkha a ǁgae ǁkhā sida ǃgâsana ǁkhaeǂgao tsî omkhâis ǃnâ. (Rom. 15:1, 2) ǀNîn hîna ǀhaohâb ǃnâ emosioneel ǃgomsina ūhân ge ǀaeǃkhō-aogu di huiba a hōǁkhā. (Luk. 5:31) ǀHaohâb ǃûi-aogu tsî ǀnî ǃgâsan hîna ǀhaohâb ǃnâ hân ge nî ǂanǃgâ ǁîn ǀaeǃkhō-ao tama hâsa nēti i mâsib ǃnâ. Xawe hoan ge ǂhâǂhâsa ǃâba ǀhaohâb ǃnâ ra ǀuru î da “ǂkhabuǂâi hâna ǁkhaeǂgao, ǂkhabusana ǂkhâǃnâ î du ǃnūǃnâxa hoan ǃoa.”—1Tes. 5:14. w18.09 14 ¶10-11

Sida ǂgomǃgâsiba da ge Jehovab ǃnâ ra ǀgaiǀgai ǁîba ǃnāsase ǂans ǃnâ-ū. Jehovaba da ga ǃgâise ga ra ǂan ǂgao o, o da ge Elobmîsa ǂōrisase nî khomai tsî khomai da go xū-e nî ǂâiǃgâ. Elobmîs ge ra ǁgau Jehovab ge mati ǁîb khoena ǃkharu ge ǁaeb ǃnâ gere ǁkhaubasa. Nēs ge ǂgomǃgâsiba ra mā da nētsēs tsînab nî kōǃgâ da ǃkhaisa. Jesajab ge sîsen-ū mîdi hîna ai-īsiba ra ǁguiǃā di xa ǂâi re, hîna ra ǁgau de matib Jehovaba nî kōǃgâ dasa. ǁÎb ge Jehovaba ǃoa ǃûi-aob ase ra ǁnaeǁgau tsî Elob ǃoaba-aona ǁkhaon ase. Jesajab ge Jehovab xa ge mî: “ǁÎb ge ǁkhaon âba ǁîb ǁôakha ǃnâ ǀhaoǀhao tsî tîǂams âb ǃnâ nîra tani.” (Jes. 40:11) Jehovab ǃomkha da ra hōǃâ o, o da ge ǁkhaubahe hâse ra tsâ. ǃGomsin ǃnâ ǃnomsase hâs ǃaroma nētsēs di xoas xa ǂâiǃgâ re. Nēs ge nē ǃgomsin ǀkha nî hui du. w19.01 7 ¶17-18

ǀGui tamas ka io ǃnāsa gagasi mîǁguigats ūhâ dīǀoaǀoa ǂgaots ra ga? ǀNîsits ge Elobmîs ǃâ-e tsēs hoasa ra khomai ǂgao. Tamas ka io sa ǃhoa ǀgaub tsî ǁkhāǁkhā ǀgaub tsîna ra ǃgâiǃgâi ǂgao. ǀNîsits ga nēn ǃnâ ǃgâise dī o tsîn ga khoena koa tsi o, ots mati ra tsâ? Nēs ge kaise ǃgâise ra tsâ kai tsi xū-ets go dīǀoaǀoa amaga. Nētits ge tsâ tide Jehovab ǂâisats ǂgurose ra mâi amaga Jesuba ǁgaes ǃnâ-ū. (ǂKhm. 27:11) Gagasi mîǁguigu ai ǂgomaiǂnûis ǃnâ-ūts ge ǃgâiaǂgaoxa sîsen-e ra dī, nēs a dīǀoaǀoasa amaga. Apostel Paulub ge ge xoa: “Mâhō, ǁnobeǁoasase, î du ǃaruǀîǀgui ǀaro ǃKhūb di sîsenni ǃnâ, sadu sîsenni ǃKhūb ǃnâ ǁau tama ǃkhaisa du a ǂan xuige.” (1Kor. 15:58) Ûib hîna ǀgapi ǁkhāǁkhāsens tsî ǃkhūsis tsîna ūhâb ge a ǁau, ǃgâiǃō tama i hâ amaga.—Luk. 9:25. w18.12 22 ¶12-13

Davib ge ǃhūbaib ai hâ khoen Elob ǂhanu-ai ǀgaugu ǃoagu nî ûi ǁaeba ǃoa gere ǁnaeǁgau. (2Pet. 3:13) Jesajab 65:22 tawa hâ kēbos ge ra mî: ‘Tsēdi ti ǁaes didi hais tsēdi khami nîra ī xui-ao.’ Nēs ge ra ǂâibasen khoen ge ǂgui kuriga nî ûi di. ǂHaisǂhais 21:1-4 ǃoagub ge Eloba khoesib ǃnâ ǃgâiǃgâibasensa nî ūhâ tsî ge mîmâi “ob ge ǁōba ǃaruǀî hâ tide,” Elob ǂhanu-ai ǀgaugu ǃoagu ǁîba nî ǃoaba khoen ǃaroma. Adammi tsî Evas tsîn ge Paradaisa ge ǂoaǃnâ Edenni ǃhanab ǃnâ xawe nēs ge ǀamosib kōse ge ǂoaǃnâhe tama hâ i. Elob ge mîmâi khamin ge khoena ǃhūbaib-ai noxoba nî ǀkhaehe. Davib ge ǂkhâǃnâhe hâse ge mî ǂhanu-ai khoen ge ǃhūbaiba nî ǀumi tsî ǁnāpa ǀamosib kōse nî ǁan. (Psa. 37:11) Jesajab ǂkhanis ǃnâ māsa kēbodi ge nî tura kai da ǁnā mâsib ǃnâ ûi ǂgaosa. (Jes. 11:6-9; 35:5-10; 65:21-23) Mâǁae? Jesub ge Jodeǁî tsūdī-aoba a mā mîmâis ga dīǀoaǀoahe o. (Luk. 23:43) Sadu ge ǁnā Paradais ǃnâ a hâ ǁkhā. w18.12 7 ¶22-23

