Aprili

Kai ǃgomsi-e du ūhâ sadu ûib ǃnâ? ǀNîsi i ge ǀhaohâb ǃnâ hâ khoe-e go tsûtsû du. (Jak. 3:2) Tamas ka ion ge ǂan du a khoena. Jehovaba du ra ǃoaba amaga ǁgaise ra hâ-ū du. (1Pet. 4:3, 4) ǀNîsin ge sadu omaris ǁanin tsîna ra mîba du î du tā ǀhoade ǃoa ī. Tamas ka io sadu ra ǂgom xūn xa ǃhoa. (Mat. 10:35, 36) Nēti i ǃgomsiga hōǃâs kaise a ǃgom. Amaga du ge ǀnîsi Jehovaba ra ǃoaba ǀû ǂgao. Xawe ǂâis ǃnâ ūhâ re. Taen hoana du ga ǃkharu ǃnâ xaweb ge Jehovaba gā-aisiba nî mā du. Î du ǃgâi mîǁguiga dī. Tsî ǀgaiba nî mā du, î du ǁnā ǃgomsi-e tani. Jehovab ge Elobmîs ǃnâ aiǁguade ge xoamâi. ǀOasa kurusa ūhâ tama khoen ge ǁîn ǃgomsiga gere tani ǀgausa ra ǁgauna. Tae-i ǃaromab ge nēsa dī? Î da sada ǁnapaxu ǁkhāǁkhāsen. Jehovab ge Apostel Pauluba nēsa ge xoamâi kai. ǁNā ǃâga da ga khomai o, o da ge ra ǂkhâǃnâhe. Tsî da ge ra mû sida mâsib tsîn ni dawasa. Xawe da ge tā Elobmîsa khomais ǀguisa nî hî. Mā-am da ge nî în khomai da ra xūna sida ǂgaoba tsâǀkhā. w21.03 14 ¶1-2

Aoǁnâba du ra khoena du ǃgaohes amsi ǂhanu ǃhanab ase ra mû? Nēs ga ama o, on ge ǃnona xūna nî ī. ǂGurose, ǁgariǁgarisasib ǀkha du ge nî aoǁnâ. ǃGaos ǁaeb ge ǃnupu tsî da ge ǁae-e ǁore ǂgao tama hâ. ǀGamǁîse, ǃgâiaǂgao da ge nî khoen ga ǃgâiǂhôasa ǃoa ǃgâ o. Elobmîs ge ra mî: “Khoen ra ǃgaos ǃnâ ǃgâiaǂgao.” (Jes. 9:2) Tsî ǃnonaǁîse, mâ khoe-i hoa-e da ge Jesub ǁkhāǁkhāsabe-i ase a mû ǁkhā. Nēs ǃaroma da ge sada aoǁnâ sîsenni haisi amsa khoen ǂgaoga i nî tsâ ǀkha ǀgaub ǃnâ nî dawa. Jesub saosaben ǀnîn ge gere ǂâi Samaritanǁîn tātsē Jesub ǁkhāǁkhāsabe kai tide di. Xaweb ge Jesuba nēti i ǂâiǀgauba ge ūhâ tama hâ i. ǁÎb ge ǁîna ǁkhāǁkhāsaben ase gere mû. Sada tsîn ge sada ǂharidi ǃnâ hâ khoena Xristub ǁkhāǁkhāsaben ase nî mû. Apostel Paulub ge ǃgâi aiǁgausa ge ǁgau hîna da a ǁgae ǁkhāsa. ǁÎb ge aoǁnâbab gere khoen ǂgomdi xa xū-e ge ǂan i. ǃGâiǃgâibasensan ūǃnâ hâ xūna gere ôaǃnâ tsî ǁîna Jesub ǁkhāǁkhāsaben ase gere mû. w20.04 8-9 ¶3-4

Khoena ǁîn tanisen ǀgaub ǃoagu ǀgoraǃgâs xa ǁgûtsâ re ǁîna ǁnâuǃāsa. Jehovab ge ǃamkuse ra ǁnâuǃā da. Nēs ǃaroma ǂgan bi re îb hui du. Î du sadu ǃgâsana ǁîb da mû nî khami mû tsî ǁnâuǃā mati da tsâbaǁhaoxasiba nî ǁgau nîsa. ǁHûi ǁoa da ge a mâ ǃgâsan sada tsâbaǁhaoxasiba ǂhâ hâ ǃkhaisa. ǂGuin ge Jonab, Eliab, Hagars, tsî Loti khami ǃgomsina ra hōǃâ. ǃKharagagu mâsigu ǃnân ge ǃgomsin hînan gere hōǃâna aitsama ge ǃaroma. Amaba da ga mî o, o da ge haoda ǁaen ai nēsa ra hōǃâ. Nēs ǃaroma i ge a ǂhanu Jehovab ga ǂgān da o i da sada ǃgâsan ǃoa-ai tsâbaǁhaoxasiba ǁgau. (1Pet. 3:8) Jehovaba da ga ǁnâuǀnam o, o da ge sada ǃhūbaib ǂhawase hâ ǃkharagagu khoen xa kuru ǂui-e hâ ǀhaohâb ǀguiǃnâxasib ai ra ǀaro. Nēs ǀkha da ge sîsen ǀhao da ga o, o ra ǃgâ, ǁkhāǁkhāsen tsî tsâbaǁhaoxasiba ra ǁgau ǂgao. w20.04 18-19 ¶15-17

Jesub ge ge ǁgauda mati da Jehovaba nî ǁnâuǀnamsa. Jesub di aiǁgausa da ge ǁkhā da as kōse nî sao ǁnās ǃnâ-u da Jehovaba ra ǁnâuǀnam amaga. (Jhn. 8:29) Amab ǃnâ da ga ǃgûǀgara ǂgao-o, o da ge nî ǂgom Jehovab hoaǁae amaba ra ǃhoasa tsî ǁîb mîs ǃnâb mî hâ xūn hoan a ama ǃkhaisa. Jesub a Mesia ǃkhais tsîna da ge nî ǂgom. Nētsēn ge ǂgui khoena Jesub ge Elob Gaosib di gao-aob ase a ǂkhauhe ǃkhaisa ǂgom tama hâ. Johaneb ge ge mî “ǂgui ǂgaeǂhapu-aon” ǁnā khoen hîna Jehovab tsî Jesub ǃnâ ǀgaisa ǂgomsa ūhâ tama hâna nî ǂgaeǂhapu ti. (2Jhn. 7-11) Johaneb ge ge xoa: “Mâba kha ǂhumi-aoba, ǁnāb ga ī tama io, Jesub a Xristu ǃkhaisa ra ǀūxūba?” (1Jhn. 2:22) Elobmîsa da ga ôaǃnâ o ǀgui da ge ǂgaeǂhapuhe tide. Nē-e da ga dī o, o da ge Jehovab tsî Jesub tsîna nî ǂan. (Jhn. 17:3) O ǀgui da ge nî ǂan amaba da ūhâsa. w20.07 21 ¶4-5

