Augustub

Jesub ge ǀnîsi Romeǁî soldagu xa gere ǃhoa hîna ge ǁîb di ǂaidi tsî ǃomdi ǃnâ spuikerga a ǃgâugu xa. ǂHâbasa tama i ge ge hâ i Jesuba ǁōsa. Tsîb ge ǁnās ǀkhas ǃgâi tamase ǀgoraǃgâhe xaweb ge. Khoena ǂgari-am tsî ǁîn ǀkha ge ǁaixa tama hâ i. (1Pet. 2:23) Jesub khami da ge sada tsîna nau khoena nî ǀūba. (Kol. 3:13) ǀNîn hîna sida omaris din ge nî mâǃoa da. Sida di ǂgomǀgaub tsî ûiban ǁnâuǃā tama amaga. ǁÎn ge sida xa ama tama xūna ǃhoa. Nau khoen ais ai taotao da. Tsî sida ǂkhanin tsîna ǁgaiǁgai ǁkhā. Tamas ka io mîba da ǁkhā, ǁîn nî tsûtsû dasa. Nē khoen da di xūn xa ǁaixa tama i. Tsî da ge Jehovaba ǂgan ǁkhā, în amab ǃnâ ǂgâxa. (Mat. 5:44, 45) ǀNî ǁaega i ge kaise a ǃgom ǁkhā khoena ǀûbasa. ǀNîsi da ga ǃgâi tamase hâ ūhe ǁaeb ǃnâ. ǁAixa hâse da ga hâ tsî da ga ǀûba tama io. O da ge aitsama nî tsûtsûsen. (Psa. 37:8) ǀÛba da ra o, o da ge ra ǁgau, ǃgomsin hîna da ra hōǃân ǁaixa hâse hâ kai da ǁoasa.—Efe. 4:31, 32. w21.04 8-9 ¶3-4

Sadu ǀnamǀnamsa omaris ǁani-e ǀhaohâba xu ǂnûiǂuihe hâ? ǁNās ge kaise a tsûtsûsa ǁkhā. ǂÂis ǀguisa hî re matikōseb ge Jehovab ǂgaoba kôahe hâ isa. ǀNî ǀhomǃāgu ǁîb di omaris di gu ge ǁîba a mâǃoa o. (Jud. 6) Tsî ǂâis ǀguisa hî re matikōseb ge ǃgâi tamase gere tsâsa. Israelǁîn hînab ge ǁîba kaise ǀnam în ge ǁîba a mâǃoa o, ǂgui ǃnāde. (Psa. 78:41) ǂGomǃgâ ǁkhā du ge a sida di ǀnamǀnamsa ǀhomsi ǁGûb tsîn ra tsûtsûhesa. ǀNam da a khoe-i ga ǁîba ga ra ǁnāxu o. ǁÎb ge ra ǁnâuǃā ǃoab hîna du ra hōǃâba. ǁÎb ge ra ǁkhaeǂgao du ǂgao. Tsî ǂhâ du hâ ǂkhâǃnâs. Tsî mâxoǀkhās tsîna nî mā du. ǀŌ-aisa ǀgôab tamas ka io ǀgôas ga Jehovaba ga ra ǁnāxu o. On ge ǃnāsa ǁaeba ǁgûna ra ǂâi. Tae-en ga ǃnāsase dī hâsa în ǁîn di ǀgôa-e hui. Î-i Jehovaba ǃoaba ǀgara. ǀGui ǃgâsab ge ra mî: “Aitama ta ge gere ǀhapiǂgā-amsen. ǃGâi tama hâ ǁhapodi tsîna ta ge ǁnā xūn xa ge ūhâ i. .” ǃGâsas hîna ge ǁkhā mâsiba gere hōǃâs ge gere ǂâi: “Tae-e ta ge ǁgû ta ase dīsā? Tsâ ta ge ge ǃnāsa-e ta ge dī tama hâ isa. Î ta ti ǀgôaba ǁkhāǁkhā îb Jehovaba ǀnam.” w21.09 26 ¶1-2, 4

ǀNî khoen ge ra ǂâi Jehovab di ǃoaba-aon Elobmîsa ǁkhāǁkhās di ǂan-e ūhâ tamasa. ǁÎn ǂhâǂhâsa ǂgoms di skolga ǂgâ tama amaga. Xawen ge amaba nî ôaǂui. ǁNāsab ge Elobmîs xoa-aob Lukab tsîna ge dī. ǁNā-amagab ge ǃkharise gere sîsen, îb ‘hoana ǂōrisase ôaǃnâ.’ ǁÎb ge khomai-aona ge ǂhâba hâ i, în ‘ǁKhāǁkhāhen hâ xūn di ǂanǁaposa hōǃgâ.’ ǁÎn ge Jesub xa a ǁnâuna. (Luk. 1:1-4) Jodeǁî khoen hîna ge Berea di ǀon hâ ǃās ǃnâ gere hân ge Lukab khami ge i-i. ǁÎn ge ǂguro ǃnāsa ǃgâiǂhôasa a ǁnâu o Jesub xa. On ge Hebre xoadi ǃnâ ge kō, în mû nē i a ama ǃkhaisa. (ǃNǃkh. 17:11) ǁKhā ǀgaub ǃnân ge khoen tsîna amaba nî ôaǃnâ. ǀGopeǀnōn ge nî Elob khoen ra ǁkhāǁkhān. Tsî xoadi ra mati mîn tsîn ǀkha. Tsî da ge Jehovab di ǃoaba-aon ge sida ǁaeb ǃnâ dī xūn xas tsîna nî ôaǃnâ. ǃNāsa ôaǃnâden ga dī o. On ge khoen ra mî. Tsî dī xūn xa ǂkhabuǂâi kaihe tide. w21.05 3 ¶7-8

Khoe-e hâ sadu ǀhaohâb ǃnâ khoexaǃnâsiba du a ǁgau ǁkhā-e? ǁAeb ge nî hā Xristeǁîn kaise nî ǃgôaǃgâsa. Sadu ga ǁîn ǀkha ǀguiba ga ra hâ ǁae o. ǀNîn ge ǃgomsiba a hōǃâ ǁkhā Jehovaba ǃoaba tama khoen ga sâtsēde ga ra tsēdi o. ǀNîn ge ǀnîsi a ǃgombahe ǁkhā. ǁŌb ǃnân ge ǂoaǃnâ khoe-i di ǃgammeb di kurixas xan ga ǂâi o. ǁAeba ǁamaǂui tsî da ga ǁnāti i ǃgomsiga ra. Hōǃâ khoen ǀkha hâǀhao o. O da ge ra ǁgau ama ‘ǃgâiba da ra ôasa.’ (Fil. 2:20) ǂGui ǃaromadi ge hâ Xristeǁî i a ǀguritsâsen ǁkhāde. Xawe da ge tā nî ǀuru Jehovab ǁnāti i tsâsiga ra mûsa. ǁÎb ge sida ǃgâsana ra sîsenū, îb ǂhâ da hâ xūna māda. (Mat. 12:48-50) ǁNās ǀkha da ge Jehovaba ra ǁgau matikōse da ra gangansa. ǁÎb di ǀnamxaǃnâ ǀhaohâb ǃaroma. Sida di ǃgâsana da ga ǂkhâǃnâ tsî ga ra hui o. Mati ǀgui da ga tsâ xawe ta ge tātsēs tsîna ǀguri hâ tama hâ. Jehovab sida ǀkha hoaǁae hâ amaga. w21.06 13 ¶18-20

