Oktoberi

Jesuba da ga ra ǂan o da ge ǁîb ǀgauga nî ǁgae. Jesub ǂâiǀgaub tsî tanisen ǀgauba da ga ǂan o, o da ge ǃgâi ǀhōsagusisa ǁîb ǀkha nî ūhâ. Mati da Jesuba a ǁgae ǁkhā? ǀGui aiǁgausa ǃoa kō re. Jesub ge nau khoena huisa ǃoa ǃnāsa ǁaeba gere mûǂui aitsama ǂkhîǂkhîsens xa. (Mat. 20:28; Rom. 15:1-3) Nē tanisen ǀgaubab ge ūhâ i amagab ge hoaǁae ge huiǀnamxa i tsî gere ǀûba. ǁÎb ge supuse khoen gere mî xūn xa ge ǁaixa kaihe tama hâ i. (Jhn. 1:46, 47) Tsîb ge khoen ge ǃkharu ge ǁae dī xūn ǁîn ǃoa-aib ūhâ tanisen ǀgauba nî ǀkharaǀkhara ǃkhaisa ge mâ-am tama hâ i. (1Tim. 1:12-14) Jesub ge ge mî: “Nēs tawan ge hoana nî mûǂan, ti ǁkhāǁkhāsabe go asa, ǀnamguba go ga sago ǃnâ ūhâo.” (Jhn. 13:35) Tae-i amsi du dîsen tama hâ, “Jesub aiǁgausa ta ra ǁgae hoa xūna ti ǀgaib ǃnâ dīsa i ta ǂkhîba ti ǃgâsan ǁaegu ūhâ?” w20.04 24 ¶11

Jehovab ǀonsa ra ǀuriǀuri khoen xa ǀoa hâ ǃhūbaib ǃnâ du ûi hâ. Xawe du ge amaba a ǃhoa ǁkhā. Jehovab a ǃanu, ǂhanu-ai, ǃgâi tsî ǀnamxaǃnâsa du ge khoena a mîba ǁkhā. ǁÎb nî sadu ǂgaeǂgui-ao ǃkhaisa du ǂhaba hâ ǃkhaisa ǁgau re. Khoena da ge a hui ǁkhā în ǁnâuǃā Jehovab ǂgaeǂguis. ǀGuis a ǂhanu-ai tsî ǃnōrasasib tsî ǂkhîb tsîna ǃhūbaiba nî hauba ǃkhaisa. (Psa. 37:9, 37; 146:5, 6, 10) Khoena da ga Elobmîsa ǁkhāǁkhā ǁaeb ai da ge Elob ǂhanub ǂgaeǂguis diba ra ǁguiǃā. Jehovab ǃhūbaiba ǂgaeǂguis aiǂhanuba ūhâ ǃkhaisa. Nēs ge a ama. Jehovab ǃgâi ǀgauga da ge ra ǁguiǃâ ǂgao. Tsî ǀons tani-aob a tae ǃnôa khoe ǃkhais tsîna. (Jes. 63:7) Nē ǀgaub ǃnâ da ga khoena ǁkhāǁkhā o, o da ge nî hui nî. În Jehovaba ǀnam tsî ǁnâuǀnam ǁîb ǃoa-ain ga ǂhauǃnâse hâ ǂgao, o. w20.06 6 ¶16; 7 ¶19

Khoe-i ǂkhûs ge buruxa ǀgaub ǃnâ a kurusa. ǁHās ǃnâ du hâ hînas ge sadu ǂkhûsa xoa ǁguibahes hâ ǀgaub ai ra kurusen. Tsî gu ge ǀoadisidi ǂkhuruga mâ haib hoab ǃnâ ra ǀarosen. Ôaǃnâ-aogu ge ra mî kai hâ khoe-i ǂkhûs 100 biliuns ǀgūse hâ ǂkhurun hîna neurons di ra ǂgâihena ūhâ di. Nē ǂkhurugu hîna 1.5 kg gu ge sada ǂkhûsa ra kuruǂui. ǀGui mâǂoa ra xū-i hînas ǂkhûsa dī-e ǃoa kō re. ǃHoa da ga o i ge, mâ mîs hîna da ra mîs hoasa sada ǂkhûsa nami, dommi, amǁgaukha, ǃnanigu tsî ǁkhâib tsîna ra sîsen-ū. Nē xūn hoan hîna da go mîn ge ǀgui ǁaeb ai nî sîsenǀhao mîhe ra xū-e da ga ǁnâuǃā ǂgao o. 2019ǁÎ kurib ǃnâ ge ǁgâihe ǂkhanib gera mî ǀgôaron ǀasa mîna ǃhaese ra ǁkhāǁkhāsen ǃkhaisa. Nē ôaǃnâs ge ra ǂanǃgâ sada ǀasa gowaga ǁkhāǁkhāsens ǁkhāsib ǀkha kuruhe hâ ǃkhaisa. Amaba da ga mî o, sada ǃhoas ǁkhāsib ge ǀkhaeba Eloba xu. w20.05 22-23 ¶8-9

Abrahammi ge ǁkhoaxa ûib hînab ge Urs ǃnâ ūhâ ība xūmâi tsî ge doe. Tae-i ǃaroma? ǁÎb ge ‘ǃās ǃgaoǃgaoba ūhâsa’ ǃâu hâ i amaga. (Heb. 11:8-10, 16) Abrahammi ge ǃâu hâ-i ǃās ge a Elob di Gaosi. Jesub Xristub tsî 144 000 ǂkhauhesa Xristeǁîn ge ǁnā Gaosiba ra kuruǂui. Paulub ge nē Gaosiba ‘ûitsama Elob di ǃās, ǀhomsi Jerusalems’ di ge ǂgai. (Heb. 12:22; J.ǂHa. 5:8-10; 14:1) Jesub ge ǁîb ǁkhāǁkhāsabe ga ge ǁkhāǁkhā îgu nē Gaosib di hāsa ǁîgu ǀgoredi ǃnâ ǂgân, îb Elob ǂâisa ǃhūbaib ai īkai ǀhommi ǃnâs ra īs ǁkhās khami. (Mat. 6:10) Elob Gaosib nî sîsen ǀgauba Abrahamma ǂan i ge i? Hî-i. Nē ǂans ge ǂgui kuriga “ǂganǃgâsib” ǃnâ ge ūhâ-e hâ i. (Efe. 1:8-10; Kol. 1:26, 27) Xawe Abrahammi ge ge ǂan-i ǁîb suriba xu-i gaoga nî ǂoaxa ǃkhaisa. Nēsab ge Jehovaba ǀnai ge mîmaibabi hâ i.—Gen. 17:1, 2, 6. w20.08 2-3 ¶2-4

