Februarib

Nētsēs mîsa tae-e ra ǂâibasen? Jesub ge ra ǁguiǃā, nauna ǃnāsase ǀnamsa aitsama ǀnamsens xa. Tamas ka io ǀnammi hîna Xristeǁî-e ǂkhâǃnâs tsîna a di ǁkhā-e, ǂhâbasa i ga o ǁî-i ǃgâsa-i ǃaroma ǁōsa. Elobmîs ge ra ǁkhāǁkhā da, ǀnammi kaise a ǂhâǂhâsasa. Aiǁgause, ǂgui khoen ge saora xoadi xa a ǃgâibahe: “Elob a ǀnam.” (1Jhn. 4:8) “Sa ǀgūkhoe-ets ge sats ǁkhāts khami nî ǀnam.” (Mat. 22:39) “ǀNammi ra ǂgui ǁorena ǃgū-ai.” (1Pet. 4:8) ‘ǀNammi ge tātsē ǀuni tide.’ (1Kor. 13:8) Nē xoadi tsî ǀkharan tsîn ge ra ǁgau da, kaise i a ǂhâǂhâsasa nē îxa ǀgauba ǁgauǂuisa. Ama ǀnammi ge Jehovaba xu ra hā. ǁNān hîna Jehovab di gagab tsî ǀkhaeba ūhân ǀguin ge ama ǀnamma ǁîn ǁaegu ūhâ ǁkhā. (1Jhn. 4:7) ǁNā-amagab ge Jesuba ge mî, khoen nî ǁîb di ama saosabena ǂanǂuisa ǁîn ūba gu hâ ǀnammi ǃnâ-ū. Jesub ge mî khami î ge ǂguina, ǁîb di saosaben ūba gu hâ ǀnammi ǃnâ-ū ra mûǃāhe. w23.03 27-28 ¶5-8

Nauna du ǃnāsase a ǀûba ǁkhā? ǀNîsi du ge khomai tsî a ǂâiǃgâ ǁkhā Elobmîs di aiǁgaudi, hîna ge māsenxase ǀûba tsî māsenxase ǀûba tama în tide. Jesub aiǁgaus xa ǂâi re, ǁÎb ge māsenxase nauna gere ǀûba. (Luk. 7:47) ǁÎb ge dīǁoan ge i xūna kōǃkharu tsî dī ǁkhān ge i xūn ai gere kō. Xawe Jesub ǁaeb Farisegu ge ‘nauna’ ge ǃgôa tama hâ i. (Luk. 18:9) Nē aiǁgaudi xa du ga ǂâiǃgâ toa o, dîsen re: ‘Tae-e ta nau khoen ǃnâ ra mû?’ ‘Mâ ǀgaugu ǁîn du gu ai ta ti ǂaisa ra ǂnûi ǂgao?’ Khoe-e ǀûbas ǀkha du ga ǃgomsiba ūhâ o. ǁÎ-i di ǃgâi ǀgaugu hoaga xoamâi re. ǁNāpaxu dîsen re: ‘Matib Jesuba nē khoe-e ra mû? ǁÎ-eb nî ǀûba?’ Nēti i dîde dîsens ge nî hui da, î da sida ǂâiǀgauba ǀkharaǀkhara. ǂGurose da ge ǀnîse ǃgarise nî sîsen î da, sida go tsûtsû khoe-e ǀûba. Nēs ai da ga sîsen, o da ge ǃnāsase māsenxase nî ǀûba. w22.04 23 ¶6

ǂHaiǂhais ǂkhanîs ǃnâ da ge ǀgurun, hîna Elob khākhoena ra ǂnûǁkhaeban xa nî ǃhoa. Aiǁgause, i ge ‘huriba xu ǀguruba ra ǂoaxa, hû danadi tsî disi ǁnâgu tsîna ūhâba.’ (J.ǂHa. 13:1) ǁNā ǀgurub ge ‘ǀnî ǀgurub ǃhūba xu ra ǂoaxab’ xa ge sao-e. Nē ǀgurub ge draki tamas ka io drakoni khami ra ǃhoa. Tsî ‘ǀae-e ǀhomma xu ra ǁnāǁgôaxa’ kai. (J.ǂHa. 13:​11-13) ǁNāpaxu da ge ǀkhara ǀguruba ra mû, ‘ǀgaisa ǀapa ǀguruba’ ǀai-aos xa ǃgapihe hâse. Nē ǃnona ǀgurugu ge Elob khākhoen hîna, Jehovab tsî ǁîb Gaosib ǃoa-ai ra ǃkham na ra ǂnûǁkhaeba. ǁNā-amaga i ge kaise ǂhâǂhâsa, î da ǁîna ǂanǂui. (J.ǂHa. 17:​1, 3) ǁNâuǃā da ge nî ǀgurub tsî ǀai-aos tae-e ra ǂnûǁkhaebasa. ǃGâi ǀgaub nēsa ǁnâuǃās ge Elobmîsa mā-amsa is ǁguiǃā. ǂGui ǂkhōdi hîna ǂHaiǂhais ǂkhanis ǃnâ ǁguiǃāsa di ge, nau Elobmîs ǂkhanidi ǃnâs tsîna a ǁguiǃāsa. w22.05 8-9 ¶3-4

ǀNî ǃgâsan ge ǀaeb mâsib, kairasib tamas ka io ǀnî hâ mâsigu xa ǃaromahe hâse, ǂgurosen ge Jehovaba gere ǃoaba khami ǃoaba hō tama hâ. ǀNai du gere dī xū-e, du ga dī hō ǁoa o. O dîsen re. ‘Jehovaba tae-e tita xu ǂgaoǀkhā hâ?’ Jehovab ge ra ǂhâba, î du ǁkhā du a i hoa-e dī. Nēs xa ǂâi re: ǃGâsas ge 80 kurixas a hîna, 40 kurixas ge io, os ge aoǁnâ sîsenni ǃnâ ǀoasase gere sîsen ǀgaub xa ra ǂâi tsî ra ǂkhabuǂâi. ǁÎs ge ra ǂâi, Jehovab ǁkhās a i hoa-i, ǀkha ǂkhî tama hâsa. Xawe ǁnāsa a ama? Nēs xa ǂâi re. Nē ǃgâsas ge 40 kurixas a, Hîna Jehovaba ǁkhās a i hoa-e gere dībasa. Tsî 80 kurixas a hîna noxoba Jehovaba ǁkhās a-e ra mā. Os ge nēsa ra ǁgau, ǁîs ǁkhās a i, hoa-e Jehovaba gere dībasa, tsoatsoasa xu nēsis kōse. ǁKhā da a i, hoa-e da ga dī o, Ob ge ǁÎba “kaise nî ǂkhî.” (ǀGopeǀnō re, Mateub 25:​20-23 sa.) Dī ǁoa da a i ai, da ge tā ǂâisa nî ǂnûi xawe dī ǁkhā da a i hoa-i ai, ǁnās ǂkhîba nî mā da xui-ao. w22.04 10 ¶2; 11 ¶4-6

