Septemberi

Joeli di kēbos xab gere ǃhoa o, ob ge Petruba ǀnîhâ ǀgaub ǃnâ ǀgui nē ǂâisa ge mî. (ǃNǃkh. 2:16, 17) “ǁNās khaoǃgâ” di hâ mîdi ǀkha tsoatsoas xab ge Petruba: “Tsî i ge ǀuni tsēdi ǃnâ” di hâ mîdi hîna Jodeǁîn ǀkha gere ī xūn ǀams ǃoa ra ǁnaeǁgause ge mî—Elob ǃanu gagab ge “ǁgans hoas ai” nî ra ǁhōǂuihe. Nēs ge ra ǁgau ǁaeb ge Joeli kēbos nî dīǀoaǀoahes aiǃâ ǃkharusa. Elob ge ǁîb di ǃanu gagaba ǃkharu ge ǁaeb Xristeǁîn ai ǁhōǂuis khaoǃgân ge aoǁnâ sîsenni ǀkha ge tsoatsoa. Hîna ǂhanu ǁaeb ai hoaraga ǃhūbaiba nî ǀoaba. Apostel Paulub ge ǁîb sîǂkhanisa Koloseǁîna ǃoa 61ǁî kurib ǃnâ xoa-o, ob ge ǃgâiǂhôas hîna ra aoǁnâhes xa ǁguiǃā tsî ge mî nēs “kurusaben ǀhommi ǃnaga hân hoana” ra aoǁnâbahe di. (Kol. 1:23) Paulub tsēdi ǃnân ge ‘kurusaben hoana’ ǃhūbaiba ǃoa gere ǁnaeǁgau. Jehovab ǀgaisa ǃanu gagab huib ǀkhab ge aoǁnâ sîsenna sada tsēdi ǃnâs tsîna ra dīhe—“ǃhūbaib di ǀams kōse.”—ǃNǃkh. 13:47. w20.04 6-7 ¶15-16

Jehovab ge mâ ǀgui-i hoa-i âda a ǀnam. ǁNā gūn hîna ge amab daoba xu a ǁgôan tsîna. (Mat. 18:12-14) Elob ge ra mîba da ǁîb kā hâ gūnab ôaǂui. Tsî gagasise ǁkhapa nî hui di. Tsîb ge matib ǁnāsa nî dīsa ge ǁgau. Israelǁaes ǃûi-aob gū-i ga kā o ra dī xūnab ǁîb tsîna nî dī tib ge ge mî. (Ese. 34:12-16) ǂGurob ge ǃûi-aoba gū-e nî ôa. Nēs ge ǂgui ǁaeb tsî sîsenni tsîna ǃkhōǂgā hâ. Kā hâ gū-eb ga ǀhao-ū o, ob ge nau gūna ǃoa ra sī-ū. Tsî i ga kā go hâ i gū-e ǃâ tsî tsû o. Ob ge ǁî-e nî hui, tsûhâ ǃkhai-e kōǃgâs tsî ǂûmās ǀkha. ǀHaohâb ǃûi-aogu, “Elob gūn” kōǃgâ-aogu ge ǁkhā ǀgauga nî sao. Tsî ǀhaohâba xu kā hâ gūna nî hui. (1Pet. 5:2, 3) ǀHaohâb ǃûi-aogu ge ǁîna ôa tsî ra hui în oaǀkhī. Nēs khaoǃgâ gu ge gagasise ra hui nî. În ǁkhapa Jehovab ǀhōsa kai. w20.06 20 ¶10

ǂGui khoen ǁîba nî sao dib gere ǂâi ǃkhais ǃaromab Jesuba, ǃhanagu ǃgaohes amsi ǂhanu di gere mî? Hî-î di tama ge is ge. Xoadi ge ge ǁgau ǀoro khoen nî ǂgomsa ūhâsa. (Jhn. 12:37, 38) Tsî Jesub ge khoen ǂgaoga khomais ǁkhāsiba ge ūhâ i. (Mat. 9:4) Xaweb ge ǁnā ǀoro khoen hîna ǁîb ǃnâ nî ǂgomsa ūhân ai ǁîb ǂâisa ge ǂnûi tsî ôasase gere aoǁnâ. Nēs ǃaroma da ge sada hîna ǂgaoga a khomai ǁoada ǀgui khoe-i. Tamas ka io ǂharis khoena ǀgoraǃgâsa xu nî ǂgōsen. Tsî khoen di ǃgâiǃgâibasensa nî mû. Xawe Jesub ge ǁîb ǁkhāǁkhāsabena mîba xū-e ǂâi re. ǃHanagu ge a ǃuri tsî ǃgaohes amsi a ǂhanu. Khoen ge ǀkharaǀkharasen tsî a Jesub di ǁkhāǁkhāsabe kai ǁkhā. Jehovab ge nē khoena ‘ǃkhūsib’ ase ra mû. (Hag. 2:8) Khoena da ga Jehovab tsî Jesub tsîkha khami mû o. O da ge ǁîn khaoǃhūgu tsî ǃgâiǃgâibasensan ūǃnâhâ xūn tsîna nî ǂanǂui. ǁÎna da ge ǃhaokhoen ase mû tide xawe sada ǃgâsa kai ǁkhā a khoen ase. w20.04 13 ¶18-19

Elobmîs ge ǃgāsase ra ǁkhāǁkhā Jesuba da ǀnamma omkhâiba tsî nî ūhâ ǀgaraba ǃkhaisa Jehovaba ǂkhîǂkhîs ǃaroma. ǀGui xū-i hîna da nî dī-i, i da Jesub ǀhō kai i ge Jesub ǀkha ǂangusa kurusa. Nēsa da ge Markub, Lukab, tsî Johaneb tsîgu di ǂkhanide Elobmîs ǃnâ khomais ǃnâ-ū a dī ǁkhā. Jesub di ûiǀgauba ra ǁgauda Elobmîs ǃâdi xa da ga ǂâiǃgâ o, o da ge ǀnammi tsî ǃgôasib tsîna nî omkhâiba bi khoen ǀkhab gere hâ ǀgaub ǃaroma. ǁÎb ge ǁîn di dana i xaweb ge Jesuba ǁîb ǁkhāǁkhāsabena ǃgān ase ge hâ-ū tama hâ i. Xaweb ge ǁîb ǂâidi tsî tsâsigu tsîna ǁîn ǀkha gere ǀgoragu. Jesub ge ǁîn tsûba ǁnâuǃā tsî ǁîn ǀkha gere ā. (Jhn. 11:32-36) ǁÎb mâǃoa-aon tsîn ge ge mî ǁîb ǁnān hîna ǁîb haisi amsa ǃoara ǃgân di ǀhō di. (Mat. 11:19) Jesuba da ga ǁîb ǁkhāǁkhāsaben ǀkhab gere hâ ǀgaub ǃnâ a ǁgae o, os ge ǁîb ǀkha da ūhâ ǀhōsagusisa nî ǀgai. Tsî da ge ǂkhîba nî hōǃâ tsîb ge sada ǀnammi tsî ǃgôasib tsîna Xristub ǃoa-ai nî kai. w20.04 22 ¶9-10

