Februarib

Sadu ǃgâsan ǀkha ǃgâi ǂangusa kuru re. ǁÎn ǀkha ǀhaos aiǃâ tsî ǀhaos khaoǃgâ ǃhoa re, dītsâ re ǁîn ǀkha aoǁnâ sîsenni ǃnâ sîsensa tsî īǁkhā i ga o, o ǂûǀhaos amsi ǁkhau nî re. Nēsa da ga dī o, o da ge nî mûǂan ǃgâsas hîna supuse ǃhoa-ūhe ǁoa khami ra mûsens taoxas ǀguisa ī ǃkhaisa. ǃGâsab hîna ǃkhūsisa ǀnam khami ra ǁgausen nî ǃhaokhoe ǃkhōǃoaxa ǃkhaisa. Omaris hîna hoaǁae ǀhaos tsoatsoa hâ hîna ǀguira ǀkhīs ra mâǃoahe ǃkhaisa. (Job 6:29) Tā da ge nî ‘ǁause omdi ǃnâ ǃgûma’ tsî khoen ǂhôan ǀkha nî ǂnû mâ. (1Tim. 5:13) Xawe i ge a ǃgâi sada ǃgâsan xa da xū-e nî ǂansa. Nēs ge ǁîna ǁnâuǃās ǀkha nî hui da. ǃGâi tama tanisen ǀgauba ūhâ di du ra ǂâi ǃgâsa i ǀkha du ga ǂangusa a kuru o, o du ge ǁî-e a tsâbaǁhao ǁkhā. Sada ǃgâsana ǂans ge sîsenna ǂhâ hâ. Xawe da ga Elobmîs aiǁgausa sao tsî sada ǂgaoga ǁkhowa-am o. O da ge Jehovab hîna ‘khoen hoana’ a ǀnammi aiǁgausa nî ǁgae.—1Tim. 2:3, 4; 2Kor. 6:11-13. w20.04 16-17 ¶10-12

ǁŌb nîs aiǃâb ge Jesuba ǁîb ǁkhāǁkhāsabega ge mîba î gu ǀnamgu. ǁÎb ge ge ǂan i māsenxase gu ga ǀnamgu o, o gu ǀguiba nî hâsa. Tsî ǃhūbaib xa gu ga ǃhuihe xawe gu nî mâǀgaisa. Tesalonikas ǃnâ ge hâ i ǀhaohâb di aiǁgausa kō re. ǁNā ǀhaohâb ge tsoatsoasa xūn ge ǁnā ǃgâsana gere mâǃoahe. Xawen ge ǁîna ǂgomǂgomsa tsî kai ǀnamma ge ūhâ i.  Tsî ǁnās ǀkha ǃgâi aiǁgausa nau ǃgâsana gere ǁgau. (1Tes. 1:3, 6, 7) Paulub ge ge ǂkhâǃnâ nî în ǀnamma ǃnāsase ǁgaugu. (1Tes. 4:9, 10) ǀNammi ge nî hui nî ǁnān hîna ǂkhabuǂâi hâna ǁkhaeǂgao. Tsî ǁnān hîna ǂkhabusana hui. (1Tes. 5:14) ǁÎn ge Paulub ge ǁnâma nî xūna ge dī. ǀGamǁî sîǂkhanis hînab ge kuriba ǃkharu tsî a xoas ǃnâb ge ge mî. “Tsî mâ-i hoa-i di ǀnammi, sadu hoadu ǁaegu du ūhâbagub ra ǃnā xui-ao.” (2Tes. 1:3-5) ǁÎn di ǀnammi ge ge hui nî în ǁgâiǀāgu ǃnâ mâǀgai ǁkhā. w21.03 22 ¶11

ǁKhā ǀgaub ai da ge ǀamo ûib di ǀkhaeba da ga dan ǂgao o, o Xristeǁî ûiǀgauba nî sao. (ǃNǃkh. 20:24; 1Pet. 2:21) Xawe ǁGâuab tsî ǁnān hîna ǁîba ra saon ge Xristeǁî ûiǀgauba da nî sao ǃkhaisa ǂgao tama hâ; ǁîn ge ǂhaba hâ i da ǁîn ǀkha ‘ǃkhoeǀhûgu.’ (1Pet. 4:4) ǁÎn ge sada ra sao daob xa ama tama xūna ra mî tsî ra mî ǁîn da ǃgû ai daob ge a ǃgâi tsî ǃnōrasasiba ǃoa ra ī di. Xawe nēs ge ama tama. (2Pet. 2:19) Kaise i ge a ǂhâǂhâsa ǂhanu daoba da nî ǁhûisa. Satanni ge ǂhaba hâ i da hoada ǂō daob ai ǃkhoe ǀû hîna “ûib ǃoa garuba” tsî hara daob hînan ǃhūbaib khoen hoana ra ǃkhoe-aib ai ǃkhoe. Nē daob ge supuse a ǃkhoe-aihe ǁkhā. Xaweb ge ‘kāǁōsib ǃoa garu.’ (Mat. 7:13, 14) ǂHanu daob ai hâ ǀgara tsî nēsa xu tā ǂgaeǂhabuhes ǃaroma da ge Jehovab ai ǂgomaiǂnûi tsî ǁîba nî ǃgâ. w20.04 26 ¶1; 27 ¶5, 7

Russiab tsî ǁîba ra ǂkhâǃnâ ǃhūgu tsîn ge “ǃhūb îsasib dib” ǃnâ ge ǂgâ. (Dan. 11:41) Matin nēsa ge dī? 2017ǁÎ kurib ǃnâb ge Russiaba Jehovab khoen sîsen-e ǀam kai tsî ǀnî ǃgâsana ǃkhōsis ǃnâ ge ū. Tsîb ge sida ǂkhanin tsî New World Translation Elobmîsa mâǂuisa ge ǀam kai. Saorasen ge ǁnâub beros, gaosib ǀhû-omgu tsî kai ǀhaodi ra ūhâ ǃnâ-e ǃkhaiga ge ǂganam. Nē xūn ge īs khaoǃgâs ge ǂgaeǂguira sorosa 2018ǁî kuri ge mî, Russiab tsî ǁîba ra ǂkhâǃnâ ǃhūgu a ǀapas di gao ǃkhaisa. Jehovab khoen ge kai ǁgâiban ra hō xawe ǂhanuba mâǃoa tamas ka io ǀkharaǀkhara ǂgao tama hâ. Xawe Elobmîs daoǁgaude sao tsî ‘ǀgapise mâgu hoaga’ ra ǀgoreba, ǃgōsase sada ǃnōrasasiba ra tsâǀkhā mîmâina gu ra dī ǁaeb ai. w20.05 14 ¶9