ǂGomsa xu ǁnāǁgôa hâ khoen di ǂâiǀgauga xu da ge nî ǂgōsen. Xristeǁî ǀhaohâb ge tsoatsoasa xub ge ǁGâuaba îganǀgē kaira ǂâide Elob di ǂgomǂgomsa khoen ǃnâ ra ǃhana. ǁNā-amaga da ge nî mûǃā, tae-i a ama tsî tae-i a ǂhomi ǃkhaisa. Sida ǃhui hâ khoen ge internets ain ra ǃnâo vidion, foton tsî ǁnapan ra xoa xūn ǃnâ ǂhomiba ra ǃhoa. Î da tā Jehovaba ǂgomǃgâ tsî sida di ǃgâsana ǀnam. Nē ǂhomib ge ǁGâuaba xu ra ǀkhī. Tā nē ǂhomiba ǂgom. (1Jhn. 4:1, 6; J.ǂHa. 12:9) ǁGâuab di ǁnāǂamde da ga māǃoa ǂgao o, o da ge Jesub tsî ǁîb Elob di ǂâibasens ǃnâ ra ǀhuru ǃâb ǃnâ ǂgomǃgâsiba nî omkhai. Tsî da ge Jehovab ǁîb ǀapeǂhumisa gu nî ǂgaeǂguiga ga ra sîsen-ū khoegu tsîn ǀguina nî ǂgomǃgâ. (Mat. 24:45-47) Elobmîsa da ga ǃnâs hoasa ôaǃnâ o da ge sida ūhâ ǂgomǃgâsiba ra omkhâi. Os ge sida ǂgomsa hais hîna ǃgamse ǃhūb ǃnâ ra ǂgâ ǃnomaga ūhâs khama nî ī. Apostel Paulub ge ǁkhā xū-e ge mî nētsēs xoas ǃnâ. w20.07 23-24 ¶11-12

ǀOasa kurusa ūhâ tama hâ khoen ase da ge hoada, khoena mû da ra xūna xu ǀgoraǃgâs ǃgomsiba ūhâ. (Jhn. 7:24) Xawe da ge kaise ǀoro xūna mûs da mû xūna xū a ǂanǂui ǁkhā. Aiǁgause, ǂansa ūhâ ǀaeǃkhō-aob ge ǂgui xūna ǀaesen hâ khoe-e kōsa xū ǂanǂui tide. Nē khoe-i tae ǃgomsi-e ūhâsa ǂanǂuis ǃaromab ge ǃgâise ǃgâ tsî mati i ra tsâ ǃkhais tsîna nî ǂanǂui. ǀAeǃkhō-aob ge ǀnîsi X-ray i tsîna a dī kai ǁkhā nē khoe-i ǂgānagaba mûs ǃaroma. Nēsab ga dī tama io, ob ge ǂhanu tama sōǀôana a mā ǁkhā. ǁKhā ǀgaub ǃnâ da ge sada ǃgâsana ǁîna ǃoa kōs ǀguisa dīsa xu a ǁnâuǃā ǁoa. ǃAugab īsiba ǃoa ǀgui tā kō re. Xawe dītsâ re ǁîna ǁnâuǃāsa. ǁÎn ǂgaoga da ge a khomai ǁoa. Xawe da ge a ǁgūtsâ ǁkhā Jehovaba ǁgaesa. ǁÎb ǃoaba oanab ge ra ǃgâ. ǁÎb ge ǁîn khaoǃhūgu tsî mâsib tsîna ǃoa ra kō. Tsîb ge ǁîna tsâbaǁhaoxasiba ra ǁgau. w20.04 14-15 ¶1-3

ǃGamǃgamsensa da ge nî ǁkhāǁkhāsen, ǀgapiǂâixa khoen “ǀgaus ǀkha gā-ai” tama amaga. ǀGapiǂâixa khoe-i ge a ǃgaridana tsî ǁî-i xa ǀgui ra ǂâi. ǁÎn ra ǂâi ǀgaub tsî dīn ra xūn tsîn ge ǁîn tsî nau khoen tsîna ra tsûtsû. ǁÎn ǂâiǀgauban ga dawa tama i o, os ge ǁîn ǂâisa ǁGâuab xa a ǂgaeǂhabu-e ǁkhā. (2Kor. 4:4; 11:3) ǃGamǃgamsen hâ khoe-i ge ǀnōsa ǂâi ǀgauba ūhâ. ǁÎ-i ge ǀnōsa ǀgaub ǃnâ ra mûsen tsî nau khoen ǂgui ǀgaugu ǃnâ ǁî-i xa a ǀgapi ǃkhaisa ra mûǂan. (Fil. 2:3) Elob “ǃguriǂgaoxana ra mâǃoa, xaweb ra ǃgamǃgamsensana ǀkhomma mā” ǃkhaisa ī ge a ǂan. (1Pet. 5:5) ǀNōsa ǂâi ǀgauba ūhâ khoe-i ge, Jehovab di khākhoe kai ǂgao tama. ǃGamǃgamsen da ga ra o, o da ge Elobmîs ǃnâ hâ ǁnamas “ǀoro khoeba ǁîb di dīgu ǀkha ǁhûǁnâ, î du ǀasa khoeba ana” ti hâsa nî ǁnâuǀnam. Jesub aiǁgaus xa ǁkhāǁkhāsen tsî da ge ǁîba nî ǁgae ǁkhā da as kōse.—Kol. 3:9, 10; 1Pet. 2:21. w20.07 7 ¶16-17

Jehovab di ǀhaohâb di ǃâda a ǃkhais ge kaise a kai aiǂhanu. Kaise da ge ra ǃgâiaǂgao tsîda ge ǂkhîb ǃnâ sada ǃgâsan ǀkha ǀhaohâb ǃnâ Jehovaba ra ǃoaba. Sado mâ ǃâ-e ra ǀhuru ǀhaohâb ǃnâ? Apostel Paulub ge ǀhaohâba khoe-i soros ǀkha ge ǀgopeǀnō. ǀHaohâb di ǃgâsan tsînab ge soros di ǁanin ǀkha ge ǀgopeǀnō. (Rom. 12:4-8; 1Kor. 12:12-27; Efe. 4:16) ǀGui xū-i hîna da Paulub ǂkhōsa xu ra ǁkhāǁkhāsen i ge Jehovab omaris ǃnâ da hoada ǂhâǂhâsa ǃâba ra ǀhurusa. Paulub ge nē ǂkhōs xab ge ǃhoa o, o nēti ge tsoatsoa. “ǀGui soros ǃnâ da ǂgui uniǁaede ūhâ khami, tsî hoa uniǁaedi ǁkhā sîsenna ūhâ tama khami, ǁnās ǁkhās khami da ge ǂguida a ǀgui soro, tsî ǀguiǀguibe da ge nē-e, nau-i di uniǁae.” (Rom. 12:4, 5) Pauluba tae-e gere ǂâibasen? Hoada ǃkharagaǃnâgu ǃâga ǀhaohâb ǃnâ ra ǀhuru xawe i ge mâ khoe-i hoa-e kaise a ǂhâǂhâsa. w20.08 20 ¶1-2; 21 ¶4