Jehovaba ǃoaba tama hâ khoena xu da hoase a ǂgō ǁkhā? Hî-î, nē ǃhūbaiba xu da a ǃgûǂoa ǁoa amaga. ǁÎn di ǂâi ǀgauba xu da ge a ǃkhoebē ǁoa. (1Kor. 5:9, 10) Xawe da ge aoǁnâ sîsenni ǃnâs tsîna ǂhanu tama ǂgom ǀgauba ūhâ khoen ǀkha ra ǀhao. ǀNîsi da ga ǃgâi tama mâsib ǃnâ ǁîn ǁaegu ga ra hōsen o, o da ge ǁkhā da an hoana nî dītsâ ǁîn ǀgauga ūǃoa tama isa. Jesub khami da ge ǁkhā da as kōse Satanni di ǂâi ǀgauba ra ǃkhōǃkhō ǀgauga nî ǂhābē. Nēs ǃnâ-ū da ge ǃgâi tama ǂâi ǀgauga ūhâ khoen di ǀgauga xu ra ǁkhaubasen. Aiǁgause, ǀhōsana da ga ra ǁhûi ǁaeb ai da ge kaise ǂōrisase nî ǁhûi. Elobmîs ge ra ǃkhâikhom, khoen hîna Jehovaba ǃoaba tama hân ǀkha da ge tā nî hâ ǀhao ǁîn ǂâi ǀgaugu a ǂgaeǂhapu da ǁkhā amaga. (ǂKhm. 13:20; 1Kor. 15:12, 32, 33) Kurus, ǂkhabadīb tsî ǁgauoǃnâ ǀgauga ra khâikhâiǃnâ ǁaxasiga xu da ge nî ǂgōsen. Nē ǀgaub ǃnâ-ū da ge sida ǂâi ǀgauba ra ǁkhauba tsî “Elob ǂans ǃoagu” hâ ǀgauga ra ǂhābe.—2Kor. 10:5. w18.11 21 ¶16-17

Mati da amab ǃnâ ǃgû ǀgarasa nî ǀgaiǀgai? ǀGui ǀgaub ge ǁkhā da as kōse Elobmîs amaba nau khoena ǁkhāǁkhāsa. Nē ǀgaub ǃnâ da ge sida gagasi beltsa ǃgarise nî ǃkhō, nēs ge ‘Elob di mîsa.’ (Efe. 6:17) Hoa da ge a dītsâ ǁkhā sida ǁkhāǁkhā ǀgauba ǁgauǃnâ-ao-i ase ǃgâiǃgâisa î da ‘amab di mîsa ǂhanuse ǀgoraǃā [sîsen-ū]’ ǁkhā. (2Tim. 2:15) Elobmîsa da ge ra sîsen-ū nau khoena huis ǃnâ în amaba ǁama tsî ǂhanu tama ǁkhāǁkhā ǀgauga ǂhābē tsî da ge sada tsîna Elobmîsa sida ǂâis tsî ǂgaob tsîn ǃnâ nî ǃomaǃkhō kai. Nē ǀgaub ǃnâ da ge amab ǃnâ ǃgû ǀgaras di mîǁguiba nî ǀgaiǀgai. Amab ge kaise a ǀō-aisa ǀkhaeba Jehovaba xū. Nē ǀkhaeb ge ge ǃaroma î da ǃgâi ǀgaisa ǀhōsagusisa sida ǀhomsi ǁGûb Jehovab ǀkha ūhâ. ǁÎb nēsi ra ǁkhāǁkhā dan ge tsoatsoas ǀguisa ī. Elob ge amaba da ge ǁama xawes tsîna ǀamosib kōse ûis di ǀkhaeba ge mā da. ǁNās ǀkha amaba ǂoaǂamsa ǀuis ase ǃgôaǃgâ re. Mîǁgui re tita ge ‘amaba ǁama tsî ǁîba ǁamaxū’ tide.—ǂKhm. 23:23. w18.11 8 ¶2; 12 ¶15-17

