Julib

Jesub ǀkha da ge ǀhōsagusisa nî ūhâ Jehovaba ǃoa ǀgores ǃaroma. Nēs ge “Jesub ǀons ǃnâ” di ǀgui sada ǀgoredi ǀams ai mîs xa ǃnāsa-e ǃkhōǂgā hâ. Mûǂan da ge nî Jehovab mati Jesuba ra sîsen-ūsa ǀgorede ǃereams ǃnâ. Jesub ge apostelga ge mîba: “Ti ǀons ǃnâ go ga ǂgan xū-i hoa-i, ǁî-e ta nî dī.” (Jhn. 14:13) Jehovab sada ǀgorede ǁnâu-am tsî ra ǃeream xaweb ge Jesuba sîsenna ra taniǂui. ǁNā-amagab ge Eloba sida ǀgoredeb nî ǁnâu-am aiǃgâ ra kō Jesub daoǁgausa da ra sao ǃkhaisa. Aiǁgause, Jesub ge ge mî: “Khoena du ga ǁîn di dāsāde ǀûbao, ob ge sadu ǀhomsi Îba sadu dide ǁkhāti nî ǀûba du. Tsî khoena du ga ǁîn di dāsāde ǀûba tama io, ob ge sadu Îba sadu dāsāde ǁkhāti ǀûba du tide.” (Mat. 6:14, 15) Khoena da ge Jehovab tsî Jesub tsîkha ra hâ-ū da ǀgaub ǃnâ nî hâ-ū. Nēs ge kaise a ǂhâǂhâsa. w20.04 22 ¶6

Apostel Paulub ge ǁîb ǃgâ-aon taen ǃnâ ǃgâiǃgâibasensa ūhâsa ge ǂan i tsî nēs ǀkha ǁîb aoǁnâ sîsenna gere ǀkharaǀkhara. Aiǁgause, Listras ǃnâb gere ǃhoa-ū khoen ge xoas xa ǂansa ge ūhâ tama hâ i. Nēs ǃaromab ge Pauluba ǁîn nî ǁnâuǃā ǀgaub ǃnâ gere ǃhoa. ǁÎb ge ǃgâise ra kai ǃhanagu tsî ǃgâiǁaeba ūhâs tsîn xa gere ǃhoa. ǁÎb ge mîn tsî ǂkhōdi ǁîb ǃgâ-aon nî ǁnâuǃāde gere sîsen-ū. Sada ǁnâuǃāba da ge ra sîsen-ū ǂgao sada ǂharis ǃnâ hâ khoena ǁnâuǃās ǃaroma tsî sada aoǁnâ ǀgauba ǁnās ǃoa-ai ra ǀkharaǀkhara ǂgao. Mati da a ǂanǂui ǁkhā khoe-i tae-i ǃnâ ǃgâiǃgâibasensa ūhâsa, ǁî-i ǀkha ǃhoas ǃnâ-ū tamas ka io ǁî-i oms ǂnamibeba xu? ǃGaoǃgâxa re. Aiǁgause i ge ǃhanaba ra kōǃgâ, ǂkhani-e ra khomai, audosa ra kuru tamas ka io ǀnî hâ xū-e ra dī. ǁÎ-e du ga ǀgū o, o du tae-i amsi nē xūn ǀgui-e sîsen-ū tama hâ ǁî-i ǀkha ǁgam tsoatsoas ǃaroma? (Jhn. 4:7) Khoe-i sara ana ǀgaub tsîn ge ǁî-i xa xū-e a mî ǁkhā—aiǁgause, mâ ǃhao-i a ǃkhais, tae sîsen-e i ra dī ǃkhais tamas ka io tae-i xa i a ǃgâibehe ǃkhaisa. w20.04 11 ¶11-12

ǂGui ǂhansendi xa ǃaromahe hâsen ge ǂgui ǃgâsana nau ǃgâsan ǂnamipe ǃgâi tamase ra tsâ. ǃGombahe ǁkhān ge a ǂgui khoen ǂnamipe hâsa xawen ge ǀhaohâb ǀhaodi, ǂharis ǀhaodi tsî ǀkharib kai ǀhaodi tsîna ǁhaoǃnâs ǀkha ra aiǃgû. ǀŪn a khoen ǀkha ǃhoas xan ge a ǃgombahe xawen ge aoǁnâ sîsenni ǃnâ nēsa ra dī. Nēs ga sadu xa ama o, o ǂan re ǀguri du hâ tama hâ ǃkhaisa. ǂGuin ge nē ǃnôa ǃgomsina ra hōǃâ. ǂÂis ǃnâ ūhâ re Jehovab sadu ǁgûtsâde ra ǃgôaǃgâ ǃkhaisa. Nēs ǃnâ du māǁnâsen tama hâ ǃkhais ge ra ǁgau ǁîb ra ǀkhae du tsî ǀgaib hîna du ǂhâhâba mā du ǃkhaisa. (Fil. 4:6, 7) Jehovaba du ga emosionele ǃnubusigu tsî sorosi ǂkhabusasigu ǃnâ ǃoaba ǀgara o, o du ge a ǂgomǃgâ ǁkhā ǁîb xa du ra ūǃoahe ǃkhaisa. Xawe Xristeǁî ǃkhoeǀhûgus ǃnâ da ge hoada ǃgâi sorosi ǂurusiba ūhâ tama hâ. (2Kor. 4:16) Jehovab di huib ǀkha da ge hoada ǀams kōse nî ǃkhoe. w20.04 31 ¶20-21

Elob gā-aisib ge sada ǁan ǃkhaisab ge kuru ǀgauba xu a mûhe ǁkhā. (Heb. 3:4) Sada di ǁanǃkhaib ge sores ǂnamipe ǀgui ǃgû tama hâ, xawe sada ûiga i nî aiǃgû kai ǀgaub ǃnâ a kurusa. ǃHūbaib tsî ǀhommi-aib tsîna da ge hurib ai hâ ǂgaus ǀkha a ǀgōpeǀnō ǁkhā. Xaweb ge kai ǃkharagagusiba hâ khoena ūhâ ǂgaus tsî sida ǃhūbaib ǁaegu. Aiǁgause, khoen hîna ǂgaus ǃnâ hâna mati kō ǁaeba nî ûi, aitsaman ga ǀomǂgān ra ǂoab, ǂû-i tsî ǁgammi tsîna kurubasen tsî ǀapoba āxū tama io? ǁNā ǂgaus ǃnâ hâ khoen ge kaise ǃhaese nî ǁō. Xawe ǃhūbaib ge ǂgui xamanin tsî khoena ûitsamase ra ūhâ. ǂÂusa ǂûn, ǁgammi tsî ǀomǂgā da ra ǂoab tsînab ge ǃhūbaiba ra kuru tsî nē xūn ge tātsē toa tama hâ. Nē xūn ra sîsen-ūhe o ra ǃgau ǀapob ǃhūbaib ai ra hâ ǀgara xaweb ge ǃhūbaiba hoaǁae a îsa. Nēsa mati ra sîsen? Jehovab ge ǃhūbaiba ǁnāti ge kuru îb ǀuriba sîsen-ūhe ǁkhā ǀgaub ǃnâ ǀkharaǀkharahe. w20.05 20 ¶3-4

