Maarti

Apostel Petrub ge ǃgâsana ge mîba în ǁîn di ǁkhāsib tsî ǀkhaegu tsîna sîsenū, nauna ǂkhâǃnâs ǃgao. Petrub ge ge xoa: “ǃOabagu re, mâ-i hoa-e ǃkhōǃoa-i ge hōs ǃoa ǃgâi ommûǂamaose ǃkharaga ǀkhommi Elob dib dise.” (1Pet. 4:10) Tā da ge nî ǃkhō-oasen, sada di ǁkhāsiga ǀoasase sîsenūs ǃnâ, nau ǃgâsan ga suri tsî ǂkhabuǂâi xawe. ǂAnbasen da ge nî î da tā ǁnās xa koasen. (1Kor. 4:6) ǂÂis ǃnâ da ge nî ūhâ, ū da hâ ǁkhāsiga da Eloba xu ra hōsa. Nē ǁkhāsiga da ge nî sîsenū, î da ǃgâsana ǀhaohâb ǃnâ omkhâi. Sida ǃgâib ǃoas ǀguis ose. (Fil. 2:3) Sida ǁkhāsib tsî ǀgaib tsîna da ga sîsenū o, Elob ǂâisa dīsa o da ge nî ǃgâiaǂgao. Nēs ge nau ǃgâsan xa da ǃnāsase ra dīs, ai ǃgaoǃgaosa tama hâ. Xawe sida ǁkhāsiga da Jehovab ǃoabas ǃnâ ra sîsenū amaga. w22.04 11-12 ¶7-9

Jesub ge Xoade ge ǀnam ī. Tsî ǁîb tsâsigu ge Psalmdi 40:8 ǃnâ ra hō-e mîdi ǃnâ ra ǁgâiǂuihe: “Sa ǂâisa ta nî dīse ti Elotse, sa ǂhanub ge ti ǂgaob ai hâ.” Jesub ge xoade ǀnam i amagab ge ge ǃgâiaǂgaoxa i tsî Jehovaba ge ǃoaba ǀgara. Sida tsîn ge ǃgâiaǂgaob, ǂkhîb tsî ǃgâiba a hō ǁkhā Elobmîsa da ga khomai. Tsî ǁîsa ǀnamsa ga ǁkhāǁkhāsen tsî sida ǂgaob ǃnâ ga ra ǂgā o. (Psa. 1:​1-3) Jesub mîdi tsî aiǁgaus ǀkha ǀguiǃnâxase hâs ǃaroma, da ge Elobmîsa da ra khomai ǀgauba nî ǀāǀā. Elobmîs ǃnâ da ra khomai xūna ǁnâuǃāsa da ge a ǃgâiǃgâi ǁkhā. ǀGores, ǁaeb ǀkha khomais, dîde dîs tsî xoaǁnâs ǃnâ-ū. ǀGores di ǁkhāsiba da ge a sîsenū ǁkhā, î da khomai da ra xūna ǃamkuse ôaǃnâ. Sida ǂkhanin hîna Elobmîs ai ǃgaoǃgaosan huib ǀkha. Elobmîsa da ge a mā-am ǁkhā îs ǀkharaǀkharada, î da khomai da ra khami ǂhanu ǂâi ǀgauba ūhâ ǀgara. Nē ǀgauga da ga sîsenū, o da ge sida Elobmîs khomaisa xu ǃnāsa ǃgâiba nî hō tsî Jehovaba ǃoa nî ǀgū.—Psa. 119:17; Jak. 4:8. w23.02 13 ¶15-16

