Aprili

Aristarxub Masedoniaǁî Xristeǁîb Tesalonikas tib ge ǂgomǂgomsa ǂhauǃnâsiba apostel Paulub ǃoa-ai gere ǁgau. ǂGuro ǃnās hîna da Aristarxub xa ra khomais ge Paulub ge ǃnonaǁî ǃnāsa Efesus ǃoa sîsabeb ase a oasī o. Paulub ǀkhab hâ hînab ge Aristarxuba ǃkhōsis ǃnâ ge a ūhe. (ǃNǃkh. 19:29) ǃNora kaiheb ge o, ob ge ǁîb di ǃnorasasib xa ge ǂâi tama hâ i xawe Paulub ǀkha ǂgomǂgomsase ge a hâ. ǀOro ǁkhâga ǃkharu tsîb ge Aristarxuba Paulub ǀkha noxoba Grikeǁî ǃhūb ǃnâ ge hâ i Paulub noxoba gere mâǃoahe xawe. (ǃNǃkh. 20:2-4) 58ǁÎ kurib ǃnâb ge Pauluba Romesa ǃoa ǃkhōsis ǀkha sî-e ob ge Aristarxuba ǁîba nē daob ai ge sao tsîkha ge ǀguiba ǂgau khôas di mâsib tsîna ge ǃkharu ǃnâ. (ǃNǃkh. 27:1, 2, 41) Sīkha ges khaoǃgâb ge Paulub ǀkha ǃkhōsis ǃnâ Romes ǃnâ noxoba hâ i khami i ge ra ǁgausen. (Kol. 4:10) Nēs ǃaroma da ge buru tama hâ Paulub ge ǂkhâǃnâ-e hâse gere tsâ o nēti i ǃgâi ǀhōsa i xa. Aristarxub khami da ge ra ǂgomǂgomsa ǀhōsa ǂgao tsî sada ǃgâsana ra hâba ǂgao ǃgâi ǁaegu ǃnâs ǀguis ose xawe ‘ǂōǂōsib ǃnâs’ tsîna. w20.01 9 ¶4-5

ǂKhauhesa khoe-i ge nē ǀō-aisa aiǂhanuba i anu tama hâ khami a tsâ ǁkhā. ǁÎn ge tātsēs tsîna Jehovab ge ǁhûi nî ǃkhaisa ǂgomoǃnâ tama hâ. Kaisen ge ra ǃgâiaǂgao tsî ǀhommi ǃnâ sī ûis di ǃâubasensa ra ǃgôaǃgâ. (1Pet. 1:3, 4) Nēsa ra ǂâibasen ǂkhauhesan ge ra ǁō ǂgao di? Apostel Paulub ge nē dîsa ra ǃeream. ǁÎb ge ǁîn sorode tents ǀkha ra ǀgopeǀnō tsî ge mî: “Nē sorosi ommi ǃnâ da hâ hîa da ra ǀhâimâinǀom tsî da ǃgomǃgomhe hâ xui-ao; ǂgaeǂuiǀkhāhe tama i tsî ǂgaeǂgāhe ǂgao da ra amaga, ǁōsa-i nî ûib xa harahese.” (2Kor. 5:4) Nē Xristeǁîn ge ǃhūbaib ai ûisa ǀope tama hâ tsî nē ûib ǃhaese nî toas tsîna ǃâubasen tama. Xawen ge ûib ǃnâ ǃgâiǃgâibasensa ūhâ tsî mâ tsēs hoasa ra sîsen-ū Jehovaba ǁîn di omaris ǁanin tsî ǀhōsan tsîn ǀkha ǃoabasa. Tae-i ǀgui-en ga dī xawen ge ǀō-aisa ǃâubasens hînan hānîǁaeb ǃgao ūhâsa ǂâis ǃnâ ra ūhâ.—1Kor. 15:53; 2Pet. 1:4; 1Jhn. 3:2, 3. w20.01 23 ¶12-13

Sida ǀnamxaǃnâ ǀhomsi ǁGûb ge ǁkhāǁkhā das ǃgao ǂhâbasa i ga ra o, o ra ǁnama da. ǁÎb ge ǂgui ǀgaugu ǃnâ ra ǁnama da. Aiǁgause da ge ǀnîsi xū-e ǁîb Mîs ǃnâ khomai tamas ka io ǀhaos tawa ǁnâu tsî a ǁgari-e ǁkhā ǀkharaǀkharana dīsa. Tamas ka io da ge ǂhâ da hâ huiba ǀhaohâb ǃûi-aoga xu a hō ǁkhā. Jehovab ga mâ ǀgaub ǃnâ ǀgui ga ra ǁnama da xawe i ge ǁîb ǁnamasa hoaǁae ǀnammi ai a ǃgaoǃgaosa. (Jer. 30:11) Jehovab ge ǃgomsin ǃnâ mâǀgais ǀkha ra hui da. ǀNamxaǃnâ ǁgûb ǁîb ǀgôana ǃgomsin ǃnâ ra ǂkhâǃnâ khamib ge sida ǀhomsi ǁGûba ǃgom ǁaegu ǃnâ ra hui da. ǁÎb ǃanu gagab ǃnâ-ūb ge sida ǀhōsagusis ǁîb ǀkha da ūhâsa ra ǁkhauba. (Luk. 11:13) Jehovab ge ǂâiǂhansen da ga ǁaeb ǃnâs tsîna ra hui da. Aiǁgauseb ge ǂoaǂamsa ǃâubasensa ge mā da. ǁNā hānîǁaeb ǃâubasens ge ra hui da ǃgomsin ǃnâ mâǀgaisa. Sao ra i xa ǂâi re: Mâ ǁgai xū-i hoa-i hîna sada ǀkha ra ī-eb ge sada ǀnamxaǃnâ ǁGûba nî ūbē. Sada ǃgomsin ge hâhâ tide xawe Jehovab ra mā da ǀkhaegu ge nî hâhâ.—2Kor. 4:16-18. w20.02 5 ¶14-15

