Meib

Mâna a ǀnî xū hînan ǁgûna nî dīna ǁîn ǀgôana huisa în Jehovaba ǀnam. Jehovab huiba ǀgoreba re. Manoaxi aiǁgaus ǃnâ-ū ǁkhāǁkhā re. Mî du ra xūn ge ǂhâǂhâsa xawe dī du ra xūn ge kai sîsenǂuiba sadu ǀgôa-i ai a ūhâ ǁkhā. ǂGomǃgâ da ge ra Joseb tsî Marias tsîn ge ǂoaǂamsa aiǁgausa ǁîra ǀgôana a mā ǃkhaisa Jesub tsîna ǃkhōǂgā hâse. Joseb ge ǃgarise gere sîsen ǁîb omarisa kōǃgâs ǃgao. Tsîb ge ǁîna gere ǂkhâǃnâ în Jehovaba ǃoabasa ǀnam. (Deu. 4:9, 10) ǁÎb ge ǁîb omaris ǀkha Jerusalemsa ǃoa “kurikorobe” gere ī Pasxaba sī tsēdīs ǃgao. (Luk. 2:41, 42) ǀNî ǁgûgu ge ǀnîsi gere ǂâi ǁîb omaris hoasa Jerusalemsa ǃoa ī ūs kaise nî ǃgom i, ǂgui ǁaeba nî ū tsî ǂgui mari-e nî ǂgan di. Joseb ge gagasi xūna gere ǃgôaǃgâ tsîb ge ǁîb ǀgôana ge ǁkhāǁkhā în ǁîn tsîna nē xūna ǃgôaǃgâ. Marias tsîn ge Elobmîsa ǃamkuse ge ǂan i. ǁÎs mîdi tsî dīgu ǃnâ-ūs ge ǁîs ǀgôana gere ǁkhāǁkhā în Elobmîsa ǀnam. w19.12 24-25 ¶9-12

Jehovab sida ūba hâ ǀnamma da ge Adammi ge ǁîba ǁnâuǀnam tama hâ io, ob ge dī xū-e xu ra mû. Adammi ge ǁîb ǀhomsi ǁGûba ǁnâuǀnam tama hâ io, ob ge ge Jehovab omaris ǃâ tama hâ i tsî ǁîb surib tsîn ge nēsa ge ǂoaǃnâ. (Rom. 5:12) Xawe Jehovab ge xū-e ge dī Adammi suriba huis ǃgao. Jehovab ge Adamma ge ǁkhara xawe ǁîb suriba huisa ge mîmâi. ǁÎb ge ǁnā ǁaeb ai ge mîmâi ǁnâuǀnamxa khoen ge nî ǁîb omaris ǁanin di ǃâ kai di. (Gen. 3:15; Rom. 8:20, 21) Jehovab ge nēsa ǁîb ǀnamǀnamsa ǀGôab Jesub di xoremarib ǃnâ-ū ge īǁkhā kai. ǁÎb ǀGôaba xoremarib ase mās ǃnâ-ūb ge Jehovaba matikōseb a ǀnam da ǃkhaisa ge ǁgau. (Jhn. 3:16) ǁÎb ge a ǂoaǂamsa ǁGû. ǁÎb ge sida ǀgorede ra ǃgâ tsî ǂhâ da hâ xūna ra mā da, sorosises tsî gagasises tsîna. ǁÎb ge ǁkhāǁkhā da tsî ra ǂkhâǃnâ da. Tsîb ge hānîǁaeb ǃnâs tsîna ǂoaǂamsa xūna nî dība da. Kaise da ge ra ǃgâiaǂgao ǂansa sida ǁGûb ge a ǀnamda tsî ra tsâba da di. w20.02 6 ¶16-17; 7 ¶20

Xū-i xa du kaise ge ǀnai ǂhansen hâ i? ǀNîsi du ge ǃgâsa-i ge mî tsî dī xū-i xa kaise ge tsûaǂgao kaihe. Tamas ka io du ge sadu ge mî tsî dī xūn xa tsūse a tsâ ǁkhā. Aiǁgause, du ge ge dīsā tsî ra ǂâi Jehovab ge ǀûba du tide di. Tsî du ge nēs xa ǃaroma-e hâse a ǂâi ǁkhā ǀgaisa ǂgomsa du ūhâ tama hâ tsî a ǁgai khoesa. ǀNî Elobmîs aiǁgaude ǃoa kō re. Hannas kēbo-aob Samueli ǁgûs ge ǀgaisa ǂgomsa ge ūhâ i. Xawes ge Hannasa, Peninas xa ǁgaise gere hâ ūhe tsî ǁnās xa ǃaromahe hâse gere ǂâiǂhansen. (1Sam. 1:7) Apostel Paulub ge ǀgaisa ǂgomsa ge ūhâ i xaweb ge gere ‘ǂhansen ǀhaohâgu hoagu ǃgao.’ (2Kor. 11:28) Gao-aob Davib tsîn ge ǀgaisa ǂgomsa ge ūhâ i tsîb ge Jehovaba ǁîba kaise ge ǀnam i. (ǃNǃkh. 13:22) Xaweb ge Davib tsîna ge dīsā tsî nēs xa ǃgâi tamase gere tsâ. (Psa. 38:4) Jehovab ge hoana ge ǁkhaeǂgao. w20.02 20 ¶1-2

Māǁnâsensa du ge ǂgaob ǃgamsiba xu hâ ǀgores ǃnâ-ū Jehovaba ra mîba sadu ûib hoaba du ǁîba nî ǃoaba di. Jehovab ǃoa-ai du ga māǁnâsen o, o du ge ǁî-aitsama ra “ǀūxūsen.” Nēsisa du ge Jehovab ǃomǁae hâ tsî nēs ge kaise a ǃgâi. (Rom. 14:8) ǁÎba du ge ra mîba nētsēsa xu du ge ǁîba nî ǃoaba tsî aitsama ǂkhîǂkhîsen tide. Sadu māǁnâsens ge khôahe ǁoasa mîmâis hîna du Elob ǃoa-ai ra dīsa. Jehovab ge ǁgari da tama hâ nē mîmâisa dīs ǃnâ. Xawe da ga nēsa dī o, ob ge ǂhaba hâ i da nēs ǃoagu ûi. (Psa. 116:12, 14) Māǁnâsens ge ǀgores ǃnâ ra dī-e tsî khoe-i tsî Jehovab tsîn ǁaegu hâ. ǁĀǁnâs ge khoen aisi ra dīhe ǂharis ǀhaos tamas ka io ǀkharib kai ǀhaos tawa. ǁĀǁnâ kaisen du ga o, o du ge khoena ra ǁgau ǀnai du ko Jehovab ai māǁnâsen ǃkhaisa. Nēs ǃaromas ge sadu ǁāǁnâsa khoena ra ǁgau Jehova Eloba du sadu ǂgaob hoab, ǀoms hoas, ǁnâuǃāb hoab tsî ǀgaib hoab ǀkha a ǀnam ǃkhaisa.—Mrk. 12:30. w20.03 9 ¶4-5