Sida ǃgâsana da ge ‘ǃnôa-ai’ xū-i ase ība tide, ǁaen ai da ga mā-am o în xūna ǁîn ǀgaub ai dī. Tsî hoaǁae sada ǀgaub ais ose. (Rom. 14: 19-21; 1Kor. 8:9, 13) Nē ǂhâǂhâsa ǀgaub ai da ge ǃhūbaib di ǃkhoe-aon khami i tama hâ, hîna ǁîn ǀguin dansa nî hōsa ra ǂhâbana. Nē ǃkhoe-aon ge ǁîn ǃgâib xa ǀgui ra ǂâi. Tsî nēs ǃaroma nau ǃkhoe-aona a ǂhābē ǁkhā în ǁîna ǂgurose ǂoaxa. Xawe sada ge sada ǁaegu ǃkhoeǀhûgu tama hâ. (Gal. 5:26; 6:4) Sada ge ǂguina ra hui ǂgao în ǁîn tsîna ǀams kōse ǃkhoe tsî ǀamo ûib ǀkhaeba ǃkhōǃoa. Nēs ǃaroma da ge nē daoǁgausa ra sao ǂgao “a i mâ-i hoa-e tā ǁî-i ǃgâib xa ǀgui ǂâi, î-i ǁkhāti nau-i ǃgâib on xa ǂâi.” (Fil. 2:4) Sada hâ ǃnâ ǃkhoeǀhûgus ǃnâb ge Jehovaba mîmâiba da hâ. Sada ǀams ǀkhaeba da nî ǃkhōǃoasa ǀhommi ǃnâs kas tamas ka io paradais ǃhūbaib ai. w20.04 28 ¶10; 29 ¶12

ǂGui aore tsî tare Xristeǁîn ge nî ǂoaxa tsî ǀasa ǃhūbaiba nî hō. ǁNā ǃhūbaib ai hān ge ǁōb di dansa nî mû. ǂGui khoen hîna ge ǁōn ga, khâisa ga ra hō o, ǂâis ǀguisa hî re matikō ǂkhîb nî hâsa nēs ga ra io. (ǃNǃkh. 24:15) Hoan hîna Jehovab ǃoa ai a ǂgomǂgomsan ge ǁōb di dansa nî hō Adamma xūn ge ǀumisa tsîn ge ǀamosib kōse ǃhūbaib ai nî hâ. Khâis xab ge Pauluba Korinteǁîna ǃoa xoa mîdi xa i ge mâ Xristeǁî-i hoa-i nēsi ûitsama-e kaise ra ǁkhaeǂgaohe. ǃGâi ǃaromasa da ge ūhâ, î da Paulub di ǀawemāsa ǁnâuǀnam tsî ǁkhāda a i hoa-e dī “ǃKhūb di sîsenni ǃnâ.” (1Kor. 15:58) Hoa ǁaeda ga ǁnā sîsenni ǃnâ ǃgarise sîsen o, o da ge ǂkhîsa ûiba hānîǁaeb ǃnâ ūhâsa ra mûǂui. Nēsi da ra ǂâis xa i ge ǁnā hānîǁaeba kaise nî ǃgâi i. Sida sîsenni ǃKhūb ǃnâ da gere dī i ǁautama hâsa i ge nî ǁgau. w20.12 13 ¶16-17

Sao ra kēbodi hîna Esegieli 38:10-23; Danieli 2:43-45; 11:44–12:1 tsî ǂHaiǂhais 16:13-16, 21 ǃnâ hâ di ǀgui xū-i xa ra ǃhoa di da ga ǂâi o, o da ge saora xūna a ǃâubasen ǁkhā. ǁAe-e kai ǁgâiǀāb tsoatsoa hâs khaoǃgâ gu ge ‘ǃhūbaib di gao-aoga’ khoena nî ǀhaoǀhao ǂnubisa oms ǃaroma. (J.ǂHa. 16:13, 14) “Gogi, ǃhūb Magogi” dis Elobmîsa ra ǂgai ǂnubis ge nēsa. (Ese. 38:2) Nē ǂnubis khoen ge Elob khoena ǁnāǂam tsî nî hîkākā ǂgao. Nē kēbos xa ra ǃhoaseb ge apostel Johaneba ge mî kai ǃnaredi ǀhomma xu Elob di khakhoen ai nî ǁnā di. Nē ǃnaredi ge ǀnîsi kaise ǁkhōǁkhōsa haisi-ams hînan Jehovab khoena nî aoǁnâse isa ǃoa a ǁnaeǁgau ǁkhā. Nēs ge Gogi, ǃhūb Magoga a ǃkhāǃkhā ǁkhā tsîb ge Jehovab khoena ǁnāǂam tsî nî hîkākā ǂgao.—J.ǂHa. 16:21. w20.05 15 ¶13-14