Satanni ge Evasa ge mîba Jehovab a ǂhumi-ao di. Nē ǀgaub ǃnâb ge Satanna ge ǁgâua tamas ka io mâǃoa-ao kai. Evas ge Satanni xa ǂgaeǂhapuhe tsî ge ǂgom. (1Tim. 2:14) ǁÎs ge Satanna Jehovab ǃgâ-ai ge ǂgomǃgâ. Nēs ge ge ǃaroma is Evasa ǁnā mîmâisa dī. ǁÎs ge ge mîǁgui Jehovaba ǁnâuǀnamoǃnâsa. ǁÎs ge Jehovab ge tā ǂû di mî haisa xu ge ǂû tsoatsoa tsî Adammi tsîna ge mā. (Gen. 3:6) ǁAero-e ǂâi re matis ga Evasa Satanna ǃeream hâ ǀgaus xa. ǀNîsis ge saora mîde ga mî hâ: “ǀŪ ta ge a sats a ham ǃkhaisa. Xawe da ge ti ǁGûb Jehovaba a ǂan tsî ta ge ǁîba a ǀnam tsîra ǂgomǃgâ. ǁÎb ge Adammi tsî tita tsîma ūm hâ xūn hoana ge mā. Ots satsa nēti ī xū-e ǁîb xa ra mî? Ī garu.” Jehovab ge nēti-i ǃgâi ǂgomǃgâsib mîde. ǁÎb ôasa xū ǁnâus xa ga ǂkhî kaihe hâ. (ǂKhm. 27:11) Xawes ge Evasa ama ǀnamma Jehovaba ge ūhâba tama hâ i; Adammi tsîn ge nē ǀnammi xa ge ǁgarihe tama hâ i. Nēti i ǀnamma ra ge ǁîra ǁGûba ūhâba tama hâ i. Amaga ra ge Adammi tsî Eva hâra ǁîb ǀonsa. ǁGaiǁgaihesa xu ge ǁkhauba tama hâ i. w20.06 4 ¶10-11

Sida di ǃgâsadi ge a koahe ǁkhā, Jehovab di ǃoabas ǃnâ di ra dī sîsen-i ǃgao. Nē ǃoabadi ge oms, ǀhû-omga hî-ūnus, ǀkhara gowaga ra ǃhoa groepde ǂkhâǃnâs. Tsî māsenxase Bethels tawa sîsens tsîna ǃkhōǂgā hâ. ǁÎdi ge tsūkeǃgâb ga ra hâ o hui, ǂnûiǃkhuni, aimâba-ao tsî sîsabeses tsîna ra sîsen. ǁNās ǂam-ai di ge ǃgamme tarade ǁîdi aoga ra ǂkhâǃnâ îgu ǀhaohâb ǃnâ gu ūhâ sîsen-e dī. Nē ǂgomǂgomsa ǃgâsagu ge ‘khoen mādi’ ǁîgu ūhâde ǃamkuse ga sîsen-ū tama hâ. ǁÎgu taredi ga ǂkhâǃnâ gu tama hâ o. (Efe. 4:8) Gā-ai ǀhaohâb ǃûi-aogu ge ra mû ǂan ǃgâsadi “kaise a ǂgui” ǃkhaisa tsî di ǁîde ǃgâi aoǁnâ sîsen-e ra dī ǃkhaisa. ǁNās ǂam-ai gu ge ǀhaohâb di ǃûi-aoga ra mûǂan ǂgomǂgomsa tsî gā-ai ǃgâsadi, ǂkham ǃgâsade ra huisa, ǁîdi di ǃgomsigu ǃnâ. (Tit. 2:3-5) Amase di ge sida ǃgâsade sida ǀnammi tsî ǃgôaǃgâsiba anu hâ. w20.09 23-24 ¶13-14

Jehovab ge ǁîb ǃoaba-aon hîna ǁîba gere ǃoaba xawe ǁaeroba ge a ǀûna ǀuru tama hâ. Tsîb ge ǁîn ge ǁîb ǃoabas ǃnâ dība bi sîsenni tsîna ǀuru tama hâ. (Heb. 6:10) Kēbo-aob Jesajab ge ǃgâi aiǁgaus. Matib Jehovaba ǁîb khoena ra tsâba ǀgausa ra ǁgausa ge xoamâi. “ǁÎb ge gūn âba ǃûi-ao-i khami nîra ǃûsi,” tib ge Jesajaba ge xoa. “ǁÎb ge ǁkhaon âba ǁîb ǁôakha ǃnâ ǀhaoǀhao tsî tîǂams âb ǃnâ nîra tani.” (Jes. 40:11) Jehovab kai ǃûi-aoba mati ra tsâ, ǁîb di ǃoaba-ao-i ǀgui i ga ǁîba ǃoaba ǀû o? Jesub ge Jehovab ǀgauga ge ǂanǂan. ǁÎb ǁkhāǁkhāsabegab ge dî o: “Mati go ra ǂâi? Khoe-i ga ǀguikaidisi gūna ūhâo, tsî i ga ǀgui-i ân xa kāheo, khoesedisikhoeseǀana i ǁnāxū tsî ǃgû tsî kā hâ-e ǃhomgu ai ôa tide? Tsî hō i kao, amase ta ra mîba go, ǁî-i ǃaroma i kom khoesedisikhoeseǀan kā tama ge hâ in ǃgâ-ai ra ǃgâiaǂgao-o.”—Mat. 18:12, 13. w20.06 19-20 ¶8-9

