Maarti

Elob tsî ǁîb mîs tsîna da ūba hâ ǀnammi ge nî ǀgaiǀgai da, î da Jehovaba ǁnâuǀnam, sida ǀaokhoen ga ǁgari da o, î da Elobmîs ai ǃgaoǃgaosa tama hâ ǁkhāǁkhādi hîna ǁōb xa hâdi ǃnâ ǁhao. ǁÎn ge ra mî sida ge ǁō go khoe-e ǀnam tama hâ tamas ka io ǃgôasiba ūhâba tama hâ. Tamas ka ion ge ra mî ǁō go khoe-i ge sida nî tsūdī di. Karibbean ǃhūb ǃnân ge khoena ra ǂgom khoe-i ga ǁō o, o i ge ǁî-e ra ‘ǀnōre’ kai tsî ǁî-e ra ǃkhāǃkhā khoena ra tsūdī. Nē ‘ǀnōre’ î ge khoen ǁaegu ‘ǃgomsina a ǃaroma ǁkhā’ dib ge ǀnî xoa-aoba ge mî. Afrikab ǃhūgu ǃnâ i ge khoena spilsa ra ǃgū-ai ǁō go khoe-i oms ǃnâ tsî ai-īsiga mirgu ǃoa ra dawa. Tae-i ǃaroma? ǀNîn ge ra mî ǁō hâ khoen ge tā nî mûsen di. Jehovab ǃoaba-aon ase da ge ama tama xūna ǂgom tama tsî ǁGâuab ǂhumiba ra aiǃgû kai dīxūn ǃnâ ǃâ tama hâ.—1Kor. 10:21, 22. w19.04 16 ¶11-12

Jesub ge tsoatsoade [mîmāde] ge ǁkhāǁkhā hîna ge ǁîb saosabena a huite în nau khoen ǀkha ǂhanu ǀgaub ǃnâ hâ. Sadu ra hâ-ūhe ǂgao khami nau khoena hâ-ūs ǂhanub xa ǂâi re. Hoa da ge ǃgâi ǀgaub ǃnâ ra hâ-ūhe ǂgao. ǁNās ǀkha da ge nau khoena ǃgâi ǀgaub ǃnâ nî hâ-ū. Nēsa da ga dī o, on ge ǁîna nî ǂgae-e sida ǀkha ǃgâi ǀgaub ǃnâ hâsa. Xawe ǂhanuoǃnâse da ga hâ-ūhe os? Jesub ge ǁîb saosabena ge ǁkhāǁkhā în ǂgomǃgâsiba ūhâ Jehovab ǁîba ‘tsēs tsî tsuxub tsîra ra ǂgaiǀîna nî ǂhanuǂhanuba’ ǃkhaisa. (Luk. 18:6, 7) Nē mîdi ge ra mîmâi: Sida ǂhanu-ai Elob ge hōǃâ da ra ǃgomsina ra mûǂan nē ǀuni tsēdi ǃnâ tsîb ge ǀgūǁae ǂhanu-aisiba nî māda. (2Tes. 1:6) Jesub ge ǁkhāǁkhā da tsoatsoade da ga sao o, o da ge nau khoena ǂhanu-ai ǀgaub ǃnâ nî hâ-ū. Tsî ǀnîsi da ga ǃgâi tama ǀgaub ǃnâ hâ-ūhe o, o da ge ra ǁkhaeǂgao-e ǂansa Jehovab nî ǂhanuoǃnâsiba ūbēsa. w19.05 5 ¶18-19

ǂKhamkhoeto tsî du noxoba skoli ǃnâ hâ? ǂGui ǀgôan ge sa klas ǃnâ ra ǂgom khoen ge kuruhe tama hâ tsî ǁnāti ǀgui ge hā di. ǀNîsits ge sa ǂgomsa ra ǁkhauba ǂgao xawets ge ǁkhāsiba ūhâ tama hâ. Nēs ge ra ǂâibasen ǃnāsasets ge ôaǃnâsa nî dī. ǀGam ǃaroma rats ge nēs xa a ūhâ ǁkhā: (1) sa ǂgomsa ǀgaiǀgais Elob ge hoa xūna a kurusa tsî (2) sa ǂgomsats mati nî ǁkhauba ǀgauba ǃgâiǃgâis. (Rom. 1:20) ǀNîsits ge a dîsen ǁkhā, ‘ti skoli ǀhōsana tae-i ǃaroma ra ǂgom khoen kuruhe tama hâsa?’ ǁNās khaoǃgâts ge sida ǂkhanin hîna Elobmîs ai ǃgaoǃgaosan ǃnâ ôaǃnâsa nî dī. Sa ǂgomsa ǁkhaubas ge kaise ǃgom tama hâ. ǀNî khoen ge khoen Jehovab xa kuru-e tama hâsa ra ǂgom, ǁîn ǃgôaǃgâ hâ khoe-i ge ti mî amaga. ǀGui tamas ka io ǀgam mâǂoara ǂâide da ga hō o hîna da ra ǀgoragu ǂgaode, o da ge khoe-i hîna ǃereamsa ra ôa-e a ǃeream ǁkhā.—Kol. 4:6. w19.05 29 ¶13

Eliab ge ǁîb ûib ǃaroma a ǃkhoe o, ob ge kaise ge ǂkhabuǂâi hâ i tsî gere ǁō ǂgao. Jehovab ge ǀhomǃgāba ge sî, îb nē ǂkhabuǂâi hâ aoba ǁkhaeǂgao. ǀHomǃgāb ge ǃgâi huiba ge mābi. ǁÎb ge Eliaba ǀgamsa ǂû-e mā tsî ge ǂkhâǃnâ îb ǂû. (1Gao. 19:5-8) Nē ǃnaeǃkhais ge amaba ra ǁkhāǁkhā: Khoexaǃnâsib hîna da khoe-e ra ǁgaub ge kaise ǃgâi sîsenǂuiba a ūhâ ǁkhā. ǂÛǀhaos tamas ka io ǀkhaeba da ge ǁî-e a mā ǁkhā, nēs ge tsûaǂgao hâ khoe-e a ǁkhaeǂgao ǁkhā sida ǀnammi tsî khoexaǃnâsib tsîna ra ǁgause. Nau khoe-i ǀkha sida ǂganǃgâsa xūn xa ǃhoas xa da ga ǃgombahe xawe da ge noxoba huiba a mā ǁkhā. Jehovab ge buruburuxase Eliaba ǂhâb ge hâ i, huiba ge mā îb, Horeb ǃhomma ǃoa ī. ǁÎb ge ǀnîsi gere ǂâi ǁîba gere ǃgam ǂgao khoena xub ǃgūse hâ di. Tae-e da nē aiǁgausa xu a ǁkhāǁkhāsen ǁkhā? Tsūdī-e hâ khoena da ga ǁkhaeǂgao ǂgao o, o da ge aibe ǁîna ǃnorasase nî tsâ kai. ǁÎ-i oms tamas ka io ǀhû-ommi tawa. w19.05 16 ¶11; 17 ¶13-14