ǁGâuab ge khoena Jehovab xa ra ǀuru kai. Jesub apostelgu ǁōb khaoǃgân ge ǀnîn hîna ge Xristeǁîn a di gere mîna ǂhumiba ge ǁkhāǁkhā tsoatsoa. (ǃNǃkh. 20:29, 30) Nē mâǃoa-aon ge ama-ai Eloba ge ǀuru. Aiǁgause, ǁîn ge Elob ǀonsa Elobmîs ǃnâ ge sîsen-ū ǀû tsî nēsa “ǃKhūb” tsî ǀnî hâ ǂgai ǀondi tsîn ǀkha ge ǃkhōǃkhuni. Elob ǀonsan ge ūǂui tsî nēsa “ǃKhūb” ǀkha a ǃkhōǃkhuni o, o i ge ge ǃgom mûsa Jehovab mati nau Eloga xu ra ǀkharasa. (1Kor. 8:5) ǁÎn ge Jehovab tsî Jesub tsîna “ǃkhūb” di gere ǂgai, nēs ge ge ǃgom kai Jehovab tsî ǁîb ǀgôab ǁaegu hâ ǃkharagagusiba ǁnâuǃāsa. (Jhn. 17:3) Nēs ge ge ǃaroma î-i ǃnonaǀgui ra Eloba hâ, nēs ge Elobmîs ǁkhāǁkhādi ǃâ tama hâ. Nēs xa ǃaroma-e hâsen ge ǂgui khoena ra ǂgom Eloban ge a ǂan ǁoa di. Nēb ge a ǂhumi.—ǃNǃkh. 17:27. w19.06 5 ¶11

ǀNî hâ ǀgaub hîna da sida ǃoabasa a dīǀoaǀoa ǁkhāb ge sida di aoǁnâ ǀgauga ǃgâiǃgâis ǃnâ-ū. (ǂKhm. 1:5; 1Tim. 4:13, 15) Kaise i ge a ǃgâi Jehovab ǁîb ‘ǀhaosîsenao da’ ase ra mû da o. (1Kor. 3:9) ‘ǂHâǂhâsa xūna da ga mûǂan’ tsî Xristeǁî ǃoabas ai ǂgomaiǂnûi o, o da ge Jehovaba ‘ǃgâiaǂgaob ǀkha’ ra ǃoaba. (Fil. 1:10; Psa. 100:2) Elob ǃoaba-aon ase da ge ǂgomǃgâsiba nî ūhâ ǁîb ǀgaiba nî mā da ǃkhaisa sada ǃoabasa dīǀoaǀoas ǃnâ sada ǃgomsin ǂam-ai. (2Kor. 4:1, 7; 6:4) Sada mâsib ga ra mā-am da o kaises tamas ka io ǂkharirose aoǁnâsa, o da ge ǃaromasa nî ūhâ ‘ǃgâiaǂgaos’ disa sada ǃoabas ǃnâ da a ǀoasa amaga. (Gal. 6:4) Sada ǃoabasa da ga dīǀoaǀoa o, o da ge ra ǁgau Jehovab tsî sada ǀgūkhoen tsîna da a ǀnam ǃkhaisa. “Nēnats ga dīo, ots kom sa-aitsama tsî ǁnâu tsi ran tsîna nîra ǃgâiǃō kaio.”—1Tim. 4:16. w19.04 6 ¶15; 7 ¶17

ǂAm ǀgaub ǁGâuab tsî ǁîb demongu khoena ra ǂgaeǂhapub ge ǃgaidīb ǃnâ-ū. ǁNān hîna ǃgaidība ra sîsen-ūn ge khoen ǃgōsase a ǀū xūna ǂan tsî a dī ǁkhā. Aiǁgause, ǀnîn ge hānîǁaeb xa a ǂan ǃgaidība sîsen-ūs ǃnâ-ū. ǀNîn ge ǁō hâ khoen ǀkhan ra ǃhoa khami ra ǁgausen. ǀNîn ge ǃgaidība sîsen-ū tsî khoena ra tsûtsû. Ôaǃnâs hîna ge dī-es ge ra ǁgau, nēs 18 ǃhūgu hîna Amerikab tsî Karibbeani ǃnâ hâgu ǃnâ ge hōǂuihesa, mâ ǃnonaǁî khoe-i hoa i ǃgaidīb tsî ǁō hân ǀkha ǃhoas ǃnâ ra ǂgomsa. Tsî ǀnî ôaǃnâs ge 18 Afrikab ǃhūgu ǃnâ ge dī-e. ǂAn da nîs ge hâ da a ǃkhai-i hoa i ǃnâ da ǃgaidīb ǃoa-ai nî ǃûisensa. w19.04 20-21 ¶3-4

Jehova Elob ge hoa ǃnôa tsū xūna a ǃhuisa. (Psa. 5:4-6) ǁÎb ge kaise ǀgôana ǃgâi tamase hâ-ūhesa a ǃhuisa tsî ǃgōsase ǀgôa ǀgaiǃkhōsa. Jehovab aiǁgausa ǁgaes ǃnân ge Jehovab di ǀHûǀguitimî-aona ǀgôa ǀgaiǃkhōsa ǃhuisa tsî nēsa Xristeǁî ǀhaohâgu ǃnâ ǃkhōǃkhō tama hâ. (Rom. 12:9) Hoa ǀgaugu ǃnâ ǀgôan ǀkha tsūse hâs ge “Xristub di ǂhanub” ǃnâ ra mâǃoahe. (Gal. 6:2) Jesub gere ǁkhāǁkhā xūn, dīb tsî mîb geren hoana ǀnammi ai ge ǃgaoǃgaosa i tsî ǂhanu-aisiba gere aiǃgû kai. Nē ǂhanub xa ǂgaeǂgui-e hâsen ge ama Xristeǁîna ǃnorasase tsî ama ǀnam-en a ǃkhaisa ǁîn ǀgôana ra tsâ kai. Xawe ǀgaiǃkhōs ge kaise a ǁgai ǀgôana i ǀnam-e taman hâ khami ra tsâ kai tsî ǃnorasaoǃnâses tsîna amaga. ǃOaxases ge ama Xristeǁîn tsîna nēs xa ra tsâǀkhāhe. Tae-i ǃaroma? “ǂKhaba khoen tsî ǂgaeǂhapu-aon” tsîn ǀoa hâ tsî ǀhaohâgu ǃnâs tsîna a ǂgâxa ǁkhā amaga. (2Tim. 3:13) ǁNān hîna ǀhaohâgu ǃnâ hân tsîn ge nē turaga ǃkham ǃoasa dan hō tama i tsî ǀgôana ge ǀgaiǃkhō nē turaga taniǂuis ǃnâ. w19.05 8 ¶1-3