Noaxi ge kai ǁgammi dâus aiǃâ ǃkhâikhoms di haisi-amsa gere aoǁnâ. Jesub ge sao ra mîde ge mî: “Tsî kai ǁgammi di tsēdi ǃnâ i ge ī khami, ǂû tsî ra āǃâ, ǃgame tsî ǃgameb ǃoa ra māǂuiǃâ, Noaxi ge arki ǃnâ ǂgâ tsēs kōse. Tsîn ge mûǂan tama i, kai ǁgammi hā tsî hoana ge ūbēs kōse; ǁnāti i ge ǁkhāti nîra ī Khoen Ôab di hās ǃnâ.” (Mat. 24:38, 39) Khoen ge ǁîn ûigu ǀkha gere ǁaeǁaesen xaweb ge Noaxa ǂgomǂgomsase ǃkhâikhoms haisi-amsa ge aoǁnâ. Nētsēs tsîna da ge khoena ǁnā ǃēsa ra mā în Elob ǂâibasens ǃhūbaib disa ǁkhāǁkhāsen. Jehovab khami da ge sada tsîna ra tsâ în khoena ǁîb ǃkhâikhomsa ǁnâu tsî “ûi” ǀgara. (Ese. 18:23) ǁNās ǀkha da ge omsa xu oms ǀkha da ga ǃgû o, o khoena ra ǃkhâikhom tsî ra mîba Elob Gaosib ǀgūǁae nē eloxoresa ǃhūbaiba hā nî dīkākāsa.—Ese. 3:18, 19; Dan. 2:44; J.ǂHa. 14:6, 7. w18.05 19 ¶8-9

Sadu ǁan ǃnâ hâ ǂharis tamas ka io ǃhūb ǃnâ i ga aoǁnâ sîsen-e ga ra ǂkhāhe o tsî du ga sadu ǃgâsan xa ga ra dî ǃnâhe o, o du tae-e nî dī? O du ǁîna hoa amaba nî mîba? Jesuba tae-e ge dī Romeǁîn ǂhanub xab gere dî ǃnâhe o? Tsî Elobmîs tsoatsoas ra ǁgau khami î ge ‘xū-i hoa-e ǁî-i di ǁaeba ūhâ.’ Jesub tsîn ge ǀnî ǁaeb ai gere ǃnō. (Aoǁn. 3:1, 7; Mat. 27:11-14) ǁNā ǁaeb ai î ge ǂkhaikari hâsa a ǂhâbasa, î da tā sida ǃgâsan ûiba ǁkhōǁkhōsa mâsib ǃnâ mâi. (ǂKhm. 10:19; 11:12) Tae-e du nî dī ǀgū ǀhōsa-i tamas ka io sadu omaris ǁani-i ga ra ǁore o tsî du ga ǁnās xa ga ra ǂan o? ‘ǂHanu-aisiba ǂhaiǂhai.’ Sadu ge ǀhaohâb ǃûi-aoga hoa amaba nî mîba. ǁÎgu ge ǃoaǂui hâ hoa amaba ǂansa, nē ǀgaub ǃnâ gu tsūdi-ao-e ǃgâi ǀgaub ǃnâ a hui ǁkhā amaga î-i Jehovab ǀkha ǃgâi ǀhōsagusisa omkhâi.—Jak. 5:14, 15. w18.10 10 ¶17-18

Mati da nau khoena ǀnammi ǃnâ a omkhâi ǁkhā? ǀGui ǀgaub nēsa da a dī ǁkhāb ge ǃgâi ǃgâ-ao kais ǃnâ-ū. (Jak. 1:19) ǁNâuǃāxa ǀgaub ǃnâ ǃgâs ge a ǀnammi di ǁgauǁgau. Sadu ge ǀnîsi ǃamku tsî khoexaǃnâ ǀgaub ǃnâ dîde a dî ǁkhā, nē khoe-i tsâsiba ǁnâuǃās ǃaroma. ǁNā ǀgaub ǃnâ du ge sadu ǃgâsa-i ǃoagu khoexaǃnâsiba ra ǁgau. A i sadu ais ǁgâiǂuisen ǀgauba ǀnamxaǃnâsib ǀkha du ra ǃgâsa ǁgau re. ǀNîsi i ga Xristeǁî-e kaise ǂguiǃnâgu xūna ga ra ǃhoa o, o ǁî-e ǃnūǃnâxasib ǀkha ǃgâ re tā ǁî-i ra ǃhoa hîna ǂhani re. ǃNūǃnâxasib ǀkha ǃgâs ge nî hui du ǁî-i di tsâsiba ǁnâuǃās ǃnâ. Sadu ga ra ǁgau o ǁî-e du amabes ǃnâ ra tsâbasa os ge nēsa ǁî-e nî ǁkhaeǂgao. w18.09 14 ¶10; 15 ¶13

Amaba ra ǁama khoen hoan ge ǁaeba ra matare. Gaosib haisi-amsa ǃgâs, Elobmîsa ôaǃnâs tsî ǀhaodi ǃgao aiǂhomisens tsîn hoan ge ǁaeba ǂhâ hâ. ǁAeba da ge ǂhâǂhâsa tama hâ xūna xu nî ǁamaǂui. (Efe. 5:15, 16) Matikō ǁaeba i ǂhâ hâ sida Elobmîs ǂansa hōsa? Nēs ge sida mâsiba xu hâ. Jehovab gā-aisib, ǀgaugu tsî sîsengu tsîn xa da ge ǁkhāǁkhāsen ǀû tide. (Rom. 11:33) ǂGurose ge māǂuihe ǃKhē xu ǂgō-ommi ge amaba “ǃamku bloms” ǀkha ra ǀgopeǀnō tsî ge mî: “Tā ǀgui bloms ǀkha ǂâu re di. ǀGuis ga ǂâu tama hâ o, o î ge ǁkhawa ga ǀkhai hâ. Noxoba ǂguina ôa re.” ǂGui ǁaeba da ga ra ūhâ xawe da ge noxoba Jehovab xa nî ǁkhāǁkhāsen. Nētsē da ge sida ǁaeba ǃgâise nî sîsen-ū î da ǂgui amaba ǁama sida mâsib ra mā-am khami. w18.11 4 ¶7