12ǁÎ danaǃâs Saxariab kēbodi disa du ra khomai hîna du ge Mesiab di ǁōb xa ra khomai. (Sax. 12:10) 12ǁÎ ǁaraǃās tawa du ge “ǃhaos Natanni dis” xa ra khomai hîna kaise Mesiab ǁōb xa ra ǃoana. ǃHaese nēsa khomais xa du ge mâ tsî a dîsen ǁkhā: ‘Mesiab tsî Natanni omaris tsîn ǁaegu i tae ǃgaeǀhao-e hâ?’ Ôaǃnâ sîsena du ge a dī ǁkhā. ǁNaeǁgaudi ge 2 Samueli 5:13, 14 ǃoa ra ǁnaeǁgau du hîna ra ǁgaude Natanni a Gao-aob Davib ǀgôagu ǀguisa. ǀGamǁî ǁnaeǁgaus ge Lukab 3:23, 31, ǃnâ ra ǁgau Jesub ge Natanni di surib ǃnâ a ǃnaesa Marias ǃnâ-ū. Tsîts ge nēs xa ra ǃgâibahe. ǂAn du ge go i Jesub Davib suriba xu ra hâsa. (Mat. 22:42) Xaweb ge Daviba 20 xa a ǃnāsa ǀgôaga ge ūhâ i. Tsîs ge nēsa ǁnās ǃaroma buru kai da tama hâ Saxariab ge Natanni omarisa ǃoa a ǁnaeǁgausa hîna ǃaroma-e ūhâna Jesub ǁōb xa ǃoasa? w19.05 30 ¶17

Tae-e da ǁnâi nî dī? Hoaǁae da ga Elobmîsa ôaǃnâ o, o da ge ǀgaisa ǂgomǃgâsiba ǂgom ǃnâ da ra xūn ai nî omkhâi. Tsî da ge khôahe ǁoasa ǂgomǃgâsiba nî ūhâ Jehovab di daoǁgaudi a ǂhanu-aisa. O da ge hais hîna ǀgaisa ǃnomaga ūhâs khami nî “ǃnomaǃnomahe . . . ǂgoms ǃnâ.” (Kol. 2:6, 7) ǂÂis ǃnâ ūhâ re, ǀnîhâ khoe-i ge sada di ǂgomsa a ǀgaiǀgaiba da ǁoa, nēs ǃaroma sadu di ǂâisa ǀasa kai re hoaǁae. ǀÛs ose ǀgore tsî Jehovab di ǃanu gagaba ǂgan re. ǃGamse ǂâiǃgâ tsî aiǃgû re sadu ra ǂgomǃnâ xūn a amasa hoaǁae ôaǃnâs ǀkha. ǃGâi ǀhōsana ôa re tsî ǁnān hîna sadu ǂgomsa ǀgaiǀgais ǀkha nî huidun ǀkha hâ re. Nēsa dīs ǃnâ du ge ‘ǀapede ra hîkākā tsî mâ ǀgapib hoab, Elob ǂans ǃoagu ra khâib tsîna.’—2Kor. 10:5. w19.06 13 ¶17-18

Ruts ge Naomisa a ǁkhaeǂgao khami da ge sada tsîna sada ǃgâsan hîna ǁîn ǀgūkhoena ǁōb ǃnâ ra ǂoaǃnâna ra ǂkhâǃnâ ǂgao. (Rut. 1:16, 17) Paulas ge ra mî: “Ti kaikhoeba ǁō toa tsî ta ge ǂgui ǂkhâǃnâsa ge hō. ǁAeb ra ǃkharu khamin ge khoena ǁkhawa ra ǃgâi. Xaweb ge ti ûiba ge dawa. ǁKhaeǂgao ra khoen ga mûǂan o ǃoab ǃnâ hâ khoe-i ge sao ra ǁkhâgu ǃnâ noxoba ǁkhaeǂgaohesa nî ǂhâ tamas ka io kurin ǃkharu hâ hînas tsîna os ge nēsa kaise nî hui.” ǂAn da ge a khoen a ǃkharagagusa. ǀNî khoen ge ǃhaese ra ǃgâi. Xawe i ge ǀnîn ǃaroma a tsûtsûsa ǁîn ge ǃgame hâ i khoe-i ǀkhan gere dī xū-en ga ǁî-i ǁōb khaoǃgâ a dī o. Khoen ra ǃoa ǀgaugu ge ra ǃkharagagu. ǂÂis ǃnâ da ge nî ūhâ Jehovab ge nē aiǂhanub ǃgâsana ǁkhaeǂgaos diba ge mā da. w19.06 24 ¶16

Sida sîsenni ga mâǃoa-e ǁaeb ǃnâ da ge nî ǂan mâǁaeb ai da nî ‘ǃnōsa.’ (Aoǁn. 3:7) Sida ǃgâsan ǀondi, ǃoabas ǃgao da ra ǀhao ǃkhaidi, aoǁnâ sîsen-e da ra dī ǀgaub tsî gagasi ǂû-e da ra hō ǀgaub tsîna da ge nî ǁkhauba. Nē ǃnāsa ǃgāsasiba da ge ǂhanub, sida ǀhōsan tsî ǀnî hâ khoen tsîna mîba tide. Tā ǂkhari ǃgomsina mā-am re în ǀgorasa sada ǁaegu hao-ū. ǁGâuab ge a ǂan ǀgorasa oms a mâhō ǁoa ǃkhaisa. (Mrk. 3:24, 25) ǁÎb ge hoaǁae ǃgomsina sada ǁaegu nî ǃaroma. Nē ǀgaub ǃnâb ge ra ǂgao î da sida ǁaegu ǃkham tsî tā ǁîb ǃoagu ǃkham. ǃGarise da ga ǁgūtsâ o sida ǃgâsan ǀkha da ūhâ ǁnâusāgude sîsenǂamsa, o da ge ǀgorasa ūhâ tide.—Kol. 3:13, 14. w19.07 11-12 ¶14-16