ǁKhāǁkhāsen ǂgao du ra xū-e ǁhûi tsî ǁnās khaoǃgâ ǃgarise sîsen re, î du ǁnā xūna ǃgâiǃgâi. Nēsa mati a dīǀoaǀoahe ǁkhā? ǀNîsi du ge ǃgâi ǁkhāǁkhā-ao kais ai ra sîsen ǂgao. Khomais tsî ǁkhāǁkhās ǃnâ ǁguiǂgāsens ti hâ ǂkhaniba du ge ǃamkuse wekheb ǁaegub ǃnâ hâ ǀhaos tawa du ga ǃâ-e māhe o, a ôaǃnâ ǁkhā. ǂAnsa ūhâ ǃgâsa-e ǂgan re î-i sadu ǃâba ǃgâ tsî maba du nî ǃgâiǃgâis ǀkha hui du. ǁAeb aiǃâ sadu di ǃâb ai sîsen re în khoena mû ǃgarise du ra sîsen tsî du a ǂgomǃgâhe ǁkhāsa. (2Kor. 8:22) Tae-e du a dī ǁkhā sadu mîǁguib ga sado ǃgomba xū-e ǃkhōǂgā o? Tā ǀûsen re! Timoteuba ge ǃgâi ǃhoa-ao tsî ǁkhāǁkhā-ao kai? Elobmîs ge mî tama hâ. Xawe Timoteub ge ǃgâise ǁîb ǁgaumâis ǃnâ gere dī Paulub daoǁgausab gere sao amaga.—2Tim. 3:10. w22.04 24-25 ¶8-11

Hû danade ūhâ ǀguruba a tae? ǃGaoǃgâ da ge ra nē ǀgurub tamas ka io ǂhûiseb (Luiperdi) khami ra mûsensa. Xaweb ge bēri khami ī ǂaidi, xammi khami ī amǃnâs tsî 10 ǁnâgu tsîna ūhâ. Danieli di 7ǁî danaǃâs ǃnâ hâ ǀgurub tsîn ge nē ǀgauga ūhâ. Xawe ǂHaiǂhais ǂkhanis ǃnâ î ge nē ǀgauga ǀgui ǀgurub ǃnâ a hō-e ǁkhā tsî ǃkharagagu 4 ǀgurugu ǃnâs ose. Nē ǀgurub ge ǀgui gaosib ǀguiba ǂnûǁkhaeba tama hâ. Johaneb tsîn ge ge mî: ‘Mâ ǃhaos tsî mâ gowab hoab tsî mâ ǁaes hoasagu’ gere ǂgaeǂgui ǃkhaisa. ǁNā-amaga gu ge hoa ǂhanugu xa a kai. (J.ǂHa. 13:7) ǁNā-amagab ge nē ǀguruba hoa ǂgīǂgōsi ǃnandi hîna khoena nēsis kōse ra ǂgaeǂguina ra ǂnûǁkhaeba. (Aoǁn. 8:9) Elobmîs ǃnâ i ga disis xa ǃhoahe, o i ge ǀoasa xū-i xa ra ǃhoa. w22.05 9 ¶6

Hamna nē ǀkhaega xu ǃgâiba nî hō? ǂGurose, kai ǃgôab khoen hîna Armagedonsa ra ûi ǃkharun tsî ǀasa ǃhūbaib ǃnâ ra ǃnaehe ǀgôan. Xawe ǂHaiǂhais 20ǁî danaǃâs ge ra mîmâi, ǁō hân tsîn khâisa nî hō ǃkhaisa. (J.ǂHa. 20:​11-13) ǂGomǂgomsa ‘ǂhanu-ain’ tsî ‘ǂhanuoǃnân.’ Jehovab xa ǁkhāǁkhāsens, ǃēsa ge ūhâ tama hâ în ge ǃhūbaib ai khâisa nî hō. (ǃNǃkh. 24:15; Jhn. 5:​28, 29) Nēsa ra ǂâibasen hoa khoen 1 000 kurigu ǂgaeǂguis ǁaeb ǃnâ khâisa nî hōsa? Hî-î. Ûitsaman a hîna ge Jehovaba, ǃoabasa ūǃoa tama hâ în ge khâisa hō tide. ǁÎn ge ǃēsa ge ūhâ i xawe nē ǃēs paradais ǃhūbaib ai ûis disa ge ūǃoa tama hâ i.—Mat. 25:46; 2Tes. 1:9; J.ǂHa. 17:8; 20:15. w22.05 18 ¶16-17

