Junib

Elobmîsa ra ǁkhāǁkhā khoen ge ǁkhāǁkhān ta khoen ǃnâ ǃgâiǃgâibasensa nî ǁgau. ǁÎn ge ǀgū ǁae nî sadu di ǃgâsa kai ǀhaohâb ǃnâ. Supu tama i ge hâ ǀhōsan hînan ge ǃhūbaib ǃnâ ūhâ īna ǁnāxusa. Tsî ǂkhabasa ǀkharaǀkharana dīsa Jehovaba ǃoabas ǃgao. ǃGâi ǁkhāǁkhā-ao-e i ge ǁî-i ra ǁkhāǁkhā khoe-e ra hui ī i ǀhaohâb ǃnâ hâ ǃgâsana ǂan. Nēn ge ǁîna nî hui în Jehovab ǀkha ǀgū ǀhōsasisa kuru. ǁKhāǁkhā du ra khoen ge ǃgâi ǁaeba Elob di khoen ǀkha nî ūhâ. Tsî nē ǃgâsan ge ǁîna nî hui în ǃgâi ǀhōsagusisa Jehovab ǀkha ūhâ. Tsî ǁî-e nî ǂkhâǃnâ ǃgomsinan ga ra ūhâ o. ǁKhāǁkhāsen ra khoe-i hoa-i ge ǀhaohâb ǃnâ ǃâ-e ūhâ tsî a gagasi omaris di ǁani ǃkhaisa da ge ra ǂhâba. Tsî i nî ǀnamxaǃnâ omaris ǃgâsan ǃoa ǂgae-e ǃkhaisa. O i ge ǁî-e nî supuba i ī tā Jehovaba ǀnam tama hâ khoen ǀkha hâ. (ǂKhm. 13:20) ǁÎ i gere hâ-ū ǀhōsan ga ǁî-i ǀkha hâ ǂgao tama ga ra ī tamas ka io. ǁÎ-i ǀkha dī xū-e ūhâ ǂgao tama ga ra io. I ge ǁî-e a ǂan ama ǀhōsana i Jehovab di ǀapeǂhomis ǃnâ nî ūhâ ǃkhaisa.—Mrk. 10:29, 30; 1Pet. 4:4. w20.10 17 ¶10-11

Jesub ǀkha da ge ǀhōsagusisa nî ūhâ Jehovab ǀkha da ga ǀhōsagu ǂgao o. Tae-i ǃaromasa nēsa? ǀGam ǃaroma ra xa ǂâi re. ǂGurob ge Jesuba ǁîb ǁkhāǁkhāsabega ge mîba: “Abob kom aitsama sago ǀnam hâo, sago tita ǀnam hâ” amaga. (Jhn. 16:27) “Khoe-i xare-i ge Abob tawa a sī ǁoa, tita xu i ga sī tama io” tis tsînab ge ge mî. (Jhn. 14:6) Jehovab ǀkha ǀhōsagusa Jesub ose kuru ǂgaos ge oms ǃnâ dao-amsa sîsen-ū tamase ǂgās ǀkha a ǀgui. Jesub ge ǁkhā ǂkhōsa ge sîsen-ū ǁguiǃāb ge o “tita ge gūn di dao-amta.” (Jhn. 10:7) ǀGamǁî ǃaromas ge Jesub ge ǁîb ǁGûb di ǀgauga ǃgâise ra ǁgau. ǁÎb di ǁkhāǁkhāsabega ǃoab ge ge mî: “Tita ra mû-i kom ǁGûba ra mû-eo.” (Jhn. 14:9) ǂHâǂhâsa ǀgaub hîna da Jehovab xa a ǁkhāǁkhāsen ǁkhāb ge Jesub ûiba ôaǃnâs ǃnâ-ūsa. Jesub xa da ra ǃnāsa ǂansa ūǂgā khami da ge ǁîba ǀnamma nî omkhâiba. Tsî sada ǀhōsagusis Jesub ǀkha ra kai khamib ge Jehovaba da ūba hâ ǀnamma nî ǀgai. w20.04 21-22 ¶5-6

ǀAeb xa du karob ǃnâ ǁgoe tamas ka io rolstoels ǃnâ ǂnôa? ǂKhabusa ǁgoadi tamas ka io mûde du ūhâ? Nēs ga ama o, o du Jehovaba ǁnān hîna ǂkham tsî a ǀgaisan ǀkha a ǃoaba ǁkhā? Î, nēsa du ge a dī ǁkha. ǂGui khaira ǃgâsan ge nē daob ai ra ǃkhoe. ǁÎn ge nē sîsenna ǁîn ǀgaib ai a dīhō ǁoa. Xawen ge Jehovab ǀgaib ai ra ǃgāsen ǀhaode ǃoa ǁâǁawab ǃnâ-ū tamas ka io vidiob ǃnâ-ū kōs ǃnâ. Tsîn ge aoǁnâ sîsenni ǃnâ ra ǁhao ǁîn ǀaeǃkhō-aon tsî ǀaokhoen tsîna aoǁnâbas ǃnâ. Hoa xūn hîna du Jehovaba ra dība ǂgaona du ga dīho tama i. Xawe tā ǂkhabuǂâi tsî ǂâi re ǀams kōse ta ge ǃkhoe hō tide di. Jehovab ge sadu ǂgoms tsî kurugu ǃnâ du ge ǁîba dība xūn amsi a ǀnam du. Sadu ge ǁîb huiba nēsi ǃnāsase ǂhâ hâ tsî ǁîb ge ǁnāxū ǃnâ du tide. (Psa. 9:10) Xaweb ge sadu ǀgūse nî hâ. w20.04 29 ¶16-17

Elob ǃnâ ra ǂgom khoe-i ǀkha da tae-e a ǃhoaǃgao ǁkhā? ǀGau ai du ra xūna ǃoa kō re. ǀGui Elob ǀguiba ǃoaba tsî i ge Jesuba khoen ore-aob ase a mû ǁkhā. ǁÎ-i ge tsū ǁaeb ǀgūǁae nî ǀamse īb ǃnâ da ûi hâ ǃkhaisa ra ǂgom. Nē xūna sîsen-ū re tsî Elobmîsa ǃgâi ǀgaub nē khoe-i ǂgaob nî tsâǀkhā-eb ǃnâ sîsen-ū re. ǂÂis ǃnâ ūhâ re khoen hoa xūn ǁîn ǂgomdi ǂgaeǂgui-aogu ra ǁkhāǁkhānin ǃnâ ǂgom tama hâsa. Nēs ǃaroma khoe-i hâ ǃnâ ǂgoms xa da ga ǂanǂui toas khaoǃgâ ǁî-i ǃgōsase ra ǂgomǃnâ xū-e ôaǃnâ re. Sîsabe ǃgâsab ge ge mî khoen ge ǃnona ǀguira elob ǃnân da ǂgom di ra mî. Xawen ge ǁGûb, ǀGôab tsî ǃanu gagab a ǀgui khoesa ǂgom tama hâ. “Nēsa ta ga mûǂan o, o i ge a supu nē khoe-i ǀkha ǁgamǀhaosa,” tib ge ra mî. Nēs ǃaroma khoe-i tae-e amabes ǃnâ ra ǂgomsa ôaǃnâ re. O da ge apostel Paulub khami ‘hoana a hū kaiba’ ǁkhā ǂguin âna da nî hōse.—1Kor. 9:19-22. w20.04 10 ¶9-10

