Novemberi

Jehovaba da ga ǃoaba o, o da ge Adammi tsî Evas tsîra ge ǂoaǃnâ xūna nî hō-oa ǀamo ûib tsîna ǃkhōǂgā hâse. Adammi tsî Evas tsîra ge ge ǁhûi Jehovaba ǃoaba tama isa ǁîra ge ǀgaisa ǀnamma ǁîb ǃoagu omkhâi tama hâ i amaga. Xaweb ge Jehovaba ge mā-am ra gaxuse ûisa tsî ǀgôana hōsa ǁîra ǁgaragu ǃoagu ra nî kaikaina. Adammi tsî Evas tsîra di mîǁguib aitsama ǂgaeǂguisens dib ge kaise ǃhaese ǃgâi tama ǀamǂoasa ge ūhâ i. ǁÎra di ǂguro ǀgôab ge ǁîb di ǂkham ǃgâsaba ge ǃgam tsî i ge ǂhanuoǃnâsib tsî ǁîǂâibasenxasib tsîna khoena ge gaoǂam. (Gen. 4:8; 6:11-13) Nē ǁaeb hoabab ge Jehovaba ǀape-e ge ūhâ i Adammi tsî Evas tsîra ǀgôan ǁîba ra ǃoaba ǂgaona huis diba. (Jhn. 6:38-40, 57) Jehovab di ǀnammi tsî ǃnūǃnâxasib tsîn xa du ga ǁkhāǁkhāsen o, o du ge ǁîba du ūba hâ ǀnamma nî ǀgaiǀgai. Adammi tsî Evas tsîra ge ǃgû daoba da ge ǃgû ǂgao tama hâ xawe sada ûiga Jehovaba ǃoa ra mā ǂgao. w19.03 2 ¶3; 4 ¶9

Tsâbaǁhaosiba omkhâi re omaridi khoen tsî sada ǃgâsan tsîn ra tsâ ǃgomsina ǁnâuǃās ǃnâ. ǃGâiǃgâibasensa ǂkhamkhoen ǀhaohâb ǃnâ hân, ǀaesan hâ ǃgâsan, kaira hân tsî ǀgūkhoena ǁōb ǃnâ ǂoaǃna hâ ǃgâsan tsîna ǁgau re. Dî nî re matin ra ǂkhaisa. Tsî ǁgâiǂuisen an ra ǁaeb ǃnâ ǃgâ re. Mûǂan kai nî re, amabes ǃnâ du ra ǁnâuǃāsa ǃkharu ǃnân ra xūna. Hui ǁkhā du a ǀgaun hoan ǃnâ hui nî re. Nēsa da ga dī o, o da ge amabes ǃnâ da a ǀnam nîsa dīgu ǃnâ ra ǁgau. (1Jhn. 3:18) Hoaǁae da ge nî hui ǀnamxa. Tae-i ǃaroma? ǀNî ǃgâsan ge ǃgomsina ǃkharagaguse ra sîsenǂam. ǀNîn ge supuse ra ǃhoa ǀnîn a ǃgombahe hîna. ǁNā-amaga da ge ǃgâsana huiba ra mā ǂgao xawe tā kaise ǃgam dîde nî dî. (1Tes. 4:11) ǀNîn ga ǁîn ǃgomsina mîba da xawe da ge hoaǁae ǁîn mûǂuiga ǃkhō-am tama hâ. Xawe da ge nî mûǂan nēs ge ǁîn ra tsâ ǀgausa. Xawe da ge nî ǃhae ǁnâusa tsî nî ǂau ǃhoas ǃnâ.—Mat. 7:1; Jak. 1:19. w19.03 19 ¶18-19

ǀHûhâsib ǃnâ du ga amab xa ǃhoa o, o du ra ǃao? Nehemiab xa ǂâi re. ǁÎb ge ǀgaisa gao-aob ommi ǃnâ gere sîsen. Nehemiab ge ge ǂkhîoǃnâ ǁnâub ge o Jerusalems mirgu tsî dao-amdi tsîn ge hîkakahe ǃkhaisa. (Neh. 1:1-4) ǂÂihō re ǁgâib hînab ge ūhâ ība gaob ge dîbi o tae-i ǃaromab ge ǂkhîoǃnâ i ǃkhaisa. Nehemiab ge ǃhaese ǀgore tsî ǁnāpaxū ge ǃeream. ǃEreams ǃnâ-ūb ge gaoba xū-e nēs ǂam-ai ge di Elob khoena huis ǃnâ-ū. (Neh. 2:1-8) Jonab xas tsîna ǂâi re. Jehovab ge Jonaba ge ǂgan îb Nineves ǁanǂgāsaben ǀkha ǃhoa ob ge kaise ǃaob xa ǃkhō-e tsî ge ǃkhoebē. (Jon. 1:1-3) Xaweb ge Jehovaba Jonaba ge hui ǁîb ǁgaumâisa taniǂuis ǃnâ. ǁÎb mîdi ǃhoab ge dige ǃgâi xū-e Nineves ǁanǂgāsabena ge dība. (Jon. 3:5-10) Nehemiaba xū da ge ǃhoa da nîs aiǃâ ǀgores ǂhâǂhâsasiba ra ǁkhāǁkhāsen. Tsî Jonaba xū da ge ra ǁkhāǁkhāsen Jehovab hoaǁae nî hui da sa ǁîba ǃoabasa, ǃao da ga xawe. w19.01 11 ¶12

Elobmîs ǁgaragu ǃoagu da ga ra ûi o, o î ge sida ǀhōsan tsî ǀaokhoen tsîn ǀkha da ūhâ ǀhōsagusisa nî dawa. Tae-i ǃaroma? Jesub ge ǁîb saosaben xa ge mî: “ǁÎna ǃanuǃanu amab ǃnâ, sa mîs ge a ama.” (Jhn. 17:17) “ǁÎna ǃanuǃanu” di hâ mîs ge “ǀgora nî” dis tsîna a ǂâibasen ǁkhā. Amaba da ga ra ūǃoa o, o da ge ǃhūbaiba xu ra ǀgorahe. Khoen ge ǀnî hâse ra mû da sida ǂgom ǀgaub ra ǀkhara amaga. Elobmîs ǁgaragu ǃoagu da ge ra ûi. ǀGorasa da ūhâ ǂgao tama hâ xawen ge sida ǀhōsan tsî ǀaokhoen tsîna sida xu nî bē tamas ka io sida ǂgomsa a mâǃoa tsoatsoa ǁkhā. Jesub ge nēs xa ge mî: “Tsî khoe-i ommi din ge ǁî-i khākhoese nî i.” (Mat. 10:36) Tsî ge mî amaba ǁamasa da ge xū-i ǀkha a mādawa-am ǁoa di. w18.11 6 ¶11