ǂHaiǂhais 21ǁî danaǃâs ge 144 000, ǂhauhesana ‘ǀasa Jerusalems’ ǀkha ra ǀgopeǀnō. ‘Nē ǃās ge 12 ǃgaoǃgaoga ge ūhâ i.  Tsî ǁîgu ai i ge 12 apostelgu ǁKhaob digu di ǀonde ge xoasa i.’ (J.ǂHa. 21:​10-14; Efe. 2:20) Nē ǃās ge nau ǃādi khami ī tama hâ. ǁÎs di ǃgangu ge ǃhuni [goud] ǀuriba xu a kurusa. Tsî 12 hekti ge karaba xu a kurusa, mīrgu tsî fondasieb ge îsa ǀuide xu kurusa. Tsî nē ǃās ge ǃgâise ǀnōǂuisa. (J.ǂHa. 21:​15-21) Xaweb ge Johaneba ge mû, xū-i noxoba a ǀkhaisa. Kō re, Johaneb tae-e sao rase ra mîba dasa: ‘Tsî ta ge ǁîs ǃnâ tempel-e mû tama ge i; Jehova Elob Hoaǀgaixab a ǁîs di tempel, tsî ǁKhaob tsîna xui-ao. Tsî ǃās ge sores tsî ǁkhâb tsîra ge ǂhâba tama hâ i, ǁîs ǃnâ ra nî ǃnâse; ǂkhaisib Elob dib ǁîsa gere ǃnâǃnâ, tsî ǁKhaob ge ǁîsa lampse hâba i xui-ao.’ (J.ǂHa. 21:​22, 23) ǁNān hîna ǀasa Jerusalemsa ra kuruǂuin ge Jehovab ǀkha ǀguiba nî hâ.—Heb. 7:27; J.ǂHa. 22:​3, 4. w22.05 17-18 ¶14-15

Jehovab a sida Kuru-ao, ǂHanub mā-ao tsî a ǀGoraǃgâ-ao xaweb ge noxoba a sida di ǀnamxaǃnâ ǀhomsi ǁGû. (Psa. 100:3; Jes. 33: 22) ǁÎb ǃoagu da ga ǁore tsî amabes ǃnâ ǃhausen o, ob ge sida ǀûbas di turab ǀguiba ūhâ tama xaweb ge ra ǀûba da ǂgao. (Psa. 86:5) Kēbo-aob Jesajab ǃnâ-ūb ge Jehovaba ǀnamxaǃnâ ǁkhaeǂgaosa ge mā: ‘Sadu ǁoren ga ǀaob khami ǀapa, xawen ge gūǀûn khami nî ǃuri.’(Jes. 1:18) ǀOasa kurusa da ūhâ tama amaga da ge mî tsî xūna ra dī, nau khoena ra tsûtsûna. (Jak. 3:2) Xawe ǁnās ge ǂâibasen tama hâ, ǀgū ǀhōsagusisa da nau khoen ǀkha a ūhâ ǁoa di. Ūhâ ǁkhā da ge a, nau khoena ǀûbasa da ga ǁkhāǁkhāsen o. (ǂKhm. 17:9; 19:11; Mat. 18:​21, 22) ǂKhari ǀgaugu ǃnâ da ga tsûtsûgu o, ob ge Jehovaba ra ǂhâba î da ǀûbagu. ǃGâi ǃaromasa da ge ūhâ, ǁnāsa dīsa. Tsî nēn hoan ǂam-aib ge Jehovaba māsenxase ‘ǃnāsase’ nî ǀûba da.—Jes. 55:7. w22.06 8 ¶1-2

Nau ǃgâsan ǀkha ǀgopeǀnōsens ge a ǁkhōǁkhōsa. Xawe da ge ǁîn di aiǁgaude xus tsîna a ǁkhāǁkhāsen ǁkhā. Hā re, î da Jesub di aiǁgaus xa ǁkhāǁkhāsen. Jesub khami da ge ǀoasa kurusa, ūhâ tama hâ xawe da ge ǁîb di ǀgaugu tsî dīb gere xūna xus tsîna a ǁkhāǁkhāsen ǁkhā. (1Pet. 2:21) Jesub di aiǁgausa da ga ǃgâise sao o, o da ge Jehovaba ǂhanu ǀgaub ǃnâ a ǃoaba ǁkhā. Elobmîs ǃnâ da ge ǀoasa kurusa ge ūhâ tama hâ i. Xawe Jehovaba ǂgomǂgomsase gere ǃoaba khoen di aiǁgaude ūhâ, ǁgae da nî de. Gao-aob David di aiǁgaus xa ǂâi re, Jehovab ge ǁîba “ti ǂgaob ǃoa ī aob” ti ge mî. (ǃNǃkh. 13:22) Davib tsîn ge gere dīsā. Xawe da ge ǁnān hoan ǂamai, ǁîb di aiǁgausa xu a ǁkhāǁkhāsen ǁkhā. Tae-i ǃaroma? ǁîb ge ǁnamaheb ge o, nēsa ge ūǃoa. Tsîb ge ge ǁgau, ǁîb ge ǃhausensa. ǁNās ǃaromab ge Jehovaba, ǁîba ge ǀûba.—Psa. 51:​3, 4, 10-12. w22.04 13 ¶11-12