Khoen ge sida haisi-amsa ǃgâise ra ūǃoa, tae-e da ra mîs ǃgaos ose xawe mati da nē xūna ra mî ǀgaub xa. ǁÎn ge a ǃgâibahe sida ga khoexaǃnâsib, ǃgaoǃgâxasib tsî ǁîn ǃnâ ama ǃgâiǃgâibasensa ǁgau o. ǁÎna da ge ǁgari tama hâ în sida ra mî xū-e ǃgâ. Xawe da ge ǁîn ǂgomdi xa ūhâ ǂâiǀgauba ra ǁnâuǃā. Mâ mâsib hoab ǃnâ da ge ra dītsâ ǁîn tsâsiga ǁnâuǃāsa. Paulub ge Jodeǁîn ǀkhab gere ǃhoa o, o xoade gere sîsen-ū. Grikegowaba ra ǃhoa ôaǃnâ-aogu ǀkhab gere ǃhoa o Areopagus tawa, ob ge ge mî tama hâ i Elobmîsa xub ge ra ǃhoa di. (ǃNǃkh. 17:2, 3, 22-31) Mati da Paulub aiǁgausa nî sao? Khoe-i hîna Elobmîsa ūǃoa tama hâ i ǀkha da ga ǀhao o, o da ge Elobmîsa sîsen-ū tide ǁîn ǀkha da ga ǃhoa o. Khoe-i ga Elobmîsa i ra khomai hîna mûhesa tao o, o da ge xoade ǀnî hâ ǀgaub ǃnâ a ǁgau ǁkhā, aiǁgause ǀnîsi ǁâǁawab ǃnâ-ū. w19.07 21 ¶5-6

ǁGâuab ge gā-ai ǀgaub ǃnâ Israelǁîna ge ǂgaeǂhapu ǁgôatsuiǁgoaǃoabas ǃnâ-ū. ǁÎb ge ǁîn ǂû-e ǂhâ hâsa ge ǂan i tsî nēsa ge sîsen-ū. Israelǁîn ge mîmâisa ǃhūb ǃnâ a ǂgâ o, on ge ǀasa ǀgaub ǂûna ǃhanas diba ge ǁkhāǁkhāsen. Egipteb ǃnân hâ hînan ge Israelǁîna Nylǃāb di ǁgammi ǀkha gere ǃhana. Xawe ǂgārib ge mîmâisa ǃhūb ǃnâ ǃāba xu ra hā ǁgammi ǀkha ge dī-e tama hâ i xawe ǀnanus ǁgammi ǀkha gere dī-e. (Deu. 11:10-15; Jes. 18:4, 5) ǁNās ǃaroman ge Israelǁîna ǀasa ǀgaub ǃhanas diba ge ǁkhāǁkhāsen. Jehovaba tae-i ǃaroma ǁgôatsuiǁgoaǃoabasa ge ǃkhâikhom, ǀasa ǀgaub ǃhanas dib xab ra ǃhoa hîna? Jehovab ge ge ǂan i, Israelǁîn nî ǃâitsâhe ǃkhaisa ǀasa ǀgaub ǂgārib diba ǁîn ǂnāmipe ge hâ i khoena xu ǁkhāǁkhāsensa. ǁÎn ǂnāmipe ge hâ i khoen ge ǂansa ǂgārib xa ge ūhâ i tsîn ge Elob khoena ǁîna xu ǂhâǂhâsa xūna ge ǁkhāǁkhāsen xawe i ge ǁkhōǁkhōsasiba ge hâ i. Kanaanǁî ǂgāri-aon ǂâiǀgaub ge ǁîn ǂgoms Baali ǃnân ge ūhâ is xa gere tsâǀkhāhe.—Num. 25:3, 5; ǂHǂh. 2:13; 1Gao. 18:18. w19.06 3 ¶4-6

Apostel Paulub, Silab, Lukab tsî Timoteub tsîn ge Filipis ǃnâ sī o, on ge ǂgui khoena Gaosib ǃgâiǂhôas ǃnâ ǃgâiǃgâibasensa ge ūhâ i. Nē haka ǃgâsagu ge ǀhaohâba ge omkhâi tsîn ge hoa ǁkhāǁkhāsabena Lydia di ǀon hâ ǃhaokhoe ǃkhōǃoaxa khoes oms tawa ge ǀhao tsoatsoa. (ǃNǃkh. 16:40) Nē ǀhaohâb ge ǀgūǁae ǃgomsina ge hōǃâ tsoatsoa. ǁGâuab ge ge dī în amaba ǃhui hâ khoena nē Xristeǁîn aoǁnâ sîsen i ǃoa ai ǃkham. Paulub tsî Silab tsîkha ge ǂnau-e tsî ǃkhōsis ǃnâ ge ūhe. ǃKhōsisa xu kha ge ǃnora kaihe o, okha ge nē ǀasa ǁkhāǁkhāsabena sari tsî gere ǂkhâǃnâ. ǁNās khaoǃgâ gu ge Paulub, Silab tsî Timoteub tsîna ǃāsa xu ge ī tsîb ge Lukaba ǁnāba ǀnîsi ge hâ. Nē ǀasa ǃgâsana tae-e ge dī? Jehovab huib ǀkhan ge ge aiǃgû ǁîba ǁkhoaǂgaosib ǀkha ǃoabasa. (Fil. 2:12) Paulub ge ǃaroma-e ge ūhâ i ǁîn xa ǃgâise tsâsa. w19.08 8 ¶1-2

Doe tsâ du hâ? ǀNî hâ ǃāsa ǃoa da ga doe o, o da ge ǂgui mari-e a sîsen-ū ǁkhā tsîs ge nēsa a ǃaroma ǁkhā i da surudegu ǃnâ ǂgāsen. Surudega xū da ga ǂgōsen ǂgao o, o da ge tā mari-e ǂgan tsî ǂhâbasa tama hâ xūna nî ǁama. (ǂKhm. 22:3) Kaise i ge a ǃgom ǁkhā ǂanǂuisa matikō mari-e da nî sîsen-ūsa ǀaesen hâ ǀaokhoe-e da ga kōǃgâ o. Nēti i mâsigu ǃnâ du ga hâ o, o ‘ǀgore tsî ǀkhoma’ re îb Jehovaba gā-aisiba mā du ǃgâi mîmâiga dīs ǃaroma. Sadu di ǀgorede ǃereams ǃnâb ge Jehovaba “sadu ǂgaogu tsî ǂâidi tsîna” nî sâu tsî nî hui du ǃgâi mîǁguiga dīs ǃnâ. (Fil. 4:6, 7; 1Pet. 5:7) ǃGâi ǀhōsaguside ūhâ re. Sa ǀhōsan ǀkha sa tsâsigu tsî ǃgomsin xa ǃhoa re ǃgōsase ǁnān hîna ǁkhā mâsigu ǃnâ ge hâ în ǀkha. Nēsa da ga dī o, o da ge ǃgâise a tsâ ǁkhā. (Aoǁn. 4:9, 10) Sadu ǂguro ǁgaumâidi ǃnâ du ge dī ǀhōsan ge hoaǁae nî sadu ǀhōsa i. w19.08 22 ¶9-10