ǁKhā da a ǀgau i hoa i ai Jehovaba ǃoabasa da ge kai aiǂhanub ase ra mû. (Psa. 27:4; 84:10) ǃGâsab ga Jehovab ǀapeǂhomis ǃnâ ǃnāsase a hui ǂgao o, ob ge koahesa anu hâ. ǁÎb ga ǀhaohâb ǃnâ sîsen-e māhe o, ob ge tā ǁîb xa ǃnāsase nî ǂâi. (Luk. 17:7-10) ǁÎb ge ǁîb ǃgâsana ǃgamǃgamsens ǀkha nî sîsenba. (2Kor. 12:15) Elobmîs ge aiǁgaude ūhâ khoen dide hîna ge ǁîn xa ǃnāsase gere ǂâina. Diotrefeb ge ge ǀgapi ǂâixa ī tsî ǀhaohâb “ǃnâ ǂguro” ǃkhaisa gere ôa. (3Jhn. 9) Usiab ge ǀgapiǀgapisen tsî Jehovab xab māhe tama hâ sîsen-e ge dī. (2Kro. 26:16-21) Absalommi ge gao kai ǂgaob ta ǃkhais ǃgao khoenab a ǀnam khama gere dīsen în khoena ǁîb ǀkhāba ǁhûi. (2Sam. 15:2-6) Nē Elobmîsa xu hâ aiǁgaudi ge ra ǁgau Jehovab ǃgâibahe tama hâsa, khoe-i ga koahe i nî ga xū-e dī o. (ǂKhm. 25:27) ǁAeb ra ī khama ī ge khoen hîna a ǀgapiǂâixa tsî nau khoen xa nî koahesa ra ǂhâbana ǃgomsin ǀguina nî hō.—ǂKhm. 16:18. w20.07 4 ¶7-8

ǀNî Xristeǁî omaridi ge ǁîn ǃhūb ǃnân ǁgai xūna ra ī amaga ǀkhara ǃhūba ǃoa ge doe. ǁNā-amagan ge ǁîn ǀgôana ǁnân go doesi ǃhūb di gowab ǃnâ skoli ai ra ǁkhāǁkhāhe. Sîsen-en ga ôa on ge ǁgûn tsîna nē gowaba nî ǁkhāǁkhāsen. Xawe ǁîn ǁgûsigowab ra ǃhoa-e ǀhaohâb tamas ka io ǃgūbis ga hâ os? Omarisa mâ ǀhaohâba nî ǁkhao? ǃHūb di gowab ra ǃhoaǃnâhe ǀhaohâba ǃoan nî ī? Tamas ka ion ǁgûsigowab ra ǃhoaǃnâ-e ǀhaohâba ǃoa nî ī? Oms dana-i ge nî mîǁgui ǁî-i omaris mâ ǀhaohâba ǃoa nî īsa. ǁÎ-i ǀgui-i nē mîǁguiba a dī ǁkhā amaga i ge ǁî-i omaris nî ǀama ǀgaub xa nî ǂâi. Sida ge nē oms di dana-i nî dī mîǁguiba nî ǃgôa. Mâ mîǁguiba i ga dī xawe da ge nēsa nî ǃgôa tsî ǁî-i omarisa ǁkhoreǁhare tsî ǀnamma nî ǁgau.—Rom. 15:7. w20.08 30 ¶17-18

Jehovab ǀgaiba da ga hō ǂgao o, o da ge tā nî ǂâi sida ǂurusib, ǁkhāǁkhāsens, khaoǃhūb. Tamas ka io sida mari i Jehovab mûǁae a ǂhâǂhâsa ti. Nē xūn ge tātsē Jehovab aisi ǂhâǂhâsa kai da tama hâ. ǂGui khoen Jehovab din ge ‘ǁgans ǃoa gā-ai, ǀgaisa tsî ǀgapiǃgôasa’ tama hâ. (1Kor. 1:26) Nē goro ǃhoaǃgao-e xūna da ga ūhâ tama i xawes tsîna da ge Jehovaba a ǃoaba ǁkhā. Sida mâsib xa da ge ǃgâi ǀgaub xa nî ǂâi. Nēsa da mati a dī ǁkhā? ǂÂis ǃnâ ūhâ re khoena ǂhâǂhâsase ǃhūbaib mûǁae ra mûsen kai xūna da ga ūhâ tama i o. O da ge Jehovab ǀgaiba sida di ûigu ǃnâ nî mû. Aiǁgause, sa ǂgomsa ra mîǁgaiǁgai khoenats ga ǃao o. Mati iots Jehovaba ǁkhoaǂgaosiba ǂgan tama hâ its sa ǂgomsa ǁkhauba? (Efe. 6:19, 20) ǁKhōǁkhōsa ǀaeb tamas ka io soros di ǃnubusiba du ga ūhâ o. Jehovaba ǂgan re îb ǀgaiba mā du i du ǁîb di ǃoabas ǃnâ mâǀgai. Jehovab ta huidu ǀgauba du ra mû ǁaeb hoab ai i ge sadu ǂgoms tsî sadu tsîna ra ǀgai. w20.07 16 ¶9

Gaosiba da ga ǂgurose sida ûib ǃnâ a mâi o da ge Abrahammi khami. Eloba da ra ǂkhî kai ǂgao amaga ǀnî xūna nî dī. (Mrk. 10:28-30; Heb. 11:8-10) Sida ûib ǃnâ da ǃgomsina hōǃâ tidesa da ge ǃâubasen tide. ǁNān hîna Jehovaba ǁîn ûib hoaba ǃoaba hân tsîn ge ǃgomsina ra hōǃâ. ǁNāsa da ge Abrahammi aiǁgausa xu ra mû. (Jak. 1:2; 1Pet. 5:9) Nētsē da ge ǂgui ǃaromade ūhâ îda hānîǁaeba ǃoa mûǂui. Nētsē ra ī xūn ge ra ǁgau ǀuniga tsēdi ǃnâ da ûihâsa. ǂGui ǀkhaegu di ǀguib hîna da Elob Gaosib ra ǂgaeǂgui ǁaeb ai nî hōǃâ i ge sida khoen hîna ge ǁōna ǁkhapa mûsa. ǁNā ǁaeb ǃnâb ge Jehovaba Abrahamma ǁîb ǂgoms tsî ǃnūǃnâxasib ǃgao nî mādawa-am. ǁÎb tsî ǁîb omarisa khâisa mās ǃnâ-ū. Sado ǁnāpa hâ î du nî, î du ǁîna ǁkhōreǁkhāre? Abrahammi khami da ga Elob Gaosib ǃaroma ǀnî xūna mâiǂui tsî ǀgaisa ǂgomsa a ūhâ ǃgomsina da ga ūhâ xawe. Tsî Jehovaba ǃnūǃnâxase a ǃâu o, os ge ǁnāsa nî ī.—Mix. 7:7. w20.08 5-6 ¶13-14; 7 ¶17