ǁGûdo, ǂhâba du ga o sadu ôan amaban ūhâsa nî ǂgomsa. On ge Elob ǀkha aitsama ǀhōsagusa nî ūhâ tsîn ge aitsamaba xu Elobmîs amaba ra ǁkhāǁkhāsa nî ǂgom. Sadu ga ǀgôana Elobmîsa xu amaba ǁkhāǁkhā ǂgao o. O du ge sadu ǂûdo Elobmîsa ǃgâise nî ôaǃnâ. ǁKhāǁkhāsen du ra xūn xa du ge nî ǂâiǃgâ. O du ge sadu ǀgôana ǁkhā xū-e a ǁkhāǁkhā ǁkhā. Sadu ôana du ge nî ǁkhāǁkhā în Elobmîs ra ôaǃnâ ūhe xūna sîsen-ū. Nau khoena du ra ǁkhāǁkhā khami. Nēti du ga dī o, o du ge sadu ǀgôana nî hui în Jehovaba ǀnam. Tsîn ge ǁnā ǀgôana nî ǂgom Jehovab ‘ǂgomǂgomsa tsî gā-ai ǃgāba’ ra sîsen-ūse, ra hui dasa i da mîsa ǁnâuǃā. (Mat. 24:45-47) Tā supu xūn ǀguina ǀgôana mîs amab disa xu ǁkhāǁkhā re. Xawe hui nî re în ǀgaisa ǂgomsa omkhâi. “Elob di ǃgamsib” di xūna ǁkhāǁkhā nîs ǃnâ-ū, ǁîn kurin ra mā-am khami.—1Kor. 2:10. w20.07 11 ¶10, 12-13

Nētsēn ge miliundi khoena Jehovab ǀkha ǀhōsagusisa ūhâ. Jesub Xristub xoremarib ǃnân ūhâ ǂgoms ge nēsa ra īǁkhā kai. ǁNā xoremarib ǃaroma da ge ǁîb ǀkha ǀhōsagusisa a ūhâ ǁkhā tsî māǁnâsen tsî a ǁāǁnâ kaisen ǁkhā. Nē mîǁguiga da ga dī o, o da ge miliundi khoen hîna māǁnâsen, ǁāǁnâ kaisen tsî ǀgū ‘ǀhōsagusisa’ Jehovab ǀkha ūhân di ǃâ. Mati da a ǁgau ǁkhā Elob ǀkha da ūhâ ǀhōsagusisa da ra ǃgôaǃgâ ǃkhaisa? Abrahammi tsî Jobi hîna ge kaidisi kurin xa ǃnāsa kuriga ǂgomǂgomsase hâ gu khama da ge sida tsîna ǂgomǂgomsase nî hâ—ǂgui kurina da ga Jehovaba ǀnai ǃoaba xawe. Danieli khami da ge Jehovab ǀkha da ūhâ ǀhōsagusisa sida ûib ǃgâ-ai nî ǃgôa. (Dan. 6:7, 10, 16, 22) Jehovab huib ǀkha da ge ǃgomsin hîna da ra hōǃân ǃnâ mâǀgai tsî ǀgū ǀhōsagusisa ǁîb ǀkha nî ūhâ ǀgara.—Fil. 4:13. w20.05 27 ¶5-6

Gao-aob Davib ge ǀnî hâ khoeb khoesa. ǁĀsens ra hîna ge mû. ǁÎb ge Jehovab ǁgaraga ge ǂan i: “Sa ǀgūkhoeb tarasats ge tura tide.” (Eks. 20:17) Xaweb ge ǁîsa kōs ǀkha ge aiǃgû. ǁÎb ǂgaob ge ge ǀgorasen tsoatsoa. Batsebasab ge omkhâi ba turab tsî Jehovaba ǂkhîǂkhî ǂgaos ǃnâs tsîna. Davib ge Jehovaba gaxuse ǀnam hâ i. Tsî ǃaoǃgâsiba omkhâiba xaweb ge. ǁÎb ti ǁgansi turab ǃnâ ge māǁnâsen. Nēs ǃaromab ge Daviba kaise tsū xū-e ge dī. Jehovab ǀons ge nēs ǃnâ-ū ge ǁgaiǁgaihe. Tsîb ge Daviba nēs ǃnâ ge ǃâ tama hâ i khoen ais, tsîna tsūba ge hā-ū. ǁÎb omaris tsîna ǃkhōǂgā hâse. (2Sam. 11:1-5, 14-17; 12:7-12) Jehovab ge Daviba ge ǁnama tsîb ge ǁîb ǃgâi ǀhōsagusisa Jehovab ǀkha ge hō-oa. (2Sam. 12:13; Psa. 51:2-4, 17) Davib ge ǃgomsin tsî tsûaǂgaob tsîna ra ǂâihō. ǁÎb ǂgaobab ge ǀgorahesa mā-am ǁaeb ǃnâ. ǁÎb mîdi hîna Psalmdi 86:11 ǃnâ mâdi ge. Sao rases tsîna a mîhe ǁkhā: ‘ǀOasa’ ǂgaoba mā te re. Jehovaba Daviba ge hui îb ǁîb ǂgaoba ǀguiǀgui tamas ga io ǀgora? ǁÎb ge Daviba ǁîb ǂgaoba ǀguiǀguis ǀkha ge hui, Elobmîs Davib xa ra mî amaga. ‘Ob ge ǂgaob âba ǀoasase Elob ǀkha ge hâ.’—1Gao. 11:4; 15:3. w20.06 11 ¶12-13

