Oktoberi

Sada ge ǁîkha khami khoen ǂgaoga a khomai ǁoa. Xawe da ge a dītsâ ǁkhā ǁîn di tsâsigu tsî ǂhâsigu tsîna ǁnâuǃāsa. (2Kor. 11:29) Nē eloxoresa ǃhūbaib hîna da ûi ǃnâ hâb xa i “mâ-i hoa-e tā ǁî-i ǃgâib xa ǀgui ǂâi, î-i ǁkhāti nau-i ǃgâib on xa ǂâi.” (Fil. 2:4) ǀHaohâb ǃûi-aogu ge ǃgōsase tsâbaǁhaosa nî ǁgau. ǁÎgu ge a ǂan gūn ǁîgu ǃomǁae hâsa tsî gu ǁîn ǃereamsa tani hâsa. (Heb. 13:17) ǁÎgu ǃgâsana huis ǃaroma gu ge ǀhaohâb ǃûi-aoga ǁîna nî ǁnâuǃā. Matigu ǀhaohâb ǃûi-aoga tsâbaǁhaosa a ǁgau ǁkhā? Tsâbaǁhaoxa ǀhaohâb ǃûi-aob ge ǁaeba ǃgâsan ǃgao nî ǁamaǂui. Nē ǀhaohâb ǃûi-aob ge dîna dî tsî ǃgaoǃgâxase nî ǃgâ. Nēs ge ǃgōsase a ǂhâǂhâsa nē gū-i di ǀgui-i ga ǁî-i ǂgaoba ǃhoaǂui ǂgao o. ǂHanuse i ga ǁgâiǂuisen tama i xawe. (ǂKhm. 20:5) ǁÎb di ǁaeba ǁnā ǃgâsa-e mās ǃnâ-ūb ge ǀhaohâb ǃûi-aoba ǂgomǃgâsib, ǀnammi tsî ǀhōsagusis tsîna ra omkhâi.—ǃNaeǃkhaidi 20:37. w19.03 17 ¶14-17

ǃGôaǃgâsib ge ǃgâi ǂû-i khami-i ǀgoragu du ga o, o i ge a ǁkhoaxa. ǃGôaǃgâhe da rasa da ge ra hōǃâ tsî da ge a ǂkhî. Sadu ǃgôaǃgâxasiba du ga ǁgau o, o du ge nau khoena ra ǂkhîǂkhî. ǃGôaǃgâsiba du ra ǁgau khoe-i ge ra ǂanǃgâ sadu ǁî-i xa du go mā-e huib tamas ka io xū-e ra ǃgôaǃgâsa. Nēs xa ǃaroma-e hâses ge sadu tsî ǁnā khoe-i ǁaegu hâ ǀhōsagusisa ra ǀgaiǀgai-e. Sadu ra ǁgau ǃgôaǃgâsib ge ra ǃgôaǃgâhe nētsēs xoas ra mî khami. ǂÂi re matikōse di ǃhuniǀuriba xu a kurusa apeldi hîna ǀhaiǀurixapas ǃnâ ǂnôade a îxasa. Tsî matikōse i nî ǂoaǂamsa. Mati du nî tsâ nēti-i xū-e du ga mā-e o? ǃGôaǃgâsib mîdi hîna du nau khoena ǃoa ra mādi tsîn ge kaise nî ǀō-aisa. Nēs xa ǂâi re: ǃHuniǀuriba xu a kurusa apels ge ǀamosib kōse nî hâhâ. ǁNās ǁkhās khami di ge sadu ǃgôaǃgâxasib mîdi tsîna ǁnān hîna ra ǃkhōǃoan xa nî sâubasen-e tsî ǁîn ûib hoaba nî ǃgôaǃgâhe. w19.02 15 ¶5-6

Adammi tsî Evas tsîra ge hais ǃgâib tsî ǂkhabab tsîkha ǂans disa xu a ǂû o, o ra ge ǃgāsase ge mî: ǁÎra ge Jehovab tsî ǁîb ǁgaragu tsîn ǃnâ ǂgomǃgâ tama hâ ti. ǁÎra ge ǁgaraga aitsama ge ǂnûiǂgābasen tae-i a tsû tsî ǃgâis diga. Xawe kō re tae-e ra ge ǂoaǃnâsa. ǁÎra ge ǁîra ǀhōsagusisa Jehovab ǀkha ge ǂoaǃnâ. ǁÎra ge ǃâubasens ǀamose ûis dis tsîna ge ǂoaǃnâ tsî ǁoreb tsî ǁōb tsîna ǁîra ǀgôana ge mā. (Rom. 5:12) Adammi tsî Evas tsîra ge tanisen ǀgaub tsî ǁuiǃkhōmâi-aob tsîn ǁaegu hâ ǃkharagagusiba ǃoa kō re. Nē Etiopiaǁî khoeb ge Jehovab tsî Jesub tsîkha ge dība bi xūna gere ǃgôaǃgâ tsî gere ǁāǁnâ kaisen. (ǃNǃkh. 8:34-38) Eloba ǃoa du ga mâǁnâsen tsî nē Etiopiaǁî khoeb khami ǁāǁnâ kaisen o, o du ge ǃgāsa haisi-amsa ra mā. O du ge ra mî Jehovab tsî Jesub tsîkha ge dība du xūna du ra ǃgôaǃgâ di. Tsî du ge ra ǁgau Jehovaba du ra ǂgomǃgâsa tsîb ǁîba tae-i a ǂhanu tsî tsūs ǁgaraga nî māsa. w19.03 2 ¶1-2