Elobmîs ge ra ǂanǃgâ ǁōb a khākhoesa. (1Kor. 15:​25, 26) ǀNam da a khoe-i ga ǀaesen, o da ge a ǂâiǂhansen ǁkhā ǁōb xa. Tae-i ǃaroma da ǁōba ra ǃao? Jehovab ge ǀamosib kōse ûis di turab ǀkha kuru da amaga. (Aoǁn. 3:11) Xawe ǁōb xa ǀnōsa ǃaoba ūhâs ge a hui da ǁkhā, î da sida ûiba ǁkhauba. Aiǁgause i ge a ǂkhâǃnâ da ǁkhā, î da ǃgâi mîǁguiga dī, ǃgâise ǂû tsî sorosa ǃgâi mâsib ǃnâ ūhâ. Tsî dokterna xu huiba hō tsî sōǀôan tsîna ôa ǂhâbasa i ga o. Tsî sida di ûiga ǁkhōǁkhōsa mâsib ǃnâ mâisa xu nî ǂgōsen. ǁGâuab ge a ǂan sida ûiba da ra ǃgôaǃgâ ǃkhaisa. Tsîb ge ra mî sida ûiba sâus ǃaroma da xū-i hoa-e nî dīsa. Sida ǀhōsagusis hîna da Jehovab ǀkha ūhâs tsîna da ge nî māǁnâ ûitsamase hâs ǃaroma. (Job. 2:5) Xawe ǁGâuab ge ǂhanu tama hâ. ‘ǁŌb di ǀgaibab ūhâ’ amagab ge ǁGâuaba ra dītsâ îb. Sida di khoesi ǃaob ǁōb diba sîsenū, î da Jehovaba ǁnāxu.—Heb. 2:​14, 15. w22.06 18 ¶15-16

Sida sîsenni ǂkhāsa ǁaeb ǃnâ da ge ǀnîsi ǃgâsan ǀkha, ǀoro ǃgôab ǃnâ nî ǀhao. ǁNā-amaga i ge kaise ǂhâǂhâsa nēsi ǂkhîba sida ǁaegu ūhâsa. ǁGâuab ǃoagu ǃkham re sa ǃgâsa-i ǃoagus ose. Sadu ǃgâsan dīsāde kōǃkharu tamas ka io dītsâ tsî sadu ǁaegu hâ ǃkharagagusina sîsenǂam re. (ǂKhm. 19:11) Māsenxa re huigus ǃnâ. (Tit. 3:14) Aoǁnâ sîsenni ǃgubis ge ǃgâsas hîna ǂhâsib ǃnâ hâsa a mā huib ge, ǃgâi sîsenǂûiba hoan ai ge ūhâ i. ǁÎn ge omaris ǁanin khami ǀgūse gere tsâ. (Psa. 133:1) ǂGui ǃgâsan ge Jehovaba ra ǃoaba, ǂhanub sîsen-e ra ǂkhā xawe. ǀNîn ge ǁîn ǂgoms ǃaroma ǃkhōsis ǃnâ ǂnôa. Sida ge ǁîn tsî ǁîn omaridi tsîna a ǀgoreba ǁkhā. Tsî ǁnān hîna ǁîn ûiga ǁkhōǁkhōsa mâsib ǃnâ ra ūhâna, în nē ǃgâsana gāgāsise, sorosise tsî ǁnâuǃgâ ǃkhaib ǃnâ ǂkhâǃnâ. (Kol. 4:​3, 18) Tā sadu ǀgores di ǀgaiba ǃgôaǁnâ re.—2Tes. 3:​1, 2; 1Tim. 2:​1, 2. w22.12 26-27 ¶15-16

ǀGôan ge hoaǁae ǁîn ǁgûna ra ǁgae. Ama as ge ǁgûn ǀoasa kurusa ūhâ tama hâsa. (Rom. 3:23) Xawen ge ra dītsâ în ǃgâi aiǁgause ǁîn ǀgôana iba. ǀGui ǁgûb ge ge mî: “ǁÎn ge ǃāpis khami i, hoa xūnan ge ra ūǂgā.” ǀAro tsîb ge ra mî: “ǁÎn ge nî mîba da ǁkhāǁkhā nî da ra xūna da ga dī tama io.” ǂHâba da ga o, în sida ǀgôana Jehovaba ǀnam, o i ge sida ǀnammi ǁîba da ūba hâba nî ǀgaisa tsî nî mûhe ǁkhā. ǂGui ǀgaugu ge hâ ǁgûn ǁîn ǀgôana, Jehovaba ǀnamsa a ǁkhāǁkhā ǁkhāna. Andrew ti ǀon hâ ǃgâsab 17 kurixab ge ra mî: “Ti ǁgûra ge hoaǁae ra ǁkhāǁkhāte ǀgores kaise a ǂhâǂhâsasa. Mâ ǃuis hoasab ge ti paba tita ǀkha gere ǀgore. ǀNai ta ga ǀgore xawes tsîna. Nēsi î ge a supubate ǀgore tsî Jehovaba ǀnamte a ǁGûb ase mûsa.” ǁGûdo hoaǁae ǂâis ǃnâ ūhâ re, sadu Jehovaba ūba hâ ǀnammi ǀgôana nî huisa în ǁîn tsîna Jehovaba ǀnam. w22.05 28 ¶7-8

ǀGui xū-i hîna da ǂgurose nî dī î ge, sida ǁoren ǃaroma ǃhobasensa. (ǃNǃkh. 2:​37, 38) Amase da ga ǃhausen, o da ge ǀkharaǀkharana nî dī. Jehovaba ra ǂkhîoǃnâ kai ǁnaetiga du ūbe hâ? Aiǁgause, ǀaib, tabaka-e sîsenūs tamas ka io ǁgai gowaba sîsenūsa. (1Kor. 6:​9, 10; 2Kor. 7:1; Efe. 4:29) Aiǃgû tsî ǀkharaǀkharana dī re. Tsî sado Elobmîsa ra ǁkhāǁkhā khoe-i tamas ka io ǀhaohâb ǃûi-aogu daoǁgausa ǂgan re. Sa ǁgûn oms ǃnâts ga noxoba gara hâ o. ǁÎna ǂgan re în huitsi îts ǁgai ǁnaetiga ǀgû, hîna mā-am tama hâga îts ǁāǁnâhe ǁkhā. ǂHâǂhâsas tsîna î ge ī, ǃgâise gagasise hoaǁae kōǃgâsensa. ǁNās ge Xristeǁî ǀhaode hâǃnâs tsî ǁîn ǃnâ ǃâ-e ūhâs tsîna ǃkhōǂgā hâ. (Heb. 10:​24, 25) ǁNā ûiba ra sâu sîsenni ǃnâ du ga ǃâ-e ūhâ, o ǃnāsase ǁî-i ǃnâ ǁhao re. w23.03 10-11 ¶14-16