Elobmîs ge Jehovab ǁîb khoena ūba hâ ǀnamma tsurib ǀkha ra ǀgōpeǀnō. Mâ ǀgaub ǃnâb Elob ǀnamma tsurib ǀkha a ǀgui? Sao ra aiǁgaus xa ǂâi re, ǁaixa hâ hurib ǃnâ du ra āǁō hîna i ge. Khoe-e plastik jakets hîna ǁgammi ǀgapiga nî ūhâ dusa ra aoba du. Amase du ge nē huiba nî ǃgôaǃgâ ǁnā jakets kai huib ase nî ī amaga. Xawe nē jakets ge gaxuse ûitsamase ūhâ du tide. ǁGammi ge kaise a ǃkhai tsî du ge ǂgaus tawa du ga sī tama io a ǁō ǁkhā. Tsuriba aoba du tsî nî ǂgausa ǃoa ǂgae ǀgū du khoe-e du ge ǂhâ hâ. Jehovab ge nētsēs xoas mîdi ǃnâ. Israelǁîn xab gere ǃhoa o, o sao ra-e ge mî: Gā ge hâ i Israelǁînab nî ǂgae-oa di. Elob ge nētsē ǁkhā ǀgaub ǃnâ ǁnān hîna ge ǁîba ǃoaba ǀû. Tsî ǃgomsigu xa ǃnamiǂgāhe hân xa di ra tsâ. ǁÎb ge ǁînab a ǀnam ǃkhaisa ra ǁgau nî ǂgao tsî ǁîna ǁîba ǃoa ra ǂgaeǀgū ǂgao. ǁÎb ge sada ǃnâ-ū ǁîna ǁnā ǀnamma a ǁgau ǁkhā. ǃKhai hâ khoena Jehovab tsî sida a ǀnam nî ǃkhaisa ǃnās hoasa mîbas ge a ǂhâǂhâsa. w20.06 27 ¶12-13

Stefanub ge ǃgamhes khaoǃgân ge ǂgui Xristeǁîna Jerusalemsa xu ge doe. Tsîn ge ‘hoatsama ge ǀgaruǀgaruhe Judeab tsî Samariab ǃhūkha ǃnâ.’ Siprus tsî Antioxias kōse ǃnū ǃkhaigu ai. (ǃNǃkh. 7:58–8:1; 11:19) ǂÂi re ǁkhāǁkhāsabegu gere hōǃâ ǃgomsin xa. Xawe gu ge ǁkhoaǂgaose gere aoǁnâ. Tsî i ge ǂgui ǀhaohâga ge omhe Romes ǃnâ. (1Pet. 1:1) Xawe ǁnās khaoǃgân ge ǂgui ǃgomsina gere hōǃâ. Aiǁgause 50ǁî kurib ǃnâb ge Romes di ǂgaeǂgui-aob Claudiusa, Jodeǁîna ge mîba în Romesa xū doe. Jodeǁîn hîna ge Xristeǁî kain ge ǁîn di omde ǁnāxū tsî ge doe. (ǃNǃkh. 18:1-3) Apostel Paulub ge 61ǁî kurib ǃnâ ge xoa ǁîb di ǃgâsan ge trokhedi ǃnâ a ǂgāhesa. Tsî ǁîn di xūna a ū xu-e ǃkhaisa. (Heb. 10:32-34) Nau khoen khamin ge Xristeǁîna ǀaeb tsî ǀgâsib tsîna gere hōǃâ.—Rom. 15:26; Fil. 2:25-27. w21.02 26-27 ¶2-4

ǁGâuab tsî ǁîba ra ǂkhâǃnâ khoen ge Xristeǁî-i hîna ǁî-i ǂgomsa ǀgaiǀgai hâ-e a ǁnobe kai ǁoa. (2Jhn. 8, 9) ǃÂubasen da ge nî ǃhūbaib khoen xa da nî ǃhuihesa. (1Jhn. 3:13) Johaneb ge “ǃhūbaib hoaragab ǂkhabab ǃnâ ǁgoesa” ra hōhōǃnâ da. (1Jhn. 5:19) Nē ǃhūbaib di ǀams ra ǀgu toa khamib ge ǁGâuaba ob ra ǁaixa o ra ǁaixa. ǁÎb ge tsaura ǀgaub ǃnâ ǀaib tsî ǁnāǁgôa hâ khoen di ǂhomib ǃnâ-ū ǀgui ǁnāǂamda tama hâ xawe ǃoaǃūs tsîna ra ǁnāǂamda ǃgôaǃgôn di ǃnâ-ū. Sida aoǁnâ ǀû kai tsî sida ǂgomsa khôas ǃgaob ǃnubu ǁaerob ǀguipa ūhâ sab ge Satanna a ǂan. ǁNā-amaga da ge buru tama hâ sida ra dī xūn ǀnîn tamas ka i o hoan ǂgui ǃhūgu ǃnâ mā-am-e tama hâsa. Nēti i ga ī xawen ge sida di ǃgâsan hîna ǁnā ǃhūgu ǃnâ hâna ra māǀgai. ǁÎn ge ra ǁgau tae-i ǀgui-eb ga Satanna Jehovab khoena a dī xawen nî māǀgaisa. w20.07 24 ¶12-13