Khoe-i hîna kai tsûb ǃnâ hâ i ge nî ǃgombahe ǀgoresa. ǁÎ-i ge xūose nî tsâ Jehovaba ǃoa ǀgūsa. ǁNā khoe-e da ga ǁkhaeǂgao ǂgao o, o da ge ǁî-i ǀkha a ǀgore ǁkhā, ǁî-i ǀonsa ra sîsen-ūse. ǁNā ǀgores ǃnâ da ge Jehovaba a mîba ǁkhā ǁnā khoe-e da kaise a ǀnam ǃkhaisa. Jehovaba da ge a ǂgan ǁkhā îb ǃoab ǃnâ hâ khoe-e hui î-i tsaura ǂgaoba ūhâ tsî ǁkhaeǂgaosa hō. ǁNā ǀgoredi ge kaise ǃgâise ra ǁkhaeǂgao da. ǂÂi re, ǃhoa du nîs aiǃâ. ǂÂiǃgâ-e tama hâ mîdi ge a tsûtsû ǁkhā. Khoexaǃnâ mîdi ge a ǂgauǂgau da ǁkhā. (ǂKhm. 12:18) Jehovaba ǃoa ǀgore re, îb hui du khoexaǃnâsib, ǁkhaeǂgaos tsî tsaura mîdi tsîna hōsa. ǂÂis ǃnâ ūhâ re mîdi hîna a huida ǁkhā dige Jehovaba xu ra hā, nē mîde da ge Elobmîs ǃnâ ra hō. (Heb. 4:12) Khoena da ga ǁkhaeǂgao o, o da ge ǁîna Jehovab a ǀnam nî ǃkhaisa ra ǂâiǂâiǃnâ. Tsî da ge tā nî ǀuru Jehovab a ǂhanu-aisib Elosa. Jehovab ge tsûtsûhe ge khoen hoana ra mûǂan, nau khoen ga mû tama i xawe. Jehovab ge hoa xūna ra mû tsîb ge nî dī î-i ǃhausen tama hâ tsūdī-ao-e ǁkharahe.—Num. 14:18. w19.05 18 ¶18; 19 ¶19, 21

ǁGâuab ge ra ǂgao î da Jehovaba ǀnam ǀû. Nēsa dīǀoaǀoas ǃgaob ge sida ǂâiǀgauba ra dawa tsî ra dī î da ǁîba ǁnâuǀnam tsî ǁîb khami ǂâi tsoatsoa. ǁÎb ge ra ǂgaeǂhapu da î da ǁîba sao, sida a ǀnam xūna sîsen-ūs ǃnâ-ū. (Kol. 2:4) ǁGâuab xa ǂgaeǂhapuhes ǁkhōǁkhōsasib ǃnâ da amabes ǃnâ hâ? Îo, ǁnās ge a ama. Paulub ge Koloseǁîn 2:8 tawa a mā ǃkhâikhoms ge Jehovaba ǃoaba tama hâ khoen ǃgao xoasa tama hâ. ǁÎb ge Xristeǁîn hîna ǃanu gagab ǀkha a ǂkhauhesana ǃoa ge xoa. (Kol. 1:2, 5) ǁNā Xristeǁîn ge ǁkhōǁkhōsa mâsib ǃnâ ge hâ i tsî sida tsîn ge kai ǁkhōǁkhōsasib ǃnâ hâ. (1Kor. 10:12) Tae-i ǃaroma? ǁGâuab ge ǃhūbaiba ǃoa ge aoǁnâ-e tsî ǃgarise ra dītsâ Elob ǂgomǂgomsa ǃoaba-aona ǂgaeǂhapusa. (J.ǂHa. 12:9, 12, 17) Tsî ǁnās ǂam-ai da ge ǂkhabaxa khoen tsî ǂgaeǂhapu-aon “ǃaruǀîǀgui nî tsū” ǃhūbaib ǃnâ ǁan hâ.—2Tim. 3:1, 13. w19.06 2 ¶1-2

Eliab ge Gao-aos Isebelsa gere ǃao ǃgambis nî dis ge mî o. Ob ge ǁîba Bersebasa ǃoa ge ǃkhoe. ǁÎb ge ǁnātikōse ǂkhabuǂâi tsî ge mî “ti ǀomsa ū” re ti. Tae-e di gere tsâ kaibi? Eliab ge ǀoasa kurusa ge ūhâ tama hâ i tsî “sada khami ī khoe ge i” tsâsigu ǀkha. (Jak. 5:17) ǁÎb ge ǀnîsi kaise ge tsûaǂgao tsî tsau hâ i. ǀNîsib ge Eliaba gere ǂâi ǁîb ǁgūtsâdi ama ǃoabasa ǃkhambas didi go ǁauxū-i di tsî i xū-e Israeli ǃnâ ǀkhara tama hâ di tsîb ǁîb ǀguiba Eloba ra ǃoabase ǃgau hâ di. (1Gao. 18:3, 4, 13; 19:10, 14) Jehovab ge Eliab tsâsiga gere ǁnâuǃātsî ge mî ǁgaiǁgai bi tama hâ i nē tanisen ǀgaub ǃaroma. Xaweb ge Eliaba ge hui îb ǁîb ǀgaiba hō-oa. (1Gao. 19:5-7) Jehovab ge Eliab ǂâiǀgauba ega ge dawa ǁîb ǀgaiba ǁgaubis ǃnâ-ū. Tsîb ge ǁnāpaxū Jehovaba Eliaba ge mîba noxoba gu 7000 khoega Israeli ǃnâ hâsa hîna Baala ǃoaba tama hâ ga. (1Gao. 19:11-18) Nē aiǁgaude mābis ǃnâ-ūb ge Jehovaba Eliaba ǀnambib a ǃkhaisa ge ǁgau. w19.06 15-16 ¶5-6

Hoaǁae māsa ǁgaraga sao re. ǂGomǂgomsa ǃgâsaga xu da ra hō daoǁgaude da ga sao o, o da ge ǃgomsina xu nî ǂgōsen. Aiǁgause, aoǁnâ sîsenni a ǂkhāsa ǃhūb ǃnâ gu ge ǃgâsaga ǃgâsana ra mîba în tā ǂkhanina khoena mā. Aimâba-ao ǃgâsab ge ǁgaraga ge sao tama hâ i tsî khoena ǂkhanina gere mā. Tae-e ge ī? ǁÎb tsî nau ǃgâsan tsîn ge aoǁnâ toas khaoǃgân ge ǀapaǃnamgu xa gere dîǃnâ-e. ǀApaǃnamgu ge ǁîna gere sao tsî ǁîn gere māǂui ǂkhanina ge ū-oa. Tae-e da nē aiǁgausa xu ra ǁkhāǁkhāsen? Mā-e da ra daoǁgaude da ga ǁnâuǃā tama i xawe da ge nē daoǁgaude nî sao. Jehovab ge sida ǃgâsagu hînab ge ǁîba a ǁgaumâigu ǀkha da ga sîsenǀhao o, o ra ǀkhae da.—Heb. 13:7, 17. w19.07 12 ¶17