ǃAnu Gagab ge Eloba xu hâ ǀkhaeba. ǃAnu gagab sida ǁaeb ǃnâ ra dī xūn xa da ga ǂâi o, o da ge nî ganganxa. Jesub ge ǀhomǃabab nîs aiǃâ ǁîb ǁkhāǁkhāsabegu ǃoa ge mî: “Xawe go ge sago ǃAnu Gagab di ǀgaiba nîra hō, sago ǂama nîra hāba; o go ge nî ti ǃkhō-amao . . . ǃhūbaib di ǀams kōse.” (ǃNǃkh. 1:8) ǃAnu gagab huib ǀkhan ge ǁkhaisa miliuns xa ǃnāsa khoena ǃhūbaib ǂhabase Jehovaba ra ǃoaba. Gagasi paradais tsîna da ge ūhâ, Elob ǃanu gagab saora ǀgauga ūhâs ǀkha ra hui da amaga: ǀNammi, ǃgâiaǂgaob,ǂkhîb, ǃnūǃnâxasib, khoexasib, ǃgâixasib, ǂgoms, tsamtsiǃnâsib tsî ǃkhō-oasens tsîna. Nē ǀgaugu ge ‘gagab di ǂûga’ ra kuruǂui. (Gal. 5:22, 23) ǃAnu gagab ge kaise ǀō-aisa ǀkhaeba. w20.05 28 ¶10; 29 ¶13

ǃAromadi ge hâ ǂgomǃgâ kai da ra de khâisa māhe hâ khoena ra ǀhao-ū khoen, ǁîn ǀnamsabena nî mûǃā ǃkhaisa. Aiǁgause, ǃkharuge ǁaeb ǃnâ ge khâisa a māhe khoen ge ǁōn nîs aiǃân gere mûsen ǀgaub, ǃhoa ǀgaub tsî ǂâi ǀgauba ūhâse khâisa ge māhe. ǁNā-amaga da ge a ǃâubasen ǁkhā Jehovab ǁkhā xū-e nî dīsa. ǂÂis ǃnâ ūhâ re Jesub ge ǁōba ǁoms ǀkha ge ǀgopeǀnō tsî khâisa ǁomsa xu ǂkhaiǂkhaihes ǀkha. (Mat. 9:18, 24; Jhn. 11:11-13) ǁOmsa xu ra khâi khoe-i ge ǂkhaikari i go i ǁaeb ai i goro ǃhoa tsî mûsen ǀgaub-ai ǀgui i tsî i ge ǁnā khoe-e ǁî-i ûib ǃnâ ge ī xūn hoana noxopa ra ǂâihō. Lasarub di aiǁgausa kō re. ǁÎb ge haka tsēde ge ǁō hâ-i tsîs ge ǁîb sorosa gere ǀō tsoatsoa. Xaweb ge Jesuba khâisa a mābi o, ob ge ǁîb ǃgâra xa ge mûǃāhe tsîb ge ǁîb tsîna ge ǂan-i ǁîra a ham ǃkhaisa.—Jhn. 11:38-44; 12:1, 2. w20.08 14 ¶3; 16 ¶8

ǀNî ǀgaugu ǃnân ge ǂkhauhesan tsî nau gūna a ǀgui. Jehovab ge hoana ǀguitikōse a ǀnam. Nēsa da ge a ǂan ǁîb ge ǂkhauhesan. Tsî nau gūn tsîna ǁîb ôab ǀkha a ǁamaǂûi xui-ao. ǃKharagagusib hîna hâb ge hoara ge ǀkhara ǃâubasende ūhâ. Hoan ge Xristub tsî Elob ǃoagu ǂgomǂgomsase nî hâ. (Psa. 31:23) Tsî ǂâis ǃnâ ūhâ re. Elob di gagab ge hoada. ǀGui ǀgaub ǃnâ ǀgaiba a mā ǁkhā. Nēs ge ra ǂâibasen. Jehovab ra mâ-i hoa-e ǃanu gagaba māsa, ǂhâ i hâ ǀgaub ǃnâ. Jehovab ge ǁîb di ǃoaba-aon hoana ǀō-aisa ǃâubasensa ǁguiǂuiba hâ. (Jer. 29:11) Jesub Xristub ǁōb di ǂâiǂâisens ge. Hoada ǃaroma kaise a ǀō-aisa. ǁNā ǁaen ge Xristub tsî Eloba ǀamo ûib ǃgao gangansa ra mā. Jesub ǁōb di ǂâiǂâisens ge. Kurib ǃnâ ra hâ ǀhaodi xa Xristeǁîna a ǂhâǂhâsaba. w21.01 18 ¶16; 19 ¶19

ǃNāsa khoen hîna Jesub ǁōb. Di ǂâiǂâisensa ra hâǃnân ge. ǃHūbaib ai ûis di ǃâubasensa ūhâ. O, tae-i ǃaroman ra hâǃnâ? ǀHōsa-i ǃgammeba ǃoa ra ī khoe-i ǀkha i ge ǁî-e a ǀgui. ǀHōsan ge ǁîn ǀnammi tsî ǂkhâǃnâsa ra ǁgau ǂgao. ǁKhā ǀgaub ǃnân ge nau gūna Jesub di ǁōb di ǂâiǂâisensa ra hâǃnâ. ǁÎn ra Xristub tsî ǂkhauhesan tsîna ǀnamma ǁgau ǂgao amaga. Tsîn ge Xristub di ǁguibasan ra ǃgôaǃgâ ǃkhaisa ra ǁgau ǂgao. Nē ǁguibas ge ǀamose ǃhūbaib ai ûisa ge īǁkhā kai. Nau gūn ge Jesub ǁōb di ǂâiǂâisensa ra hâǃnâ, Jesub di mîmāsan ra ǁnâuǀnam ǂgao amaga. Jesub ge nē ǀō-aisa ǂûsa a ǂnûiǂgā ob ge ǁîb apostelga ǃoa ge mî: “Dī nēsa ti ǂâiǂâisensa ǃoa.” (1Kor. 11:23-26) Tsîn ge Jesub ǁōb di ǂâiǂâisensa nî hâǃnâ. ǂKhauhesan ǃhūbaib ai nox hâs kōse. w21.01 17-18 ¶13-14