Danieli tsî Johaneb tsîkha hoakha ge ge mî Jehovab tsî Jesub tsîkha ǁîkha ra ǃoaba khoena kai ǁgâiǀāb ǃnâ nî sâusa. Nēs ǃaroma da ge ǃnomsase nî hâ, tae-i ǀgui i ga i xawe. Danieli ge ra mî ǁnān hîna ra ûiǃkharun ǀondi ge “ǂkhanis ǃnâ xoahe” hâ. Tae-e da nî dī i di sida ǀonde ǁnā ǂkhanis ǃnâ xoamâihe? ǁGau da ge nî Elob ǁKhaob, Jesub ǃnâ da ra ǂgomsa. (Jhn. 1:29) Sida ûiba da ge Eloba mā tsî nî ǁāǁnâ kaisen. (1Pet. 3:21) Tsî da ge khoena Jehovab xa ǁkhāǁkhās ǃnâ-ū Elob Goasiba nî ǂkhâǃnâ. Nēb ge a ǁae sada Jehovab tsî ǁîb ǀapeǂhumis ǃnâ ǂgomǃgâsiba nî omkhâisa. Nēsi da ge Elob Gaosiba nî ǂkhâǃnâ. Nēsa da ga dī o, o da ge ǀapas tsî ǃkhawagas gaokha ga Elob Gaosib xa hîkākāhe o, o nî sâuhe. w20.05 16 ¶18-19

Adammi tsî Evas tsîra ge Jehovab ǀonsa ge ǂan i. ǁÎra ge ǂgui ǂhâǂhâsa xūn tsîna ǁîb xa ge ǂan i. Aiǁgause ra ge ge ǂan i ǁîb a ǁîra di kuru-ao, ûib di mā-ao. Tsîb ge ǁîra îsa paradais ǃhanaba oms ase a mā tsî ǀoasa ûib tsîna ǃkhaisa. (Gen. 1:26-28; 2:18) Xawe ra ge ǁîra di ǀoasa kurusa sîsen-ū. Nē xūn hînab ge Jehovaba ǁîra mān xa ǂâiǃgâs ǃnâ? ǀNammi tsî ǃgôaǃgâsib tsîna ra ge nē ǀonsa ra ǂnûǁkhaeba khoe-e ǁgau? ǃEreams ge ge ǃgāsa Elob di mâǃoa-aob ge ǁîra ǃâitsâ o. Satanni ge ǀaoba sîsen-ū tsî Evasa dîsa ge dî: Eloba amabes ǃnâ ge mî: “Saro ge ǂû tide mâ hai-i nē ǃhanab di-i hoa-i xa, ti?” (Gen. 2:16, 17; 3:1) Satanni ge ǂhumiba ǃkhōǂgā hâ dîsa Evasa ge dî. Elob ge ge mî ǁîra hoa haide xu a ǂû ǁkhā di. Xawe ǁîra ǀgui ǃkhâikhoms ǀguisa ge mā. (Gen. 2:9) Satanni dîs ge gere mî Elob māǀnamxa tama hâ di. Evas ge ǀnîsi gere ǂâi, ‘ǃgâi xū-e hâ hînab Eloba tida xu ra sâu-e?’ w20.06 3-4 ¶8-9

ǀNî ǃoaba-aon Jehovab din ge. ǁÎn ǃgâsa-i ǁî-i ǃoa-ai ge dī xū-i xa ge tsûtsûhe. Apostel Paulub ge nēsa ge mûǂan. ǁAen ai da “ǀauxū-e” sada ǃgâsan ǃoa-ai a ūhâ ǁkhā ǃkhaisa. Tamas ka io da ge ǂhanuoǃnâse ge hâ-ūhe. ǂAnbasen tama da ga io da ge ǁaiba a omkhâi ǁkhā. Nē ǁaib hîna da ra omkhâib ge a ǃaroma ǁkhā. Î da Jehovaba xu ǂgae-oasen. Pablo di ǀon hâ ǃgâsab hîna Suid Amerikab ǃnâ ra hâb. Xa i ge khoe-e ama tama xūna ge ǃhoa. Pablob ge ge ǀhapixa tama hâ i. Xawe gu ge ǀhaohâb ǃûi-aoga ǁîb a ǀhapixa ǃkhaisa ǂgom tsî ge ǁnama bi. ǁÎba mati ge tanisen? “Kaise ta ge nēs xa ge ǁaixa. Tsî ǀhaohâba xu ge ǂgae-oasen,” tib ge Pabloba ra mî. Khoe-i ga ǃkharu ge ǁaeb ǃnâ ǁgai ǁore-e dī o. O i ge nēs xa gaxu ǁaeba ǃgâi tamase a tsâ ǁkhā. Tsî a ǂâi ǁkhā Elob ǁî-e a ǀnam ǁoa ti. ǃHausen tsî i ga Elob ǀkhomma hō xawe i ge. Elob khoen di ǃâsa i anu tama khami a tsâ ǁkhā. Nē da go ǃhoaǃgao mâsiga ra hōǃâ ǃgâsan xa du mati ra tsâ? w20.06 19 ¶6-7