“ǂGomǂgomsa tsî ǁnâuǃāxa ǃgāb” ǃnâ-ūb ge Jesuba. ǂOaǂamsa ǀapeǂhumisa ǃhūbaib ai ūhâ, hîna ǂhanuse ra ǃoabasa. (Mat. 24:45) ǁNā ǀapeǂhumis xa du mati ra tsâ? ǁNāsa ǃereams ǃaroma du ge ǀnîsi Apostel Petrub di mî di Jesub ge mîdi xa ra ǂâi hîna nētsēs xoas ǃnâ ra mîhe te. Mâpa da ga hoada nētsē hâhâ, Jehovab ǀapeǂhumis ǀkha da ga ǀhao tama hâ o. ǁÎs ǃnâ-ūb ge Xristuba ra dī, î da hoa xūna ūhâ tsî gagasise ǂû māhe. Mati da aoǁnâ sîsen-e, ǃgâi ǀgaub ǃnâ nî dīs tsînab ge ra ǁkhāǁkhā da. Tsîb ge ra hui da, î da ‘ǀasa khoesi’ ǀgauga ūhâ tsî Jehovaba ǂkhîǂkhî. (Efe. 4:24) Jesub ge ga-ai daoǁgaude, tsūkēǃgân ǁaeb ai ra mā. ǁNā daoǁgausa xu da ǃgâiba ra hō ǀgausa da ge, Koronas tsoatsoas ǃnâ ge mû ǁkhā i. ǂGuin tae-en nî dīsa gere ǂâi, hînab ge Jesuba ǃgāsa daoǁgaude ge mā da, î da ǃnorasase hâ ǁkhā. w22.07 12 ¶13-14

Jehovab ge ǀorogam ǁaeb di Israelǁîna ge mîba în, ǁîn ǀgôana hoaǁae Jehovab xa ǁkhāǁkhā. (Deu. 6:​6, 7) ǁNā ǁgûn ge ǂgui ǃēde ge ūhâ i, în ǁîn ǀgôana Jehovaba ǀnamsa ǁkhāǁkhā. Aiǁgauseb ge ǂkham Israelǁî ǀgôaba, ǁîb di dadasab ǀkha ǃhanaba ra ǂgā tamas ka io gere ǃgao hui. Tsî i ge ǁîb di ǃgâsa mamasasa ra hui, ǂoms tsî nau oms sîsenan ǀkha. ǁGûn tsî ǀgôan tsîn ge ǀguiba gere sîsenǀhao, on ge ǂhâǂhâsa xūn xa ge ǃhoa ǁkhā i. Aiǁgausen ge, Jehovab di ǃgâi ǀgaugu xa ge ǃhoa ǁkhā i. Tsî matib ge omarisa gere hui ǀgaub tsîna. ǂGui ǃhūgu ǃnân ge ǀgôan tsî ǁgûn tsîna hoa tsēsa ǀguiba hâ tama hâ. ǁGûn ge sîsenni tawa hâ tsî ǀgôana skoli tawa. Nēs xa ǃaromahe hâsen ge ǁgûna ǃēde nî ôa în ǁîn ǀgôan ǀkha ǃhoa.—Efe. 5:​15, 16. w22.05 28 ¶10-11

Tsū ǁoren ge Elob di ǂhanuba ǃgôaǃgâ tama hâ. Xristeǁî-i ga ǁnāti i ǁore-e dī o, o i ge Jehovaba ǃoa ǀgores ǃnâ nî ǀgū. Tsî ǀhaohâb ǃûi-aoga ǃoas tsîna nî ī. (Psa. 32:5; Jak. 5:14) Mâ ǃereamsa gu ǀhaohâb ǃûi-aoga ūhâ? Jehovab ǀguib ge ǁnā ǀgaiba ūhâ, khoe-i di ǁoreba ǀoasase ǀûbasa. Tsîb ge sida ǁorena xoremarib ǃnâ-ū ǀgui ra ǀûba. Xawe Jehovab ge ǀhaohâb ǃûi-aoga ǃereamsa mā hâ, î gu xoade ra sîsenūse kō khoe-i ǀhaohâb ǃnâ a hâ ǀgara ǁkhāsa. (1Kor. 5:12) ǁNāsa sīǃnâs ǃaroma gu ge, sao ra dîdi ǃereamde nî ǂanǂui: Nē khoe-e ǀnai go aiǂhomisen hâ i ǁoreba dīsa? Nē khoe-e ǂgui ǃnāde ǁoreba dī hâ? Xawe ǂhâǂhâse ǁgauǁgauna hâ, nē khoe-i amabes ǃnâ ǃhausen hâ ǃkhaisa? ǁGauǁgauna hâ Jehovab ǁî-e ǀûba hâsa?—ǃNǃkh. 3:19. w22.06 9 ¶4