ǃUis hînab ge Jesuba a ǃgam-es aib ge ge mî ǁîb ǁkhāǁkhāsaben ge nî saoǃgon-e di. (Jhn. 17:14) Nētsēs tsînan ge Jehovab di ǂgomǂgomsa ǃoaba-aona, khoen hîna ama ǂgomsa ra mâǃoan xa ra saoǃgon-e. Nē ǃhūbaib ǀams ra ǀgū khamin ge sada mâǃoa-aona ǀgaisase nî mâǃoa da. (Mat. 24:9) Mati da nēsi a aiǂhomisen ǁkhā ǃâitsâna mâǃoas ǃnâ? ǂHâǂhâsa tama i ge hâ sada ǀkha nî ī tsū xūn hoana ǂâiǃgâsa. Nēsa da ga dī o, o da ge ǃaob xa nî ǃkhōǃnami-e. Sada ǂâidi ge nî ǃaroma i da ǃâitsâgu noxoba hā tama hâ hîna ǃao tsoatsoa. (ǂKhm. 12:25; 17:22) Sada “mâǃoasabeb ǁGâuab” ge nē ǃaob tsâsiba sada ǃoa-ai ra sîsen-ū. (1Pet. 5:8, 9) Jehovab ǀkha da ūhâ ǀhōsagusisa da nēsi a ǀgaiǀgai ǁkhā. w19.07 2 ¶1-3

Apostelgu ge kaise ge ǂkhî i ǃhommi ai gu ge ǀhao hâ io. Jesub ge ǁîb ǁōb khaoǃgâ ge ǂgangu îgu ǁnāba ǁîb ǀkha sī ǀhao. (Mat. 28:16) ‘ǁNās khaoǃgâb ge ǀgui ǃnās ai korokaidisisa [500] ǃnā hâ ǃgâsan xa ge mûhe.’ (1Kor. 15:6) Tae-i ǃaromab ge Jesuba ǁîb ǁkhāǁkhāsabega ǁnāǀî ǂgai? ǁÎga sîsen-e mās ǃaroma: “ǁNā-amaga ǃgûǂoa, î go hoa ǁaede ǁkhāǁkhāsabedī.” (Mat. 28:18-20) ǁKhāǁkhāsabegu hîna ge Jesub mîde a ǁnâugu ge ge ǂguroǁaeb Xristeǁîn ǀhaohâb ǃâ kai. Nē ǀhaohâb di ǂâibasens ge ge i ǁkhāǁkhāsabedīsa. Nētsē î ge ǂgui ǀhaohâga hâ hîna ama Xristeǁîna ūhâga tsî nē ǀhaohâgu ǂâibasens ge noxoba a ǀgui. w19.07 14 ¶1-2

ǃNarimâra sari-aob ge Norwayb ǃnâ ge mî khoen hîna Elob xa ǃhoa ǂgao tama hân ge ǃhūbaib ǃnâ ra ī xūn xa ǃhoas xa a ǃgâibahe. Khoena tawede toa tsîb ge ra mî: “Tae-e du ǃgâi hānîǁaeb hîna da nî ūhâb xa ra ǂâi? Sida ǃâubasensa ǂgīǂgōsi ǂgaeǂgui-aogu, kurusǂansa ūhâ khoen tamas ka io ǀnî hâ khoe-e xu hâ?” ǃGaoǃgâxase ǃgâ tsîb ge xoasa ra khomai hîna ǃgâi hānîǁaeba ra ǁgausa. ǀNîn ge Elobmîs mîmâis hîna ǃhūbaib ge ǀamosib kōse nî hâ tsîn ge ǃgâi khoena ǀamosib kōse nî ûi di hâs xa ra buru kaihe. (Psa. 37:29) Dītsâ da ge nî ǀhao-ū da ra khoena ǃkharagaǃnâgu ǀgaugu ǃnâ ǃhoa-ūsa. Tae-i ǃaroma? ǀNî khoe-e a ǃgâiba xū-i ge nau khoe-i xa ǃgâ-e tide. ǀNî khoen ge Elob tamas ka io Elobmîs xa ǃhoas xa a ǃgâibahe xawen ge ǀnîna ǀnî hâ xūn xa ǃhoas xa a ǃgâibahe. Mâ ǃēs hoasa da ge nî sîsen-ū hoa khoen ǀkha ǃhoasa. (Rom. 1:14-16) ǂÂis ǃnâ da ge ra ūhâ ǂgao Jehovab ǂhanu ai ǂgaoga ūhâ khoen ǂgaogu ǃnâ hâ amaba ra kai kai ǃkhaisa.—1Kor. 3:6, 7. w19.07 22-23 ¶10-11

Elob sida ūba hâ ǀnammi ge nî ǁgari da i da sida ǃgâsana ǀnam. (1Jhn. 4:20, 21) ǀNîsi da ge ra ǂâi kaise i a supu di sida ǃgâsana ǀnamsa, nēs ge hoa da Jehovaba ra ǃoaba amaga tsî ra dītsâsa ǁîb di ǃgâi ǀgauga ǁgaesa. Jesub aiǁgausa da ge ra ǁgae hîna ge kai ǀnamma a ǁgauba ǁîb ûiba sida ǃgao mās ǃnâ-ū. Xawe ǀnî ǁaegu ai i ge ǃgom ǀnammi xa hâ mîmāsa ǁnâuǀnamsa. Euodias tsî Sintixes tsîra ge ǁkhoaǂgaoxa ǃgâsara hîna ge apostel Paulub ǀkha gere sîsen ra. Xawe ra ge ǀnîsi ǁîra ǁaegu ǃgomsina ge hōǃâ tsoatsoa tsî ge ǀhōsagu tama hâ i. ǁÎb sîǂkhanis hînab ge nē ǃgâsara ge hâ i ǀhaohâba ǃoa a xoas ǃnâb ge Pauluba Euodias tsî Sintixes tsîra ǀonde ǂgai tsî ǁîra ge ǃkhâikhom “î ra . . . ǀguiǂâixa.” (Fil. 4:2, 3) Paulub ge hoa ǀhaohâba ǃoa ge xoa mî rase: “Hoa xūna ǀaras tsî ǃhoaǃoas ose dī re.”—Fil. 2:14. w19.08 9 ¶6-7