Surixasib ǃoa-ai da ūhâ ǃkhamsa da ge a dan ǁkhā. Joseb ǃgâsagu aiǁgaus xa ǁkhawa ǂâi re. ǂGui kurin ǃkharu hâse gu Joseba ǃgâi tamase hâ-ū hâ hîna gu ge Egipteb ǃnâ ge ǀhao-ū bi. ǁÎb a ham ǃkhaisab nî mîba gus aiǃâb ge Joseba aibe gere mû ǂgao ǁîb ǃgâsagu ge ǀkharaǀkharasensa. ǂÛǀhaos hîna gu ge ūhâ is, tawab ge Benjaminna ǃnāsa ǁaeba gere mā, nau ǃgâsagu ǁîb digu xa, îb ǁîgu tanisen ǀgauba mû ǁkhā. (Gen. 43:33, 34) Xawe gu ge ǁîb ǃgâsaga Benjaminna ge suri tama hâ i. Tsî ama ǂhansensiba ǁîgu ǃgâsab tsî ǁîgu ǁgûb Jakob tsîn ǃoa-ai gere ǁgau. (Gen. 44:30-34) Joseb ǃgâsagu ge surixa gagaba ǃaruǀî ūhâ tama hâ i amagab ge omaris ǃnâ ǂkhîba ge hā-i. (Gen. 45:4, 15) ǁKhā ǀgaub ǃnâ da ge sada tsîna ǂkhîba omaridi tsî ǀhaohâb ǃnâ a hā-ū ǁkhā surixasiba xu da ga ǂgōsen o. Jehovab ge ǂhaba hâ i da surixasiba ǃkhamǃoa tsî ǂkhîba omkhâi. Xawe da ga ǂâuxasib, tsâmtsiǃnâsib tsî ǃgôaǃgâsib tsîna omkhâi o, o da ge surixasiba ǃkhai-e mā tide. w20.02 19 ¶17-18

ǀGui ǀgaub Jehovaba da ra ǃgâsa da a ǁgau ǁkhāb ge ǁîba ǃoa ǀgoresa. Jehovaba du ūba hâ ǀnammi ge nî kai ǁîba du ga sadu ǂhânsendi xa ǀgores ǃnâ-ū mîba tsî gangan bi o sadob ra dība xūn ǃgao. Tsîs ge sadu Jehovab ǀkha ūhâ ǀhōsagusisa nî ǀgai ǁîb sadu ǀgorede ra ǃeream ǀgausa du ga mû o. ǂGomǃgâ tsoatsoa du ge nî ǁîb sado ra tsâba ǃkhaisa. Xawe Jehovab ǀgū ǀhōsa kais ǃaroma da ge ǁîb taen xa ǃgâibahe tsî taena a ǃhuisa ǃkhaisa nî ǂan. Tsî du ge nî ǂan ǁîb tae-e sado xu ra ǃâubasensa. Tsî nē ǂansa da ge Elobmîsa ǁkhāǁkhāsensa xu ǀgui a hō ǁkhā. ǃGôaǃgâsiba omkhâiba re. Elobmîs ǀguis ge Jehovab tsî ǁîb ǂâibasens tsîn xa amaba ūhâ. Elobmîsa du ra ǃgôaǃgâ ǃkhaisa du ge ǁîsa tsēs hoasa khomais ǃnâ-ū a ǁgau ǁkhā tsî khomai du ra xūna nî ûiǂui. (Psa. 119:97, 99; Jhn. 17:17) Elobmîsa tsēs hoasa khomais ǃaroma du ǀapeǁguiba ūhâ? Tsî du nē ǀapeǁguiba tsēs hoasa sao tsî Elobmîsa ra khomai? w20.03 5 ¶8-9

ǀHapese du ga ǃgû hō tama io, o du ge khoen ǂguise ra ǃgû ǃkhaib tawa ǂnû tsî a aoǁnâ ǁkhā. Sîǂkhanide xoas tamas ka io ǁâǁâpab ǃnâ-ūs tsîna du ge a aoǁnâ ǁkhā. ǂGui aoǁnâ-aon hîna omsa xu oms ǀkha a aoǁnâ ǁoan ge noxoba ra ǃgâiaǂgao ǀnî hâ ǀgaugu ǃnân ra aoǁnâ o. Sida ǂurusib ǂam-ai da ge noxoba sida ǃoabasa a dīǀoaǀoa ǁkhā. Paulub ge ge mî: “Hoana ta a ǁkhā ǁîb, tita ra ǀgaiǀgaib, Xristub ǃnâ.” (Fil. 4:13) Paulub ge ǀgaiba ge ǂhâ hâ i ǁîb ǃnarimâ sîsenni ǃnâb ge ǀaesen o. ǁÎb ge Galateǁîna ge ǁguiǃāba: “ǁGans di ǂkhabusasib ǃnâ ta ǂguro ǃnāsa ǃgâiǂhôasa gere aoǁnâba dusa.” (Gal. 4:13) ǁNās ǁkhās khami i ge sida ǂurusib mâsiba ǃēsa nî mā da î da nau khoena ǃgâiǂhôasa aoǁnâba aiǁgause, ǀaeǃkhō-aob, ǀaedī-aob tsî ǀnî hâ khoen hîna ra kōǃgâ dan. ǂGui khoen ge sîsenni tawa hâ ǁîn omdi tawa î ra aoǁnâ-e o. w19.04 4-5 ¶10-11

2018ǁÎ kurib ǃnâ î ge 223 000 xa ǃnāsa ǃgâiǂhôas aoǁnâ-aona ge hâ i ǂgui ǃhūgu ǃnâ ge aoǁnâsa ǂkhā-e hâ īna. Nēs ge buru kai da tama hâ. Ama Xristeǁîna nî mâǃoa-e. Hâ da ra ǃkhais hoas tawab ge ǂhanuba sida ǃoabas Jehovab ǃoa-ai da ūhâsa a mâǃoa ǁkhā. ǂHanub ga sida sîsenga mâǃoa o, o da ge a ǂâi ǁkhā Elob ǀkhaeba da ge ūhâ tama hâ di. ǂÂis ǃnâ ūhâ re mâǃoa-e da ra ǃkhais ge ǂâibasen tama Jehovab ge sida ǃnâ ǃgâiǃgâibasensa ūhâ tama hâ di. Apostel Paulub aiǁgaus xa ǂâi re. Elob ge ǁîb ǀkha ge ǂkhîǂâixa i. ǁÎb ge aiǂhanuba ge ūhâ i 14 sîǂkhanidi Grike Xoadi dide xoasa tsîb ge ǁîba ge hoaǁaedi apostel kai. Xaweb ge noxoba gere mâǃoahe. (2Kor. 11:23-27) Apostel Paulub aiǁgausa xu da ge ra ǁkhāǁkhāsen Jehovab ǁîb ǂgomǂgomsa ǃoaba-aona mâǃoahesa ra mā-amsa. w19.07 8 ¶1, 3