Ama ǀnammi ge dīgu ǃnâ-ū ra ǁgau-e. (Jak. 2:17, 26 ǀkha ǀgopeǀnō re.) Aiǁgause Jehovab ge a ǀnam da. (1Jhn. 4:19) Tsîb ge ǁîb di ǀnamma ra ǁgau, ǃgâi mîdi hîna Elobmîs ǃnâ xoamâisa di ǃnâ. (Psa. 25:10; Rom. 8:38, 39) Xawe da ge a ǂan Elob ge. ǁÎb di mîdi ǃnâ-ū ǀgui ǁgau tama hâ ǀnam dab asa. Xawe ǁîb di dīgu ǃnâ-ūs tsîna ra ǁgauda. Jehovab ge ǁîb di ôaba ge mā îb ǃgoma tsâ tsî sida ǃgao ǁō. (Jhn. 3:16) ǁNā-amaga da ge a ǂan Jehovab a ama ǀnamdasa. Jehovab tsî Jesub tsîna da ge. ǀNamkha da a ǃkhaisa nî ǁgau, ǁîkha da ga ǁnâuǀnam o. (Jhn. 14:15; 1Jhn. 5:3) Jesub ge ǃgāsase ge mîbada î da ǀnamgu. (Jhn. 13:34, 35) Sida ǃgâsana da a ǀnam ti ǀgui da ge mî ǂgao tama hâ. Xawe da ge dīgu ǃnâ-ūs tsîna ra ǁgau ǂgao.—1Jhn. 3:18. w21.01 9 ¶6; 10 ¶8

ǂKhauhesan ge Jesub ǀkha ǂgaeǂguis tsî ǁîb ǀkha ǀamose ûis aiǂhanuba ūhâ. ǁÎn ge Xristub ǀkha nî hâ, ǁîba mû, ǁîb ǀkha ǃhoa tsî ǁaeba ǁîb ǀkha nî ūhâ. (Jhn. 14:2, 3) ǁNān hîna ǃhūbaib ǃâubasensa ūhân tsîn ge Jesub ǀnammi tsî tsâbaǁhaoxasib tsîna nî hōǃâ. Jesuban mû tide xawes ge ǁîb ǀkhan ūhâ ǀhōsagusisa nî ǀgai Jehovab tsî Jesub tsîn ge īǁkhā kai ûib ǃnân ra ǃgâiǃgâibasensa hō hîna. (Jes. 9:6, 7) Jesub ǀkha ǀhōsagus di ǁkhauǂuisa da ga ūǃoa o da ge ǂgui ǀkhaega ra hō. Aiǁgause da ge nēsi ǁîb xa ǀnam-e tsî ra ǂkhâǃnâhe. ǀAmose ûis di ǃâubasensa da ge māhe hâ. Nēn hoan ǂamais ge Jesub ǀkha da ūhâ ǀhōsagusa ǂoaǂamsa ǀkhaeba ra hauba da—ǁîb ǁGûb. Jehovab ǀkha da ūhâ ǀgū ǀhōsagusa. Kaise kai aiǂanub ge Jesub di ǀhō-i ase ǂanhesa. w20.04 25 ¶15-16

Apostel Paulub ge ǁîb di sîǂkhanisa Korintes ǃnâ ge hâ i, ǂkhauhesa Xristeǁîna ǃoa ge a xoa. Hîna ǀhommi di khâisa nî hōna. ǁNā Xristeǁîn ge ‘Xristub Jesub ǃnâ ǃanuǃanuhe hân, ǂgaihesa ǃanun hoana.’ Tsî Paulub ge “Xristub ǀkha ge ǁōn” xa ge ǃhoa. (1Kor. 1:2; 15:18; 2Kor. 5:17) Paulub ge ǀnî sîǂkhanis ǃnâ ge xoa, “Xristub ge ǁō hâna xu ǂkhaiǂkhaihe khami ǁGûb di ǂkhaisiba xu, ǁnāti da nî ǁkhāti ǀasasib ûib dib ǃnâ ûiga.” (Rom. 6:3-5) Jesub ge gagasi soros ǃnâ khâisa hō tsî ǀhommi ǃoa ge ī. Tsî ǁnās khamin ge “Jesub Xristub” ǀkha nî sī ǀhommi ǃnâ ǂgaeǂguina gagasi khâisa nî hō. Paulub ge ge xoa, Xristub ge ‘ǁō gen’ di ǂguro khâi. (1Kor. 15:20) Jesub ge ge ǂguro i, gagasi khâisa ge a hōba. Tsî ǀamo ûib tsîna. w20.12 5-6 ¶15-16

ǂKhauhesa ǃgâsan hîna nē ǁaen ai ra ǁōn ge ǁnā ǁaeb ǂûb ai khâisa ra hō tsî ǀhomma ǃoa ra ī. Nēs ge apostel Paulub ge 1 Korinteǁîn 15:51, 52 ǃnâ xoa mîdi ǃnâ hâ. Khâisan ga hō o i ge Xristub di ǃgâsana kai ǂkhîba nî ūhâ tsîn ge. Elobmîs ge ra mîba da ǁnān hîna “mûsǀapirob ǃnâ” khâisa nî hōn tae-e ǀhommi ǃnâ sī nî hîsa. Jesub ge ǁîna ge mîba: “Dan ra-i tsî ti sîsenga ǀunis kōse ra ǃkhōǀgaipebasen-i, ǁî-e ta ge nî ǀgaiba mā ǀūben ǂama, o i ge ǁîna ǂnūǀuri haib ǀkha nîra ǃûi, on ge sūǂnubi-aob di soadi ra ǂkhūǂkhūhe khami nîra ǂkhūǂkhūhe, tita on ge ti Îba xu hō xase.”—J.ǂHa. 2:26, 27. w20.12 12 ¶14-15

Apostel Paulub gere mî o, Jesub ge ǁō hân di “ǂguro kai” di. Ob ge gere ǂâibasen Jesub khaoǃgâs tsînan ǀnîna ǀhommi khâisa nî hōsa. Apostelgu tsî nau khoen hîna “Xristub ǃnâ ge ǁōna” ǃkhōǂgā hâse. (1Kor. 15:18) ǁÎgu tsîn ge ǁnā khâisa nî hō. “Xristub ǃnâ” ge ǁōn di khâis ge Paulub ge ǁîb sîǂkhanisa a xoa ǁaeb ai noxoba ge ī tama hâ i. Paulub ge nēs hānîǁae nî īsa gere ǂâibasen, tsî nēb ge ī-i nî ǀgauba. “ǂGurob ge Xristuba, ǁnās khaoǃgâ Xristub dina, hās âb ǃnâ.” (1Kor. 15:23; 1Tes. 4:15, 16) Nētsē da ge Jesub di “hās” ǁaeb ǃnâ hâ. Apostelgu tsî nau ǂkhauhesa Xristeǁîn hîna ge ǁōn ge Jesub di ǀkhaeba ǃâu hâ, ‘ǁîb ǀkha sī ǀhommi ǃnâ ûis’ diba.—Rom. 6:5. w20.12 5 ¶12; 6 ¶16-17

