Septemberi

Jesub ge tsâbaǁhaosa Martas tsî Marias tsîra ge ǁgau. ǁÎra ǃgâb Lasarub di ǁōb ǃgao ra tsûaǂgao hâ ǃkhaisab ge mû o, ob “ge Jesuba ge ā.” (Jhn. 11:32-35) Jesub ge ǁîb di ǀhōsabab ge ǂoaǃnâ ǃkhais ǃaroma ǀgui ge ā tama hâ i. ǁÎb ge ge ǂan i Lasarubab ǁōba xu nî khâi kaisa. Xaweb ge gere ā ǁîb ǀhōsan di tsûbab gere ǁnâuǃā amaga. Jesub di tsâbaǁhaosa xu da ge ǂgui xūna a ǁkhāǁkhāsen ǁkhā. ǂAn da as ge ǁîb khami da ǀoasa kurusa ūhâ tama hâsa. Xawe da ge khoen ǀkhab gere sîsen ǀgaub ǃaroma a ǀnam bi. ǂKhâǃnâ-e da ge ra ǂansa ǁîb nēsi Elob Gaosib di Gao-aob ase ra ǂgaeǂguisa. ǁÎb ge ǀgūǁae hoa ǃgomsina nî ǀam kai. Khoeb aseb ge ǃhūbaib ai hâ i, amagab ge Jesuba khoen ǃgomsin hîna ǁGâuab xa ra ǃaromahena a ǀamǀam ǁkhā. ǀKhaesa da ge a nēti i ǂgaeǂgui-aob ‘sada ǂkhabusasigu ǀkha ǀkhomxasi-e ūhâba.’—Heb. 2:17, 18; 4:15, 16. w19.03 17 ¶12-13

Khoena Elob xa ǁkhāǁkhās aiǂhanuba da ge ūhâ xawe da ge sada kai ǃâba ǀhuru tama hâ. (1Kor. 3:6, 7) Jehovab ge khoena ǁîb ǃoa ra ǂgae. Tsî ǀams ai mâ khoe-i hoa-i ge aitsama ǁî-i ǂgaob mâsib ǃoagu ǃgâiǂhôasa nî ūǃoa. (Mat. 13:4-8) Jesub tsîn ge ge ǃgâi ǁkhāǁkhā-ao-i xawen ge khoen tsîna ǁîb haisi-amsa ge ūǃoa tama hâ i. ǁNās ǀkha da ge tā nî ǂkhabuǂâi khoen ga ǃgâ da tama io. Khoexaǃnâsiba ǁgaus ge ǃgâi ǃnuriba nî mā da. Tsî da ge sada aoǁnâ sîsenni xa kaise nî ǁkhoaxabahe. Tsî da ge nēs ǃnâ-ūs tsîna māsa xu hâ ǂkhîba nî hōǃâ. Tsîs ge nēs tsîna ǁîn hîna “ǀamo ûiba ǃoa ǃkhōǂuibasenhe hân” tsîna nî supuba ǃgâiǂhôasa ūǃoasa. (ǃNǃkh. 13:48) ǁNās ǀkha “ǁaeba da ūhâ hîa, a da ǁnâi hoana ǃgâidība.” (Gal. 6:10) Tsî da ge ǁnās ǀkha sada ǀhomsi ǁGûba nî ǃgâiaǂgao kai.—Mat. 5:16. w19.03 25 ¶18-19

Gao-aob davib ge ge xoa: “ǃKhūb ge a kai tsî karehesa anu.” (Psa. 145:3) ǁÎb ge Jehovaba ge ǀnam-i tsî nē ǀnammi ge ge ǁgari bi îb Eloba koa “ǀhaohâb ǃnâ.” (1Kro. 29:10-13; Psa. 40:5) ǀGui ǀgaub Jehovaba koas dib ge ǃereamdi ǃnâ-ū Xristeǁî ǀhaodi tawa. Hoada ge ǃkharagaǃnâgu ǃereamde ǀhaodi tawa ǁnâusa ra ǃgôaǃgâ. Supu ǃereamdi ǀgôaron dide da ge ra ǃgôaǃgâ. Khoen domgu ǃnâ hâ ǂkhîb ge ra ǃgâiaǂgao kai da amab hînan go hōb xan ra ǃeream hîna. Tsî ǁnān hîna “ǁkhoaǂgaosiba ǀhaoǀhao” tsî taon ra xawe ǃereamde ra mān tamas ka io nēsi ǀgui gowaba ra ǁkhāǁkhāsena. (1Tes. 2:2) Mati da ǃgôaǃgâsiba nē ǃgâsana a ǁgau ǁkhā? ǁÎna da ge ǀhaodi khaoǃgâ a gangan ǁkhā ǁîn ǃereamdi ǃaroma. ǀNî ǀgaub ǃgôaǃgâsiba da ra ǁgaus ge sada tsîn ga ǃeream de mao. O da ge ǂkhâǃnâ-es ǀguisa hî tama xawe sada tsîna ǁîna ra ǂkhâǃnâ.—Rom. 1:11, 12. w19.01 8 ¶1-2; 9 ¶6

Disi khoegu hîna ǃgomsib ǃnâ ge hâ i gu. ǁÎgu ge ǃomamaxasib ǀaeba ge ūhâ i tsî ǃâubasen-e ge ūhâ tama hâ i. Xawe gu ge Jesub ǃgâi ǁkhāǁkhā-aoba ǀgui tsē ǃnūseba xu ge mû. ǁÎgu ge ge ǁnâu Jesub hoaraga ǀaena ra ǂgauǂgausa. Tsîgu ge ge ǂgaibi: “Jesu, ǁkhāǁkhā-aotse, ǀkhomxa ge re” nē disi khoegu ge ge ǂgauǂgau-e. Hoagu ge Jesub di tsamtsiǃnâsiba gere ǃgôaǃgâ. Xawe ǀguib ge nē tsamtsiǃnâsiba ǃgôaǃgâs ǀguisa ge hî tama hâ i tsî mîdi ǃnâ-ū Jesuba ge mîba mati kōseb nēsa ra ǃgôaǃgâsa. ǁNā ǂgauǂgau-e ge Samariaǁîb ge ge ǁgari-e Eloba koasa “kai dommi ǀkha.” (Luk. 17:12-19) Samariaǁîb khami da ge khoexaǃnâ khoena mîdi ǃnâ-ū ǃgâiba ra ǁgau ǂgao. Jehovab ge aiǁgausa ge mā da ǃgôaǃgâsiba ǁgaus ǃnâ. ǀGui ǀgaub nēsab ra dīs ge ǁnān hîna ǁîba ra ǂkhî kaina ǀkhaesa. (2Sam. 22:21; Psa. 13:6; Mat. 10:40, 41) Tsî xoadi ge ra ǂkhâǃnâ “î du Elob di ǁgaeǁgae-ao ǀnamǀnamsa ǀgôan axase.” (Efe. 5:1) ǂAm ǃaromas hîna du ǃgôaǃgâsiba ra ǁgau ǂgaos ge î du Jehovab aiǁgausa ǁgae ǁkhā. w19.02 14 ¶1-2; 15 ¶4