Sida ge a ǂan sida khākhoen ga ǃgam da xaweb Jehovaba sida ûiba nî mā-oa ǃkhaisa. Tae-i ǀgui-en ga dī xawen ge ǁîna sida Jehovab ǀkha ūhâ ǀhōsagusisa khôa hō tide. (Rom. 8:35-39) Jehovab ge ǁîb gā-aisiba ge ǁgau khâis di ǃâubasensab ge mā da o. Nē ǃâubasensa da ūhâ amaga da ge Satanni ǀkhāb ai hâ khoen ga ǁōb ǀkha ǃaoǃao da. Xawe ǁîn ra mî xūna dī tide tsî i ge ǁnās xōǀkhā ǁkhoaǂgaosiba ra mā da. Î da Jehovab ǀkhāb ai ǂgomǂgomsase mâǀgara. Jehovab khākhoen ga sado ǁōb ǀkha a ǃaoǃao o, sadu ûiba du Jehovab ǃomǁae nî xū? Mati du nî ǂan ǁnā ǁaeb ai du Jehovaba nî ǂgomǃgâsa? Dîsen re, ‘tsēs hoasa ta ra dī mîǁguiga ra ǁgau Jehovab ai ta ra ǂgomǃgâsa?’ (Luk. 16:10) ǀNî dîs ge, ‘ti ǁaeb tsî mari-e ta ra sîsen-ū ǀgauba ra ǁgau, Gaosiba ta ga ǂgurose mâi ob Jehovaba nî kōǃgâ te ǃkhaisa ta ra ǂgomsa?’ (Mat. 6:31-33) Nē dîra du ga î ti-a ǃeream-o, o du ge hā nî ǃgomsi i hoa i ǃgao a aiǂhomisa.—ǂKhm. 3:5, 6. w20.08 17-18 ¶15-16

Elobmîsa da nî sîsenū ǀgausa da ge nî ǂan. Nē ǂansa da ge ǀhaodi tawa ra omkhâi. Xawe da ga nau khoena Elobmîs a ama-aisa ga ra ǁgau ǂgao o, o da ge aitsama Elobmîsa nî ôaǃnâ. Elobmîsa da ge nî sîsen-ū îda sida di ǂgomsa ǀgaiǀgai. Nēs ge khomai da ra xūna ǂâiǃâ tsî sida di ǂkhinigu ǃnâ ôaǃnâsa ǃkhōǂgā hâ. Î da ǃamkuse ǁnâuǃā tsî ǁkhāǁkhāsen da go xūna dī. (1Tim. 4:13-15) O da ge Elobmîsa sîsen-ū tsî nau khoena nî ǁkhāǁkhā. ǁÎna da ge xoas ǀguisa khomaiba ǂgao tama. Xawe da ge ra ǂhâba în ǁîna ǁnâuǃā tsî nē xūnan mati nî sîsen-ūsa mû. Elobmîsa da ga hoaǁae ga ra ôaǃnâ o da ge ra ǀāǀāsen.—2Tim. 3:16, 17. w20.09 28 ¶12

Jehovab aoǁnâ sîsen-i ǀkha ra huida ǀgaus xa da ga ǂâi o, o da ge aoǁnâ sîsen-i ai ǂâisa nî ǂnûi. ǁÎb ge gagasi ǂûna ǁgâisa ǂkhanin, audion, vidion tsî broadcast ǃnâ-ū ra māda. Aiǁgause i ge sida internets ǂhaweb ai 1 000 xa ǃnāsa gowagu ǃnâ Elobmîs xa hâ ǃnāsa ǃgāsasiba ra hō-e. (Mat. 24:45-47) ǀKhara ǀgaub hîna da aoǁnâ sîsen-i ai, sida di ǂâisa a ǂnûi ǁkhāb ge Jesub di aiǁgausa saosa. ǁÎb ge xū-i xare i tsîna mā-am tama ge hâ-i, i i aoǁnâ sîsen-i ǃnâ ǂhanibi. (Jhn. 18:37) ǁGâuab ge “hoa gaosigu ǃhūbaib diga ge ǁgau bi ǁîgu ǂkhaisib ǀkha.” Xaweb ge Jesuba nēs xa ge nanahe tama hâ-i. Khoen gere gao kaibi ǂgao xawes tsînab ge ǁîba ge ǂkhā. (Mat. 4:8, 9; Jhn. 6:15) ǁÎb ge ǃkhusisa ge ôabasen tama hâ-i tsîb ge ǁîba ǃgôaǃgonhesa ge ǃao tama hâ-i. (Luk. 9:58; Jhn. 8:59) Apostel Paulub di ǁnamas hîna nētsēs xoas ǃnâ hâsa da ga ǂâihō. O da ge sida di aoǁnâ sîsen-i ai ǂâisa nî ǂnûi, sida di ǂgoms ga ǃâitsâhe xawe. w20.09 9-10 ¶6-7

Kaise da ge ra ǃgâiaǂgao ǃgarise ra sîsen ǃgâsade da ǀhaohâb ǃnâ ūhâsa. ǁÎdi ge ǀhaodi tawa ǃeream tsî ra aoǁnâ. ǀNîdi ge ǀhû-omga hî-ūnu tsî ǃgâiǃgâibasensa nau khoen ǃnâ ra ǁgau. Xawe da ge a ǂan ǁîdi tsîn ge ǃgomsina ra hōǃâ. ǀNîdi ge kaira ǁgûna ra kōǃgâ. Tsî ǀnîdi ge omaris ǁanin xa ra māǃoahe. Tsî di ge naude ǃgamme tama di hâ xawe ǃgarise ra sîsen îdi ǁîdi omaride kōǃgâ. Tae-i ǃaroma da tarekhoede ǃgôasiba nî ǁgau? Nē ǃhūbaib ǃnâ di tarekhoede hoaǁae ǃgôasiba ǁgauhe tama hâ amaga. Elobmîs ge ra ǂkhâǃnâ da îda hoaǁae ǁîde ǂkhâǃnâ. Aiǁgauseb ge apostel Pauluba Romes ǃnâ hâ Xristeǁîna ge mîba în Febesa harase tsâ kai tsî “ǁîsa hui.” (Rom. 16:1, 2) Paulub ge tarekhoede ra ǃgôaǁnâ khoen ǀkha ge kai. Xaweb ge Xristeǁî-i ase tarekhoede ǃgôa tsî ǃgâise gere hâ-ū, Jesub khami. w20.09 20 ¶1-2