Jesub ge ǁîb di saosabena ge mîba, în ǂhanu-aisiba ôa. (Mat. 5:6) Nēs ge ra ǂâibasen: Khoe-i nî ǀgaisa turaba ūhâsa, ǂhanu ǃgâi tsî Elob mûǁae ǃanu xūna dīs diba. Amab tsî ǂhanu-aisib tsîna du a ǀnam? ǁNāsa da ge ra ǂgom. Sadu ge ǂhumib tsî hoa ǁgai xūna ǃhui hâ. (Psa. 119:​128, 163) Khoe-i hîna ra ǂhumi î ge, nē ǃhūbaib ǂgaeǂgui-aob, ǁGâuaba ra ǁgae. (Jhn. 8:44; 12:31) ǁGâuab ra dī ǀgui xū-i ge, Jehova Elob ǃanu ǀonsa ǁgaiǁgaisa. Edenni ǃnâ ge hâ i mâǃoasa xub ge ǁGâuaba ǂhumi xūna sada Elob xa ra ǃhoa. ǁÎb ge khoena gere ǂâi kai ǂgao, Jehovab a ǁîǂâixa tsî ǂhanuoǃnâ ǂgaeǂgui-aosa hîna ǃgâiba khoena xu ra ǃkhō-oaba. (Gen. 3:​1, 4, 5) ǁGâuab Jehovab xa ra ǂhûmi xūn ge khoena ǁgaise ǁîb xa ra ǂâi kai. Khoen ga ‘amaba ǀnamsa’ ǁhûi tama io, ob ge ǁGâuaba ǁîna a ǂgaeǂhapu ǁkhā în ǂhanuoǃnâ tsî eloxoresa xūna dī.—Rom. 1:​25-31. w23.03 2 ¶3

ǀNî ǁgai ǁnaetiga ǀûsa du ǃgarise ra sîsen ai, hîna du ge ǀnîsi ǁkhawa ǁî-e dī ǁkhā. Tamas ka io du ǁaixa tsî nî tsâ sadu di mîǁguiba sīǃnâs kaise a ǃnūsa. Tae-e nî hui du, î du mâǀgai? ǂHâǂhâsa ǀgaub hîna da nî ūhâb ge Jehovaba ǀnamsa. Jehovaba du ūba hâ ǀnammi ge kaise a îsa ǀgau, hoa ǀgaugu hîna du ūhâ gu ǃnâ. (ǂKhm. 3:​3-6) ǁNā tsâsib ge bē tama ǃgomsiga du ga ra hōǃâ o. Elobmîs ge ǂgui ǁaegu ai, Jehovab ǁîb ǃoaba-aona ūba hâ ǂgomǂgomsa ǀnammi xa ra ǃhoa. Nēb ge ǃgam tsâsib hîna mā-am tama hâba, î da ǁîba ǁnāxu. Elob di īsib ǃnâ du ge kuruhe hâ. (Gen. 1:26) Mati du ǁnāti ī ǀnamma a ǁgau ǁkhā? ǃGôaǃgâsib ǀkha tsoatsoa re. (1Tes. 5:18) Tsēs hoasa dîsen re, ‘Jehovaba mati ǀnamma ge ǁgaute?’ Tsî ǁnās ǃaroma sadu ǀgoredi ǃnâ, ǁîba gangan re xūn hînab ge dība du na ǂgai khâis ǃnâ-ū. ǁÎb ǀnamma sado ra mā khami mû re. Apostel Paulub ge ǁnāsa Jehovab xa a mû ǀgaub khami. w23.03 12 ¶17-19