Apostel Paulub ge ǁnān hîna ǀhommi ǃnâ sī nî hâ sorodi xa gere ǃhoa. ǁNā i ge “gagasi soro-i” hîna ǀhommi ǃnâ nî hâ-e. (1Kor. 15:43, 44) Jesub ge ǃhūbaib aib ge hâ i o ǁgansi sorosa ge ūhâ i. Xaweb ge ǀhomma ǃoab ge oa o ge “ûi-ûi ra Gaga kai.” ǁNā-amaga i ge ǂkhauhesana ǀhommi ǃnâ a hâ ǁkhā sor ame sorode nî ūhâ ǀhommi khâisan ga hō o. Paulub ge ge xoa: “ǃHūb dib di īsiba da gere tanis ǁkhās khami da ge ǁkhāti ǀhommi di īsiba nîra tani.” (1Kor. 15:45-49) ǂÂis ǃnâ ūhâ re, Jesub ge khoesi soros ǀkha khâisa ge hō tama hâ i. Paulub ge ǃgāsase ge mî ‘ǁgans tsî ǀaob tsîra Elob gaosiba a ǀumi ǁoa ǃkhaisa.’ (1Kor. 15:50) Apostelgu tsî nau ǂkhauhesan tsîn ge ǀhommi di khâisa sorosi ǁgans hîna ra ǀōs ǀkha hō tide. w20.12 10-11 ¶10-12

Elob ge ǀnî apostelgu Jesub di ga ge daoǁgau î gu ǀhomsi khâis xa xoa. Apostel Johaneb ge ge mîǃā: “Nēsi da a Elob ôa, tsî i ge gorose ǂhai tama, mati da nî īsa; xawe da ge a ǂan, ǁîb ga ǂhai ǃnubai da nî ǁîb khami ī ǃkhaisa.” (1Jhn. 3:2) ǁNā-amaga i ge ǂkhauhesa Xristeǁîna a ǀū ûib mati nî īsa ǀhommi di khâisan ga gagasi sorodi ǃnâ a hō o. Xawen ge Jehovaba ǁîn di madawa-āmsan ga hō o nî mû. Elobmîs ge ǀnî xūna ǁnās xa ge xoa. Aiǁgause i ge ǂkhauhesana Xristub ǀkha nî hâ. “Hoa ǂamkhoesib tsî ǁkhāsib, tsî ǀgaib tsînab ga hîkākā” o. Nēs ge ‘ǀuni khakhoeb ǁōb’ tsîna ǃkhōǂgā hâ. ǀUnisi i ge Jesub tsî ǁnān ǁîb ǀkha nî ǂgaeǂguin tsîna hoa xūna Jehovaba nî mâǁnâ. (1Kor. 15:24-28) ǁNāb ge kaise nî ǁkhoaxa i ǁaeba. w20.12 8 ¶2

ǂGomǂgomsa Xristeǁîn hîna, Jesub ǀkha ǀhommi ǃnâ, sī hân tsîn ge khâisa nî hō. Elobmîs ge ra mî, apostel Paulub tsî nau ǂkhauhesan tsîn ge ǀhommi khâisa ‘ǁō hâna’ xu ǂgurose nî hō. (Fil. 3:11) Nēs ge ra ǁgau ǀnî khâis nî hâsa. Nēs ge Jobi ge hānîǁae i ǁîb ûib ǀkha tae-e nî īsa a mîs ǀkha a ǀgui. (Job 14:15) ‘Xristub hās ǃnân’ ge ǁîb dina, ǁîb ǀkha ǀhommi ǃnâ sī nî hâ. Hoa khoesi ǂhanugu tsî ǁîgu ūhâ ǀgaibab ga dīkākā toa o. Tsî “ǀUni khākhoeb, hîkākāhe nîb ge ǁōba.” ǀHommi khâisa nî hōn ge ǁkhawa ǁō tide. (1Kor. 15:23-26) ǃHūbaib ai khâisa nî hō khoen ge Paulub ge nētsēs xoas ǃnâ a mî mîde xu ǃâubasensa a hōǁkhā. Nē xoasa xu a ǃgāsas ge ǂhanu-ai khoe-i ge ǀhommi ǃoa ī tide. Xawe ǃhūbaib ai khâisa nî hō. w20.12 6-7 ¶18-19

Sada ge a dîsen ǁkhā, ‘mati ta a ǂan ǁkhā Jehovab ǀurute tama hâsa?’ Ti da ga ra dîsen o da ge a ǂan Jehovab a ǀūbada ǁkhā ǃkhaisa. ǂGui kurina ǃkharu hâse i ge The Watchtower ǂkhanib ǃnâ ge mîhe: “ǂGui ǃnāde da ge ǀnai da ge dīsā hâ-i xū-i ai a ǃnôa ǁkhā. Īǁkhā i ge a kaise i ǃgombada ǁkhāsa, Jehovaba da nî ǃoabas aiǃâ da ge ūhâ-i ǁgai ǁnaetiga ǀûsa. . . . Tā Jehovab a ǀūba ǁoa ǁore-e du ge dī ti ǂâi re. ǁGâuab ge ra ǂhâba î du di ǂâi. Kaise du ge ǃoa tsî ǁgaise ra tsâ tsū xū-e du ga dī o. Nēs ge ra ǁgau, ǁgai khoe tama du hâsa tsîb Jehovaba ǀūba du hâ ǃkhaisa. ǃGamǃgamsen re i Jehovaba ǃoa ǀgore tsî ǂgan îb ǀūba du. Îb huidu î du ǃanu ǃgâi ǂâisa ūhâ tsî sadu xa ǃgâise tsâ. Tsî huidu î du nē dīsāna tā ǁkhapa dī.” Xristeǁî kaib nîs aiǃgâb ge apostel Pauluba ǂgui ǁorena ge dī. ǁÎb ǁorenab ge ǀuru tama ge hâ i. (1Tim. 1:12-15) Xawe ǁîb ge xoremarib ǁguibasa Elob xab ge māhe ǀkhaeb ase gere mû. Apostel Paulub ge ge ǀhapitsâsen tama hâ-i xaweb ge ǁîba dī ǁkhāb a xūna Jehovaba dības ai ǂâisa gere ǂnûi. w20.11 27 ¶14; 29 ¶17