ǀGui ǀgaub hînab Jehovaba nēsa ǁîb khoena ra dības ge ǁîna huisa nē ǁgai ǂkhaba gagaga mâǃoas ǃnâ. Sada kai mâǃoa-aogu ge ǁGâuab tsî ǁîb demongu tsîna. Jehovab ge nē mâǃoa-aogu ǃoa-ai ra ǃkhâikhom da tsî ǁîga mâǃoas ǀkha ra hui da. (Efe. 6:10-13) Jehovab huiba ūǃoa tsî da ga ǁîb ai ǂgomaiǂnûi o, o da ge ǁGâuaba mâǃoas ǃnâ nî dan. Apostel Paulub ge ūhâ i ǂgomǃgâsiba da ge a ūhâ ǁkhā. ǁÎb ge ge xoa: “Elob ga sada ǀkha hâo, tari-e kha sada ǃoagu nî hâ?” (Rom. 8:31) Xristeǁîn ase da ge sada ǁGâuab tsî ǁîb demongu ǀkha ǃgâiǃgâibasen-e ūhâ tama hâ. Sada ǁaeba da ge Jehovab tsî ǁîb xa ǁkhāǁkhāsens ai ra ǂnûi. (Psa. 25:5) Xawe da ge nî ǂan ǁGâuab mati ra sîsensa. Tae-i ǃaroma? Î da tā ǁîb xa ǂgaeǂhapu-e.—2Kor. 2:11. w19.04 20 ¶1-2

ǃGâsa-e da ra ǃgâ hîna ǂkhabuǂâi hâ-e? Nēs ge xū-e mî tamas ǃgâ-ai hâ. ǁÎna da ge tsâbaǁhaoxasib, khoexaǃnâsib tsî ǀnammi tsîna a ǁgau ǁkhā. ǀNî ǁaegu ai i ge ǀoro mîdi hîna da ra mîde sida ra tsâ ǀgauba a ǁgau ǁkhā. ǀNîsi du ge a mî ǁkhā: “Kaise ta ge ǁgaise ra tsâ nēs go sadu ǀkha a īsa.” ǀNîsi du ge dî-e a dî ǁkhā, i du ǁnâuǃā khoe-i mati ra tsâsa. ǀNîsi du ge a dî ǁkhā, “toxoba du hui te re, î da ǁnâuǃā, tae-e du ra ǂâibasensa?” Tamas ka io “nēti du ge mî o, o da ge sao rase ge ǁnâuǃā . . . Nēti du goro ǂâibasen?” Nē ǀnamxaǃnâ ǁgâiǂuisendi ge khoe-e ǂgomǃgâsiba a mā ǁkhā, amabes ǃnâ du ra ǃgâ tsî ra ǁnâuǃāsa. (1Kor. 13:4, 7) ǂAn re, î du ‘ǂau ǃhoa du nîsa.’ Tā khoe-e ǃhaese ǁnama tamas ka io ǁî-i ǂâi ǀgauba ǀkharaǀkhara re. Tsî ǃnūǃnâxasiba ūhâ re. Mâ sîsenǂuiban a hō ǁkhā ǀgauba khoena mîba tama hâse da ge tsâbaǁhaoxasib tsî khoexaǃnâsib tsîna ra ǁgau.—1Pet. 3:8. w19.05 17-18 ¶15-17

Omaris ǃnâb ge aoba ǁîb tarasa nî ǀnam ‘Xristub ǀhaohâba a ǀnams . . . ǁkhās khami.’ (Efe. 5:28, 29) Aob ge Xristub di māsenxa ǀnamma nî ǁgae ǁîb taras di ǂhâsigu tsî ǃgâiǃgâibasens tsîna ǂgurose mâis ǃnâ-ū. ǀNî aogu ge a ǃgomba-e nēti i ǀnamma ǁgausa, ǀnîsi gu ǁnā ǀgaub ǃnâ kai khâi tama hâ amaga. Kaise î ge a ǃgom nē ǀgauga xu ǂgōsensa xawe gu ge nî dawa Xristub ǂhanuba gu ga ǁnâuǀnam ǂgao o. Aob hîna māsenxa ǀnamma ra ǁgaub ge ǁîb tarasa xu ǃgôasiba ra hō. ǁGûb hîna ǁîb ǀgôana a ǀnammi ge ǁîna tsûtsû tama hâ ǁîb dīgu tsî mîdi ǃnâ-ū. (Efe. 4:31) Xaweb ge ǁîb ǀnamma ǃgâi ǀgaub ǃnâ ra ǁgau hîna ǁîb ǀgôana ǃnorasase ra tsâ kaiba. Nē ǁgûb ge ǁîb ǀgôana xu ǂgomǃgâsib tsî ǀnammi tsîna nî ǃkhōǃoa. w19.05 6 ¶21

Gabrieli mîde tae-e Mariasa gere ǂâibasenba? ǁÎsa gere ǂâi Gabrieli ra mî di Jesub ge Gao-aob Herodeba nî ǃkhōǃkhuni Israeli ǂgaeǂgui-aob ase? Jesub ga gao-ao kai hâ o, os ge Mariasa ga gao-aob ǁgû hâ tsîn ge ǁîs omaris khoena ǀgapise ga ǃgôa-e hâ. Xawes ge Elobmîsa mî tama hâ Marias ge nēs xa Gabrieli ǀkha gere ǃhoa di, tamas ka io Gaosib ǃnâ ǀgapi ǃkhaisa ge ǂgan di. Marias ge ǃgamǃgamsenxa ǀgauba ge ūhâ i.ǂÂis ǃnâ da ge nî ūhâ Elobmîs tsî Elobmîs ai ǃgaoǃgaosa ǂkhanina da ga ôaǃnâ o, o da ge Jehovaba ǃoa ra ǀgū ǂgao. Tsî da ge ra ǂan ǂgao ‘mati ī’ khoe da asa tsî mâ ǀkharaǀkharana da nî dīsa Eloba ǃgâiaǂgao kais ǃaroma. (Jak. 1:22-25; 4:8) Elobmîsa da nî ôaǃnâ tsoatsoas aiǃâ da ge Jehovab ai ǃanu gagaba nî ǂgan. ǁÎba da ge nî ǂgan îb huida nē da ra ôaǃnâ xūna xu ǀama tsî ǂhâbasa ǀkharaǀkharana dī. w19.05 31 ¶18-19