Jesub ge aoǁnâ sîsen-i ǃoagu ǃgâi mûǂuiba ge ūhâ i. Tsî ge re aoǁnâ khoen ge. ǁÎb ra mî xūna ǃgâ tama i xawes tsîna. Tae-i ǃaroma? ǁÎb ge ge ǂan i matikōsen ge khoena amaba ǂkhâ hâ isa. Tsîb ge ǁkhāb ase ǂgui khoena gere hui ǂgao, în ǃgâiǂhôasa ūǃoa. Tsîb ge ge ǂan i khoen hîna nēsi ūǃoa taman ega sī nî ūǃoasa. Aiǁgau-e kō re ǁîb di omaris ǃnâ ge ī-e. Jesub di ǃnona tsî ǃkhare kurigu, ǁîb di aoǁnâ sîsen-i ǃnâb ge. ǁÎb di ǃgâgu di ǀguib tsîna noxoba ge ǁîb di ǁkhāǁkhāsabe tama hâ i. (Jhn. 7:5) Xaweb ge ǁîba khâisa mā toahes kaoǃgâgu ge ge Xristeǁî kai. (ǃNǃkh. 1:14) Hoada ge a ǀū ham-i nî amaba ūǃoa. Tsî nî Jehovab di ǃoaba-ao kai ǃkhaisa. ǀNîn ge kaxuse naun xa amaba ǁkhāǁkhāsensa a ū ǁkhā. ǁNān hîna sida ǃgâ ǂgao taman. Tsîn ge sida di ǃgâi tanisen ǀgauba ra mû. Tsîn ge “Eloba kare” tsoatsoa ǁkhā. w21.05 18 ¶17-18

Jesub ge ǃhūbaib ai hâ io. Ob ge ǁîb di saosabena ǀgam ǃâga ūhâ sîsen-e ge dī kai. ǁÎb ge ge mî, în ǃgâiǂhôas Gaosib disa aoǁnâ. Tsîb ge ge ǁgau nî matin ǁnāsa nî dīsa. (Luk. 8:1) Aiǁgause, Jesub ge ǁîb di ǁkhāǁkhāsabena ge mîba. Tae-en nî dīsa, khoen ga Gaosib di haisi-amsa ga ra ǃgâ o. Tsî tae-en nî dīsa khoen ga ǃgâ ǂgao tama ga ra io. (Luk. 9:2-5) ǁÎb ge ge mî, ǁîb ǁkhāǁkhāsaben ǂgui khoena nî aoǁnâbasa. Tsî ǂgui ǃhūgu ǃnâs tsîna nî aoǁnâsa. Mîb ge o, “hoa ǁaedi mîdansa ǃoa” di. (Mat. 24:14; ǃNǃkh. 1:8) ǁNās ǃaromab ge ǁîb di saosabena ge mîba în khoena ǁkhāǁkhā. Tsî ǁîb ge mîmān hoana ǁnâuǀnam. Jesub ge ge mî, nē ǂhâǂhâsa sîsen-i nî aiǃgûsa. Sida tsēdi ǃnâs tsîna, “nē hâ ǁaeb di ǀams kōse.” (Mat. 28:18-20) ǂHaiǂhais hînab ge Johaneba a mās. ǃNâb ge Jesuba ǃgāsase ge mî. Hoa ǁkhāǁkhāsabena xu i ǃâubasen-e hâsa. În khoena ǁkhāǁkhā, în Jehovab xa ǂan.—J.ǂHa. 22:17. w21.07 2-3 ¶3-4

Nē ǃhūbaib ǃnân ge ǂgui khoena ra dītsâ. Nau khoen xa ǃgâisa. Tsîn ge ǁaes tsîna hî tama hâ. ǁÎn ra dī xūn nau khoena mati ra tsâǀkhāsa. Xūna ra ǁamaxū khoeb ge ǀnîsi xūn hoan hînab a dī ǁkhāna nî dī. Îb nau khoegu xa ǀgapise ǂan. Tsîb ge nau khoena ra tsûtsû. Xūn tsîna ǀnî ǁaegu ai a dī ǁkhā. ǃKhoeǀhûgus ǃnâ hâ khoe-i tsîn ge ǂanabegase. ǁÎ-i ǃoagu ra ǃkhoe khoe-e a tsûtsû ǁkhā. Î-i ǁî-e dansa hō. ǁKhāǁkhāsen ra khoe-i ge ǀhôagaose xūna a dī ǁkhā. Î-i ǃgâi ǃgôaba hō tsî ǂanǂansa ǀgapi ǃkhaigu ai, sī ǁkhāǁkhāsen. Xawe Xristeǁîn ase da ge ra mûǂan. ǁNāti i ǀgaugu ǃgâi tamasa. ǁNāgu ge “ǁgans di sîsenga.” (Gal. 5:19-21) Xawe īǁkhā-e, ǀnîs i Jehovaba ra ǃoaba ǃgâsa-e. ǀHûgusa ǀhaohâb ǃnâ a tsoatsoa ǁkhāsa, ǀūǃgâse? ǁNās ge kaise ǃgâi dîsa. ǀHûgusa ǀhaohâb ǃnâ kurus ge ǀguiǃnâxasib, ǃgâsan ǀkha da ūhâba nî kôa. ǃGâise da ge ra dī ǂgomǂgomsa aiǁgaudi. Aogu tsî taradi hîna ge Elobmîs ǁaegu ǃnâ hâ în. Tsî ge ǀhûgus di gagasa omkhâi tama hâ în xa ǃhoas ǃnâ. w21.07 14 ¶1-2

ǂGomǂgomsa ǀnamma da ga ūhâ o. O da ge ǃoara tamas ka io ǂkhabuǂâira ǃgâsana nî hui. ǂGui ǃgâsana ǃoahâ tamasa ka io ǂkhabuǂâihâ ǃgâsana ra hui. ǁÎn ge ǁîn ǃgâsana a ǀnam. Tsî dī ǁkhān an hoana nî dī. ǁÎn ǃgâsana huis ǃaroma. (ǂKhm. 12:25, 24:10) Apostel Paulub ge ge ǂkhâǃnâ da. Sao ra mîdi ǃnâ: “ǂKhabuǂâi hâna ǁkhaeǂgao, ǂkhabusana ǂkhâǃnâ î du ǃnūǃnâxa hoan ǃoa.” (1Tes. 5:14) ǀGui ǀgaub hîna da ǂkhabuǂâihâ ǃgâsana a hui ǁkhāb ge. ǁÎna ǃoa ǃgâ tsî ǀnamnî da asa ǂan kai nîsa. Jehovab ge ǁîb ǃoaba-aona da ra mā huiba ra ǃgôaǃgâ. ǂKhoamîdi 19:17 ge ra mî: “ǀGâsaba ga ǀkhommi, ǁnāb ra ǃKhūba ǀkhupi. Tsî ǁîb ge ǃgâidīb âba nîra mādawa-am bi.” w21.11 10 ¶11-12