Gagasise a tsûtsûda ǁkhā xūna mûǃā tsî da ge ǁîna xu nî hâbē. (Heb. 5:14) Aiǁgause da ge sida di sâǁaeb ǃnâ da ra dī xūna ǃamkuse nî ǁhûi. Tvs tsî muvin tsîn ge kai-amse ǁgauoǃnâ xūna ra ǁgau. Jehovab ge nē tanisen ǀgaub xa ǃgâibahe tama hâ tsî i ge sida tsîna a tsûtsû ǁkhā. ǁNā-amaga da ge Eloba da ūba hâ ǀnamma nî ǂkhabu kai xūna xu nî hâbē. (Efe. 5:5, 6) ǁNāǁnôa hâ khoen ra ǃhoa ǂhumi ǂhôab a dī ǁkhā ǂkhôaba da ge nî mûǃā. ǁÎn ge sida di ǃgâsan tamas ka io Jehovab di ǀapeǂhomis ǃnâ da ūhâ ǂgomǃgâsiba ra ǂkhabu kai ǂgao. (1Tim. 4:1, 7; 2Tim. 2:16) ǁNā ǂhôan ge sida ǂgomsa a ǂkhabu kai ǁkhā. Tā da ge nē xūna nî ǂgom. Tae-i ǃaroma? Nē ǂhumi ǂhôan ge “ǁgao hâ ǁnâuǃāba ūhâ tsî amaba ūǀhanahe hâ” khoena xu ra hā. ǁÎn ge “ǂnoagudîdi tsî khomgudi” tsîna ra tsoatsoa ǂgao. (1Tim. 6:4, 5) ǁÎn ge ra ǂkhaba îda ǁîn di ǂhumiba ǂgom tsî tā sada di ǃgâsana ǂgomǃgâ. w20.09 29 ¶13, 15

Aob tsî taras tsîra ge ǃgôasib tsî ǀnammi ǃnâ nî hâ-ūgu. (Efe. 5:33) Elobmîs ge ra ǁkhāǁkhā da mâs ge ūs ǃgâ-ai a ǃgâi. (ǃNǃkh. 20:35) Mâ ǀgauba ǃgamme hâ khoena nî hui în ǀnammi tsî ǃgôasiba ǁgaugu? ǁNā ǀgaub ge ǃgamǃgamsenxasiba. ǃGamǃgamsenxasib ge ǂgui Xristeǁî ǃgâsana ge hui în ǂkhîba ūhâ ǁîn di ǃgamme ommi ǃnâ. Aiǁgause, ǃgamme hâ aob Steveni ge ra mî: “ǃGomsin ga hâ ǁaeb ai ro ge nî sîsenǁare. ‘Tita tae-i xa a ǃgâibahe’ ti dîsens xa, ‘sima tae-i xa a ǃgâibahe’ ti dîsen re.” ǁÎb taras Stefanies ge ra ǂā-am: “Khoe-i ge hoaǁae ra ǂkhaba khoe-i ǀkha hâ ǂgao tama hâ. ǁNâusāgum ga ra o, om ge ǃaromas ǁnā ǁnâusāgus disa ôa tsî ra sîsenǂam. ǁNāpāxum ge ǀgore, Jehovab ǀapeǂhomis ǂkhanina ôaǃnâ tsî ra ǁgamǁare. ǃGomsibam ge ra ǁnāǂam, sim ge ǁnāǂamgu tama hâ.” ǃGamme hâ khoen ge ǂkhîba a hōǃâ ǁkhā ǁî-i ǃgamme hâ khoe-i xa i a ǀgapi di i ga ǂâi tama io. w20.07 3-4 ¶5-6

Tā sadu ǀgaib tsî ǁkhāsib ai ǂgomaiǂnûi Jehovaba du ga ǃoaba o. Apostel Paulub ge ǀgapi ǁkhāǁkhāsensa ge ūhâ i. ǁÎb ge ǀgapise ge ǃgôahe hâ i Jodeǁî ǂgaeǂgui-aob Gamaliel di ǀōn hâb xa ge ǁkhāǁkhāhe. (ǃNǃkh. 5:34; 22:3) Tsî ǁaerob ǀgaibab ge Pauluba Jodeǁîn ǁaegu ǁîb tsîna ge ǀgapi ǃgôahe hâ i. (ǃNǃkh. 26:4) Xaweb ge Pauluba ǁîb ǀgaib ai ge ǂgomaiǂnûi tama hâ i. Paulub ge nau khoen mûdi ǃnâ ge ǀgapise gere mûsen kai bi xūna ge xūmâi. (Fil. 3:8) Paulub ge ǂgui ǃgomsina ge ǃkharu ǃnâ Xristeǁî kaib ge o. ǁÎb ge ǁîb ǃhaos khoen xa ge ǃhuihe. (ǃNǃkh. 23:12-14) Tsîb ge ǁîb ǁanǁare-aon Romen xa ǂnauhe tsî ǃkhōsis ǃnâ ge aoǂgāhe. (ǃNǃkh. 16:19-24, 37) ǁÎb ge ge mûǂan ǀoasa kurusab ūhâ tama hâsa tsî ǃgâi xū-e dīs a ǃgomsa. (Rom. 7:21-25) ǁÎb ge ge mā-am tama hâ i ǁîb mâǃoa-aon tamas ka io ǁîb ǃnubusina în ǁîba Xristuba sao ǀû kai. Xaweb ge ‘ǃgâiǃgâisen-e ge ūhâ ǂkhabusasigu’ ǃnâ. Tae-i amsi? ǂKhabub gere o, ob ge gere mû Jehovab mati ra hui bi ǀgausa.—2Kor. 4:7; 12:10. w20.07 16 ¶7-8

Nētsē da ge Gaosib di ǃgâiǂhôasa aoǁnâs ai sida di ǂâisa ra ǂnûi ǂgao. Jesub ge ge mî ǁîb sao-aon ǁîb xa ǃnāsa sîsen-e nî dī ti, ǁîb ǁōb khaoǃgâ. ǁÎb khâis khaoǃgâb ge Jesuba ǁîb ǁkhāǁkhāsabega ge hui, îgu buruxa ǀgaub ǃnâ ǁauna ǃkhō. ǁNā ǁaeb aib ge ǁîga ge hōhōǃnâ, khoeǃkhō-ao sîsen-i nau xūn ǂam-ai a ǂhâǂhâsa ǃkhaisa. (Jhn. 21:15-17) ǀHomǃapab nîs aiǃgâb ge Jesuba ǁîb di ǁkhāǁkhāsabega ge mîba, aoǁnâ sîsen-i ǁîb ge tsoatsoa i, nau ǃhūgu ǃnâs tsîna nî dīhesa. (ǃNǃkh. 1:6-8) Kurigu khaoǃgâb ge Jesuba apostel Johaneba ǁkhapos ǃnâ ge mîba tae-i “ǃKhūb di tsēs” ai nî ī sa. Apostel Johaneb ge ge mû: ǀHomǃgāb daoǁgaus ǃnakas “ǀamo ǃgâiǂhôasa . . . mâ ǃhaoǃnās hoasa, tsî ǃhaos hoasa, tsî gowab hoaba, tsî ǁaes” hoas ǃnâ ra aoǁnâhesa. (J.ǂHa. 1:10; 14:6) ǃGāsa i ge a Jehovab di ǂâis ge îda nē ǃhūb ǂhabase ra dīhe aoǁnâ sîsen-i ǃnâ ǃâ, toa i nîs kōse. w20.09 9 ¶5