1870ǁÎ kurib ǃnâb ge Britaina ǃnāsa ǂgaeǂguisa ǃhūbaib ai ge ūhâ i tsî ǀgaisa toroǃkham-aogu tsî xūn tsîna ge ūhâ i. Nē ǂhanub ge ǂkhari ǁnârob hîna nau ǃnona ǁnâga ra hîkākāb ase ge mûhe—Fransi, Spaini tsî Nederlands tsîna. (Dan. 7: 7, 8) Tsî Britaini ge ǀapas gaob di ǃkhaib ǃnâ ǂguro torob nî tsoatsoas kōse ge ǂgaeǂgui. Nē ǁkhā ǁaeb ǃnâb ge Amerikab tsîna kai ǃâb ǃhūbaib diba ge ǂgaeǂgui tsoatsoa tsî Britaini ǀkha ǃgaeǀhaosa gere kuru. ǂGuro torob ǁaeb ǃnâ kha ge Amerikab tsî Britaini tsîna gere sîsenǀhao tsîkha ge kaise ge ǀgaisa i. Britaini tsî Amerikab tsîkha ge ǀguiba ge sîsen tsoatsoa tsîkha ge ge ǀgaisa ǂhanu kai ǃhūbaib ǃnâ. Danieli ge kēbo khamib ge nē gaoba “kai tsî ǀgaisa toroǂnuwi-e” ge hō. ǀUni tsēdi ǃnâb ge ǀapas di gaoba a Britaini tsî Amerikab di gao. w20.05 4 ¶7-8

ǁGam-e da ge ǃhūbaib ai ūhâ ǃhūbaib ǂhanu ǃnusiba soresa xu ǂnôa amaga. ǂKharirose da ga sores ǀgūse hâ o, ob ge ǃhūbaiba ǁgam-e ūhâ tide tsîn ge ûitsama xūn tsîna nî ǁō. ǃHūbaib ga ǂkharirose ǃnūse ǂnû hâ o, o i ge hoaraga ǁgam-e ga ǃkhoa hâ tsîb ge hoaraga ǃhūbaiba ga ǃkhoa hâ. Jehovab ge ǃhūbaiba ǃgâi ǃkhaib ai ǀgui mâi amaga da ge haoǁae ǁgam-e ūhâ tsîb ge ûiba ra aiǃgû. Sores ge hurib ǁgam-e ǃhūbaiba xu ra daokhâi tsî i ge nē ǁgam-e ǀnanudi ǃnâ ra ǀkharaǀkharasen. Mâ kurib hoabas ge soresa 500 000 cu km ǁgam-e ra daukhâi. Nē ǁgammi daukhâihe hâs khaoǃgâ i ge disi tsēde ǀhommi ǃnâ hâ tsî ǀnanub ase ra ǁnā. Nē ǁgammi ge hurib tsî ǃāga ǃoa ra ôa tsî ǁkhawa ra daukhâihe. Jehovab ge nē ǀgauba ge ǂnuiǂgā îb ǃhūbaiba hoaǁae ǁgam-e ūhâ. Nēs ge ra ǁgau Jehovab gā-ai tsî a ǀgaisa ǃkhaisa.—Job 36:27, 28. w20.05 22 ¶6

Jesub ge ra mîba da i da ǃanu gagaba ǀgores ǃnâ-ū ǂgan. (Luk. 11:9, 13) ǁÎb ǃanu gagab ǃnâ-ūb ge Jehovaba ǀgaiba ra mā da—“ǃnāǂamsasib ǀgaib diba.” (2Kor. 4:7) Elob ǃanu gagab huib ǀkha da ge hâ nî ǃgomsin hoan ǃnâ a mâ ǀgai ǁkhā. ǃAnu gagab tsîn ge nî hui da i da Elob xa da māhe hâ sîsen-e dī tsî sida ǁkhasiba ǀāǀā ǁkhā. Jehovab ǃoabas ǃnâ da ra hō ǀkhaegu ge ǁîb ǃanu gagab huib xa ǀgui ra īǁkhā kaihe. Elob ǃanu gagaba da ra ǃgôaǃgâ ǃkhaisa da ge ǀgores ǃnâ-ū ra ǁgau. Î da hui-e sada ǂgaogu ǃnâ hâ ǃgâi tama ǂâidi tsî tsâsigu tsîna mûs ǀkha. (Psa. 139:23, 24) Tsî nesa da ga ǀgores ǃnâ ǂgan o, ob ge Jehovaba ǁîb ǃanu gagab ǀkha nî ǁgau da ǃgâi tama ǂâidi tsî tsâsigu tsîna da ga ūhâ o. Tsî da ga ǃgâi tama ǂâi-i tamas ka io tsâsi-e da ūhâsa mûǂan o. O da ge ǀgore tsî Elob ai ǃanu gagaba nî ǂgan îb nē ǂâidi tsî tsâsiga mâǃoas ǀkha hui da. Nēsa da ga dī o, ob ge Jehovaba nî mû ǁîb ǃanu gagaba sida xu nî ūbe xū-e da dī ǂgao tama hâsa.—Efe. 4:30. w20.05 28-29 ¶10-12

Jehovab ǀonsa da ga ǁkhauba o, o da ge Jesub Xristub di aiǁgausa ra sao. Jesub ge ǁîb ǁGûb di ǀonsa ǂanǂans ǀguisa ge dī tama hâ i. Xawe Jehovab xa hâ amab tsîna gere ǁkhauba. Aiǁgause gu ge Farisega gere mî Jehovab a ǃgariǂgaoxa, ǁgâiǀāxa. Khoen ǀgūse hâ tama tsî ǀûbaǀnamxa tama hâ ti. Xaweb ge Jesuba nē ǂhumib xa xū-e ge dī. Jesub ge khoena gere hui în ǁîb ǁGûba ǂhanu-ai, ǃnūǃnâxa, ǀnamxaǃnâ. Tsî ǀûbaǀnamxa Elob ase mû. ǁÎb tsēkorobe ûiǀgaub ǀkhab ge khoena gere hui în Jehovab ǀgauga ǁîb tanisen ǀgaub ǃnâ mû. (Jhn. 14:9) Jesub khami da ge khoena Jehovab xa da ǂan xūna a mîba ǁkhā. ǁÎna matib Eloba a ǀnamxaǃnâ tsî a tsaura ǀgauba, ǁkhāǁkhās ǃnâ. Nēsa da ga dī o, o da ge Jehovab xa ra mîhe ǂhumiba ra mâǃoa. Jehovab ǀons xan khoena ra tsâ tsî ǂâi ǀgauba dawas ǃnâ-ū da ge ǁîb ǀonsa ra ǃanuǃanu. Khoena da ge sada tanisen ǀgaub ǀkha Jehovab a tae ǃnôa Elosa ra ǁgau. Nē ǀonsa da ge ra ǃanuǃanu khoena da ga nē ǀons xa hâ amaba mîba o. w20.06 6 ¶17-18