Tae-e da nēsi a dī ǁkhā, î da hānîǁaeb ǃaroma aiǂhomisen? Ū da hâ xūn ǀkha da ge nî ǂâu. Tsî ǁnās ǀkha ǂkhîba nî ūhâ. ǀHōsagusisa da Jehovab ǀkha ūhâ amaga. Nēsi da ga Eloba ǃgâise ǂan tsoatsoa o. O da ge ǂgomǃgâsiba nî ūhâ Jehovab nî ǁkhauba dasa. Gogi tsî Magogi ga ǁnāǂam da ǁaeb ai. Nētsēs mîdi ge ra ǁgau, tae-i ǃaromab ge Daviba Jehovab ai gere ǂgomǃgâsa. Davib ge hoaǁae, Jehovab ai gere ǂgomǃgâ. Tsî Jehovab ge tātsē ǁîba ge ǂkhabuǂâi kai tama hâ i. ǂKham, Davib ge Filisteǁîb Goliati ǀkhab nî ǃkhams ais ai. Nēti ge mîba bi: “Nētsēs ǁkhās aib ge ǃKhūba [“Jehovab,” NW] satsa ti ǃomǁae nîra māǁnâ.” (1Sam. 17:46) Egab, ge Daviba gao-aob Saula gere sîsenba. Hîna ge ǂgui ǃnāde a dītsâba îb ǁîba ǃgam. Xawe ‘Jehovab ge’ Davib ǀkha ge hâ i. (1Sam. 18:12) Davib ge ǃkharu ge ǁaeb ǃnâ Jehovab di huiba hōǃâ amagab ge. Daviba ǂgomǃgâsiba ge ūhâ i Jehovab. Nē ǃgomsib ǃnâ nî hui bi ǃkhaisa. w22.01 6 ¶14-15

Dīb ra xūn hoan ǃnâb ge Jehovaba. ǃNūǃnâxase ǁaeba ra ǁamaǂui, îb hoa sîsenna dītoa. Nēsab ge ra dī îb koasa ǁîb ǀons ai ǀkhī-ū. Tsî nau khoena hui ǁkhā. Kō re matib ge Jehovaba. ǁAeb ǀkha ǃhūbaiba khoen ǃaroma a kuru ǀgausa. Nēsa ǁguiǃgās ǃnâs ge Elobmîsa ra mî o. Os ge “ǀnē-ūdadi,” “ǃgaoǃgaob.” Tsî ǁnāpaxu ‘ǁhôaǀuis ge ǁguihe’ ǀgaus xa ra ǃhoa. (Job. 38:5, 6) ǁÎb ge ǁaeba ū tsî ǁîb sîsen-e ge ôaǃnâ. (Gen. 1:10, 12) Mûnanai ǁkhā î du a mati gu ge ǀhomǃgāga gere tsâ ǀgausa. Mâ ǀasa xū-i hoa-i hînab ge. Jehovaba kuru-e gu ge mû o? Amase gu ge kaise ge ǃgâiaǂgao hâ i. ǁNā-amaga gu ge ‘dâxase gere ǁnae.’ Tae-e da ra ǁkhāǁkhāsen? Jehovab di sîsen-i ge ǂgui kuriga ge ū dītoahes ǃaroma. Jehovab ge hoa xūn hînab ge kuruna kō. Tsî ge mî ‘kaise a ǃgâi’ di.—Gen. 1:31. w21.08 9 ¶6-7

Jesub di ǂkhōs ǃnâb ge khoeba ǀnî ǃhūb ǀkha gere ī. Xawe īb nîs aiǃgâb ge ǁîb di ǃgāga ge ǂgai. Tsî māb hoaba talende ge mā. ǃNāsa mari-e gu nî kuru ga. ǁÎb ge ge ǂan i ǁîb di ǃgāgu ǃkharagagu ǁkhāsiga ūhâsa. Tsîb ge ǀgui ǃgāba koro talende ge mā. Tsî ǀgamra nauba tsî ǀguisa ǃnonaǁî ǃgāba. ǂGuro ǀgam ǃgāga ge ǃgarise gere sîsen. Î kha ǂgui mari-e ǁîkha di ǀhōnkhoeba kuruba. Tsî ǃnonaǁî ǃgāb ge xū-e ge dī tama hâ i. Tsîb ge sîsen-e xu ge ǃhaehe. ǂGuro tsî ǀgamǁî ǃgāb tsîkha ge ge ǁnâuǃā. ǁÎkha di ǀhōnkhoeb ge a mākha ǃereams ge ǂhâǂhâsa isa. Tsîkha ge ǁîb ǀhōnkhoeba ǃgarise ge sîsenba. ǁNās xa ǃaromahe hâse kha ge ǁîkha di ǀhōnkhoeb. Talende ge ǂguiǂgui. ǀHōnkhoeb ge nē ǃgākha. ǁÎkha di ǃgari sîsen-i ǃaroma ge mādawa-am. Nē ǀhōnkhoeb ge ǃgâiaǂgaos ǀguisa ge dī tama hâ i. Xawe koakha tsî ǃnāsa ǃereamsa ge mākha. w21.08 21 ¶7; 22 ¶9-10

Jehovab ge ǃnūǃnâxasiba nē ǀuni tsēdi ǃnâ ǁgau hâ. ǁÎb ge ǂgao tama hâ khoe-i nî hîkākāhesa. (2Pet. 3:9) ǁÎb ge hoa khoena ǁaeba ge mā în ǃhausen. Xaweb ge ǀamosib kōse ǃnūǃnâxa tide. ǁNān hîna Elob Gaosiba ǂkhâǃnâsa ra ǂkhān ge. Faraob hîna ge Moseb tsēdi ǃnâ hâ îb ge ǃkharu ǃnâ. Khami i mâsiba nî ǃkharu ǃnâ. Jehovab ge Faraob ǃoa ge mî: ‘Nēsi ta tita ti ǃomma go ǀhōǂui xuige sats. Tsî sa ǁaesa ta nî ǂhīǁō-i ǀkha ǂnause. Tsî ǃhūbaiba xu du nî hîkākāhese. Tsî amase, ǁîs ǃaroma ta ge tita go ǂkhaiǂkhai tsi. Ti ǀgaiba ta nî sa tawa ǁgauga. Ti ǀons nî ǃhūbaib hoab ai ǂhôahega.’ (Eks. 9:15, 16) Hoa ǃhaodi ge ǀams ai nî ǂan. Jehovab ǀguib a ama Elosa. (Ese. 38:23) Nē ǀkhūs hîna nētsēs xoas ǃnâ ra ǃhoaǃgaohes ge ra ǂâibasen ǁnān hîna. Faraob khami Jehovab ǂgaeǂguisa ūǃoa ǂgao taman. ǀAmosib kōse nî hîkākāhesa. w21.09 18-19 ¶17-18