ǁGûdo, mati du Jehovab di ǃgamǃgamsenxasiba a ǁgae ǁkhā? ǀNî ǁaegu ai sadu ǀgôana dî re mati-i sîsen-e a dī-e ǁkhāsa. ǁÎn ǂâiǀgaub ga sîsen o ǁnāsa sao re. ǁÎba ra ǃoaba khoen ga ǃgôasib ǃnâ ǁîba dîna gere dî ob Jehovaba ge ǃnūǃnâxa i. ǁÎb ge ǃgâi aiǁgausa ge mā da. Jehovab ge Abrahamma ge ǃgâ Sodoms tsî Gomoras nî hîkākāhe ǀgaub xab ǃgâibahe tama tib gere mî-o. (Gen. 18:22-33) Abrahammi taras Saras ǃoa-aib ge Jehovaba a tanisen ǀgaub xa ǂâi-oa re. ǁÎs kairasis ǃnâ ǀgôa-e nî hō tis ge mîbahe. Os ge ǁîsa a âi ob ge Jehovaba ǁîs ǀkha ge ǁaixa tama hâ i. (Gen. 18:10-14) Xaweb ge ǁÎba ǁîs ǀkha ǃgôasib ǃnâ ge ǃhoa. ǁGûn tsî ǀhaohâb ǃûi-aogu tsîna Jehovab aiǁgausa xu tae-e a ǁkhāǁkhāsen ǁkhā? ǀGôa-i tamas ka io ǀhaohâb ǃnâ hâ khoe-i ga sats go dī mîǁguib ǀkha ǂkhîǂâixa tama iots mati ra dī? ǃHaesets ǁî-i a tsū ǃkhaisa ǁî-e ra mîba? Tamas ka iots ǁî-i ra ǂâi ǀgauba ra ǁnâuǃā ǂgao? Omaridi tsî ǀhaohâgu ge kaise nî ǀama ǁnān hîna ǀgaiba ūhân ga Jehovab ǁîb ǀgaiba ra sîsen-ū ǀgauba a ǁgae-o. w20.08 10 ¶7-9

Tae-e da Pauluba xu a ǁkhāǁkhāsen ǁkhā? Jehovab khoen ǀkha da ge ǀhûǀhao tsoatsoa o, o da ge gere mûǂan nau khoena xu da huiba ǂhâ hâsa gagasise da ge ǂkhabusa i amaga. (1Kor. 3:1, 2) O nēsis? Nēsi da ge Jehovaba kurina ǃoaba hâ tsî sida ǂansa omkhâi hâ tsî da ge huiba ūǃoa ǂgao tama hâ. ǃGōsase sida xa ǀoro kurina ǃoaba hâ khoe-e xu. Xaweb ge Jehovaba ǀnî ǁaegu ai ǃgâsana ra sîsenū sida ǀgaiǀgaisa. (Rom. 1:11, 12) Jehovaba xu da ga ǀgaiba ǂhâba o, o da ge huiba sida ǃgâsana xu nî ūǃoa. ǃGâi xuna dīs ge sadu ǂurusib, skol ǂgâs, maris tamas ka i o khaoǃhūba xu hâ tama hâ. Xawe ǃgamǃgamsensa xu tsî Jehovab ai ǂgomaiǂnûisa xu hâ. Hâ re î da hoa da (1) Jehovab ai ǂgomaiǂnûi, (2) Elobmîs aiǁgaude xu ǁkhāǁkhāsen tsî (3) sida ǃgâsana xu huiba ūǃoa. Tsî da ge matikōse da ga ǂkhabusase tsâ xawe Jehovab xa nî ǀgaiǀgaihe. w20.07 14 ¶2; 19 ¶18-19

Kaise i ge a ǃgombada ǁkhā ǃnūǃnâxasiba ūhâsa, sida di omaris ǁanina da ga aoǁnâba o. Aoǁnâ-aob 3:1, 7 ǃnâ hâ tsoatsoas ge a huida ǁkhā. ǁNāpa i ge ra mî: “Mâ xū-i hoa-i ge ǁî-i di ǁaeba ūhâ . . . ǁaeb ǃnōsase hâs dib, tsî ǁaeb ǃhoas dib.” Sida di tanisen ǀgaub ge sida di omaris ǁanina a hui ǁkhā, în sida ga ǁîna aoǁnâba o ǃgâ. (1Pet. 3:1, 2) Hoa khoen ǀkha da ge ǃnūǃnâxase nî tanisen sida di omaris ǁanina ǃkhōǂgāhâse, ôasase da aoǁnâ tsî ra ǁkhāǁkhā hîna. ǃNūǃnâxasiba da ge nētsē ûi hâ khoen tsî Elobmîs ǃnâ xoahe hâ khoena xu ra ǁkhāǁkhāsen. Habakuki ge eloxoresasib nî ǀam ǁaeba ǃoa gere mûǂui tsîb ge ǁîba ge mî: “Tita ge ti ǃûiǃkhais ai nî mâ.” (Hab. 2:1) Apostel Paulub ge ǁîb di aoǁnâ sîsen-e gere “dīǀoaǀoa” ǂgao xaweb ge ǃnūǃnâxase ge ǃâu tsî ge mî: “ǃGâiǂhôas Elob ǀkhommi disa ta nî aoǁnâ.”—ǃNǃkh. 20:24. w20.09 11-12 ¶12-14

Jehovab ǀguib Jesub xa a ǀgaisa xaweb ge Jesuba ǀgapiǂâixa tama hâ. Jesub aiǁgausa ǁgae tsîn ge ǃgamǃgamsen hâ ǃoaba-aona khoena a ǀnam. Tsî Jesub ge ge mî Jehovaba ǂhanuse ra ǃoaba khoen nî ǀnamgu ǃkhaisa. (Luk. 9:48; Jhn. 13:35) Tae-e du nî dī ǀhaohâb ǃnâ du ga ǃgomsina mû o tsî du ga ǀhaohâb ǃûi-aogu xū-e dī tama khama a tsâ o? Nē xūn xa ǃhoamâ tama ī tsî da ge ǃgamǃgamsen tsî sida aiǃgû-aoga nî ǂkhâǃnâ. (Heb. 13:17) Nēsa du ga dī ǂgao o dîsen re: ‘Nē ta ra mû ǃgomsina ǁnātikōse a kai? Nēpa a ǃgâi ǁae ǁîna hî-ūnus tiba? Tita nē ǃgomsina hî-ūnusa mā-amhe hâ? Amabes ǃnâ ǀguiǃnaxasiba ta ǀhaohâb ǃnâ ra omkhâi, tamas ka io ta tita a ǂhâǂhâsa ǃkhaisa ra ǁgau ǂgao?’ Jehovab ge ǃgamǃgamsenxasib tsî ǀguiba sîsensa ǀgapise ra ǃgôa, ǁkhāsib tsî xūna ǃamkuse dīs xa. ǁNā-amaga Jehovaba ǃgamǃgamsen hâse sîsenba re. Nēsa da ga dī o, o da ge ǀguiǃnâxasiba ǀhaohâb ǃnâ nî omkhâi.—Efe. 4:2, 3. w20.07 4-5 ¶9-11