Jehovaba tae-i ǃaroma ǁîb di ǀuniga toroba Megidos ǀkha ge ǃgaeǀhaoba? Elobmîs ǁaeb ǃnâ i ge ǂgui toroga Megidos tsî Jesreels ǀgūses tsîna gere ǃkham-e. ǀNî ǁaegu aib ge Jehovaba ǁîb khoena gere hui nē toroga ǃkhams ǀkha. Aiǁgause, “Megidos di ǁgamgu” tawab ge Eloba Israelǁî ǂhanuǂhanu-aob Baraka ge hui îb Kanaanǁî toro ǃkham-aob Siseraba ǃkham ǃoa ǁkhā ga. Baraki tsî Deboras tsîn ge Jehovaba ge gangan. Tsî ge xoa: ‘ǀHomma xu di ge ge ǃkham, ǀgamirode. . . . Siserab ǃoagu ge ǃkham. . . . Nētin ge sa khākhoen hoana nîra ǀkhai, Jehovatse, Xawe ǁîba ǀnam hân, ǁîn ge sores ra ǀgaib âs ǃnâ ǁhai khami nîra ī.’ (ǂHǂh. 5:19-21, 31) Armagedons tawan ge Elob di khākhoena nî hîgāgāhe xawe ǁnān hîna Eloba ǀnam hân ge nî sâu-e. Xawe ǀgui ǂhâǂhâsa xū-i ge nē ǀgam torokha ǁaegu nî ǀkhara. Armagedons tawan ge Elob khoena ǃkham tide. ǁÎn ge ǃkham-ū xūn tsîna ūhâ tide. ǁÎn di ǀgaib ge “ǃnōsase hâs” tsî Jehovab tsî ǁîb di ǀhomsi toro ǃkham-aon ai ǂgomaiǂnûisa xu nî hâ.—Jes. 30:15; J.ǂHa. 19:11-15. w19.09 9 ¶4-5

ǀGui ǀgaub Jesuba ǃoa da a ‘ǀgū’ ǁkhāb ge ǁîb gere mî tsî dī xūna ǁkhāǁkhāsens ǃnâ-ū. (Luk. 1:1-4) Elobmîs tae-e Jesub xa ra mîba da ǃkhaisa da ge aitsama nî ôaǃnâ. Jesuba ǃoas tsîna da ge ra ‘ǀgū’ ǁāǁnâhesa da ga mîǁgui tsî Xristub di ǁkhāǁkhāsabe kai o. ǀNîhâ ǀgaub Jesuba ǃoa da ra ‘ǀgūb’ ge ǀhaohâb ǃûi-aoga ǃoa da ga ī o huiba da ga ǂhâ ǁaeb ai. Jesub ge “khoena māde ge mā” nē aogu ǃnâ-ū îgu ǁîb gūna kōǃgâ. (Efe. 4:7, 8, 11; Jhn. 21:16; 1Pet. 5:1-3) Sida ge ǂgurose nî ǁgūtsâ ǁîgu huiba ǂgansa. Tā da ge nî ǂâi ǀhaohâb ǃûi-aogu sida ra ǂâi xūn tsî sida ǂhâsigu tsîna a ǂan ǃkhaisa. Julian di ǀon hâ ǃgâsab ge ra mî: “Xawe ta ge ega huiba ge ǂgan tsî i ge nē sarisa kaise ge ǂoaǂamsa ǀkhae i hîna ta ge hōba.” ǂGomǂgomsa ǀhaohâb ǃûi-aogu Juliana ge sari hâ îgu khami īgu ge nî huida i da ‘Xristub ǂâisa ǂan’ tsî ǁîb khami ǂâi tsî tanisen tsoatsoa. (1Kor. 2:16; 1Pet. 2:21) Nē ǀgaub ǃnâ gu ga huida o, ob ge nēba kaise ǂoaǂamsa ǀkhae hîna gu ra mā daba. w19.09 21 ¶4-5

Xoadi ǃnâ da ge ǂgomǂgomsa aogu tsî taradi tsîn xa ra khomai hîna ǃanu gagab xa gere daoǁgau-ena xawe ge ǁîna 144 000 ǃgâsan di ǃâ tama hâna. Johaneb ǁĀǁnâ-aob di aiǁgaus ge a ǀgui. (Mat. 11:11) Davib dis ge a ǀnî. (ǃNǃkh. 2:34) ǁÎkha tsî ǀnî hâ ǂguin tsîn ge paradais ǃhūbaib ai khâisa nî hō. ǁÎn tsî kai ǂnubis khoen hoan tsîn ge aiǂhanuba nî ūhâ ǂgomǃgâsiba Jehovab ǂgaeǂguis ǃoa-ai ǁgaus diba. Nēs ge a ǂguro ǃnā hînab Eloba ǀguiǃnâxasib ǃnâ hoa ǃhaode xū khoena ǀhaoǀhao hâsa. Nēsi da ga ǀhommi tamas ka io ǃhūbaib ǃâubasensa ūhâ xawe da ge hoa da ǂgui khoena ra hui ǂgao în ‘nau gūn’ di ǃâ kai. ǀGūǁaeb ge Jehovaba kai ǁgâiǀāb hînab ge mîmâiba nî hau ǂhanugu tsî ama tama ǂgomdi hîna khoena kai ǃgomsiba ra ǃaromabade hîgāgās ǃaroma. ǂOaǂamsa aiǂhanub ge kai ǂnubis di khoena ǃâu hâ Jehovaba ǀamose ǃhūbaib ai ǃoabas diba.—J.ǂHa. 7:14. w19.09 31 ¶18-19