ǂGaob ǃnâ du ra tsû. Sadu di ǀnamsabe-i ǂnûiǂuihe hâ amaga? Tae-e du nî dī ǀhaohâb ǃnâ hâ ǃgâsan ga. ǃGâi tama hâ xūna sadu ǃoagu mî o, tsûtsû du ra na? ǃÂubasen ǁoa da ge a, hoa khoen ǂhanu xūn ǀguina nî mîsa. (Jak. 3:2) Hoa da ge ǀoasa kurusa ūhâ tama hâ. ǁNā-amaga da ge tā nî buru ǀnîn ga ǃgomsiba hōǃâ o. Tae-en nî mîs ǀkha. Tamas ka ion ga tsûtsû du ra xūna ǂâibasen taman hâ hîna ga ra mî o. ǂÂihō re apostel Paulub di ǁnāmasa: “Î du tanibagu, î du ǀûbagu, nē-i ga nau-i ǃoagu ǀauxū-e ūhâo.” (Kol. 3:13) Aiǃgû re î ǂkhâǃnâ ǂgomǂgomsa omaris ǁanina. ǁÎn ge nēsi sadu ǀnammi tsî ǂkhâǃnâs tsîna kaise ǂhâhâ. (Heb. 10:24, 25) ǀNî ǁaega i ge ǂnûiǂuihe hâ omaris ǁanina ra mû. ǀHaohâb ǃnâ hâ ǃgâsan ǁîn ǀkha ǃhoa ǀû hâ ǃkhaisa. ǁÎn tsîn ǂnûiǂuihe hâ khami. Sida ge ǂgao tama hâ în ǁîn tsîna ǁnāti tsâ. Koa tsî da ge ǂkhamkhoena nî ǂkhâǃnâ. ǁGûnan ge amaba xu a ǂoaǃnâ, xawen hâ ǃkhais ǃaroma. w21.09 29 ¶13-14; 30 ¶16

Kaira ǃgâsa-i tsî ǂkham ǃgâsa-i. Tsîn ga ǀguiba ǁgamǀhao o. On ge hoana ra ǂkhâǃnâgu. (Rom. 1:12) ǂKham ǃgâsa do, sadu di ǃgôaǃgâsiba du ge Jehovab ǃnâ nî ǀgaiǀgai. ǁÎb ra ǂgomǂgomsa ǃoaba-aon ǁîb dina kōǃgâ ǀgaub ǃnâ. On ge kaira ǃgâsana ǀnam-en a ǃkhaisa nî hōǃâ. Tsî i ge ǃgâiaǂgaob ǀkha nî ǁgamba du. Mati i ge Jehovab ǀkhaega a ǃkhōǃoa ǀgausa. Khoe-i di îsasib ge kairasib ǀkha ra bē. Xawe ǁnān hîna Jehovab ǃoagu a ǂhauǃnân ge. ǃKharu ra kurib hoaba ǁîba ǃnāsase ra îsaba. (1Tes. 1:2, 3) Tae-i ǃaromas ǁnāsa a ama? ǁÎn ge ǃkharuge kurigu ǃnâ Jehovab di ǃanu gagaba ge mā-am. În ǁkhāǁkhāhe tsî huihe îxa gagasi ǀgauga omkhâis ǀkha. Sada di ǀō-aisa kaira ǃgâsagu tsî ǃgâsadi tsîna da ǃnāsase ra ǂan khami. ǃGôaǃgâ nî re tsî ǁîna xu ǁkhāǁkhāsen re. O da ge ǁîna ǀō-aisase nî mû. ǀHaohâb ge ǀgaisase ra kai, kaira ǃgâsan. Tsî ǂkham ǃgâsan tsîn hoan ga ǃgôaǃgâgu o. w21.09 7 ¶15-18

Dītsâ tsî da ge nî ǃûisen. Î da ǁgai mâsiga xu ǂgōsen. Tsî ǁgūtsâ î da “ǀkhommi xa ǃkhū,” sida Elob khami. (Efe. 2:4) ǀKhomxaǂgaosib ge tsâsis ǀguisa hî tama. ǀKhomxaǂgaoxa ǃgâsa-i ge ǃgâsana huis xa a ǃgâibahe. Hoa da ge huiba ǂhâhâ khoena a ôa ǁkhā. Sada omaris, ǀhaohâb tsî ǀhûhâsib ǃnâs tsîna. ǂGui khoen hîna huiba ǂhâhâna da ge a hō ǁkhā. ǃGâsa-i ga ǁkhaeǂgaohesa ǂhâ o. O da huiba a mā nî ǁkhā? Aiǁgause, ǂû-e mā nî tsî dī ǁoan a xū-e dība nîs tsîna. ǀHaohâba ǃoa oaǀkhī hâ ǃgâsa-e. Omkhâihe tsî ǁkhaeǂgaohes tsîna ǂhâhâ? ǃGâiǂhôas xa da khoe-e xū-e a mîba ǁkhā? (Job. 29:12, 13; Rom. 10:14, 15; Jak. 1:27) Khoe-i ǂhâsiga ūhâsa da ga ǂan o. O i ge a supu ǀkhomxaǂgaosiba ǁgausa. ǀKhomxaǂgaosiba da ga ǁgau o. O da ge sida di ǀhomsi ǁGûb. “ǀKhommi xa ǃkhū” hâba ra ǂkhîǂkhî. w21.10 13 ¶20-22