Elob khoen ase i ga sada ǃoa ǁnaeǁgau o, ob ge ǂhauǃnâsiba ra ǂâibasen hoaraga ǂgaob ǀkha ǀnams tsî khôahe ǁoa ǂgomǃgâsib tsîna Jehovab ǃnâ ūhâsa. Nēs ge nî hui da ǁÎb ǂâisa sada mîmâidi ǃnâ ǂgurose mâisa. ǀGui ǁguiǃās Elobmîs dis “ǂhauǃnâsib” dis ge ǀoasa tamas ka io ǀguiǃgupu di ra ǂâibasen. Aiǁgause, Jehovaba ge ǁguibas ǃnâ gere māhe xamani-i ge ga ǀoasa hâ. (Lev. 22:21, 22) Elob khoen ge ǃhora hâ xamanin hîna ǀnūb, ǂgaes tamas ka io mûsa ūhâ tamana ge ǁguiba tama hâ i. Jehovaba i ge kaise ge ǂhâǂhâsaba i ǀoasa xamani-i nî ǁguibahesa. (Mal. 1:6-9) ǁNās ǀkha da ge a ǁnâuǃā ǁkhā Jehovab tae-i ǃaroma ǀoasasiba ra ǃgôaǃgâsa. Xū-e du ga ǁama o, hai ǂû-i kas, ǂkhani-i kas tamas ka io kuru-ū xū i kas, o du ge ǂhâba hâ î-i ǁnā xū-e tā khôa, ā-e ūhâ tamas ka io ǃâ-e ǀkhai. ǁNā xū-i nî hoasa du ge ǂhâba hâ. Jehovab tsîn ge ti ra tsâ ǁîb ǃoa-ai du ūhâ ǀnammi tsî ǂgomǃgâsib tawa i ra ǀkhī o. Nēs ge nî ǂnao o tamas ka io nî ǀoasa i. w19.02 3 ¶3

Sida ǂgaoba ǁkhaubas ǃgao da ge tā ǁgai xūna xu ǀgui nî ǂgōsen xawe ǃgâi xūn tsîna nî mā-am. Mirga ūhâ ǃās dao-ams ǃûi-aob ge kākhoen tā nî ǂgâ amaga dao-amsa ra ǂganam xawe ǁkhawa ra ǁkhowa-am î-i ǂû-i tsî ǀnî hâ xūn tsîna ǂgâ ūhē. Dao-aomdi ga ǁkhowa-amhe tama hâ o, on ge ǁanǂgāsabena ga ǃâǁō hâ. ǁNās ǁkhās khami da ge sida ǂgaoga nî ǁkhowa-am î da Elob ǂâi ǀgauba ūhâ. Elobmîs ge Jehovab ǂâi ǀgauba ūhâ, ǁnās ǀkha da ga Elobmîsa hoaǁae khomai o, o da ge Jehovab ǂâi ǀgauba ra mā-am îb sida ǂâi ǀgaub, tsâsigu tsî dī da ra xūn tsîna tsâǀkhā. Mati da sida Elobmîs khomaisa xu a ǀama ǁkhā? ǀGores ge a ǂhâǂhâsa i da buruxan Elob “ǂhanub dina ǃgapaǀî.” (Psa. 119:18) Khomai da ra xūna da ge nî ǂâiǃgâ. ǀGore, khomai tsî da ga ǂâiǃgâ o, o i ge Elob di mîsa sida ǂgaoba nî tsâǀkhā tsî da ge Jehovaba ra ǀnam.—ǂKhm. 4:20-22. w19.01 18 ¶14-15

Jehovab ge ǂan ǃkharagagu ǀgaugu tsî mâsigu tsîna da ūhâsa tsî nē ǁguibadi hîna da ra dība bi de ra ǃgôaǃgâ. ǀNî Isrealǁîn ge ǁkhaona gere ǁguiba tsî ǀnîna pīrina. Xawen ge ǀgâsa Isrealǁîna ‘ǂnaidi tamas ka io ǂkham ǂnabude’ gere ǁguiba. Xawe i ga ǀgam ǂnabura ǁguiba ǁoa ob ge Jehovaba ‘efab di disiǁîǃâs tsampereb disa’ gere ūǃoa. (Lev. 5:7, 11) Tsampereb ge ǂgui mari-e ge ǂgan tama hâ-i xaweb ge Jehovaba nē ǁguibas ǃgâi “tsampereb”dis tsîna gere ǃgôaǃgâ. Sada Elob ge nētsēs tsîna nēti ra tsâ. ǃEreamde da ga mā ob ge hoada ǀgui ǃnôa ǃgâi ǃereamde nî mā ǃkhaisa ǂgaoǀkhā da tama hâ Apolob tsî Paulub khami. (ǃNǃkh. 18:24; 26:28) Jehovab ge sida ǁkhāsib ǃnâ hâ ǃereamde da nî māsa ra ǂgao. ǃOataras hîna ge ǀgam ǂkhari mariro ra a mās xa ǂâi re. ǁÎs ge Jehovab mûǁae kaise ge ǂoaǂamsa i ūs ge hâ în hoanas ge mā xui-ao.—Luk. 21:1-4. w19.01 8-9 ¶3-5

Xristub saosaben ase da ge ǂan mâǃoa-e da nî ǃkhaisa. Jesub ge ge mî ǁîb ǁkhāǁkhāsaben ge ǀuni tsēdi ǃnâ nî mâǃoa-e di. (Mat. 24:9; Jhn. 15:20) Jesajab kēbos ge ge mî, sida khākhoen ge ǃhui das ǀguisa dī tide xawe ǂgui xūna nî sîsen-ū sida tsûtsûs ǃgao. Nē xūn ge ǂgaeǂhapuhes, ǂhumib tsî mâǃoahes tsîna ǃkhōǂgā hâ. (Mat. 5:11) Jehovab ge sida khākhoena ǂkhā tide nē xūna sida ǃoagu sîsen-ūsa. (Efe. 6:12; J.ǂHa. 12:17) Xawe da ge tā nî ǃao. Jehovab ge ge mî “sîsenūxūs sa ǃoagu ga ǁāǁāhes hoas ge ǃgâiǃgâ tide.” (Jes. 54:17) Mirgu ǃgâi tama ǂoab mâsiba xu ra ǁkhauba da khamib ge Jehovaba “ǁnaes tirangu disa” xu ra ǁkhauba da. (Jes. 25:4, 5) Sida khākhoen ge ǃgâiǃō tide sida tsûtsûs ǃnâ. (Jes. 65:17) Elob mâǃoa-aon hoan ge “nîra ǁau tsî nîra kā.”—Jes. 41:11, 12. w19.01 6-7 ¶13-16