Satanni ǃhūbaib di ǀams ra ǀgū khami da ge nî ǃâubasen sida ǂgomǂgomsasib Jehovab tsî ǁîb di Gaosib ǃoa-ai nî ǃâitsâhe ǃkhaisa. Khoen ge nî aiǃgû saoǃgon das ǃnâ. Nēs ge Satanni ǃhūbaib di ǃâ tama da hâ amaga nî ī. Sida ǂgomǂgomsasiba da ge nēsi nî ǀgaiǀgai i da kai ǁgâiǀāb ǁaeb ǃnâs tsîna ǂgomǂgomsase hâ ǁkhā. Kai ǁgâiǀāb ǁaeb ǃnâ i ge ǃhūbaib ai ra ǂgaeǂgui ǃgâsagu xa ǀkharaǀkhara-e nî hâ. ǂKhauhesan hîna noxoba ǃhūbaib ai ǃgau hân ge nî ǀhaoǀhaohe în ǀhommi ǃnâ sī Armagedons toroba ǃkhams ǃnâ ǁhao. (Mat. 24:31; J.ǂHa. 2:26, 27) Nēs ge ra ǂâibasen ǂGaeǂguira soros ge sida ǀkha ǃhūbaib ai hâ tide di. Xawen ge kai ǂnubis ǃgâsana noxoba ǂhanu ǀgaub ǃnâ nî aiǃgû. ǂAnsa ūhâ ǃgâsagu ge kai ǂnubis khoena nî ǂgaeǂgui. Jehovab ǃoagu da a ǂgomǂgomsasa da ge nî ǁgau nē ǃgâsaga da ga ǂkhâǃnâ tsî ǁîgu Eloba xu ra hō daoǁgaude sao o. Sâuhe ǂgao da ga o, o da ge ǁîgu di daoǁgaude nî sao. w19.10 17 ¶13-14

Naomis ge ge ǂgomǂgomsa tara-i hîna ge Jehovaba ǀnam isa. Xawes ge ǁîs aob tsî ǀgam ǀgôakha ǁōb khaoǃgâ ǁîs ǀonsa Naomisa xu Maras ǀkha gere dawa ǂgao hîna ‘au’ ti ra ǂâibasensa. (Rut. 1:3, 5, 20, 21) Naomis di ǀui ǀgôas Ruts ge ǁîs ǀkha ǁîs ǃgomsin hoan ǃnâ ge hâ. Ruts ge ǃgâi huib ǀguiba ge māsi tama hâ i xawe gere tsâbaǁhaosi. Ruts ge ǁîs ǀnammi tsî huib tsîna ǃgâi ǀgaub ǃnâ gere ǁgau. Sada gagasi omaris khoe-i ga ǁî-i di ǃgame khoe-e ǁōb ǃnâ a ǂoa ǃnâ o, o i ge sada di ǂkhâǃnâsa ǂhâ hâ. ǃGamme hâ khoen ge ǀgam haira hîna ǀguiba kai ǁae hâra ase a mûhe ǁkhā. Tsî kurin da ī khami ra ge haira di ǃnomaga ra ǃgaesen. ǀGui hais ga ǃhomǂui-e tsî ǁō o, os ge nēsa nau haisa a tsâǀkhā ǁkhā. ǁKhā ǀgaub ǃnâ i ga ǃgame hâ khoe-e ǁî-i ǃgame khoe-e ǁōb ǃnâ ǂoaǃnâ o, o i ge kai tsûaǂgaoba a hōǃâ ǁkhā. w19.06 23 ¶12-13

ǂAnbasen da ge nî tae-e da ǁkhoaxa ǁaeba ūhâs ǃnâ ra dīsa tsî matikō ǁaeba da nēs ai ra ǂkhôasa. ǂAn tama da ga ra io, o da ge ǃnāsa ǁaeba ǁkhoaxa ǁaeba ūhâs ai nî ǂkhôa Jehovaba ǃoabas ais ose. ǂGurose da ge matikō ǁaeba da ǁkhoaxa ǁaeba ūhâs ai ra ǂkhôasa nî ǂanǂûi. Tae-i ǃaroma da nēsa wekheba dītsâ tama hâba? Kalenders ai xoa re matikō ǁaeba du ai-īsiǂhôaǂgaresa ra kōs, internets ai xūna ra kōs tsî gamena ǁâǁawab ai ra ǀhurusa. ǃNāsa ǁaeba du ga nē xūn ai ǂkhôa o, o ǀkharaǀkhara-e dī re. ǁAeba ǁamaǂûi re i ǂhâǂhâsa xūna ǂgurose dī tsî ǁnās khaoǃgâ ǁkhoaxa ǁaeba ūhâ. Sao rase Jehovaba ǂgan re îb hui du i du mîǁgui du hâ xū-e dī ǁkhā. ǁNā ǀgaub ǃnâ du ge ǁaeb tsî ǁkhāsib tsîna nî ūhâ Elobmîsa ôaǃnâs, omaris ǃoabasa dīs, ǀhaodi ǃgao aiǂhomisen tsî ǀhaode ǃoa īs tsî aoǁnâ sîsen-e dīs tsîna. Nēs tsîn ge a dī ǁkhā i du ǁkhoaxa ǁaeba ǀnōsa ǀgaub ǃnâ mû Jehovaba du ǂgurose ra mâi amaga. w19.10 30 ¶14, 16; 31 ¶17

55ǁÎ kurib ǃnân ge Korinteǁîna ǂhâǂhâsa mîmâisa ge dī. ǁÎn ge ge ǁnâu ǃgâsan hîna Jerusalems tsî Judeas ǃnâ hân ǃgoma ra tsâsa tsîn ge ge mîmâi nē ǃgâsana huisa. (1Kor. 16:1; 2Kor. 8:6) ǀOro ǁkhâga ǃkharu tsîn ge korinteǁîna mān nî din ge mî marisi huiba ge mā tama hâ i. Nēs xa ǃaroma-e hâsen ge ǁîn di marisi huiba nau ǃgâsan dib ǀkha ǀhaoǀhaohe tsî Jerusalems ǀhaohâba ǃoa ge sîhe ǁoa i. (2Kor. 9:4, 5) Korinteǁîn ge ǃgâi mîmâisa ge dī tsîb ge Pauluba ǁîn di ǂgoms tsî māxasib amsi ge koa nî. Xaweb ge mîn ge mîmâisa dīǀoaǀoas amsis tsîna nî ǂkhâǃnânise ge īs ge. (2Kor. 8:7, 10, 11) Nē aiǁgaus ge ra ǁgau da ǂgomǂgomsa Xristeǁîn tsîn ǃgomsiba a hōǃâ ǁkhāsa ǁîn mîmâide dīǀoaǀoas ǃnâ. Tae-i ǃaroma? ǀOasa kurusa da ūhâ tama hâ ǃkhais ǃaroma da ge a mâiǂui ǁkhā. Tamas ka io i ge ǃâubasen tama da hâ xūna a ǁkhae da ǁkhā sada di mîǁguiga dīǀoaǀoas ǃnâ.—Aoǁn. 9:11. w19.11 26-27 ¶3-5