Aogu ge ra mîbahe îgu ǁîgu taradi ǀkha ‘ǁnâuǃāxasib’ ǃnâ sîsen. Nē mîs ge “taradi xa ǂâi tsî ǁîde ǁnâuǃā” di ra ǂâibasen. (1Pet. 3:7) ǂÂi tsî ǁnâuǃā di hâ mî ra ge ra ǃgûǀhao. ǁNâuǃāxa aob ge a ǂan ǁîb taras a ǁîb hui-aosa tsîs ǁîsa ǁîb aiǃâ xū tama dib ge ǂâi tama hâ. (Gen. 2:18) ǁÎb ge ǁîs tsâsiba ǂâis ǃnâ ra ūhâ tsî ǁîsa ǃgôasib ǃnâ ra ǃhoa-ū. ǁNâuǃāxasiba ūhâ aob ge ǁîb taras xa ra ǂâi ǀnî hâ tarekhoedi ǀkhab ga ra ǃhoa ǁaeb ai. ǁÎb ge tātsēs tsîna ǁîdi ǀkha ǁâǁâsen tamas ka io ǁîdeb ǂhâba hâsa ǁgau tama hâ. Nēsab ge internets ǂhawegab ga ra sîsen-ūs tsîna ǂâis ǃnâ nî ūhâ. (Job. 31:1) Nēsab ge ǁîsab a ǀnam o ǀgui dī tama hâ xaweb Elobab a ǀnam ǃkhais ǃgao tsîb ǁgaib tsîna ǃhui hâ amaga.—Psa. 19:14; 97:10. w18.09 29 ¶3-4

Tae-i ǃaroma i a ǃgom Elobmîs ǃnâ da ra ǁkhāǁkhāsen xūna ûiǂuisa? ǀGui ǃkhais ge kai ǃgamǃgamsenxasiba î ge ǂhâ hâ ǃgâina dīsa tsî sida ǃgamǃgamsenxasib ge ra ǃkhāǃkhāhe. Nē “ǀuni tsēdi” ǃnâ da ge khoen hîna a ‘ǁîǀnamsenxa, mariǃgunuxa, anxa tsî ǃgurixan’ ǁaegu ûi hâ. (2Tim. 3:1-3) Xawe nēti i ǀgaugu ǀamǂoade ra ūhâ ǁaeb ai i ge Elob ǃoaba-aona surixa gagadi xa ra ǀoa-e. (Psa. 37:1; 73:3) ǀNî i ge ǀnîsi a ǂâi ǁkhā: ‘ǂHâbasa-e tita nau khoen ǂhâsiga ti gu ǂam-ai nî mâisa? Tita ga ‘ǂkharirose’ ga ra tanisen o, on khoena ǃgôasiba ūhâba te tite?’ Jehovaba ǃoaba tama khoen ǁîǀnamsenxasib ǀgaugu ge sida a ǂgaeǂhapu ǁkhā tsîs ge nēsa ǀhaohâb ǁanin ǀkha da ūhâ ǀhōsagusisa a tsâǀkhā ǁkhā tsî sida Xristeǁî tanisen ǀgaub tsîna. Xawe da ge kai ǀkhaega ra hōǃâ Elobmîs ǃnâ hâ aiǁgaude da ga ǁgae o. w18.09 3 ¶1

Jehovab ge ǀguri hâ i xūnab nî kurus aiǃâ xaweb ge ǁîb xa ǀgui ge ǂâi tama hâ i. ǁÎb ge ûib di ǀkhaeba kurusabena ge mā, gagasises tsî sorosises tsîna. “ǃGâiǃō hâ Elob” Jehovab ge ǃgâi xūna hoaǁae ra mā. (1Tim. 1:11; Jak. 1:17) Tsî sida nî ǃgâiaǂgaosab ra ǂgao amagab ge Jehovaba ra ǁkhāǁkhā da, î da māxa. (Rom. 1:20) Elob ge khoesiba ǁîb īsib ǃoa ge kuru. (Gen. 1:27) Sida ge ge kuruhe î da Jehovab ǀgauga ǁgae. ǃGâiaǂgaoba da ga ra ūhâ ǂgao o, o da ge Jehovab aiǁgausa nî ǁgae tsî nau ǃgâsan ǃnâ ǃgâiǃgâibasensa nî ūhâ. (Fil. 2:3, 4; Jak. 1:5) Tae-i ǃaroma? Nēs ge kaise a supu Jehovab ge khoena di a kuru amaga. ǀOasa kurusa da ūhâ tama hâ xawe da ge Jehovab di māxasiba a ǁgae ǁkhā. Jehovab ge ra ǂgao în khoena ǁîba ǁgae tsî ǁnā-amaga ra ǃgâiaǂgao māxa da ga ra o.—Efe. 5:1. w18.08 18 ¶1-2; 19 ¶4