ǂGui ǀhaohâgu tsî ǃgâsan ge ǁnān hîna ǀoasa ǁaeb aoǁnâ sîsenni ǃnâ ra ǁhaona ra hui în ǁîn ǁgaumâidi ǃnâ hâ ǀgara. ǁÎn ge nēsa ǁîna ǁîn di ǂhâsigu ǀkha huis tamas ka io ǁîn ǀaokhoe-i hîna ǀaesen hâ-e kōǃgâba nîs ǃnâ-ūs tsîna a dī ǁkhā. ǀOasa ǁaeb aoǁnâ-aon ga sadu ǀhaohâga ǃoa sîhe o, o tā ǂâi re ǁîn, ǁîn sîsenna ǃgâise ǁnān hâba dī tama tamas ka io tsū xū-e dī hâ di. ǁÎna hui re is nēsa ǃhaese dī-e ǁkhā. ǁKhoreǁhare nî re tsî dīn ge sîsenni amsi koa nî re, ǀaeb mâsib xan ga nēsi ǃnāsase dī tama i xawe. ǁÎn ǀkha ǀhōsagusisa kuru re. ǁÎn di gā-aisib, ǁkhāǁkhāsen an ge xūn tsî ǂans tsîn xa ǃnāsase ǁkhāǁkhāsen re. ǁNān hîna ǀasa ǁgaumâide ūhân ge omde ôa huihe, ǃnarimân nî ǀgausa ǁgau-e tsî ǀnî hâ xūn hînan ǂhâ hân ǀkhas tsîna nî hui-e. w19.08 23-24 ¶12-13

Gogi ge ǁîb di ‘ǁgansi ǁôab’ ai nî ǂgomaiǂnûi. (2Kro. 32:8) Sida Elob Jehovab ai da ge nî ǂgomaiǂnûi nēs ge ǃhaodi xa gâresib ase nî mû-e. Babilons Kais di elogu ge ǁîsa ǃgarob “ǀgurub” tsî “disi ǁnâgu” tsîna xu ge sâu tama hâ i. (J.ǂHa. 17:16) ǁNās ǀkha di ge ǃhaode nî ǂâi sidan supuse nî hîgāgā di. ‘ǀNanudi hîna ǃhūba’ ra ǃgū-aidi axase i ge Jehovab di ǃoaba-aona nî ǁnāǂam-e. Xawe i ge ǃhaode nî mûǂan nēsa xūn sâusen hō tidesa. Faraob ge ǂĀxahurib tawa mûǂan khamib ge Goga nî mûǂan ǁîb Jehovab ǃoagu ra ǃkham ǃkhaisa. (Eks. 14:1-4; Ese. 38:3, 4, 18, 21-23) Xristub tsî ǁîb di ǀhomsi toro ǃkham-aogu tsîn ge Elob khoena nî ǁkhauba tsî ǃhaodi tsî ǁîn toro ǃkham-aon tsîna hoase nî hîgāgā. (J.ǂHa. 19:11, 14, 15) Tae-e Jehovab khākhoeb Satanni ǀkha nî ī hîna ge ǃhaode a ǂhumibaba tsî a dība î di ǃhaode Jehovab khoena ǁnāǂam Armagedons tawa. Jesub ge ǁîb tsî ǁîb demongu tsîna duisend kurigu ǀgaiba ǃkhōsis ǃnâ nî ū.—J.ǂHa. 20:1-3. w19.09 11-12 ¶14-15

Hoaǁae da ge Jehovab ge mîmâiba da ǃgâi ǀkhaega ǃoa ra mûǂui. ǃÂubasen da ra ǀkhaega da ga hōǃâ tama i o, o da ge ǁkhoaǂgaosiba a ǂoaǃnâ ǁkhā. Tsî da ge a ǂkhabuǂâi ǁkhā. (ǂKhm. 13:12) Nēs ge 1914ǁî kuriba ra sao kurigu ǃnâ ǀnî ǃgâsan ǀkha ge ī. Nē ǁaeb ǃnân ge ǂgui ǂkhauhesa Xristeǁî ǃgâsana ǀhomma ǃoa gere ī ǂgao 1914ǁî kurib ǃnâ. Nēs ge ī tama i o, on ge ǃgâsana mati nē ǃâubasens hîna ge dīǀoaǀoahe tama hâ is xa tsâ? ǁÎn ge Jehovaba ǃoabas ai ǁîn ǂâisa ge ǂnûi hâ i tsî ǀhommi ǀkha īs ose. ǁÎn ge nē ǃkhoeǀhûgusa ǀams kōse ǃkhoesa ge mîǁgui. Hoa da ge ra mûǂui ǁaeb hînab Jehovaba ǁîb ǀonsa nî ǃanuǃanus tsî ǁîb di ǀkhaegu hînab ge mîmâiga nî dīǀoaǀoaba ǃoa. ǂÂis ǃnâ ūhâ re nē xūn hoan Jehovab mîmâi hâ ǁaeb ai nî īsa. ǁNā ǁaeb kōse a da Eloba ǃoaba ǀgara tsî dīǀoaǀoahe tama hâ mîmâiga tā mā-am îgu ǂkhabuǂâi kai da. w19.08 4-5 ¶9-10

Dîsen re: ‘Khoena tsauraǂgaoxa tsî ǃgamǃgamsenxa khoe-i ase ra mû te? Nau khoena ǃnaga ra hâba sîsena ta ra dī? Nau khoen ǃoagu ta a khoexaǃnâ?’ Jesub ge ǃnomsa tsî ǃgâi ǀgaub ǃnâ khoen ǀkha gere sîsen tsî ǁîna ǁkhāǁkhās xa ge ǃgâibahe i. (Luk. 10:1, 19-21) Jesub ge ǁîb ǁkhāǁkhāsabega gere ǂkhâǃnâ îgu dîde dî tsî ǁîgu ra ǂâi ǀgauba gere ǁnâu ǂgao. (Mat. 16:13-16) Haidi hîna ǁgai ǂoab mâsiba xu ǁkhaubahe tsî ra kai di khami i ge Jesub ǁkhāǁkhāsabena ge kai. ǁÎn ge Jesub gere ǁkhāǁkhā xūna ǃgaoǃgâ tsî ǃgâi ǂûna ge tani. Khoena mûǂams di aiǂhanuba du ūhâ? Ūhâ du ga o, o dîsen re: ‘Nau khoena ta mati ra hâ-ū sîsenni tawas tamas ka io oms tawa? ǀGuiǃnâxasiba ta ra omkhâi? Khoena ta ra ǂkhâǃnâ în dîde dî? Tsî ǁîn ra ǂâi ǀgauba ra ǃgâ?’ Farisegu khami da ge ī ǂgao tama hâ. ǁÎgu ge gere ǁaixa khoen ge ǁîgu ra mî xūna ǂgom tama i tsî ǁîn ra ǂâi ǀgauba gere ǁgâiǂnûisen o.—Mrk. 3:1-6; Jhn. 9:29-34. w19.09 20 ¶1; 23 ¶9-11