Apostel Paulub ge ǁîb ǃgâsagu tsî ǃgâsadi tsîna ǃgôaǃgâsiba ǁîn xab gere ǃhoa ǀgaub ǃnâ ge ǁgau. ǁÎb ge Eloba ǁîb ǀgoredi ǃnâ hoaǁae ǁîn ǃaroma gere gangan. ǁÎb ge ǁîb ǃgôaǃgâsib tsîna xoab gere ǁaeb ai gere ǁgau. ǂGuro 15 xoaǀgoradi Romeǁîn 16 ǃnâb ge Pauluba 27 ǃnāde ǁîb ǃgâsan ǀonde ge ǂgai. Paulub ge ǃgō-aisase Prisilas tsî Akwilab tsîna ‘ǁîra ǃaora ra ge mâibabi’ ǃkhais ǃgao ge ǂâi tsî Febesa “ǂguina gere hui” khoeb ase ge ǂgai Pauluba ǃkhōǂgā hâse. ǁÎb ge ǁnā ǀnamxaǃnâ ǃgâsan hîna ge ǃgarise gere sîsenna ge koa. (Rom. 16:1-15) Paulub ge ge ǂan i ǁîb ǃgâsan ge ǀoasa kurusa ūhâ tama hâ isa tsî ǁnās ǀkha ǁîn ǃgâi ǀgaugu ǃgao ge koa nî. ǂÂi re nē ǃgâsan ge mati ǂkhâǃnâsase gere tsâ ǀgauba Paulub mîdi ge ǃgarise ǀhaohâba ǃoa a khomaihe o. ǁNās xa ǃaromahe hâse i ge ǁîn ǀhōsagusis Paulub ǀkhan ge ūhâ isa ge ǀgai. ǁAeba xu ǁaeb ǀkha du sadu ǀhaohâb ǃgâsana ǁîn ra mî tamas ka io dī ǃgâi xūn ǃgao ra koa? w19.02 16 ¶8-9

ǀOasa kurusa da nî ūhâ ǂhauǃnâsiba ǁgaus ǃaroma? Xawe du ge a ǂâi ǁkhā sadu anu tama nēs ǃoa-ai di. Tā da ge nî ǃao Jehovab sida ǂkhabusasigu ai kō tama hâ amaga. ǁÎb mîs ge ra mî: “Sats ǃKhūts nî dīsādi ai ǃgaoǃgâs karao, ǃKhūtse, tari-e nî mâ ǁkhā?” (Psa. 130:3) ǁÎb ge a ǂan sadu ǀoasa kurusa ūhâ tama hâsa tsî ǁore-aosa tsî a ǀûbaǀnamxa. (Psa. 86:5) Jehovab ge sadu ǃnubusiga a ǂan tsî ǃnāsa-e sado xu ǂgaoǀkhā tama hâ dī ǁkhā du as xa. (Psa. 103:12-14) Jehovab di ǀHûǀguitimî-aon ge ǂhauǃnâsiba ūhâs ǃaroma ǀnamma ǂhâ hâ. Sadu ǀnammi Elob ǃoa-ai tsî mâǀgaibesib sadu ǀhomsi ǁGûb ǃnâs tsîna ūhâ ǀgaras ǃaroma du ge nî ǀoasa tsî ǂnao o. Sadu ǀnammi ga ǁnāti hâ ǀgara o, o du ge ǂhauǃnâsiba nî ūhâ. (1Kro. 28:9; Mat. 22:37) ǂAn da ge a Jehovab ǂhanu-ai ǁgaraga ūhâsa. ǁNās ǃgao da ge sida ǀhomsi ǁGûba ra ǂkhîǂkhî xūna ǂâis ǃnâ ra ūhâ. ǁÎba da ūba hâ ǀnammi ge ra hui da i da sida mîmâidi ǃnâ ǁîba ǂgurose mâi tsî nēs ǀkha ǂhauǃnâsiba ūhâ. w19.02 3 ¶4-5

Hoaǁae da ga ǃgâi xūna dīsa xu da ra ǀama ǀgauba mûǂan o, o da ge sida ǂgomsa ra ǀgaiǀgai. (Jak. 1:2, 3) Kaise da ge ǃgâise ra tsâ Jehovab ǁîb ǀgôan ase ra mûǂan da o tsî da ge ǁîba hoaǁae ra ǃgâiaǂgao kai. (ǂKhm. 27:11) Mâ ǃâitsâs hoas ge ra ǁgau hoase da Jehovaba ǃoabas ǃnâ mâǁnâsen hâsa. (Psa. 119:113) Hoaǁae da ge ra ǁgau Jehovaba da ǂgaob hoab ǀkha a ǀnamsa tsî ǁîb ǂâisa ra dī ǂgaosa. (1Gao. 8:61) Dīsā î da nî? Îo, hoa da ge ǀoasa kurusa ūhâ tama hâ. Dīsā da ga o, o da ge Gao-aob Hiskiab aiǁgaus xa nî ǂâi. ǁÎb tsîn ge gere dīsā. Xaweb ge ge ǃhōbasen tsî Jehovaba “ǀoasa ǂgaob ǀkha” ge ǃoaba tsoatsoa. (Jes. 38:3-6; 2Kro. 29:1, 2; 32:25, 26) ǁNās ǀkha da ge ǁGâuab ǂâi ǀgauba ūhâsa xu nî ǂgōsen. Tsî nî ǀgore î da “ǁnâuǃāxa ǂgaoba” ūhâ tsî Jehovab ǃoa-ai ǂgomǂgomsase hâ.—1Gao. 3:9; Psa. 139:23, 24. w19.01 18-19 ¶17-18