Jehovab ge ge ǂhâba hâ i în khoena îxa ǃhūbaib hînab ge kurub ai ǁkhoaxase ǀamosib kōse ûi. Adammi tsî Eva hâra ge ǁîra ǀnamxaǃnâ ǁGûba mâǃoa-o, o ra ge ǀamo ûiba ge ǂoaǃnâ. Nēs ge ǁîra tsî ǁîra ôan ai ǁōba ge hau. (Rom. 5:12) Jehovaba nēs xa tae-e ge dī? ǁNāǁaeb ǂûb aib ge ge mîmâi khoenab nî huisa. (Gen. 3:15) Jehovab ge xoremariba ge mā în Adammi tsî Evas di ǀgôana ǁoreb tsî ǁōba xu xore-e. ǁNāsǃnâ-ūb ge ǁîba ǃoabasa ra ǁhûi khoena ǀamo ûiba a mâ ǁkhā. (Jhn. 3:16; 1Kor. 15:21, 22) ǃÂubasen ǁkhā da ge a Jehovab ga ǁîb ǀGôab ǃnâ-ū khoena khâisa mā-on miliundi khoena ǀgui ǁaeb ai khâi tide ǃkhaisa. Tae-i ǃaroma? ǀGui ǁaeb ai i ga khoena khâisa a māhe-o, o i ge kaise nî ǀhomaxa. Jehovab ge ǀhomaxa ǀgaub ǃnâ xūna dī tama hâ. ǁÎb ge a ǂan xūn ga ǃamkuse dīhe o, o ǀguin khoena ǂkhîb ǃnâ a ûi ǁkhā ǃkhaisa.—1Kor. 14:33. w20.08 14 ¶3; 15 ¶5

Elobmîsa ra ǁkhāǁkhāsen khoe-i ge nî ǁnâuǃā nē Elobmîs ǁkhāǁkhāsa ī ra dī ǃaromas ge, ī i Jehovaba ǃoaba tsoatsoa tsî ǁāǁnâhe Jehovab di ǃoaba ao i ase. ǂGui xūn ge hâ Elobmîsa ra ǁkhāǁkhāsen khoen hîna ra ǁāǁnâhe ǂgaon nî dī na. ǂGurose i ge ǁkhāǁkhāsen ra khoe-e Jehovaba nî ǂan tsî nî ǀnam tsî ǁÎb ǃnâ nî ǂgom. (Jhn. 3:16; 17:3) Tsî i ge ǀgū ǀhōsagusisa Jehovab ǀkhā ra omkhâi. Tsî ǀhaohâb ǃnâ hâ ǃgâsan ǀkhā ra ǀhōsagu kai. (Heb. 10:24, 25; Jak. 4:8) ǁNāpaxūn ge dīn ge re ǁgai xūna ra ǀû tsîn ge ǁîn di ǁorena xūra ǃhōbasen. (ǃNǃkh. 3:19) Tsî i ge nau khoena ǁî-i tae-e nēsisa ra ǂgoms xa ra mîba. (2Kor. 4:13) Tsî i ge nēsi ǁāǁnâs ǃnâ-ū ra ǁgau ǁî-i Jehovab ǃaroma māsen hâ ǃkhaisa. (1Pet. 3:21; 4:2) Tsî nē tsēs ain ge hoa khoena kaise ra ǃgâiaǂgao. ǁKhāǁkhāsen ra khoe-i ǂaub ǀkha ǁî-i mîǁguiga ra sīǃnâ, khami harase ǁî-e koa tsî ǂkhâǃnâ re. I-i saora mîǁguigu tsîna sîǃnâ ǁkhā. w20.10 17-18 ¶12-13

ǀHaohâb ǃnâ hâ ǃgâsan ǀkha du ga ǀgopeǀnōsen o, o du ge a ǃgôaǁnāsen tsoatsoa ǁkhā. ǀHaohâb ǃnân ge ǀnî ǃgâsana ǃgâise ra ǁkhāǁkhā, ǃamkuse xūna ra aiǂhomi tamas ka io ǃgâsana ǃgâise ǁkhaeǂgao tsîra ǂkhâǃnâ. ǀNîsi du ge a ǂâi ǁkhā, nē xūna du nau khoen ra dī khami dī hō tide ti. Nēs ge ra ǁgau ǃgamǃgamsenxa du a ǃkhaisa. (Fil. 2:3) Xawe ǂanbasen re. ǃNās hoasa du ga ǁkhāsiba ūhâ khoen ǀkha ǀgopeǀnōsen o du ge nî ǂkhabuǂâi. Apostel Paulub ra mî khami du ge, ǀhaohâb ǃnâ du xū-i tsîna ǃoaǂui tama khami a tsâ ǁkhā. Jehovab ge ǂguro Xristeǁîna ǃanu gagab ǃnâ-ū hōde ge mā, xawen ge hoa Xristeǁîna ǀgui hōde ge māhe tama hâ i. (1Kor. 12:4-11) Xawe i ge mâ Xristeǁî i hoa-e ge ǀō-aisa i. Nētsē da ge ǃanu gagab di buruxa hōde ūhâ tama hâ, xawes ge ǂâisa a ǀgui. Hoa da ǀguitikō ǁkhāsiga ūhâ tama hâ xawe da ge Jehovab mûǁae a ǀō-aisa. w20.08 23 ¶13-15

ǁKhoaǂgaosiba du ga ǀgores ǃnâ ǂgan ob ge Jehovaba sadu ǀgorede nî ǃeream tsî hukas tsîna āxū du tide. (ǃNǃkh. 4:29, 31) ǁÎb ge hoaǁae nî ǂkhâǃnâ du. ǃGomsina du ge ūhâ-i ǁaeb ǃnâb ge ǁîba a hui du tsî sadu ûib ǃnâ du ge ǀkharaǀkharana gere dī ǁaeb ǃnâ ǀgaiba a mā du ǀgaus xa ǂâi re. Amaseb ge Elob hîna ge ǁîb khoena ǂāxahurib ǃnâ-ū a daoǁgauba a huidu ǁkhā, î du Xristub di ǁkhāǁkhāsabe kai. (Eks. 14:13) Psalmdi xoa-aob hîna ge nētsēs xoasa a mîb ge Jehovab ǃnâ ūhâ-i ǂgomsa du ge sadu tsîna a ūhâ ǁkhā. ǀAsase ra aoǁnâ tsoatsoa khoe-i tsînab ge Jehovaba ǁkhoaǂgaosiba a mā ǁkhā. Tomoyo di ǀon hâ ǃgâsas di aiǁgausa kō re. ǁÎs ge omsa xu oms ǀkha a aoǁnâ tsoatsoa o, os ge ǂguro oms di kaikhoesa ǃau tsî ge mî: “Tida ge Jehovab di ǀhûǀguitimî-aon ǀkha ǃhoa ǂgao tama hâ” tsîs ge ǁnāpaxū daosa ge ǂnoaǂganam. Tomoyos ge ge ǃao tama hâ i tsî ǁîs ǀhōsa ge mîba: “ǁNâus go? Xū-i tsîna ta mî tama hâ hînas ge kaikhoesa go ǂan i Jehovab di ǀhûǀguitimî-ao ta a ǃkhaisa. Kaise ta ge ǃgâise ra tsâ.” Tomoyos ge nēsisa ǁnaetisa aimâba-aos ase ra sîsen. w20.09 6 ¶13-14