Jesub ge eloǃaoǃgâxa taradi hîna ge “ǂgui xūn âdi ǀkha gere ǃoaba” bi de kaise gere ǃgôaǃgâ. (Luk. 8:1-3) ǁÎb ge ǁîde ǂhâǂhâsa amaba Elob ǂâisa xu ge ǁkhāǁkhā. Aiǁgauseb ge ǁîde ge mîba ǁō tsîb nî khâisa. (Luk. 24:5-8) Tsîb ge ǁîb di apostelgab ge aiǂhomi khami ǁîdi tsîna hā nî ǃgomsib ǃgao ge aiǂhomi. (Mrk. 9:30-32; 10:32-34) Jesub ge ǃkhōsis ǃnâ ūhe o gu ge ǀnî apostel ga ǁîba xu ge bē. Xawe di ge ǀnî tarade ǁîb ǀgūse ge hâ, ǃgâuhaib aib mâ hîna. (Mat. 26:56; Mrk. 15:40, 41) Tarekhoedi ge ge ǂguro i ǁîb di khâise ge mûde. ǁÎb ge nē tarekhoede ge mîba, îdi ǁîb di apostel ga mîba ǁōba xub ge khâisa. (Mat. 28:5, 9, 10) Tarekhoedi ge Pinkster 33ǁî kuri ǀnîsi ǁnapa ge hâ-i, ǁîb di ǁkhāǁkhāsabegab ge ǃanu gagab ǀkha gere ǂkhau-o. Tsîn ge ǁnapa ge hâ i khoen hoana ǀkhara gowagu ǃna gere ǃhoa. Tsî khoena ‘Elob di kai dīgu’ xa gere mîba.—ǃNǃkh. 1:14; 2:2-4, 11. w20.09 23 ¶11-12

Aoǁnâ sîsenni ge ûiba ra sâu sîsen-e. Mati da nēsa a ǂan? Jesub ge Mateub 28:19, 20 ǃnâ māsa mîde a mā ob ge ge mî: “Î go ǁîna ǁāǁnâ.” Mati kōses ǁāǁnâsa a ǂhâǂhâsa? ǀAmo ûiba da ga ra ǂhâba o, o da ge nî ǁāǁnâhe. ǁĀǁnâhe ǂgao ra khoe-i ge ǂgomsa nî ūhâ. ǀAmo ûiba i ge, Jesub ge a ǁōbada tsî a khâi ǃkhais ǃaroma ǀgui a hō ǁkhā ǃkhaisa. ǁNā-amagab ge Apostel Petruba ǁîb ǀkha ǀguiba ra ǃoaba Xristeǁîna ge mîba. ‘ǁĀǁnâs ge sada nēsi ra ǃgâiǃō kai, Jesub Xristub di khâisa xū.’ (1Pet. 3:21) ǁNā-amaga i ge ǀasase ra ǁāǁnâhe khoe-e ǃâubasensa ūhâ ǀamose ûis dīsa. Aoǁnâ da ga ra o, o da ge “nî ǃgâi ǁkhāǁkhā-ao kai.” (2Tim. 4:1, 2) Tae-i ǃaroma? Jesub ge ‘ǃgûǂoa i ǁîna ǁkhāǁkhā’ ti a mîmāda amaga. Apostel Paulub ge ge mî: Nē sîsenni ǃnâ “hâhâ. Nēnats ga dīo, ots kom sa-aitsama tsî ǁnâu tsi ran tsîna nîra ǃgâiǃō kaio.” w20.10 14 ¶1-2

ǁKhāǁkhāsabeb Petrub ge ǁauna ǃkhōsa kaise ge ǀnam i tsîb ge khoenǃkhō-aos tsîna ge ǀnam tsoatsoa. Tsîb ge Jehovab di ǂkhâǃnâs ǀkha kaise ǃgâise gere sîsen. (ǃNǃkh. 2:14, 41) Sida ge ra aoǁnâ Jehovaba da a ǀnam amaga. ǁNās ǃaroma da ge nē sîsen-e ra dī. ǁKhāsiba da ūhâ tama hâ di da ga ra tsâ. Xaweb ge ǁnā ǀnammi Jehovaba da ūba hâba ra huida î da khoena aoǁnâba. Jesub ge Petruba a ǁkhau o îb khoeǃkhō-ao kai ob ge ǁîba “tā ǃao” di ge mîba. (Luk. 5:8-11) Petrub ge ǁkhāǁkhāsebe kaib ga ra o nî ī xūna ge ǃao tama hâ i. Xaweb ge ge buru mûb ge o Jesub di huib ǀkha gu ge khoega ǂgui ǁauna a ǃkhō o. ǁNā-amagab ge Jesub ǀkha sîsen sab anu tama hâ khama gere tsâ. ǀNîsi du ge Petrub khama ra tsâ tsî ra ǂâiǂhansen Xristub ǁkhāǁkhāsabe kai du nîs aiǃgâ du nî dī xūn xa. ǁNās ga ama o Jehovab, Jesub tsî sadu di ǀgūkhoena du ūba hâ ǀnamma ǀgaiǀgai re. Ots ge ǁnā turaba nî ūhâ îts Jesub di ǁkhauǂuisa ūǃoa khoeǃkhō-aos disa.—Mat. 22:37, 39; Jhn. 14:15. w20.09 3 ¶4-5