Psalmdi 23 ǃnâb ge Daviba ǂhâǂhâsa xūn hînab ge Jehovaba a mābina ra ǂgai khâi. ǁÎb ge Jehovaba ǃûi-aob ase a ūǃoa ǃkhais ǃaroma. Jehovab ge ǁîba “ǂhanu-aisib di daob ǃnâ” ra ǂgaeǂgui. Tsîb ge Daviba ǂgomǂgomsase ra mâxoǀkhā, ǃgâi tsî tsū ǁaegu tsîn ǃnâ. Davib ge ra ǂanǃgâ ǁîb di ûib Jehovab. ‘ǀGâxa ǃû-aidi’ ǃnâ ǃgomsi-i ose hâ tidesa. Tsî ǁaen ǃnâb ge ra ǂkhabuǂâi. ‘ǃGamǃgoab di sommi ǃnâb’ ra ǃgû khami. Tsîb ge khākhoena nî ūhâ. Xawe Jehovab a ǁîb di ǃûi-ao, amagab ge Daviba “xū-i xare-e ǃao tide.” Mâ ǀgaub ǃnâb ge Daviba ‘xū-i xare-e ǃnubu tama hâ i’? Gagasi ǀgaub ai da ga ǃhoa o. Ob ge hoa xūn ǂhâb ge hâ ina ge ūhâ i. ǁÎb di ǂkhîb ge ūb hâ xūna xu ge hâ tama hâ i. Davib ge Jehovab gere mābi xūn ǀkha ge ǂâu hâ i. ǁÎba ge ǃnāsase ǂhâǂhâsaba i xū-i ge, ǁîb di ǀkhaeb. Tsî ǁîb di Elob di ǁkhaubas tsîna. Davib di mîde xu da ge ra ǁkhāǁkhāsen kaise i ǂhâǂhâsasa. Î da ū da hâ xūn ǃaroma, ǀnōsa mûǂuiba ūhâ. w22.01 3-4 ¶5-7

ǃKharu ge kurigu hoagu ǃnân ge. Jehovab ǃoaba-aona khoena gere aoǁnâba. Hîna ge ǃgâ ǂgao tama hâ î na. Aiǁgause, Noaxi ge “ǂhanu-aisib di aoǁnâ-ao” ge iba ǂgui kurina. (2Pet. 2:5) ǁÎb ge gere ǂgom khoen. ǁÎb di haisi-amsa nî ǃgâsa. Xaweb ge Jehovaba nēs nî ī di ge mî tama hâ i. Noaxab ge arka om kai o. Ob ge Eloba ge mî: “Tsîts ge arki ǃnâ nîra ǂgâ, sats tsî sa ôagu. Tsî sa taras tsî sa ôagu di taradi tsîna sats ǀkha.” (Gen. 6:18) Jehovab ge Noaxa arki nî matikōse kais xa mîba o. Ob ge ge ǂanǃâ, ǂgui khoen ǃgâbi tidesa. Hoa khoen arki ai ǂâu tide amaga. (Gen. 6:15) ǂAn da a khami i ge ǀgui khoe-i tsîna Noaxa ge ǃgâ tama hâ i. (Gen. 7:7) Jehovaba gere ǂâi, Noaxi ge ǃgâi aoǁnâ sîsen-e dī tama hâ i di? Hî-i, ǁîb ge di ge ǂâi tama hâ i. Jehovab ge Noaxi ǀkha ge ǂkhî i. ǁÎb ge Jehovab ge ǂgān bî sîsengu hoaga ǂgomǂgomsase a dī amaga.—Gen. 6:22. w21.10 26 ¶10-11

ǂÂis ǀguisa hî re Rutsa mati gere tsâ. Nē mîdes ge Naomisa xu ǁnâu o. Ruts ge dī ǁkhās an hoana ge dī Naomisa huis ǃnâ. Ruts ge ǁîs ǀkha gere ā, ǁkhaeǂgaosi. Tsî ǂgui tsēde ǁîs ǀkha ge ǃgû. Nēn hoan khaoǃgâs ge Naomisa ge mî: “ǀKhaiǃnâseb ge ǃKhūba go ǁaruhā kai te.” Nē mîdi ǀkhas ge Naomisa Ruts ge māsi. Huib xas tsîna ge ǂâi tama hâ i, ǁîs xoǀkhā ge mâ isa. Nēs ge ǀnîsi Rutsa kaise ge tsûaǂgao kai. Xawes ge Naomis tawa ge hâ. (Rut. 1:3-18) Nētsēs ge ǃgâsas hîna ǂgui ǃgomsigu ǃnâ ra ǃkharusa. Tsûtsû da ra ǀgaub ǃnâ sada ǀkha a ǃhoa ǁkhā. Māda hâ huib hoab khaoǃgâ. Xawe da ge tā nē xūna ǂgaob ǀkha nî ū. Sada ǃgâsas hîna ǃgomsib ǃnâ ra ǃkharusa da ge ra mâxoǀkhā. Tsî Jehovaba nî ǂgan îb hui da, î da ǂan mati da sada ǃgâsasa a hui ǁkhāsa. (ǂKhm. 17:17) ǃGâsas hîna ǂhâsiba ūhâs ge ǀnîsi ǂgurose sida huiba ūǃoa tide. Xawe i ge sida di ǂgomǂgomsa ǀnamma nî huida, î da ǁîs tawa hâ ǀgara.—Gal. 6:2. w21.11 11 ¶17-19

Elobmîs ǃnâ ra ge “ǃanu” tsî ‘ǃanusib’ ti hâ mîra. Sorosi ǃanusib tsî gagasi ǃanusiba ǃoa ra ǁnaeǁgau. Nē mîra ge Eloba ǃoabas ams ai ǂnûiǂûihe hâ. Dis tsîna a ǂâibasen ǁkhā. ǀNî mîdi ǃnâ da ga sorosise ǃanu. Tsî Jehovaba ǂhâbab hâ ǀgaub ai ǃoaba. Tsî ǁîb ǀkha ǀgū ǀhōsagusisa ūhâ o. O da ge ǃanu khoen ase a ǂgaihe ǁkhā. ǀŌ-aisa i ge a, ǀoasa kurusa da ūhâ tama hâ. Xaweb Jehovab hîna hoase ǃanuba. ǀGū ǀhōsagusisa sada ǀkha ra ūhâ ǂgaosa. Jehovab ge hoa ǀgaugu ǃnâ a ǃanu. Nēsa da ge ǀhomǃgāgu hîna. Jehovab trons ǀgūse ra mâga xu a ǂan. ǀNîgu âgu ge sao ra xūna ge mî: ‘ǃAnu, ǃanu, ǃanub ge Jehovab ǂnubidi diba.’ (Jes. 6:3) Nē ǀhomǃgāgu ge ǀgū ǀhōsagusisa ǁîgu ǃanu Elob ǀkha ūhâ. ǁÎgu tsîn a ǃanu amaga. w21.12 3 ¶4-5

ǂKhamkhoen ge ra ǂâiǂhansen, mâǀgaub ûib dib a ǃgâi ǃkhaisa. Skol ǀapemā-aon, Jehovaba ǃoaba taman. Tsî omaris ǁanin ge a ǂkhâǃnâ da ǁkhā. Î da ǀgapi ǁkhāǁkhāsensa ū. Tsî ǃhūbaib ǃnâ ǂgui mari-e sī kurubasen. Nēti i ǁkhāǁkhāsen di ge ǁîn ǁaeba kaise nî ū. Xawe ǀnî ǃâb ai în ge ǁgûn tsî ǀhōsan. Hîna ǀhaohâb ǃnâ hâna ǂkhamkhoena ra ǂkhâǃnâ în. ǁÎn di ûiba Jehovaba ǃoabas ǃnâ sîsenū. Tae-e ǂkhamkhoena nî hui. Hîna Jehovaba a ǀnamna, în ǃgâi mîǁguiba dī? ǁÎ-i ge ǃgâiba nî hō Efeseǁîn 5:15-17 sa î ga khomai tsî ǂâiǃgâ o.  Nē xoade î ga ǂkhamkhoe-e khomai toas khaoǃgâ, î ge nî dîsen: ‘Mâsa a ‘Jehovab di ǂâi?’ Mâ mîǁguiga ǁîba nî ǂkhî kai? Mâ ǀgauga nî huite, î ta ti ǁaeba ǃgâise sîsenū?’ ǂÂihō re ‘tsēdi ge ǂkhabab xa ǀoa hâ.’ Tsî nē ǃhūbaib ǁGâuab ǂgaeǂguis ǃnaga hâb ge ǀgūǁae nî ǀam. w22.01 27 ¶5