ǃGâi-i ge a internets ǃnâ-ū da ga foton tsî vidion tsîna sida ǀhōsan tsî omaris ǁanin tsîna a sîba tsî ǁnāpa ǁîna xūna xoaba o. Xawe hōǃâ du ge ǀnî khoen ge internets ǃnâ-ū vidiogu tsî foton tsîna ra sî tsî ǁnāpa ra xoa, nau khoen xa nî koahega. ǁÎn ge khoen xa nî mûhe sa ra ǂhâba. ǀNî khoen ge ǁîn ǃnao hâ tamas ka io nau khoen xa ǃnaohe hâ ai-īsigu ǃnāga ǁgai tsî ǀurixa xūna ra xoa. Xristeǁîn ge ra ǂkhâǃnâhe în ǃgamǃgamsen tsî nau khoena tsâba ǁnā-amagan ge foton tsî vidion tsînan ga sî o ǁnāti tanisen tide. (1Pet. 3:8) Internetsa du ga sîsen-ū o dîsen re: ‘Nē ta ra ǃnao foton tsî vidion tsî xoa ta ra xūna nau khoena nî ǂâi kai ūsen ta ra ti? Khoena ta suri gagasa nî mā?’ Xristeǁîn ge tsâsen tama hâ tsî nau khoen xan nî koahe ga xūna dī tama hâ. ǁÎn ge Elobmîs ǁnamasa ra ǁnâuǀnam nētsēs xoas ǃnâ hâsa. ǃGamǃgamsens ge nî hui da i da tā nē ǃhūbaib khoen khami tanisen.—1Jhn. 2:16. w20.07 6 ¶14-15

Apostel Paulub ge Xristub di saosabe kaib nîs aisi ǃgôasiba ge ūhâ tama hâ i ǂkhamkhoeba Xristub di saosabena ǃoa. (ǃNǃkh. 7:58) Jesub ge Paulub ǀkha Saul tib ge ǀōn hâ i ǁaeb ai ǀhomma xu ǃhoa. Tsî ge mîba îb Xristeǁî ǀhaohâba ǃgôaǃgon ǀû tsî ge ǂgī kai bi. ǁKhawa mûs ǃgaob ge Pauluba ǁkhā khoen hînab ge re ǃgôaǃgonan ai huiba ga ǂgan hâs ge. ǃGamǃgamsenxasib ǀkhab ge ǁîba saosabeb hîna Ananias di ǀon hâb xa ge hui-e tsî ǁkhawa ge mû tsoatsoa. (ǃNǃkh. 9:3-9, 17, 18) Paulub ge ēga ge ǂansa i Xristeǁî ǀhaohâb ǃnâ. Xaweb ge tātsē Jesub xab ge ǁkhāǁkhāhe xū-e ǁnā Damaskus daob aib ge garu-i hîna ge ī-e ge ǀuru tama hâ i. ǁÎb ge gere ǃgamǃgamsen tsî ǃgâsan xab gere māhe huiba ge ūǃoa. ǁÎb ge ge mûǂan ǁîn ge ǁîba “ǁkhaeǂgaose iba i” ǃkhaisa.—Kol. 4:10, 11. w20.07 18-19 ¶16-17

Jehovab ge Hoaǀgaixab a xawe nau khoen ǀkha sîsen-e ra ǀgoragu. Aiǁgauseb ge Jesuba ǁîb Gaosib di Gao-aob ase ge ǁgaumâi tsî ǀnî sîsen-e 144 000 khoen hîna Jesub ǀkha sī nî ǂgaeǂguina ge mā. Ama as ge Jehovab ge Jesuba Gao-aosis tsî ǀgapi pristersis tsîna a ǁkhāǁkhāsa. (Heb. 5:8, 9) Jesub ǀkha sī nî ǂgaeǂgui khoen tsînab ge ge ǁkhāǁkhā. Xaweb ge nē sîsen-en ǁîna ra dī ǀgauba kō ga kō tama hâ. ǁÎb ǂâisan nî dī ǃkhaisab ge ǂgomǃgâ hâ. (J.ǂHa. 5:10) Sida ǀhomsi ǁGûb hîna khoe-i huiba ǂhâ tama hâb ge nau khoen ǀkha sîsen-e ra ǀgoragu. O da kom sida tsîna ǁkhā xū-e nî dī o. Aiǁgause, omaris dana do? Tamas ka io ǀhaohâb ǃûi-ao do? Jehovab aiǁgausa sao re i nau khoena sîsen-e mā tsî ǁîna tā mâkhao. Jehovaba du ga ǁgae o i ge sîsen-e nî dī-e. Xawe du ge ǁnās ǂamai khoena nî ǁkhāǁkhā tsîn ge ǁîna harase nî tsâ.—Jes. 41:10. w20.08 9 ¶5-6

Kā hâ gūn xa da mati nî tsâsab Jehovaba ra ǂgao? Jesub aiǁgausa xu da ge a ǁkhāǁkhāsen ǁkhā. ǁÎb ge ge ǂan i Jehovab gūn ǁîb ǃoa-ai a ǂhâǂhâsa ǃkhaisa. Nēs ǃaromab ge Jesuba “kā hâ gūn Israeli ommi” dina gere hui, în Jehovaba ǃoa oa hā. (Mat. 15:24) ǃGâi ǃûi-aob aseb ge Jesuba ǁkhāb an hoana gere dītsâ în tā Jehovab gūna kā. (Jhn. 6:39) Apostel Paulub ge Efeseǁî ǀhaohâb ǃûi-aoga ge ǂkhâǃnâ i gu Jesub aiǁgausa sao. “ǁKhā tamana ǃkhōǃoa tsîts nî ǃKhūb Jesub di mîs, mîb geres xa ǂâi: ‘Mās ge ūs ǃgâ-ai a ǃgâi.’” (ǃNǃkh. 20:17, 35) Nē xoas ge ra ǁgau ǀhaohâb ǃûi-aogu ǀō-aisa ǁgaumâisa ūhâsa. Jehovab khoena ǃûis disa. “Jehovab kā hâ gūn xa ra tsâ ǀgaub xa ta ga ǂâi o, o ta ge ǁkhā ta a i hoa-e ra dī ǂgao ǁîna huis ǃnâ.” Tib ge Spaini ǃnâ ra hâ ǀhaohâb ǃûi-aob Salvadora ra mî. “Tita ge ra mûǂan, Jehovab ǁîna ta nî kōǃgâsa ǂhâba hâsa.” w20.06 23 ¶15-16