Abrahammi omaris tsîn ge kai ǃgomsiga ge ūhâi i. ǁÎb taras Saras ge ǀgôa-e ge hō ǁoa i. Nēs xa ǃaromahe hâse ra ge ǂgui kuriga ge ǂkhîoǃnâ i. Egas ge Sarasa ǁîs ǃgās Hagarsa Abrahamma ge mā is ǀgôana hōba ra. Xawes ge Hagarsa Ismaelas ge ǀgamǀkhā o Sarasa ge sora tsoatsoa. Nē mâsib ge kaise ge ǃgombasi tsîs ge Sarasa Hagarsa omsaxu ge ǃhaeǂui. (Gen. 16:1-6) Saras ge ǀgamǀkhā tsî Abrahamma aore ǀgôab hînab ge Isak ti ǀonsa a māba ge hōba. Abrahammi ge ǁîb ǀgôakha, Isaki tsî Ismaeli tsîkha kaise ge ǀnam-i. Xaweb ge Ismaela Isaka ǁgaise gere hâ-ū, amagab ge Jehovaba Abrahamma ge mîba îb Ismaeli tsî Hagars tsîna sîbē. (Gen. 21:9-14) Egab ge Jehovaba Abrahamma ge mîba îb Isaka ǁguiba. (Gen. 22:1, 2; Heb. 11:17-19) Hoa ǃnāra ǃnâb ge Abrahamma Jehovab ǃnâ ǂgomǃgâsiba nî ūhâ ge īs ge ǁîb ôakha ǃgaon xūna nî ǃgâisa. w20.08 4 ¶9-10

ǂÂis ǀguisa hî re khâisa nî māhe khoen matiskōse nî ǂkhîsa, Jehovaban nî ǁnâuǀnam gan ǀkhaǀkharana ǁîn ûib ǃnâra dī hîna. Xawe Jehovab ge mā-am tide în khoen hîna ǀkhaǀkharana dī ǂgao tama hâna paradais ǃnâ hâ tsî ǂkhîba ūbē. (Jes. 65:20; Jhn. 5:28, 29) Gaosib ǂgaeǂguis ǃnākan ge Elob khoen hoana nî mû ǂKhoamîdi 10:22 ǃnâ hâ mîdi a ama ǃkhaisa. “ǀKhaeb ǃkhūb dib ra ǃkhū kai tsî tsû-i xare-eb ǁîba dī ǀaro tama.” Jehovab gagab huib ǀkhan ge Elob khoena gagasise nî kai. Nēs ge ra ǂâibasen ǁîn ge ǂaub ǀkha Xristub khami nî tanisen tsî ǀoasa kurusa nî hō. (Jhn. 13:15-17; Efe. 4:23) Tsēdi ra ǃkharu khaman ge ǁîn sorode on ra ǀgai o nî ǀgai tsîn ge nî ǁnâuǀnamxa khoe kai. Amaseb ge ǁnāǁaeb ai ûiba kaise nî ǁkhoaxa.—Job 33:25. w20.08 17 ¶11-12

Mati da nî ǁgau ǃgamme tama hâ ǃgâsan di mâsigu tsî tsâsigu tsîna da ra ǃgôasa? ǂÂis ǃnâ da ge nî ūhâ ǀnî ǃgâsan hîna ǃgamme tama hân ge aitsama nē mîmaisa a dīsa. ǀNîn ge ra ǃgamme ǂgao xawe ǁîn a ǃgâiba khoe-e hō tama hâ. Tsî ǀnîn ge ǁî-i ge ǃgamme hâ i khoe-i xa ge ǁōxū-e. Matib ga mâsiba ī xawen ge ǀhaohâb ǃnâ hâ ǃgâsana. ǃGamme tama hâ ǃgâsana tā nî dî tae-i ǃaroman ǃgamme tama hâsa. Tamas ka ion ǃgamme-ūn nî khoe-e ra ôahui-e ǂgao ǃkhaisa. Huiban ǂgan tama hâ hîna da ga ǃgammen nî khoe-e ǁîna ôaba on, nē ǃgâsana mati nî tsâ? (1Tim. 5:13) Sida ǃgâsan hîna ǃgamme tama hân ge kaise nî ǃgôaǃgâ. ǁÎna da ga ǁîn ūhâ ǃgâi ǀgaugu ǃgao a ǃgôa o. Tsî ǃgamme taman hâ ǃkhais ǃgao ǀkhom tama io. ǁÎna ǀkhom tama i tsî da ge Jehovaban ǂgomǂgomsase ra ǃoaba ǃkhais ǃgao nî ǃgôa nî. Nēti da ga dī on ge sida ǃgâsan hîna ǃgamme tama hâna, “satsa ta ǂhâba tama hâ” di da ra mî khama tsâ tide. (1Kor. 12:21) On ge ǁîna nî ǂan ǃgôa nî da ra sa tsî ǁîn ǀhaohâb ǃnâ ra ǀhuru ǃâb tsîna da ra ǃgôaǃgâsa. w20.08 29 ¶10, 14

Egab ge apostel Paulub tsîna Jesuba ge mû. (1Kor. 15:8) Paulub (Saul) ge Damaskusa ǃoa ge gau i, tsî ǁōba xu khâi hâ Jesub domma ge ǁnâu ǀhomma xu. (ǃNǃkh. 9:3-5) Paulub ǀkha ge ī xū-i ge ra ǁgau, Jesub ge amabes ǃnâ khâisa. (ǃNǃkh. 26:12-15) ǀNî khoen ge Paulub ge mî, xū-i ǃnâ ǃgâiǃgâibasensa nî ūhâ. ǁÎb gere Xristeǁîna mâǃoa amaga. Paulub ge Jesub khâisab ge mû o, o ǃgarise gere sîsen. Tsî khoena amaba gere ǁkhāǁkhā. ǁÎb ge ǂnauhe, tronkes ǃnâ ǂgāhe tsî ǂgau-i xas tsîna ge khôa xuhe hâ i. Tsî nēn hoan ge Jesub ge ǁō xawe, ûitsama dib gere ǁkhāǁkhā amaga, ǁîb ǀkha gere ī. (1Kor. 15:9-11; 2Kor. 11:23-27) Paulub ge gere ǂgom Jesub ge ǁōba xu a khâisa. Tsîb ge gere māsen ǁnās xa aoǁnâ tsî ǁîb ǃgao ǁōsa. ǂGurokamǁaeb Xristeǁîn ge, Jesub ge ǁōba xu a khâisa a mû ǃkhais ge ra hui da, î da khâis ǃnâ ǂgom. Sida di ǂgoms ge nēs xa ra ǀgaiǀgaihe. w20.12 3 ¶8-10