ǂKhamǀgôas ge skoli tawa Elob xa ǃkhōǃoahe tama hâ ǃoabas ǃnâ ǁhaosa ǃgôaǃgâsib ǀkha ra ǂkhā. Taoxa ǂkhamkhoeb omsa xu oms ǀkha ra aoǁnâb ge ǁîb ǀkha ǀguiba skola ra ǂgâ khoe-i hîna ge Jehovab di ǀHûǀguitimî-aona gere ǃkhāǃkhā i oms ai ra ǃguwuam. Oms khoeb hîna ǁîb omarisa kōǃgâs ǃgao ra sîsenni ge ǁîb sîsen mā-aob xa ge ǂhumi kaihe tamas ka io ǁgauoǃnâ xū-e ra dī kaihe. ǁÎb sîsen-eb a ǂoaǃnâ ǁkhā xaweb ge nē ǃgâsaba ǁîb ǀhōnkhoeba ge mîǃāba ǁîb a ǂhumi ǁoasa tsî Elob ǁgaraga nî ǁnâuǀnamse īsa nēs a Elob ǂgaoǀkhā amaga. (Rom. 13:1-4; Heb. 13:18) Mâ ǀgauga da nē ǃnona ǃgâsan ǃnâ ra mû? ǃKharagagu ǀgauga du ge a mû ǁkhā aiǁgause ǁkhoaǂgaosib tsî ǂhauǃnâsib tsîga. Xawe ǀgui ǀgaub ge ra mâǂoa—ǂhauǃnâsiba. Nē ǃnona khoen hoan ge ǂgomǃgâsiba Jehovab ǃnâ ra ǁgau. Mâ i hoa-i ge Jehovab ǁgaraga ǁnâuǀnamoǃnâ ǂgao tama hâ. ǂHauǃnâsib ge nē khoena ge ǁgari în nēn ge tanisen ǀgaub ǃnâ tanisen. Jehovab ge mâ i hoa-i ǀkha kaise a ǂkhî nēti tanisens ǃaroma. Sada tsîn ge sada ǀhomsi ǁGûba ra ǂkhî kai ǂgao. w19.02 2 ¶1-2

Nē ǂhanub ge ǁnān hîna ge aitsama ǁkhaubasen hō tama îna gere ǁkhauba aiǁgause, ǁgûo ǀgôan, ǃoataradi tsî ǃhūsaben tsîna. Israelǁî ǀgoraǃgâ-aogu ge ge mîbahe: “ǂHanub, ǃhaokhoeb dib tsî ǃoaǀgôab dibats ge gamagama tide, tsîts ge sarab ǃoataras diba mâiǁkhaese ū tide.” (Deu. 24:17) Jehovab ge huio khoena gere ǁgau ǁîb ǁîn xa ǁae hâsa. Tsîb ge ǁnān hîna ge ǁîn ǀkha ǃgâi tama ǀgaub ǃnâ gere hâna ge ǁkhara. (Eks. 22:22-24) Jehovab ge ǁîb ge ǁgaumâi ǃgâsagu ǁnān hîna gu ra mûǂamna ǀnamxaǃnâ ǀgaub ǃnâ nî kōǃgâsa ra ǂgao. Jehovab ge ǃgâi tama ǀgaub ǃnâ ǁgoe-ūgusa ǃhui hâ tsî hoa khoen ǃgōsase ǁnān hîna a huion nî ǁkhaubahe ǃkhaisa ra ǂhâba. (Lev. 18:6-30) Jehovab ǂhanu ǀgaub ǃnâ ra hâ-ū da di da ga ra mû o, o i ge sida ǀnamma ǁîb ǃnâ ra ǀgai. Elob tsî ǁîb ǁgaragu tsîna da ga ǀnam o, o da ge ra ǂkhâǃnâ-e nau khoena ǀnamsa tsî ǁîna ǃgâi ǀgaub ǃnâ ra hâ-ū. w19.02 24-25 ¶22-26

Aiǁgause, ǂâi re mati da ǁGâuab ǂâi ǀgauba ūhâsa xu a ǁkhaubasen ǁkhā ǀgausa. Jehovab ge ge ǁkhāǁkhā da “ǀaib tsî mâ ǃanuoǃnâsib hoab tsî xūǃgunuxasib tsîna an sadu ǃnâ tā ǂgaihe.” (Efe. 5:3) Xawe tae-e da nî dī khoen ga skoli tamas ka io sîsenni tawa ǀaib xa ǃhoa o? Sida ǃgâiǂâis hîna a ǃûi-aos ge ǁkhōǁkhōsa xūna xu a ǁkhauba da ǁkhā. (Rom. 2:15) Xawe ǃgâ i da nî? ǀNî ǁaeb ai da ge ra ǁgari-e sida ǀhōsan ra ǃhoa xūna ǃgâsa tamas ka io ǁîn ra kō xūna kōsa. Xawe ǁnā ǁaeb ǃnâ da ge ǃās dao-amde nî ǂganam, nēs ge ra ǂâibasen î da ǀnî hâ xū-i xa ǃhoa tsoatsoa tamas ka io ǃgû bē. ǁKhoaǂgaosiba i ge ǂhâ hâ, hî-i di mîsa sida ǀhōsan ra mî tsî dī xūna ǃoa. Jehovab ge sida ra dītsâ o ra mû tsî ǀgaib tsî gā-aisib tsîna nî mā da ǁGâuaba mâǃoasa.—2Kro. 16:9; Jes. 40:29; Jak. 1:5. w19.01 17-18 ¶12-13