Aitsama da ge ra ǂkhâǃnâsen ǀhaodi tawa da ga ǃeream o. (Jes. 48:17) Mati io? ǂGurose ǃeream-e māsa da ga aiǂhomisen o, o da ge ǃaromasa ūhâ ǀhaodi ǃaroma aiǂhomisensa. ǃGâise da ga aiǂhomisen o, o da ge Elobmîsa ra ǁnâuǃā. Sada ǁnâuǃāb ga ǃgâi o, o da ge ǁkhāǁkhāsen da ra xūna sada ûigu ǃnâ a sîsen-ū ǁkhā. ǀGamǁîse da ge ǀhaode xū a ǀama ǁkhā ǃereamde mās ǃnâ da ǃâ-e ūhâ amaga. ǃNonaǁîse ǃereamde mās ǁguiǂgāsensa ǂhâ hâ amaga da ge ǃeream da ra ǃâga ra ǂâiho ǀhaos ga toa xawe. Jehovab ǂgaoba da ge ra ǂkhî kai sada ǂgoms ǃnâ da ga ǁgâiǂuisen o. ǂGomǃgâ ǁkhā da ge a Jehovab sada ǃoa ra ǃgâ tsî nēsa kaise ra ǃgôaǃgâsa. Sada ǁgūtsâ di ǃereamde mās didi ǃnâ. (Mal. 3:16) ǁÎb ge nēsab ra ǃgôaǃgâsa sada ǀkhaes ǃnâ-ū ra ǁgau dītsâ da ga o ǁîba ǂkhîǂkhîsa. (Mal. 3:10) ǃGâi ǃaromade da ge ūhâ ǀhaodi tawa ǃereamsa. w19.01 8 ¶3; 9-10 ¶7-9

Jehovab ge ǁîb ǃoaba-aona ǃgâi ǀgaub ǃnâ ra hui. ǁÎb ge ǂgui ǁgaraga mā da tama hâ xawe ra ǁkhāǁkhā da î da ǀnammi di ǂhanuba sao. ǁÎb ge ra ǂgao î da Elob ǁgaragu ǃoagu ûi tsî ǁgai xūna ǃhui. Jesub ǃhommi aoǁnâs ge a ǃgâi aiǁgau ǁkhāǁkhās ǃgao, nēs ǁoreb ra tsoatsoa ǀgausa ra ǁgau amaga. (Mat. 5:27, 28) Elob Gaosib Gao-aob aseb ge Xristuba ǀasa ǃhūbaib ǃnâ noxoba nî ǁkhāǁkhā da, î-i sida tanisen ǀgauba ǁîb ǂhanu-aisib ǀkha ǀguiǃnâxa. (Heb. 1:9) ǁÎb ge ǀoasa kurus tsî ǂurusib tsîna nî mā da. ǁKhawa da ge ǁoreb tsî ǁîb ǀamǂoadi tsîna hōǃâ tide. Tsî da ge ‘ǂkhaisib di ǃnorasib’ Jehovab mîmâiba da hâba nî hōǃâ. (Rom. 8:21) Hoase da ge ǃnorasasiba ūhâ tide. Xawe sida ǃnorasasib ge elosi ǀnammi xa i ga daoǁgauhe o, o ǀgui ǂâibasensa nî ūhâ.—1Jhn. 4:7, 8. w18.12 23 ¶19-20

Israelǁî-aob ge ǁîb tarasa xu gere ǀgora “ǀkhomas ga ǁîb mûǁae hō tama io.” Nē ǂhanub ge “ǀkhoma” di hâ mîsa ge ǁguiǃā tama hâ i. Nē î ge ǀnîsi ge ǁgai xū-i hînas ge tarasa a dī-e. (Deu. 23:14) Jesub tsēdi ǃnân ge ǂgui Jodeǁîna ‘mâ ǂâibasens hoas ai’ gere ǃgame khôa. (Mat. 19:3) Sadu ge nēsa tā nî sao. Maleaxib ge Elob mûǂuiba ǃgameb ai ge ǁgau da. ǁNā ǁaeb ǃnâb ge aoba ǁîb ǂkhamsis taras ǀkha ǃgameba khôasa ge mā-amsa i, îb ǀnîhâ ǂkhamkhoesa ǃgame. Maleaxib ge Elob ǃgameba ra mû ǀgaub xa ge mî: “ǃGamekhôasab ǁîba ǁkhan hâ ǃkhaisa.” (Mal. 2:14-16) Nēs ge Elob ge ǂguro ǃgameb xa a mîs ǀkha ra ǃgûǁae: “ǁîb di taras tawa ǂgāmâisen, o ra ge ǁîǀgamra nî ǀgui ǁgan.” (Gen. 2:24) Jesub ge ǁîb ǁGûb ge ǃgameba gere mû ǀgauba gere ǃgôaǃgâ tsî ge mî: “Elob xa ǃgaeǀhaohe hâ-e i ge khoe-e ǀgora tide”—Mat. 19:6. w18.12 11 ¶7-8

ǀNî ǃgâsan ge ǁnā aiǂhanuba ūhâ māsenxase sī ǀnî hâ ǃhūb ǃnâ aoǁnâsa. ǁÎn ge kēbo-aob Jesajab di aiǁgausa ra sao. Jehovab ge dî o “tariba ta tita nî sî, tariba sige nî ǃgûbaba?” ob ge ǁîba ge ǃeream: “Mû, nē ta a, tita sî re!” (Jes. 6:8) Sadu tsîna ǁnā ǁkhāsiba ūhâ nē kēbo-aob khami ǃeream tsî gagasi ǁaxasigu ǃnâ ǁhaosa? Jesub ge aoǁnâ tsî ǁkhāǁkhāsabedīs xa ge mî: “ǁNā-amaga ǃKhūb ǃgaos diba ǂgan, îb sîsenaoga sîǂui ǁîb di ǃgaos ǃoa.” (Mat. 9:38) Sadu tsîna ǂhâsib hâba sī aimâba-aose sîsen ǂgao tama hâ? Tamas ka io du nau khoe-e hui ǂgao tama hâ ǁnāsa dīsa? ǂGui ǃgâsan ge ra mî ǃgâi ǀgaub hîna da Jehovab tsî ǀgūkhoen tsîna ǀnamma a ǁgau ǁkhāb ge aimâba-aose ǂhâsib hâba sī sîsensa. ǀGaugu xa du a ǂâi ǁkhā hîna da sida aoǁnâ sîsen-e a khoraǂui ǁkhāga? Kai ǃgâiaǂgaob ge hâ nēsa dīs ǃnâ. w18.08 27 ¶14-15