Genesis 3:​14, 15 ǃnâ ra ǂgaihen ge “ǀaob” tsî “taras” ti surib tsîna ǃkhōǂgā hâ. Elobmîs ge ra hui da î da ǂanǂui haman asa. Hā re î da “ǀaob” ǀkha tsoatsoa. Ama ǀao i ge tātsē ga ǁnâuǃā tama hâ, tae-eb ge Jehovaba Edenni ǃhanab ǃnâ a mîsa. ǁNās ǃaroma i ge Jehovab di ǀgoraǃgâsa gā-ai kurusabe i ǃoagu nî hâ. Ham-i xab ge Jehovaba gere ǃhoa? ǂHaiǂhais 12:9 ge ǃgāsase ra ǁguiǃā, ǀaob a hamsa. ǁNāpa i ge “ǀoro ǀaoba” ǁGâuab tamas ka io Satanni ti ra ǂgaihe. ǀNî ǁaegu ais ge Elobmîsa “surib” ti hâ mîsa ra sîsenū. ǁNās ge khoe-i hîna ǂâi tsî xūna ǁî-i di ǁgû-i khami ra dī-i ǃoa ra ǁnaeǁgau. ǁNā-amaga i ge ǀaob di suriba ǂgomoǃnâ ǀhomǃgāgu tsî khoen hîna Satanni khami īn. Tsî Jehovaba mâǃoa tsî ǁîb khoen tsîna ra mâǃoana ǃoa ra ǁnaeǁgau. Tsî nēs ge ǁnā ǀhomǃgāgu hîna ǁîgu di ǁgaumâisa ǀhommi ǃnâ ǁnāxu ga ǃoa ra ǁnaeǁgau, Noaxi di tsēdi ǃnâ. Tsî ǁnā ǁgai khoen hîna ǁîn di ǁgûb ǁGâuab khami ra tanisena.—Gen. 6:​1, 2; Jhn. 8:44; 1Jhn. 5:19; Jud. 6. w22.07 14-15 ¶4-5

Apostel Paulub ge ǃgâsana kaise ge ǀnam i. ǁÎb tsîn ge ǃgomsina gere hōǃâ. Tsîb ge ǁnās ǀkhās tsîna ǀkhomxaǂgaosib tsî tsâbaǁhaoxasib tsîna, ǃgâsana ge ǁgau ǁkhā i ǃgomsinan gere hōǃâ o. ǀGui ǃnās aib ge Pauluba mari-e ge ūhâ tama hâ i. Tsîb ge sîsen-e ge ôa îb aitsama kōǃgâsen tsî ǁîb ǀkha ge hâ în tsîna kōǃgâ. (ǃNǃkh. 20:34) ǁÎb ge tende kuru tsî gere ǁamaxu. Korintes ǃnâb ge sī ob ge ǂgurose, Akwilab tsî Priskilas hâra ǀkha gere sîsen. Xaweb ge mâ ‘sâtsēs’ hoas ai Jodeǁîn tsî Grikeǁîn tsîna gere aoǁnâba. Silab tsî Timoteub tsîn ge sī ob ge Pauluba, ‘aoǁnâ sîsenni ǀkha ge ǀhabe i.’ (ǃNǃkh. 18:​2-5) Paulub ge tātsē ge ǀuru tama hâ i, Jehovaba ǃoabas ge ǁîb ûib ǃnâ ǂgurose ǂhâǂhâsa īsa. Paulub ge ǃgâi aiǁgausa aoǁnâ sîsenni tsî aitsama kōǃgâsens ǃnâ ge ūhâ i. ǁNā-amagab ge nau ǃgâsana ge ǂkhâǃnâ ǁkhā i. ǁÎb ge ge ǂâiǂâiǃnâ nî, în tā ûib di ǁgâiǀāgu. Tsî omarisa ǂûmās xa ǃaromahe hâse, “ǃgâi xūna” ūǃoabasensa ǀuru. Tsî nēn hoan ge Jehovab di ǃoabasa ǃkhōǂgā hâ. w22.08 20 ¶3

Elob di ǂâis ge îs ǃgâiǂhôas Gaosib disa, nētsē ǃhūbaib ǂhabase aoǁnâhe. (1Tim. 2:​3, 4) Nē i ge Jehovab sîsen-e tsî i ge ǂhâǂhâsa. ǁNā-amagab ge ǁîb ǀnamǀnamsa ǀgôaba ge ǁhûi, îb nē sîsen-e ǂgaeǂgui. ǂGomǃgâ ǁkhā da ge a Jesub di mûǂams ǃnaga i, aoǁnâ sîsen-e nî dīǀoaǀoahesa. Jehovab ǂgao hâse, ǀams nî hās aiǃâ. (Mat. 24:14) Mati da ǁnāsa a ǂan? ǀHomma ǃoab nî īs aiǃâb ge Jesuba ǁÎb di ǂgomǂgomsa sao-aon ǀkha, ǃhommi ai Galileab ǃnâ ge ǀhao. Tsîb ge ǁîna ge mîba: “Tita ge hoa ǁkhāsiba ǀhommi ǃnâ tsî ǃhūbaib ai māhe hâ.” Tsîb ge sao rase ge mî: “ǃGûǂoa, î hoa ǁaede ǁkhāǁkhāsabedī.” (Mat. 28:​18, 19) Nau xūn xōǀkhāb ge Jesuba, aoǁnâ sîsen-e ǂgaeǂguis di ǁkhāsiba ge māhe. Tsî i aoǁnâ sîsenne Jesub kōǃgâs ǃnāga nî aiǃgûsa, sida tsēdi ǃnâ. w22.07 8 ¶1, 3; 9 ¶4