Xristub saosaben ge ra ǁgau Jesub mîden ra ǁnâusa, ǃgâs ǀguisan ga di tama io xawe ǁnâun ra xūn ǃoa-ain ga sîsen o. ǁÎn ge ‘ǃhūbaib di ǂhansendi’ ǀkha ǁaeǁaesen tama hâ. (Luk. 21:34) ǁÎn xa i ge Elob mîmāde ǁnâuǀnamsa a ǂhâǂhâsa, nēs ga kaise ǃgom xawe. Nē xūn hoan ǂam-ain ge sida ǃgâsana Jehovab ǃoa-ai ǂgomǂgomsase ra hâ. ǀNî hâ ǀgaub hîna da a ǁgau ǁkhāba Jesuba da ge ra ǁnâu di: Jesub ge ǁgaumâi aogu ǀkha ǀguiba sîsenǀhaos ǃnâ-ū. (Heb. 13:7, 17) Elob ǀapeǂhumis ge ǃkharu ge kurigu ǃnâ ǀkharaǀkharana ge dī, nēs ge ǀasa sîsen-ū da ra xūn tsî sida aoǁnâ ǀgaub, sida wekheb ǁaegu hâ ǀhaodi ra dīhe ǀgaub tsî sida ǀHû-omga da ra om ǀgaus tsîna ǃkhōǂgā hâ. Kaise da ge nē daoǁgaudi hîna ǀnamǀnamsa ǀgaub ǃnâ ra māhe de ra ǃgôaǃgâ. ǂGomǃgâ da ge ra Jehovab nî ǀkhae da ǃkhaisa sada ǁgūtsâdi ǃgao ǁîb ǀapeǂhomis daoǁgaude saosa. w19.03 10-11 ¶11-12

ǃNaeǃkhais hîna 10 persent-e a amas ge 100 persent-e ama tama ǂhôan ǃoa a daoǁgau ǁkhā. ǂÂi re tae-i ge Israelǁaes hîna ge Josuab di tsēdi ǃnâ Jordanǃāb di huriǂoas ǀkhāb ai ǁan hâ în ǀkha a īsa. (Jos. 22:9-34) ǁÎn ge ge ǁnâu Israelǁaes hîna ge aiǂoas ǃnâ ǁan hâ în ge kai altarsa ge om. Nē ǂhôas di ǃâ-i ge ge ama i. Nē ǀoasa tama ǃgāsasiba ǁnâus khaoǃgân ge huriǂoas ǀkhāb ai ǁan hâna ge ǂgom ǁîn ǃgâsan go Jehovaba a mâǃoa di. Tsîn ge nēs ǀkha Israelǁaes hîna ge huriǂoas Jordanǃāb dis ǃnâ ǁan hâ îna toroba ǁnān hîna aiǂoas ǃnâ ǁan hân ǃoagu ge tsoatsoa. (Jos. 22:9-12) Xawen ge ǃkham tsoatsoan nîs aiǃâ ǂgomǂgomsa aoga ge sî, îgu hoa amaba aibe sī ǁnâu. Nē aoga tae-e ge ǁkhāǁkhāsen? Altars ge ge omhe ǁguibadi ǃgaos ose xawe ǂâiǂâisens ǃaroma, în hoa khoena hānîǁaeb ǃnâ ǂâihō ǁîn tsîn ge Jehovaba ǂgomǂgomsase gere ǃoabasa. Matikōses ge Israelǁaesa gere ǂkhî, ǁîn ǃgâsanan ge ǀoasa ǂhôan ǃgao ǃkham ū tama hâ io, xawen ge ǁîna ǁaeba ge ū hoa amaba ǂan ǃgaosa. w18.08 5 ¶9-10

Paulub nēpa ra ǂoaxa-ūs ge ama ǃoaba-aon Jehovab din tsîn ge tsūdīs ǃnâ a ǁhao ǁkhā. ǁNān hîna ǃâitsâb ǃnâ ra māǁnâsen an ge ǀnîsi a ǂâi ǁkhā Jehovab mā-amsan ūhâ di. Jehovab mā-amsa da ūhâ di mîs ge ǂâibasen tama hâ ǁîb mā-amsa da amabes ǃnâ ūhâ ǃkhaisa. (1Kor. 10:1-5) Israelǁaes ge ge ǂâiǂhansen Moseb ge Sinaiǃhommi ai sī ǀhapese a hâ o. ǁNās ǁkhās khami da ge nētsē a ǂâiǂhansen ǁkhā tsî a mî ǁkhā tae-i ǃaromab Jehovaba gaxuse ra ū nē ǃhūbaiba ǀgoraǃgâsa tsî ǃgôaxa ǀasa ǃhūbaib tsîna hausa. Nē mîmâidi dīǀoaǀoahes ge ǀnîsi ǀhapese ra ū tsî ǀnîsi ama-aise ǀgui ra mûsen. ǁNāti i ǂâi ǀgaub ge nî ǃaroma î da ǁgansi xūna ôa, Jehovab ǂâisa dīs xa. ǁAeb ǀkha da ge Jehovaba xu a ǃnū ǁkhā tsî ǁgai xūna a dī tsoatsoa ǁkhā. Nēn ge xūn hîna da ga tātsēs tsîna dī tama hâna gagasise da ga ǀgai hâ o. w18.07 21 ¶17-18