Haka ǃGâiǂhôas ǂkhanidi ge ra ǁgau da Jehovab mati ra tsâsa ǃkhū ǂgaos xa. Elob ge ǁîb ǀGôaba nî kaikai khoe-aogu ra ge ǁhûi ǁîra ge ǃkhū tama hâ i xawe. (Lev. 12:8; Luk. 2:24) Jesub ge ǃnaehe o, os ge Mariasa “ǁgorob ǃnâ ge ǁgui bi, ǃgûkhoen ommi ǃnâ i ge ǃkhai-e ǀkhai-i amaga.” (Luk. 2:7) Jehovab ge ǂhâbab ga hâ o, o ǁîb ǀGôaba ǃkhū hâ khoe-aogu ra omarisa xu ga ǃnae kai hâ. Jehovaba ge ǂhâǂhâsaba îs ge îb Jesuba gagasise a ǀgaisa omaris ǃnâ kai. Nē aiǁgausa xu da ge ra ǁkhāǁkhāsen î da Jehovab ge ǃkhūsisa gere mû ǀgauba ǃgôaǃgâ. ǀNî ǁgûn ge ǁîn ǀgôana ǃkhūsisa ra ǂhâbaba, nēs ga ǀgôan di gagasi ûi ǀgauba ga ra tsâǀkhā xawe. Amaseb ge Jehovaba gagasi ǀgauga ūhâsa ra ǀgapiǃgôa. Sadu tsîna Jehovab nēsa ra mû ǀgauba ge ūǃoa? Sadu ûi ǀgauba nēs xa tae-e ra ǁgau? w18.11 24 ¶7-8

ǁÎb a ǂkhîb di Elo amagab ge Jehovaba ra ǂhâba î da sada tsîna ǂkhî khoe tsî ǁnās xa da ge ǂgui ǃaromade ūhâ. (Deu. 12:7; Aoǁn. 3:12, 13) Xawe nē tsēdi ǃnâ i ge kaise a ǃgom ǂkhîba ūhâsa. Tae-i ǃaroma? ǃGom mâsigu ge sida ǂkhîba a ūbē ǁkhā, aiǁgause ǁōb ǃnâ khoe-e ǂoaǃnâs, omaris ǁani i ga ra ǂnûiǂuihes, ǃgame ǀgoras tsî sîsen-e ǂoaǃnâs. Omaris ǃgomsigu tsî ǁnâuǃāgu tama is tsîn ge kai ǃgomsigu tsî ǂkhîoǃnâsib tsîna a ǃaroma ǁkhā. Sîsenǁare-aon tamas ka io skol ǀhōsan xa ǃkhāǃkhāhes, ǂgomdi ǁkhāǁkhā-aon xa mâǃoahes tamas ka io ǂgoms ǃgao ǃkhō-oms ǃnâ ǂgāhes tsîn ge a ǂkhîoǃnâ kai da ǁkhā. Tsî ǁkhōǁkhōsa ǀaeb, ǂgau-e tama ǀaeb tsî depressib tsîn ge sida ǂkhîba a ūbē ǁkhā. Jesub Xristub hîna “ǃgâiǃō hâ tsî ǀguri ǀgaiba ūhâ ǃKhūb” ge kaise ra dâ khoena ǁkhaeǂgao tsî ǃgâiaǂgao kaisa. (1Tim. 6:15; Mat. 11:28-30) ǁÎb ǃhommi aoǁnâs aib ge Jesuba ǂgui ǀgaugu hîna ǂkhîba ra mā da gu xa ge ǃhoa, nēsi da ga Satanni ǃhūbaiba xu ǁgâiba ga ra hōǃâ xawe. w18.09 17-18 ¶1-3

Elobmîs ai ǃgaoǃgaosa tama hâ dī xūn tsî ǁnaetigu tsîna xu ǂgōsens ge kaise a ǃgom. (ǂKhm. 23:23) ǀNî khoen ge a supubahe nēsa dīsa xawe ǀnîn ge ra îganǀgē amaba ǁamasa omaris ǁanin, ǀhōsan tsî sîsenǀhao-aona xun nî hō ǁgâib ǃgao. Nē mâsib ge ǃgâi tide nēs ga ǁō hâ ǀaokhoe-i mari ǁhōga ga ra ǃkhōǂgā o. Nau khoen di aiǁgaudi ge a hui da ǁkhā î da ǂhâbasa ǀkharaǀkharana dī. ǀAsase ge ǁāǁnâhe Xristeǁîn Efesus ǃnâ ge hâ îna tae-e ge dī în ǁîn ǁgai ǁnaetiga xu ǂgōsen tsî amaba ǁama? Elobmîs ge ra ǁguiǃā: ‘ǁÎn ge ǁîde ǂhaisase ge khauǃkhū, tsîn ge ǁîdi ǀgausa ǃgôaǀhao, tsî ǁîsa korodisiǀoadisi ǀhaiǀuri maride ge hō.’ (ǃNǃkh. 19:19, 20) ǂGomǂgomsa Xristeǁîn ge nē ǁguiǂgāsens ǃgao kaise ge ǀkhaehe. w18.11 7 ¶15-16