Jehovab ge ǀoadisi kurigu nî ǃkharus kōse nî ǃâu ǀoasa kurusab sida xū nî ǃâubasens aisi. ǁNā ǁaeb kōseb ge Jehovaba sida ǁorena nî ǀûba da. Sida tsîn ge ǁîb aiǁgausa sao tsî khoen ǃnâ ǃgâi xūna nî ôaǂui tsî ǁîn ǀkha ǃnūǃnâxase nî hâ. Jesub tsî ǀhomǃgāgu ge kaise ge ǂkhî-i ǃhūbaib ge kuruhe o. Xawe gu ge ǁîga ǁnās xa ǃnāsase nî ǂkhî ǃhūbaib ǀoasa kurusa ūhâ khoen. Hîna Jehovaba ǀnam tsîra ǃoaban xa ǀoahe hâsa gu ga mû-o. ǂÂis ǀguisa hî re ǁnān hîna ǀhommi khâisa māhe tsî Xristub ǀkha sīra ǂgaeǂguin nî ǂkhî ǀgausa. ǃHūbaib ai hâ khoen ǁîn sîsenga xu ra ǀama ǃkhaisan ga mû o. (J.ǂHa. 4:4, 9-11; 5:9, 10) Mûnanai re ǂkhîb di ǁgamrogu, tsûb xa ra ǃaromahe ǁgamroga ǃkhōǃkhuni tsî ǀaeb, tsûaǂgaob tsî ǁōb tsîn nî ǀkhai ǁaeb ai ûisa. ǁNā ǁaeb nî hās kōse sadu ǀnamxaǃnâ, gā-ai tsî ǃnūǃnâxa ǁGûba ǁgae re. Ti du ga dī o, o du ge sadu ǂkhîba nî ǃkhōǀgara hā nî ǃgomsin hoan ǃnâ. (Jak. 1:2-4) Kaise da ge ra gangan Jehovab ge mîmâi-o “ǁō hâna xu khâi-i nîra hâ ti.”—ǃNǃkh. 24:15. w20.08 19 ¶18-19

Elobmîs ge ǀnamǀnamsa ǀkhaeba Eloba xu. Sada ǀhomsi ǁGûb ge khoega ge sîsen-ū i gu Elobmîsa xoa ǀnamdab a ǃkhais ǃaroma. Elobmîs ǃnâ-ūb ge Jehovaba ǂhâǂhâsa dîde ra ǃeream hîna da ra dîsende. Aiǁgause: Mapa xu da ra hā? Ûib ǂâibasensa a tae? Hānîǁaeba taena ǃkhōǂgā hâ? Jehovab ge ǂhâba hâ în ǁîb di ôan hoana nē dîdi ai ǃereamde hō. ǁNā-amagab ge kurigu ge ī khami khoena ge sîsen-ū în Elobmîsa ǂgui gowagu ǃnâ ǂnûiǃkhuni. Nētsēs ge hoa Elobmîs tamas ka io Elobmîs ǃā-e 3 000 gowagu ǃnâ a hō-e ǁkhā. Elobmîs ge ǃnāsase a ǁgâisa tsî a māǂuisa ǂkhanisa. Elobmîsa tsēs hoasa khomais tsî khomai da ra xūna ǂâiǃgâ tsî ûiǂuis ǃnâ-ū da ge a ǁgau ǁkhā Elobmîs ǃaroma da a ganganxa ǃkhaisa. Sada ǃgôaǃgâsib tsîna da ge a ǁgau ǁkhā ǂgui khoena Elobmîs ǃnâ da ra ǁkhāǁkhāsen xūn xa mîbas ǃnâ-ū.—Psa. 1:1-3; Mat. 28:19, 20. w20.05 24-25 ¶15-16

Kēbo-aob Jeremiab gere aoǁnâ ǂkharis ǃnâ gere hâ khoen ge kaise ge ǃgom ǃgâxa-i. ǀGui ǁaeb ge kaise ǂkhabuǂâi tsî gere aoǁnâ ǀû ǂgao. Xaweb ge ǀûsen tama ge i. Tae-i ǃaroma? ‘Mîs ǃKhūb dis’ ge Jeremiab ǃnâ ǀaes khami ge hâ-i tsîb ge ge ǃkhō oa ǁoa i. (Jer. 20:9) Sida tsîn ge Jeremiab khami nî ī Elobmîsa da ga tsēs hoasa ǁkhāǁkhāsen tsî ga ǂâiǃgâ o. Nēsa da ga dī o da ge sida aoǁnâ sîsenni ǃnâ kai ǂkhîba nî ūhâ tsî i ge ǂgui khoena nî ǃgâ da. (Jer. 15:16) ǁNā-amaga du ga tae-i ǀgui i xa ga ra ǂkhabuǂâi xawe, Jehovaba ǀkhoma re îb ǂkhâǃnâ du. ǁÎb ge sadu di ǀoasaoǃnâsib, ǂkhabusasigu tamas ka io ǀaegu ǀkha nî huidu. ǁÎb ge nî huidu î du sadu di ǁgaumâisa ǃamku ǀgaub ǃnâ mû. Tsîb ge nî huidu î du ǃgâi mûǂuiba sadu di aoǁnâ sîsenni xa ūhâ. Sadu di ǀnamxaǃnâ ǁGûba ǃoa du ǀgore re tsî sadu di ǃgomsina ǁîba mîba. ǁÎb di huib ǀkhā du ge ǂkhabuǂâisa nî ǃkhamǃoa. w20.12 27 ¶20-21