ǂHanu-ain hîna ge ǁîn ǁōb aiǃâ, ǃgâi xūna gere dīn ge “ûib khâisa” nî ǃkhōǃoa. ǁÎn ǀondi ǀnai ûib ǂkhanis ǃnâ a xoamâisa amaga. Nēs ge ra ǂâibasen “ǁnān ǃgâina gere dīn” Johaneb 5:29 ǃnâ xoamâisan, ǁnān hîna “ǂhanu-ain” di khâis ǃNaeǃkhaidi 24:15 ǃnâ ra mîhen ǀkha a ǀguisa. Nē ǁnâuǃā ǀgaub ge a ǀguiǃnâxa Romeǁîn 6:7 ǃnâ hâ mîdi ǀkha: “ǁŌ ra-i, ǁoreb di ǀgaiba xu ra ǃnoraǃnorahe xui-ao.” Jehovab ge ǂhanu-ain di ǁorena ǁōn ga o ra ǀûba. Xaweb ge ûitsaman a hînan gere dī ǂgomǂgomsa xūna ǀuru tama hâ. (Heb. 6:10) Nē ǂhanu-ain hîna ge khâisa a hōn ge ǂgomǂgomsase nî hâ, î-i ǁîn ǀonde ûib ǂkhanis ǃnâ hâ ǀgara. w22.09 18 ¶13, 15

Kēbo-aob Danieli ge ǃgâi aiǁgaus ǂgomǂgomsasib disa ge ǁgau. Babilonǁîn xab ge ǃkhōsis ǃnâ ūhe xaweb ge ge ǁgau, ǂgomǂgomsa tsîb a ǂgomǃgâhe ǁkhā ǃkhaisa. Khoen ge ǁîba ǃnāsase ge ǂgomǃgâ Jehovab huib ǀkhab ge, Gao-aob Nebukadnesari ǁhapode a ǁguiǃā o. (Dan. 4:​20-22, 25) ǂGui kuriga ǃkharu tsîb ge Daniela ǁkhapa ge ǁgau, ǂgomǂgomsab a ǃkhaisa. Babilons ǃnâ ge hâ i paleis miri ai ge xoasa i ǂgānǃgâsa haisi-ams ǂâibasensab ge ǂhanuse a ǁguiǃā o. (Dan. 5:​5, 25-29) Ega i ge Dariusi hîna a Mediaǁîb tsî ǁîb xa ǁgaumâihe hâ mûǂam-aogu tsîna ‘ǀō-aisa gaga-e’ Danieli ǃnâ ge mû ǁîgu ge ge mûǂan, Danieli ge ǂgomǂgomsa isa. Tsî “ǁîgu ge ôa gu gere, xawe dīsā-i xare-e hō tama ge i.” (Dan.6:​3, 4) ǃGâise da ge ra dī, dîsen da ga o: ‘ǂGomǃgâhe ǁkha khoe-i ase ta a ǂansa?’ Koasa da ge Jehovaba ra mā, ǂgomǂgomsa da ga o. w22.09 8-9 ¶2-4

ǃGâiba da ge ra hō, Jehovab di ǁgaragu ǃgâi-i tsî tsū-i xa hâ gu ǃoagu da ga ûi o. Mû ǁkhā i du a tae-i ǃaroma i ǁnāti īsa? Mûnanais ǀguisa di re tae-i a ī ǁkhāsa, hoa bank di ga matikō mari-i nî ǂgā-esa ga ra mîǁgui, os ge ǀamǂoasa kaise ǃgâi tide. Tsîn ga ǀaedī-aona ǀaeǃkhōs di ǂhanuga sao tama io khoenan ga hui ǁaeb ai, os ge ǁnāsa a ǃaroma ǁkhā, în ǀaeǃkhōhe ra khoen ǀnîna ǁō. Khoen ga ǂnûiǂgāhe hâ ǀgauga ūhâ o, o i ge ǁnāsa ǁkhaubas ase i. ǁNās khami ǀgui i ge Elob di ǀgaugu, ǃgâin tsî tsūn diga ra ǁkhauba da. Jehovab ge ǁnān hîna ra dītsâna ra ǀkhae, în ǁîb di ǁgaragu ǃoagu ûi. ǁÎb ge ra mîmâi: “ǂHanu-ai khoen ge ǃhūba ǀumi tsî ǀamose ǁîb ǃnâ nî ǁan.” (Psa. 37:29) Mûnanai ǁkhā î du a, matikōse i nî ǀguiǃnâxa tsî ǂkhîsasa. Khoen hoan ga Jehovab di ǀgauga ga ra sao o? Jehovab ge ra ǂhâba î du ǁnāti i ûiba ūhâ. Hoa da ge ǃgâi ǃaromasa ūhâ ǂhanu-aisiba ǀnamsa. w22.08 27-28 ¶6-8

ǃGomsina da ga hōǃâ, o i ge sada ǂgomǂgomsasib hîna da Jehovab tsî ǁîb ǀapeǂhumis ǃoagu ūhâba a ǃâitsâhe ǁkhā. Mati da nē ǃgomsiga a dan ǁkhā? ǂHâbasa i ge a ǁnâuǃāxa ǂâisa ūhâ ǀgara, ǂkhaikari hâ. Tsî ǂgoms ǃnâ ǁaposase mâsa. ǁNâuǃāxa ǂâisa da ge ra ūhâ ǀgara ǃgāsase ǂâi. Tsî da ga dītsâ o, xūna Jehovab ra mû ǀgaub ǃnâ mûsa. ǁNāsa da ga dī, o i ge sada ǂâide sada tsâsigu xa tsâǀkhāhe tide. ǀNîsi i ge ǀhaohâb ǃnâ ǃereamsa tani hâ ǃgâsaba, ǂâibasen tamase go tsûtsû du. (Rom. 3:23; Jak. 3:2) Xawe du ge noxoba ǁîb ge dī xū-i xa ge ǁaixa. ǀNîsi du ge a ǂâi ǁkhā, ‘ǃgâsab ga nē ǀgaub ǃnâ tanisen o, nēsa amabes ǃnâ Elob ǀapeǂhumisa?’ Satani ge ǁnā ǀgaub ai da nî ǂâisa ǂhâba hâ. (2Kor. 2:11) Nē ǀgaub ǃnâ da ga ǂâi, o da ge Jehovaba a ǃoaba ǀû ǁkhā tsî ǁîb di ǀapeǂhumisa xu a ǂoa ǁkhā. ǁNās ǀkha da ge nî dītsâ, î da tā ǁaixa hâse hâ ǀgara. w22.11 20 ¶1, 3; 21 ¶4