Israelǁaes Jordan ǃāba ǃkharu toa hâs khaoǃgâb ge Josuaba ge khoeb ǀkha ge ǀhao hîna ge kai kôaba ūhâ îba. Nē khoeb ge ǃeream tsî ge mî ‘ǂnubis ǃKhūb dis di gaoda’ ge hîna Elob khoena nî ǁkhauba da. (Jos. 5:13-15) Josuab ge ǃgāsa daoǁgausa ǀhomǃgāba xu ge hō matib Jerixosa nî dīkākā ǀgaub xa. ǀNîsi î ge ǂguroseb ge māhe ǁgaraga ǃgâi tamase gere mûsen. Aiǁgauseb ge Jehovaba ge mîmā î gu hoa aore khoega ǃgaohe tsîs ge ǁnāsa ra ǂâibasen ǁîgu tsûb ǃnâ nî hâsa ǁaerob ǀgaiba. (Gen. 34:24, 25; Jos. 5:2) ǁNā huioǃnâ soldagu ge ǀnîsi gere ǂâi mati gu ǁîgu omaris ǁanina nî kōǃgâ ǀgauba. Xawe î ge ǂhôasa ge hā Jerixos ge “ǁāga ǂganam, tsî ge ǂganamsen hâ i Israeli ôan di ais aiǃâ.” (Jos. 6:1) ǁÎna ǃgâi ǂâibasen-e ūhâ tide ǂgomǃgâsiba Jehovab ǃnâ ūhâsa, mâsib go nēti a dawa o? w18.10 23 ¶5-7

Mati da Paulub di ǃgamǃgamsenxasiba a ǁgae ǁkhā? ǂGurose da ge ǃâitsâgu ǃnâ tā nî māǁnâsen tsî tā ǂhaisiba nî ǂgao Jehovab ǀapeǂhumis ǃnâ da ra hō ǁgaumâidi ǃgao. ǀGamǁîse da ge nî dîsen: ‘Khoen hîna da ra aoǁnâba na da mati ra mû? ǀŪǃgâse ta ǀhûhâsib ǃnâ ǀnî khoen ǃoagu ǃhaoǃnâbe ǀgorasa ra ǁgau?’ Xawe mûhe ras ǃoagun ge Jehovab di ǀHûǀguitimî-aona ǁîn ǂharidi ǃnâ ǀûsen tamase hoa khoena ra aoǁnâba. Tsî nēs ge ǀnî ǁaega ra ǂgaoǀkhā în khoen hîna ǁîn ǂharidi ǃnâ ra ǁanan di gowab tsî ǁnaetigu tsîna ǁkhāǁkhāsen în ǁîna aoǁnâba ǁkhā. Nēs ge amabes ǃnâ ra ǁgau ǀHûǀguitimî-aon nēs xa ǀgapiǃgôasen tama hâsa. ǁÎn ge nēn hoan ǂam-ai ra dītsâ mâ khoe-i hoa-i di ǂhâsiga ǁnâuǃāsa în nēs ǃnâ-ū Gaosib ǃgâiǂhôasa aoǁnâ ǁkhā. w18.09 5 ¶9, 11

Romeǁîn ge Judaba ge ǃgam kai. Judab tsî nau ǂgīǂgōsi ǂgaeǂgui-aogu ge hâ i xawen ge ǀnî Jodeǁîna Mesiab di hāsa ge ǃâubasen hâ i. ǁÎn ge gere ǂâi Mesiab hā tsî ǁîna Romeǁîn ǂhanuba xu nî ǃnora kai di. (Luk. 2:38; 3:15) ǂGuin ge gere ǂgom Mesiab gaosiba nî ǂnûikhâi di Israeli ǃnâ. Tsîn ge ǂgui Jodeǁîn hîna ge ǀnî hâ ǃādi ǃnâ ǁan hâ îna ǁîn ǃhūba ǃoa ge oa hā. ǂÂi oa re Johaneb ǁĀǁnâ-aob ge Jesuba a dî dîs xa: “Satsa, hā nîtsa koma?” (Mat. 11:2, 3) Johaneb ge ǀnîsi gere ǂan ǂgao ǀnî hâb noxoba hā tsî Jodeǁîn ǃâubasensa nî dīǀoaǀoa di. ǀGam ǁkhāǁkhāsabe kha hîna ge Jesuba khâis khaoǃgâ Emaus daob ai a ǀhao-ū kha tsîn ge dīǀoaǀoahe ǁoa ǃâubasens Mesiab dīs xa gere ǃhoa. (Luk. 24:21) ǁNās khaoǃgâgu ge Jesub apostelga ge dî: “ǃKhūtse, nē ǁaeb aits kha Israelǁîna gaosiba ǁkhawa nî ūkhâiba?”—ǃNǃkh. 1:6. w18.06 4 ¶3-4

ǂHaikhari da ge nî hâ î da tā khoen ga Jehovab di khoen xa ga ra xoa ǂhôana khomai. Tā ǀuru re ǁGâuab ge Elob di ǂgomǂgomsa ǃoaba-aona ra ǂhumi ǂgari-am. (J.ǂHa. 12:10) ǁNās ǀkhab ge Jesuba ge ǃkhâikhom tsî ge mî mâǃoa-aon ge “ǂhumib ǀkha hoa ǂkhaba xūna” sida ǃoagu nî mî di. (Mat. 5:11) Nē ǃkhâikhomsa da ga ǂgaob ǀkha ga ra ūbasen o, o da ge ǃhuri tide ǃgâi tama xūn ga Jehovab di ǃoaba-aon xa ga ra ǂhôa-e o. Sadu tsîna a ǃgâiba-e email an tsî sms an tsîna sadu ǀhōsana sîbasa? ǁNās ǀkha du ge sadu tsîna ǀnîsi xū-e du ga ai-īsiǂhôaǂgares ai ǁnâu tamas ka io ga ra khomai o ǀnîsi ra tsâ nē ǂhôa-e khoena mîbasa. Xawe ǁnā sms tamas kai o emailsa du nî sîs aiǃâ, dîsen re: ‘Nē ta ra mî ǂgao ǂhôa-e ama-e? Hoa amaba ta a ǂan?’ Amaba du ga ra ǀū io, o du ge sado īǁkhā î ga ra o ama tama xūna a ǂhôa ǁkhā ǀhaohâb ǁanin ǁaegu. ǁNās ǃaroma hoa amaba du ga ra ǀū io, o nē sms tamas ka io emailsa ǀariǂui re. w18.08 3 ¶3; 4 ¶6-7