ǁKhāǁkhāsen ra khoena da ge nî hui în aoǁnâs di turaba ūhâ. ǁÎna da ge a dî ǁkhā: “Sadu ûiba mati ge ǃgâiǃgâi-e Elobmîs ǃnâ du ra ǁkhāǁkhāsen xūna du ge a dī tsoatsoa o? Nau khoen tsîn nē haisi-amsa nî ǁnâusa du ra ǂhâba? Tae-e du nî dī î du ǁîna hui?” (ǂKhm. 3:27; Mat. 9:37, 38) ǂÂis ǃnâ du ūhâ re Jesub ge ge ǁkhāǁkhāda î da nau khoena ǁkhāǁkhā în ‘ǁîb gere ǁkhāǁkhā mîmān hoana ǃkhōǀgaipe.’ Nēs ge ǀgam kai mîmāra tsîna ǃkhōǂgā hâ—Eloba ǀnams tsî sa ǀgū khoeba ǀnams—hoara ge aoǁnâ tsî ǁkhāǁkhāsabe dīs sîsenni ǀkha ra ǃgûǀhao. (Mat. 22:37-39) Sida ǀkha Elobmîsa ra ǁkhāǁkhāsen khoena da ga ra hui o în nē mîmāra ǁnâuǀnam. O da ge ǁîna ra hui în aoǁnâ tsoatsoa. Tae-i ǃaroma? ǀNammi ge nî ǂkhâǃnâ nî în aoǁnâ. ǀNî khoen ge aoǁnâsa ra ǃao. Xawe da ge ǁîna ǂkhâǃnâ tsî a mîba ǁkhā Jehovab huib ǀkhan khoena nî ǃao ǀûsa.—Psa. 18:1-3; ǂKhm. 29:25. w20.11 3 ¶6-8

Elobmîs ǁkhāǁkhāsa dīs ǃgao du ga aiǂhomisen o, Jehovaba ǃoa ǀgore re. Tsî Elobmîsa du ra ǁkhāǁkhā khoe-i tsî ǁî-i di ǂhâsigu tsîna ǀgoreba re. Jehovaba ǂgan re, îb hui du î du Elobmîsa xu ǁkhāǁkhā, khoe-i di ǂgaoba nî tsâǀkhā ǀgaub ǃnâ. ǂÂis ǃnâ du ūhâ re, sadu ge nē khoe-e nî hui î-i ǁāǁnâhe. Elobmîsa ra ǁkhāǁkhāhe khoe-e ǁî-i di aib ai i ga ǁkhāǁkhāsen o, nēsa xu ǃgâiba nî hō. Jehovab ǀkha i ge nî ǃhoa. Mati? Kaise i ge a ǂhâǂhâsa ǁîna ǃgâ tsî Jehovab ǀkha ǃhoasa. ǁÎ-i ge Jehovaba a ǃgâ ǁkhā Elobmîsa tsēs hoasa khomais ǃnâ-ū. (Jos. 1:8; Psa. 1:1-3) ǁÎ-i ge Jehovab ǀkha tsēs hoasa nî ǃhoa. ǁNā-amaga du ge ǂgaoba xu nî ǀgore. Elobmîs ǁkhāǁkhās tsoatsoas tsî ǀams ai. Sadu Elobmîsa ra ǁkhāǁkhā khoe-i ǀkha ǀgore re tsî ǁî-i tsîna ǀgoreba re. Sadu di ǀgorede i ga ra ǃgâ o i ge nî ǁkhāǁkhāsen. Mati i ǂgaoba xu Jehovab ǃoa, Jesub Xristub ǀons ǃnâ nî ǀgoresa. (Mat. 6:9; Jhn. 15:16) ǂÂi re mati i Elobmîsa tsēs hoasa khomais (Jehovaba ǃgâs). Tsî ǀgores (Jehovab ǀkha ǃhoas) sadu ǀkha Elobmîsa ra ǁkhāǁkhāsen khoe-e Elob ǀkha nî ǀgū-ǀgūsa.—Jak. 4:8. w20.10 8 ¶8; 9 ¶10-11

Jehovab di ǀapeǂhomis ge nētsē ǃgarise ra sîsen. Îs Xristeǁîna ǀhaohâb ǃnâ ǃamku tsî ǂkhîsa ǀgaub ǃnâ ūhâ. (ǃNǃkh. 16:4, 5) Aiǁgause du ga ǃKhē xu ǂgō-ommi ǂkhanib ǀkhara ǀhaohâb ǃnâ a dī o. Tamas ka io ǀkhara ǃhūb ǃnâ, o du ge a ǂan nē ǁkhāǁkhāǃâs mati nî dīhesa. Tsî mâ ǁkhāǁkhāǃâsan nî ǃhoaǃgaosa. Tsî du ge harase nî tsâ. Jehovab di ǃanu gagab ǀguib ge nēti ī ǀguiǃnâxasiba a īǁkhā kai ǁkhā. (Sef. 3:9) Tae-e du a dī khā? Dîsen re: ‘ǂKhîb tsî ǀguiǃnâxasib tsîna ǀhaohâb ǃnâ ūhâsa ǂkhâǃnâ i da ra? ǀHaohâb ǃûi-aoga ǁnâuǀnam i da ra? Nau khoena tida ai huiba ǂgan ǁkhā-e, ǃgōsase ta ga aiǂhanuba ǀhaohâb ǃnâ ūhâ o? ǁAeb ai hâ i ta ra? Mâsen xase ta ra sîsen?’ (Jak. 3:17) ǀNî ǀgaugu ǃnâ du ge ǃgâise a dīǁkhā ti du ga ǂâi o, ǃanu gagaba ǂan re. Nēsa du ga mā-am o i ge sadu ǂūgu tsî tanisen ǀgaub tsîna nî dawa. Tsî i ge sadu di ǃgâsana nî ǀnam du. Tsî sadu ra dī xūna nî ǃgôaǃgâ. w20.10 23 ¶12-13

Elobmîs ge spiels ase a īǁkhā. (Jak. 1:23-25) ǂGui khoeda ge mâ ǁgoas hoasa, omsa xu da nî īs aiǃâ spiels ǃnâ ra kōsen. ǁNā ǀgaub ai da ge ra mû hî-ūnu da nî xū-e nau khoen nî mûdas aiǃâ. ǁNās ǁkhās khami da ge Elobmîsa da ga tsēs hoasa ga ra khomai o. O ra mû ǀgaugu hîna da a ǀkharaǀkhara ǁkhāga, sida di ǂâiǀgaub tsî tanisen ǀgaub ǃnâ. ǂGuin ge tsēkorobe mîsa mâ ǁgoas hoasa omsa xūn nî īs aiǃâ khomais xa ra huihe. ǁÎn ge ra mā-am i i khomain ta xū-e ǁîn ǂâiǀgauba tsâǀkhā. Tsîn ge tsēs ǃnâ matin Elobmîsa xun ko hō xū-en nî sîsen-ūsa ra kō. ǁNās xōǀkhā da ge Elobmîsa ǁkhāǁkhāsen tsî ǁîs xa nî ǂâiǃâ tsēs hoasa. Nēsa dīs ge supuse a mûsen ǁkhā, xawe i ge a ǂhâǂhâsa. ǁÎ-i ge nî huida î da nē ǂō daob ûib dib ai hâ. ǁNās ǁkhās khamis ge Elobmîsa X-ray masins khami ī, hîna ra huidasa î da tae-i ǂganaga hâsa mû. Xawe da ge nî ǃgamǃgamsen î da Elob di mîs tsî ǁÎba ra ǃoaba khoena xu ǃgâiba hō. w20.11 18 ¶3; 20 ¶8