Jehovab ge buruxa ǃâubasensa mā da hâ, ǀamo ûib disa. ǀNîn ge ra ǃâubasen gagasi kurusaben ase ǀhommi ǃnâ ǀamose ûisa. (1Kor. 15:​50, 53) ǂGuin ge ra ǃâubasen ǀamose ǃhūbaib ai ûisa, ǀoasa ǂurusib tsî ǂkhîb ǃnâ. (J.ǂHa. 21:​3, 4) Nēsi da ga ǀhommi tamas ka io ǃhūbaib ai ǀamose ûisa ga ra mûǂûi, xawes ge sida ǃâubasensa kaise a ǀō-aisa. Sida ǃâubasens hānîǁaeb dis ge a ǁapoǁaposa, Jehovaba xu i ra hā amaga. (Rom. 15:13) ǂAn da ge a tae-eb ge mîmâisa tsîb hoaǁae ǁîb mîsa ra dīǀoaǀoasa. (Num. 23:19) Jehovab turab tsî ǀgaib tsîna ūhâsa da ge ra ǂgom, ǁîb ge dīb nî ti a mî xūn hoanab nî dīǀoaǀoasa. Sada ǀhomsi ǁGûb ge a ǀnam da tsîb ge ǂhâba hâ, î da ǁîb ǃnâ ǂgom. Sida ǃâubasens ga Jehovab ǃnâ a ǀgaisa, o da ge ǃgomsigu ǃnâ a mâǃkharu ǁkhā. Tsî da ge hānîǁaeba ǁkhoaǂgaosib tsî ǃgâiaǂgaob ǀkha nî tani. w22.10 24 ¶1-3

Khoen ge ǃgâ tama hâ i ǃkhais ǃaromab ge Jesajaba ge kēbo, Jehovab nî mā-amsa în ǃgomsina hōǃâ. (Jes. 30:​5, 17; Jer. 25:​8-11) Tsî ǁnās ge ge ī, Babilonǁîn xan ge Babilonsa ǃoa ǃkhōsabese ī ūhe o. Xawe î ge Jodeǁîn ǁaegu ǀnî ǂgomǂgomsa khoena ge hâ i. Tsîb ge Jesajaba ǁîna ge mîba Jehovab nî mā-amsa, în Israela ǃoa-oa tsî ǁnāpa sī hâ. (Jes. 30:​18, 19) Tsî ǁnās ge ge ama ī, Jehovab ge ǁîna Babilonsa xu ge ǃnora kai. Xawen ge ǁnā ǁaeb ai ge ǃnora kaihe tama hâ i. Nē mîdi: “ǁNā-amagab ge ǃKhūba [Jehovaba] sadob nî ǀkhomxase nî ǃâu” ti hâ ti ge ra ǁgau, ǁaero-i nî ǃkharusa. Jehovab ǂgomǂgomxa khoena nî ǃnora kais aiǃâ. Ama i ge Israelǁîn ge Babilons ǃnâ 70 kuriga ǃkhōsabese ge hâ i, ǀnîn ge ǃnora kaihe tsî Jerusalemsa ǃoa-oasa mā-amhes aiǃâ. (Jes. 10:21; Jer. 29:10) ǁÎn di ǃhūba ǃoan ge oasī, on ge ǃoab di ǁgamrona, ǃgâiaǂgaob di ǁgamron ǀkha ge ǃkhōǃkhuni. w22.11 9 ¶4

Nētsēn ge sa da ǃgâsana ǂgui ǃhūgu ǃnâ, ǃkharuge ǁaeb apostelgu ge Jesub xa gu gere aoǁnâ, o gere ǃgôaǃgonhe khami ra ǃgôaǃgonhe. Tsî ǁîgu gere ǃkharuǃnâ xūna nētsē ra hōǃâ. Mâǁaeb hoaba gu ge ǀgoraǃgâ-aogu, Jodeǁîn di ǀgapi ǁnâuǃgâ ǃkhaib diga ǁîga gere mîmā î gu “tā ǁkhawa Jesub ǀons ǃnâ khoen ǀkha ǃhoa.” (ǃNǃkh. 4:​18-20; 5:​27, 28, 40) Mati gu ge apostel ga tanisen? ǁÎgu ge ge ǂan i khoe-i hîna ǃnāsa ǀgaiba ūhâ i, xa gu ge mîmāhesa î gu “khoena ǃgâiǂhôasa aoǁnâba,” Xristub xa. (ǃNǃkh. 10:42) ǁÎgu ǂnûǁkhaeba-aokha Petrub tsî Johaneb tsî kha ge ǁkhoaǂgaoxase ge mî, ǁîgu Eloba nî ǁnâuǀnamsa, ǀgoraǃgâ-aoga ǁnâuǀnams xa. Tsî ge mî ǁîgu Jesub xa ǃhoa ǀû tidesa. (ǃNǃkh. 5:29) ǁÎgu ǂhauǃnâsib ǃaroma gu ǂnauhe toa hâs khaoǃgâ, gu ge apostel ga, Jodeǁîn di ǀgapi ǁnâuǃgâ ǃkhaiba xu ge ǂoaxa. Tsî ge ‘ǃgâiaǂgao Elob ge ǁîga anuǃgôa, Jesub ǀons ǃaroma gu ge khoen aiǃâ ǃharaxūhe ǃkhais ǃaroma.’ Tsî gu ge ǁnā ǁaeb ai aoǁnâ sîsenni ǀkha ge aiǃgû.—ǃNǃkh. 5:​41, 42. w22.10 12-13 ¶2-4

ǁNâuǃāxase, Jehovab xa ǁkhāǁkhāsens ge ǂkhariro xūn ǀkha ra tsoatsoa. Hebreǁîna ǃoab ge xoa sîǂkhanis ǃnâb ge Apostel Pauluba ǂkhari xurona ǁkhāǁkhāsensa, ‘Elobmîs ǃgaoǃgaoba’ ǃoa ra ǁnaeǁgau. ǁÎb ge ‘ǂguro ǁkhāǁkhāde’ ge mîǁgaiǁgai tama hâ i, xawe dai-i hîna ǀgôa-e ra khoakhoa ī ǀkha ge ǀgopeǀnō. (Heb. 5:12; 6:1) Xaweb ge hoa Xristeǁîna gere ǂkhâǃnâ, în tā ǂkhari ǁkhāǁkhādi tawa mâ ǀgara tsî Elobmîs di ǃgam amaba ǁkhāǁkhāsen. Turaba da ūhâ Elobmîs di amab xa ǁkhāǁkhāsensa? Māsenxa î du a gagasise kai ǀgarasa? Tsî Jehovab tsî ǁîb ǂâibasens xa ǁkhāǁkhāsen ǀgarasa? ǂGui da ǃaromas ge ǁkhāǁkhāsensa a ǃgom ǁkhā. Mati du ǁkhāǁkhāsens xa ra tsâ? Skoli tawa du ge khomai tsî ǃgâise ǁkhāǁkhāsen? ǁKhāǁkhāsens xa du ge ǃgâibahe î tsî ǂgui xūna du ge ǁkhāǁkhāsen khami du ra tsâ? Tamas ka io du ra ǂâi, ǃgâi tama du hâsa ǂkhanina xu ǁkhāǁkhāsensa? ǁNāti du ga ǂâi, o du ge ǀguri hâ tama xawe Jehovab ge a hui du ǁkhā. ǁÎb ge a ǀoasa tsî a ǃgâi ǁGauǃnâ-ao hîna du a ūhâ ǁkhāba. w23.03 9-10 ¶8-10