Dîsen re: ‘Hoaǁae ta ǀhaode ra ǁhaoǃnâ?’ Jehovab ǀapeǂhomis xa aiǂhomihe hâ ǀhaode ta ga ǁhaoǃnâ o, o da ge gagasise ra khoakhoahe tsî sida ǃgâsan xa ra ǀgaiǀgaihe. (Mat. 11:28) Nētis tsîna dîsen re: ‘Hoaǁae ta Elobmîsa ra ǁkhāǁkhāsen?’ Sadu omaris ǀkha du ga hâ-o, wekheb hoaba du omaris ǃoabas ǃgao ǁaeba ra ǁamaǂûi? Tamas ka io ǀguri du ka hâ o du omaris ǃnâ du hâ khama ǁaeba ra ǁama ǂui? Tsî ǁkhā du a khama du aoǁnâ tsî ra ǁkhāǁkhāsabe dī? Tae-i ǃaroma da nē dîde nî dîsen? Elobmîs ge ra mî Jehovab ge sida ǂâidi tsî sida ǂgaogu ǃnâ hâ xūna ra ôaǃnâ tsî da ge sida tsîna ǁkhā xū-e nî dī. (1Kro. 28:9) Sida ǂâiǀgaub tamas ka io tanisen ǀgaub ǃnâ da ǀkharaǀkharana nî dī sa da ga mû o, da ge Jehovaba nî ǂgan îda ǁnā xūna dawa. Nē ǁaeba sîsen-ū re its hā nî ǃgomsin ǃgao aiǂhomisen. w20.09 19 ¶19-20

Jesub ge ǂkhō-e ra sîsen-ūse ge mîǃā, tae-e i khoe-e nî dīsa ǁîb ǁkhāǁkhāsabe kai ǂgao i ga ra o. ǁÎb ge khoe-i ǂgō-om-e ra om ǂgao i tsî gaob hîna toroba ǃoa ra îb xa gere ǃhoa. Jesub ge ge mî om aob ge “aibe ǂnû, tsî ǁnās ǃoa ǂhâbab hâna nî ǃgôa.” ǂGō-omma om toas ǃgao tsîb ge gaob tsîna “aibe ǂnû, tsî” ra ǀapeǀape nē torobab nî dansa. (Luk. 14:27-32) ǁNās ǁkhās aseb ge Jesuba ge ǂan i, khoe-i ga ǁîb di ǁkhāǁkhāsabe kai ǂgao o, o i ge nî ôaǃnâ ǁîba sao-ais taena ǃkhōǂgā hâsa. ǁNā-amaga da ge Elobmîsa da ra ǁkhāǁkhā khoena nî ǂkhâǃnâ, în mâ wekheb hoaba ǁkhāǁkhāsen. Elobmîsa ra ǁkhāǁkhā khoe-i ase du ge mâ Elobmîs ǁkhāǁkhās hoas aiǃâ nî aiǂhomisen. Elobmîsa du ra ǁkhāǁkhā khoe-e ǂâis ǃnâ ūhâse, ǂâi re, mati i nē ǃgāsasiba nî supuse ǁnâuǃā tsî ǁî-i ûib ǃnâ sîsen-ūsa.—Neh. 8:8; ǂKhm. 15:28. w20.10 7 ¶5; 8 ¶7

Jesub di daoǁgaudi ge a ǃgāsa. Khoena da ge Jesub ge mîmā xūna nî ǁkhāǁkhā. Xawe da ge ǂhâǂhâsa xū-e tā nî ǀuru. Jesub ge ge mî tama hâ-i: ‘Sago ta gere ǁkhāǁkhā mîmāna’ ǁkhāǁkhā di. Xaweb ge ge mî: ǁÎna ǁkhāǁkhāre în ǃkhōǀgaipe “sago ta gere mîmān hoana.” Jesub di mîmāsa ǁnâuǀnams ge ra ǂâibasen, Elobmîsa ra ǁkhāǁkhāsen khoe-e da ge tae-e i nî dīsa nî ǁkhāǁkhā. Tsî da ge ǁî-e sida di dīb ǃnâ-ūs tsîna mati i nî dīsa nî ǁgau. (ǃNǃkh. 8:31) ‘ǃKhōǀgaipes’ ge ra ǂâibasen mîmāsats ge ra ǁnâuǀnam di. Elobmîsa da ga nau khoena a ǁkhāǁkhā o, o da ge ǁîna ra hui în Elob di mîmāda ǁnâuǀnam. Xawe da ge nēs xa ǃnāsa-e nî dī. ǁKhāǁkhā da ra khoena da ge nî hui în ǁkhāǁkhāsenan go xūna ǁîn di ûib ǃnâ ûiǂui. (Jhn. 14:15; 1Jhn. 2:3) Sida di aiǁgausa xu da ge ǁkhāǁkhā da ra khoena nî ǁgau, matin amab ǂans hînan go hōsa nî sîsenǂuisa. Skoli ais, oms ais, tsî ǃgâi ǁaeban ga ra ūhâs tsîna. ǁKhāǁkhā da ra khoe-i ra ǁnâu hîna da ge Jehovaba ǃoa nî ǀgore. Tsî da ge Jehovaba nî ǂgan i i ǁîb di ǃanu gagaba ǁî-e daoǁgau.—Jhn. 16:13. w20.11 2-3 ¶3-5

Jesub ǁkhāǁkhāsabegu ge ǃgomsina gere hōǃâ. Aiǁgause, i ge ǂgui Elobmîde ge ǀkhai-i. ǁÎgu ge nētsē da sida ūhâ ǂgui ǂkhanin Elobmîsa ra ǁguiǃāna ge ūhâ tama hâ-i. Tsî gu ge ǂgui khoen, ǃkharagu gowaga ra ǃoana gere aoǁnâba. Nē ǃgomsina gu gere hōǃā, xawe gu ge nē ǂgomǂgomsa ǁkhāǁkhāsabega ǂgomhe ǁoasa sîsen-e ge dī. ǀOro kurigu ǃnâ gu ge ǃgâiǂhôasa ‘khoen ǀhommi ǃnaga hân hoana gere aoǁnâba.’ (Kol. 1:6, 23) Sada ǁaeb ǃnâb ge Jehovaba noxopa ǁîb khoena ra daoǁgau. Tsî ǁîna ǂhân hâ ǀgaiba ra mā, în ǁîb di ǂâisa dī. ǁÎb khoenab ge ǃnāsase Elobmîs ǃnâ-ū ra daoǁgau. Elobmîs ǃnâ da ge Jesub di aoǁnâ sîsenni tsî ǁîb di mîmās ǁkhāǁkhāsabegab ge mîmās. Î gu ǁîb ge tsoatsoa sîsen-e ǀams gose dīs xa ra khomai. (Mat. 28:19, 20) Jehovab ge ǀgora-e ūhâ tama. ǁÎb ge ge mî ǃgâiǂhôas ge ‘ǃhaoǃnās hoas, tsî ǃhaos hoas, tsî gowab hoab, tsî ǁaes hoas’ ǃnâ nî aoǁnâhe ti. (J.ǂHa. 14:6, 7) ǁÎb ge ǂhâba hâ i i mâ ǀguiǀguibe khoe-i hoa-e Gaosib ǃgâiǂhôasa ǁnâu. w20.10 21 ¶6-8