Jesub ge ra ǂhâba î da ǃgâiaǂgao māxasiba xu. ǂGui khoen ge māxasib xa a ǃgâibahe. Hoa khoe taman ge hîna sida māxasiba nî ūǃoa na xawen ga ra ūǃoa o, os ge nēsa ǂgui khoena a ǂgae ǁkhā. ǁNā-amaga da ge khoen ga gangansa ǁgau tama ga ra i xawe nî mā. ǂAn da ge nî ǂkharirose mās tsîn ge ǃgâiba a ūhâ ǁkhā. Māxa khoen ge xū-en nî hō amaga ǀgui mā tama hâ. Jesub ge nēsa ǂâis ǃnâ ge ū hâ i mîb ge o: “Xawe ǂûǀhaosats ga dīo, ǁkhau ǁnâi re ǀgâsan, tsî ǃhom hân, tsî ǃhoran, tsî ǂgīn tsîna, ots ge nî ǃgâiǃō, mādawa-am tsin nî xū-en ūhâ tama amaga; xawets kom nîra dīdawa-amheo ǂhanu-ain di khâis ǃnâ.” (Luk. 14:13, 14) “Māxa khoe-i ge nî ǀkhae-e” dib ge ǀgui xoa-aoba ge mî. ǀNî hâ i ge ge xoa: “ǃGâiǃōb ge ǁnā khoeb, ǀgâsa-i xa ra ǂâiba.” (ǂKhm. 22:9; Psa. 41:1) Nau khoena huis ge kaise ǃgâise ra tsâ kai da. w18.08 21-22 ¶15-16

Amaba ôaǃnâs ge kaise a ǃgom nētsē. Khoen hoaǁae ama tama xūna ra ǂhôa amaga tsî ǀoasa kurusa da ūhâ tama hâ ǃkhais ǃgaos tsîna. Tae-e nî hui da nēsa ǃkhams ǃnâ? Elobmîs tsoatsoade ǂan tsî da ge nî sîsenǂui sida ûib ǃnâ. ǀGui Elobmîs tsoatsoas ge ra ǁgau, gâresib ge hoa xūna du a ǀū hîna ǃereamsa. (ǂKhm. 18:13) ǀNî Elobmîs tsoatsoas ge ra ǃkhâikhom, tā da ge mâ mî-i hoa-e nî ǂgom. (ǂKhm. 14:15) Tsî ǀûnis ai, matikō ǂans tamas ka io matikō gaxuse da ǁāǁnâhe hâ xawe da ge tā sida ǁnâuǃāb ai nî ǂgomaiǂnûi. Elobmîs tsoatsoadi ge nî hui da î da hoa amaba da ga ra ǂan o ǀgui ǃgâi ǀamǂoasa hō tsî ǃgâi mîǁguigu tsîna dī. w18.08 7 ¶19

Jehovaba da ge ra gangan ǁÎb ai da ga ra māǁnâsen o. Tsî ǁāǁnâs ge ra ǁgau Jehovab di da asa tsî ǁîb ǂâisa da ra dī ǂgaosa. Jesub tsîn ge nēsa ge dī ǁîb ǁāǁnâs tawab ge Jehovaba ǃoa a mî o: “Ti Elotse, sa ǃgâiǂâisa ta nî dī” di. (Psa. 40:7, 8) Jehovaba mati Jesub ǁāǁnâsa ge ǃkhōǃoa? Elobmîs ge ra mî: “Tsî Jesub ge ǁāǁnâhe, ob ge ǁnātimîsi ǁgamma xu ge ǂoaxa, tsî mû, ǀhomgu ge ge ǁkhowa-amsenba bi, tsîb ge Elob Gagaba ǂnabu-i ase ǁgôaxa tsî ǁîb ǂama ra hāse ge mû. Tsî mû, dom-i ge ǀhomma xu ge ǀkhī, nēti ra mî-e: Nēb ge ti ǀgôab, ǀnam ta aba, ǃgâiǃgâibasensa ta ūǃnâ hâba.” (Mat. 3:16, 17) Jesub ge ǀnai ǁîb ǀhomsi ǁGûb di i, xaweb ge Jehovaba kaise ge ǂkhî mûsa Jesub ge ǁÎb ǂâisa ǂgaoba xu gere dīsa. ǁNās ǁkhās khamib ge Jehovaba sida māǁnâsensa ra ǃkhōǃoa tsî nî ǀkhae da.—Psa. 149:4. w18.07 23 ¶4-5

Moseb ge “khom” di hâ mîsa sîsen-ūs ǃnâ-ū ǁîb tsî Aronni tsîn xa gere ǃhoa. ǁNā mîdi ge Jehovaba ǃgôasiba ge ǁgau tama hâ i hîna ge nē buruxa dība a ī ǁkhā kaiba. Nēs ge Psalmdi 106:32, 33 ǃnâ a xoasa mîdi xa ra ǂkhâǃnâhe: “Tsîn ge Eloba ǁkhāti kaise ge ǁaixa kai Meribas ǁgamgu tawa, ob ge Moseba ǁîn ǃaroma tsūse ge ībahe; ǁîb di gagasan ge mâǃoa xui-ao, ob ge ǂâi tamase amǁgaukha âb ǀkha ge ǃhoa.” (Num. 27:14) Moseb tanisen ǀgaub ge Jehovaba ǃgôasiba ge ǁgau tama hâ i tsî ǁÎba gere ǃgôaǁnâ. Moseb tsî Aronni tsîn ǀkhab gere ǃhoa o, ob ge Jehovaba ge mî: “Sakho ge ti mîmāsa ǁnâuǀnam tama” go hâ i. (Num. 20:24) Nē ǁoreb ge kaise ge kai i. Jehovab ge ǃkharu ge ǁaeb ǃnâ ge ǂgao tama hâ i în ǁîb khoena Kanaanni ǃnâ ǂgâ ǁîn ǁoren ǃgao. (Num. 14:26-30, 34) Nēs ǃaromab ge Jehovaba Moseba Israelǁaes khami ge ǀgoraǃgâ ǁÎb ǁoreb ǃgao. Moseb ge mîmâisa ǃhūb ǃnâ ǂgâsa ge mā-amhe tama hâ i. w18.07 14 ¶9, 12; 15 ¶13