Salomob hîna ge ǃkhū hâ îb ge ‘ǃgâiaǂgaoba ge ǃâitsâ îb ǃgâiba kōǀî.’ (Aoǁn. 2:1-10) ǁÎb ge ǂgui omdi tsî ǃhanagu tsîna gere om tsî ǁîb turab ǃnâ ge hâ i xūn hoana gere dī. ǁNās khaoǃgâb ge mati tsâ? ǂÂu hâse? Dīǀoaǀoasase? Tāts ge nî ǂâi tsâ. Salomob ge nēsa aitsama ge mîba da nētsēs xoas ǃnâ. Nēs ge kaise ǂoaǂamsa. Nēsats ǂgaoba ǃoa nî ū? Jehovab ge ûib ǃnâts ǃgom ǀgaub ǃnâ nî ǁkhāǁkhāsensa ǂgao tama hâ. ǂGomsats ge ǂhâ hâ Eloba ǁnâuǀnamsa tsî ǁîb ǂâisa sa ûib ǃnâ ǂgurose mâis ǃgao. Nē ǂgoms ge ǀō-aisa tsî tātsēs tsîna tsûaǂgao kai tama. Jehovab ge tātsēs tsîna “ǀnammi ǁîb ǀons ǃnâ du ge ǁgauba” ǀuru tide. (Heb. 6:10) ǁNā-amaga ǁgūtsâ re ǀgaisa ǂgomsa omkhâisa tsî mû sa ǀhomsi ǁGûb sats ǃnâ ǃgâiǃgâibasensa ūhâsa.—Psa. 32:8. w18.12 22 ¶14-15

Gagasi khoe î ge Elob ǃnâ ra ǂgom tsî hoa xūn ǃnâ Elob ǂâi ǀgauba ūhâ. ǁÎ-i ge Elob xa daoǁgauhes ǃoa ra kō tsî ǁîba hoaǁae ra ǁnâuǀnam ǂgao. (1Kor. 2:12, 13) Davib ge a ǃgâi aiǁgau. ǁÎb ge ge xoa: “ǃKhūb ge a ti ǀumi-amǃnâ tsî ti āǀgabi; sats ge ti ǀumi-amǃnâsa ra sâuba te.” (Psa. 16:5) Nēs ge Davib ge Elob ǀkha ūhâ i ǀhōsagusisa ge ǃkhōǂgā hâ i. (Psa. 16:1) ǀAmǂoasa ge tae-i? ‘Ti ǂgaob hoab ge ra ǃgâiaǂgao’ dib ge ge xoa. ǀNî xū-i ge Daviba ǂkhîba ge mā tama hâ i Elob ǀkha ǀhōsagusisa ūhâs ǂam-ai. (Psa. 16:9, 11) Davib gere hōǃâ ǃgâiaǂgaob ge ǃkhūsisa ra ôa khoen xa a hōǃâhe ǁoa. (1Tim. 6:9, 10) Jehovab ǃnâ ǂgomsa omkhâis tsî ǁîba ǃoabas tsîn ge ǂkhîb tsî dīǀoaǀoasa ûib tsîna nî mā tsi. Matits ǂgoms ǃnâ nî ǀgai? Jehovab ǀkhats ge ǁaeba nî ūhâ, ǁnās ge Elobmîsa khomais, ǁîb kurusa ǃgaoǃgâs tsî ǁîb ǀgaugu xa ǂâiǃgâs tsîna ǃkhōǂgā hâ.—Rom. 1:20. w18.12 25 ¶7-8

Paulub ge nēsa ǃgaoǃgâs ǀguisa ge dī tama hâ i. Xawe nēs ge Xristeǁîna gere ǂkhâǃnâ în ǃgameba ǃgôaǃgâ tsî ǀō-aisase mû. Sadu tsîna ǃgameba nēti ra mû, ǃgōsase sadu ǃgameba, ǃgame du ga ra io? ǃGameba ǃgôaǃgâs ǃgao du ge ǃgâi ǃkhais ǃnâ hâ. Jesub ge ǃgameba gere ǃgôaǃgâ. Farisegu ge Jesuba ǀgoras xa a dî o, ob ge Elob ge ǂguro ǃgameb xa a mî mîde ǃoa ge ǁnaeǁgau: “ǁNā-amagab ge khoeba ǁgûb tsî ǁgûs tsîra ǁnāxū, tsî taras âb ai nî ǂgāmâisen. Tsî ra ge ǁî ǀgamra nî ǀgui ǁgan. ǁNā-amaga ra ge ǃaruǀî ǀgam tama tsî a ǀgui ǁgan.” Jesub ge ge ǀaro: “Elob xa ǁnâi ǃgaeǀhaohe hâ-e i ge khoe-e ǀgora tide.” (Mrk. 10:2-12; Gen. 2:24) Jesub ge ge mûǂan ǃgameb a ǂhâǂhâsa ǃkhaisa tsî da nēsa nî ǃgôaǃgâsa. Elob ge Adammi tsî Evas tsîna ge mîba tama hâ i ǃgameb ge a khôahe ǁkhā di. Nē ǃhanab ǃnâ ge dīhe mîmâis ge gere ǁgau, ǀgam khoera ge nî ǀgui kai ǀamosib kōse. w18.12 10-11 ¶2-4

ǂGurose da ge amaba a ǁnâu o, o da ge Jehovaba ǁnâuǀnams di ǂhâǂhâsasiba ge ǁkhāǁkhāsen. Gagasise da ra ǀgai khami da ge Jehovab ǂâi ǀgaub xa ǃnāsase ra ǁkhāǁkhāsen, ǁîb tae-i xa a ǃgâibahes tsî tae-i xa ǃgâibahe tama hâs tsîna. Nēs ge sida dīxūn tsî mîǁguigu tsîna nî ǂgaeǂgui. Jehovab ǂâi ǀgauba ūhâs ga ra ǃgâi i xawe î ge a ǃgom ǁkhā. Sida ǂâi ǀgaub hîna ǀoasa tama hâb ge daob ǃnâ a ǂgâ ǁkhā. Aiǁgause, Jehovab ǁgauoǃnâsib, ǃkhūsis, aoǁnâ sîsenni tsî ǀaob ra sîsen-ūhe ǀgauba ra mû ǀgauba ǁnâuǃās xa da ge a ǃgombahe ǁkhā. Tae-e da a dī ǁkhā? Mati da a aiǃgû ǁkhā Elob ǂâi ǀgauba sida dib ǀkha ǀguiǃnâxa kaisa? Nēs ge ra ǂâibasen i da sida ǂâis di ǀasa kaisis ǃnâ sao ra xūn ǃnâ ǀkhara, Elobmîsa ǁnâuǃā ǂgaos ǀkha ǁkhāǁkhāsens, ǂâiǃgâs tsî sida ǂâi ǀgauba Elob dib ǀkha ǀguiǃnâxa kais. w18.11 23-24 ¶2-4