Gao-aob Davib ge ‘ǃKhūb di ǂhanuba’ ge ǀnam-i. (Psa. 1:1-3) Davib ge ge ǂan i Jehovab ǃgamǃgamsen rana nî sâusa tsîb ǀgapiǂâixana ra māǃoa ǃkhaisa. Davib ge ge mā-am îb Jehovab di ǂhanuba ǁîb ǂâiǀgauba dawa. ǁÎb ge ge xoa: “Tita ge ǃKhūba nî kare, ǁîb ǀapemā te geba; ǁkhāti tsuxub ǃnâ ra ge ti ǃnaira ra ǁgau te.” (Psa. 16:7) ǃGamǃgamsenxa da ga ra o, o da ge Elobmîsa ra mā-am is sida di ǃgâi tama ǂâiǀgauba ǃgâiǃgâi, tsūdī da nîs ais-ai. Elobmîs ge: “Nēb ge daoba, ǃgû re ǁîb ai” di ra mî dommi khami nî. Tsūxū-e da ga ra dī os ge ǁîsa nî mîbada. (Jes. 30:21) Jehovaba ǃgâs ǃnâ-ū da ge ǂgui ǀgaugu ǃnâ ǃgâiba nî hō. (Jes. 48:17) Aiǁgause da ge khoe-i ga ra ǁnama da o ǁgâise tsâ tide. Tsî da ge Jehovab ǃoa nî ǀgū. ǂAn da a ǁîb ǀnamxaǃnâ ǁgûb khami sada ra tsâba amaga.—Heb. 12:7. w20.11 20 ¶6-7

ǀNî khoen hîna ge Korintes ǃnâ hâ în tsîn ge ǁnā ǂâiǀgauba ge ūhâ i. (1Kor. 15:12) Tsî ǀnî khoen ge gere ǂâi khoe-i ge ǀgui ǁae ǁoreb ǃnâ ge hâ i. Xawe Xristeǁî kai i ga o, o khâisa ra hō. Nē khoen ge khâis ǃnâ ǂgom tama hâ is ge gere ǁgau, ǁîn ǂgoms ge ǂkhabusa isa. Elob ga Jesuba khâisa mā tama hâ o, ob ge xoremariba matare-e tama. Tsî da ge ǁoren ǀûbasa ūhâ tide. ǁNā-amagan ge ǁnān hîna ge khâis ǃnâ ǂgom tama hâ-ina, ama ǃâubasen-e ge ūhâ tama hâ i. (1Kor. 15:13-19; Heb. 9:12, 14) Paulub ge aitsama ge ǂanǃgâ ‘Xristub ge ǁō hâna xu khâi ǃkhaisa.’ Nē khâis ge ais ai ge hâ i khâidi xa ge kai i. ǁNān hîna ge khâisa mā-e hâ în ge ǁkhawa ǁō amaga. Paulub ge ra mî, Jesub ge “ǁō gen di ǂguro kai” ǃkhaisa. ǁÎb ge ge ǂguro i, gagasi khâisa ge hōba. Tsîb ge ge ǂguro i, ǀhomma ǃoa ge ība.—1Kor. 15:20; ǃNǃkh. 26:23; 1Pet. 3:18, 22. w20.12 5 ¶11-12

ǂGurokam Xristeǁîn ǁaeb ǃnâs ge ǂgaeǂguira soros hîna ge Jerusalems ǃnâ hâ-isa, ǀguiba gere sîsen is Elob khoen ǁaegu ǃamkusib tsî ǂkhîb tsîna ǃkhōǀgara. (ǃNǃkh. 2:42) Aiǁgause i ge 49ǁî kuri ǂgui Xristeǁîna ǃkharagagu ǂâiǀgauga ge ūhâ-i. Hoa khoen nî ǃgaohe ǃkhaisa în Jehovaba ǃoaba. ǁNā-amagas ge ǂGaeǂguira sorosa ǃanu gagab huib ǀkha nēsa ge ǃhoaǃgao. ǀHaohâb ga nēs xa ǃaromahe hâse ǀgora hâ o, o i ge aoǁnâ sîsen-e ga ǂhanihe hâ. Jodeǁî gu ge i xawe gu ge ǁkhāǁkhāsabegu tsî ǀhaohâb ǃûi-aogu tsîga Jodeǁî ǁnaetigu xa ge ǂgaeǂhapuhe tama hâ i. Tamas ka io ǁnān hîna ǁîn di ǁkhāǁkhāde ra māǃoan xa. ǁÎgu ge Jehovab di mîs ǃnâ gere kō tsî ǃanu gagaba gere ǂgan i gu huihe ǃgâi mîǁguiga dīsa. (ǃNǃkh. 15:1, 2, 5-20, 28) Nēsa mati ge ǀam? Jehovab ge ǁîgu di mîǁguib ǂkhîb, tsî ǀguiǃnâxasib tsîna ge ǀkhae tsî i ge aoǁnâ sîsen-e ge aiǃgû. (ǃNǃkh. 15:30, 31; 16:5) Sada ǁaeb ǃnâs ge Jehovab di ǀapeǂhomisa ǁîb khoena ge hui în ǃamkuse tsî ǂkhîb ǃnâ hâ. w20.10 22-23 ¶11-12