ǃHūbaib ǂgaeǂgui-aogu tsîn ge nē ǂâi ǀgauba ra sîsen-ū ǃhaode ǀguiǃnâxa kais xa gu ga ǃhoa o. Xawe “ǂkhîb ge hâ tsî tsūǃgâ-i a ǀkhai” di hâ ǂanǂans Elobmîs ǃnâ hâs ge nî ǀkhara. Tae-i ǃaroma? Nēs ga ī on ge khoena nî ǂâi ǃhūbaib ǂgaeǂgui-aogu go ǂkhîb tsî ǃnorasasib tsîna hoa ǃhūbaiba hā-ūba di. Xaweb ge “kai ǁgâiǀāba” nîra tsoatsoa tsî gu ge “kai tsūǀkhāga” nîra hâ. (Mat. 24:21) ǀŪ da ge a tae-i nî ǃaromasa nē ǂanǂans nî mā-es aiǃâ tamas ka io matis nē ǂanǂansa nî mā-e ǃkhaisa. Nē ǂanǂans nî ǃâgu ǃnâ tamas ka io ǀgui ǁaeb ai dīhe ǃkhais tsîna da ge a ǀū. Tae-i ǀgui i ga ī xawe da ge tātsē ǂgom ǂgao tama nē ǃhūbaib ǂgaeǂgui-aogu ǂkhîba ǃhūbaiba nî hā-ūba di. Xawe nēs ge ‘Jehovab kai tsēs’ di tsoatsoas ǁgauǁgaus ase nî ī.—1Tes. 5:2. w19.10 8-9 ¶3-4   

Armagedons di torob ge nî nē ǃhūbaib di ǀam i. Xawe da ge xū-e ǃao tama hâ. Tae-i ǃaroma? Nēs nî Jehovab di toro i xui-ao. (ǂKhm. 1:33; Ese. 38:18-20; Sax. 14:3) Jehovab di mîmās ǃnāgab ge Jesuba nē toroba nî ǂgaeǂgui. Nēsab ge khâisa ge māhe ǂkhauhesan tsî ǀhomǃgāgu tsîn di huib ǀkha ni dī. ǁÎn ge Satanni, ǁîb demongu tsî toro ǃkham-aogu tsîn ǃoagu nî ǃkham. (J.ǂHa. 6:2; 17:14) Jehovab ge ge mîmâi “sîsenūxūs sa ǃoagu ga ǁāǁāhes hoas ge ǃgâiǃgâ tide.” (Jes. 54:17) Jehovab di ‘kai ǂnūbis’ ǂgomǂgomsa ǃoaba-aon ge ‘kai ǁgâiǀāb’ ǁaeb ai nî sâuhe. Tsîn ge nî aiǃgû ǁîba ǃoabas ǀkha. (J.ǂHa. 7:9, 13-17) Elobmîs ge ǂgomǃgâsiba ra mā da ǁnā ǁaeb ǃnâ da nî sâuhesa. ǂAn da ge a Jehovab ‘ǂgomǂgomsa khoena ra sâu’ ǃkhaisa. (Psa. 31:23) Hoan hîna Jehovaba a ǀnam tsîra ǂkhaisiba mān ge kaise nî ǃgâiaǂgao ǁîb di ǀonsab ga ǃanuǃanu o.—Ese. 38:23. w19.10 18-19 ¶17-18

ǃGamse da “ǀuni tsēdi ǃnâ” ra ǂgâ khami da ge kai ǃgomsina ra hōǃâ. (2Tim. 3:1) Aiǁgause, huriǂoas Afrikab dis ǃnâ i ge ǁhûisa toa o, o i ge kai ǃkhamsa ge hâ i. Kaise i ge ge ǁkhōǁkhōsa i sada ǃgâsan ǃaroma, khoen ǁnā ǂharidi ǃnâ gere ǃkham amaga. Tae-e nē ǃgom ǁaegu ǃnâ ge hui nî? ǀNîn ge ǃnomsa ǂharidi ǃnâ gere hâ ǃgâsan tawa sī gere hâ. ǀNî ǃgâsab ge ge mî: “Nē ǁaegu ǃnâ ta ge kaise ǃgâi ǀhōsana ūhâsa gere ǃgôaǃgâ di. Nēs ǃnâ-ū da ge a ǂkhâǃnâgu ǁkhā.” “Kai ǁgâiǀāb” ga tsoatsoa o, o da ge ǃgâi ǀhōsan hîna a ǀnam dana ūhâsa nî ǃgôaǃgâ. (J.ǂHa. 7:14) Nēs ǃaroma da ge nēsi ǀgaisa ǀhōsaguside ra omkhâi ǂgao. (1Pet. 4:7, 8) Tae-i ǃaroma? Sida khākhoen ge ra ǀgora da ǂgao, ǂhomib tsî ama tama ǂhôan hînan ra sîsen-ūb ǃnâ-ū. ǁÎn ge ra ǂhâba î da ǃhuigu. Xawe ǁnāsan ge dī hō tide. ǁÎn ge sida ǀnamma khôa tide. w19.11 2 ¶1-2; 7 ¶19

Satanni “ǂhumib di ǁgûb” ge ǁîb ǃnāga ra sîsen khoena ra sîsen-ū, Jehovab tsî sada ǃgâsan tsîn xa hâ ǂhumiba aiǃgû kais ǃnâ. (Jhn. 8:44) Aiǁgause ama tama ǂgomdi ge ǂhumiba Jehovab ǀapeǂhumis xa internets tamas ka io ai-īsiǂhôaǂgares ǃnâ-ū ra mā ǃkharu. Nē ǂhumib ǀnîb ge Satanni di “ǀaexa ǂāgu” di ǃâ. Tae-e da nî dī khoen ga sada ǀkha nē ǃnôa ǂhumib xa ǃhoa tsoatsoa o? Sada ge nē ǂhumiba ǃgâ tide. Tae-i ǃaroma? Sada ge Jehovab ǃnâ ǂgomsa ūhâ tsî sada ǃgâsana ra ǂgomǃgâ. Tsî da ge ama tama ǂgomde xu ra ǂgōsen ǂgao. Sada ge xūn hoana xu ra ǂgōsen tsî xū-e mā-am tama hâ în nē ǃnôa khoen ǀkha ǀhaoǀhao da. Dītsâ da ra ama tama ǂgomdi sada xa ra mî ǂhumiba ǃgâ tama isa tsî tā ǁîn ǀkha ǂnoagusa? Tsî ǂkhabuǂâis tsâsigu tsîna du ra mâǃoa hō? Nēs ga ama o, os ge sadu ǂgomsa ǃgâi mâsib ǃnâ hâ. Xawe da ge nî ǂanbasen Satanni ge ǀnî hâ ǃâitsâgu tsîna ūhâ hînab sada ǃoa-ai ra sîsen-ū ǂgaoga. w19.11 15 ¶8; 16 ¶11