ǂGurokam ǁaeb Xristeǁîn ge ǃgôaǃgonhen gere xawe ǃnomsa ǁaeb tsîna ge ūhâ i. Tae-en ge nē ǁaeb ǃnâ gere dī? Nē ǂgomǂgomsa khoen ge ǀû tamase ǃgâiǂhôasa gere aoǁnâ. ǃNaeǃkhaidi ǃnâ-i ge ra mî, ǁîn ge ‘ǃKhūb di ǃaoǃgâs ǃnâ gere tanîsen’ di. ǁÎn ge ǀûs ōse ǃgâiǂhôasa gere aoǁnâ tsî i ge ǁnās xa ǃaromahe hâse ǀhaohâba “ge ǀoa.” Amaseb ge Jehovaba ǃnorasa ǁaeb ǃnân ge ôasase gere dī aoǁnâ sîsen-e ge ǀkhae. (ǃNǃkh. 9:26-31) ǂGurokam ǁaeb Xristeǁîn ge hōn gere ǃēs hoas ai ǃgâiǂhoasa gere aoǁnâ. Aiǁgauseb ge Apostel Pauluba ǂgui khoen hîna Efeses ǃnâ hânab. A aoǁnâba ǁkhā sab ge mû-o ǁnapa hâ tsî gere ǁkhāǁkhāsabe dī. (1Kor. 16:8, 9) ǁKhāǁkhāsaben ge ôasase “ǃKhūb mîsa gere aoǁnâ.” (ǃNǃkh. 15:30-35) Tae-e ge hā? Nētsēs xoas ge ra mîba da. w20.09 16 ¶6-8

Adammi ge ǁore o, ob ge ǃgomsina ǁîb ǀgôan hoana ge hauba. Nētsē da ge ǁîb ǃgao ǃgomma ra tsâ. Xawe Elob ge ǁîb ôaba khâisa mā, amaga da ge ǃgâi ǃâubasensa ūhâ. ‘ǁŌ hân khâis ge ǀgui khoeba xu ge hâ’ Jesub ǃnâ-ū. “Adammi ǃnân ra hoana ǁō khamin ge ǁkhāti hoana Xristub ǃnâ nîra ûi-ûihe,” dib ge apostel Pauluba ge mî. (1Kor. 15:22) Pauluba tae-e gere ǂâibasen “Adammi ǃnân hoana ra ǁō” dib ge mî o? Paulub ge Adammi surib hoab xa gere ǃhoa. Hîna ge ǁoreb tsî ǀoasaoǃnâsib tsîna ǁîba xu hōna. Tsî ǁnās xa ǃaromahe hâse ra ǁōsa. (Rom. 5:12) Adammi ge ǁnān hîna ‘khâisa’ hō tiden di ǀgui. ǁÎb ge Xristub di xoremariba xu ǃgâiba hō tide. Adammi ge ǀoasa kurusa ge ūhâ i, tsî māsenxase Eloba ge ǁnâuǀnam tama hâ-i. Adammi ǀkha ge ī, xū-i ge ǁnān hînab ‘Khoen Ôaba’ ‘pirin’ ase ǀgoraǃgâ hân ǀkha nî ī. ǁÎn ge ǀamo ûiba hō tide.—Mat. 25:31-33, 46; Heb. 5:9. w20.12 5 ¶13-14

Sada ga ǂhâba da hâ ǁgaumâisa hō tama io. ǂGomǂgomsa ǀhomǃgān di ǃgâi aiǁgausa kō re. Aiǁgauseb ge Jehovaba ǀhomǃgāna ge sîsenū în Gao-aob Axaba gâre mû. ǀNî ǀhomǃgān ge tae-i nî dīhesa gere mî. Xaweb ge Eloba ǀgui ǀhomǃgāba ge mîba ǁîb ge mā ǀawemas ge nî sîsen ti. (1Gao. 22:19-22) Nau ǀhomǃgāga ǂkhabuǂâi tsî mî i gere ‘ti ǁaeba ta ge ge ǁore’ ti? Hî-î tātsē. ǀHomǃgān ge a ǃgamǃgamsenxa tsî hoa ǃgôasib Jehovaba ǃoa nî īsa ra ǂhâba. (ǂHǂh. 13:16-18; J.ǂHa. 19:10) ǂÂis ǃnâ da ge nî ūhâ kai aiǂhanub hîna da ūhâb ge Jehovab di ǀonsa tani tsî aoǁnâsa. ǁGaumâidi ge sida Jehovab mûdi ǃnâ a ǀō-aisasa ǁgau tama hâ. ǃGamǃgamsenxasiba da ga ra ūhâ o. O da ge Jehovab tsî sida di ǃgâsan ǃoa ai nî ǀnamǀnamsa. ǁNā-amaga Jehovaba ǀkhoma re îb huidu î du ǃgamǃgamsenxasiba ūhâ. Jehovaba ge re ǃoaba ǃgamǃgamsen hâ khoen Elobmîs ǃnâ hân ǃgâi aiǁgaudi xa ǂâi re. ǁKhā du a khami du māsenxase sadu ǃgâsana hui re.—1Pet. 5:5. w20.12 26 ¶16-17

Toro ǀgapas ǃgâiǃōsib dis ge ǃâubasens hînab Jehovaba ra mādasa. Nē ǃâubasens ge ra ǂâibasen ǁîb di ǂâisa da ga dī ob nî ǀkhaedasa. Tsîb nî ǁō da ga xawe khâisa mādasa. (1Tes. 5:8; 1Tim. 4:10; Tit. 1:1, 2) Sida ǃâubasens ge sida di ǂâiǀgauba ra ǁkhauba. ǁNā ǃâubasens ge ra hui da î da Jehovab mîmâi hâ xūn ai kō. Tsî tā nē ǃhūbaib di ǃgomsin ai sida di ǂâisa ǂnûi. Nē ǀgapasa da ge ra ǂnûi. Jehovab ra ǂâi ǀgaub ai da ga ǂâi tsoatsoa o. Aiǁgause hâ hâ tide ǃkhusib ai ǂgomǃgâ tama i tsî da ge Elob ai ra ǂgomǃgâ. (Psa. 26:2; 104:34; 1Tim. 6:17) Elobmîs ge a gagab di gôa. ǁNā gôab ge ǂhumib tsî amaba ra ǀgora. Tsî khoena ǃgâi tama ǁnaetiga xu ra ǃnora kai. (2Kor. 10:4, 5; 2Tim. 3:16, 17; Heb. 4:12) ǁNā gôaba sîsenūsa da ge ra ǁkhāǁkhāsen. Elobmîsa khomais tsî Jehovab di ǀapeǂhumis ta mā ǁkhāǁkhādi ǃnâ-ū.—2Tim. 2:15. w21.03 27 ¶4; 29 ¶10-11