Tsamtsiǃnâxa da ga, o da ge nî mā-am îs Elobmîsa ǀkharaǀkhara da. ǀGoraǃnâxa tamas ka io ǀgapiǂâixa gagaba xu da ga ǂgōsen, o ǀgui î ge Elobmîs ǁkhāǁkhādi hîna ǀkhomxaǂgaosib, tsâbaǁhaoxasib tsî ǀnammi xa hâde a ǀkharaǀkhara da ǁkhā. Nau khoena da ra hâ-ū ǀgaub ge a ǁgau ǁkhā, Elobmîsa da ra mā-amsa îs sida ǀkharaǀkhara. Farisegu ge Elobmîsa ge mā-am tama hâ i, îs ǁîgu ǀgauba ǀkharaǀkhara, amaga gu ge ‘ǀhapiona gere ǀgoraǃgâ.’ (Mat. 12:7) ǁKhā ǀgaub ǃnâ i ge mati da nau khoena ra mû tsî ra hâ-ū ǀgauba ra ǁgau, Elobmîsa da ra mā-amsa îs sida ǀkharaǀkhara. Aiǁgause, ǁnaeti î da hâ ǃgâib hîna da naun ǃnâ ra mûba mîsa? Tamas ka io da ǃhaese ǁîn ǃnūbusigu xa ra ǃhoa? ǀKhomxaǂgaoxa tsî da ǃhaese ra ǀûba? Tamas ka io da ǀgoraǃgâxa tsî ǁîn ǀkha ǁaixa hâse ra hâ? Nē dîde da ra ǃeream ǀgaub ge a ǁgau ǁkhā, khomai da ra xūna da ra mā-amsa, î-i sida ǂâi ǀgaugu, tsâsigu tsî dīgu tsîna ǀkharaǀkhara.—1Tim. 4:​12, 15; Heb. 4:12. w23.02 12 ¶13-14

Josefi, Arimateab aiǁgaus xa ǂâi re. ǁÎb ge Jodeǁî khoen xa kaise ge ǃgôahe hâ i, tsî ge Sanhendrini ǁani ī, Jodeǁîn di ǀgapi ǁnâuǃgâ ǃkhaiba. Xawe Jesub di ǃhūbaisi aoǁnâ sîsenni ǁaeb aib ge Josefa kaise ge ǃaoǃnâ i. Johaneb ge ra mî, ǁîb ge ‘ǂgānǃgâsib ǃnâ ge Jesub di ǁkhāǁkhāsabe ī, Jodeǁînab gere ǃao amaga.’ (Jhn. 19:38) Josefi ge ǃgâiǃgâibasensa Gaosib haisi-ams ǃnâ ge ūhâ i, xaweb ge Jesub ǃnâb ūhâ ǂgomsa nauna xu gere sâu. ǁÎb ge ǀnîsi gere ǂâi, khoen ǁîba ǃgôaǃgâsiba ūhâba tidesa, ǂanǂuin ga o ǁîb Jesuba ra sao ǃkhaisa. Xawes ge Elobmîsa ra mîba da, Jesub ge ǁō toas khaoǃgâb ge Josefa “Pilatub tawa sī tsî Jesub di sorosa ge ǂgan, ǁîb ǀguib ge ǁnā ǁkhoasiba ūhâ i xui-ao.” (Mrk. 15:​42, 43) Josefi ge nēsi ǁîb a Jesub di saosabesa ge sâu tama hâ i. Josefi khami du sadu tsina khoena ra ǃao? w23.01 30 ¶13-14

Skebas di gao-aos ge Israelǁaes ge gao-aob Salomoni ǂgaeǂguis ǃnāga gere hōǃâ, ǂkhîb tsî xūn xa ge ǁnâu. Tsîs ge gaxu daoba Jerusalemsa ǃoa ge ǃnari is aitsama sī mû. (1Gao. 10:1) Salomoni gaosibas ge mû toas khaoǃgâs ge ǀgapiga hâ mîde ge mî. Salomoni ǂgaeǂguis ǃnāga ge hâ mâsib ge aiǁgaus ǀguisa ge ī-i. Jehovab tae-e khoesiba nî dībasa ǁîb ǀgôab Jesub ǂgaeǂguis ǃnāga. Jesub ge hoa ǀgaugu ǃnâ Salomoni xa a ǀgapi. Salomoni ge ǀoasa kurusa ge ūhâ tama hâ i, ǁnās ǀkha gere dīsā. Tsî nēs ǃnâ-ū Elob khoena ǂgui ǃgomsina ge ǃaromaba. Xawe Jesub ge ǀoasa kurusa ūhâ ǂgaeǂgui-ao tsî dīsā tama hâ. (Luk. 1:32; Heb. 4:​14, 15) Xristub ge ge ǁgau ǁîb tātsē ǁore tidesa. Tamas ka iob ǁîb ǂgaeǂguis ǃnaga hâ ǂgomǂgomsa khoena tsûtsû tidesa. Amase kai aiǂhanub ge ǁîba sida Gao-aose ūhâsa. w22.12 11 ¶9-10