Habakuki ge kaise ǃgom ǁaegu ǃnâ ge ûi hâ i. ǁÎb ge kaise ge tsûaǂgao hâ i khoen ǁîb ǂnamipe ge hâ în ge eloxoresa i amaga. ǁÎn eloxoresasiba mâ ǁae ge ǀam? Jehovaba tae-i ǃaroma ǀhapese ge ū xū-eb nî dīs aiǃâ? Habakuki ge ǃgâi tama tanisen ǀgaub ǀguiba gere mû ǁîb khoen ǁaegu. ǁÎb ge huioǃnâse gere tsâ. ǁNā ǃgom ǁaegu ǃnâb ge Habakuka Jehovab ai ge kō îb xū-e dī. Habakuki ge Jehovab ǁîb ǀkha ǁae tama hâ khami gere tsâ. Elob xū-e ǀgūǁae dī tide dib ge ge ǂâi hâ i. Elob ǃoaba-aob di tsâsiga du a mû ǁkhā? Habakuka Jehovab ai ge ǂgomaiǂnûi ǀû? Jehovab mîmâidi ǃnâb ge ǂgom ǀû? Hî-î. ǁÎb ǂâiǂhansendi tsî ǃgomsigu tsînab ge Jehovab ǃomdi ǃnâ ge mā, ǁnās ge ra ǁgau Jehovab aib ge ge ǂgomaiǂnûi ǀû tama hâ i. ǁÎb ge Elob xūna ra dī ǀgauba ge ǁnâuǃā tama hâ i tsî nēs xa kaise gere tsûaǂgao tsî gere ǂâi Jehovaba tae-i ǃaroma ǁîb tsûba gere mā-am di. w18.11 14 ¶4-5

Petrub tsî Andreab tsîn ge ǁkhauhe o, îgu ‘khoeǃkhō-ao’ kai o gu ge ǁîgu ‘ǀûide ǁnāxū’ tsî ge ī. (Mat. 4:18-20) ǂGui khoen hîna amaba ra ǁkhāǁkhāsenan ge ǁîn sîsen-e ǁnaxū tsî a ī ǁoa. ǁÎn ge Elobmîs ai a ǃgaoǃgaosa ǃereamde ūhâ. (1Tim. 5:8) Elobmîs amaba ra ǁkhāǁkhāsen khoe-i ge ǁî-i ǃkhūsis ǃoagu ūhâ ǂâi ǀgauba nî dawa tsî ǂhâǂhâsa xūna ǂgurose nî mâi. Hā re i da Marias aiǁgausa kō. ǁÎs ge golfsa kaise ge ǀnam-i tsî nēs ǃnâ-ū ǂgui mari-e gere kuru ǂgao. Xawes ge Elobmîsa ge ǁkhāǁkhāsen tsoatsoa tsî gere ǃgâiaǂgao amab ge huisi o, îs ǁîs ûib ǃnâ ǀkharaǀkharana dī. Marias ge ge mûǂan gagasi ǃkhūsis tsî ǃhūbaib ra mā ǃkhūsis tsîn hoanas ge a ūhâ ǁoa di. (Mat. 6:24) ǁÎs ǃkhūsis tsî ǂanhes ǁkhāsib tsînas ge ge māǁnâ. Nēsis ge a aimâba-ao tsî “ǂâibasensa ūhâ ûib” ǃnâ ǃgâiba ra mû. w18.11 5 ¶9-10

³⁰ Kurixab a hînab ge Jesuba ge mûǂan aoǁnâ sîsenni a ǂhâǂhâsa ǃkhaisa tsî ǁnās ǀkha ǃnaokuru sîsen-e ge ǀû. ǁÎb ge ge mî Jehovab ge Gaosib ǃgâiǂhôasab nî aoǁnâ ǃkhais ǃgao ge sî bi. (Mat. 20:28; Luk. 3:23; 4:43) Jesub ge aoǁnâ sîsen-e ǂgurose ǁîb ûib ǃnâ ge mâi tsî nau khoen tsîn nē sîsen-e nî dīsa gere ǂgao. (Mat. 9:35-38) Sida ge ǀnîsi ǃnaokuru-ao tama hâ xawe da ge a Gaosib ǃgâiǂhôas aoǁnâ-ao. Nē sîsenni ge kaise a ǂhâǂhâsa, “Elob di ǀhaosîsenao” di da ra ǂgaihe amaga. (1Kor. 3:9; 2Kor. 6:4) Sida ge ‘Jehovab mîs a ama’ ǃkhaisa ra ǂanǃgâ. (Psa. 119:159, 160) ǁNā-amaga da ge ‘amab di mîsa ǂhanuse ra ǀgoraǃgâ’ ǂgao sida aoǁnâ sîsenni ǃnâ. (2Tim. 2:15) Tsî sida Elobmîsa ra sîsen-ū ǀgauba ra ǃgâiǃgâi, nēsa da ge Jehovab, Jesub tsî Gaosib tsîn xa khoena mîbas ǃnâ ra sîsen-ū. w18.10 11 ¶1-2

Aob ga Jesub Xristub hîna a ǁîb danab ǃoa ga ra kō o, os ge ǁîb tarasa ǁîba ‘ǃgam ǃgôasiba’ nî ūhâba. (Efe. 5:22-25, 33) Tsîb ge ǁîs aobas ūba hâ ǃgôasiba ǁîsa nî hui îs ǁnâuǃāxasib ǃnâ ǁîs aob ǃoagu tanisen. Khoe-aogu ra ga ǃgâi ǀgaub ǃnâ ga ra hâ-ū gu o, on ge ǀgôan tsîna ǁîra aiǁgausa nî ǁgae. ǁGûn ge ǁnā aiǂhanuba ūhâ în ǀgôana ǁkhāǁkhā în sao ra khoe-i xa ǂâi. Aiǁgausen ge ǁgûna ǀgôana nî ǁkhāǁkhā în tā ǀhû-ommi ǃnâ ǃkhoe mâ tamas ka io ǀhuru. Tsî ǂû ǀhaodi tawan ge ǁgûna ǀgôana nî mîba în aibe ǃâu kaikhoen ǂû-e nî hora toas kōse. ǀGôa-i ga ǀhû-ommi dao-amsa ga ra ǁkhowam tamas ka io ga ra ǃkhōba da o, o da ge ǁî-e nî gangan. ǁÎ-e gangans tamas ka io ǃgâi mî-e mîs ge ǁî-e a hui ǁkhā î-i ǂâis ǃnâ ūhâ ‘mās ūs ǃgâ-ai a ǃgâisa.’ w18.09 29 ¶5-6