Sadu mîǁguigu di ǃaromade ôaǃnâ re. Jehovab ge mîǁguiga da ra dība ǃaromadi ǃnâ ǃgâiǃgâibasensa ūhâ. ǁÎb ge ǂhâba hâ i da hoa xūn ǃnâ ǂhauǃnâ. Nēs ǃaroma da ge mîǁguiga da ga dī o, sada tsî nau khoen ǃoa-ais tsîna ra ǂhauǃnâ ǂgao. ǂHauǃnâ ūsen tama da ga i o, o i ge sada mîǁguiga dīǀoaǀoasa a ǃgomba da ǁkhā. Aiǁgause ǂkham ǃgâsab ge a mîǁgui ǁkhā aimâba-ao kaisa. ǁAeb ra ǃkharu khami i ge ra ǃgomba bi tsoatsoa ǁîb di irga hōǂgās ǀkha tsîb ge nēs xa ǃaroma-e hâse ǀoro ǂkhîba aoǁnâ sîsenni ǃnâ ūhâ. ǁÎb ge ge ǂâi ǁkhā i, ǁîb ra aimâba-ao kai ǃkhais ge ǁîb Jehovaba ra ǂkhîǂkhî ǂgao amaga di. Xaweb ge ǁîba ǁîb di ǁgûn tsî ǀnî hâ khoe-i tsîna ǂkhîǂkhîs di ǂâisa ūhâ tama hâ i? Elobmîsa ra ǁkhāǁkhāsen khoe-i hîna ge ǂgae ǀûsa mîǁgui-i di aiǁgausa ǃoa kō re. ǂGurob ge wekheb tamas ka io ǀgamkha ra ǂgae ǀû tsî ǁnās khaoǃgâ ǂgaes di turaba hō tsî ra ǂgae tsoatsoa. Xaweb ge ǀams ai ra ǂgae ǀû. ǁÎb ǀnammi hînab Jehovaba ūba hâb tsî Jehovaba ǂkhîǂkhîs ge ra hui bi nēsa ǀûs ǀkha.—Kol. 1:10; 3:23. w19.11 27 ¶9; 29 ¶10

Apostel Paulub ge ǂgomǃgâsiba ge ūhâ i, nē ǃkhoeǀhûgusa dan tsîb nî ǁîb di mîǁguiba dīǀoaǀoa ǃkhaisa. ǂKhauhesa Xristeǁîb aseb ge ‘ǀgapiseba ǃoa ra ǂgai’ ǀkhaega ǃoa gere mûǂui. ǁÎb di mîǁguiba sīǃnâs xab ge ge mûǂan aisǀkhāba ǃoab nî “ǀhōǂuisen” ǃkhaisa. (Fil. 3:14) Paulub ge ǃgâi ǂkhōsa ge sîsen-ū Filipeǁîna huis ǃnâ în ǁîn di mîǁguiga dīǀoaǀoa ǁkhā. Paulub ge Filipeǁîna ǁîn di ǀhomsi ǁanisis xa ge ǂâiǂâiǃnâ. (Fil. 3:20) Tae-i ǃaroman nēsa nî ǂâiǂâiǃnâ-e ge īsa? ǁNā tsēdi ǃnân ge khoena gere Romeǁî ǁani kai ǂgao ǂgui ǃgâi xūnan gere ǁnāba xu ǀama amaga. Xawen ge ǂkhauhesa Xristeǁîna ge ǀhomsi Gaosib di ǁani i hîna ǃgâi ǀkhaega nî mā nî ba. ǀHomsi Gaosib ǀkha i ga ǀgopeǀnō-e o, on ge Romeǁî ǁanina ǂgui ǀkhaega ge ūhâ tama hâ i. Nētsēs ǂkhauhesa Xristeǁîn ge ǃgâi aiǁgausa ra ǁgau ǀhōǂuisens ǃnâ ǁîn di ǀhomsi ǁgaumâisan nî hōs kōse. w19.08 6 ¶14-15

Nē ǃnorasasib ge Israelǁîn ge dâkurib ǁaxasib tawa gere hō ǃnorasasib xa ge kai i. (Lev. 25:8-12) Aiǁgause khoe-i hîna ge dâkurib ǁaxasib tawa gere ǃnora kaihe i ge ǁkhawa ǃgāsisa ǃoa ge oa ǁkhā i tsî ega ǁōs tsîna gere hî. 33ǁÎ kurib pinkstertsēs aib ge Jehovaba apostelgu tsî ǀnî hâ ǂgomǂgomsa aogu tsî taradi tsîna ǃanu gagab ǀkha ge ǂkhau. ǁÎb ge ǁîna ǁîb ǀgôan ase ge ūǃoa în hānîǁaeb ǃnâ khâisa hō tsî Jesub ǀkha sī ǀhommi ǃnâ ǂgaeǂgui. (Rom. 8:2, 15-17) ǁÎn ge ge ǂguro i Jesub ge Nasarets di sinagogegu ǃnâ gere ǃhoa ǃnorasasiba xu ǀamasa. (Luk. 4:16-19, 21) Nē aogu tsî taradi tsîn ge ama tama ǁkhāǁkhān tsî Elobmîs ai ǃgaoǃgaosa tama ǁnaetigu Jodeǁî ǂgomdi ǂgaeǂgui-aogu dina xu ge ǃnora kaihe. Elob ge ge mî ǁîn ge ǁoreb hîna ǁōba ra ǃaromaba xus tsîna ge ǃnora kaihe di. Dâkurib ǁaxasib hîna ge 33ǁî kuri Xristub saosabena ǂkhauhes ǀkha a tsoatsoab ge Jesub ǀoadisi ǂgaeǂguis ǀams ai nî ǀam. w19.12 11 ¶11-12