Asab ge khoena ge mîba Jehovab ge ǃhūba “sâba mā hâ i” sa. (2Kro. 14:5, 6) ǁÎb ge nē ǃnorasasib ǁaeb ǂkhîǂhorisens ǃgao ǀgui nî sîsen-ūhe ti ge ǂâi tama hâ i. ǁÎb ge ǁaeba ǁama ǂui tsî ǃādi, mirku, ǂgō-omku, tsî dao-amdi tsîna ge om. Judab di khoenab ge “ǃhūb gorose sada ais aiǃâ hâ” ti ge mîba. Asaba tae-e gere ǂâibasen? ǁÎb ge khoen harase Elob xan māhe hâ ǃhūb ǃnâ a ǃgûmâ ǁkhā tsîn khākhoen xan ǁgâiǀāhe tamase a om ǁkhā ti gere ǂâibasen. ǁÎb ge khoena ge ǂkhâǃnâ în nē ǃnorasasib ǁaeba ǃamkuse sîsen-ū. Asab ge nē ǃnorasa ǁaeba sîsen-ū tsî ǁîb toroǂnubisa ge ǀgaiǀgai. (2Kro. 14:7) Nēsa ra ǂâibasen Jehovab ǃnâb ge ǂgomǃgâ tama hâ i ti? Hî-i. Asab ge ge ǂan i gao-aob aseb khoena nî aiǂhomisa, hā nî ǃgomsigu ǃgao. ǁÎb ge ge ǂan i nē ǃnorasasib Judab ǃnâ hâhâ tidesa tsî nēs ge ge ama-i. w20.09 15 ¶4-5

ǀHaohâb ǃûi-aogu ge ǁgaraga a ǁgui ǁkhā. Îb Jehovab di gūna ǁkhauba ǁkhā. ǀHaohâb ǃûi-aob ūhâ ǃereamdi tsî oms di danab ūhâ ǃereamdi ge kaise ǂgui ǀgaugu ǃnâ a ǃkharagagu. Aiǁgauseb ge Jehovaba ǀhaohâb ǃûi-aoga ǀgoraǃgâ-aogu ase ge mâi. Tsî gu ge ǁore-aon hîna dī-ūnusen ǂgao tamana ǀhaohâba xu a ǂnûiǂui ǁkhā. (1Kor. 5:11-13) Jehovab ge oms di danaga ǀhaohâb ǃûi-aogu ūhâ tama ǃereamde ge mā. Aiǁgauseb ge oms di danaba omaris ǃaroma ǁgaraga a ǁgui ǁkhā. Tsî nî kōǃgâ i gu ǁnā ǁgaraga sao-e. (Rom. 7:2) Aiǁgauseb ge oms di danaba a mîǁgui ǁkhā. Mâ ǁaen ǀgôana oms ai nî oa ǀkhīsa. Tsîb ge ǁîb di ǀgôana a ǁkhara ǁkhā. ǁNā ǁgaragan ga ǁnâuǀnam tama io. (Efe. 6:1) Oms di danab nî ǁgaraga mîǁguis aiǃgâb ge ǁîb di kaikhoes ǀkha ra ǃhoa. ǁÎra a ǀgui “ǁgan amaga.”—Mat. 19:6. w21.02 16-18 ¶10-13

ǀGui ǃaromas hînas Elobmîsa a ǀō-aisas ge Jehovab ge ǃgamǃgamsen hâ khoen hîna “ǃkhōǂuibasenhe” hâna Elobmîs amaba ra mā. (ǃNǃkh. 13:48) ǃGamǃgamsen hâ khoen ge ǂgomǂgomsa tsî gā-ai ǃgāb Elobmîs xa ra ǁkhāǁkhā nî xūna ra ūǃoa. (Mat. 11:25; 24:45) Nē amaba da ge sida aib ai ǀgui ǁkhāǁkhāsen hō tide. Tsî nēs ge hoa xūn ǂam-ai a ǀō-aisa. (ǂKhm. 3:13) Jehovab ge ǁîb tsî ǁîb nî dī xūn xa hâ amab xa nau khoena mîbas di aiǂhanub tsîna ge māda. (Mat. 24:14) Nē haisi-ams ge kaise a ǀō-aisa Jehovab di omaris ǁani kai tsîs khoena ǀamo ûiba hōs ǀkha ra hui amaga. (1Tim. 4:16) Nēsi da ga ǃnāsa tamas ka io ǀoro ǁaeba aoǁnâ sîsen-i ǃnâ ga ra dī, xawe da ge nē ǂhâǂhâsa sîsen-i hîna nēsi ra dīhe-e ra ǂkhâǃnâ. (1Tim. 2:3, 4) Kai aiǂhanub ge Jehovab ǀkha ǀguiba sîsensa.—1Kor. 3:9. w20.09 26-27 ¶4-5