ǁÎb di daoǁgaus ǃnâ-ūb ge Jesub Xristub sida Gao-aoba hānîǁaeba ǃoa ra mûǂui. ǁNās ǀkha hā re î da ǃgâiaǂgao nēsi da ra hōǃâ ǀkharaǀkharan ǃnâ ǃgâina da ra ǀama amaga. ǀNîsi du ge sadu omaris ǃoabas ǃnâ, mati du ǀhaodi nēsi ra dīhe ǀgauba xu ra ǀama ǀgaub xa a ǃhoa ǁkhā. Jehovab ǀapeǂhumisa xu da ra ǀama ǀgauba da ga ra mûǂan o, o da ge nē daoǁgaude ǃgâiaǂgaob ǀkha nî sao. Kaise da ge ra ǃgôaǃgâ ǁgâihe ra ǂkhanin ge ǀoroǀorohe o tsî da texnoloxiba ǀoasase sîsen-ūs ǃnâ-ū marihe ǂōrisase ra sîsen-ūsa tsî da nēn hoan ǂam-ai ǃhūbaib ǂhawase noxoba ra aoǁnâsa. ǁNās ǀkha da ge ǁkhā da as kōse elektronise ǂkhanin tsî mediab tsîna nî sîsen-ū. Nē ǀgaub ǃnâ da ge ǀapeǂhumis ra mā da xūna gā-ai ǀgaub ǃnâ nî sîsen-ū Xristub di ra ǂgao amaga. Xristub di daoǁgausa da ga ūǃoa o, o da ge sida ǂgomsa ra ǀgaiǀgai tsî ǀguiǃnâxasib tsîna ra aiǃgû kai. w18.10 25-26 ¶17-19

Elob khami da ga ǀhomxaǂgaosiba ǁgae o, o da ge ǂkhabuǂâi hâ khoe-i di ǀgorede a ǃeream ǁkhā. (2Kor. 1:3-6) Xawe tā ǀoasa kurusa sadu gagasi ǃgâsana xu ǃâubasen re. ǀNōsa mûǂuisa da ge sada gagasi ǃgâsan xa nî ūhâ. ǁNâuǃāxa i ge tide sida ǃgâsan tsūdī da tide di ǂâisa, nēs ge a ǂkhîoǃnâ kai da ǁkhā. (Aoǁn. 7:21, 22) ǂÂis ǃnâ ūhâ re Jehovab ge ǁnâuǃāxa ǂgaoǀkhāde ǁîb ǃoaba-aona ūba hâ. Jehovab aiǁgausa da ga ra ǁgae o, o da ge nau ǃgâsan dīsādi ai kō tide. (Efe. 4:2, 32) ǁÎn ǃnāsase dī tama hâ xūn xa da ge ǂâi ǂgao tama hâ xawe ǁîn ǀnai ǃgâise ra dī xūn ǃgao nî koa nî. ǁNās ge ǁîna a ǂkhâǃnâ ǁkhā. ǂHauǃnâse ǃgâsana ǀnammi ǃnâ koas ge ǁîna nî omkhâi tsî ǁîna nî hui în “koa-e” ūhâ ǁîn ǃoabas ǃnâ. ǁNās ge kaise nî ǃgâi dīsa, ǁaixa tsî ǀnî ǃgâsan ǀkha ǀgopeǀnōsens xa.—Gal. 6:4. w18.09 16 ¶16-17

Jesub mîdi ǃoagu î ge gagasi ǂû-e Elob daoǁgaus ǃoagu ûisa ǃkhōǂgā hâ. Nēsa mâ ǀgaub ǃnâ ǂû-i khami ī? Sida soros ǃgâi ǂûna da ga ra ǂû o, o ra tsâ khami i ge sida ǂgaogu tsîna ra ǀgaiǀgaihe tsîs ge sida ǂgoms tsîna ra ǀgai ǀamo ûib mûǂuis ǃnâ. Elosi ǁkhāǁkhāsa sîsenǂuis ge kaise a ǂhâǂhâsa gā-aisiba i ra omkhâi amaga. (Psa. 107:43) Gā-aisiba ūhâs ge kai ǀkhaega ra hau. “Tsî ūts ga hâ ǃgomǀgausan hoan ge ǁîb ǀkha ǀguiti-ī tama hâ . . . ǁÎb ge ûib di haise ība, ǁnān ǁîba ra ǃkhōna; tsî ǁîba ga ǃkhōǀgaipe-i hoa-i ge a ǃgâiǃō.” (ǂKhm. 3:13-18) Jesub ge ge mî: “Nēna ǂan tsî go ga ǁîna dīo, o go ge a ǃgâiǃō.” (Jhn. 13:17) Jesub di ǁkhāǁkhāsabegu ge ǂkhîba nî hōǃâ, ǁîb ge mîbagu xūna gu ga ra dī ǀgara o. Xawe gu ge ǁîga Jesub ǁkhāǁkhā ǀgaub tsî aiǁgaus tsîna ǁnā ǁaeb ai ǃgâise ge sao tama hâ i. Tsî gu ge ega ǁîgu tsîna nēti i ûi ǀgauba gere sao. w18.09 4 ¶4-5

Elob ge ǂguro kurusabe ra ǁgaraga ge mā, nē ǁgaragu ge nau khoen xa ga ǂâi kai ra hâ ǀguri ra ge ǃhanab ǃnâ hâ i xawe. Jehovab ge Adammi tsî Evas tsîra ge ǀkhae tsî ge ǂkhâǃnâ ra î ra ǂûǂûxaǃnâ, ǂguiǂguisen tsî ǃhūbaiba ǀoaǀoa. (Gen. 1:28) Kuru-aob ge ǁîb kurusaben ǃnâ ǃgâiǃgâibasensa ūhâ i khami ra ge Adammi tsî Evas tsîra ǁîra ǀgôan ǃnâ ǃgâiǃgâibasensa ga ūhâ. Paradais ge ǃhūbaib ǂhawase ga hâ hâ Adammi omaris di ǃgâib ǃgao. Nēs ge sîsen ǀhaosa ga ǂhâ hâ Adammi omarisa xu. ǀOasa kurusa ūhâ khoera ase ra ge Jehovab ǀkha ǀguiba ga sîsen hâ paradaisa ǃhûbaib ai hausa tsî Jehovab ǃgâiǃgâibasensa hōs ǃgao. (Heb. 4:11) Nēs ge kai ǀkhaega ga hau hâ. Nau khoen ǃgao ra ga māsen hâ o, o ra ge kai ǀkhaegu tsî ǀoasa kurus tsîna ga ūhâ. w18.08 18 ¶2; 19-20 ¶8-9