Sida di ǁaeb, mari-i tsî ū da hâ xūn tsîna da ge ǂkhîse ra sîsen-ū îda ‘ǀamo ûiba ǃoa ǃkhōǂuibasenhe hân hoana’ aoǁnâba. (ǃNǃkh. 13:48) Nēsa da ga dī o da ge Jesub di aiǁgausa ra sao ai. ǁÎb ge ge mî: “Nēs ge ti ǂûsa, sî te geb ti ǂâisa ta nî dī, tsî ǁîb di sîsenna ta nî dītoasa.” (Jhn. 4:34; 17:4) Nēs tsîn ge sida di ǁkhore. Sida ǂgomǃgâbabe hâ sîsenne da ge ra dītoa ǂgao. (Jhn. 20:21) Tsîda ge ǃkhai hâ ǃgâsan sida ǀkha nē sîsenni ǃnâ nî mâǃkharusa ra ǂhâba. (Mat. 24:13) Supu tama i ge hâ Jesub ge mîmāda xū-e dīsa. Xawe da ge nē sîsenne ǀguri dī tama hâ. Jesub ge ge mîmâi ǁîb ge sida ǀkha hoaǁae nî hâ ti. ǁKhāǁkhāsabe dīs di ǁgaumâisa da ge “Elob di ǀhaosîsenao” i ase “Xristub” ǃnâ-ū ra dī. (1Kor. 3:9; 2Kor. 2:17) ǁNā-amaga da ge nēsa a dī hō ǁkhā. Nēb ge kaise a ǀō-aisa aiǂhanuba, î da nē ǁgaumâisa dī tsî nau khoena hui în nēs ǃnâ ǃgâise dī.—Fil. 4:13. w20.11 7 ¶19-20

ǃNāsa ǁaeba î ge ǁgûn ra dī mîǁguiga ǀgôana gaixu ǁaeba ra tsâǀkhā. ǁGûn ga ǃgâi tama mîǁguiga ga ra dī o, os ge nēsa ǁîn ǀgôana ǃgomsiba a mā ǁkhā. Xawen ga ǃgâi mîǁguiga a dī o, on ge ǁîn ǀgôana ra hui în ǂkhîsa ûiba ūhâ. Ī a ǃkhais ge ǀgôan tsîn ge ǃgâi mîǁguiga nî dī. ǀGui ǃgâi mîǁguib hîna i khoe-e a dī ǁkhab ge sida di ǀnamxaǃnâ ǀhom-si ǁGûb Jehovaba ǃoabasa. (Psa. 73:28) Jesub ǁgûra tsîn ge gere ǂhâba în ǁîra di ǀgôana Jehovaba ǃoaba. Tsî mîǁguigu ǁîra gere dī gu ge ra ǁgau ǃoabas ge ǁîn ûib ǃnâ ǂhâǂhâsa i ǃkhaisa. (Luk. 2:40, 41, 52) Jesub tsîn ge ǃgâi mîǁguina ge dī Jehovab ǂâisa dīs ǀkha ge hûibi na. (Mat. 4:1-10) Jesub ge ge ǃgâi, ǂgomǂgomsa tsî ǁkhoaǂgaoxa ao kai. Hoa ǁgûn Jehovaba ǀnaman ge kaise nî ǂkhî ǁnāti ī ǀgôa-e ūhâsa. w20.10 26 ¶1-2

Nē ǃnona aiǁgaudi xa ǂâi re. Kaira ǃgâsas ge ǃgâi ǁaegu hînas ge ǂkhams a hîna ūhâ-i gu xa ra ǂâi. ǁÎs ûib nēsi a ǃgom xawes ge ǁkhās a i hoa-e Jehovaba ra dība. (1Kor. 15:58) Tsēs hoasas ge ǁîs omaris tsî ǀhōsan tsîn ǀkhas paradais ǃnâ hâ ǀgausa ra mûnan-ai. ǀGui ǃgâsas ge ra ǂâihō ǀhaohâb ǃnâ i ge khoe-e, ǁîsa ra tsûaǂgao kai xū-e a mîsa. Xawes ge ǁîsa nēs xa kaise ge ǂâi tama hâ-i. (Kol. 3:13) ǃGâsab ge ǃkharuge ǁaeb ǃnâb ge dī hâ-i dīsādi xa ra ǂâi. Xaweb ge ǁîba ǁkhāb a i hoa-e ra dī tsî Jehovab ǃoa-ai ǂgomǂgomsase hâs ai ǁîb ǂâisa ra ǂnûi. (Psa. 51:10) Matin nē ǃnona Xristeǁîna a ǀgui? Hoan ge ǃkharuge ǁae ge ī xū-i xa ra ǂâi. Xawen ge ǁnā xū-i xa ǀgui ǂâi tama hâ. ǁÎn ge “ǂhanuse” hānîǁaeb ǃoa ra “kō.” Tae-i ǃaromas ǁnāsa a ǂhâǂhâsa? Khoe-i hîna hoaǁae ǃgâbǀkhāb ai ra kō i ge ǂhanuse a ǃgû ǁoa. Nēs ge sida ǃoabas Jehovab ǀkhā da ūhâs ǀkhā a ǀgui. Jehovaba da ge ǀoasase a ǃoaba ǁoa, hoaǁae da ga ǀnai ge ī xūn xa ga ra ǂâi o.—Luk. 9:62. w20.11 24 ¶1-3

Davib ge Goliati mûǁae ǂkhabusase gere mûsen. Goliati ge kai, ǀgaisa tsî ǂgui torona ge ǃkham. Davib ge ge ǂkhamro i tsî toro ǃkhams xa xū-e ge ǀū i. Xaweb ge Daviba Jehovab di huib ai ge ǂgomǃgâ hâ i. Tsî nē huib ǀkha ǁîb khākhoeba ge dan. (1Sam. 17:41-45, 50) Davib ge ǀnî hâ ǃgomsiba ge ūhâ i ǂkhabuǂâi kai bi gere ba. Davib ge ǂgomǂgomsase Jehovab xa ge ǁgaumâihe gao-aob Saula gere sîsenba. Gao-aob Sauli ge Daviba gere ǃgôa, xaweb ge Saula ēga ǀgapi ǂâixa tsî Daviba ge suri tsoatsoa. Sauli ge Daviba ǃgâi tamase gere hâ-ū tsî gere ǃgam bi ǂgao. (1Sam. 18:6-9, 29; 19:9-11) ǃGâi tamaseb ge hâ ūhe tama hâ i gao-aob Sauli xa, xaweb ge Daviba Jehovab ǂkhauhesa gao-aoba gere ǃgôa. (1Sam. 24:6) Davib ge Jehovab ai ge re ǂgomaiǂnûi tsîb ge ǂhâb ge hâ i ǀgaiba ge hō nē ǃgomsib ǃnâ mâǀgaipesa.—Psa. 18:1. w20.07 17 ¶11-13