Buruxa ǀkhaega da ge a hōǁkhā Jehovab ga sida ǀonsa ǂan o. Xawe mati da Jehovab xa a ǂanhe ǁkhā? Nēsa da ge ǁÎba ǀnams tsî ǁÎb ai māǁnâsens tsîn ǃnâ-ū ra dī. (1Kor. 8:3) Sida ǀhōsasisa da ge sida ǀhomsi ǁGûb ǀkha nî ǀgaiǀgai. Galate Xristeǁîn hînab ge Pauluba a xoaban khami da ge sada tsîna “ǂkhabusa tsî ǁkhoatsama tsoatsoa-ain” nē ǃhūbaib dina xu nî ǂgōsen. Nēs ge ǂanǃgâhesa ǃkhōǂgā hâ. (Gal. 4:9) ǁNā ǂgurokamǁaeb Xristeǁîn hîna ge Paulub xa a xoabahen ge gagasise ge aiǃgû tsî Elob xa ge ǂanhe. Xawe Paulub tsîn ge ge mî nē ǃgâsan ge ǁkhawa ge “ǁnā” oa ǀkhaiǃnâ xūna ǃoa. Paulub ge ǀnî mîdi ǃnâ gere mî: “Nētikō ǃnūse hā tsî du ra gâresib ǃoa oa, ǁau xūn hîna du ge ǁnāxūna ǃoa?” w18.07 8 ¶5-6

ǃGâi a ǃkhais ge Elob ǂhanuga khôa tsî da ǃgomma tsâ ǂgao tama hâsa. Elobmîs ǃnâ a xoamâisa khoen hîna ge a tsūdīna xu da ge a ǁkhāǁkhāsen ǁkhā. Ama as ge kaise ǀgapi ǁkhāǁkhāsa da ge Eloba xu ra ǃkhōǃoa. ǁÎb di mîs ǃnâ hâ ǃnaeǃkhaide da ge khomai tsî a ǂâiǃgâ ǁkhā. Aiǁgause, ǂâi re tsûb hînab ge Gao-aob Daviba a hōǃâba Jehovab ǂhanubab ge ǁnâuǀnamoǃnâ tsî Batsebas ǀkha a ǀai o. (2Sam. 12:7-14) Nē ǃnaeǃkhais xa da ra khomai tsî ǂâiǃgâ hîna da ge sao ra dîde a dîsen ǁkhā: ‘Matib Gao-aob Daviba Batsebas ǀkha ǀais xa ge ǃaromahe tsûba xu ga ǂgōsen hâ? Tita ga ǁnāti i mâsib ǃnâ ǃâitsâhe o, ǀgaiba ta nî ūhâ ǂgōsens diba? Joseb khami ta nî ǃkhoebē tamas ka io ta Davib khami nî māǁnâsen?’ (Gen. 39:11-15) ǁOreb ūhâ ǁgai sîsenǂuiba ǂâiǃgâs ge nî sida ǂgaoba hui îb “ǂkhababa ǁkhan.”—Amo. 5:15. w18.06 17 ¶5, 7

ǂHanuoǃnâsib ge ǂgīǂgōsi xūna ra khâikhâiǃnâ. Jesub ǁaeb ǃnâ î ge ǁgui-aimarisa kaise ge ǃgomsi i. ǁÎn hîna ge Jesuba a ǃgân ge gere ǂgaoǀkhāhe în ǁgui-aimarisa ǁîn ūhâ xūn ai matare, aiǁgause ǂgarib tsî omdi ais tsîna. Xawe gu ge mariǃkhōǃoa-aoga nēsa ge ǃgom kai. Nē mariǃkhōǃoa-aogu ge kai marisa ra ǂgan xū-e ǁamaxū tsî ǁîga marisa gere ūbasen. Saxeub ge ge dana mariǃkhōǃoa-ao-i hîna ge Jerixos ǃnâ ǁan hâ îba. ǁÎb ge khoena xu mari-e gere ū tsî nēs ǃnâ-ū ge ǃkhū. (Luk. 19:2, 8) ǁÎb tanisen ǀgauban ge ǃnāsa khoena ǀnîsi ge ūhâ i. Jesub di mâǃoa-aon ge ge ǂhâba hâ i îb Jesuba ǁgui-aimaris di ǁhōgu ǃnâ ǃâ-e ǁhûi. ‘ǁGui-aimaris’ ge ge ǃgomsi i ǁîs ge Romeǁîn ǂhanub ǃoagu maris ai gere māhe ǀgapi ǁgui-ai î amaga. (Mat. 22:16-18) Jodeǁîn ge nē ǁgui-ais xa ge ǃgâibahe tama hâ i. Nēs ge gere ǁgau ǁîn ge Romeǁî ǂhanuba gere ǃgôasa. w18.06 5-6 ¶8-10