Apostel Paulub ge Romesa ǃoa gere ǃnari ǁaeb ǃnân ge ǁîb di ǃgâsana ǁîba gere hui. Aiǁgause, ǀgam ǂgomǂgomsa ǀhōsakha Paulub dikha Aristarxub tsî Lukab tsîkha ge Pauluba Romes ǃoa ge sao-ai. Elobmîs ge mî tama hâ Jesub ge Aristarxub tsî Lukab tsîkha a mîmâibasa ǁîkha Romes ǃnâ ǃnorasase nî sī ǃkhaisa. ǁNā-amaga kha ge ǁîkha ûiba ǁkhōǁkhōsasib ǃnâ nē ǃaoǃaosa daob ai gere mâi. Xawe kha ge nēsa mâsenxase gere dī îkha Pauluba hui. Ega ǀgui kha ge nē ǁkhōǁkhōsa daob ai i ǁîkha ûiba nî saohesa ge ǂan. ǁÎgu ge Sidons ǃnâ a sī o, ob ge Juliuba ge mā-am îb Pauluba ‘khoen tawa sī tsî sîsenbahe.’ (ǃNǃkh. 27:1-3) Tsî ega Puteoli di ǀon hâ ǃās ǃnâ i ge Paulub tsî ǁîb ǀhōsagu tsîna ‘ǁnāpa ǃgâsana hō, tsî ǁîn xa ge ǂganhe, hû tsēde gu ǁîn ǀkha nî hâsa.’ ǁNā ǃādi ǃnâ ge hâ-i Xristeǁîn ge Paulub tsî ǁîb ǀhōgu di ǂhâsiba gere kōǃgâ. Paulub ge nē ǃgâsana kai ǂkhîba gere mā tsî ǁîn ǀkha ǂkhâǃnâ ra xūn ǃkharuǃnâ gu gere na gere ǀgoragu.—ǃNaeǃkhaidi 15:2, 3 sa ǀgopeǀnō re. w20.11 15-16 ¶15-17

ǁGûdo, sadu ôana du ge nî ǁkhāǁkhā, sadu ra dī tsî mî xūn ǃnâ-ū du Jehovaba kaise a ǀnam ǃkhaisa. Kai ǀkhaeb hîna du ǁîna a mā ǁkhab ge ǁîna huisa în Jehovaba ǀnam. Tsî nox ǂhâǂhâsa xu-i hîna du ǁîna a ǁkhāǁkhā ǁkhā i ge în hoaǁae Elobmîsa ǁkhāǁkhāsen, ǀgore, ǀhaode ǃoa ī tsî aoǁnâ. (1Tim. 6:6) Ī a ǃkhais ge ǁîn ge ǁîn ǀgôana ǂhân hâ xūna nî mā. (1Tim. 5:8) Xawe ǂâis ǃnâ ūhâ re, sadu ôa-i Jehovab ǀkha ūhâ ǀhōsagusis ge ǁî-e nî hui î-i ǀamo ûiba hō. ǁÎn ūhâ mari-i tamas ka io xūn ose. (Ese. 7:19) Kaise i ge a ǃgâi ǂgui Xristeǁî ǁgûn ǃgâi mîǁguiga ra dīsa, în ǁîn ôana hui în Jehovab ǀgūse hâ. Nēti ī omdi ǃnâ ra kai ǀgôan ge ǁkhāǁkhāsenan ge ǃgâi xūna ra ǃkhōǀgara tsî ega si ǃhausen tama hâ.—ǂKhm. 10:22. w20.10 28-29 ¶10-11

ǀGui ǃnās aib ge apostel Petruba gere ǃhausen mî tamas ka iob ge dī xūn ǃgao. Aiǁgauseb ge Jesuba ǁîb di ǁkhāǁkhāsabe ga a mîba o ǃgoma tsâ tsîb nî ǃgamhesa. Ob ge Petruba ǁîba ǀau tsî ǀgapise mâ mîde ge mî. (Mat. 16:21-23) Jesub ge Petruba ge mî-ūnuba. Jesub ge gere ǃkhōhe ob ge Petruba ǂâi tamase ǀgapi pristeri di ǃgāb di ǂgaesa ge ǁaraǁnā. (Jhn. 18:10, 11) ǁKhapab ge Jesuba Petruba ge mî-ūnuba. ǁNāsa hâ tsîb ge Petruba nau apostelgu ga Jesuba a ǁnāxū, xaweb ǁîba ǁnāsa tātsē dī tide ti gere koasen. (Mat. 26:33) Petrub ge ǂâib gere khami ge ǀgaisa tama hâ-i. Egab ge ǁnā ǃuia Jesuba ǃnona ǃnāde ge ǀūxū. Kaise ǂkhabuǂâi tsîb ge Petruba “ǃaugab ǃoa ǂoa, tsî ause gere ā.” (Mat. 26:69-75) ǁÎb ge ǀnîsi gere ǂâi Jesuba ǀûbabi î nî di. Xawe Petrub ge kaise ge ǂkhabuǂâi tama hâ-i îb Jehovaba ǃoaba ǀû. ǁNās ge ītoas khaos aib ge Jehovaba ge ǃoaba ǀgara nau apostelgu ǀkha.—Jhn. 21:1-3; ǃNǃkh. 1:15, 16. w20.12 20 ¶17-18

Oms di danab ge ǂgui ǀgaugu ǃnâ ǃgamǃgamsenxasiba a ǁgau ǁkhā. Aiǁgauseb ge ǃâubasen tama hâ ǁîb ǀgôan tsî kaikhoes tsîn ǀoasa kurusa nî ūhâsa. ǁÎb ge omaris di ǁanin di ǂâiǀgauga ǃgâ tsî ǂâis ǃnâ nî ūhâ. ǁÎb di ǂâiǀgaub ǀkha i ga ǀgui tama is tsîna. ǃGamǃgamsenxa-aob ge omsa ra ǃanu hui. Tarekhoes sîsen-i ase i ga mûhe xawes tsîna. ǁNās ge kaise a ǃgom ǁkhā. Tae-i ǃaroma? Rachel di ǀon hâ ǃgâsas ge ra mî. “Tita ge kai ǀkhāb aib ga aoba xapana ǁā tamas ka io omsa ǃanu o. On ge ǁanǁare-aona ra dî ‘ama aorekhoeb’ asa. ǁÎn ge nî ǂâi ǁîb taras xa ra dāhe di.” Sadu ra hâba i ga ǁnati ǂâihe o. O da ge nî ǂâihō Jesub tsîn ge ǁîb ǁkhāǁkhā-aogu ǂaide a ǁāsa. ǃGān di sîsen-i ge i xawe. ǃGâi oms danab ge nau khoen ais ai ǀgaisa tsî ǂhâǂhâsase mûsen ǂgao tama hâ. ǁÎb taras tsî ǀgôan nî ǂkhîsab ge ǂhâba hâ. w21.02 2 ¶3; 4 ¶11