ǃNāsa ǃâb nē kēbos dib ǀgam gaokha hîna ra ǃkham kha, ǀapas gaob tsî ǃkhapagas gaob tsîkha xa ra ǃhoas ge ǀnai ge dīǀoaǀoahe. Nēs ǃaroma da ge a ǂgom ǁkhā nau ǃâb tsîn nî dīǀoaǀoahe ǃkhaisa. Danieli 11ǁî xoaǀgoras ǃnâ xoasa kēbosa ǁnâuǃās ǃaroma da ge nî mûǂan nē kēbos Elob khoena ra ǁnāǂam ǂhanuga ǃoa ra ǁnaeǁgausa. Tsî Elob ǁaes ǀoro ǃgôab khoen ǀguina ra kuruǂûi xawen ge ǃhūbaib ǃnâ ra ī xūn xa hoaǁae ra tsâǀkhāhe. Tae-i ǃaromasa nēsa? ǁGâuab tsî ǁîb ǀkhāb ai hâ khoen tsîn di ǃuru ǂâibasens ge Jehovab tsî Jesub tsîna ra ǃoaba khoen hoana hîkākāsa. (Gen. 3:15; J.ǂHa. 11:7; 12:17) Danieli kēbos ge nau kēbodi Elobmîs ǃnâ hâ di ǀkha nî ǃgûǀhao. ǀNî Elobmîs ǃâga ǃoa da ge nî kō Danieli ǂkhanis kēbosa da ga ǁnâuǃā ǂgao o. w20.05 2 ¶1-2

ǂGui khoen ge ûib ǁōb khaos ai hâb xa ǂgui ǂâiǀgauga ūhâ. Xawe Elobmîsa tae-e ra ǁkhāǁkhā? Khoe-i ga ǁō o i ge ǁî i sorosa ra ǀō. Xawe ǁnāb hîna ge ǃhūbaiba xū-i a ǀkhai ǃkhaib ai a kurub, ǁnāb ge ǁnā khoe-e khâisa nî mā. Tsî ǁî-i ǂhâba hâ sorosa nî mā. (Gen. 1:1; 2:7) Apostel Paulub ge ǂkhōsa ge sîsen-ū hîna ra ǁgausa ǂhâbasa tama i hâsa Elob ǁnā sorosa khoe-e nî mā-oa ǃkhaisa. ǃHoro i tamas ka io “ǃkhom-i” xa ǂâi re. ǃKhoms ge ǃhūb ǃnâs ga ǃhana-e o ǀasa hais ase ra ǂoaxa. ǁNā ǀasa hais ge ǀkharadi ǃkhomsa xu ra mûsen. Paulub ge ǃkharagagusiba ge ǁgau. ‘Elob ǁî-e ǂgaob ra khami ī soro-e ra mā’ ǃkhaisa. Paulub ge ge xoa “ǀhomsi sorode hâ, tsî di ge ǃhūsi sorode hâ.” ǁNāsa tae-e ra ǂâibasen? ǃHūbaib ai da ge ǁgansi sorode ūhâ xawe ǀhommi ǃnâ i ge gagasi sorode hâ, ǀhommi ǃnâ hâ ǀhomǃgān khami.—1Kor. 15:36-41. w20.12 9-10 ¶7-9

Hoada ge ǃnomsa tsî ǂkhî ûiba ǂhâba hâ. Tsî sada ge tātsē ǂâiǂhansen ǂgao tama hâ. Xawe da ge ǀnî ǁaegu ai sada tsîna ra ǂâiǂhansen. Tsî Gao-aob Davib ge dî dîsa ra dîsen. Nētsēs di mîs ǃnâ i ra mî-e khami. ǂGui xūn ge ra ǂâiǂhansen kai da. ǁNās ǀkha da ge ǀnî xūna a ǁkhae ǁoa. Aiǁgause, saran, ǂûn tsî oms di ǃgôab kurib hoaba ra khâimâ ǀgaus. Tsî da ge ǁnās ǀkha a ǁkhae ǁoa matin sida di skol ǀhōsan. Tamas ka io sîsenǁare-aona ra ǃâitsâ da î da ǂhomi tsî ǀaiba dī. Tsî da ge sida ǂnamipe hâ ǂkhabadība a ǁkhae ǁoa. Nēti ī ǃgomsiba da ge ra hōǃâ, khoen Elobmîs ra mî khami ǂâi tama hâ amaga. Nē ǃhūbaib di elob Satanni ge a ǂan. ǀNî khoen ‘ǃhūbaib di ǂhansendi’ xa ǃaromahe hâse Jehovaba nî ǃoaba ǀûsa. (Mat. 13:22; 1Jhn. 5:19) ǁNā-amaga da ge buru tama hâ. Nē ǃhūbaib ǃgomsin hînan khoena ra ǂâiǂhansenan xa ǀhoa hâsa. w21.01 2 ¶1, 3

Apostel Johaneb tsîn ge ge ǂkhâǃnâ da. Î da tā sida di ǃgâsana ǃhui. ǁNā ǀapemāsa da ga sao tama io. O da ge Satanni xa nî ǂgaeǂhapuhe. (1Jhn. 2:11) Nēs ge ǂguro Xristeǁîn di ǁaeb ǃnâ ge ī. ǁNā ǁaeb aib ge Satanna ge dītsâ în Elob di khoena ǃhuigu tsî ǁnapaxu ǀgora. Johaneb ge sîǂkhanide gere xoa ǁaeb ǃnâ i ge. Satanni di ǀgauba ūhâ khoega ǀhôakaose ǀhaohâb ǃnâ ge ǂgâ. Aiǁgause Diotrefesi ge ǀhaohâgu ǃnâ ǀgaisa ǀgorasa gere dī. (3Jhn. 9, 10) ǁÎb ge ǃgôasi-e ǂgaeǂgui ra sorosa ra ǂnūǁkhaeba khoega ge ūhâba tama hâ i. ǁÎb tsîn ge ǁîba ge ǃgâiba tama hâ i. Khoena gere ǃkhōǃoa ǃgâsana ǀhaohâba xu gere ǃhaeǂui. ǁNā i ge ǃgâi tama ge hâ i xū-e. ǁGâuab ge nētsēs kōse ra dītsâ. Îb Jehovab di khoena ǀgora. w21.01 11 ¶14