Jesub xa aoǁnâs ǃaromab ge ǂganamǂgāhe hâ-i. Hînas tsînab ge apostel Johaneba. Nau khoen xa gere ǂâi. Aiǁgauseb ge ge xoa tsî ǀhaohâga ǃoa ge sî. În ǂan “ǃhaese nîra” ī xūna. (J.ǂHa. 1:1) Tsîb ge Patmosa xu a ǃnora kaihe o. Ob ge Johaneba Jesub di ûib tsî aoǁnâ sîseni xa hâ ǂkhanisa ge xoa. Tsîb ge ǁnapaxu ǃnona sîǂkhanide ge xoa, îb ǁîb di ǃgâsana ǂkhâǃnâ. Sadu tsîn ge Johaneb ge ǁîb ûib ǃnâ. Nau khoen ǃgao gere māsen ǀgausa a ǁgae ǁkhā. Tsî Khoena du a ǀnamsa du ge ra ǁgau. Sadu ûib ǀkha du tae-e ra dīs ǃnâ-ū. ǁGâuab ǃhūbaib ge ra ǂhâba î du sadu xa ǀgui ǂâi. Tsî mari-e kuru tsî ǀonsa aitsama dībasen. Xristeǁî aoǁnâ-aon ge ǃhūbaib ǂhawase. ǁÎn di ǁaeba ra sîsenū în aoǁnâ sîseni ǃnâ ǃgarise sîsen. Tsî khoena ra hui în Jehovaba ǂan. w21.01 10 ¶9-10

Jonatanni ge Daviba ga suri hâ. Gao-aob Sauli di ôab aseb ge Jonatanna ga mî hâ. ǁÎb a ǂhanu khoe gaosisa hōs diba. (1Sam. 20:31) Xawe Jonatanni ge ge ǃgamǃgamsenxa i. Tsî Jehovab ǃoa-ai ge ǂgomǂgomsa i. ǁNā-amagab ge Daviba Jehovab xa. Saora gaob ase ǁhûihe o. Ob ge ǁîba ge ǂkhâǃnâ. ǁÎb ge Davib ǃoa-ai ge ǂgomǂgomsa i. Sauli gere ǁaixa xawes tsîna. (1Sam. 20:32-34) Jonatanni ge Daviba ge ǀnam-i. ǁNā-amagab ge ǁîba ge suri tama hâ-i. Jonatanni ge ǂgui toroga ge dan hâ-i. Tsî khās ǃnâ ge ǃgâi i. ǁÎb tsî Sauli tsîn ge “ǃariǃkhādi ǃgâ-ai ǃhae” tsî “xamgu xa ǀgaisa” se ge ǂansa i. (2Sam. 1:22, 23) ǁNā-amagab ge Jonatanna ga koasen hâ ǁîb ge dī xūn ǃgao. Xaweb ge Jonatanna, Daviba ge suri tama hâ i, ǁîb ra dī xūn ǃgao. Xaweb ge Jonatanna Davib ge ǁkhoaǂgao i. Tsî Jehovab ai gere ǂgomǃgâ ǃkhais xa ge ǃgâibahe i. Aiǁgauseb ge Daviba Goliata ǃgam toas khaoǃgâb ge Jonatanna ǁîba ge ǀnam tsoatsoa. w21.01 21 ¶6; 22 ¶8-9

Hoa Xristeǁîn ge Jesuba ǃnāka nî hâba. ǁÎb ge ǀoasa kurusa ūhâ tsî a dana. Xawes ga Xristeǁî tarekhoesa a ǃgamme o. Os ge ǀoasa kurusa ūhâ tama danaba ǃnāka nî hâba. ǁNāsa dīs ge hoaǁae supu tide. ǁNā-amagas ge ǃgamme ǂgaos ra ǃgâsab xas ga ǂâi o. Saora dîde nî dîsen: ‘Mati ta a ǂan nē ǃgâsab nî ǃgâi oms dana kai ǃkhaisa? Jehovaba ǀgoreǀîsab ǂgurose ǁîb ûib ǃnâ ra mâi? Ti i ga ī tama io, mati io ta ra ǂâi ǁîb ǃgamme toam ga ra o Jehovab ǀgūse nî ūhâ mi di?’ Tsîs ge nox nî dîsen: ‘Mâ ǂūga da ūhâ sim ǃgammeba nî omkhâiga? ǃNūǃnâxa ta a? Tsî ta ǂgaoba xu khoena xūna ra mā? Jehovab ǀkha ta ama ǀgū ǀhōsagusa ūhâ?’ (Aoǁn. 4:9, 12) ǃGammes nîs aisis ga ǃgâsasa ǃgâi mîǁguiga dī o. Os ge ǂkhî tsî ǁkhoaxa ǃgamme ûiba nî ūhâ. Miliundi Xristeǁî ǃgâsadi ge ǃgâi aiǁgausa ra mā da. ǁÎdi aoga di ga ǃnāka hâba o. ǁÎdi ge koahesa anu hâ. w21.02 8 ¶1-2

Nētsēn ge ǂgui aoǁnâ-aona ge mîmâi în ǀnî hâ gowaba ǁkhāǁkhāsen tsî ǃnâsase dī aoǁnâ sîsen-i ǃnâ. Tsîn ge ǀkhara gowab ra ǃhoa ǃnâ-e ǀhaohâb hîna ǂhâsiba ūhâba ǃoa ra doe. Nē mîǁguiban ge nē ǃgâsana aitsama ge dī Jehovaban ǃnāsase ra ǃoaba ǂgao amaga. Gowaba ǃamkuse ǂans kuriga ra ū, xawen ge nē ǃgâsana ǀhaohâba ǂgui ǀgaugu ǃnâ ra hui. ǁÎn ǃgâi ǂūb tsî ūnhâ ǂans ge ǀhaohâb ǃnâ hâ ǃgâsana ra omkhâi. Nē māsenxa ǃgâsana da ge ra ǃgôaǃgâ. ǀHaohâb ǃûi-aogu ge ǃgâsaba ǃkhō-oa tide, ǀhaohâb ǃûi-aob tamas ka io ǀhaohâb hui-aob ase ǁgaumâihesa xu. ǁÎb hâ ǃnâ ǀhaohâb ra sîsen-ū gowabab ǃamkuse ǃhoa tama hâ amaga. ǀHaohâb ǃûi-aogu ge ǃgâsaba Elobmîs ǂgaoǀkhadi ǃoa-ai ǀhaohâb ǃûi-aob. Tamas ka io ǀhaohâb hui-aob ase nî ǁgaumâi. Tsî ǁîb ǀhaohâb ǃnâ ra sîsen-ūhe gowaba ra ǃhoa ǀgaub ai tā nî kō.—1Tim. 3:1-10, 12, 13; Tit. 1:5-9. w20.08 30 ¶15-16