Satanni ge ǂgui xūna ra sîsenū, îb ǃnôa kai. Nē xūn ǃoa-ai da mati ra tanisen? Supu i ge a ǂâisa nē xūn ǁnātikōse tsū tama hâ di. Aiǁgause da ge a ǂâi ǁkhā: ‘Nē xū-e dīs ǃaroma ta ge ǂnûiǂuihe tide tsî i ge ǁnātikōse tsū tama.’ Nēti i ǂâiǀgaub ge kaise a tsū. ǃGâise da ge nî dī saora dîde da ga dîsen o: ‘Satanna nē ǃâitsâba ra sîsen-ū ti ǂgaoba ǀgoras ǃaroma? Nēs ǃnâ ta ga māǁnâsen o, o ta Jehovab ǀonsa nî ǀuriǀuri? Nē xū-e ta ga dī o, os nēsa Elob ǀgūse tamas ka io ǃnūse nî ūhâ te?’ Nē dîde ǂâiǃgâ re. Tsî ǁnāpaxū gā-aisiba ǀgoreba. Tsî nē dîde ǂhanu-aisib ǀkha ǃeream re. Nēsa dīs ge nî ǁkhauba da. Tsî nî hui da i da ǃâitsâgu ǃnâ mâǀgai tsî Jesub ge mî khami mî: “Bēxū te, Satantse.” (Mat. 4:10) Sada ǂgaob ga ǀgorasa o, os ge nēsa a tsū ǁkhā. w20.06 12-13 ¶16-17

Hoaǁae da ge Jehovaba ra ǁnâuǀnam mûǂan da ra xui-ao ǁîb a ǂansa tae-i sida ǃaroma a ǃgâisa. (Efe. 4:22-24) ǃGamǃgamsenxasib ǀkha da ge ra mûǂan Jehovab ǂâis a ǀō-aisa ǃkhaisa tsî da ge nau khoen tsîna sida ǀgapiga ra ǃgôa. ǁNās ge ra ǃaroma i da ǃgâi ǀhōsagusisa Jehovab ǀkha ūhâ tsî sida di ǃgâsan ǀkhas tsîna. (Fil. 2:3) ǂAnbasen tama da ka i o, o da ge ǃhūbaib khoen xa ǂgaeǂkhabuhe tsî ǁîn khami a ǀgapi ǂâixa tsî ǁîǂâixa kai ǁkhā. ǂGuro Xristeǁîn tsîn ge ǁnā ǁkhōǁkhōsa mâsib ǃnâ hâ i sa da ge ra mû. Apostel Paulub ge Romeǁîna ǃoa mî o: “Tita ge mâ-i hoa-i âdo ra mîba, anu i hâsa ǃnā hâse i gā-aise ūhâsen tide ǃkhaisa; î-i ǀgaus ǀkha gā-ai.” Apostel Paulub ge ra mûǂan ǂhâbasa i a ǃkhaisa hoa da nî ǃgôasensa. Xawe ǃgamǃgamsen da ga ra o, o da ge ǀnōsa ǀgaub ǃnâ sida xa nî ǂâi. Tsî da ge ǀgapiǃgôasen tide. w20.07 2 ¶1-2

Gao-aob Asab di tsēdi ǃnâ i ge ǃnorasasiba ge hâhâ tama hâ i. ǀGui miliuns xa ǃnāsa soldaga ūhâ toroǂnubis ge Etiopiaba xu ge hā. Toroǂnubis mûǂam-aob Serab ge ge ǂgomǃgâ hâ i ǁîb tsî ǁîb ǂnubis Judaba nî hîkākāsa. Xaweb ge Asaba ǁîb di ǃgôab khoen ai ǂgomsa ǂnûi tama i tsî ǁîb Elob Jehovab ai ge ǂgomaiǂnûi. Asab ge ǀgore tsî ge mî: “Hui da re, ǃKhū, sida di Elotse, sida ge sa ai ra ǂgomaiǂnûi, tsî sa ǀons ǃnâ da ge nē ǂguib ǃoagu go hā xuige.” (2Kro. 14:10) Etiopiab di toroǂnubis ge ǂgui soldaga ge ūhâ i Asab di toroǂnubis xa. Xaweb ge Asaba ge ǂan-i Jehovab a ǀgaisasa tsîb ǁÎb khoena nî huisa. Jehovab ge ǁîb khoena ge hui tsî Etiopiab di toroǂnubisa taoxase ge hîkākā. (2Kro. 14:7-12) ǀŪ da ge a mā ǀguiǀguibe khoe-i hoa-i ǀkha i tae-e hānîǁaeb ǃnâ nî īsa, xawe da ge a ǂan Jehovab ǀhûǀguitimî-aon ra hōǃâ ǃnorasasib hâhâ tidesa. ǂÂis ǃnâ ūhâ re, Jesub ge ge mî ǀuniga tsēdi ǃnâ i ǁîb ǁkhāǁkhāsabena “hoa ǁaedi xa nîra ǁkhanhe” ǃkhaisa.—Mat. 24:9. w20.09 17-18 ¶14-16