ǃGâi ǂâidi ge Jehovaba xu hâ ǀkhaeba. Sida di ûib ge matikōse ǃkharuge ǁae ǃgâi i, xawe i ge hā nî ûiba nēs xa ǃnāsase nî ǁoaxa. Khoen ge a tsûtsûda ǁkhā. Xawe da ga ǁîna a ǀūba o, o da ge Jehovaba nēsi ǃoabas ai sida di ǂâisa nî ǂnûi. Kaise ǀhapitsâsens ge Jehovaba ǂkhîb ǀkha ǃoabasa nî ǂkhāda. Xawe da ge Paulub khami nî ǂgom Jehovab sida ra ǀūba ǃkhaisa. (1Tim. 1:12-15) ǀAmose ûis di ǃâubasensa da ge ūhâ. ǀAsa ǃhūbaib ǃnâ da ge xūn hîna ǁgaise ra tsâ kai dan xas tsîna ǂâi tide. ǁNā ǁaeb xas ge Elobmîsa ra mî: “Aibekam xūn xa i ge ǃaruǀî ǂâihe tide.” (Jes. 65:17) ǂÂi re: ǀNîda â da ge Jehovab di ǃoabas ǃnâ ge kaira. Xawe ǀasa ǃhūbaib ǃnâ da ge ǁkhapa nî ǂkham. (Job 33:25) ǁNā-amaga hā re î da ǀasa ǃhūbaiba ǃoa kō. Tsî ǁkhā da a xūn hoana dī î da ǁnapa hâ. w20.11 24 ¶4; 29 ¶18-19

Tae-e hānîǁaeb ǃnâ nî ī? Kai ǁgâiǀāb ǃnâb ge Jehovaba ǀgam ǀō-aisa ǀgaukha ǃnâ nî ǁkhauba da. ǂGuroseb ge ǁîb di ǂgomǂgomsa ǃoaba-aona nî sâu. ǁNā ǁaeb hînab ama tama ǂgomdi. Babilons kais ǃnaga ra ǁnāde ra dīkākā hîna. (J.ǂHa. 17:16-18; 18:2, 4) Tsîb ge ǁnapaxu ǁîb khoena nî sâu. Armagedons ǃnâb ga ǁGâuab di ǃgau hâ xūna ga ra dīkākā o. (J.ǂHa. 16:14, 16) Jehovab ǀgūse da ga hâ o, ob ge. ǁGâuaba tātsēs tsîna hâhâ ra tsûba sida ai a dī ǁoa. ǁÎb ǀguib ge ǁnā tsûba nî hōǃâ. (Rom. 16:20) ǁNā-amaga ǀoasa ǁâtanina ana re. Tsî hoaǁae ana ǀgara re. Tā ǁGâuab tsî ǁîba ra sao khoen ǃoagu ǀguri ǃkham ǂgao re. Sadu di ǃgâsana ǂkhâǃnâ re. Jehovab di daoǁgausa sao re. ǁNāsa du ga dī o, o du ge ǂgomǃgâsiba ūhâ ǁkhā. Sadu di ǀhomsi ǁGûb Jehovab nî ǁkhauba du tsî ǂkhâǃnâ dusa.—Jes. 41:10. w21.03 30 ¶16-17

Mati da sada ǂgomǃgâsiba. Jehovab ǃnâ nî ǁgau? Jehovab ra mā dauǁgaude saos ǃnâ-ū. Elobmîs tsîn ge ra ǁguiǃā matikōse i a ǂhâǂhâsasa. Î da ǃnomsase Jehovab ai ǂgomaiǂnûi. Nē xūna du ra ǁkhāǁkhāsen ǁaeb ai ǂâi re. Matin ge Jehovaba gere ǃoaba khoena ǃnomsase a hâ ǃkhaisa. Aiǁgause, ǀgapi ǁnâuǃgâǃkhaib ge. Apostelga a mîba o i gu aoǁnâ ǀû. O gu ge ǃao tama ge hâ i. ǁÎgu ge ge mî: “Anu i kom ao, Elob nî khoen ǃgâ-ai ǁnâuǀnamhe ǃkhaisao.” (ǃNǃkh. 5:29) ǂNauhe gu ge xawe gu ge apostelga ge ǃhuri tama hâ-i. Tae-i ǃaroma? ǁÎgu ge ge ǂan i Jehovab ǁîgu ǀkha hâ ǃkhaisa. Tsîb ge ǁîgu ǀkha ge ǂkhîǂâixa i. ǁNā-amaga gu ge ǀûs ose ǃgâi ǂhôasa gere aoǁnâ. (ǃNǃkh. 5:40-42) ǁŌb nîs aiǃâb ge Stefanuba ge ǂkhai. Tsî i ge ǁîb di aisa “ǀhomǃgā-i di ais” axase ge ī i. (ǃNǃkh. 6:12-15) Tae-i ǃaroma? ǁÎb ge ge ǂan i Jehovabab ra ǂkhî kaisa. w21.01 4 ¶10-11