ǀNî khoen ge ra ǂâi ǁîn ga ǃgâi ǂgurusib, ǂgui mari-i tsî ǂkhî omarisa ūhâ o, on a ǂkhî ti. Xawe Jakobub ge xoa ǂkhîb ge gagab di ǂûb di ǃâ. Tsî khoe-i di mâsigu ai ǃgaoǃgaosa tama hâ. (Gal. 5:22) Xristeǁîn ge ǃgam ǂkhîba ra hōǃâ Jehovaba ǂan tsîn ga ǁîba ǃoaba o. Tsî Jesub di aiǁgausa ga ra sao o. (Luk. 6:22, 23; Kol. 1:10, 11) Lams ǃnâ ra khau flami khami i ge sida ǂkhîba ra khau ǂgaob ǃnâ. Tsî da ge ǁnās ǀkha ǂkhîba a ūhâ ǁkhā ǃgomsin ǃnâs tsîna. ǀAesen da ga ra o, os tsîna da ge sida ǂkhîba ǂoaǃnâ tide. Tamas ka io ǀoro mari-e da ga ūhâ os tsîna. ǁNās ǁkhas khamis tsîna da ge sida di omaris ǁanin ga mâǃoada os tsîna ǂkhîba ǂoaǃnâ tide. Sida di ǂkhîb ge ra ǀgaisa mâ ǁaeb hoab hîna da ǃgomsin ǃnâ ra mâǀgaib ǃnâ. Sida di ǂgoms ǃaroma da ra hōǃâ xūn ge ra ǁgau Jesub di ama ǁkhāǁkhāsabe da a ǃkhaisa. (Mat. 10:22; 24:9; Jhn. 15:20) ǁNā-amagab ge Jakobuba nētsēs di xoasa ge xoa. w21.02 28 ¶6

Elobmîsa du ra khomai hîna du ga. ǃNomsase Jehovab ai ǂgomaiǂnûis tawa ga ra sī o. O dītsâ re i mâǂoara xoade ǁnāpaxū ǃkhōmâi. ǀNîsi du ge ǃgarise a khomai ǁkhā. Tamas ka io a xoaǁnâ ǁkhā î du ǁaeba xu ǁaeb ǀkha kō. Jehovab ge Josuaba ge mîba. Îb Elobmîs di ǂkhanuga ǃnomsase tsî ǃgāsase khomai, ib gā-ai. Tsî ǁnapab gere khomain ge gere huibi. Îb ǂan matib nî Elob di khoena ǂgaeǂgui ǀgausa. (Jos. 1:8, 9) ǂGui xoadi hîna Elobmîs ǃnâ hâ di ge a huida ǁkhā. ǂÂiǂhansen tsî da ga ǂkhabuǂâi ǁaeb ai. (Psa. 27:1-3; ǂKhm. 3:25, 26) Sida ǀhaodi tawa da ra hō ǃhoadi. ǃGâsan di ǃereamdi tsî omkhâi ra ǁgamǀhaodi ge sida ǃaroma a ǃgâi. (Heb. 10:24, 25) ǀHaohâb ǃnâ da ūhâ ǃgâi ǀhōsa-e da ga sida ra ǂhani xū-e mîba o. O da ge kaise ra ǂkhâǃnâhe. w21.01 6 ¶15-16

ǁĀǁnâhe du ge o. O du ge ǀgaisa ǂgoms. Tsî ǂgomǃgâsib tsîna Jehovab ǃnâ ge ǁgau. Tsîb ge Jehovaba aiǂhanuba ge mā tsi îts Jehovab di omaris ǁani kai. Nēsits nî dīs ge, îts hoaǁae Jehovab ai ǂgomaiǂnûi. Kai mîǁguiga du ra dī ǁaeb ai Jehovab ai ǂgomǃgâs ge ǀnîsi a supu ǁkhā. O nau ǁaegu ai tae-e du nî dī? Kaise i ge a ǂhâǂhâsa Jehovab ai ǂgomaiǂnûisa mîǁguigats ra dī ǁaeb ai. Aiǁgause mâ sîsene du nî ūs, ûib di ǀapeǁguib. Tsî mâ ǂgamǂgamsen ǀhuruna du nî dīs tsîna. Tā sa gā-aisib ai ǂgomaiǂnûi re. Xawe Elobmîs ai ǃgaoǃgaosa ǀapemāde sadu di mâsib ǃoagu ôa re. Tsî ǁnāpaxu ǁnā daoǁgaude sîsenū re. (ǂKhm. 3:5, 6) ǁNāsa du ga dī o du ge Jehovaba nî ǂkhîǂkhî. Sats tsîn ge ǀoasa kurusa ūhâ tama hâ tsîts ge nî dīsā. Xawets ge ǁnā i xa tā Jehovaba ǃoabas ǃnâ nî ǁkhaehe. w21.03 6 ¶14-15

Sadu di omaris di ǁanina ra mâǃoa du? Tamas ka io du Jehovab di khoen ra dī sîsenni ra mâǃoahe ǃhūb ǃnâ ra hâ? Ti i ga ī o, o du ge 2 Timoteub 1:12-16 tsî 4:6-11, 17-22 sa khomais xa nî huihe. Apostel Paulub ge nē ǃâba tronkhes ǃnâb ǂnôa hîna ge xoa. Nē ǃâba du nî khomais aiǃgâ Jehovaba sadu ǃgomsiba mîba re. Tsî mati du ǁnās xa ra tsâs tsîna. ǃGāsase ǁguiǃā re. ǁNāpaxū ǂgan re Jehovaba îb hui du. Î du Paulub di ǃgomsina xu du a ǁkhāǁkhāsen ǁkhā xūna mû. Tsî mati du sadu di ǃgomsina nî sîsenǂam ǀgaus tsîna ǂan. Jehovab ge Pauluba ge mîba hâ i. ǃGomsinab nî hōǃâsa Xristeǁî kaib ga o. (ǃNǃkh. 21:11-13) Jehovaba Pauluba mati ge hui? Jehovab ge Paulub di ǀgorede ge ǃeream, tsî ǁaeb ai ǀgaiba ge mābi. Paulub ge ge mîbahe. ǁÎb ta ǃgarise sîsen ǃkhais ǃaromab nî ǀkhaehe ǃkhaisa. Tsî Jehovab tsîn ge Paulub di. ǂGomǂgomsa ǀhōsana ge sîsenū, în huiba mābi. w21.03 17-18 ¶14-15, 19