ǂGui ǃaromadi ge ǀnîsi hâ Jehovab di ǃoabas ǃnâ da ǂkhabada hâ ǁgaumâide hō tamasa. Aiǁgause da ge ǀnîsi kaira, ǀaeb mâsigu tamas ka io ǀkhara ǃgomsina ūhâ. Nē mâsiga da ga ra ūhâ o, o da ge Gao-aob Davib di aiǁgausa xū a ǁkhāǁkhāsen ǁkhā. Davib ge kaise Elob tempela gere omǂgao, xaweb ge Jehovaba ǀkhara khoe-e ge ǁgaumâi. Davib ge ǂgui xaud-i tsî silver-i tsîna ge mā i i nē sîsen-e dīhe. David di aiǁgaus ge amase a ǂoaǂamsa. (2Sam. 7:12, 13; 1Kro. 29:3-5) Hugues di ǀon hâ ǃgâsab hîna Fransi ǃnâ ra hâb ge ǀaeb mâsigu xa ǃaromahe hâse ge ǀhaohâb ǃûi-ao ǀû. Tsîb ge omsib gere dī ǂkhari xūrona ge dī ǁoa i. ǁÎb ge ra xoa: “Tsoatsoas ai ta ge kaise gere ǂkhabuǂâi tsî xū-o khami gere tsâ. Xawe ta ge ǁaeb ta ī khami ge mû ǂhâǂhâsa i asa i ta ti ǃnubusiga ūǃoa. Nēsa ta ge dī o ta ge Jehovab di ǃoabas ǃnâ ta a dī ǁkhā xūn ǃgao ǂkhîba gere hō.  Gideoni tsî ǁîb di 300 khoegu khami. Hoagu ge ge tsau hâ i. ǁÎgu khama ta ge ǃkhamsa nî dan.”—ǂHǂh. 8:4. w20.12 25 ¶14-15

ǁÎb di ǂkhanis hînab ge. Jesub di ûib xa a xoas ǃnâb ge. Apostel Johaneba, “ǀnam” tsî “ge ǀnam” sa ǃnāsase ra sîsenū. Mateub, Markub tsî Lukab di ǂkhanidi xa. ǁÎb ǂkhanidi ge ra ǁgau Xristeǁî-i ra dī xū-i hoa-i ǀnammi xa nî ǃkhōǂgāhesa. (1Jhn. 4:10, 11) Xawe i ge ǁaeba ge ū, Johaneba ǁnāsa ǁkhāǁkhāsensa. Johaneb ge ǂkhami ge i o. Hoaǁae ǀnamma ge ǁgau tama hâ-i. Aiǁgause, ǀgui ǃnâ-eb ge Jesuba Galileaba xu Samariab ǃnâ aoǁnâ sîsene gere dī. Xawen ge ǀnî Samariaǁîna Jesub. Tsî ǁîb ǀkha ge hâ-i khoen tsîna. Harase ge ǃkhōǃoa tama hâ-i. Johaneb ge ge mî, i gu ǀhomma xu ǀaeba ǂgan. În ǁnā khoen hoana dīkākāhe. (Luk. 9:52-56) ǀNî ǃnā-i aib ge Johaneb. Tsî ǁîb ǃgâb tsîna ǁîkha di mamasasa ge ǂgan. Îs Jesuba mîba îkha ǀgapi ǃharosa Gaosib ǃnâ māhe. Nau apostelgu ge Johaneb. Tsî Jakobub ge dī xū-e ǂanǂui o. O gu ge kaise ge ǁaixa hâ-i. (Mat. 20:20, 21, 24) Xawe nē dīsādi hoadi ǃnâb ge. Jesuba Johaneba kaise ge ǀnam i.—Jhn. 21:7. w21.01 8-9 ¶3-4

Jehovab ge nau khoen ǃaroma ǃgâi miǁguiga ra dī. Aiǁgauseb ge ge mîǁgui îb ûiba kuru. ǁÎb di ǃgâib ǃaromas ǀguis ose. Xawe î da sida tsîna ǁkhoaxase ûi. Tsî khoe-i tsîn ge ge ǁgaribi tama hâ i. Jesuba sida ǃaroma māsa. ǁÎb ge māsenxase ǁnā ǁguibasa sida ǃaroma ge dī. Jesub tsîn ge nau khoena ra hui mîǁguiga ge dī. Aiǁgauseb ge tsaub ge hâ i. Tsîb gere sâ ǂgao xawe, khoena gere ǁkhāǁkhā. (Mrk. 6:31-34) ǃGâi omaris danab ge ǂhâǂhâsa mîǁguiga omaris ǃaroma nî dī. Tsî nē mîǁguigu ge omarisa nî hui. Tsîb ge ǁîb di tsâsigu ǃoagu ǀgui hâ mîǁguiga dī tide. Xaweb ge ra mā-am îb Jehovaba ǁkhāǁkhā bi. (ǂKhm. 2:6, 7) Tsî ǁnā ǀgaub ǃnâb ge ǁîb xa ǀgui ǂâi tide xawe nau khoen xa nî ǂâi. (Fil. 2:4) Oms di danab ga Jehovab tsî Jesub di aiǁgausa sao o. Ob ge nî ǃgâi dana kai. w21.02 7 ¶19-21

Gao-aob Asab ge ǂkham i ge ī o. O ge ǃgamǃgamsenxa i tsî ǁkhoaǂgaoxa i. Aiǁgause Abiab pap ge ǁō toas khaoǃgâb ge Gao kai o. Ob ge ǁgôatsuiǁgoaǃoabadi hoade ǃhūba xu ge ūbē. Tsîb ge ǁîna ǃoa ge mî. “ǃKhūb, ǁîn îgu di Eloban nî ôasa, în ǂhanub tsî mîmās tsîra dī.” (2Kro. 14:1-6) Tsî Serab Etiopiaǁîb ge Judaba ǁnāǂam o ǀoadisigu di ǀoadisigu (1 000 000) di soldagu ǀkha. Ob ge Jehovab ai huiba ge ǂgan tsî ge mî. “ǃKhūtse, sa tawa i ge xū tamase ī, ǀgaisa khoe-i kas, ǀgaio khoe-i kas hoasa huisa. Xuige hui da re, ǃKhū, sida di Elotse, sida ge sa ai ra ǂgomaiǂnûi.” Nē ǁgâiǂûisens ge ra ǁgau matikōseb ge Asaba Jehovab ǃnâ ǂgomǃgâsiba ūhâ-isa. Tsîb ǁîb di khoena nî sâusa. Asab ge ǁîb di ǀhomsi ǁGûba gere ǂgomǃgâ. Tsîb ge “ǃKhūba Etiopiaǁîna Asab tsî Judab aiǃâ ge ǁnora.” (2Kro. 14:7-11) ǀOadisigu di ǀoadisigu (1 000 000) ǃnâ hâ soldaga ǁîb ǃoagu ǃkhams ge kaise ge ǃaoǃaosa i. Xaweb ge Asaba Jehovab ai ge ǂgomaiǂnûi. Tsî ǁnā ǃkhamsa ge dan. w21.03 5 ¶12-13