ǀNî ǃgâsadi ge nau ǃgâsan ǀkha kai-amse ǀhaodi ai ǀgui ra ǀhao. ǁNā-amaga da ge nē ǃede sîsen-ū tsî ǁîde harase tsâ kai, ǁîdi ǀkha ǃhoa tsî ǁîdi xa da ra ǂâi ǃkhaisa nî mîba di. Jesub khami da ge nî dītsâ îda sada di ǃgâsadi ǀkha ǃgâi ǁaeba ūhâ. (Luk. 10:38-42) ǀNîsi da ge ǁîde a ǁkhau ǁkhā ǂûǀhaos ǃaroma. Nēsa da ga dī o da ge omkhâira ǀgaub ǃnâ ǁîdi ǀkha nî ǃhoa. (Rom. 1:11, 12) ǀHaohâb ǃûi-aogu tsîn ge Jesub gere tanisen khama nî tanisen. ǁÎb ge ge ǂan i ǃgamme tamase hâs a ǃgom ǁkhāsa, xaweb ge mî tama ge hâ i ǃgammes, tamas ka io ǀgôana hōs hâhâ ra ǂkhîba nî hau ti. (Luk. 11:27, 28) Xawe da ge ǂkhîba nî ūhâ Jehovab di ǃoabasa da ga ǂgurose sida di ûib ǃnâ a mâi o. (Mat. 19:12) ǀHaohâb ǃûi-aogu ge Xristeǁî ǃgâsade, gagasi ǃgâsadi tsî ǁgûdi ase nî mû. ǀHaohâb ǃûi-aogu ge ǁaeba ǁamaǂui tsî ǀhaos ais ai tamas ka io, ǀhoas ga toa o ǃgâsadi ǀkha nî ǃhoa. w20.09 21-22 ¶7-9

Israel ǃhūb ǃnâb ge ǃhanaba ǃani ǁkhâgu khaoǃgâ ǀgui gere ǂûtani. ǃHanaǂgā-aob ge ǁîb di ǃkhomde ǂguro ǀnanub khaoǃgâ gere ǂgā. Tsî ǀuniga ǀnanub khaos-ai ǂûna gere ǀhaoǀhao. (Mrk. 4:28) Sada tsîn ge ǃhanaǂgā-aob di ǃnūǃnâxasiba ra ǁgae ǂgao. Xawes ge nēsa supu tama hâ. Dīǀoaǀoasa kurusa ūhâ tama hâ khoen ge, ǁîn ra dī sîsen-i ǃhaese nî ǂûtani ǃkhaisa ra ǂhâba. Xawe da ge sida di ǃhanab nî ǂûtanisa da ga ǂhâba o, sida di ǃhanaba ǃanu, ǁgam-e mā tsî nî kōǃgâ. Aoǁnâ sîsen-i ǃnâs tsîna da ge ǁkhā ǀgaub ǃnâ nî ǁguiǂgāsen. ǁAeba i ge ra ū sida ǀkha Elobmîsa ra ǁkhāǁkhāsen khoena huisa, în ǃhaoǀgorasa ǀû tsî ǀnamxaǃnâ khoe kai. Sida di ǃnūǃnâxasib ge nî huida îda tā ǂkhabuǂâi khoen ga ǃgâ ǂgao tama io. ǀNî khoen ga māsenxase ǃgâ tsî ga ra ǁkhāǁkhāsen ǂgao xawe da ge nî ǃnūǃnâxa. Elobmîsa ra ǁkhāǁkhāsen khoe-e da ge a ǁgari ǁoa, i i ǂgomsa ūhâ. ǀNî ǁaegu ais tsîna i ge Jesub di ǁkhāǁkhāsabega, Jesub gere ǁkhāǁkhā xūna ge ǁnâuǃā tama hâ-i. (Jhn. 14:9) ǂÂis ǃnâ da ge nî ūhâ, ǃhana tsî da ge a ǂnâ ǁkhā, xaweb ge Elob ǀguiba ra kaikai.—1Kor. 3:6. w20.09 11 ¶10-11

Hoada ge ǂhâba hâ i-i sida ǀkha ra Elobmîsa ǁkhāǁkhāsen khoe-i hoa-e ǁāǁnâhe. ǀGui ǂhâǂhâsa ǀgaub hîna da ǁîna a hui ǁkhāb ge ǁîna ǂkhâǃnâsa în ǀhaode ǃoa ī. Elobmîsa ra ǁkhāǁkhāhe khoen hîna ǀhaode ǃoa ra īn ge ǃhaese ra aiǃgû. ǀNî ǁkhāǁkhā-aon ge ǁîn ǀkha ra ǁkhāǁkhāsen khoena ra mîba Elobmîs ǁkhāǁkhāsa xun ǀnî xūn ǀguina nî hōsa. Xawen ǂgui xūn hînan nî ǁkhāǁkhāsenan na ǀhaodi tawa nî hōsa. Hebreǁîn 10:24, 25 sa khomai re sadu ra ǁkhāǁkhā khoe-i ǀkha. Tsî ǁî-e mîǃāba re tae-i ǃaroma i a ǃgâisa, i-i ǀhaode ǃoa ī. Ôasase ǁî-i ǀkha ǃhoa re tae-e du go ǀhaos ai a ǁkhāǁkhāsensa. ǁÎ-i ga sadu mati nē ǀhaodi xa ra tsâsa a mû o, o i ge ǁî-i tsîna nē ǀhaode ǃoa nî ī ǂgao. ǁÎ-i di ǂguro ǀhaos ai i nî hōǃâ xūn ge nau kerkhe gu ain ra mû tsî ǁnâu xūn xa nî mâǂoa. (1Kor. 14:24, 25) ǁÎ-i ge ǃgâi aiǁgaude ūhâ khoena nî ǀhao-ū ǁgae ǁkhān ana. Tsî nî hui nî na în ǁāǁnâhe. w20.10 10-11 ¶14-15

Elob di ǃanu gagab ge nî hui du î du Elobmîs ǃnâ du ra ǁkhāǁkhāsen xūna sadu di ûib ǃnâ ûiǂui. Psalmdi xoa-aob ge ǀgore khami du ǀgore re: “ǁKhāǁkhā te re, ǃKhūtse, sa daoba, tita ge sa amab ǃnâ nîra ǃgû; ǀguiǀgui re ti ǂgaoba, î ta sa ǀonsa ǃao.” (Psa. 86:11) Aiǃgû re Elobmîsa khomai tsî ǁkhāǁkhāsensa. Tsî nau ǂkhanin Jehovab ǁîb ǀapeǂhomis ǃnâ-ū ra mā du na. Ama as ge, ǂan ǂgaos ǀguisa du ge hî tama hâ. Amab a ǃkhaisa du ge ra ǂgom ǂgao tsî sadu di ûib ǃnâ ra sîsenǂui ǂgao. Jehovab di ǃanu gagab ge nî huidu î du ǁnāsa dī. Sadu di ǃgâsana du ge ra ǂkhâǃnâ ǂgao. (Heb. 10:24, 25) Tae-i ǃaroma? Sadu di omaris ǃân a amaga. ǀGore i Jehovab di ǃanu gagaba ǂgan îb huidu, î du ǂâibasensa ūhâ ǃgâi ǃereamde ǀhaodi tawa mā. Î du ǃgâise dī ǀhaodi tawa du ga ǃâ-e ūhâ tamas ka io ǃhoasa ga ra mā o. Nē xūna du ga dī o du ge Jehovab tsî ǁîb Ôab tsîna ra ǁgau, ǁîkha di “gūna” du a ǀnam ǃkhaisa. (Jhn. 21:15-17) ǁNā-amaga sadu kai ǁkhāǁkhā-aoba ǃgâ re. ǁÎb ra mā du gagasi ǂûna ūǃoas ǃnâ-ū. w20.10 24-25 ¶15-17