ǂKhamkhoedo, Jehovab ge ǃnorasasiba a ǀnam tsî nē ǀnamma sadu ǂgaob ǃnâ ge ǂgā. ǁÎb ge sa ǃnorasasibats ǃgâi ǀgaub ǃnâ nî sîsen-ūsa ra ǂgao, nēs nî ǁkhauba tsi amaga. ǀNîsits ge ǀnî hâ khoen hîna ǃgâi tama ai-īsiga ra kōn, ǁgauoǃnâ ûi ǀgauba ūhân tsî ǀhubuǀhubu xūna ra sîsen-ūna a ǂan. ǁÎn ge nē xūn ǃnâ ǀoro ǁaerob ǃgâib ǀguiba ra hō. Xawe nēs ge ǁgai ǀamǂoasa a hau ǁkhā, aiǁgause ǀaeb tsî ǁōb. (Gal. 6:7, 8) ǁÎn ǃnorasasib ge ǁîn xa ǀgui ra ǂâi kai nî. (Tit. 3:3) Matikō khoenats a ǂan hîna ge ǀaesena Elobmîs ǁgaragan ge sao amaga? Jehovaba ǁnâuǀnams ge sida ǂurusib ǃgao a ǃgâi. (Psa. 19:7-11) Sa ǃnorasasibats ga gā-ai ǀgaub ǃnâ sîsen-ū o, Elob ǂhanugu tsî ǁgaragu ǃoagu, ots ge Elob tsî sa ǁgûn tsîna ra ǁgau ǂgomǃgâhe ǁkhāts asa.—Rom. 8:21. w18.12 22-23 ¶16-17

Adammi ǁoreb ge ǀkharaǀkharana ge hau. ǀGui ǀkharaǀkhara î ge ǁōba hîna ǃgameba ra tsâǀkhāba. Nēsa da ge a mû ǁkhā apostel Paulub ge xoa mîde xu, Xristeǁîn ge nētsē Moseb ǂhanub ǃnāga hâ tama hâ. ǁÎb ge ge ǁgau ǁōb ge ǃgameba ra khôa di tsî ûi ǃgau ra î ge ǃgame ǁkhā. (Rom. 7:1-3) Elob ge Israelǁaesa a mā ǂhanub ge ǃgameb xa ǃnāsase gere ǃhoa. Nēs ge ǀguis xa ǃnāsa tarade ǀgui ǁaeb ai ūhâsa gere mā-am, nēs ge Elob ge ǂhanuba a mās aiǃâ ge hâ i. Xawe nēs ge gere ǁkhaehe i di khoede tā ǂgui tsî ǃgoma tsâ. Aiǁgause, Israelǁî-aob ga ǃgāsa ǃgame o tsî ǁnāpaxū ǀgamǁî tarasa, ob ge ǁîb ǂguro taras ǂû-i, saran tsî sorosise ǂharugus tsîna ǀoro kai tide. Elob ge gere ǂgaoǀkhā ǁîb tarasab nî kōǃgâsa. (Eks. 21:9, 10) Sida ge nē ǂhanub ǃnāga hâ tama hâ xawe da ge Jehovab ǃgameb ǃnâ ūhâ ǃgâiǃgâibasensa ra mû. Nēsa hui du tama hâ ǃgameba ǃgôaǃgâsa? w18.12 10 ¶3; 11 ¶5-6

ǁÎb ǃgomsina Jehovab ǃomdi ǃnâ mā toa tsîb ge Habakuka gere ǂâiǂhansen Jehovab mati nî ǃereamsa. ǁNâuǃāxa ǁGûb aseb ge Jehovab ǁîba ge ǂhābē tama hâ i. Elob ge ge ǂan i tsûaǂgaob tsî ǃoab tsîn di ās a ǃkhaisa. Jodeǁîna ǃoa ge hâ i mîdi ǃnâb ge Jehovaba Habakuka ge ǂanǂan tae-eb hānîǁaeb ǃnâ nî dīsa. Habakuki ge ǀnîsi ge ǂguro khoe-i Jehovab ge mîbaba ǀams ǁnā tsēdi dis ge go ǀgū di. Jehovaba Habakuka ge ǁgau ǁîb a ǂhanusa hui bis ǃaroma. ǁNā ǂkhabadī tsî eloxoresa ǃhaos di dīkākāhes ge ge ǀgū. “Sadu tsēdi ǃnâ” di hâ mîdi ǃnâ-ūb ge Jehovaba ǀgoraǃgâs ǁaeb nē kēbo-aob tsēdi ǃnâs tamas ka io ǁîb ǀkha ge hâ i khoen ǁaeb ǃnâ nî hâsa. Jehovab ge ǃeream bi ǀgaubab ge Habakuka ge ǃâubasen tama hâ i. ǃNūǃnâxasibab ge ǁgau tama hâ i o, ob gere ā ǀgaub di ǃereamsa? Jehovab ge ǁîba a mîba mîdi ge tsūdība Judab ǃnâ kaikais ǀguisa ge dī. w18.11 15 ¶7-8

Sado tae-e ra ǂâi khoen hîna amaba noxoba nî ǁkhāǁkhāsenan xa? Apostel Paulub ge sinagogegu ǃnâ ǀnai amaba Elob xa a ǂan khoena gere ôa xaweb ge ge ǃkhō-oasen tama hâ i Jodeǁî khoena aoǁnâbasa. Paulub di ǂguro sîsaben sîsenni ǃnâb ge Likaonias ǃnâ a sī o, on ge khoena ǁîb tsî Barnabab tsîna ore-aose gere mû. ǁÎn ge ǁîkha ǁîn di elogu Seub tsî Hermeb tsîn di ǁgauǁgaus ase gere mû. Paulub tsî Barnabab tsîna mûmûsen ǂgaos xa gere ǃâitsâhe? Nēsa mâǃoas hîna kha gere hōǃâsa xu nî ǃnora kai kha? ǁÎkha ǀnîsi gere ǂâi nē mûmûsens ǃgâiǂhôasa aoǁnâs ǃnâ nî hui di? Tātsēs tsîna. ǁÎkha ge ǃhaese ǁîkha saraga ge doa tsî ge ā tsoatsoa tsî gere mî: “Tarexa du nēna ra dī? Sikhom on ge a khoe, ǁkhā tsâsendi sadu didi khami īde ūhâ khoma.”—ǃNǃkh. 14:8-15. w18.09 4-5 ¶8-9