Elobmîs ge ra mîba da. ǀOasa kurusa ūhâ tama khoen. Hîna ge ǃgam ǀnamma gere ǁgaugun xa. Jonatanni tsî Davib di aiǁgausa kō re. Elobmîs ge ra mî: “Os ge Jonatanni di ǀomsa Davib di ǀoms ǀkha ge ǃgaeǁaesen; ob ge Jonatanna ǁîb di ǀoms ǂhanis khami ge ǀnam bi.” (1Sam. 18:1) Davib ge Saulab nî gaose ǃkhōǃkhunise ge ǁgaumâihe. ǁNās khaoǃgâb ge Saula Daviba ge suri tsoatsoa. Tsî ǁîba gere ǃgam ǂgao. Jonatanni ge ǁîb dadasab ǀkha ge. ǀGuiǂâixa tama hâ-i Daviba ǃgams ǃaroma. Jonatanni tsî Davib tsîn ge ge mîba gu. Îkha ǀhōsaguse hâ tsî hoaǁae ǂkhâǃnâgu. (1Sam. 20:42) Jonatanni tsî Davi hâkha di ǀhōsagusa ga ǁkhae hâ xūn. Xa da ra ǂâi o, o da ge ra mû. Matikōses ǁîkha di ǀhōsagusisa ge ǀō-aisa īsa. Aiǁgause Jonatanni ge Daviba 30 kurina ge kaiba i. Jonatanni ge ǀnîsi ga mî hâ. ǂKham khoe-i hîna ǂansa ūhâ tama i ǀkha ǀhōsagus a īǁoasa. Xawe Jonatanni ge ǁnāti ge ǂâi tama hâ i. Tsî kaise kai ǃgôasiba Daviba ge ūba hâ-i. w21.01 21-22 ¶6-7

Jesub ge ǁîb di sao-aona ge mîba ama ǂkhîban nî hōǃâ ǃkhaisa. Tsîb ge ǁîna ge mîba ǁnān hîna ǁîba a ǀnaman nî ǃgomsina hōǃâ ǃkhaisa. (Mat. 10:22, 23; Luk. 6:20-23) Sida ge a ǂkhî Jesub di ǁkhāǁkhāsabe da a amaga. Xawe mati da ra tsâ sida di ǀaokhoen xa da ra mâǃoahe o? Tsî da ga ǂhanub xa mâǃoahe. Tsî sîsen ǀhao u da ra khoen tsî skoli ǀhōsan xa ǃgâi tama xūna ga ra dī kaihe o? Nē xūn xa da ga ǂâi o, o da ge a ǂâiǂhansen tsoatsoa ǁkhā. ǂGui khoen ge ǃgomsinan ga hōǃâ o nēs ǃnâ-ūn ǂkhîba nî hō ti ǂâi tama hâ. Elobmîs tsîn ge ǁnāsa ra mî. Aiǁgauseb ge ǁkhāǁkhāsabeb Jakobuba ge a xoa ǃgomsina da ga hōǃâ o, o da ge nî ǃgâiaǂgao ti. (Jak. 1:2, 12) Jesub tsîn ge ge mî ǃgomsina da ga hōǃâ o, o da ge nî ǃgâiaǂgao ti. (Mat. 5:11) Jehovab ge Jakobuba ge mîba îb Xristeǁîna ǂkhâǃnâ tsî ǀapemā. Matin ǂkhîba nî ūhâsa ǃgomsin ǃnân ga ǃkharu xawe. w21.02 26 ¶1-2; 27 ¶5

Timoteub di ǁaeb ǃnâ ge ûi hâ-i Xristeǁîn ge Elob ǀkha sîsens di aiǂhanuba ge ǃgôaǃgâ tama hâ-i. Nēs ge Demab, Figelub, Hermogeneb, Himeneub, Aleksanderi tsî Filetub tsîga ǃkhōǂgā hâ. (1Tim. 1:19, 20; 2Tim. 1:15; 2:16-18; 4:10) Nē khoen hoan ge Jehovaba ge ǀnam i, xawe ega Jehovab ge mā nî ama-ai xūna ǀō-aisase ge mû ǀû. ǁGâuaba taena ra sîsen-ū i da Jehovab ge ǂgomǃgâda tsî a māda xūna ǁnāxū? ǁÎb ge saora ǃnuide ra sîsen-ū. TVs tsî ǂkhanin tsînab ge ra sîsen-ū îb sida di ǂâiǀgaub tsî tanisen ǀgaub tsîna dawa, îda ǂaub ǀkha Jehovaba ǃgâ ǀû tsî ǀnam ǀû. ǁÎb ge nau khoen ra mî xūn tamas ka io ǃgôaǃgonhes ǀkha ra ǃaoǃaoda î da aoǁnâ ǀû. ǁÎb ge ra ǂhâba î da “ǂkhabase gā-aisise ra ǂgaihe ǂans” hîna ǁāǁnôa hâsa ǃgâ tsî amaba ǁāxū. ǂAnbasen tama da ga io, o da ge ǂgause amaba a xu ǁkhā.—1Tim. 6:21. w20.09 27 ¶6-8

Omaris ǁani-i tamas ka io ǀhōsa-e. Sado ge tsûtsû tsâ hâ i? Î di du ga ǃeream o. O du ge Gao-aob Davib di ǀgôab Absalommi. Di aiǁgausa xu ǂgui xūna a ǁkhāǁkhāsen ǁkhā. (2Sam. 15:5-14, 31; 18:6-14) Nē ǃnaeǃkhaide du ǂâis ǃnâ ūhâse Jehovaba mîba re. Mati du ge ǃgâi tamase gere hâ-ūhe ǀgausa. (Psa. 6:6-8) Tsî mûnanai re matib ge Daviba gere tsâsa. Nē xūn hoan ge ǁîb ǀkha gere ī o. ǁÎb ge Absalomma kaise ge ǀnam i. Tsîb Ahitofeli tsîna ge ǀnam i. Xawekha ge hoa ǀgamkha ǁîba ge ǀawexū. ǁÎkha ge ge tsûtsû bi tsî noxoba gere ǃgambi ǂgao. Davib ge ǁîb di ǂgomsa ga ǂoaǃnâ hâ. Nau ǀhōsagu tsîn nē xūna ra dī ǂgao. Tsî Absalommi ǀkha ǀguiba ra mâ ǂgao tib ge ga ǂâi hâ. Tsî ǁnās ǀkha ǀguri tsâsen tsî ǃāsa xū ǀguriga ī hâ. Tsîb ge ǀnîsi amabes ǃnâ ga ǀûsen hâ. Xaweb ge Jehovaba ǃoa ǀgore tsî huiba ge ǂgan. Tsîb ge ǁîb di ǀhōn ais tsîna huiba ge ǂgan. Tsîb ge ǃhaese mîǁguib ge xūna ge dī tsoatsoa. ǁÎb ge Jehovaba ǂgomǃgâ, tsîb ge ǁîb ǀhōn tsîna noxoba gere ǂgomǃgâ. w21.03 15 ¶7-8; 17 ¶10-11