Satanni ǀkhāba da ga ǁhûi o, o da ge ǃgâi tama ǀamǂoasa nî ūhâ. (Job. 21:7-17; Gal. 6:8) Tae-i aiǂhanuba da ūhâ ǂansa Satanni ǂgaeǂguis xa? Nēs ge ra hui da î da ǀnōsa mûǂuisa ūhâ khoesi ǂhanugu ǃoa-ai. Tsî nēs ge ra ǂkhâǃnâ da î da aoǁnâ sîsenni ǃnâ aiǃgû. ǂAn da ge a Jehovab ge ra ǂhâba î da khoesi ǂhanuga ǃgôasiba ǁgau. (1Pet. 2:17) Tsî Jehovab ge ra ǂgaoǀkhā da î da khoesi ǂhanuga ǁnâuǀnam, ǁîgu ga ǁîb ǂhanuga mâǃoa tama io. (Rom. 13:1-4) Xawe da nî ǂanǃgâs ge î da tā ǀkhā-e ū. Tātsēs tsîna da ge ǀgui ǂgīǂgōsi ǃnansa naus ǂam-ai koa ǂgao tama hâ. Tsî ǀgui khoesi ǂgaeǂgui-ao-e nau-i ǀgapiga mâi ǂgao tama hâ. (Jhn. 17:15, 16; 18:36) Mû da ras ge Satanni tae-e Jehovab ǀons ǀkha ra dīsa. ǁNās ǀkhas ge nēsa kaise ra tsâǀkhā da î da khoena Elob amab xa ǁkhāǁkhā. Kaise da ge a ǂnīsa Jehovab ǀonsa tanisa. ǂAn da as ge Jehovaba ǀnams ge ǃkhūsib tsî xūna ǀhaoǀhaos ǃgâ-ai a ǀgapi.—Jes. 43:10; 1Tim. 6:6-10. w18.05 24 ¶8-9

ǃGameb ǃnâ hâ ǃgomsin hoan ǃnâs ǀgoras ǀguisa nî hui? Xoadi ge ǀgoras di ǁgaraga ūhâ tama hâ. Paulub ge ge xoa: “Tsî taras ga ǂgomoǃnâ aoba ūhâ, tsîs ga ǂkhî ǁîb ǀkha ǁansa, as ǁîba tā ǁnāxū.” (1Kor. 7:12, 13) Nēs ge sida tsēde ǃoas tsîna ra ǁnaeǁgau. ǀNî ǁaegu ai î ge Jehovaba ǃoaba tama aoba ra mî ǁîb ge ǁîb taras ǀkha a hâ ǁoa di. ǁÎb ge ǁîb tarasa kaise ra ǁore, ǁîs ûib tsî ǂurusib tsîn ǁkhōǁkhōsasib ǃnâ hâ khamis ra tsâs kōse. ǁÎb ge ǁîb omarisa kōǃgâ ǀû tsî ǁîb tarasa gagasise ǁkhōǁkhōsasib ǃnâ ra mâi. ǀNî ǁaegu ain ge ǀnî Xristeǁîna ǁî-i ra mî xū-i ai ǃgameba khôasa ra mîǁgui. Xawe ǀnî Xristeǁîn hîna ǃgom mâsiga ra hōǃân ge ge mâǀgai tsî ǃgameba ǃgâiǃgâisa ra dītsâ. w18.12 13 ¶14, 16; 14 ¶17

Tsoro-aob ǂkhōs hîna Lukab 8:5-8, 11-15 ǃnâ hâs ǃnâ î ge ǃkhomsa “Elob mîs” tamas ka io Gaosib ǃgâiǂhôasa ǃoa ra ǁnaeǁgau. ǃHūb ge khoe-i ǂgaoba ra ǂnûǁkhaeba. ǃKhoms hîna ge ǃgâi ǃhūb ai a ǁnās ge ǁhai tsî “kaidisiǃnâguse ge ǂûtani.” Jesub ǂkhōs ǃnâ î ge ǃgâi ǃhūba ǃkhomma a hō khami da ge sida tsîna ǃgâiǂhôasa ge ūǃoa tsî ge ǃkhōǀgara. ǁNās ge ge ǃaroma î-i Gaosib ǃgâiǂhôasa ǁhai, ǃgâise kai tsî ǃhoro hai kai hîna ra ǂûtanisa. ǃHoro haib ge ǀasa ǃhoroba ǂûtani kai tama hâ. Xawe ǃkhomma ra ǂûtani khami da ge sida tsîna ǁkhāǁkhāsabedī tama hâ xawe Gaosib ǃkhomma ra ǂûtani. Mati da Gaosib ǃkhomma ra ǂûtani? Gaosib ǃgâiǂhôasa da khoe-i ǀkha ra ǀgoragu ǃnās hoasa da ge sida ǂgaob ǃnâ ge ǃhanahe ǃkhomma ra ǀgora. (Luk. 6:45; 8:1) Nē ǂkhōs ge ra ǁkhāǁkhā da Gaosib ǃgâiǂhôasa da ga aoǁnâs kōse da ge nî ‘ǂûtani.’ w18.05 14 ¶10-11

Paulub ge ǁîb ǃgâsana ǂkhâǃnâs ǀguisa ge dī tama hâ i xawe ǁîna ‘ǃnāǂamsase’ ge ǀnam i. (2Kor. 12:15) ǀHaohâb ǃûi-aogu ge ǂkhâǃnâ ra mîdi ǀguide mî tide xawe ǃgâsan ǃnâ ǃgâiǃgâibasensa nî ūhâ. (1Kor. 14:3) Omkhâigus ge ǁnamahesa ǃkhōǂgā hâ xawe gu ge ǀhaohâb ǃûi-aoga nî ǂan mati gu ǃgâsana ǂkhâǃnâ ra ǀgaub ǃnâ nî ǁnamasa. Jesub ge ǃgâi aiǁgausa ge ǁgau ǁîb ǁōb tsî khâis khaoǃgâ. ǁÎb ge ǂkhariro Asiab [ǃKhawagasǃhūb] ǃnâ hâ ǀhaohâga gere ǁnama. Xawe ǁnamab nîs aiǃgâb ge ǁîba Efesus, Pergamums tsî Tiatiras tsîn ǃnâ hâ ǀhaohâga gere koa. (J.ǂHa. 2:1-5, 12, 13, 18, 19) ǀHaohâb ǃûi-aogu ge Xristub aiǁgausa nî ǁgae ǃgâsana gu ga ra ǁnama o. w18.04 22 ¶8-9