Sadu ǀgôana hui re, în ǃgâi ǀhōsana ǁhûi. ǀGôa-i di ǁgûs tsî ǁgûb tsîn ge hoara nî ǂan ǁî-i ǀgôa-i ham-i ǀkha ra hâs tsî tae-en da dīs tsîna. Nēs ge ra ǂâibasen, ǂan ǀgôa-i ham-i ǀkha internets ǃnâ-ū ra ǃhoas tsî ǁîn ǁâǁawagu ais tsînasa. ǀGôa-i ra hâ-ū khoen ge ǁî-i di ǂâiǀgaub tsî tanisen ǀgaub tsîna a tsâǀkhā ǁkhā. ǂGui ǁgûn ge ra dītsâ în ǁîn ǀgôana ǃgâi aiǁgausa Eloba ǃoabas ǃnâ ra mān ǀkha hâ. Aiǁgause N’Dénib tsî Bomines hîna Côte d’Ivoireb ǃnâ ra hâra ge ǀnî ǁaegu ai ǃnarimâra mûǂam-aoba gere ǁkhau îb ǁîn oms tawa sī hâ. N’Dénib ge ra mî: “Nēs ge kaise ǃgâi sîsenǂuiba sim ǀgôab ai ge ūhâ i. ǁÎb ge aimâba-ao sîsenni ǀkha ge tsoatsoa tsî nēsi a mâǁkhae ra ǃnarimâra mûǂam-aob.” ǁGûn ga ǁîn ǀgôana noxoban a ǂkhariro hîna ǁkhāǁkhā tsoatsoa o, o i ge nēsa kaise a ǃgâi. (ǂKhm. 22:6) Timoteub xa ǂâi re. Timoteub ǁgûs Eunikes tsî ǁîb di aumas Lois tsîn ge ǁîba ‘ǀgôasisa xu’ ge ǁkhāǁkhā.—2Tim. 1:5; 3:15. w19.12 25 ¶14; 26 ¶16-17

ǂGomǂgomsa ǀhōsa i ase ī re. Aiǁgause da ge sada ǃgâsana da nî hui di ǀgui mî ǂgao tama hâ xawe xūna ǃoa ra kō ǂgao hîna da a dība nî ǁkhāna. (Mat. 5:37; Luk. 16:10) ǁNān hîna huiba ǂhâ hân ga ǂan o ǁîn ge sada xa a huihe ǁkhā di on ge kaise nēs xa ra ǂkhâǃnâhe. ǀGui ǃgâsas ge ra ǁguiǃā. ǁÎs ge ra mî “tsûa danab ǀkhats ge ǂnû tama hâ ǂants a xui-ao ǃgâsa-i hîna hui nî hā di go mî i ǂhanu ǁaeb ai ǀkhī tsî dī i nî se ī xū-e ra dī amaga.” ǁNān hîna ǃgom ǁaegu ǃnâ ra ǃkharun ge ǁkhaeǂgaosa ǂgomǂgomsa ǀhōsan tawa ra hō. ǂGomǂgomsa ǀhōsa ǂgao da ga o, o da ge ǃnūǃnâxasiba nî ūhâ. Zhannas kaikhoeb ge ǁîsa ǁnāxū o, os ge ǁîs di tsâsiga ǁîs di ǂgomǂgomsa ǀhōsan ǀkha ǀgoragus ǃnâ-ū ǁkhaeǂgaosa gere hō. “ǁÎn ge ǃnūǃnâxasib ǀkha gere ǃgâ te” dis ge ra mî, “ǀgui xū-e ta ǀguis xa ǃnāsa ǃnāde gere mî xawe.” Sadu tsîn ge a ǃgâi ǀhōsa kai ǁkhā ǃgâi ǃgâ-aose īs ǃnâ. w20.01 10-11 ¶9-11

Elobmîs ǃnâ da ge ǂgomǂgomsa aogu aiǁgaude ra mû hîna ge ǃanu gagaba a ǃkhōǃoa ga xawe ge ǀhomma ǃoa īs di ǃâubasensa ūhâ tama hâ i ga. Davib ge ǃanu gagab xa gere daoǁgauhe. (1Sam. 16:13) ǃAnu gagab ge ǁîba ge hui îb Jehovab di ǃgamsiba ǁnâuǃā tsî ge daoǁgau bi îb Elobmîs di ǃâ-e xoa. (Mrk. 12:36) Xaweb ge apostel Petruba ge mî “Davib ge ǀhommi ǃoa ǃapa tama hâ.” (ǃNǃkh. 2:34) Johaneb ǁĀǁnâ-aob ge ‘ǃanu gagab ǀkha ge ǀoaǀoahe.’ (Luk. 1:13-16) Jesub ge ge mî Johaneb xa a ǀgapi khoe-i ge ǀkhai di xaweb ge ǁkhawa ge mî Johaneb ge ǀhommi Gaosib di ǃâ tide di. (Mat. 11:10, 11) Jehovab ge ǁîb di ǃanu gagaba ge sîsen-ū nē khoega huisa i gu ǂoaǂamsa xūna dī xaweb ge ǁîb di gagaba ge sîsen-ū tama hâ i ǁîga ǁhûisa i gu ǀhomma ǃoa ī. Nēsa ra ǂâibasen ǁîgu ge ǂgomǂgomsa tama hâ isa. Hî-î. Nēs ge ra ǂâibasen Jehovab ge ǁîga khâisa nî mā di paradais ǃhūbaib ai ûis ǃgao.—Jhn. 5:28, 29; ǃNǃkh. 24:15. w20.01 25 ¶15

Jehovab ge ra ǁkhau da i da ǁîb ǃoaba-aon di ǃâ kai. Nē omaris ǁanin ge Elob ai māǁnâsen tsî ǁîb ǀGôab di xoremarib ǃnâ ǂgomsa ūhâ. Nē omaris ge kaise a ǂkhî. Nēsib ge sida ûiba ǂâibasensa ūhâ tsî da ge hānîǁaeb ǃnâ ǀam-e ūhâ tama hâ ûiba ǃoa ra mûǂui, ǀhommi ǃnâs gas tamas ka io paradais ǃhūbaib ai. Jehovab ge ge īǁkhā kai i da ǁîb omaris di ǃâ kai, sadab kaise a ǀnam amaga. Xawe nēsa īǁkhā kais ǃaromab ge kai ǁguibasa ge dī. (Jhn. 3:16) “ǃGomǀgausase” da ge ge ǁamahe. (1Kor. 6:20) Xoremarib ǃnâ-ūb ge Jehovaba ge ǃaroma i da ǀgū ǀhōsagusisa ǁîb ǀkha ūhâ. Aiǂhanuba da ge ūhâ hoaǀgaixa Eloba sida di ǁGûb di ǂgaisa. Tsî ǂoa goro ǁkhāǁkhāǃâs ǃnâ da go ǃhoaǃgao khamib ge Jehovaba a ǂoaǂamsa ǁGû. ǀNî Elobmîs xoa-aob khami da ge a dîsen ǁkhā: “Tare-e ta kha ǃKhūba nî mādawa-am, ǁîb di ǃgâidīgu ti tawab ge dīgu di amǃnâs ǃnâ?” (Psa. 116:12) ǃEreams ge, sida ǀhomsi ǁGûba da ge tātsē a mādawa-am ǁoa. Xawe ǁîb sida ūba hâ ǀnammi ge ra ǁgari da ǁîba ǀnamsa. w20.02 8 ¶1-3