Tae-e da a dī ǁkhā ǀaeb ga sida ra hâ ǃkhaib tawa khoraǂuisen o? ǂHanub ra māda daoǁgauna da ge nî ǁnâuǀnam. Aiǁgause, ǃomde ǁās, ǃnūguse hâs, maskerte ǂnûi tsî ǀaesen da ga o khoena xu nî hâ bēs. Nē xūna da ga dī, o da ge ra ǁgau Elob ǀkhaeb ûib diba da ra ǃgôaǃgâsa. ǂŌǂōsib di ǁaeb ǃnâ î ge sada ǀhōsan, ǁanǁare-aon tsî kō da ra ǂhôan tsîna ama tama xūna a ǃhoa ǁkhā. “Mâ xū-i hoa-e” ǂgoms xa da ge ama ǂhôan hîna ǂhanub tsî ǀaeǃkhō-aona xu ra hāna nî ǃgâ. (ǂKhm. 14:15) ǂGaeǂguira soros tsî ǁnâub bērodi tsîn ge ra dītsâ în ǂhanu tsî ǂgomǃgâhe ǁkhā ǂhôana hō, ǀhaohâb ǀhaodi tsî aoǁnâ sîsenni xa gu daoǁgaude nî mās aiǃâ. Daoǁgauna sao-ais ǃnâ-ū da ge sida tsî nau khoen tsîna ǁkhōǁkhōsa xūna xu ra ǁkhauba. Sida ǂnamipe hâ khoen tsîna da ge a hui ǁkhā, în Jehovab di ǃoaba-aon xa ǃgâi mûǂuiba ūhâ.—1Pet. 2:12. w23.02 23 ¶11-12

Israelǁaes ge mîmâisa ǃhūb ǃnâ ǂgâ, on ge ǃkharagaǃnâgu ǃnādi ǃnâ ge ǁan hâ i. Israelǁaes ge ǃkharagaǃnâgu ǃnādi ǃnân gere ǁans xa ǃaromahe hâse ge ǁae-ū gu ǀû ǁkhā ī. Xaweb ge Jehovaba ge ǀapeǁgui îs Israelǁaesa ǁaeba xu ǁaeb ǀkha ǀhao. Tsî ǁîb mîsa khomaibahe tsî ǁguiǃābahe ǁkhā. (Deu. 31:​10-12; Neh. 8:​2, 8, 18) Mûnan-ai re ǂgomǂgomsa Israelǁaes khoe-i gere tsâ ǀgauba, Jerusalems ǃnâ sī tsî î ge ǂgomǂgomsa Jehovab di ǃoaba-ao-e gere mû o. Nē ǀgaub ǃnâb ge Jehovaba ǁîb khoena gere hui în ǀguiǃnâxase hâ. Tsî ega ge Xristeǁî ǀhaohâb ǃnâ ǂanhe î khoen ge, aogu tsî taradi hîna ge ǃkharagagu gowaga gere ǃhoana. Tsî ǀnîn ge ǂhâǂhâsa khoen ase ge ǂanhe i tsî nauna ǃgamǃgamsenxa khoen ase. Tsîn ge ǀnîna ge ǃkhū hâ i tsî nauna ge ǀgâsā i. Xawen ge Eloba ǃoabas ǃnâ ge ǀguiǃnâxa ī. ǂGomsabe kai gen ge, Elobmîsa naun ǀkha ǀguiba ǃoaba ǀhaos ǃnâ-ū ǀgui ge ǁnâuǃā ǁkhā ī.—ǃNǃkh. 2:42; 8:​30, 31. w23.02 3 ¶7

Jehovab ge ra mîmâi, ǁnān hîna ǁîba ra ǁnâuǀnaman ge ‘ǀamo ûiba’ nî hō. (Rom. 6:23) Jehovab ra māda ǂgao xū-i xa da ga ǂâiǃgâ o. O i ge ǁîba da ūba hâ ǀnamma ra kai. ǂÂis ǀguisa hî re: Jehovab ge ǁnātikōse a ǀnamda, ǁnā-amagab ge mā-am tide î da ǁîba xu ǀgora-e. Jehovab ǀamo ûib xa ra mî mîmâis ge ra hui da î da sida ǃgomsin ǃnâ mâǀgai. Sida khākhoen ga ǃgam da ǂgao xawes tsîna da ge Jehovaba ǃoaba ǀû tide. Tae-i ǃaroma? ǀGui ǃaromas ge Jehovab ǃoagu da ga ǂgomǂgomsase ga ra ǁō o. Ob ge ǁîba khâisa nî māda. Tsî da ge ǃâubasensa nî ūhâ ǁkhawa da ǁō tidesa. (Jhn. 5:​28, 29; 1Kor. 15:​55-58; Heb. 2:15) ǂAn da ge a Jehovab ǀamosib kōse a ûi kai da ǁkhāsa, ûib ǁîba xu ra hā amaga. Tsîb ǁîba ǀamosib kōse ra ûi amaga. (Psa. 36:9) Elobmîs ge ra ǁgau, Jehovab ge ǀnai hâ isa.—Ps. 90:2; 102: 12, 24, 27. w22.12 2 ¶1-3

Jehovab di khoen ase da ge buru tama hâ ǃgomsiga da ga hōǃâ o. ǂAn da ge a Elobmîs ra mîsa, ‘ǂgui ǃgomgu ǃnâts ǃkharu hâs khaoǃgâ ǀguits Elob Gaosib ǃnâ nî ǂgâ ǃkhaisa.’ (ǃNǃkh. 14:22) ǂAns tsîna da ge ī, ǀnî ǃgomsin hîna da ūhân Elob di ǀasa ǃhūbaib ǃnâ ǀgui a ǃgâiǃgâihe ǁkhāsa. ǁNāpa ī ge ‘ǁō-e ǃaruǀî hâ tide, ǃoa-i tamas ka io ā-i tamas ka io tsû-i xare-i ge hâ tide.’ (J.ǂHa. 21:4) Jehovab ge sida di ǃgomsina xu sâu da tama xaweb ge ra hui da, î da mâǀgai ǁkhā. ǃGaoǃgâ re apostel Paulub ge tae-e ǃgâsan hîna ge Romes ǃnâ gere hâna a mîbasa. ǂGuroseb ge ǁîb tsî ǁîb ǃgâsagu ge hōǃâ ǃgomsigu xa ge xoa. Tsîb ge ǁnāpaxū ge xoa: ‘Xawe da ge nēn hoan ǃnâ, dansa ǁnāb sada ǀnam hâb ǃnâ-u ūhâ.’ (Rom. 8:​36, 37) ǁNās ge ra ǂâibasen Jehovab ge a hui du ǁkhā, ǃgomsigu ǃnâ du ra mâǀgai hîna. w23.01 14 ¶1-2