ǁGûdo, sadu ǁkhāsib ǃnâ hân hoana du ge nî dī i du sadu ǀgôana ǁkhōǁkhōsa ǀae-e xu ǁkhauba. ǁNās ǁkhās khami du ge sadu ǀgôana muvin, ai-īsiǂhôaǂgares, vidio gamedi tsî internets hîna ǁGâuab ǂâi ǀgauba ūhâna xu nî ǁkhauba. Jehovab ge ǀgôan gagasi ǂhâsiba kōǃgâs ǁgaumâisa ǁgûna ge mā. (ǂKhm. 1:8) ǁNās ǀkha tā ǃao re, oms ai Elobmîs ai ǃgaoǃgaosa ǁgaraga ūhâsa. Sadu ǀgôana mîba re tae-en nî kōs tsî tae-en kō tidesa tsî ǁnâuǃā kai tae-i ǃaroma du nē mîǁguiga ra dīsa. (Mat. 5:37) Sadu ǀgôan ra kai khami ǁîna mûǂan kai re tae-i a tsūs tsî tae-i tsū tama hâs tsîna Jehovab ǁgaragu ǃoagu. (Heb. 5:14) ǂÂis ǃnâ ūhâ re sadu ǀgôan ge ǂgui xūna sadu ra dī xūna xu nî ǁkhāǁkhāsen.—Deu. 6:6, 7; Rom. 2:21. w19.01 16 ¶8

ǂKham Xristeǁîse du tae-i !aroma kaira !gâsan !nâ !gâi!gâibasensa ǁgau tama hâba? ǁÎna du ge ǀnîsi ǃgôasib ǃnâ a dî ǁkhā, mâ ǀkhaegan ge hōǃâsa Jehovaba ǀoasase ǃoabas ǃnâ-ū. Nēs xa du ge kaise a omkhâi-e ǁkhā. Tsîs ge nēsa sats tsî ǁîn tsîna a hui ǁkhā ǃnâba ǃnâ kais ǀkha. ǁNās ǀkha da ge hoa da nî dītsâ ǀasase sida ǀhaodi tawa ra hā khoena ǁkhoreǁharesa. ǁGaumâisats ga ra o aoǁnâ sîsenni ǀhaosa dīsa, o kaira ǃgâsana hui re aoǁnâ sîsenni ǃnâ. ǁÎna ǀhomaxa tama hâ ǂharis ǃnâ ra aoǁnâ? ǀNî ǁaeb ain ge ǁîna ǀnîsi ǂkhamkhoe-i ǀkha a sîsen ǁkhā în hui-e. ǁÎn hîna ǀaeb tamas ka io ǃnubusiga ūhân tsîna du ge ǁnâuǃāxa ǀgaub ǃnâ a hui ǁkhā. Sadu ga ǂkhaman, kairan, ǂansa ūhâ taman tsî ǂansa ūhân tsîn ǃnâ ǃgâiǃgâibasensa ga ra ǁgau o, o du ge ǁîna a hui ǁkhā în ǁkhoaǂgaose aiǃgû ǁîn ǃnâba ǃnâ kais ǃnâ.—Lev. 19:32. w18.06 23-24 ¶10-12

ǁOreb tsî ǁōb tsîna xu da ǃnora kaihe hâ ǃkhaisa da ge nî ǃgôaǃgâ. Xoremarib ǃgao da ge Eloba ǃgâiǂâis tsî ǃgâiaǂgaob ǀkha a ǃoaba ǁkhā. (Psa. 40:8) ǃGôaǃgâsiba da ra ǁgau hîna da ge tātsēs tsîna sida ǃnorasasiba ǃgâi tama ǀgaub ǃnâ sîsen-ū tide. Apostel Petrub ge ra ǃkhâi da î da tā sida ǃnorasasiba ǁgansi turagu ǃgao sîsen-ū. Nē ǃkhâikhomsa Israelǁaes ǀkha ge ī xūn xa ǂâi kai da tama hâ? Xawe nēs ge kaise sida nî ǁkhōǁkhōsaba. ǁGâuab tsî ǁîb ǃhūbaib tsîn ge xūna îsase ra mûsen kai, sara anas, ǂû-i, xûi-i tsî ǁkhoaxasib tawa i ga ra hā o. Kaise gā-ai ǁamaxū-aon ge gaxaǃnâsiba ra sîsen-ū î da mâ xū-i hoa-e ǁama ǂgao. Nē xūna da ǂhâ tama hâ xawe. Kaise i ge nî supu ǁnāti i xūna ǂgaosa tsî sida ǃnorasasiba ǃgâi tama ǀgaub ǃnâ sîsen-ūsa. w18.04 10 ¶7-8