Jesub ge hoa 12 apostelgu ǃoagu khoexaǃnâ tsî ge ǀnamxaǃnâ i. Tae-e da ra ǁkhāǁkhāsen? ǂHâǂhâsa a ǃkhais ge nau khoen ra dīsā xūn ǀguin ose, xawe mati da ǁîn ǃnūbusigu tsî dīsādi ǃoagu ra tanisen ǀgaub tsîna. Sida ǃgâsa-i ǀkha da ga ǁaixa, o da ge a dîsen ǁkhā: ‘Tae-i ǃaroma i ǁî-i go dī xū-e ǁnātikōse ra ǁaixa kaite? ǁGai ǀgaub hîna ta nî sîsen aiba ī ra ǁgauǂui? Īǁkhā-e khoe-i hîna go ǁaixa kaite i ǃgomsiga ūhâsa? ǃGâi ǃaromas ǁaixas disa da ūhâ khami da ga ra tsâ xawe da ǀnamma ǁgau tsî ǁnā khoe-e ǀûba ǁkhā?’ ǀNamma da ga ǁgaugu o da ge ra ǁgau, Jesub di ama saosabe da asa. Jesub di aiǁgaus tsîn ge ra ǁkhāǁkhā da, î da dītsâ tsî sida ǃgâsana ǁnâuǃā. (ǂKhm. 20:5) Jesub ge ǂgaoga ge khomai ǁkhā i, sida ose. Sida ǃgâsan ga ǁaiǁai da, o da ge ǁîn ǀkha nî ǃnūǃnâxa. (Efe. 4:​1, 2; 1Pet. 3:8) ǁNāsa dīs ge nî supu, khoe-i di khaoǃhūb xa da ga ǂan o. w23.03 30 ¶14-16

ǀNî ǁaegu aib ge ǁGâuaba ra mû ǁkhōǁkhōsa ǀae-e da ūhâsa tsî ǁnāsa a sîsenū ǁkhā. Doktergu tamas ka io sida omaris di ǁanin ge a ǁgari da ǁkhā, î da ǀaoba ra sîsenū ǀaeǃkhōde ūǃoa. Tsî ǁnās ge Elob di ǂhanuga a mâǃoa ǁkhā. Tamas ka ion ge ǀnî khoena a ǂkhâǃnâ da ǁkhā, î da Jehovab daoǁgaudi ǃoagu hâ tama ǀaeǃkhōna ūǃoa. ǁŌ ǂgao tama da hâ xawe da ge a ǂan, Jehovab ǀnam da ǀû tidesa ǁō da ga o. (Rom. 8:​37-39) ǁÎb ǀhōn ga ǁō o, ob ge Jehovaba ǁîna ǁîb ǂâis ǃnâ ra ūhâ ûitsaman a khami. (Luk. 20:37) ǁÎb ge ra ǁkhōre ǁîna khâisa māsa. (Job. 14:15) Jehovab ge ǀgapi marisa ge matare î da “ǀamo ûiba” hō. (Jhn. 3:16) ǂAn da ge a Jehovab kaise a ǀnam da tsî ra tsâba dasa. ǁNā-amaga da ge Jehovaba ǁnāxu tama hâ, ǀaesen tsî da ga ǁōb xa hā ǂamhe o. Xawe da ge ǁîb ǃoa ǁkhaeǂgaos, gā-aisib tsî ǀgaib ǃaroma ra kō.—Psa. 41:3. w22.06 18 ¶16-17

Elobmîs ge ra mî: Jehovaba “ǃaoǃgâs ge ǂans di tsoatsoasa tsî ǃAnub di ǂans ge ǁnâuǃāba hōsa.” (ǂKhm. 9:10) ǁNā-amaga î ge a ǂhâǂhâsa mîǁguiga da ga dī, o da Jehovab di ǂâiǀgauba nî ūhâsa—ǁnā ǂans “ǃAnub” disa. ǂAnǂui da ge nî Jehovab nēs xa mati ra ǂâisa. Nēsa da ge Elobmîs tsî Elobmîs ai ǃgaoǃgaosa ǂkhinina ǁkhāǁkhāsens ǃnâ-ū a dī ǁkhā. Nēsa da ga dī, o da ge ama gā-aisiba ra ǁgau. (ǂKhm. 2:​5-7) Jehovab ǀguib ge ama gā-aisiba a mā da ǁkhā. (Rom. 16:27) Tae-i ǃaroma da a mî ǁkhā, ama gā-aisib Jehovaba xu ra hāsa? ǂGurose, Jehovab ge a Kuru-ao tsîb ge hoa xūn hînab ge kuruna ǃamkuse a ǂan. (Psa. 104:24) ǀGamǁîse, Jehovab ra dī xūn hoan ge ǁîb gā-aisiba ra ǁgau. (Rom. 11:33) ǃNonaǁîse, Jehovab di gā-ai ǀapemāde ra sîsenūn ge ǃgâiba ra hō. (ǂKhm. 2:​10-12) Gā-ai ǂgao da ga, o da ge amaba nî ūǃoa. Tsî nî mā-am î-î sida di mîǁguigu tsî dī da ra xūn tsîn ǃnâ daoǁgau da. w22.10 19 ¶3-4