ǀNî ǁaen ai da ge ǂgui ǃkharagagu tsûaǂgao kai da ra ǃgomsina ǀgui ǁaeb ai ra hōǃâ. Sao ra aiǁgaude ǃoa kō re. Johaneb, di ǀon hâ ǃgâsab ge ǁkhōǁkhōsa ǀaeba ge ūhâ i tsî ǁîb kaikhoes xas tsîna ge xū-e 19 kurigu ǃgame ûib khaoǃgâ. Tsî ra ge ǁîb ǀgam ǀgôara Jehovaba ge ǃoaba ǀû. Bob tsî Linda di ǀon hâ khoe-aogu ra ge ǀnî ǃnôa ǃgomsina gere hōǃâ. ǁÎra ge hoara ǁîra sîsengu tsî oms tsîna ge ǂoaǃnâ. Nē ǃgomsina ra nî hōǃâs aiǃâs ge Lindasa ǂgaoǁōb hîna a ǃgamsi ǁkhāb tsî ǀnî hâ ǁōb hîna ǁîs sorosa ra ǁāǂami tsînas ūhâ di ǀaeǃkhoa-aob xa ge mîbahe. ǂGomǃgâ ǁkhā da ge a sada di kuru-aob tsî ǀnamxaǃnâ ǁGûb Jehovab sada ǃgomsina ra ǁnâuǃāsa. Tsîb ge nē ǃgomsin hîna da ra hōǃân ǀkha ra huida ǂgao. (Fil. 4:6, 7) Elobmîs ge ǂgui aiǁgaude ūhâ hîna ra ǁgaude matin ge Elob khoena tsûaǂgaoba ra ǃaroma ǃgomsina a ǃkharuǃnâ ǀgaub dide. ǁGuiǃās tsîna i ge ra dī matib ge Jehovaba nē khoena nē ǃgomsin ǀkha a hui ǀgauba. w19.06 14 ¶2-3

ǃGâi xūna da ga ǁîn ǃgame khoe-i xa ǁnāxū-e hâ khoena a dība o, o da ge amabes ǃnâ da a ǀnam nîsa ra ǁgau nî. ǀGurin ga ǃgau o, on ge kai ǂkhâǃnâ-esa ǂhâ hâ. Mati da a ǁgau nî ǁkhā ama ǀhōsa da a ǃkhaisa? ǂÛǀhaos amsi du ge a ǁkhau nî ǁkhā. Tsîts ge a ǂgan nî ǁkhā ǀguiba ǃgâi ǁaeb tamas ka io aoǁnâ sîsenni ǃnâ ǁhaosa. Tamas ka io da ge ǁaeba xu ǁaeb ǀkha omaris ǃoabasa ǃoa a ǁkhau nî ǁkhā. Nēsa da ga dī o, o da ge Jehovaba ra ǂkhîǂkhî hîna “ǀgūse hâba ǁnān, khôaǂkhūsa ǂgaoga” ūhân tawa tsî a ‘ǃoataradi di ǂhanuǂhanu-aoba.’ (Psa. 34:18; 68:5) ǀGūǁaeb ga Elob di Gaosiba hoaraga ǃhūbaib ai ǂgaeǂgui o, o gu ge ‘ǂōǂōsigu hoaga nî ǀuruhe.’ ǁNā ǁaeb “aibekam xūn xa i ǃaruǀî ǂâihe tide, tsîn . . . ǂgaob ǃnâ khâi” tideba ǃoa da ge ra mûǂui. (Jes. 65:16, 17) ǁNā ǁaeb kōse hā re î da ǂkhâǃnâgu tsî mîdi tsî dīgu ǃnâ sada gagasi omaris ǁanina ǁgau ǀnam nî da a ǃkhaisa.—1Pet. 3:8. w19.06 25 ¶18-19

ǃKhē xu ǂgō-ommi ge kurin ǃnâ ge mûǂan: “ǃGâsan hîna Eloba ǃgâise ǂan an ge ǁîb ai ǃgom ǁaegu ǃnâ ra kō.” Nēs ge a ama. ǃÂitsâga mâǃoa hōs ǃaroma da ge Jehovaba ǀnam tsî nî ǂgomǃgâ. (Mat. 22:36-38; Jak. 5:11) Elobmîsa tsēkorebe khomai tsî Jehovab ǀkha ǀgū ǀhōsagusisa omkhâi re. (Jak. 4:8) Khomai du ra khami Jehovab ǀnamxaǃnâ ǀgauga ǃoa kō re. ǁÎb di ǀnammi tsî tsâbaǁhaoxasiba, mî tsîb ra dī xūn ǃnâ hōǃâ re. (Eks. 34:6) ǀNîn ge Elob amabes ǃnâ a ǀnam nî ǃkhaisa ǂgom tama hâ nēsan ge noxoba hōǃâ tama hâ i amaga. Nēti du ga tsâ o, o tsēs hoasa Jehovab ra ǁgau du ǀkhomxaǂgaosib tsî ǀnamxaǃnâsib tsîna xoaǁnâ re. (Psa. 78:38, 39; Rom. 8:32) Sadu ǂanǂuis tsî Elobmîs ǃnâ du ra khomai xūn tsîn xa du ra ǂâiǃgâ hîna du ge Jehovab ge dība du ǂgui xūna nî xoamâi hō. Jehovab ge dība du xūn xa du ga ǂâiǃgâ o, o du ge sadu ǀhōsagusisa Jehovab ǀkha a ǀgaiǀgai ǁkhā.—Psa. 116:1, 2. w19.07 2-3 ¶4-5

Jehovab ge nau khoena mîǁguiga dības ǁgaumâisa mā da tama hâ. Khoe-i hîna ǂhâbasa tama hâ ǁgaraga ra dī-i ge ǁî-i ǃgâsana ǁkhōǁkhōsasib ǃnâ ra mâi. ǁGâuab ge Jehovab ǂgomǂgomsa ǃoaba-aona mâǃoasa ǀû tide. (1Pet. 5:8; J.ǂHa. 2:10) ǁGâuab tsî ǁîba ra ǂkhâǃnâ khoen tsîn ge sida Jehovaba ǃoabasa xu nî ūbē. ǃAo da ga xawes tsîna da ge Jehovaba ǃoaba ǀû tide. (Deu. 7:21) Jehovab ge sida ǀkha hâ tsî nî ǂkhâǃnâ da sida sîsenni ga mâǃoa-e xawe. (2Kro. 32:7, 8) ǂGuroǁaeb Xristeǁîn hîna ge ǁnā ǁaeb ǂgaeǂgui-aoga sao ra-e a mîban xa ǂâi re: “Aitsama ǀgora, ise i Elob aiǃâ a ǂhanu ǃkhaisa, sago Elob ǂamai nî ǁnâuǀnamsa? ǀÛ ǁoa khom kom ao, mû tsî khom ge ǁnâun xa ǃhoasa.”—ǃNǃkh. 4:19, 20. w19.07 13 ¶18-20