O sadu ga ǂhanuoǃnâse ga ra ǀgoraǃgâ-e os? Jesub tsî Johaneb ǁĀǁnâ-aob tsîn ge ǁnāti i ǃgomsiba ge hōǃgâ. (Mat. 11:18, 19) Jesuba mati nēsa ge sîsenǂam? ǁÎb ge ǁîb ǁaeb tsî ǁkhāsib tsîna ǁkhaubasens ai ge sîsen-ū tama hâ i. Xaweb ge khoena ge ǂkhâǃnâ în aibe ǃhoan nîs aiǃâ hoa amaba ǂan. Jesub ge ge mî, ‘gā-aisib ge dīgu ǃnâ-ū ra mûhe’. (Mat. 11:19) Nēba xu da ge xū-e a ǁkhāǁkhāsen ǁkhā. Khoen ge ǀnî ǁaegu ai ama tama tamas ka io ǃgâi tama xūna sida xa a mî ǁkhā. Hoa da ge ǁnās ǀkha ǀnîsi ǂhanu-aise da nî ǀgoraǃgâ-e ǃkhaisa ra ǃâubasen tsî ra ǁkhore sada ǀonsa ǃanuǃanusa. Xawe xū-i ge hâ dī ǁkhā da a-e. Khoe-i ga sada xa ama tama xūna ga ra ǃhoa mâ o, o da ge sada dīgu ǃnâ-ū nî ǁgau sada ǁnāti-i ǀgauga ūhâ tama hâsa. Jesub aiǁgausa xu da ge a ǁkhāǁkhāsen ǁkhā tsî ǂhauǃnâ Xristeǁî ûiǀgaub tsîn ge ama tama ǂhôana xu a ǁkhauba da ǁkhā. w18.08 6 ¶11-13

ǁNâuǀnamoǃnâsib Kainni, Salomob tsî Israelǁaes hîna ge Sinaiǃhommi tawa hâ în tsîn ge hoana ǀgui xū-e hoaǃnâ-aixase ge ūhâ i. Nē khoen hoan ge ǃēsa ge ūhâ i în “ǃhausen” tsî “ǃhobasen.” (ǃNǃkh. 3:19) ǃGāsa a ǃkhais ge Jehovab ge ǃhaese dīsā ra khoe-i ai ǀûsen tama hâ. Aiǁgause, Aronni tsîn ge Jehovab xa ge ǀûbahe. Nētsē da ge sida tsîna Jehovab xa ǃgâi ǀgaub ǃnâ ra ǁnamahe Elobmîs ǃnaeǃkhaidi, Elobmîs ai a ǃgaoǃgaosa ǂkhanin tsî ǃgâsa-i tsîn ǃnâ-ū. Nē ǃkhâikhomde da ga ra ǃgâ o, o da ge Jehovab ǀkhomma nî hō. Jehovab ǀkhommi hîna da ǃoaǂui tama hâb ge ǂâibasensa ūhâ. (2Kor. 6:1) Nē ǀkhommi ge ǃēsa ra mā da î da “eloxoresasib tsî ǃhūbaib di turagu tsîna ǀūxū.” (Tit. 2:11-14) Nē ‘ǃhūbaib ai da ûi’ hâs kōses ge Jehovaba ǃoabasa nî ǃâitsâhe. A da hoaǁae Jehovab ǀkhāb ai mâ re. w18.07 21 ¶20-21

Mati da nî dī î da sida mîǁguiba ǀgaiǀgai tsî Jehovab ǂanǃgâsa ôa, ǃhūbaib dis ose? Nēsa dīs ǃgao da ge ǀgam ǂhâǂhâsa xūna nî ǂâiǃgâ. ǂGurose Jehovab ge hoaǁae ǁîba ǂgomǂgomsase ra ǃoaba khoena ǂanǃgâsiba ra mā. (Heb. 6:10; 11:6) Jehovab ge ǁîb ǃoaba-aona ra ǃgôaǃgâ. Tsî ǁÎb ge ǁîna ǃgôaǃgâ tama isa ‘ǂhanuoǃnâse’ ra mû. ǁÎb ge “ǂhanu-ain di daoba a ǂan” tsî a ǂan matib ǁîna ǃgomsina xu nî huisa. (Psa. 1:6; 2Pet. 2:9) ǀGamǁîse, Jehovab ge nî ǂanǃgâ da ǂgomhe ǁoasa ǀgaub ǃnâ. ǁNān hîna ǃgâi xūna khoen xan nî mûhe amaga ǀgui ra dīn ge Jehovab xa ǀkhaehe tide. Tae-i ǃaroma? ǁÎn ǀkhaeb ge ǀoasase ǀnai mataresa. (Mat. 6:1-5) Jesub ge ge mî ǁîb ǁGûb ge “ǂganǃgâsib ǃnâ” ǁnān hîna khoen xa ǂanǃgâhesa ôa tamana ra ǀkhae. Jehovab ge ǁîn dīga ra ǃgaoǃgâ tsî ǁîna ra ǀkhae, mâ-i hoa-e. w18.07 9 ¶8, 10

ǁHaposa xub ge khâi o, ob ge Petruba gere ǂhâ nē dommi ge tae-e gere mîba bi ǂgaosa. Tsî î ge Korneliub di sîsabega ge hā. ǃAnu gagab xa daoǁgau-e hâseb ge Petruba ge aiǃgû tsî sîsabega Korneliub omsa ǃoa ge sao. Petrub ga xūna ai-īsib ai ǀgui mû hâ o, ob ge tātsēs tsîna Korneliub oms ǃnâ ga ǂgâ tama hâ. Jodeǁîn ge Jodeǁî tama khoen omdi ǃnâ ge ǂgâ tama hâ i. Petruba tae-i ǃaroma ge aiǃgû ǃhaoǃnâbe ǀgores ge hâ i xawe? Petrub ge kaise ge tsâǀkhāhe ǁîb ǁhapos tsî ǃanu gagaba xub ge hō ǂkhâǃnâs xa. Korneliub tae-e ra mîsab ge ǃgâ toas khaoǃgâb ge Petruba tsâǀkhâhe hâse ge mî: “Amab ǃnâ ta ra hōǃâ, Elob khoe-i aisa ǃkhōǃoa tama ǃkhaisa; xawe mâ ǁae-i hoa-i ǃnâ ga ǁîba ǃaoǃgâ tsî ǂhanu-aisiba dī-i ge ǁîb di ǃkhōǃoasabe-e.” (ǃNǃkh. 10:34, 35) ǁÎb ge nēsa kaise ǃgâise ge ǁnâuǃā. w18.08 9 ¶3-4