Khoe-i xare i ge mîǁgaiǁgaihe ǂgao tama hâ. Sida khākhoen ga mîǁgaiǁgai da o tsî da ga ne xūna ǂgaob ǀkha u o, o da ge a ǂkhabuǂâi ǁkhā. (ǂKhm. 24:10) O mati da nē khoen ta mî xūn xa nî tsâ? Apostel Paulub khami da ge “ǃgâiǃgâisen-e ūhâ” ǁkhā “tsūdīhedi ǃnâ.” Tae-i xa? Tsūdīhe tsî da ga mâǃoahe o, o i ge ra ǁgau Jesub di saosabe ta a ǃkhaisa. (1Pet. 4:14) Jesub ge ge mî ǁîb saosaben nî ǃgôaǃgonhe di. (Jhn. 15:18-20) ǂGuro Xristeǁîn tsîn ge gere ǃgôaǃgonhe. ǁNā ǁaeb ai ge Grikeǁî ǂâiǀgauba ūhâ i khoen ge Xristeǁîna gâre tsî ǂhābusa khoen ase gere mû tsî Jodeǁîn ǁaegun ge Xristeǁîna “ǁkhāǁkhāhe tama tsî ǀūǂam” khoen ase gere mûhe Apostel Petrub tsî Johaneb tsîkha khami. (ǃNǃkh. 4:13) ǂGui khoen ge gere ǂâi Xristeǁîn a ǂkhabusa tsî ǁkhaubasen ǁoa ti. ǁÎn ge ǂgīǂgōsi xūn ǃnâ ǃâ-e ge ūhâ tama hâ i ǁnā-amaga ǂhanub ǃnâ mî xū-e ge ūhâ tama hâ i. ǁÎn ge toro ǃkhamsa gere ǂkhā ǁnā-amaga ǁîna nî ǃkhamba khoe-e ge ūhâ tama hâ i. ǂGuro Xristeǁîna ǁîna gere mâǃoa khoen gere mî ǁgai xūn ǃaroma ge ǀûsen? Hî-î. w20.07 14-15 ¶3-4

Apostel Johaneb ge ǁîb ǃgâsanab ge ǀnam ī amaga ǁîn gagasi mâsib xa kaise gere ǂâiǂhânsen. Nēsa da ge ǁîb di ǃnona sîǂkhanidi ǃnâ hâ ǀapemāde xu ra mû. Johaneb khama a ǀnam da tsî ra tsâba da khoen Jesub ǀkha sī nî ǂgaeǂgui ǃkhais ge ǃgâise ra tsâ kai da. (1Jhn. 2:27) A da ǁîb ǀapemāsa ǂgaob ǀkha ūbasen. ǀKhī da amab ǃnâ ǃgû ǀgara tsî dī ta ra xūn hoan ǃnâ Jehovaba ǁnâuǀnam. ǁÎb mîsa ôaǃnâ tsî ǂgômǃgâ. Jesub ǃnâ ǀgaisa ǂgomsa om. Khoen ǁkhāǁkhādi tsî ǁnāǁgôa hâ khoen di ǂâi ǀgaub tsîna mâǃoa. Tā Jehovaba du ra ǃoaba khama dīsen tsî ǁkhā ǁaeb ai ǁîb ǂkhā hâ xūna dī tsî tā tsū xūna dīsa ra ǁgaridu khoena ǃgâ. Jehovab ǂhâba hâ khama ûi re. Sada ǃgâsan ga tsûtsûda o ǀûba nî tsî huiban ga ǂhâ o māxoǀkhā nî tsî huire sida ǃgâsana în māǀgai. Nē xūna da ga dī-o da ge ǃgomsina da ga hōǃâ xawe amab ǃnâ nî ǃgû ǀgara. w20.07 24-25 ¶15-17

Jehovab ge ǁîba ǂgomǂgomsase ra ǃoaba khoen hoanab a ǀnam amaga ǁîna ǁîb ǀhaohâb ǃnâ ǃâba mā hâ. ǃKharagaǃnâgu ǃâga da ra ǀhuru xawe da ge hoada a ǀō-aisa tsî da ge hoada ǂhâgu hâ. Apostel Paulub ge ge ǃgāsa kai, Jehovaba ra ǃoaba khoe-i ǀgui-i nau-e kō tsî “satsa ta ǂhâba tama hâ” ti a mî ǁoa ǃkhaisa. (1Kor. 12:21) ǀHaohâb ǃnâb ǂkhîba nî hâsa da ga ǂhâba-o, o da ge hoada nî ǃgôagu tsî ǀguipa nî sîsen. (Efe 4:16) ǀGuiǃnâxase da ga ǀhaohâb ǃnâ a sîsen ǀhao on ge hoan hîna ǀhaohâb ǃnâ hâna ǀnammen hâsa nî hōǃâ tsîb ge ǀhaohâba nî ǀgai. Hoa ǀhaohâb ǃûi-aogu ge Jehovab ǃanu gagab ǀkha ǀhaohâb ǃnâ ǁgaumâihe hâ. Xaweb ge mâb hoaba ǃkharagaǃnâgu ǁkhāsiga ūhâ. (1Kor. 12:17) ǀNî gu ge ǀnîsi ǀae ǀgui ge ǁgaumâihe tsî gu ge ǀnî ga ǀaeb tsî kurin xa ra ǃaromahese dī gu gere xūna a dī ǁoa. Xaweb ge ǀhaohâb ǃûi-aoba nauga ǃoa kō tsî “satsa ta ǂhâba tama hâ” ti a mî ǁoa. Nēsa dīs ǃâs ǃnâ gu ge Romeǁîn 12:10 ǃnâb Pauluba mā hâ ǁnamasa nî sao. w20.08 26 ¶1-2; 27 ¶4

Jehovab ge ûib di daob ai ra ūhâ da ǃhūbaib aib ūhâ ǀapeǂhomis ǃnâ-ū. Elob di ǀapeǂhomis ga ǀasa Elobmîs ǁkhāǁkhāde ga ra mā da o, tamas ka ra io ǃgâi tsoatsoade ga ra māda o, da ge ǁnāsa ra ūǃoa tsî ra dī. Xawe tae-e da nî dī Elob ǀapeǂhomis ga ǀkharaǀkharana ga ra dī o sada ûiba ra tsâǀkhāna? Aiǁgause sida di salgu hîna da ra sîsenū ga ǁamaxūsa? ǂKhîba da ge nî ūhâ ǀgara ǂâis ǃnâ da ga ra ūhâ o Jehovaba da ra sîsenbasa. Tsîb ǁîb ǀapeǂhomisa ra sîsen-ūse ra daoǁgauda ǃkhaisa. (Kol. 3:23, 24) Gao-aob Davib ge ǃgâi aiǁgausa ge ǁgau māsenxaseb ge marisa mā tsî i ge tempela a omhe o. ǁÎb ge ge mî: “Tari ta tita, tsî taresa ti ǁaesa, o da ǀgaiba go hō, māsenxase da nî ǀkhaega nē dommi ai? Hoan ge satsa xu go ǀkhī xui-ao, tsî sida ge ǁîna sa ǃomǁaeba xu ra mā tsi.” (1Kro. 29:14) Sada tsîn ge māsenxase da ga mari-e ga ra mā o, o ǀnaib ge māda xū-e ra mā oabi. ǁNās ga hâ xaweb ge Jehovaba kaise ra ǂkhî sada ǁaeb, ǁkhāsib tsî mari-e da ga ǁîb di sîsen-i ǃgao a mā o.—2Kor. 9:7. w20.11 22-23 ¶14-16