Amaba da ga ūǃoa tsî Elobmîs ǁgaragu ǃoagu ga ra ûi ǂgao o, o da ge sida ǂâi ǀgaub tsî tanisen ǀgaub tsîna nî dawa. Petrub ge sao rase ge mî: “Î ǁnâuǀnamxa ǀgôadu ase tā ǀguiti-īkaisen aibe du ǀūǂams ǃnâ ge ī i tura-aigu ǃoa . . . ǁkhās khami sado ǁkhāti ǃanu sadu tanisens hoas ǃnâ.” (1Pet. 1:14, 15) Khoen hîna ge eloxoresa ǃās Korintes ǃnâ ǁan hâ în ge ǂgui ǀkharaǀkharana ge dī amaba ǁamas ǃgao. Nētsēs tsînan ge ǂguina ǁîn ûi ǀgauba ge dawa amaban ra ǁama ǂgao amaga. Petrub ge Xristeǁîna ge ǂâiǂâiǃnâ: “ǂÂuba da i kom hâo, ǃgôa-ī ge ǁaeb ûib diba da ǀūben di ǂâisa gere dīǀoaǀoasa, ǁgaiǁgaisa ǂūǁoasigu tsî turagu tsî āǀhorosigu tsî ōgu tsî āǃansengu tsî ǁgaisi ǁgôatsuiǁgoaǃoabagu tsîn ǃnâ da gere ûi ǃnubai.”—1Pet. 4:3. w18.11 6 ¶13

Mati da ǁnān hîna ‘ǀamo ûiba ǃoa ǃkhōǂuibasenhe hâna’ a ǂan? ǃKharu ge ǁaeb khami da ge nē khoena aoǁnâ da ga ra o ǀgui a hō ǁkhā. Jesub ge mîmā da khami da ge nî dī: ‘Tsî mâ kaiǃās tsî ǃkhais ǂgâ go kas hoasa aibe ôaǃnâ, tari-i ǁîs ǃnâ a anu ǃkhaisa.’ (Mat. 10:11) ǃGâi tanisen ǀgauba ūhâ tama hâ khoen ǃgâiǂhôasa nî ūǃoasa da ge tā nî ǃâubasen. Sida ge ǂhauǃnâ, ǃgamǃgamsen tsî amab ǃoa ǃâ hâ khoen tsîna ra ôa. Nēsa da ge Jesub ge ǃnaokuru-aob ase gere dīs ǀkha a ǀgopeǀnō ǁkhā, ǁîb ge ǂhanu xūn ǀguina gere ôa nē sîsen-e dīs ǃgao. Kuru-ū xūnab gere ǀhaoǀhao toa o, ob ge ǁîb sîsen-i ǀkha gere tsoatsoa. Sida tsîn ge nēsa nî dī î da ǃgâi ǂgaoga ūhâ ǁkhāǁkhāsabena dī.—Mat. 28:19, 20. w18.10 12 ¶3-4

Filipub ǃgâiǂhôa-aob ge ǃgâi aiǁgausa ra mā da, aoǁnâ sîsenni ǃnâb ge ǃnāsase gere dī amaga ǀkharaǀkharan ge hâ i xawe. Jerusalems ǃnân ge ǃgâsana gere mâǃoahe Stefanub nî ǃgamhes kōse. Filipub ge ǀasa ǁgaumâisa ǁnā ǁaeb ǃnâ ge ūhâ i. (ǃNǃkh. 6:1-6) Xristub saosaben gere mâǃoahe o, ob ge Filipuba kō tsî xū-e ge dī ǁoa i. ǁÎb ge Samariasa ǃoa ī tsî gere aoǁnâ, ǁnā ǃās ǃnâ î ge ǃgâiǂhôasa noxoba ge aoǁnâhe tama hâ i. (Mat. 10:5; ǃNǃkh. 8:1) Filipub ge Elob gagab gere daoǁgau bi ǃkhais hoasa ǃoa gere ī, ǁnā-amagab ge Jehovaba ǁîba gere sîsen-ū. ǁÎb tanisen ǀgaub ge Samariaǁîna gere khoakhoa hîna ge ǃgôasiba anu tama hâse Jodeǁîn xa gere hâ ūhena. ǁNā-amagan ge khoena ǁîba “ǀguiǂâixase” gere ǃgâ. (ǃNǃkh. 8:6-8) Filipub ge aoǁnâ sîsenni ǃnâ ǃnāsase gere dī tsîs ge nēsa ge ǃaroma ǁîb tsî ǁîb omaris tsîna ǀkhaehesa.—ǃNǃkh. 21:8, 9. w18.10 30 ¶14-16

Jesub ge Dekapolib ǂharis ǃnâ gere aoǁnâ o, on ge khoena ‘ǃgome tsî ǂganaǂgae hâ khoeba ǁîb ǃoa ge ūhā.’ (Mrk. 7:31-35) Jesub ge ǁîba khoen ǁaegu ge ǂgauǂgau ǂgao tama hâ i tsî ǁîba “ǁaesa xu ǀguri ūbē” tsî ge ǂgauǂgau. Tae-i ǃaroma? Nē khoeb ge ǀnîsi gere tao khoen ǁaegu ǂgauǂgauhesa. Jesub ge nēsa a hōǃâ o, ob ge khoeba ǀguri sī ge ǂgauǂgau. Sada ge nētsē khoena buruxa dīgu ǃnâ-ū a ǂgauǂgau ǁoa. Xawe dī ǁkhā da as ge ǁîn di ǂhâsigu tsî tsâsigu xas tsîna ǂâisa. Jesub ge ǃgome khoeb di tsâsiba ǂâis ǃnâ ge ūhâ i tsî nēs ǀkha ǁîba ǁnâuǃāxa ǀgaub ǃnâ ge sîsen-ū. ǁKhā ǀgaub ǃnâ kairan tsî ǃhoran tsîna ǂâis ǃnâ ūhâ re. Xristeǁî ǀhaohâb ge ǀnammi xa saohe hâ. (Jhn. 13:34, 35) Nē ǀnammi ge ra ǂgae da î da ǁkhā da as kōse kairan tsî ǃhoran tsîna hui în ǀhaodi tsî aoǁnâ sîsenni ǃnâ ǁhao. Nēs ge ǁkhān as kōse.—Mat. 13:23. w18.09 29-30 ¶7-8