Î, sadu ge nēsa ūhâ. Khōsikhōs sorosa ra ǁkhauba khamis ge ǂgomsa sadu tsîna nē ǃhūbaib di ǁgauoǃnâ, ǂkhabaxa tsî Elob ǂâi ǀgaub ǀkha ǃgûǀhao tama xūn hoana xu ra ǁkhauba. Xristeǁî da ase da ge gagasi ǃkhams ǃnâ hâ tsî nē ǃkhams ge demonga ǃkhōǂgā hâ. (Efe. 6:10-12) Mati da a ǂan ǁkhā sada ǂgoms a ǀgaisa ǃkhaisa ǃâitsâhe da ga o? ǂGuro da ge Eloba ǃoa nî ǀgore hui-es ǃaroma. ǁNāpaxū da ge Elobmîsa nî sîsen-ū Elob ra mû da khami mûsens ǃaroma. (Heb. 4:12) Elobmîs ge ra mî: ‘ǂGomaiǂnûi Jehovab ai sa ǂgaob hoab ǀkha, îts tā sa ǁnâuǃāb ai ǂgomǃgâ.’ (ǂKhm. 3:5, 6) Tae-e ǂâis ǃnâ ūhâse da dī da ge mîǁguigu xa nî ǂâiǃgâ? Aiǁgause mari ǃgomsina du gere hōǃâ? Jehovab mîmâis hîna Hebreǁîn 13:5 ǃnâ hâs xa du ge ǂâi: “Tita ge ǁnāxū tsi tide, tsî ta satsa xu ūdawasen tide” di hâs xa. Nē mîmâisa Jehovab nî huidu ǃkhaisa ge ǂgom kai du? Nēs ga ama o, o du ge sadu di gagasi khōsikhōsa ǃgâi mâsib ǃnâ ra ūhâ. w19.11 14 ¶1, 4

ǀGôa-i ge ǂgui ǁaeb tsî ǀgaib tsîna mâ ǁgû i hoa-e xu ra ǂgaoǀkhā. ǁNās ǀkhan ge ǃgamme hâ khoena ǃnubu ǁaerob ǃnân ga ǀgôana hō o, o ǃgomsiba ra hōǃâ mâ ǀgôa-i hoa-e kōǃgâsa. ǀNî ǃgamme hâ khoen hîna ǂgui ǂkham ǀgôana ūhân ge ra mî ǁîn ge kaise gere ǂâiǂhansen di. ǁGûs ge ǀnîsi hoaǁae tsau hâse a tsâ ǁkhā. ǁÎs ge ǁnātikōse nî tsau ǁkhāsibas ūhâ tama nî īsa Elobmîsa ôaǃnâ, ǀgore tsî aoǁnâ sîsenni ǃnâ ǂoas diba. ǁÎs ge nî ǃgombahe i Xristeǁî ǀhaodi tawa ǃgaoǃgâxase ǃgâ tsî nē ǀhaode xu ǀamasa. ǀNamxaǃnâ aob ge hoa xūna nî dī ǁîb tarasa ǂkhâǃnâsa ǁîra ǀgôana ǀhaodi tsî oms tawas tsîna kōǃgâs ǃnâ-ū. Aiǁgauseb ge ǁîb tarasa a hui ǁkhā oms ai hâ sîsenna dīs ǃnâ-ū. ǃGariseb ge nî sîsen is hoa omarisa hoaǁae hâ omaris ǃoabasa xu ǀama. Tsî Xristeǁî ǁgûb ge ǁîb omaris ǀkha hoaǁae aoǁnâ sîsenni ǃnâ nî ǁhao. w19.12 24 ¶8

Israelǁîna mati dâkurib ǁaxasiba xu gere ǀama? ǂÂi re Israelǁî-i ga ǀnîsis ǂgui surudeba dī o tsî nēs ǃgao ǁî-i ūhâ xūn hoana ǁamaxū o nē surudeba matares ǃaroma. Dâkurib ǁaxasib tawa i ge ǁî-i ge mā xūn hoana nî mā-oa-es ge ge ī. ǁNās ǀkhab ge aoba ǁîb ‘xūna ǃoa gere oa’ tsî i ge ǁîb ǀgôana nē xūna ge ǀumi ǁkhā i. Aob hîna ge ǂgui surudeba ūhâ îb ge ǁîb tamas ka io ǁîb ǀgôa-e gere ǁamaxū ǃgā-i ase îb, nē surudeba matare ǁkhā. Dâkurib ǁaxasib ǃnâ i ge nē ǃgā-e ǁî-i “omarisa ǃoa gere oa.” (Lev. 25:10) Khoe-i ge ǁî-i ûib hoaba ǃgāse ge hâ tama hâ i ǃâubasen i ose. ǁNās xoǀkhāb ge Jehovaba ge mî: “Nēs ǀguis ǂama, ǀkhope-ao-i xare-i sadu ǃnâ hâ tidega: ǃKhūb ge ǃnāǂamsase nîra ǀkhae tsi xui-ao ǁnā ǃhūb, ǃKhūb sa Elob ǀumise nîra mā tsib ǃnâ, ǀumisets nî ǁîba ūhâga.” (Deu. 15:4) Nēs ge nētsē ǃhūbaib ǃnâ ra ī xūna xu ra ǀkhara, ǃkhū hân ge ǃnāsase ra ǃkhū tsî ǀgâsan ge ǀgâs ǀguisa ra hî. w19.12 8-9 ¶3-4

ǃÂitsâheb gere o, ob ge Jesuba “ǃgari ǃaus tsî ǁgamron ǀkha” gere ǀgore. (Heb. 5:7) ǁÎb ǀgoredi ge gere ǁgau Jehovab ǃoagub a ǂgomǂgomsa ǃkhaisa tsî gere dī îb Jehovaba ǁnâuǀnam ǀgara. Jehovab ǃgao i ge Jesub di ǀgorede ǃgâihamxū-i khami ge ī i. Jesub ûib hoab ge Jehovaba gere ǃgâiaǂgao kai tsî ǁîb ǂgaeǂguis a ǂhanu ǃkhaisa gere ǁgau. Jesuba da ge ǁgae ǁkhā sida ǁkhāsib hoab ǃnâ hâna dī tsî Jehovaba ǁnâuǀnam tsî ǁîb ǃoagu ǂgomǂgomsase hâs ǃnâ-ū. ǃÂitsâhe da ga o, o da ge Jehovaba ǃoa nî ǀgore ǁîb huib ǃaroma ǁîba da ra ǃgâiaǂgao kai amaga. ǂAnǃgâ da ge nî Jehovab ge sida ǀgorede ūǃoa tide ǁîb ǃhui hâ xūna da ga dī o. Xawe da ga Jehovab ǁgaragu ǃoagu ûi o, o da ge ǂgomǃgâsiba nî ūhâ sida ǀgoredi ǃgâihamxū-i khami Jehovab ǃoagu īsa. Tsî da ge ǂgomǃgâsib tsîna nî ūhâ sida ǂhauǃnâsib tsî ǂgomǂgomsasib tsîn sida ǀhomsi ǁGûba ra ǃgâiaǂgao kai ǃkhaisa. w19.11 21-22 ¶7-8