Jehovab di ǀHûǀguitimî-aon ase i ge sida aoǁnâ sîsen-e, matikō khoena da amab ǃnâ ra ǂgâxa-ūs ai ǃgaoǃgao-e tama hâ. (Luk. 8:11-15) ǀÛs ose da ga ǃgâiǂhôasa aoǁnâ tsî da ga nau khoena a ǁkhāǁkhā o, ob ge Jehovaba nēsa ǃgâi sîsen-i ase ra ǃgôa. Tae-i ǃaroma? ǁÎb tsî ǁîb ôab tsîna da ra ǁnauǀnam amaga. (Mrk. 13:10; ǃNǃkh. 5:28, 29) Sao ra ǃaromas ams ai da ge aoǁnâ sîsen-e ǁgariǁgarisase ra dī: Nē ǃhūbaib ǀams ge go ǀgū toa. ǃNubu ǁaerob ǀguiba da ge ūhâ nē ǃgâiǂhôas hîna khoen ûiga ra sâusa aoǁnâsa. Tā nē ǂhâǂhâsa sîsen-e mâiǂui tamas ka io ǃgâi mâsibats nî hō ǁaeba ǃâu re. Nēsi aoǁnâ sîsen-i ǃgaots ūhâ turaba ǀgaiǀgai, Elobmîsa ǀgaisase ǁkhāǁkhāsen, ǁkhoaǂgaosiba omkhâi tsî ǃkhō-oasensa ǁkhāǁkhāsen re. ǁKhaisa miliuns xa ǃnāsa khoen hîna ǃhūbaib ǂhawase ǃgâi ǂhôasa ra aoǁnân ǀkha sîsenǀhao re, ots ge Jehovab ra mā ǂkhîba nî hōǃâ. (Neh. 8:10; Luk. 5:10) ǁKhāts as kōse nē sîsen-e dī re Jehovab ǂâu i ge go ti nî mîs kōse. w20.09 7 ¶18-20

Tā da ge nē ǃhūbaib di xūn xa nî ǂgaeǂkhabuhe. “ǂGaeǂhapus ǁuiǃkhūsib dis” ge sida Jehovaba ūba hâ ǀnamma nî ǂkhabu kai tsî da ge Elobmîs tsî aoǁnâ sîsen-i tsîna ǃgôaǃgâ tide. (Mat. 13:22) Jehovab māda hâ xūna da ga ǃûiǃgâ o da ge ǃhaese tsū xūna xu nî ǁkhaubasen. ǀNai da ge nî aiǂhomisen tae-e da nî dīsa. ǁGauoǃnâ xūn, ǃkhamǃnâhe ra xūn tamas ka io ǁnāǁgôa hâ khoen ra ǃhoa xūna da ga internets tamas ka io TVsa da ra kō hîna ga mû o. Ī nîse ī xūn ǃgao da ga ǀnai ais-ai a aiǂhomisen o, o da ge sida ǀhōsagusis Jehovab ǀkha da ūhâsa nî sâu tsî ǁîb mûǁae ǃanuse nî hâ. (Psa. 101:3; 1Tim. 4:12) Jehovab mā da hâ xūna da ge nî ǃgôaǃgâ. Nēn ge Elobmîs amab tsî nau khoena Elobmîs xa ǁkhāǁkhās aiǂhanuba ǃkhōǂgâ hâ. Nēsa da ga dī o da ge ǃanu ǃgâiǂâis tsî ǂâibasensa ūhâ ûiba nî ūhâ. Tsî da ge nau khoena Jehovab xa ǁkhāǁkhās ra hau ǂkhîba nî hōǃâ. w20.09 30 ¶16-19

ǁĀǁnâhe du hâ? ǁĀǁnâhe du ge tsēs ai du ge ǂgui khoen ais ai ge ǁgau, ǂgomsa du Jehovab tsî ǁîb ǀapeǂhomis ǃnâ ūhâsa tsî du ǁîba ra ǃoaba ǂgao ǃkhaisa. Jehovab ge nētsē ǁîb ǀapeǂhomisa ra daoǁgau ǁîb di ǀgaugu, ǂâibasens tsî ǁkhāsib ǃoa. Jehovab di ǀgaun hîna da ǁîb ǀapeǂhomis ǃnâ a mû ǁkhāga kō. ǂGurose, ‘Elob ge khoen’ ǁaegu ǀgorasa ūhâ tama. (ǃNǃkh. 10:34) ǀNammi ge Jehovaba ge ǁgari îb ǁîb Ôaba “hoan ǃaroma xoremarib ase” mā. (1Tim. 2:6; Jhn. 3:16) Jehovab ge khoena ra sîsen-ū, în ǃgâiǂhôasa ǁnān hîna ra ǃgâna aoǁnâba. Nēs ǃnâb ge mâ khoe-i hoa-i hîna xoremarib ǃgâiba ra hō ǂgao-e ra hui. ǀGamǁîse, Jehova Elob ge ǃkhaerasib di Elo tamaba, xaweb ge a ǂkhîb di Eloba. (1Kor. 14:33, 40) ǁNā-amaga da ge nî ǃâubasen ǁîb di ǃoaba-aon ǁîba ǃamkuse ǂkhîb ǃnâ nî ǃoaba ǃkhaisa. ǃNonaǁîse, Jehovab ge kai ‘ǁkhāǁkhā-aoba.’ (Jes. 30:21) ǁNā-amagas ge ǁÎb di ǀapeǂhomisa ǃgarise ra sîsen, îs nau khoena Elobmîsa ǁkhāǁkhā. Nēs ge ǀhaohâb tsî aoǁnâ sîsenni ǃnâ-ū ra dīhe. w20.10 20 ¶1-3