Nēs ge ra ǂâibasen ǁîn ǃanu ǃgâiǂâisa ūhâ. Tsî Jehovab aiǃâ a ǂhanu-ai ǃkhaisa. (Jes. 1:18) ǁÎn ge ǁāǁnâhe hâ Xristeǁîn. Hîna ǀgaisa ǂgomsa Jesub di ǁguibas ǃnâ ra mâina. Tsî Jehovab ǀkha ǃgâi ǀhōsagusisa ūhâna. (Jhn. 3:36; 1Pet. 3:21) ǁNā-amagab ge Jehovaba ǁîna ra ūǃoa. Tsîn ge “tsēs tsî tsuxub” tsîna. ǁÎba ǃhūbaib ai a ǃoaba ǁkhā. (J.ǂHa. 7:15) Nēsis tsînan ge Gaosib di ǃgâiǂhôasa aoǁnâ. Tsî ra khoena ǁkhāǁkhāsabe dī. Tsî Elob di Gaosiba ǁîn ûib ǃnâ ǂgurose ra mâi. (Mat. 6:33; 24:14; 28:19, 20) Kai ǂnubis khoen hîna kai ǁgâiǀāba nî ûiǃkharun ge. A ǂan Elob nî kōǃgâ nîsa. ‘Trons ai ǂnôab ǁîn ǂamai. ǁAn-aisa nî dībasen’ amaga. Mîmâis hînan nau gūna gaxuse ǃâuhâs ge nî dīǀoaǀoahe: “Ob ge Eloba mûdi âna xu ǁgamron hoana nî ǀombē.”—J.ǂHa. 21:3, 4. w21.01 16 ¶9-10

ǃGâibahe da ge a Jehovab di omaris ǃâ da a sa. Tsî da ge danasib Jehovab mâi hâba ra ǃgôa. Elobmîs ge ra mî Jehovab tarekhoede ǃgôa hâsa. Aorekhoekab ǃgôa hâ khami. Aiǁgause i ge ra mî Jehovab ge ǃanu gagaba tarekhoedi tsî aorekhoegu tsîna māsa. În buruxa dīna dī. Tsîn ge ǁnās ǀkha ǃkharagaǃnâgu gowagu ǃnâ ge ǃhoa ǁkhā i. (ǃNǃkh. 2:1-4, 15-18) Hoa ǀgaman ge ǃanu gagab ǀkha ǂkhauhe. Tsî Xristub ǀkha ǀhommi ǃnâ sī a ǂgaeǂgui ǁkhā. (Gal. 3:26-29) Hoan ge ǀamo ûiba ǃhūbaib ai a hō ǁkhā. (J.ǂHa. 7:9, 10, 13-15) Tsîn ge hoana ǃgâiǂhôasa aoǁnâ tsî nî ǁkhāǁkhā. (Mat. 28:19, 20) Aiǁgauses ge ǃNaeǃkhaidi ǂkhanisa Prisila di ǀon hâ ǃgâsas xa ra ǃhoa. ǁÎs tsî Akwilab tsîn ge amaba Apoloba gere ǁguiǃāba. ǀGapi ǁkhāǁkhāsensab ge ūhâ-i xawe.—ǃNǃkh. 18:24-26. w21.02 14 ¶1; 15 ¶4

ǀHaohâb ǃûi-aogu ge kaise ǂhâǂhâsa ǃereamsa tani hâ. I gu aoǁnâ-aona hui în, ǃgâi ǀgaub ǃnâ aoǁnâ. Aiǁgause matin Elobmîs ǁkhāǁkhāsa nî dīs ǃnâs tsîna nî hui ǃnâ. ǀNîsi i ga Elobmîsa nau khoe-e ra ǁkhāǁkhā ǃgâsa-e sats ǂnôa. Hîna Elobmîs ǁkhāǁkhāsa dīsa ga ra tao. O du ge a huiǃnâ ǁkhā. (1Tes. 5:11) Nēsi da ga Elobmîsa khoe-e ǁkhāǁkhā tama i. Xawe da ge khoe-e a hui ǁkhā i i gagasise ǀgai. Elobmîs ǁkhāǁkhās tawa kaise ǃhoas. Xa da ge aiǂhumi da hâ ǃnubu ǃereamrodi ǀkha ǁkhāǁkhā ra khoe-e a ǂkhâǃnâ ǁkhā. Tsî ta ge Elobmîsa ra ǁkhāǁkhāsen. Khoe-i ga ǀhaodi tawa ǀkhī o, ǀhosagusa ǁîn ǀkha a kuru ǁkhā. ǀHaohâb ǃûi-aogu ge Elobmîsa ra ǁkhāǁkhā khoe-e a ǂkhâǃnâ ǁkhā. Tsî a koa ǁkhā ǁîn di ǃgâi xūn ǃaroma. Mati kōse i a ǁkhoaxa ǂkhari ǃâroba ǀhurusa khoe-i ûib ǃnâ. I i ǁnā khoe-e aiǃgû tsî Jehovaba ǀoasase ǃoaba tsoatsoa ǁkhā? w21.03 13 ¶18-19

Davib ge ǁîb ûib ǃnâ ge ǁgau. ǃEreamsab tani hâ tsî a ǂgomǃgâhe ǁkhāsa. Aiǁgause ǂkham i ge ī ob ge ǁîb di dadasab di gūna gere ǃgâise ǃûi. Tsî ǁnā i ge kaise ǃaorosa ge i sîsenne. Davib ge ēga Gao-aob Saula nēti ge mîba. “Sa ǃgāta ge ti îb di gūna gere ǃûi, o kha ge xammi tsî bēri tsîkha hā gū-e ge ūbē gūna xu. Tsî ta ge ǃkhoeǃgon tsî ge ǂnau bi tsî ǁî-e ams âba xu ge ore.” (1Sam. 17:34, 35) Davib ge ge ǂan i ǁnā gūnab nî kōǃgâsa. ǂKham ǃgâsagu tsîn ge Davib khami māhe gu ra sîsenni hoa-e ǃamkuse nî dī. ǂKham i a hînab ge Daviba kaise ǀgū ǀhōsagusa Jehovab ǀkha ge ūhâ i. ǁNā ǀhōsagus ge kaise ge ǂhâǂhâsa i. ǁKhoaǂgaosib tsî musik-e ǀhurus xa. Davib ge Jehovaba ǁîb di Elob ase ǀgui ge ǃgôa tama hâ i. Xawe ǁîb di ǀhōsas tsîna ge i ī. ǂKham ǃgâsago Jehovab ǀkha ǀgū ǀhōsagusa ǀgaiǀgais ge kaise a ǂhâǂhâsa. w21.03 3 ¶4-5