Aoǁnâba da ga o, o da ge sida ra ǀhao-ū khoen ra ǂâi tsî tanisen ǀgauba da ge nî ǁnâuǃā. Paulub ge Jodeǁîn ǁaegu ge kai. Xaweb ge Jodeǁî tama khoenab gere aoǁnâba o, o ǁîb aoǁnâ ǀgauba gere dawa, ǁîn ge Jehovab tsî Elobmîs tsîna ǀū i amaga. Ôaǃnâsa da ge nî dī, i da sida aoǁnâ ǂharis ǃnâ hâ khoen ǂâiǀgaugu tsî tsâsigu tsîna ǁnâuǃā. (1Kor. 9:20-23) Sida mîǁguib ge ‘ǃkhōǂuibasenhe’ hâna ôasa. (Mat. 10:11) Nēsa dīs ǃgao da ge khoena nî ǂgan în tae-en ra ǂâisa ǁgâiǂûisen tsî ǃgaoǃgâxase nî ǃgâ. ǃGâsab ge Englandi ǃnâ khoena gere dî, mati da ǂkhîba ǃgameb ǃnâ nî ūhâs, mati da ǀgôana nî kaikais tsî da mati nî mâǀgaisa mâǃoahe da ga xawe. ǁÎn ǂâiǀgauga ǃgâ toa tsîb ge gere mî “tae-e du nē ǀapemās hîna ge 2 000 kuriga ǃkharu hâse a xoahes xa ra ǂâi?” ǁNās khaoǃgâb ge “Elobmîs” di hâ mîsa sîsen-ū tama hâse, Elobmîs xoade ǁîb ǁâǁawab ǃnâ-ū ra ǁgau. w19.07 21-22 ¶7-8

Matikōse da Eloba nî ǀnam? Jesuba ge Fariseba ge mîba: “ǃKhūb sa Elobats ge nî ǀnam sa ǂgaob hoab ǀkha, tsî sa ǀoms hoas ǀkha, tsî sa ǂâis hoas ǀkha.” (Mat. 22:36, 37) Eloba da ge sida ǂgaob hoab ǀkha ra ǀnam ǂgao. Nē ǀnamma da ge tsēs hoasa ra ǀgaiǀgai ǂgao. Eloba da ge nî ǂan ǁîba da ga ǀnam ǂgao o. Elobmîs ge ra mî: “ǀNam tama-i ge Eloba ǂan tama-e, Elob a ǀnam xui-ao.” (1Jhn. 4:8) Apostel Paulub ge ge ǁgau sida ǀnammi Elob ǃoa-ai da ūhâb ge nî ǀgai “ǂans tsî hōǃâs hoas ǃnâ” da ga kai o. (Fil. 1:9) ǂGurose da ge Elobmîsa ǁkhāǁkhāsen tsoatsoa o, o da ge Jehovaba ge ǀnam ǁîb xa da ge ǃnāsase ǀū i xawe. Tsî i ge ǁîb xa da ra ǁkhāǁkhāsen khami ǁîba da ūba hâ ǀnamma ge ǀgai. ǁNā-amaga da ge Elobmîsa ôaǃnâ tsî ǂâiǃgâsa ǂhâǂhâsase sida ûib ǃnâ ra mû.—Fil. 2:16. w19.08 9 ¶4-5

ǀAsa ǁgaumâis ǃnâ du ge ǀasa ǀhōsana nî kuru. ǂÂis ǃnâ ūhâ re, ǀhōsana du ga ǂhâba o, o du ge sado nî ǃgâi ǀhōsa i. ǁÎna sadu ge Jehovab di ǃoabas ǃnâ ūhâ i ǃgâi ǁaegu tsî dī du ge xūn xa mîba re în sadu di ǂkhîb, nē xūna dīsa xu du ra hōba mû. Sadu di ǃgamme khoe-i di ǀaeb mâsib amsi du ga sadu ǁgaumâisa ǀam kai o, o tā ǁî-e ǀhapimā re. Xawes ga nēsa sadu ǀaeb mâsib xa a ǃaromahe o, o tā ǂâi re sadu ǃgao ro go ǁnā ǁgaumâisa a ǀûsa. ǂÂis ǃnâ ūhâ re ‘ǀgui ǁganro’ a sa tsîro ge Jehovab aiǃâ a mîmâisa hoa ǃgomsin ǃnâ ro nî hâbagusa. (Mat. 19:5, 6) ǃÂubasen tama ro hâ hînas ga kaikhoesa a ǀgamǀkhā o, o saro ǀgôa-e ǂanǂan re ǁî-i kaise a ǂhâǂhâsasa saro ǁgaumâis xa. Saro ǀgôa-e mîba re ‘ǀumixū-i’ a ǃkhaisa Eloba xu. (Psa. 127:3-5) ǃGâi ǁaeb hîna ro ge saro ǁgaumâis ǃnâ ūhâ îb xa mîba î re. Nēs ge saro ǀgôa-e nî hui i i ǁî-i tsîna Jehovaba ǀoasa ǁaeba saro ge dī khami ǃoaba. w19.08 22 ¶10-11

Babilons Kais ge kai ǃgôaoǃnâsiba Elob ǀons ai ra hau. ǁÎs ge ǂhumiba Elob xa ra ǁkhāǁkhā. ǁGauoǃnâ kaikhoes khami i ge ama tama ǂgomde Jehovab ǃoa-ai a ǂhauoǃnâ tsî khoesi ǂhanuga ra ǂkhâǃnâ. Ama tama ǂgomdi ge khoena ra ǁgâiǀā tsî ǁîn marina ra ū. Nē ǂgomdi ge ǂgui khoena ge ǃgam, Elob ǃoaba-aon tsîna ǃkhōǂgā hâse. (J.ǂHa. 18:24; 19:2) Jehovab ge ‘kai ǀai-aosa’ “disi ǁnâgu” ‘Skarlakǀapa ǀgurub’ digu ǀkha nî hîgāgā. Nē ǀgurub ge United Nationsa ra ǂnûǁkhaeba. Tsî disi ǁnâgu ge ǂhanugu hîna ǂgīǂgōsi ǃnande ra ǂkhâǃnâga ra ǂnūǁkhaeba. Elob ǁaeb ai i ge nē ǂgīǂgōsi ǃnande Babilons Kaisa nî ǁnāǂam. ǁÎn ge ǁîsa “ǁkhan tsî nîra ǀguriǃgâ kai tsî ǀōǀkhā kai” tsî ǁîs ǃkhūsis hoasa ū tsî hoa khoena nî ǁgau ǁîs a ǁgauoǃnâ ǃkhaisa. (J.ǂHa. 17:3, 16) Nē hîkākās ge ǀgui tsēs ǃnâ nî ī tsîn ge ǁîsa ra ǂkhâǃnâ khoena kaise nî buru. Ama tama ǂgomdi ge ra mî: “Tsî ta ge tātsē ǃoa-e mû tide.”—J.ǂHa. 18:7, 8. w19.09 10 ¶10-11