ǂGuro torob ǃnâ kha ge Germanib di ǂhanub tsî Britaini di ǂhanub tsîkha Elob khoena gere māǃoa, torob ǃnân ge ǃâ tama hâ i ǃkhais ǃaroma. Tsî Amerikab di ǂhanub ge ǁnān hîna aoǁnâs sîsenni ǃnâ ǂgaeǂguisa gere ūna ǃkhōsis ǃnâ ge ū. Nē saoǃgons ge kēbos hîna ǂHaiǂhais 11:7-10 ǃnâ a xoasasa ge dīǀoaǀoa. 1930ǁÎ kurib ǃnâ ǀgamǁî torob ǁaeb ǃnâb ge ǀapas di gaoba Elob khoena ǀkhoma ǁgau tamase gere ǁnāǂam. Hitleri tsî ǁîb sao-aon ge Elob khoen sîsen-e dīhesa ge ǂkhā. Nē māǃoa-aon ge 1500 xa a ǃnāsa Jehovab di khoena ge ǃgam tsî ǂguina ǃkhō-omde ǃoa ge sî. ǀApas di gaob ge “ǃanusiba nî ra ǀuriǀuri” tsî “tsēkorobe ǁguibasa nî ra ūbe” tsî nēs ǃnâ-ū Elob khoena Jehovab ǀonsa khaikhaisa nî ra ǀamǀam kai. (Dan. 11:30, 31) Hitleri, Germanib di ǂgaeǂgui-aob tsîn ge ge mîmâi Elob khoenab Germaniba xu nî ǃgam ǂûi ǃkhaisa. w20.05 6 ¶12-13

ǀHaohâb ǃnâ da ga ǀnamgu o. O da ge hoada kō aigu tide. Jonatanni ge Davib ǀkha ge kō aigu tama hâ i. Tsî ǁnās ǀkha aitsama gao-aose ge ǁgaumâisen tama hâ-i. (1Sam. 20:42) Hoada ge Jonatanni di aiǁgausa a ǁgae ǁkhā. A da tā sida di ǃgâsana suri re. ǁÎn ūhâ ǁkhāsigu ǃaroma. Xawe a da “ǃgamǃgamsens ǃnâ nē-e nau-e ǁî-i ǃgâ-ai ǀgapise ǃgôa” re. (Fil. 2:3) ǂÂis ǃnâ ūhâ re mâ khoe-i hoa-i ge ǀhaohâb ǃnâ xū-e a ǂâibasen ǁkhā. ǃGamǃgamsens ǀkha da ga hâ o. O da ge ǃgâina sida di ǃgâsan ǃnâ a mû ǁkhā. Tsî da ge ǃgâi aiǁgauna ǁnāpaxā a ǁkhāǁkhāsen ǁkhā. (1Kor. 12:21-25) Nēti ī ǀnamma da ga ǁgaugu. O da ge sida ǃgâsan ǀkha ǀgū ǀhōsagusisa ra omkhâi. Tsî da ge ra ǁgau Jesub di ǁkhāǁkhāsabe da a ǃkhaisa. Tsî ǁnās ǀkhan ge nau ǂhauǃnâ ǂgaoga ūhân tsîna Jehovaba nî ǃoaba tsoatsoa. Tsî hoan ǂam-ai da ge “ǁGûb ǀkhomxaǂgaosigu dib tsî Elob ǁkhaeǂgaob hoab diba” ra koa.—2Kor. 1:3. w21.01 24 ¶14; 25 ¶16

Nētsē da ge Jehovab khoen ase ǀnî ǁaegu ai khoen xa ra kēǁnâhe tsî ra ǃhōhe mîn rase ǂkhabusa tsî da gā-ai tama hâ ti. Tae-i amsi? Sida ǂnamipe hâ khoen di ǂâi ǀgauga da ǃkhōǃkhō tama hâ amaga. Jehovab khoen ase da ge ra dītsâ ǃgamǃgamsenxasib tsî ǁnâuǀnamxasib tsîna ūhâsa. Xaweb ge ǃhūbaiba ǀgapi ǂâixa khoen tsî mâǃoara khoena ra koa. Jehovab khoen ase da ge ǂgīǂgōsi xūn tsî torodīs ǃnâ ǁhao tama hâ. Nē ǃhūbaib ǂâiǀgauba da ūhâ tama hâ amagan ge khoena sida ra ǃgôaǁnâ. (Rom. 12:2) ǃHūbaib khoen ǂkhabusa da a ti ra ǂâi xaweb ge Jehovaba sida ra sîsen-ūse ǂoaǂamsa xūna ra dī. ǃHūbaib ai noxoba dīhe tama hâ aoǁnâ sîsen-eb ge nētsē ra ī ǁkhā kai. ǁÎb ǃoaba-aon ge ǂgui ǂkhanina ǂnûiǃkhūni. Tsî ǃhūbaib ǂhawase ra māǂui tsî Elobmîs ǀkha miliundi khoena ra hui. În ǁîn ûiga ǀkharaǀkhara. Jehovab ge nē xūn hoana ra ī ǁkhā kai. w20.07 15 ¶5-6

Jesub ge Jehovab di ǂhanuga ǃgôa hâ. ǂKhabusab a amagas ose. Tamas ka io gâre tsîb ǂansa ūhâ tama amagas ose. ǁÎb ge ǃgāsase gere ǁkhāǁkhā ǀgaub ge ra ǁgauda ǁîb a kaise gā-ai ǃkhaisa. (Jhn. 7:45, 46) Jehovab ge ge ǂan i Jesub a kaise gā-aisa. ǁNā-amagab ge ge mā-am bi îb ǁîb xōǀkhā sîsen. Hoaraga xūna kha gere kuru ǁaeb ǃnâ. (ǂKhm. 8:30; Heb. 1:2-4) Tsî Jesub ge khâis khaoǃgâba xub ge Jehovaba, Jesuba hoaraga xūna mā-am hâ ‘ǃhūbaib tsî ǀhommi’ ǃnâs tsîna. (Mat. 28:18) Jesub ǂansa ūhâ xawes tsînab ge Jehovaba ǃoa daoǁgausa ra ôa. Tae-i ǃaroma? ǁÎb di ǁGûbab a ǀnam amaga. Aogu ge nî ǂan Jehovab ge tarekhoede ǃgôaǁnâ tama. Aoga di ǃnāka nî hâba tib ra mî o. Jehovab ge nēsa ra ǁgau. Tarekhoedi tsî aogu tsînab ra ǁhûi o, în Jesub ǀkha ǀguiba ǂgaeǂgui. (Gal. 3:26-29) Jehovab ge ge ǁgau ǁîb ǀgôabab ra ǂgomǃgâsa. ǁÎbab ge ǂgaeǂguis di aiǂhanuba a mā o. ǁNā-amagab ge gā-ai aob tsîna ǁîb di tarasa ǀnōsa aiǂhanuga nî mā. w21.02 11 ¶13-14