Māsenxa î du nî î du tā sadu ǃgâsa-e ǃnôa kai, ǁî-i ǃgâiǂâis sadu disa xu ra ǀkhara ǃkhais ǃgao? Ama as ge ǃkhō-oasen tamase da ge ǁnāsa nî dī ǂgao. Amab xan nî ǁkhāǁkhāsens aiǃân ge ǀnî ǃgâsana alkohol-e ǃgâi tama ǀgaub ǃnâ gere sîsen-ū. Xawen ge nēsi mîǁgui hâ alkohol-en ā tidesa. Ama as ge sida ǃâ-e ǀhuru ǂgao tama hâsa î-i sida ǃgâsa-e ǁnā tsî kai tsūb ǃnâ ǂgâ. (1Kor. 6:9, 10) ǁNā-amaga i ge ǀnamxaǃnâ tide ǃhaokhoe-i ase sida ǃgâsa-e ǃkhōǃoa tsî ǁî-e ǁgarisa î-i alkohol-e ā, ǂkhā i ra hîna. Timoteub ge 20 kurixa i o, ob ge ge māsen îb ǁîb aorekhoe soros aikhōba ǃgaohe îb tā Jodeǁîn hînab gere aoǁnâbana ǃnôa kai. ǁÎb ǂâib ǀgaub ge ge ǀgui i apostel Paulub dis ǀkha. (ǃNǃkh. 16:3; 1Kor. 9:19-23) Timoteub khami da ra māsen nau khoen ǃgâib ǃgao? w18.06 18-19 ¶12-13

Jehovab ge ǁîb ra mā-am khoena ra ǂgae în ǁîb gagasi omaris ǁanin ǃâ kai. (Jhn. 6:44) ǂGuro ǃnās asets ga khoe-i hîna Jehovaba ǃoaba tama hâ i ǀkha ǀhao o, ots tae-e nē khoe-i xa a ǂan? Nēs ge Jehovab a ǂan tsî ǀnam khoe-ets ra ǀhao-ūsa xu ra ǀkhara. Nē khoe-i ga ǀnî hâ khaoǃhūb, ǃhaos tamas ka io ǃāsa xu ga ra hās tsîna da ge ǀnai ǁî-i xa a ǂan tsî ǁî-e sida xa. Aiǁgausets ge ǀnai nau khoe-i “gowaba” ra mûǂan, nēb ge “ǃanu amǁgauga” amab di gowaba. Tsîts ge ǁnās ǀkha a ǂan nau khoe-i tae-e ra ǂgomsa, Elob, ǀgaugu tsî hānîǁaeb xas tsîna. Nēn ge kaise a ǂhâǂhâsa ǂansa, nēs ǂgomǃgâsiba ra omkhâi amaga. Tsî hâhâ nî ǀō-aisa ǀhōsagusis tsîna. w18.12 21 ¶9-10

Xristub di ǂgaeǂguis ǃnāga î ge ǂgaeǂguira sorosa ge daoǁgauhe, în Xristeǁî tama hâ Jodeǁîna tā ǃgaohe. (ǃNǃkh. 15:19, 20) Xawe î ge nēs khaoǃgâs tsîna ǀnî Jodeǁîna ge aiǃgû ǁîn ǀgôana ǃgaos ǀkha. ǀNîsi da ge ra ǂâi, ‘Jesuba tae-i ǃaroma nēsa gaxu ǁaeba ge aiǃgû kai, ǁîb ǁōb ge Moseb di ǂhanuba a ǀam kai hîna?’ (Kol. 2:13, 14) ǀNîn ge ǁaeba ra ū xū-e ǁnâuǃāsa. Jodeǁi Xristeǁîn tsîn ge ǁaeba ge ǂhâ hâ i ǀasa ǀgauba ǁnâuǃāsa. (Jhn. 16:12) ǀNîn ge noxoba ǁaeba ǂhâ hâ în ǁnâuǃā ǃgaohes ǃnâ-ū ǀgui î khoe-e ǀhōsagusisa Jehovab ǀkha a ūhâ ǁoasa. (Gen. 17:9-12) ǀNîn ge mâǃoahesa gere ǃao tsî ǁnās ǀkha Jodeǁîn ǂgom ǀgauba xu mâǂoasa gere ǃao. (Gal. 6:12) Tsîb ge Xristuba noxoba ge aiǃgû daoǁgaus ǃnâ Paulub ge xoa sîǂkhanidi ǃnâ-ū.—Rom. 2:28, 29; Gal. 3:23-25. w18.10 24-25 ¶10-12

Kajafab ge soldaga ge sî îgu Jesuba ǃuia sī ǃkhō. Jesub ge ge ǂan i nē ǃnaeǃkhais nî īsa ǁnās ǀkhab ge ǂûgu nîs aiǃâ ǁîb apostelga ge ǂgan îgu gôaga ū sao. Nē ǀgam gôaga ge ǁîga ǂhâǂhâsa xū-e ge ǁkhāǁkhā. (Luk. 22:36-38) Tsîb ge Petruba ǁnā ǃui gôab ǀkha soldagu di ǀguiba ge ǁnāǂam. ǁÎb ge nēsa ǁaixab ge hâ i amaga ge dī, Jesub ge ǂhanuoǃnâse a ǃkhōhe ǃkhais ǃaroma. (Jhn. 18:10) ǁNās ǀkhab ge Jesuba Petruba ge mîba: “ǂGā-oa sa gôaba ǁîb di ǃkhais ǃnâ; gôaba ra ū-i hoa-i gôab ǀkha nî hîǀhuruhe xuige.” (Mat. 26:52, 53) Nē ǁaxasib ge Jesub ge ǁnā tsē a dī ǀgores ǀkha ge ǀguiǃnâxa i, mîb ge o ǁîn ge nē ǃhūbaib di ǃâ tide di. (Jhn. 17:16) Nēs ge ra ǁgau Elob ǀguib ge ǂhanuoǃnâsiba nî ǀam kai. Xristeǁîse da ge ǀguiǃnâxasib tsî ǂkhîb tsîna nî ūhâ. Jehovab ga ǃhūbaib mâsiba ga ra kō o, ob ge nî mû mati da sada ǁaegu ǂkhîba ūhâ ǀgauba. Nēs ge ǁîb ǂgaoba nî ǂkhîǂkhî.—Sef. 3:17. w18.06 7 ¶13-14, 16