Jehovab gūn hoan ge ǁÎba a ǀō-aisaba, nēs ge Jesub xoremarib xa a īǁkhā kaihe amaga. (Gal. 2:20) Sida gagasi ǃgâsana da ge ǂgaoba xu a ǀnam. Tsî ǁîna da ge ǃgâi tsî ǀnamxaǃnâ ǀgaub ǃnâ ra kōǃgâ ǂgao. ǁÎna khoakhoas ǃgao da ge “ǁnâi ǂkhîb dina sauruǃgon, tsî ǂnubikhâigus ǃoa hân tsîna” nî dī. (Rom. 14:19) Matikōse da hoa da ra mûǂui Paradaisa ǃoa, ǁnāpa da ge ǃaromana ūhâ tide ǂkhabuǂâis dina. ǁNāpa i ge ǀaegu, torogu, ǁōb, ǁgâiǀāb, omaris ǃgomsigu tsî tsûaǂgaob tsîna hâ tide. 1000 Kurigu ga ra ǃkharu o, on ge hoa khoena ǀoasa kurusa nî ūhâ. ǁNān hîna ǀuniga ǃâisa ra ǃkharun ge Jehovab ǀgôan ase nî ǃkhōǃoahe tsî ‘Elob ôan ǂkhaisib di ǃnorasisa nî hō.’ (Rom. 8:21) A da omkhâi ra ǀnamma hoaǁae ǁgaugu tsî huigu re î da hoa da ǂkhîb tsî kai ǀkhaegu tsîna ǃkhōǃoa. w18.09 14 ¶10; 16 ¶18

Elobmîsa ǁkhāǁkhāsens ge khomai tsî ǃereamde ǂgaeǃgaos ai ǀgui ǃgaoǃgaosa tama hâ. ǁKhāǁkhāsen da ga ra o, o da ge ǃgamse ra kō ǂgao nēs tae-e Jehovab, ǁîb ǀgaugu tsî ǂâi ǀgaub tsîn xa ra ǁkhāǁkhādasa. ǁNâuǃā ǂgao da ge ra tae-i ǃaromab Eloba nau xū-e ūǃoa tsî nau-e ǂgao tama hâsa. Sada ûib tsî ǂâi ǀgaub ǃnâs tsîna da a dī ǁkhā ǀkharaǀkharan xas tsîna da ge ra ǂâi ǂgao. Nē xūn hoan ge ǀnîsi khomai da ra ǂkhani-i ǃnâ a ǀkhai xawes tsîna da ge nî dītsâ ǁkhāǁkhāsens ǃgao ǁaeba ūhâsa. ǀNîsi da ge ǃkhare tsēsa ǁkhāǁkhāsens ǃgao a ǁamaǂui ǁkhā tsî ǃgôaǃgâsib ǀkha a ǂâiǃgâ ǁkhā. (1Tim. 4:15) ǁAeb hoaba da ga Elobmîs xa ga ra ǂâiǃgâ o, o î ge ǀnî hâ xū-e ra ī. O da ge ra ‘ǃâitsâsen ǁkhā da nîga,’ ǁnās ge mîbasen da ge ra Jehovab xūna ra mû ǀgaub a ǂhanusa. Jehovab xūna ra mû ǀgaub ai da ge xūna nî mû tsî nēs ǀkha nî ǀguiǃnâxa tsoatsoa. Sada ǂâi ǀgaub ge ra ‘dī-unuhe’ tsî da ge ǀasa ǂâi ǀgauba ra omkhâi tsoatsoa. (Rom. 12:2) Tsî da ge Jehovab khami ra ǂâi tsoatsoa. w18.11 24 ¶5-6

ǂGurokham ǁaeb ǃnâb ge Pauluba ǁîb tsî nau ǃgâsan tsîna ‘Elob di sîsenǀhao-ao’ di gere ǂgai ǁîn ge aoǁnâ sîsenni ǃnâ Gaosib amaba gere ǃhana tsî ǂnâ amaga. (1Kor. 3:6) Sida tsîn ge nētsē a ‘Elob di sîsenǀhao-ao’ kai ǁkhā sida ǁaeb, ǁkhāsib tsî ǀgaib tsîna da ga aoǁnâ sîsenni ǃnâ ga ra sîsen-ū o. Nē aiǂhanub ge kaise a ǂoaǂamsa. Aoǁnâ tsî ǁkhāǁkhāsabedīs sîsenni ǃnâ sida ǁaeb tsî ǀgaib tsîna sîsen-ūs ge kaise ra ǃgâiaǂgao kai da. ǂGui ǃgâsan hîna ge khoena Elobmîsa ǁkhāǁkhās aiǂhanuba ūhâ în ge ra mî ǂkhariro xūn ge ǂgui ǀkhaega ūhâ di. Kai ǃgâiaǂgaob ge mûsa khoen ra ǂkhî ǀgausa amaban ga ra ǁnâu tsî ǁnās ǀkha ǀkharaǀkharana dī tsî ǁîn tsîna ga ra aoǁnâ tsoatsoa o. Jesub ge kaise ge ǃgâiaǂgao 70 aoǁnâ-aogu ge “ǃgâiaǂgaob ǀkha oahā” o, khoen ge amaba a ūǃoa o.—Luk. 10:17-21. w18.08 20 ¶11-12

Sida ǁnâuǃāb ai kaise ǂgomaiǂnûis ge ǃnuis ase a ība da ǁkhā. ǀNîsi da ge nēti a tsâ tsoatsoa ǁkhā, mâsiba kō tsî ta ge tita a ǁnâuǃā ǁkhā tae-i asa hoa amaba ta a ǀū xawe. ǀNî hâ ǃgomsib hîna da a ūhâ ǁkhāb ge sida ǃgâsa-i ǀkha da ga ra ǁnâusāgu o. Sida ga ǃgomsib ai ǀgui ga ra kō o, o da ge ǀnîsi sada ǃgâsa-e ǃgâi tama mûs ǀkha a kō tsoatsoa ǁkhā. Tsî da ge sada tsîna ǁnās ǀkha nē ǃgâsa-i ǁgai ǀgauga ūhâsa a ǂgom ǁkhā. Tae-e da a ǁkhāǁkhāsen ǁkhā? Ama tama ǂhôan xa ǂâis ge a ǃaroma ǁkhā, î da sida ǃgâsana ǀgoraǃgâ tsoatsoa ama tama hâ ǂhôan ǃaroma. (1Tim. 6:4, 5) Nēsa xu ǁkhaubasens ǃgao da ge tā nî mā-am î-i ǃhuib tsî surib tsîna ǃnomaǃkhō sida ǂgaob ǃnâ. Nē ǃgâi tama ǂhôana ǃkhōǃkhōs xa da ge sada ǁgui-aisa nî mûǂan, sida ǃgâsana ǀnam tsî ǂgaoba xu ǀûbasa.—Kol. 3:12-14. w18.08 6 ¶15; 7 ¶18