Mâ ǁaeb ge Jakobuba ǂgomǂgomsa sao-ao kai, Jesub tiba? Jesub ge ǁōba xu khâisa māhes toas khaoǃgâ. Îb ge “Jakobub xa ge mûhe, ǁnās khaoǃgâ apostelgu hoagu xa.” (1Kor. 15:7) Jesub ǀkhab ge ǀhao toas khaoǃgâb ge, Jakobuba ge ǁkhāǁkhāsabe kai. ǁÎb tsîn ge ǁnāpa ge hâ i. Apostelgu hoagu ge mîmâihe hâ ǃanu gagaba. Jerusalems ǃnâ ǃau hâ io. (ǃNǃkh. 1:13, 14) Egab ge Jakobuba aiǂhanuba ge ūhâ i îb. ǂGuro Xristeǁîn di ǂgaeǂguira soros di ǁanib ase ǃoaba. (ǃNǃkh. 15:6, 13-22; Gal. 2:9) Tsîb ge 62ǁî kurib aiǃâ ǂkhauhesa Xristeǁîna ǃoa, sîǂkhani-e ge a xoa. ǁNā sîǂkhanis ge nētsē sida ǃaroma a ǃgâi. Nēsi da ga ǀhommi ǃâubasensa ūhâ. Tamas ka io ǃhūbaib di ǃâubasensa ūhâ xawes tsîna. (Jak. 1:1) ǂGuro ǁaeb di ǂansabeb, Josefusi ǃoagub ge Jakobuba ge ǃgamhe. Jodeǁîn di ǀGapi Pristeri Ananiab ǂkhami di mîdi ǃoagu. Jakobub ge ǂgomǂgomsase ge hâ Jehovab ǃoagu. ǁÎb di ǃhūbaisi ûibab nî dītoas kōse. w22.01 8 ¶3; 9 ¶5

ǀGui xū-i hîna da nētsēs di xoasa xu ra ǁkhāǁkhāsen i ge, tā da ge nî ǃâubasen. Î da Jehovab xa ǁkhaubahe hoa ǃgomsina xu. Jesub ge ǃâitsâhe khami da ge sada tsîna nî aiǂhomisen. Î da ǁgau ǂgomǂgomsa da a sa ǁōba da ga hōǃâs tsîna. (Mat. 16:24, 25) Xawe da ge ǂgomǃgâsiba ūhâ Jehovab mā-am tidesa. Î da tani ǁkhā da as xa ǃnā hâse ǃâitsâhe. (1Kor 10:13) ǀNî hâ xū-i hîna da Jesub di aiǁgausa xu ra ǁkhāǁkhāsen i ge. ǃGomsina da ge nî hōǃâ xū-e da dī tama hâ hînas tsîna. (1Pet. 2:19, 20) ǁNān hîna ra mâǃoadan ge nēsa ra dī. Sida tsū xū-e dī hâ amagas ose. Xawe sida ‘ǃhūbaib di ǃâ’ tama hâ amaga. Tsî da ǁnās ǀkha amaba ra ǂhôa amaga. (Jhn. 17:14; 1Pet. 4:15, 16) Jesub ge ge ǃnâuǃā tae-i ǃaromab ge Jehovaba mā-amsa ib ǃgomma tsâ. Xawe ǀnî ǂgomǂgomsa ǃoaba-aon Jehovab din tsîn ge ǀnî ǁaega ra dî. Tae-i ǃaromab Jehovaba ra mā-amsa în ǀnî xūna ī. (Hab. 1:3) Sida ǀkhomxaǂgaoxa tsî ǃnūǃnâxa Elob ge ra ǁnâuǃā. Nēti ra dî khoen ǂkhabusa ǂgomsa ūhâ tama hâsa. ǁÎn ge ǁîb ǀguib a mā ǁkhā ǁkhaeǂgaosa ǂhâhâ.—2Kor. 1:3, 4. w21.04 11 ¶9-10

Jehovab ge sida ǀgorede nî ǃeream, ǁîb ǂâis ǀkha i ga hâo. Tsî i ga ǀnammi tsî ǃgôasib ǃkha dīhe o. ǂAn da ge a Jehovab ǃoabahesa anu hâsa. ǁNā-amaga da ge sida ǁkhāsiba ra mābi ǂgao. ǀGui ǀgaub ǁnāsa dīs dib ge ǁîba ǃoa ǀgoresa. Xoadi ge sada di ǀgorede ǃgâise aiǂhomisa ǀanǀanǁguibadi. Hîna tabernakeli tsî ega tempeli tawa gere ǁguibahe di ǀkha ra ǀgopeǀnō. Nē ǀanǀan ǁguibas ge Eloba gere ǂkhîǂkhî. ǁKhā ǀgaub ai i ge sada ǀgoredi ǂgaoba xu hâde. ǁÎba a ǃgâiba supu mîde da ga sîsenū o. (ǂKhm. 15:8; Deu. 33:10) ǀNammi tsî ǃgôaǃgâsib tsîna da ga Jehovaba ǀgores ǃnâ-ū ǁgau. Ob ge ǁnās xa a ǃgâibahe. ǁÎb ge ǂhâba hâ i da sada di ǂâiǂhansendi, ǃâubasens. Tsî turagu tsîna mîba bi. Jehovab ǀkha du ǀgores ǃnâ nî ǃhoas aiǃâ. Tae-i ǃaroma du aibe ǁaeba ū tsî ǂâiǃgâ tama hâ. Tae-e du nî mîsa? Nēsa du ga dī o, o du ge ǃgâi “ǀanǀan ǁguibasa.” Sadu ǀhomsi ǁGûba nî mā. w22.03 20 ¶2; 21 ¶7