Jesuba tae-e ge dī, ǁîb di ǁkhāǁkhāsabegu gere ǂkhabuǂâi ǁaeb ai? ǁÎb di khâis khaoǃgâb ge Jesuba sao-aon ǁîb dina ge mîba: “Tā ro ǃao re; ǃgû î ti ǃgâsaga sī ǂhôa.” (Mat. 28:10) Jesub ge ǁîb di ǁkhāǁkhāsabega ge ǁnāxūǃnâ tama hâ i. ǁÎgu ge ǁîba xu a ǃkhoebē xaweb ge ǁîba ǁîga, “ti ǃgâsaga” ti ge ǂgai. Jehovab khamib ge Jesub tsîna ǀkhomxaǂgaoxa tsî a ǀûbaǀnamxa. (2Gao. 13:23) ǁNā-amaga da ge sida tsîna ǁnān hîna ge a aoǁnâ ǀūna kaise ra tsâba. Sida di ǃgâsan ge tsî da ge ǁîna kaise a ǀnam. Nē ǃgâsan ge Jehovaba ǃgarise gere sîsenba ǀgausa da ge ra ǂâihō. ǀNîn hîna nēsi ǃkhai hân ge ǂgui kurina ǃgarise ge sîsen. (Heb. 6:10) ǁÎna da ge kaise ǁkhore hâ. (Luk. 15:4-7) ǁNā-amaga da ge sida tsîna ǁnā ǃgâsan hîna ge ǀhaode ǃoa i ǀūna ra ǂhâǃnâ ǂgao în sī tsoatsoa. Tsîn ga ǁnā ǃgâsana ǀhaos tawa sī o, o da ge harase nî ǃkhōǃoa nî. w20.11 6 ¶14-17

Jakobub, Johaneb tsî ǁîkha mas tsîn ge Jesuba dī ǁoab a xū-e a ǂgan ob ge dī xū-i xa ǂâire. Îganǀgē tamaseb ge Jesuba ǁîna ge mîba ǁîb ǀhomsi ǁGûb ǀguib a mî ǁkhāsa tai-i ǁîb amǀkhāb tsî ǁareǀkhāb ai Gaosib ǃnâ nî ǂnûsa. (Mat. 20:20-23) Jesub ge ge ǁgau ǁîb ǃnubusigab a ǂansa. ǁÎb ge ǃgamǃgamsenxasiba ge ūhâ i. Jehovab xab dī kaihe tama hâ xū-eb ge ǁîba tātsē ge dī tama hâ i. (Jhn. 12:49) Mati da Jesub ge mā da ǃgâi aiǁgausa a ǁgae ǁkhā? Nētsēs xoas ǃnâ hâ ǁnamasa da ga sîsen-ū o, o da ge Jesub aiǁgaus ǃgamǃgamsenxasib disa ra ǁgae. ǁNā-amaga da ge khoe-e da ga ǀawemā-o sida ra ǂâi xūn ǀguin nî dīhesa tā nî ǂhâba. Tamas ka io da ge tā ǂâi tamase nî ǃhoa. Xawe da ge Elobmîs tsî sida ǂkhinin hîna Elobmîs ai a ǃgaoǃgaosan ǃnâ hâ ǁnamasa ǃoa khoe-e nî ǁnaeǁgau. Nēsa da ga dī o da ge ǃnubusiga da ūhâsa ra ǂanǃgâ. ǁNās ǀkha da ge ǃgamǃgamsen tsî Jehovab ra mā da ǁnamas hoaǁae sida dis xa a ǂhanusa ra ǁgau.—J.ǂHa. 15:3, 4. w20.08 11-12 ¶14-15

Sadu ǀhō-e du ga ra ǁnama ǂgao o, tae-e du ǂâis ǃnâ nî ūhâ? Sadu ǀhō i ǀkha du nî ǃhoas ais-ai dīsen re, ‘hoaǁae ta a “ǂhanu-ai”?’ Kaise ǂhanu-ai khoe-i ge nau khoe-e ra ǀgoraǃgâ, Jehovab ǀgaugu ais ose xawe ǁî-i digu ai. ǁÎ-i ge ǀkhomxaǂgao tama hâ. Sadu ǀhō-e du tae-i ǃaroma ra ǀapemāsa du ga ǂâi toas khaoǃgâ. Tsî du ga ǁî-i ǀkha ǃhoas di ǂhâsiba ga ra mû o, tae-i a ǃgomsisa ǁî-e mîba re tsî dîde dîre. Î-i ǁnâuǃā Jehovab mati dī î ra xū-i xa ra tsâsa. ǂÂis ǃnâ du ūhâ re, mî du ra xū-i ge Elobmîsa xu nî hā. Sadu ǀhō-e du ge ǀgoraǃgâ ǂgao tama hâ. Xawe du ge ǁî-e ra hui ǂgao, i-i ǁnâuǃā matib Jehovaba dī î ra xū-i xa ra tsâsa. (Rom. 14:10) Elobmîsa xu hâ gā-aisiba sîsen-ū re. Tsî Jesub di ǀkhomxaǂgaosiba ǁgae re khoe-e du ga ǁnama o. (ǂKhm. 3:5; Mat. 12:20) Tae-i ǃaroma? Jehovab ge nau khoena da ra hâ-ū khami sada nî hâ-ū.—Jak. 2:13. w20.11 21 ¶13

Khoen sadu kleuri, ī du a ǀgaub tamas ka io sadu soros kurusa ǀgaub ai nî ǀgoraǃgâ du ǃkhaisa du nî ǂhâba? Nēsa du ge ǂhâba tide. Kaise i ge a ǃgâi ǂansa Jehovab khoen a mû ǁkhā xūn ǃoa-ai ǀgoraǃgâ da tama hâsa. Aiǁgause, Samueli ge Jessib ǀgôaga ǃoa gere kō o, ob ge Jehovab gere mû xūna ge mû ǁoa i. Jehovab ge Samuela ge mîba ǀgui ǀgôab Jessib dib nî Israeli di gao kai di. Xaweb ge ge ǀū-i mâb a ǃkhaisa. Samueli ge Jessib di kai ǀgôaba mû o, ob ge, “amase, ǁîb ge a ǃKhūb di, ǁîb di ǂkhauǀkhāsabe, ti ge mî.” Eliab ge gao-i khami gere mûsen. Xaweb ge Jehovaba Samuela ǃoa ge mî: “Tā īsib âba kōǀî tsî gaxub soros âb diba, tita ge ǁîba aoxū hâ xuige.” Tae-e da ra ǁkhāǁkhāsen? Jehovab ge aiǃgû tsî ra mî: “Khoe-i ge mûdi aiǃâ hâna ra kōǀî, xawe ǃKhūb ra ǂgaoba kōǀî xui-ao.” (1Sam. 16:1, 6, 7) Jehovaba da ge ra ǁgae ǂgao sada ǃgâsan ǁkha da ra hâ ǀgaub ǃnâ. w20.04 14 ¶1; 15 ¶3