Sada ǂgaeǂhapus ǃnâ-ūb ge Satanna ra ǃaroma î da sida ǂgomǂgomsasiba Jehovab ǃoa-ai ǂoaǃnâ. Aiǁgauseb ge ra dī î-i sida aoǁnâ sîsen-e ǂhanugu xa mâǃoahe. Tamas ka io da ge sîsenni ais tsî skoli tawas tsîna a mâǃoahe ǁkhā, Elobmîs ǃoagu da ra ûi ǃkhais ǃgao. (1Pet. 4:4) ǁÎb ge sida omaris ǁanina a sîsen-ū ǁkhā în sida ǂkhabuǂâi kai î da tā ǀhaode ǃoa ī. (Mat. 10:36) Mati da nēsa nî mâǃoa? ǂGurose, da ge nî ūǃoa, Satanni sada ǃoagu ra ǃkham ǃkhaisa. (J.ǂHa. 2:10) Tsî da ge hara mûǂuisa nî ūhâ ī ra xūn xa. Satanni ge ra mî sida Jehovaba xu da ra hō ǃgâib ǃgao ǀgui ǁîba ra ǃoaba di. ǁÎb ge ra mî ǁgâiba da ga hōǃâ o, o da Eloba nî ǃoaba ǀû di. (Job. 1:9-11; 2:4, 5) Xawe hā re î da Jehovab ai kō î da ǀgaiba hō tsî mâǃoa bi ǁkhā. Jehovab ge tātsēs tsîna ǁnāxūǃnâ da tide.—Heb. 13:5. w18.05 26 ¶14

Sida ra aoǁnâ Gaosib ǃgâiǂhôas ga khoen ǂgaoga tsâǀkhā tama ga ra i xawe da ge tā sida ǃhana sîsen-e nî ǃgôaǁnâ. ǂGui khoen ge ǃgâ da ǂgao tama hâ xawe sida ra dī sîsen-e ra ǃgaoǃgâ. ǁÎn ge sida ra ana ǀgaub, ǃgâi tanisen ǀgaub tsî ǀnoms tsîna ra kō. ǁAeb ra i khami î ge sida tanisen ǀgauba ǂguina nî hui în mû ǁîn sida ra mû ǀgaub ǂhanu tama hâsa. Sergiob tsî Olindas hîna a aimâba-ao ra ge ra mî: “ǁAerob ǀgaibam ge ǀaeb xa ǃaromahe hâse ǁamaxū ǃkhaiba ǃoa ge ī ǀû. ǁKhawam ge ī tsoatsoa o, on ge ǃkharu gere khoena ‘tae-e ge hā? di gere dî mi tsî ǁkhore ro da ge hâ di gere mî.’” Sida ǃomga da ga ‘sâ kai’ tama ga ra io Gaosib ǃkhomma ǃhanasa, o da ge ǃâ-e ūhâ “hoa ǁaedi mîdansa ǃoa.” (Mat. 24:14) Xawe da ge hoan ǂam-ai kaise ra ǂkhî mûsa Jehovab xa da ge ra ūǃoahe di, ǁîb ge “ǂûtani” ran hoana a ǀnam.—Luk. 8:15. w18.05 16 ¶16-18

Khoen ge ǁoreb tsî ǁōb tsîna a ǀumisa xub ge Jehovaba ra ǁgau ǁîb a ǁkhaeǂgaos di Elosa. Edenni ǃhanab ǃnâ ge hâ mâǃoas khaoǃgâb ge Jehovaba Adammi suriba ge mîba în ǁkhoaǂgaosiba ūhâ. Genesis 3:15 ǃnâ a māsa kēbos ge khoesib hoaba ǃâubasensa ge mā, “kaira ǀaob” ǁGâuab tsî ǁîb dīgu tsîn ge nî dīkākāhe di. (J.ǂHa. 12:9; 1Jhn. 3:8) Jehovab ǃoaba-aob Noaxi ge eloxoresa ǃhūbaib ǃnâ gere hâ. Noaxi tsî ǁîb omaris tsîn ǀguin ge ǁnā ǁae Jehovaba gere ǃoaba. ǂKhabadīb tsî ǁgauoǃnâ ǁgoe-ūgub ge kaise ǀoa hâ i amagab ge Noaxa ge ǂkhabuǂâi. (Gen. 6:4, 5, 9, 11; Jud. 6) Xaweb ge Jehovaba Noaxa ge mîba ǁnā eloxoresa ǃhūbaibab nî dīkākāsa. Tsî Noaxa ge mîba tae-eb nî dīsa în ǁîb omaris ǁanina sâuhe. (Gen. 6:13-18) Jehovab ge Noaxa ge ǁgau ǁîb a ǁkhaeǂgaos di Elosa. w18.04 15 ¶1-2

Kaise i ge nî ǁkhōǁkhōsa i, mîsa sada ge khoe-e a ǂkhâǃnâ ǁoa kaise da ǃhoa tama hâ amaga. ǃGom tama i ge hâ khoe-e ǂkhâǃnâsa. Khoe-e du ge ǀgamsa îsa ǀnomsa a ǁgau tsî a tawede ǁkhā. Khoe-i ga ǀnîsi ǀnom ǃoa tama ga ra io, o i ge ǀnîsi xū-e ǁî-i ǀkha ǃgâi tama hâ. Xawe khoe-e ǃgâs tsîn ge ǁî-e ǁkhaeǂgaos ase a ība ǁkhā. (Jak. 1:19) Sada tsîn ge nau khoena a ǂkhâǃnâ ǁkhā ǁîn huiba ǂhâ hâ ǁaeb ǃnâ. Gao-aob Salomob ge ge xoa: “Matikōse i a ǃgâi ǁaeb ai ra ǃhoahe mî-e! ǃNâb mûdi dib ra ǂgaoba ǃgâiaǂgao kai, ǃgâi gommi ge ǂkhōga ra kaukau.” (ǂKhm. 15:23, 30) Paulub ge ge ǁgau ǀguiba Gaosib ǁnaetsanade ǁnaes tsîn ge khoe-e a ǁkhaeǂgao ǁkhā. (ǃNǃkh. 16:25; Kol. 3:16) Hoaǃnâ-aixase ǂkhâǃnâgus ge Jehovab “tsēs ra ǀgū” khami kaise a ǂhâǂhâsa.—Heb. 10:25. w18.04 23 ¶16; 24 ¶18-19