Armagedons ai i ge sida xu hâ tide, ham i Jehovab ǀkhoma nî hō. Tamas ka io hō tidesa, mîǁguisa. (Mat. 25:34, 41, 46) Sada Jehovab di ǀgoraǃgâs ǃnâ ǂgomǃgâ î da nî. Tamas ka io ǃnôa-ai ǃkhai i asen sida ǃaroma nî ī? Amabes ǃnâ da ge nēsi sida ǂgomǃgâsiba. Jehovab ǃnâ nî ǀgaiǀgai. Î da ǁnās ǀkha ǀoasase ǁîba. Hānîǁaeb ǃnâs tsîna ǂgomǃgâ ǁkhā. Mûnanais ǀguisa hî re. Mati da Elob di ǀasa ǃhūbaib ǃnâ nî tsâsa. Ama tama ǂgomdi ge ǁkhapa hâ tide. Tsîn ge marina ǀnam khoena ǁkhapa hâ tide. Tamas ka io ǂhanu i hîna khoena ǁgâiǀā. Tsî ǃgoma tsâ kai hâ-e, nē ûi kurigu hoagu ǃnâ. Sorosi ǀaegu, kairasis, ǀnamsabe-e ǁōb ǃnâ ǂoaǃnâs ge. ǁKhapa hâ tide tsî ǁnās ǀkha hōǃâ-e tide. ǁGâuab tsî demongu ge 1 000 kuriga nî ǂgānam ǂgāhe. Hoa ǁgai xūn hîna gu gere dīn ge ǁkhapa hâ tide. (J.ǂHa. 20:2, 3) Kaise da ge nî gangan. Jehovab ge xūna gere dī ǀgaub ǃnâ da ge ǂgomǃgâ amaga. w22.02 6-7 ¶16-17

Jesub ge ǂkhababa, ǂkhabab ǀkha ge mā-oa tama hâ i. Xawe ǁîb ge ǁnās xa ǃnāsa-e gere dī. ǁÎb ge ǁnā aiǂhanuba ū tsî ǂkhîba gere kuru. Tsî naun tsîna gere ǂkhâǃnâ în ǂkhîba kuru. ǁÎnab ge gere ǁkhāǁkhā ǂkhîban nî kurusa ǁîn di ǃgâsa-i ǀkha. Jehovab ǁîn di ǃoabasa nî ūǃoasan ga ǂhâba o. (Mat. 5: 23, 24) ǁÎb ge mâ ǃnās hoasa ǁîb di apostel ga gere hui î gu. ǁÎgu ǂnoagus ham-i a ǃgâis disa ǃkhamǃoa. (Luk. 9:46-48; 22:24-27) ǂKhîb di kuru-ao i ase hâs xa da ge. ǃNāsa-e nî dī î da tā ǁnâusagude ǃaroma. ǁNā aiǂhanuba da ge nî sîsenū. Tsî khoen ǀkha ǂkhîba nî kuru. Tsî ǁnās ǀkha sida ǃgâsana nî ǂkhâǃnâ. În ǁîn di ǁnâusagude ǃhoaǃgao. (Fil. 4:2, 3; Jak. 3:17, 18) Dîsen ǁkhā da ge a: ‘Tae-e ta māsenxase a māǁnā ǁkhā, î ta ǂkhîba nau khoen ǀkha kuru? ǃGâsab tamas ka io ǃgâsas ga tita tsûtsû. O ta ǁî-i ǀkha ra ǁaixa ǀgara? Nau khoe-e ta ra ǃâu î ǁî-e ǂkhîba kuru. Tamas ka io ta tita ǂgurose ǂkhîba ra kuru. Nēsi i ga nau khoe-e. ǁNā ǁnâusagusa ga ra ǃaroma xawes tsîna?’ w22.03 10 ¶10-11

ǂGui kurina ǃkharu tsîs ge Elobmîsa ge kēbo. Elob khoen kaise nîra ‘māsenxasa.’ În Jehovaba ǃoaba Jesub daoǁgauden ra sao hîna. (Psa. 110:3) Nē kēbos ge amabes ǃnâ nētsē ra dīǀoaǀoahe. Mâ kurib hoaban ge Jehovab di ǃoaba-aona. Miliun īrga aoǁnâ sîsen-i ǃnâ ra dī. Nē sîsenan ge matare-e tamase ra dī. Nēsan ge māsenxase ra dī. ǁÎn tsîn ge ǁaeba ra ū în ǁîn di ǃgâsana ǂhân hâ xūn ǀkha hui. ǂKhâǃnâ tsî ǁîn di ǂgomsa ǀgaiǀgai. ǁGaumâisa ǃgâsagu ge ǀhaode ra aiǂhomi. Tsî ǁîgu ǃgâsana ra sari ǂkhâǃnâ nîs ǃaroma. Tae-i ǃaroman Jehovab ǃoaba-aona nē sîsengu hoaga ra dī? ǀNammi—Jehovaban ūba hâ ǀnammi. Tsî ǁîn ǁanǁare-aonan ūba hâ ǀnammi tsîn ǃaroma. (Mat. 22:37-39) Jesub ge ge ǁgau nau khoen di ǂhâsigu a ǂhâǂhâsasa ǁîb digu xa. Hoana da ge ra dī î da ǁîb di aiǁgausa ǁgae. (Rom. 15:1-3) Nēsa da ga dī o, o da ge ǀkhaega nî hō. w22.02 20 ¶1-2

Israelǁaes ge ǃhanasa kaise ge ǀnam i. Tsî tsēs ǃaroma gere ǃgaehe khoe-i ge tsēs ǀams ai gere matare-e. Tsēs ǃaroma ra ǃgaehe khoe-i di marisa ǃkhō-oas ge a ǃaroma ǁkhā. Î-i ǁî-e tā, ǁî-i omarisa kōǃgâ. Jehovab ge ge mî: ‘Tsēs ǃnâts ge ǁîb marisa nî mā.’ (Deu. 24:14, 15; Mat. 20:8) Nētsēn ge ǂgui khoena ǀgui ǃnās. Tamas ka io ǀgam ǃnāra ǁkhâb ǃnâ ra matare-e. Levitikus 19:13 ǃnâ ra hōhe mîmās ge nētsēs tsîna nî sîsenūhe. ǀNî khoen ge ǃgaen ra khoena kaise ǀorose ra matare. Tsî nē khoena ra ǃgae khoen ge a ǂan. ǀOro marisan ga khoena mā xawen nî sîsensa. ǁNā ǀgaub ǃnân ge ‘ǃgae-aona khoen marina ra ǃkhō-oa.’ Xristeǁî-i hîna khoena ra ǃgae i ge ǂhanu ǀgaub ǃnâ ǁnāsa nî dī. w21.12 10 ¶9-10