Hoa khoen ge a Jehovab di, ûin hâs kōse. (Psa. 100:3; J.ǂHa. 4:11) ǃHūbaib ǂhawaseb ge Eloba ǃkharagaǃnâgu khoena ge kuru tsîn ge nēn hoana a ǁÎb di. Aiǁgause, Psalmdi 135 ge ǂgomǂgomsa ǃoaba-aon Jehovab din hîna ge Israelǁaes di în xa ra mî ‘ūǂuibasenhe’ hâ ǁaes ge di. (Psa. 135:4) Hoseab ǂkhanis tsîn ge ǀnîn hîna ge Israelǁaes di tama hâ în ge nî Jehovab khoe kai di ge mî. (Hos. 2:23) Hoseab kēbos ge ge dīǀoaǀoahe Jehovab ge Israelǁaes di tama hâ khoena Xristub ǀkhan nî ǂgaeǂguise a ǁhûi o. (ǃNǃkh. 10:45; Rom. 9:23-26) Nē ‘ǃanu ǁaes’ ge a Jehovab di “ǃkhōǂuibasensa ǃhao” ǀō-aisa ǀgaub ǃnâ. Nē ǃgâsan ge ǃanu gagab ǀkha ǂkhauhe hâ tsî ǀhommi ǃnâ ûis ǃâubasensa ûhâ. (1Pet. 2:9, 10) O Xristeǁîn hîna ǃhūbaib ai ûis ǃâubasensa ūhân? Jehovab ge ǁîn tsîna ǁÎb “khoen” ase ra mûǂan hînab ‘ǃkhōǂuibasen’ hâna.—Jes. 65:22. w18.07 22 ¶1-2

Ama Xristeǁîn ge Xristuba ra ǁgae hîna ge aiǁgausa a māba khoen mati nî māxasa. (Mat. 20:28) Hoa da ge nî dîsen, ‘Jesub aiǁgausa ta ǃamkuse nî sao ǀnai ta ra dīs xa?’ (1Pet. 2:21) Jehovab xa da ge a ūǃoahe ǁkhā ǁÎb tsî Jesub tsîn di aiǁgausa da ga ra ǁgae o tsî nau ǃgâsan ǃnâ ǃgâiǃgâibasensa ga ra ūhâ o. Jesub ge Samariaǁîb di ǂkhōs ǃnâ ge mî ǁîb ra ǂgaosa î da sida daoba xu ǂoa sida ǃgâsana huis tawa i ga ra hā o, ǀnî hâ khaoǃhūba xun ga ra hā xawes tsîna. (Luk. 10:29-37) ǂÂi oa î du ra, dîs hîna ge Jesuba a ǂgaesa îb Samariaǁîb di ǂkhōs xa ǂâi? Jodeǁîb ge ge dî bi: “Tari-e kha a ti ǀgūkhoe?” Jesub ǃereams ge ge ǁgau Elob xa da ga ra ūǃoahe ǂgao o, o da ge Samariaǁîb khami nî māxa. w18.08 19 ¶5-6

Jehovaba Mariasa noxoba gere ǂanǃgâ ǂgomǂgomsases ge ǁîb ǀGôaba a kaikai o? Î, ǁnāsab ge ge dī. Elob ge ǁîs dīgu tsî mîdi tsîna Elobmîs ǃnâ ge xoamâi. Marias ge Jesub ǀkha aoǁnâ sîsenni ǃnâ ǀguiba ge sîsen tama hâ i. ǃOataras ases ge Mariasa ǀnîsi Nasarets ǃnâ ge hâ i. ǁÎs ge ǀnî aiǂhanuga a ǂoaǃnâ xawes ge Jesub di ǁōb tsēs ai ǁîb ǀkha ǀguiba ge hâ i. (Jhn. 19:26) Marias ge ega nau ǁkhāǁkhāsabegu ǀkha Jerusalems tawa ge hâ i, ǃanu gagab ge a ǁhōǂuihe o, pinkstertsēs ai. (ǃNǃkh. 1:13, 14) ǁÎs tsîn ge ǃanu gagab ǀkha ge ǂkhauhe naun ǀkha ǀguiba. Nēsis ge ǃēsa ūhâ ǀhommi ǃnâ sī Jesub ǀkha ǀamosib kōse hâsa. ǁNā ǂanǃgâs ge kaise a buruburuxa ǂgomǂgomsa ǃoabas ǃgao. w18.07 9 ¶11; 10 ¶14

Jesub ge ǁîb aoǁnâ sîsenni ǃnâ-ū ǁîb ǁkhāǁkhāsabega hoaǃnâ-aixa amaba gere ǁkhāǁkhā îgu tanisen ǀgaub tsî dīgu tsîna mûǂan. Aiǁgause, Jesub ge ge ǁkhāǁkhā ǁaib ge ǂkhabadība a ǃaroma ǁkhā. Tsî ǁgoe-ūgus turaga ūhâs ge ǀai kai da ǁkhā. (Mat. 5:21, 22, 27, 28) Sida ǃgâiǂâis ga ǃgâise sîsen o, o da ge nî mā-am îs elosi tsoatsoadi xa daoǁgauhe, î da ǁnās ǀkha ǃgôasiba Eloba mā ǁkhā. ǀGam ǃkharagaǃnâgu Xristeǁîn hîna Elobmîs ǀkha ǁîn ǃgâiǂâisa omkhâi hân ge ǃkharagaǃnâgu mîǁguiga a ūhâ ǁkhā. ǂÂi re, alkohol-e sîsen-ūs tawa i ga ra ǀkhī o. Elobmîs ge ǀnōsa ǀgaub ai alkohol-e sîsen-ūsa ǂkhā tama hâ. Xawes ge ra ǂkhā kaise ā tsî ǀhoromâsa. (ǂKhm. 20:1; 1Tim. 3:8) Nēsa ra ǂâibasen Xristeǁî-i ǀnî hâ xūna ǂâis ǃnâ ūhâ tidesa ǀnōsa ǀgaub ai ǀgui alkohol-e sîsen-ūs ǃgâ-ai? Hî-î. ǁÎ-i ǃgâiǂâis ge ǀnîsi ǁî-e ǂhani tama hâ xawe i ge nau hâ khoen ǃgâiǂâis xas tsîna nî ǂâi. w18.06 18 ¶10-11