Elob ǁkhan hâ ǁgai xūna xu da ge ǃnūse nî hâ. Xawe ǀnî hâ ǁaxasigu ûib ǃnâ ǀō-aisase Elobmîs ǃnâ mîmāhe tama hân tsîn ge hâ. ǁNāti i mâsib ǃnâ mati da a mîǁgui ǁkhā tae-i Eloba nî ǂkhîǂkhî ǃkhaisa? ǁNāti i mâsigu ǃnâ da ge Elobmîs ǁkhāǁkāsaxū da ūhâ ǃgâi ǂâisa nî sîsenū. Jehovab ge ǀnamxaǃnâ ǀgaub ǃnâ tsoatsoade mā da hâ sida ǃgâiǂâis hîna Elobmîs huib ǀkha ǃgâise ra sîsenǀhaode. Jehovab ge ra mî: “Tita ge ǃKhūta [Jehovata, NW] sa Elota, satsa harebesaba xūna ra ǁkhāǁkhā tsi ta, ǁnā daob, ǁîba-ūts nî ǃgûb ai ra ǂgaeǂgui tsi ta.” (Jes. 48:17, 18) Sida ǂâis tsî ǂgaob tsîkha da ga sîsen-ū o, Elobmîs tsoatsoade ǂâiǃgâsa, o da ge sida ǃgâiǂâisa ǂhanuǂhanu, daoǁgao tsî ǃgâi daob ai a ǂgaeǂgui ǁkhā. Tsî ǁnās ge nî hui da î da ǃgâi mîǁguiga dī. Tsoatsoas ge sao rase a ǁguiǃāhe ǁkhā, amab di ǃgaoǃgaob ase, hoaǃnâ-aixa ǂhanub ase, ǁkhāǁkhās hîna ra ǂâi kais tamas ka io xū-e ra dī kais ase. Tsoatsoade ǁnâuǃās ge ǂHanub mā-aob ǂâi ǀgaub tsî tae-i ǃaroma ǀō-aisa ǂhanuba mā hâs tsîna ǁnâuǃāsa ǃkhōǂgā hâ. w18.06 17 ¶5; 18 ¶8-10

“Herodeǁîgu” hîna ge nē ǁgui-aimarisa ǂgao tama hâ îgu ge ge ǂâi hâ i Jesub ga ǁîga nēsa xu ga ra hui o, ob ǁîba ǁore-aob ase nî mûhesa. Tsîb ga Jesuba mî hâ o nē ǁgui-aimaris ǂhâbasa tamasa ob ge ǁîba ǁîb saosabena ga ǂoaǃnâ hâ. ǁNās ǀkhab ge Jesuba ǀkhā-e ū tamase ge hâ. Tsî Jesub ge ge ǂan i mariǃkhōǃoa-aogu ǁaegu î ǂhanuoǃnâsiba hâsa. Xaweb ge ǁÎba ge mā-am tama hâ i îs nēsa ǁîba tā ǂhani, ǂhâǂhâsa sîsen-e xu. Nēs ge Elob Gaosib xa aoǁnâsa, ǁîb ǀguib khoesib ǃgomsiba nî ūbē amaga. Nēs ǀkhab ge ǁÎba ǁîb saosabena ǃgâi aiǁgau-e ge ǁnāxuba. Tsîn ge ǁîna nēs ǀkha ǂgīǂgōsi xūn ǃnâ ǃâ-e ū tama hâ nēsi î ga ǂhanuse ga ra mûsen xawe. Xristeǁîn ge Gaosib tsî ǁîb ǂhanu-aisib tsîna ra ôa. Nēsan ge hoase ǂgīǂgōsi xūn tamas ka io ǂhanuoǃnâsib xa ǃhoa tama îs ǃnâ-ū ra dī. (Mat. 6:33) ǃNāsa Jehovab di ǀHûǀguitimî-aon ge ge dītsâ în nē ǂgīǂgōsi xūn ǃnâ tā ǃâ-e ū. w18.06 6 ¶9-11

Satanni ge nē ǀhomǃgāga sorosise ǂharugub ǀkha ǀgui ǃâitsâ tama hâ. Xawe ǁîga ǀnîsi ge mîba îgu khoena ǂgaeǂgui. ǁÎb ge ūhâ i ǂâibasens ge mîmâisa ‘suriba’ ǀgaruǀgarusa. (Gen. 3:15) Jehovab ge ǁnā ǂâibasensa Kai ǁgammi dâus ǀkha ge ǀam kai. ǁNās ge Satanni tsî mâǃoaxa ǀhomǃgāgu tsîna ge ǁaixa kai. Tātsēs tsîna da ge tā ǁgauoǃnâ ǁgoe-ūgus tsî ǀgapiǂâixasib ǃnâ ǂgaeǂhapuhes tsîna nî mā-am. Nē ǀhomǃgāgu hîna ge Satanna a ǁhao gu ge Eloba ǂgui kuriga gere ǃoaba. ǁÎgu ge ǁgai turaga ge mā-am îgu ǃnoma ǃkhō tsî kai. ǁNās ǁkhās khami da ge sida tsîna ǀnîsi Eloba ǂgui kuriga ǃhūbaib ai ra ǃoaba, ǁîb ǀapeǂhumis ǃnâ. ǃGâi gagasi mâsiba da ūhâ xawe gu ge ǃanuoǃnâ turaga a ǃnoma ǃkhō ǁkhā. (1Kor. 10:12) Kaise i ge a ǂhâǂhâsa hoaǁae sida ǂgaoga ôaǃnâsa. ǃGâi tama ǂâidi ǁgoe-ūgus didi tsî ǂhanu tama hâ ǀgapiǀgapisens tsîna mâǃoa re.—Gal. 5:26; Kol. 3:5. w18.05 25 ¶11-12