Jesub ge ǀnîsi ǃhoro ǃhanagu hîna gere kai tsoatsoagu ǁaegu gere ǃgûmâ. (Jhn. 4:3-6) Nē ǃhanagu ge haka ǁkhâgu khaoǃgâ ǀgui nî ǃgaohe. Jesub ge supuse ǁnâuǃāhe tama hâ xū-e ge mî: “ǃGapakhâi, î ǃhanaga kōǀî, ǀnai gu kom go ǃurio, ǃgaohe gu nîse.” (Jhn. 4:35, 36) Nēs ǀkhab tae-e gere ǂâibasen? Jesub ge nēsa khoena ǀhaoǀhaos ǁgauǁgaus ase ge sîsen-ū. Tae-i ge īsa ǃoa kō re. Jodeǁîn ge dīxū-e Samaritanǁîn ǀkha ūhâ tama hâ i xaweb ge Jesuba Samaritanǁî khoesa ge aoǁnâba tsîs ge ǁîsa ge ǃgâ. Jesub ge ǃgaohes amsi ‘ǃuri’ ǃhanagu xa gere ǃhoa ǁaeb ain ge. ǂNubis Samaritanǁîn hîna Jesub xa Samaritanǁî khoesa xu ge ǁnâuna. Jesuba ǃoa ge ǃgoaxa i în ǁîb xa ǃnāsa xūna ǁkhāǁkhāsen. (Jhn. 4:9, 39-42) Elobmîs ôaǃnâ-aob ǀguib ge ge mî: “Nē khoen ge ǃhaese Jesuba ǃoa a hā ǃkhais ge ra ǁgau ǃhanab ge ǃgaohes amsi ǂhanu i ǃkhaisa.” w20.04 8 ¶1-2

Sida ǀhaodi ge ra huida. Î da ǃgâi aoǁnâ-ao kai ǁkhā. Aiǁgause da ge ǁkhāǁkhās boksis ǃnâ hâ ǂkhanina ǃamku ǀgaub ǃnâ a sîsenū ǁkhā. ǁNā-amaga ǃamkuse aiǂhomisen re ǀhaodi ǃaroma. ǀHaos tawa ǃamkuse ǃgâ re. ǀHaos ai du go ǁkhāǁkhāsen xūna sîsenǂui re. ǁNāna du ga dī o, o du ge nî Jesu Xristub di ‘ǃgâi ǃkham-ao’ kai. (2Tim. 2:3) Hoada ge miliundi ǀgaisa ǀhomǃgāgu xa ra huihe. ǂÂi re ǀgui ǀhomǃgāb a dīǁkhā xū-e. (Jes. 37:36) Nēsi ǂâi re tae-e gu ǂgui ǀhomǃgāga a dīhō ǁkhāsa. Khoe-i tamas ka io demongu ge Jehovab di ǀgaisa toroǃkham-aoga a dā ǁoa. Jehovab ge hoaǀgaixa. Tsîb ga ǁîba sida ǀkha hâ o. O da ge ǁnān hîna sida ra mâǃoan xa a ǀgaisa. Matikōn ga xawes tsîna. (ǂHǂh. 6:16) ǂGom ǁkhā da ge a nēs a amasa. ǁNā xūn xa du ga ǂâi o du ge nēsi i ga, skol ǀhōsan, sîsen ǁare-aon. Tsî ǁnān hîna Jehovab ǃnâ ǂgom tamana ǁgai xūna a mî o, ǂkhabuǂâi tide. ǂÂi hō re ǀguri du ge hâ tama nē ǃkhams ǃnâ. Jehovab ge ra daoǁgau du. w21.03 29 ¶13-14

Apostel Paulub ge ǀnîsi Jesajab 22:13 sa xū nē mîde ge hîǂui hîna ge Israelǁaes ge ūhâ i ǂâiǀgaub xa gere ǃhoade. ǁÎn di ǀnammi Eloban ūba hâba ǀgaiǀgai tama i tsîn ge ǁîna ǃgâi ǁaeba ūhâs ai ǁîn ǂâisa gere ǂnûi. ǁÎn ge gere mî nēsin ge ǃgâi ǁaeba nî ūhâ mâǁaes ǀamsa nî hâ ǃkhaisan a ǀū amaga. “Nētsē hâ tsî ǁari a ǀkhai,” ǂAn da ge a Jehovab khâisa nî māda ǃkhaisa. ǁNā-amaga da ge haman ǀkha da ra hâ ǃkhaisa nî kō. Korintes ǃnâ gere hâ ǃgâsan ge ǁnān hîna khâis ǃnâ ǂgom tama hâ khoen ǀkha hâsa xū nî ǂgōsen. Nēsa xū da ge sida tsîna nētsē ra ǁkhāǁkhāsen. Kai ǁaeba da ga ǁnâ khoen hîna tae-i hānîǁaeb ai nî īs ǃnâ ǂgom tama hân ǀkha ga ra hâ o. Tamas ka io ǁnān hîna ǃgâiǁaeb ǀguiba ūhân ǀkha ga ra hâ. Os ge nēsa ǃgâi tama sîsen ǂuiba sida ai nî ūhâ. Xristeǁî i ga ǃnāsa ǁaeba nēti i khoe-i ǀkha ga ra hâ o i ge ǁî i tsîna ǁî i ūhâ ǃgâiǀgauga nî ǂoaǃnâ. Nēti i khoe-i ge Elob ǃkhui hâ xūna ǁî-e a dī kai ǁkhā. ǁNā-amagab ge Pauluba ge mî: “Î du ǀguia ǂhanuse ǂkhaikhâi, î du tā ǁore.”—1Kor. 15:33, 34. w20.12 9 ¶3, 5-6