Elobmîs ge spils khami i, tsî ra hui da î da mû mapa da ǀkharaǀkharana nî dīsa. (Jak. 1:23-25) Aiǁgause Elobmîsa da ga khomai toa o. O da ge ra mû sida di ǁaiba da nî ǃkhō-oasa. Tsî Jehovab di huib ǀkha da ge ra ǁkhāǁkhāsen mati da khoen ǀkha nî tsaurasa. Tsî ǃgomsin tsîna da ra hōǃâ ǁaeb ai. Nēsisa da ge ǃgâise a ǂâi ǁkhā. Tsî ǁnās ǀkha ǃgâi mîǁguiga a dī ǁkhā. (Jak. 3:13) ǁNā-amaga i ge ǂhâǂhâsa Elobmîsa ǂansa. ǀNî ǁaeb ai da ge ra ǁkhāǁkhāsen taena xū da nî ǂgōsensa. Tsū xū-e da dītoa hâ hîna. ǃGâi ǀgaub hîna da hoada a ǁkhāǁkhāsen ǁkhāb ge nau khoen di ǃgâi dīgu tsî tsūga xū ǁkhāǁkhāsensa. ǁNā-amagab ge Jakobuba ge ǂkhâǃnâ da î da Elobmîs di aiǁgaude xū ǁkhāǁkhāsen. Aiǁgause Abrahammi, Raxas, Jobi tsî Elia hân aiǁgaude xū. (Jak. 2:21-26; 5:10, 11, 17, 18) ǁNā ǂgomǂgomsa ǃoaba-aon Jehovab din ge ǁîn ǂkhîba ga ūbe hâ ǃgomsinan gere hōǃâ xawe ge mâǀgai. ǁÎn di aiǁgaudi ge ra ǁgauda Jehovab huib ǀkha da sida tsîna ǁnāsa a dīǁkhāsa. w21.02 29-30 ¶12-13

Elobmîsa ra ǁkhāǁkhā khoe-i di ǃereams ge. Î-i ǁnā khoe-e ǃgâise ǁkhāǁkhā i i ǁnâuǃā. ǁKhauhe du ga o, o du ge ǁnapa hui-aose ǀgui hâ. (Aoǁn. 4:9, 10) Xawe mati du a hui ǁkhā? Aiǂhomisen re. ǂGurose Elobmîsa ra ǁkhāǁkhā khoe-e ǂgan re i i ǂkhari xū-e ǁnā khoe-i xa mîba du. Mâ ǃnôa khaoǃhūba ūhâ khoe-e ǁnā-e? Mâ ǁkhāǁkhāǃâs tawa du hâ nē a o? Tae-e du ra ǂhâba nē khoe-i. Elobmîsa xu nî ǁkhāǁkhāsensa? Mati ta nē khoe-e a ǂkhâǃnâ ǁkhā i i aiǃgû? Xawe ǁkhāǁkhā-ao i ge sadu ǂan tide xū-e mîba du tide. Xawe ǁî-i sadu ǀkha ra ǀgoragu i ge a hui du ǁkhā. Joy di ǀon hâ sîsabes ge ra mî: “ǁKhau ta hâ khoe-i ǀkha ta ga nē xūna ǁgam o. O i ge ǁî-e a ǂan tae-e i ǁkhāǁkhās tawa nî mîsa. Tsî i ge ǁkhāǁkhāsen ra khoe-e ǂkharirose ra ǂan ro.” w21.03 9 ¶5-6

ǀNî ǁaegu ai da ge ǃhuihe hâ. Jehovab di ǂhanuba da ra ǁnâuǀnam amaga. Jehovab ta mî ǀgaub, ǂhanun tsî tsūn ge kaise sida ǃaroma a ǃgâi. Xawe ǃhūbaib ge ǀnî hâ ǀgauba ra ǂgom. Aiǁgause, ǂgui khoen ge ǂgom tama hâ ǀaib a tsūsa. Tsîb Jehovaba ǁnāsa ǃhui hâsa. Sodoms tsî Gomoras tsînab ge ǁnā ǃkhais ǃaroma ge dīkākā. (Jud. 7) Sida Jehovab mā hâ ǂhanuba ra ǁnâuǀnam amagan ge. ǂGui khoena ra mâǃoa da tsî ǁnās ǀkha ra ǃkhāǃkhāda. (1Pet. 4:3, 4) Tae-e a hui da ǁkhā khoen xa da ga ǁgâiǀāhe tsî ga ra ǃhuihe. Tsî ǁgâi xūna ga ra mîhe ǁaeb ai? Kaise da ge ǀgaisa ǂgomsa nî ūhâ Jehovab nî huidasa. Sida di ǁâtanin khami i ge sida di ǂgoms tsîna “ǀaexa ǂāgu ǂkhabab digu hoaga a ǀari ǁkhā.” (Efe. 6:16) Xawe da ge ǀgaisa ǂgomsa ǂhâ hâ. Tsî da ge ǀnammi tsîna ǂhâ hâ. Tae-i ǃaroma? ǀNammi ‘ǂkhaba-i xare-e ǂâi tama hâ’ amaga. ǀNammi ge hoana ra ǃgū-ai tsî hoana ra tani ǀnam. (1Kor. 13:4-7, 13) ǀNammi Jehovaba da ūbahâb, ǀnammi sida ǃgâsana da ūbahâb. Tsî ǀnammi hîna da ǁnān hîna ra mâǃoadana ūbahâb ge nî hui da ǃgomsin ǃnâ mâǀgaisa. w21.03 20-21 ¶3-4

ǀNî ǁaega da ge. Sida ǃgâsana da ǀnamsa ra ǁgau. Xū-e da ga dī tama io. Aiǁgause da ge ǁaixa tama hâ ǁîn da mî xū-i ǃaroma. Jesub di ǀuni tsēdi hînab ge. ǃHūbaib ai ūhâ i di xa ǂâi re. ǀNî ǁaeb aib ge Jesuba ǁîb di ǁkhāǁkhāsabega ge mîba. ǁÎb sorosa ǂû tsîgu ga ǁîb di ǀaoba a o. O ǀguigu ûiba nî hō ǃkhaisa. (Jhn. 6:53-57) ǀNî ǁkhāǁkhāsaben Jesub din ge. Nē mîdi xa ge ǃgâibahe tama hâ i. Tsî ge sao bi ǀû xawe, ǁîb di ama ǀhōsan ge gere sao bi. Jesub ge mî xūnan ge ge ǁnâuǃā tama hâ i. Tsîn ge ǁîn tsîna ǀnîsi gere buru. Xawen ge Jesub di ǂgomǂgomsa ǀhōsana. ǁÎb ge mî xū-i ǃgâi tama ti mî. Tsî ge ǁaixa tama hâ i. ǁÎn ge ǁîba ge ǂgomǃgâ, amabab ta ǃhoa ǃkhaisan ge ǂan i amaga. (Jhn. 6:60, 66-69) Kaise i ge a ǂhâǂhâsa î da sida ǀhōsan da mî xūn xa tā ǃhaese ǁaixa. Xawe da ge ra mā-am nî, în ǁguiǃā tae-en ta ǂâibasensa.—ǂKhm. 18:13. w21.01 11 ¶13