1919ǁÎ kurib ǃnâb ge Jesuba ǂkhari ǂnubis ǂkhauhesa ǃgâsaga “ǂgomǂgomsa tsî gā-ai ǃgāb” ase ge ǁgaumâi. Nē ǃgāb ge aoǁnâ sîsenni ǃnâ ǂgaeǂguisa ra ū tsî Xristub saosabena ‘ǁîn ǂû-e ǁaeb ai’ ra mā. Satanni tsî ǁîb ǂkhâǃnâ-aon tsîn ge nē ǃgāb di sîsen-e ra ǀam kai ǂgao. Nē ǃgāb ga Jehovab di huiba ūhâ tama hâ o, o i ge nē sîsen-e ga ī tama hâ. ǀGam torokha ge ge hâ i tsî ǃhūbaib ǂhawase i ge mari ǃgomsiga hâ. Elob khoen tsîn ge ra mâǃoahe xaweb ge ‘ǂgomǂgomsa tsî gā-ai ǃgāba’ Xristub saosaben hîna ǃhūbaib ai hâna noxoba gagasise ra ǂûmâ. Gagasi ǂû-i hîna da nētsē marioǃnâse ra hō i xa ǂâi re, 900 xa ǃnāsa gowagu ǃnâ. Nēs ge ra ǁgau Elob ǁîb ǃgāba ra ǂkhâǃnâ ǃkhaisa. Aoǁnâ sîsenni ge a ǀnî hâ ǀkhae hîna Jehovaba xu ra hā-e. ǃGâiǂhôas ge amabes ǃnâ ‘ǃhūbaib hoab ai ra aoǁnâhe.’—Mat. 24:14. w19.11 24 ¶15-16

ǂÂis ǃnâ ūhâ re ǀgapi pristeri ge aibe ǃgâihamxūna nî khaus ge ge ī ǁguibasab nî dīs aiǃâ. ǃGâihamxūna ǂgurose khaus ǃnâ-ūb ge gere dī îb Jehovaba ǁîb di ǁguibasa ūǃoa. ǃHūbaib aib hâ hînab ge Jesuba khoesib di ûiga sâus xa ǂhâǂhâsa xū-e nî dīs ge ge ī, nēsab ge ǁîb ûibab ǁguibas ase nî mās aiǃâ nî dīs ge ge ī. Tae-eb nî dīsa ge ī? ǃHūbaib aib hâ hînab ge ǂgomǂgomsase Jehovaba nî ǁnâuǀnams ge ge i îb Jehovaba ǁîb di ǁguibasa ūǃoa ǁkhā. ǁNā ǀgaub ǃnâb ge Jesuba gere ǁgau Jehovab ǀgaub ai xūna dīs a ǂhanu ǀgausa ûis ǃaroma. Jesub ge ǁîb ǁGûb ǂgaeǂguis a ǂhanusa gere ǁgau. ǃHūbaib aib ge hâ i o, ob ge Jesuba hoaǁae Jehovaba gere ǁnâuǀnam. ǃÂitsâ-i tamas ga i o ǃgomsi-i ge Jesub di ǂgomsa ge ǂkhabuǂkhabu tama hâ-i, îb ǁÎb ǁGûb ǂgaeǂguisa ǂkhâǃnâ ǀû.—Fil. 2:8. w19.11 21 ¶6-7

Jesub di ǃgomǀgausa ǁaegu hoagu ǃnâgu ge ǁîb ǂgomǂgomsa apostelga ǁîb ǀhōsagu ase ge ī i. (ǂKhm. 18:24) Jesub ge nē ǀhōsaga gere ǃgôaǃgâ. ǃHūbaib aib ge hâ io, o i ge ǁîb omaris ǃgâsana ǁîb ǃnâ ge ǂgom tama hâ i. (Jhn. 7:3-5) ǁAe i ǃnân ge ǁîb ǀgūkhoen tsîna gere ǂâi ǃkhaub hâ di. (Mrk. 3:21) Nēs ǃaromab ge Jesuba ǁîb apostelgu xa ge nētsēs xoas ǃnâ hâ mîde ge mî ǁkhā i. ǁAen ai gu ge apostelga Jesuba gere tsûtsû xaweb ge ǁîgu ǃnubusiga kō ǃkharu tsî ǁîgu ǂgomǂgomsasiba gere mû. (Mat. 26:40; Mrk. 10:13, 14; Jhn. 6:66-69) ǁÎb di ǀuniga ǃui ǀgoraǃgâheb nîs aiǃâb ge Jesuba nē ǂgomǂgomsa khoegu ǃoa ge mî: “Xawe ta ge sago “khoego” ti ge ǂgai, ti Îba xu ta ge ǁnâun hoana ta ge sago ge ǂanǂan xui-ao.” (Jhn. 15:15) Jesub di ǀhōsagu ge amabes ǃnâ ǂkhâǃnâs ase ǁîb ǃoa-ai ge ī i. w19.04 11 ¶11-12

Xawe khoe-e mati a ǂan ǀhommi di ǃâubasensa i ūhâ ǃkhaisa? Nēsa da ge ǃgāsase apostel Paulub mîdi Romes ǃnâ ge hâ i ǂkhauhesan “ǃanudo” di ge ǂgaihen didi ǃnâ-ū ra mû. Nētsēs xoas ǀkha ra ǃgûǀhaose i ge ra mî: “ǃGāsis di gagasa du ǃkhōǃoa tama hâ xui-ao, ǁkhawa du nî ǃaose; xawe du ge ǀgôasis di Gagaba ge ǃkhōǃoa, ǁîb ǃnâ du Abba, ti Îtse, ti ra ǂgaiba.” (Rom. 1:7; 8:15) ǃAnu gagab ǃnā-ūb ge Eloba ǂkhauhesana ra ǃgāsaba kai ǀhommi di ǃâubasensan ūhâ ǃkhaisa. (1Tes. 2:12) Jehovab ge ǁnān hîna ǀhommi ǃnâ sī ǂgaeǂguis di ǃâubasensa ūhâna ǁîn di ǂâidi tsî ǂgaogu tsîn ǃnâ ǂgomoǃnâsiba mā tama hâ. (1Jhn. 2:20, 27) ǂKhauhesa Xristeǁîn ge khoe-i xa ǂkhauhen hâ ǃkhaisa mîbahesa ǂhâ tama hâ. w20.01 22 ¶7-8