Nē ǁkhauǂuis ge hoa khoen ǃaroma hâ Jesub ge Jehovaba ǂgaoba xu ra ǃoaba ǂgao khoe-e ǂkhābē tide. (Jhn. 6:37, 38) Xristub saosaben hoan ge aiǂhanuba ūhâ Jehovab ge Jesuba a mā sîsenni ǃnâ ǁhaos diba. ǂGomǃgâsiba da ge nî ūhâ Jesub hoaǁae sida ǀkha nî hâsa nē sîsen-e dīǀoaǀoas ǃnâ. (Mat. 28:18-20) ǃGamǃgamsenxa khoen ge Jesuba ǃoa gere ǂgae-e. (Mat. 19:13, 14; Luk. 7:37, 38) Tae-i ǃaroma? Jesub tsî Farisegu tsîn ǁaegu hâ ǃkharagagusib xa ǂâi re. Nē ǂgomdi ǂgaeǂgui-aogu ge ge ǀnamoǃnâ tsî ǀgapiǂâixa i. (Mat. 12:9-14) Xawe Jesub ge ge ǃgamǃgamsenxa i. Farisegu ge ge kai ǂgaoxa i tsî ǀgapi ǃkhaiga ǀhûhâsib ǃnâ gere ôa. Jesub ge ge mî nē ǀgaub ge ǃgâi tama hâ di tsî ǁîb ǁkhāǁkhāsabega ge ǁkhāǁkhā îgu ǃgamǃgamsenxa tsî nau khoena ǃnaga hâba. (Mat. 23:2, 6-11) Farisegu ge khoena gere gaoǂam, ǂan gu ge i amaga khoen ge gere ǃao tae-i ǁîn ǀkha nî īsa Farisegan ga ǁnâuǀnam tama io. (Jhn. 9:13, 22) Jesub ge ǀnamxaǃnâ tsî khoexaǃnâ mîdi ǃnâ-ū khoena gere khoakhoa. Sao ra xūna du ge Jesuba xu ǁkhāǁkhāsen? w19.09 20 ¶1; 21 ¶7-8; 23 ¶9

ǀHaodi ge Jehovaba ǃoa ǀgūs ǀkha ra huida. Sada ǀhaode ǁhaoǃnâsa ra mû ǀgaus ge nî huida sada ǃâitsâga ra sîsenǂam ǀgaus ǃnâ. (Heb. 10:24, 25) Tae-i ǃaroma? ǂKhari ǃgomsiron ga ǀhaode xu a hâbē kai da o nēsi, o i tae-e ǁaeb ra ī khami nî hā, kai ǃgomsina da ga hōǃâ o? Xawe da ga ǀhaode ǁhaoǃnâs ǃnâ mâǀgaibe o, o da ge ǃgomsina da ga hōǃâ o, o ǁîn ǃnâ māǁnâsen tide. Nēsi da ge ǀnamma ǀhaode ǁhaoǃnâsa nî omkhâiba. ǀHaode ǁhaoǃnâsa da ga ǀnam o, on ge ǃâitsân tamas ka io ǂhanub tsîna ǁkhae da tide Eloba khoen ǃgâ-ai ǁnâuǀnamsa. (ǃNǃkh. 5:29) Mâǂoara xoade ǂâiǂâiǃnâsen re. (Mat. 13:52) Sada ǂâidi ge ǀoasa tama hâ xaweb ge Jehovaba ǁîb ǃanu gagab ǃnâ-ū nî huida xoade ǂâihō kai das ǃnâ. (Jhn. 14:26) Nē xoadi ge sada a hui ǁkhā î da Jehovab ǀgūse hâ ǁnā ǃgom ǁaegu ǃnâ tsî ǂgoms ǃnâ mâǁapo. w19.07 3 ¶5; 4 ¶8-9

1914ǁÎ kurib khaoǃgâ du ge ǃnae? Nēs nî amas ga i o, ots ge sa ûib hoaba “ǀuni tsēdi” ǃnâ ûi hâ. Hoa da ge Jesub ge ǀuni tsēdi xa mî xūna ge ǁnâu. Nēs ge torogu, ǃâtsūǀkhāgu, ǃhūǂgubigu, ǀaegu, eloxoresasib tsî Jehovab ǃoaba-aona saoǃgonhes tsîna ǃkhōǂgā hâ. (Mat. 24:3, 7-9, 12; Luk. 21:10-12) Khoen ge apostel Paulub ge mî ǀgaub ǃnâs tsîna ra tanisen. Jehovab ǃoaba-aon ase da ge ra ǂgom “ǀuni tsēdi” ǃnâ da ûi hâ ǃkhaisa. (Mix. 4:1) ǂGui ǁaeb ge 1914ǁǀî kurib khaoǃgâ ge ǃkharu ǁnās ǃaroma da ge ǀams “ǀuni tsēdi” dis ǃnâ ûi hâ. ǀAms nētikōse a ǀgū ǃkhais ǃaroma da ge sao ra dîdi ai ǃereamsa nî hō: Taena ǀuni tsēdi ǀams ai nî ī? Tsî Jehovaba tae-e sada xu ra ǃâubasen nēsa da ǃâu hâ hîna? w19.10 8 ¶1-2

Sida mâǀgaibesib ge ǃgâi mâsigu ǃnâ ǀgui a ǁgauhe ǁoa di. Xawes ge nēsa Jehovab ai hoaǁae ǂgomaiǂnûisa xu hâ. (Rom. 12:12) Jesub nētsēs xoas ǃnâ ra mîmâis ge ra ǂâibasen ǃgomsina da ga hōǃâ xawe da ge nî mâǀgai di. ǃGomsin ǂam-ai da ga nēsi mâǀgai o, oi ge sida ǂgomsa nî ǀgai kai ǁgâiǀāb ǁaeb ǃnâ mâǀgaisa. Mâǀgaibesiba ūhâs ǃgao da Jehovab ai ra ǂgomaiǂnûi khami da ge ǁkhoaǂgaosiba ūhâs ǃgaos tsîna ǁîb ai nî ǂgomaiǂnûi. Mati da Jehovab ai ǂgomaiǂnûisa nî ǁkhāǁkhāsen? Nēsa da ge Elobmîsa tsēs hoasa khomai tsî Jehovab ge ǁîb khoena mati ǃkharu ge ǁaeb ǃnâ a sâu ǀgausa ǂâiǃgâs ǃnâ-ū a dī ǁkhā. (Psa. 68:20; 2Pet. 2:9) ǃHaodi ga kai ǁgâiǀāb ǁaeb ǃnâ ǁnāǂam da o, o da ge nî ǁkhoaǂgaoxa tsî Jehovab ai hoase nî ǂgomaiǂnûi. (Psa. 112:7, 8; Heb. 13:6) Jehovab ai da ga nēsi ǂgomaiǂnûi o, o da ge ǁkhoaǂgaosiba nî ūhâ Gogi di ǁnāǂamde mâǃoasa. ǂGomǃgâsiba da ge ūhâ Jehovab ǀnamǀnamxa ǀgaub ǃnâ nî ǁkhauba dasa.—1Kor. 13:8. w19.10 18 ¶15-16