Jesub ge ǁîb ǁkhāǁkhāsabega ge ǃkhâikhom îgu tā nē Farisegu, Sadusegu tsî Herodeǁîgu ǁkhāǁkhādi ǃnâ ǁhao tamas ka io mâxōǀkhā. (Mat. 16:6, 12) Nē ǁgamǀhaosab ge Jesuba khoen ge ǁîba gere gao-aose ǁgaumâi ǂgaos khaoǃgâ ǁîb ǁkhāǁkhāsabegu ǀkha ge ūhâ i. ǂGomdi tsî ǂgīǂgōsi xūn tsîn ga ra ǀhao o, o i ge ǂkhabadība ra tsoatsoa. Jesub ge ǁîb ǁkhāǁkhāsabega ge mîba îgu tā ǀkhā-e ǁhûi. ǁNās ǃaromas tsîna gu ge ǁkhāǁkhā-aogu tsî Farisegu tsîna ge ǀape îgu Jesuba ǃgam. ǁÎgu ge ǁîba ǂgīǂgōsib tsî ǂgomdi ǀhomaǀhoma-aob ase ge mû. ǁÎgu ge ge mî: “ǁNāti ge ga ǁîba dī kaio, on ge hoana ǁîb ǃnâ nî ǂgom. O gu ge Romeǁîga hā, tsî nî ǃhūb tsî ǁaes tsîna sage ūǀhana.” (Jhn. 11:48) Tsîb ge ǀgapipristeri Kajafaba Jesuba ǃgamsa ge ǀape.—Jhn. 11:49-53; 18:14. w18.06 6-7 ¶12-13

ǀNî hâ ǀgaub Satanni ǂgaeǂhapusa ra sîsen-ūb ge hoa xūna ǂan ǂgaosa ǃgaidīb xa. Sida ǁaeb ǃnâb ge ama tama ǂgoms ǃnâ-ū ǀgui ǂgaeǂhapu da tama hâ. Xawe ǁkhoaxasib ǁaxasigu ǃnâ-ū ra ǂgaeǂhapu da. Aiǁgause, muvin, elektronik game an tsî mediab tsîn ge ǃgaidība ǁkhoaxase ra mûsen kai. Mati da nî ǂgōsen î da tā nē xūn xa ǃkhōhe? Tā da ge Elob ǀapeǂhumisa xu tae-i a ǃgâis tsî tsūs tsîna nî ǃâubasen ǁkhoaxasib tawa i ga ra hā o. Hoa da ge sida ǃgâiǂâisa nî omkhâi îs Elob ǂgaoǀkhādi ǀkha ǀguiǃnâxa. (Heb. 5:14) Apostel Paulub ge mā daoǁgausa da ga sao o, o da ge ǃgâi mîǁguiga nî dī. Dîsen ǁkhā da ge a: ‘Ti mîǁguib ǁkhoaxasiba ūhâs diba ǃgâi-e? Tita Elobmîsa ra ǁkhāǁkhā khoe-i ga mû o, tae-i muvina ta ra kōsa, mî în nî ǁkhāǁkhā ta ra xūna ta ra dīsa?’ ǃHoa da ra xūn ga sida dīgu ǀkha ǀguiǃnâxa o, ob ge Satanna ǂgaeǂhapu da tide.—1Jhn. 3:18. w18.05 25 ¶13

Mati da Pauluba a ǁgae ǁkhā? ǂGurose da ge khoen hîna ‘ǀamo ûiba ǃoa ǃkhōǂuibasenhe hâna’ nî ôa. ǀGamǁîse da ge Jehovaba ǀgores ǃnâ nî ǀkhomma îb khoen di ǂgaoga ǁkhowa-am. (ǃNǃkh. 13:48; 16:14) Silvanas hîna 30 kuriga a aimâba-aos ge ra mî, “omsa xu oms ǀkha ta nî aoǁnâs aiǃâ ta ge Jehovab ǃoa ra ǀgore tsî ǁîba ra ǂgan îb ǃgâi mûǂui ǀgauba mā te.” Eloba ǃoas tsîna da ge ra ǀgore îgu ǀhomǃgāga daoǁgau da ǂhauǃnâ ǂgaoga ūhâna ǃoa. (Mat. 10:11-13; J.ǂHa. 14:6) Roberti hîna 30 kuriga a aimâba-aob ge ra mî, “ǀhomǃgāgu hîna tae-i khoen ûib ǃnâ ra īsa a ǂan gu ǀkha sîsens ge kaise a ǁkhoaxa.” ǃNonaǁîse da ge khoen ǃnâ ǃgâina nî mû. Carli hîna a ǀhaohâb ǃûi-aob ge ra mî: “Tita ge khoe-i tanisen ǀgaub, ǀnom ǀgaub tsî khoe-i ra dî ǂhauǃnâ dîdi tsîn xa ra ǂgaehe.” Paulub khami da ge sida tsîna ǂûtanis ǃnâ a mâǀgai ǁkhā. w18.05 15 ¶13; 16 ¶15

Nētsē da ra hui khoen di aiǁgaudi ge hānîǁaeb ǃnâ kaise ǂkhâǃnâs ase nî ība da. Apostel Johaneb ge ge mî: “Kai ǃgâiaǂgao-e ta ūhâ tama hâ, ti ôan ra amab ǃnâ ǃgû ǃkhaisa ta ra ǁnâu-i ǀgui-i xa.” (3Jhn. 4) Aimâba-aon ge kaise ra ǂkhî ǁnâun ga ra o, ǁîn ge amab ǀkha a hui khoen ǂgomǂgomsase Eloba ra ǃoabasa. Tsî ǀnîsis tsîna nētsē aimâba-aon ase ra sîsen. Tsî aimâba-aona hōǃân gere ǂkhîb xa ǁgambas tsîn ge ǁîna ǂkhâǃnâs ase a ība ǁkhā. ǃNarimâra mûǂam-aogu ge ra mî ǁîgu tsî ǁîgu taradi tsîn ge kaise ra ǂkhî, sîǂkhani-e gu ga ǀhaohâb ǁanin xa saris khaoǃgâ ga ra māhe o. Nēs tsîn ge a ama sîsaben, aimâba-aon tsî Betels omaris ǁanin xa, ǃgôaǃgâs sîǂkhani-en ga ra māhe o ǁîn ǂgomǂgomsa ǃoabas ǃgao. w18.04 23 ¶14-15