Jehovab ǁîb omaris hîna ǀhommi tsî ǃhūbaib ai hâsa. ǀGoraǂgā hâ ǀgausas ge nē xoasa ra ǃgāsa kai. Danasis ge ǀgam xūna ǃkhōǂgā hâ. ǀNî xūna dīs di ǀgaib tsî ǃereamsa tanis. Jehovab ge a hoada “di dana.” Tsîn ge ǁîb ôan hoana māhen hâ ǀgaiban ra sîsenū ǀgaub ǃgao. ǁÎb tawa nî ǃeream. (Rom. 14:10; Efe. 3:14, 15) Jehovab ge Jesuba mā-am hâ îb ǀnî xūna ǀhaohâb ǃnâ dī. Xaweb ge Jesuba sidab ra hâ-ū ǀgaub ǃgao Jehovab tawa nî ǃeream. (1Kor. 15:27) Jehovab ge oms aob tsîna ǀgaiba mā hâ. Îb ǁîb taras tsî ǀgôan tsîna xūna dī kai. ǃGâi oms dana kai ǂgaob ga ra o, ob ge aorekhoeba aibe nî ǂan. Tae-eb ǁîba nî dīsab Jehovaba ra ǂhâbasa. Tsîb ge nî ǁnâuǃā tae-i ǃaromab ge Jehovaba danaga a ǂnûiǂgāsa. Tsî matib Jehovab tsî Jesub di aiǁgausa xu a ǁkhāǁkhāsen ǁkhāsa. Tae-i ǃaromab aorekhoeba nē xūn hoana nî ǂan? Jehovab oms danaga ǃereamsa mā hâ amaga. ǁÎb ge nē sîsen-i ǃamkuse nî dīhesa ra ǂhâba.—Luk. 12:48. w21.02 2 ¶1-3

Jehovaba da ge ra ǁgae ǂgao ǀnî xūna ǀurus ǃaroma. Aiǁgause, Jehovab ge xū-e ǀuru tama is ǁkhāsiba ūhâ xaweb ge ǃhausen da ga o, o sada ǁorena ǀûba tsî ra ǀuru. (Psa. 25:7; 130:3, 4) Tsîb ge ǁkhā xū-e da nî dīsa ra ǂhâba nau khoen ga sida ra tsûtsû xū-e dī xawe a ǃhausen o. (Mat. 6:14; Luk. 17:3, 4) Sada di ǀō-aisa ǀkhaeb ǂkhûs diba da ra ǃgôaǃgâ ǃkhaisa da ge a ǁgau ǁkhā. Nēsa ge kuruba ǃgôasiba ra ǁgau ǀgaub ǃnâ sada ǂkhûsa sîsen-ūs ǃnâ. ǀNî khoen ge ǁîn ǂkhûsa ǁîn ǃgâib ǃoa ǀgui ra sîsen-ū tsî aitsama ra mîǁgui tae-i ǂhanu tsî ǂhanu tamasa. Xawe Jehovab a sada di kuru-ao amaga gu ge ǁîb di mîǁguigu tae-i ǂhanu tsî tsūs diga sida digu xa a ǂhanu-ai. (Rom. 12:1, 2) Jehovaba da ga ǁnâuǀnam o, o da ge ǂkhîba ra ūhâ. (Jes. 48:18) Tsî da ge ra ǁkhāǁkhāsen Jehovab tae-e sada xu ra ǃâubasensa tsî nēs ǃnâ-ū sada kuru-ao tsî ǁGûba ra ǂkhîǂkhî.—ǂKhm. 27:11. w20.05 23-24 ¶13-14

Mati da ǃgam ǀnamma. Sida ǃgâsan ǃoagu nētsē a ǁgau ǁkhā? Sida di ǃgâsana da ga ǃgâise ga ra ǂan o. O i ge supu ǁîna ǁnâuǃā. Tsî ǁîna ǃgam ǀnamma ǁgausa. Khoe-i di kuri-i tsî khaoǃhū-i ge xū-e ǀkharaǀkhara tama hâ. ǂÂihō re Jonatanni ge Davib xa 30 kurina kai i ǃkhaisa. Xaweb ge ǀgū ǀhōsagusisa ǁîb ǀkha ge omkhâi. Kurin ǃnâ kai khoen ǃnâ ǃgâiǃgâibasen-e ūhâ i du nî. Tamas ka io sadu xa a ǂkham i ǃnâ? Nēsa da ga dī o, o da ge ‘ǃgâsasiba ǀnamma’ ra ǁgau. (1Pet. 2:17) ǃGam ǀnamma da ga ūhâ o. O i ra ǂâibasen ǀguitikōse da ǀhaohâb ǃnâ hâ. ǃGâsan hoan ǀkha nî ǀhōsagusa? Hî î, ǁnās ge īǁoa. Sida ra dī xūn xa. ǃGâibahe khoen ǀkha hâs. Xa da ge sida tsîna a ǃgâibahe. Jesub ge ǁîb di ǁkhāǁkhāsabega ‘khoegu.’ Tamas ka io ti ǀhōgu ti ge ǂgai. Xaweb ge ǀgū ǀhōsagusisa Johaneb ǀkha ge ūhâ-i. (Jhn. 13:23; 15:15; 20:2) Xaweb ge Jesuba hoa apostelga ǀgui ǀgaub ǃnâ gere hâ-ū.—Mrk. 10:35-40. w21.01 23 ¶12-13

Apostel Paulub ge Jodeǁînab sinagogegu ǃnâ gere aoǁnâba khami Atenes ǃnâ ge hâ i ǀūbeǁaes khoena ge aoǁnâba tama hâ i. ǁÎb ge ǁîn ûiǀgaub tsî ǁîn ra ǂgomǃnâ xūn ǃoas tsîna ǃgâise gere kō. (ǃNǃkh. 17:23) Saoraseb ge Pauluba ǁîb tsî ǁîn ǁaegu ǃgûǀhaora xūna gere ôa. Nēs ǃaromab ge Pauluba ǁîb di aoǁnâ ǀgauba ge ǀkharaǀkhara. ǁÎb ge Ateneǁîna ge mîba ǁîb haisi ams ‘ǂansa tama Elob’ hînan ra ǃoababa xu ra hā ǃkhaisa. Nē ǀūbeǁaes khoen ge xoade ǃgâise ǂan tama hâ i xaweb ge Pauluba nēs xa ge ǂkhabu ǂâi tama hâ i. Xaweb ge ǁîna ǃgaohes amsi ǂhanu ǃhorob khami gere mû tsî ǁîb aoǁnâ ǀgauba ge dawa. Paulub khami ǃgaoǃgâxa re. Sadu ǂharis ǃnâ hâ khoen ra ǂgom xūna nî ǃgāsa kai xūna ǃoa kō re. Oms khoe-i hâ ǃkhaib tsî ǁî-i audos tsîna mati ī? ǁÎ-i ǀons, sara ana ǀgaub, tsî ǃhoaǀgaub tsîna ǁî-i ra ǂgomǃnâ xūn xa tae-e ra mî? w20.04 9-10 ¶7-8