Paulub ge Jodeǁîn ge Gaosib ǃgâiǂhôasa ūǃoa ǂgao tama hâ io gere ǂkhabuǂâi. Xaweb ge ge ǀûsen tama hâ i. ǁÎb ge Romes ǃnâ hâ Xristeǁîna ǃoab ge xoa sîǂkhanis ǃnâ ge mî: “Ti ǂgaob di turab tsî ti ǀgores, Israelǁaesa ta Elob aiǃâ ra dības ge ǁîn di ǃgâiǃōsib ǃoa hâ. ǁÎna ta kom ra ǃkhō-ambao, Elob ǂaman ra tau ǃkhaisao, xawen kom ǁnâuǃāb ose ra dīo.” (Rom. 10:1, 2) Paulub ge tae-i ǃaromab ge Jodeǁîna ǀû tamase gere aoǁnâbasa ge mî. ǁÎb ge ǁîb “ǂgaob di turab” xa gere ǂgaehe. ǁÎb ǂgaob di turab ge ge ǃaroma în Jodeǁîna sâuhe ǁkhā. (Rom. 11:13, 14) ǁÎb ge Eloba ǀgores ǃnâ ge ǀkhomma în Jodeǁîna Gaosib ǃgâiǂhôasa ūǃoa. Paulub ge ge ǀaro: “Elob ǂaman ra tau ǃkhaisao.” ǁÎb ge khoen ǃnâ ǃgâiǃgâibasensa ge ūhâ i. ǁKhoaǂgaosib ge a ǃaroma ǁkhā în khoena Xristub di ǁkhāǁkhāsabe kai, Paulub ge nēsa ge ǂan i. w18.05 13 ¶4; 15-16 ¶13-14

Hoa da ge khoen ‘ǂhâsiga’ nî mûǂan. Paulub ge Hebre Xristeǁîna ǃoa ge mî: “ǁNā-amaga ǁgarasa ǃomga ūkhâi î ǂkhabusa ǁgoade ǁkhawa ǀgaiǀgai; î sadu ǂaide ǂhanu ǂgaroga dība, î-i ǃhora-e tā ǃoe, î-i ǂgau.” (Heb. 12:12, 13) Hoa da ge nî omkhâi gu ǂkhâǃnâ ra mîdi ǃnâ-ū. Paulub ge ge xoa: “ǁKhaeǂgao-i ga Xristub ǃnâ hâo, khoakhoa-i ǀnammi di-i ga hâo, ǀhûhâsi-i Gagab di-i ga hâo, ǀnamxaǃnâsi-i tsî ǀkhomxaǂgaosi-i ga hâo, ǁnâi ti ǃgâiaǂgaoba ǀoaǀoa, î du ǀguiǂâixa, î du ǁkhā ǀnamma ūhâ, î du ǁnâugu, î du ǀgui ǂâibasens ǀkha hâ. Xū-i xare-e tā ǂnīǂnīsens tsî ǁîǃgôasensa xu dī, î du ǃgamǃgamsens ǃnâ nē-e nau-e ǁî-i ǃgâ-ai ǀgapise ǃgôa. A i mâ-i hoa-e tā ǁî-i ǃgâib xa ǀgui ǂâi, î-i ǁkhāti nau-i ǃgâib on xa ǂâi.”—Fil. 2:1-4. w18.04 22 ¶10; 23 ¶12

Ama ǂâibasens ge Jehovab ge Jesub ǁguibas ǃnâ-ū ǁoreb tsî ǁōba xu a ǃnora kai dasa. ǁNās ǀkha da ge māǁnâsen hâ “Elob di ǃgāse.” Sida ǃnorasasiba da ga ǃgâi ǀgaub ǃnâ ga ra sîsen-ū ǂgao o, o da ge ǂōrisase gagasi mîǁguiga nî dī. ǁNās ge nî hui da î da tā ǃhūbaib di xūna tura. (Gal. 5:16) Aiǁgause, Noaxi tsî ǁîb omaris xa ǂâi re. ǁÎn ge tsūdīb tsî ǁgaiǁgaibe ǃhūbaib ǃnâ ge ûi hâ i. ǁÎn ge ge ǂgōsen ǁîn ǂnamipe hâ khoen gere dī xūna saosa. Matin ge ǁnāsa dī hō? ǁÎn ge ge ǁhûibasen Jehovab ge ǁîna a mā sîsenna dīsa, ǁnās ge arka omsa. ǁÎn ge ǂû-e ǁîn tsî xamanin ǃgao ǀhaoǀhao tsî khoen tsîna gere ǃkhâikhom. “Ob ge Noaxa ge dī; Elob ge ǁîba mîmās ǁkhās khami.” (Gen. 6:22) Tsî ǀamǂoasa ge tae-i? Noaxa tsî ǁîb omaris tsîn ge ge ûiǃkharu.—Heb. 11:7. w18.04 10 ¶8; 11 ¶11-12

Satanni tsî demongu tsîn ge ǂhanugu ǀguiga sîsen-ū tama hâ. Xawe ama tama ǂgomdi tsî ǁamaxū-aon tsîna ra sîsen-ū “ǃhūbaib” hoaba ra ǂgaeǂhapuse. (J.ǂHa. 12:9) Ama tama ǂgomdi ǃnâ-ūb ge Satanna Jehovab xa ǂhumiba ra ǃhoa. ǁGâuab ge ge ǁapoǁapo în ǂgui khoena Jehovab ǀonsa ǀuru. (Jer. 23:26, 27) ǁNās ǀkhan ge ǂgui ǂhauǃnâ khoena Eloban ra ǀgoreǀî di ǂâi hâ demongan ra ǀgoreǀî hîna. (1Kor. 10:20; 2Kor. 11:13-15) Satanni tsîn ge ǁamaxū-aogu ǃnâ-ū ǂhumiba ra aiǃgû kai. Aiǁgause, ǁîgu ge ra mî ǂkhî ǂgaots ga ra o, ots ge ǃkhūsiba nî ôa tsî ǂgui xūna nî ǀhaoǀhaobasen. (ǂKhm. 18:11) ǁNān hîna nē ǂhumiba ra ǂgoman ge ‘ǃkhūsiba’ ra ǃoaba Elob ose. (Mat. 6:24) ǃKhūsiban ga ra ǀnam o, on ge Eloba ǀnam tide.—Mat. 13:22; 1Jhn. 2:15, 16. w18.05 23 ¶6-7