ǁGâuab ge nē ǃhūbaiba ra ǂgaeǂgui nēs ǃaromab ge ra dī i da sida di turaga ǂhâǂhâsase mû tsî nēsa tā mâǃoa hō. (Efe. 2:1-3) ǁGâuab ge ra ǂhâba î da tā Jehovaba ǀnam. ǁGâuab ǃhūbaib di ǀams tsî ǀasa ǃhūbaib hîna nî hāb xab ge xoa toa o, ob ge apostel Petruba ge mî: “ǁNā-amaga, ǀnamsabedo, î du nēna ra ǃâubasense ǃhaeǃhaesen, ǂnao-ose tsî ūose du nî ǁîb xa hōhese ǂkhîb ǃnâ.” (2Pet. 3:14) Nē ǁgaraga da ga ǁnâuǀnam tsî ǃgarise ǁgūtsâ o Jehovab ǂgaoǀkhā hâ khami ûisa, o da ge ra ǁgau ǁîba da hoase ra ǃoabasa. Satanni tsî ǁîb di ǃhūbaib tsîn ge ra dī i da ǀnî hâ xūna ǂgurose sida ûigu ǃnâ mâi Jehovab ose. (Luk. 4:13) ǃGomsina da ga ra hōǃâ xawe da ge khoe-i tamas ka io xū-e mā-am tide Jehovab ǃkhaisa sida ǂgaob ǃnâ ūsa. Jehovaba da ge ǁnā aiǂhanub ǁîb ǀguiba ǀguri ǃoabas tiba ra mā ǂgao. w19.10 27 ¶4; 31 ¶18-19

ǀNî xūn xa ǂâiǂhansens ge a ǃgâi. Aiǁgause da ge Jehovab tsî Jesub tsîna ǂkhîǂkhîs di ǂâiǂhansende ūhâ. (1Kor. 7:32) Tsū ǁore-e da ga dī o, o da ge sada ǀhōsagusisa Jehovab ǀkha ǃgâiǃgâis xa ra ǂâiǂhansen. Sada ǃgame khoe-e ǂkhîǂkhîs xas tsîna da ge ra ǂâiǂhansen tsî sada omaridi ǁanin tsî ǀhaohâb khoen ǂurusib tsîn xa. (1Kor. 7:33; 2Kor. 11:28) Xawe ǂhâbasa tama ǂâiǂhansendi ge ǂâusa ǂû-i tsî saran tsîna ūhâ tama is xa a ǂâi kai da ǁkhā. (Mat. 6:31, 32) Sada ǂâiǂhansende ǀoroǀoros ǃaroma da ge ǂgui mari-e a sîsen tsoatsoaba ǁkhā, nē xūna hōs ǃaroma. Nēsa da ga mā-am o is ī, o da ge sada ǂgoms Jehovab ǃnâ da ūhâsa a ǂkhabuǂkhabu ǁkhā tsî sada ǀhōsagusis tsîna a khôa ǁkhā. (Mrk. 4:19; 1Tim. 6:10) Tamas ka io da ge khoen xa ūǃoahes di ǂâiǂhansensa a ūhâ ǁkhā. Nēs xa ǃaroma-e hâse da ge khoen xa ǁgâiǀāhesa nî ǃao tsoatsoa tsî Jehovaba nî ǃao ǀû. Nēsa xu ǁkhaubasens ǃaroma da ge Jehovaba ǂgoms tsî ǁkhoaǂgaosib tsîna nî ǂgan i da tā khoena ǃao.—ǂKhm. 29:25; Luk. 17:5. w19.11 15 ¶6-7

ǀNî ǂhâǂhâsa mîǁguiga da ge a ǀkharaǀkhara ǁoa. Aiǁgause Jehovaba ǃoaba ǀgaras di mîǁguib tsî sada ǃgamme hâ khoe-i ǃoa-ai ǂgomǂgomsase hâs di mîǁguib tsîna. (Mat. 16:24; 19:6) Xawe ǀnî hâ mîǁguigu ge a ǀkharaǀkharahe ǁkhā. Tae-i ǃaroma? Sada mâsigu a dawa ǁkhā amaga. Taena a huida ǁkhā ǃgâi mîǁguiga dīs ǃnâ? Gā-aisiba ǀgoreba re. ǀNî xūn ǃnâ da ge ‘gā-aisiba ra tôasi.’ ǁNā-amaga Jehovaba ǂgan re îb hui du mîǁgui-e du ga dī o tsî ga ra ǀkharaǀkhara ǂgao o. Nēsa du ga dī o, ob ge Jehovaba nî hui du ǃgâi mîǁguiga dīs ǃnâ. ǃGâi ôaǃnâsa dī re. Elobmîsa ôaǃnâ, Elobmîs ai ǃgaoǃgaosa ǂkhanin hîna Jehovab ǀapeǂhumis xa ra mā-ena khomai tsî ǂgomǃgâ du ra khoe-i hîna ǃgâi ǀapemāde a mā du ǁkhā-i ǀkha ǃhoa re. (ǂKhm. 20:18) Nē ôaǃnâs ge kaise a ǂhâǂhâsa mâpa da nî does tsî Jehovaba ǃoabas ǀkha nî aiǃgû kai da sîsen-e da nî ǁhûis aiǃâ. w19.11 27 ¶6-8