Salomob ge nēsa ge ǁnâuǀnam tama hâ i tsî 700 tarade ge ǃgame. Tsî ǁîb oms ǃnâ ǃnonakaidisi ǀgamitarade ge sī ū. (1Gao. 11:3) Nē ǂgui taradi ge ge Israelǁî tama hâ i tsî ǀnî hâ eloga gere ǃoaba. Salomob ge Elob ǂhanub tsîna ge mâǃoa ǀnî hâ ǃhao taradeb ge ǃgame o. (Deu. 7:3, 4) Salomob ge ǁaeb ǀkha Jehovab di ǂhanu-ai ǁgui-aide ge ǀuru tsî nēs ge ge dī îb kaise Jehovab mûǁae ui-uixa ǁoreba dī. Salomob ge altarsa ge om îb Astarotsa ǃoaba tsî ǀnî hâ altarsa Kemob ǃgao ge om. ǁNāpab ge ǁîba ǁîb tarade ama tama eloga ǃoabas ǃnâ gere ǁhao. ǁÎb ge nē altarga Jerusalems ǀgūse ǂnôa ǃhommi ai ge om, Jehovab tempelab ge omba. (1Gao. 11:5-8; 2Gao. 23:13) Salomob ge ge gāxaǃnâsen ǂâib ge o, Jehovab ǁîb ǁnâuǀnamoǃnâsiba nî mûǃkharu ǃkhaisa, ǁguibadeb ga ra dī ǀgara o. Xawe Jehovab ge ǁoreba mûǃkharu tama. w18.07 18-19 ¶7-9

ǀNî “ǀaexa ǂāgu” hînab Satanna ra sîsen-ūn ge ǂhumiba sida Jehovab xa mîbasa. ǁÎb ge ra mî Jehovab ge sida ǀnam tama hâ di. Ida di ǀon hâ ǃgâsas ge a 19 kurixa tsî ra ǃgôaǁnâsen. ǁÎs ge ra mî: “Tita ge Jehovab ti ǀgūse hâ khami tsâ tama hâ tsî ǁîb ti ǀhōsa kai ǂgao tama hâ khami ra tsâ.” ǁÎsa nē tsâsiga mati nî mâǃoa? “ǀHaodi ge ti ǂgomsa ra omkhâi” dis ge Ida sa ra mî. “Tita ge ǀhaodi tawa ǂnûs ǀguisa gere dī, khoe-i tita ra mî xū-e ǃgâ tide di ta ge gere ǂâi. Nēsi ta ge ǀhaodi ǃgao ra aiǂhomisen tsî ǀgam tamas ka io ǃnona ǃnāde ra ǃeream.” Idas aiǁgaus ge ǂhâǂhâsa amaba ra ǁgau: Toroǃkham-aob di khōsikhōb ge ǃgâise ge kurusa i hoa ǀkhā xawe sida ǂgoms ge ǀgai tamas ka io a ǂkhabu ǁkhā. Nēs ge sida xu hâ. (Mat. 14:31; 2Tes. 1:3) ǁNā-amaga î ge kaise a ǂhâǂhâsa sida ǂgomsa omkhâisa. w18.05 29-30 ¶12-14

ǃKhō-oms danab ge ǁîb di ǂâi ǀgauba ǃhūǂgubib khaoǃgâ ǀgui ge dawa tsî huiba ge ǂgan. (ǃNǃkh. 16:25-34) ǁNās ǁkhās khamin ge khoen hîna ge Elobmîs ǃgâiǂhôasa ǃgâ ǂgao tama hâ îna ǁîn ûib ǃnâ i ga ǃhuriǃhurisa mâsiba ga ra hā o, o ǁîn ǂâi ǀgauga ra dawa. ǀNîsin ge ǁîn sîsen-e ge ǂoaǃnâ tsî tsûaǂgaob xa ra dana mâhe. Tsîn ge ǀnîna ǁkhōǁkhōsa ǀaeba ge hōǃnâ-e tamas ka io khoe-e ǁōb ǃnâ ge ǂoaǃnâ. ǀNîn ge ǀnîsi noxoba ra ǂâi, ‘tae-e ta nî dī î ta sâuhe ǁkhā?’ ǁNās ǃaroman ge ǁîna sida ǀkhan ra ǀhao o, o sida haisi-ams hîna ǃâubasensa ūhâsa ra ǃgâ ǂgao. ǁNās ǀkha da ge ǂgomǂgomsase aoǁnâs ǃnâ-ū ǁîna ra ǁkhaeǂgao.—Jes. 61:1. w18.05 19-20 ¶10-12

Nētsēn ge ǂgui khoena ǂgīǂgīhe hâ nē ǃhūbaib di elob xa tsî eloǃoabadi, ekonomib tsî ǀhûhâsib dī xūn ǃnâ-ū ǃgāse ǃkhōhe hâ. (2Kor. 4:4) Sida aiǂhanub ge Jesub aiǁgausa saosa tsî khoena huisa în Jehova Eloba ǂan tsî ǃoaba. ǁÎb a ǃnorasasib di Elo amaga. (Mat. 28:19, 20) Nē sîsen-i ge supu tama hâ tsî ǂgui ǃgomsina ǃkhōǂgā hâ. ǂGui ǃhūgu ǃnân ge khoena ǁae tama hâ ǀgauba ūhâ tsî ǀnîna ǁaixasa. Dîs hîna da nî dîsens ge: ‘Ti ǃnorasasiba ta a sîsen-ū ǁkhā î ta Gaosib sîsenna ǂkhâǃnâ?’ ǂGuin ge nētsē ra mûǂan mâǁaeb ǃnâ da ûi hâsa tsî ǀgui ǃgupu ûiba ûi tsî ǀoasase aoǁnâ sîsenni ǃnâ ra ǁhao. (1Kor. 9:19, 23) ǀNîn ge ǁîn ǂharidi ǃnâ ra sîsen tsî ǀnîna ǂhâsib ǃnāsase hâba sī ra aoǁnâ. Nēsa ǂoaǂamsa tama hâ tsî gā-ai ǀgaub ǃnâ ǃnorasasiba sîsen-ūsa ǁgau tama hâ Jehovaba ǃoabas ǃnâ.—Psa. 110:3. w18.04 11-12 ¶13-14