Nēti i ǃgomsin hînab ge ǃkharu ǃnân. ǃAromab ge Jesuba ǀnîsi kaise ge ǁgâ i. Huibab ge ge ǂhâhâ i, ib ǁîb di ǁgâsa ūbē. Jesub ge ǂâi tama hâ i, ǂkhabusasib asa tsâb ra ǀguab xa ǃhoasa. ǁNās khami da ge sida tsîna tsâsiga sida di ga nî ǀgoragu. ǀNîsi da ge sida ûib hoaba khoe-e tsîna mîba tama hâ tae-e da ǂhâhâsa. Xaweb ga ǁaeba a hā huiba da ǂkhâ hâba. O da ge tā nî tao nau khoen ai huiba ǂgansa. Aiǁgause kaira da ga tamas ka io da ga ǃgâi ǂurusiba ūhâ tama io. O da ǀnîsi nau khoena a ǂgan ǁkhā în hui da. În ǀaeǃkhō-ao-i tamas ka io ǁamaxu ǃkhaiba ǃoa ǃnari-ū da. ǀNîsi da ga tsûaǂgao tamas ka io ǂkhabuǂâi o. O da ge ǀhaohâb ǃûi-aob tamas ka io kai ǀoa hâ Xristeǁî ǀhōsa-e a ǂgan ǁkhā i ǃgâ da. Tamas ka io i ge ǁî-e ǃgâi mîs hîna ra omkhâisa a mîba da ǁkhā. (ǂKhm. 12:25) Ada ǂÂi hō re sida ǀnamǀnamsa ǃgâsan ǀnam da sa. Tsî “ǂōǂōsib” ǁaeb ǃnâ ra hui da ǂgaosa. (ǂKhm. 17:17) Xawen ge ǁîna sida tsâsib tsî ǂâis tsîna a khomai ǁoa. ǁÎn ge a ǀū tae-e da ǂhâhâsa. Sada ga ǁîn ai huiba ǂgan tsî mîba nî tama io. w21.04 11-12 ¶11-12

ǂGui da ge ǃgomsiba ūhâ ǀkharaǀkharana dīs ǀkha. ǀNîn hîna kaxu ǁaeba ǀoasase. Aoǁnâ sîsen-i ǃnâ sîsen hân ge. ǀNî hâ ǁgaumâide ge māhe. ǀNîn ge kaisen a ǀnam aiǂhanu-e. ǁÎn kurin xa ǃaromahe hâse ge ǀam kai. ǁNâuǃāxa i ge a nē ǀkharaǀkharan ga sada tsâsiga tsâǀkhā o. ǀKharaǀkharasen ra mâsigu ǃnâ da ge a mâǀgai ǁkhā. Jehovab ūhâ mûǂuiba da ga sada tsîna ūhâ o. ǁÎb ge kai xūna nētsē ra dīǀoaǀoa. Tsî da ge sada kai aiǂhanuba ūhâ. ǁÎb di sîsenǁae-aose is diba. (1Kor. 3:9) Jehovab sada ūba hâ ǀnammi ge dawa tide. Mîǁgui-i hîna ǀapeǂhumis ǃnâ ra dīhe î ga sado tsâǀkhā o. Tā ǂgui ǁaeba tae-i ǃaromas go nē ǀkharaǀkharasa a dīhe. ǃKhais ai sadu ǂâisa ǂnûi re. ‘ǃKharuge tsēdi’ ǃoa kō-oas xa. ǀGore tsî ǃgâiba nē ǀkharaǀkharan ǃnâ mû re. (Aoǁn. 7:10) ǃGâi ǂâiǀgauba da ge nî ūhâ, nēs ǃaroma da ge ǂkhîb tsîna ǀkharaǀkharasen ra mâsigu ǃnâ nî ūhâ. w22.03 17 ¶11-12

Hamna ǃoab Jehovaba ǂgomǂgomsa ǀnamma ra ǁgau? Elobmîs ge ra mî ǂgui xūna da a ǀnam ǁkhāsa. “ǃHanasîsenaogu,” “ǂauxûib tsî olib,” ‘ǁnamas,’ ‘ǂans,’ tsî “gā-aisiba” ǀoro xūna ǂgâis ǃaroma. (2Kro. 26:10; ǂKhm. 12:1; 21:17; 29:3) Xūna da ge ǂgomǂgomsa ǀnamma a ǁgau ǁoa. Khoen ǀguin ge nē ǀnamma a ǁgauhe ǁkhā. Xawe Jehovab ge ǂgomǂgomsa ǀnamma. Mâ khoe-i hoa-e ǁgau tama. ǁÎb ge nē ǀnamma. ǁNān hîna ǁîb ǀkha ǀgū ǀhōsagusisa ūhâna ra ǁgau. Sada Elob ge ǁîb ǀhōsan ǃoa-ai a ǂgomǂgomsa. ǁÎb ge ǃgâi ǂâibasensa ǁîna ūba hâ. Tsî ǀnam nî ǀû tide. Jehovab ge hoa khoena ǀnamma ge ǁgau. Jesub ge Nikodemub di ǀon hâ khoeba ge mîba: “ǁNātikōseb ge Eloba ǃhūbaiba ge ǀnam. Ob ge ǁîb di ǀguise ǃnae hâ ǀGôaba ge mā. ǁÎb ǃnâ ra ǂgomn hoan kāǁō tidese, xawen nî ǀamo ûiba ūhâse.”—Jhn. 3:1, 16; Mat. 5:44, 45. w21.11 2 ¶3; 3 ¶6-7

ǃGomsina da ge nē ǁgai ǃhūbaib ǃnâ ra hōǃâ. Tsî da ge hānîǁaeb ǃnâ noxoba ǂgui ǃgomsina nî hōǃâ. (Mat. 24:21) ǂÂi da ge ra ǁaeb nē ǃgomsin hoan nî bēba. Tsî da ge ǁîn xa nî ǀuru. Tsî i ge ǁkhawa nēti ī ǃgomsina ī tide. (Jes. 65:16, 17) ǁNā-amaga da ge nî aiǃgû. Tsî sida tani ǀnamxasiba nî ǀgaiǀgai. Tae-i ǃaroma? Jesub ge nēti a mî amaga: “ǃNūǃnâxasib âdu ǃnâ du nî sadu ûiba hōbasen.” (Luk. 21:19) ǂÂi da ga ra o. Matin ǀnî ǃgâsana sida ūhâ ǃgomsin ǃnâ ra mâǃkharu ǀgausa. Os ge ǁnāsa sida tani ǀnamxasiba ra ǀgaiǀgai. Ham-e a ǃgâi aiǁgau tani ǀnamxasib xa? Jehova Eloba. ǁNā ǃereamsa ra buru kai da? Xawe ǁnās xa da ga ǂâi o. O da ǁnâuǃā tide. ǁGâuab ge nē ǃhūbaiba ra ǂgaeǂgui. ǁNā-amagan ge ǂgui ǃgomsina hâ. Jehovab ge ǀgaiba ūhâ, nē ǁgai ǃhūbaiba dīkākāsa. Tsî hōǃâ da ra ǃgomsin tsîna a ǀam kai ǁkhā. Xaweb ge ǁîba ǂhanu tsēsa ǃâu hâ, îb ǁnāsa dī. (Rom. 9:22) Xawe Jehovab ge tani ǀnamxasiba ra ǁgau. ǁNā ǁaeb hînab nî nē ǁgai xūna dīkākās kōse. w21.07 8 ¶2-4