Elob ge ǀgau-e ge dī i da ǁoreba xu ǃnora kaihe ǁkhā. Jesub ge nē ǃnorasasiba ra īǁkhā kai. ǃKharu ge ǁaeb ǃnâb ge kēbo-aob Jesajaba ge mîmâi kai, ǃnorasasib nî hâ ǃkhaisa ,nē ǃnorasasib ge dâkurib ǁaxasib xas tsîna nî kai i. Nē dâkurib ǁaxasib ge ǃnāsana nî īǁkhā kai Israelǁîn dâkurib ǁaxasib tawa i gere īs xa. ǁÎb ge ge xoa: “Gagab ǃKhūb, ǃKhūb dib ge tita ai hâ, ǃKhūb ge tita ǂkhauǀkhā amaga, ǃgâi ǂhôa-e ta nî tsamtsiǃnâna ūhābaga. ǁÎb ge tita ge sî, khôaǂkhūǂkhūhesa ǂgaoga ūhâna ta nî ǃgae-aibase, ǃkhōsana ta nî ǃnorasasiba ǂgaiǂuibase.” (Jes. 61:1) Nē kēbosa ham-e ǃoa ra ǁnaeǁgau? Nē ǂhâǂhâsa kēbos hîna ǃnorasasib xa hâs ge Jesub ge ǁîb aoǁnâ sîsenni ǀkha tsoatsoa o, o ge dīǀoaǀoahe tsoatsoa. Jesub ge Nasarets ǃnâ hâ sinagogegu tawab ge sī o, o Jesajab di kēbode ǁnāpa ge ǀhao hâ i Jodeǁîna ǃoa gere khomai. Tsî ǁnāsa mati ǁîba ǃoa gere ǁnaeǁgau.—Luk. 4:16-19. w19.12 9-10 ¶6-8

ǃGomsina mâǃoa hōs ǃaroma da ge ǁkhoaǂgaosiba ǂhâ hâ. Mûǂan du ga o ǁkhoaǂgaosiba du ūhâ tama hâsa, o du tae-e nî dī? ǂÂis ǃnâ ūhâ re ǁkhoaǂgaosiba ūhâs ge sadu kaisib tamas ka io ǀgaib tsîna xu hâ tama hâ. Davib hîna ge Goliata gere ǃkhami aiǁgaus xa ǂâi re. Goliati hîna kaimâ hâb ǀkha da ga Daviba a ǀgopeǀnō o, ob ge Daviba ǂkhariro tsî ǂhanu ǃkham saran tsîna ge ana tama hâ i. Davib ge ǃkhams amsi gôa-i tsîna ge ūhâ tama hâ i. Xaweb ge ge ǁkhoaǂgao i. Davib ge ǁkhoaǂgaosib ǀkha ǁnā kaimâ hâ khoeba ge ǃkham ǃoa. Tae-i ǃaromab Daviba ǁnāti ge ǁkhoaǂgaoxa i? ǁÎb ge ǂgomǃgâsiba ge ūhâ i Jehovab ǁîb ǀkha hâsa. (1Sam. 17:37, 45-47) Davib ge Goliati kaimâsib ai ge kō tama hâ i. Xaweb ge Goliati Jehovab ǃoa-ai mati kōse a ǂkhariros xa gere ǂâi. Tae-e da nēsa xu ra ǁkhāǁkhāsen? Jehovab sada ǀkha hâsa da ga a ǂan o, o da ge ǁkhoaǂgaosiba nî ūhâ tsîn sada mâǃoa-aona sada Hoaǀgaixa Elob ǃoa-ai kaise a ǂkhariros tsîna.—2Kro. 20:15; Psa. 16:8. w19.07 5 ¶11-13

Tixikub ge ǂgomǃgâsib ǃnâ gere mâǂoa ǀhōsab apostel Paulub tiba. (ǃNǃkh. 20:4) 55ǁÎ kurib ǃnâb ge Pauluba Judeab Xristeǁîn ǃaroma gere mā-e marisi huib di marina gere ǀhaoǀhao tsî ǁnās ǃaroma Tixikuba ge ǂgan îb nau ǂhâǂhâsa xūn ǀkha hui-e. (2Kor. 8:18-20) Egab ge Pauluba ǃkhōsis ǃnâ Romes ǃnâ ūhe o, ob ge Tixikuba ge ǁîb di haisi-am-ao kai. ǁÎb ge Paulub di sîǂkhanidi tsî ǂkhâǃnâ ra haisi-amdi tsîna Asiab ǃnâ hâ ǀhaohâga ǃoa gere sī-ū. (Kol. 4:7-9) Tixikub ge Paulub di ǂgomǂgomsa ǀhōsab ase ge hâ. (Tit. 3:12) Hoa Xristeǁîn ge ǁnā ǁaeb ai Tixikub khami ge ǂgomǂgomsa tama hâ i. 65ǁÎ kurib ǃnâb ge Pauluba ǁkhawa ǃkhōsis ǃnâ ūhe ob ge Pauluba ge xoa, Xristeǁî aogu hîna ge Asiab ǃnâ hâ ī gu ge ǁîb ǀkha dī xū-e ge ūhâ ǂgao tama hâ i, ǁîgu khoen xa mâǃoahesa gere ǃao amaga. (2Tim. 1:15) Xaweb ge Pauluba Tixikub ai ge ǂgomǃgâ ǁkhā i tsî ǀnî hâ ǁgaumâidi tsîna ge mā bi ǁkhā i. (2Tim. 4:12) Paulub ge kaise gere ǃgôaǃgâ Tixikub khami ī ǀhōsa-eb ge ūhâ i ǃkhaisa. w20.01 10 ¶7-8

ǀNîsi du ge ra ǂhâ ǃanu gagab ǀkha du ǂkhauhe hâ ǃkhaisa. Nēs ga ra io, o sao ra ǂhâǂhâsa dîdi xa ǂâi re: Kaise ǀgaisa turuba du ūhâ Jehovab di ǂâisa dīsa? ǂÂi i du ra ǁkhoaǂgaosiba du ūhâsa aoǁnâ sîsenni ǃnâ? Elobmîsa ǁkhāǁkhāsens xa du ǃgâibahe tsî Elob di “ǃgamsib” xa ǁkhāǁkhāsens tsîna a ǀnam? ǂÂi i du ra Jehovab ge ǃgâi sîsenǂuiba aoǁnâ sîsenni ǃnâ a mā du ǃkhaisa? ǂÂi i du ra kai ǃereamsa du ūhâ di Jehovab xa nau khoena ǁkhāǁkhās ǃnâ? Jehovab ge ǂgui ǀgaugu ǃnâ sadu ûib ǃnâ a hui du ǀgausa du ra mû? Nē dîdi hoade du ga î di ǃeream o, o i ra ǁgau ǀhommi di ǃâubasensa du ūhâsa? Hî-î nēs ge di ǂâibasen tama hâ. Tae-i ǃaroma? Elob di ǃoaba-aon hoan ge nē ǀgaub ǃnâ a tsâ ǁkhā. ǀNîsi du ga aitsama ga ra ǂâi o ǂkhauhe du hâ di, o du ge amabes ǃnâ ǂkhauhesa tama hâ. ǁNān hîna Jehovab xa ra ǁkhauhen ge ǂkhauhe tamas ka ion ǂkhauhe tama hâsa ǂâiǃgâ tama hâ. ǁÎn ge nēsa a ǂan. w20.01 23 ¶14