“Xristub ǂhanub” ge ǂoaǂamsa ǃgaoǃgaoba ūhâ, nēb ge ǀnamma. (Gal. 6:2) Jesub ge dīb gere xūn hoan ǃnâ ǀnammi xa gere ǂkhâǃnâ-e. ǀKhomxaǂgaosib ge a ǀnammi di ǁgauǁgau. Jesub ge nēs xa tsâǀkhāhe hâse khoena gere ǁkhāǁkhā, ǀaesen hâna gere ǂgauǂgau, ǃâ hâna gere ǂûmā tsî ǁō hâna khâisa gere mā. (Mat. 14:14; 15:32-38; Mrk. 6:34; Luk. 7:11-15) Jesub ge māsenxase nau khoen ǂhâsiga ǂgurose gere mâi. ǃGōsaseb ge kai ǀnamma ge ǁgau, ǁîb ûibab ge khoen ǃaroma a mā o. Jesuba da ge a ǁgae ǁkhā nau khoen ǂhâsiga ǂgurose mâis ǃnâ-ū. ǁÎba da ge khoena ǀkhomxaǂgaosiba ǁgaus ǃnâ-ūs tsîna a ǁgae ǁkhā. Nē ǀkhomxaǂgaosib ga ǁgari da o ǃgâiǂhôasa aoǁnâ tsî ǁkhāǁkhāsa, o da ge Xristub ǂhanuba ra ǁnâuǀnam. w19.05 4 ¶8-10

Jesub ge khoena ǂgomdi ǂgaeǂgui-aogu khoena ra ǁkhāǁkhā ama tama ǁkhāǁkhāde xu ge ǃnora kai. ǂGui Jodeǁîn ge ǁnā ǁaeb ai gere ǁgari-e în khoesi ǁnaetigu tsî ama tama ǁkhāǁkhādi ǃnâs tsîna ǂgom. (Mat. 5:31-37; 15:1-11) Khoen hîna gere mîn nau khoenan ge ra hui în Eloba ǃoaba din ge ǁîna aitsama Eloba ǃgâi ǀgaub ǃnâ ge ǃoaba tama hâ i, nēs ǃgaon ge ge ǂgī hâ i. Mesiab tsî ǁîb gere ǁkhāǁkhā amab tsînan ge ūǃoa tama hâ i amagan ge Eloba ge ǂan tama hâ i tsîn ge ǂgī hâse ge hâhâ tsîn ge ǁîn ǁoren tsîna ge ǀûbahe tama hâ i. (Jhn. 9:1, 14-16, 35-41) Jesub ge amaba gere ǁkhāǁkhā tsî ǃgâi aiǁgausa a mā ǃkhais ǃgaob ge ǃgamǃgamsenxa khoena ge ǁgau matin ama tama ǁkhāǁkhāde xu nî ǃnora kaihesa. (Mrk. 1:22; 2:23–3:5) Jesub ge ge īǁkhā kai îb khoesiba ǃgāsisa xu ǃnora kaihe ǁkhā. Jesub xoremarib ǁguibas xa īǁkhā kaihe hâseb ge Eloba ǁnān hîna nē xoremaris ǃnâ ǂgom tsî nēsan ra ūǃoasa ra ǁgaun di ǁorena a ǀûba ǁkhā.—Heb. 10:12-18. w19.12 10 ¶8; 11 ¶10-11

Jehovab ge ǁîb di ǃanu gagab ǃnâ-ū hoa ǂkhauhesa Xristeǁîn hînab ge ǁhûina ǃgāsasiba ra mā. Nēs ǃnâ-ū i ge ǃanu gagaba mîmâis ase ra māhe hîna ǁîna ra ǁgauba ǀhommi ǃnân hānîǁaeb ǃnâ sī nî hâsa ǃhūbaib ais ose. (2Kor. 1:21, 22) Xristeǁî-i ga ǂkhauhe o, o i nēsa ra ǂâibasen ǁî-i ge amabes ǃnâ ǀhomma ǃoa nî ī di? Hî-i. ǁÎ-i ge ǂgomǃgâsiba ūhâ ǀhomma ǃoa īs ǃgao i ǁhûi-e hâ ǃkhaisa. Xawe i ge sao ra-e ǂâis ǃnâ nî ūhâ: “ǁNā-amaga, ǃgâsado, ǁnās ǃgâ-ai ôasa, sadu di ǂgaihes tsî ǃkhōǂuibasenhesa du nî ǁapoǁaposa; nēna du ga dīo, o du kom tātsē ǃnôa tideo.” (2Pet. 1:10) ǁNās ǀkha i ge ǂkhauhesa Xristeǁî-e ǀhomma ǃoa īs ǃgao i ga ǂgaihe tsî ǂgomǂgomsase i ga hâ o ǀgui nē ǃâubasensa nî ǃkhōǃoa.—Fil. 3:12-14; Heb. 3:1; J.ǂHa. 2:10. w20.01 21-22 ¶5-6

Tae-i ǃaromagu ge Jobi di ǃnona ǀhōga ǀnamxaǃnâ ǀgaub ǃnâ hâ-ū bi tama hâ i, ǁîgu ge hoa amaba ge ūhâ tama hâ i. Nēs xa ǃaroma-e hâse gu ge Joba ǃgâi tama ǀgaub ǃnâ gere ǀgoraǃgâ. Mati da a ǂgōsen ǁkhā nē ǃnôa ǀgauba xu? ǂÂis ǃnâ ūhâ re Jehovab ǀguib hoa amaba khoen xa a ǂansa. ǃGomsiba ra tsâ khoe-i ra mî xūna ǃgâise ǃgâ re. ǁÎ-i mîdi ǀguide tā ǁnâu re xawe ǁî-i tsûba hōǃâ re. Nēsa da ga dī o, o ǀgui da ge ama tsâbaǁhaoxasiba sada ǃgâsana a ǁgau ǁkhā. Tsâbaǁhaoxasib ge nî huida î da tā ama tama hâ xūna nau ǃgâsan ra hōǃâ ǃgomsin xa ǃhoa mâ. ǃGâi tama ǂhôana ǃhoa mâs ge ǀhaohâba omkhâi tama hâ xawe ra khôaǁnâ. (ǂKhm. 20:19; Rom. 14:19) Nēs ge ǃgâi tama hâ tsî ǃgomi ǃnâ ra ǃkharu khoe-e a khôaǁnâ ǁkhā. (Efe. 4:31, 32) Xawe i ge kaise nî ǃgâi khoe-i di ǃgâi ǀgauga ǃoa da ga kō tsî ǀgauna a ôa o ǁî-e huis dina. w19.06 21-22 ¶8-9