ǁGâuab ge ǁnā ǃkhamsa ge ǂoaǃnâ, hîna ǂHaiǂhais 12ǁî danaǃâs ǃnâ ra mîhesa. Tsî i ge ǁîb tsî demongu tsîna ǀhomma xu ge aoǁnâhe, ǃhūbaiba ǃoa. ǁGâuab ǁaixa hâ amagab ge khoena ge ǁnāǂam tsoatsoa. Tsîs ge nēsa “kai ǁaiba” ǃhūbaib ai ra ǃaroma. (J.ǂHa. 12:​9-12) Mati di nē kēbode sida ǃgâiba a ǀkhī-ūba ǁkhā? Mûhe ǁkhā tanisen ǀgaugu ge nî hui da, î da ǁnâuǃā Jesub ge a ǂgaeǂgui tsoatsoasa. Khoen ǀguriǂâixasib tsî ǃhuiba mû tsî ǁaixas xa da ge ra ǂâihō, ǁîn di ǀgaugu Elobmîs di kēbode ra dīǀoaǀoasa. Gaosib ge ǂgaeǂgui tsoatsoa hâ. (Psa. 37:1) Tsî da ge ra ǃâubasen ǃhūbaib di xūn nî ǁgaiǂoas ǀguisa dīsa, Armagedons ra ǀgū khami. (Mrk. 13:8; 2Tim. 3:13) Kaise da ge ra gangan sida di ǀhomsi ǁGûb ra hui dasa, î da ǁnâuǃā tae-i ǃaroma i nēti i ǂgui ǃgomsina ǃhūbaib ǃnâ hâsa. w22.07 3-4 ¶7-8

Jehovaba da ge a ǂgan ǁkhā îb sida ǀkha ǀguiba ra ǃoaba ǃgâsana hui în. ǀAen, tsūkēǃgân, toron, ǁgâiǀān tsî nau ǃgomsin tsîna mâ ǃkharu. Sida ǃgâsan hîna ǂhâsib ǃnâ hâ ǃgâsana ra huina, da ge nî ǀgoreba. ǀNîsi i ge ǃgâise du a ǂan ǃgâsa-e ǃgomsi-e ra hōǃâ. Tae-i ǃaroma du ǁîna, ǀondi ai ǂgai tsî ǀgoreba tama hâ? Jehovaba da ga ra ǂgan o, îb ǁîna hui în mâǃkharu, o da ge ǃgâsa ǀnamguba da ūhâsa ra ǁgau. ǀHaohâb ǃnâ ra ǂgaeǂgui ǃgâsagu ge, kaise ra ǃgôaǃgâ ǁîga da ga ǀgoreba o. Tsî ǁnā ǀgoredi ge ǁîga ra hui. Apostel Paulub ge ge ǂan i, nau khoen ǀgoredeb ǂhâ hâsa. ǁÎb ge ge xoa: “Tita tsîna ǀgoreba, îb Eloba ǂhanu mîde ti ams ǃnâ ǁgui, î ta ǂganǃgâsib ǃGâiǂhôas diba ǁkhoase ǂanǂan.” (Efe. 6:19) Nētsēs tsîna da ge ǂgaeǂgui ra ǃgâsagu, ǃgarise ra sîsenga ūhâ. ǁÎga da ge ǀnamma ra ǁgau, Jehovaba da ga ǂgan o, îb ǁîgu sîsen-e ǀkhae. w22.07 23-24 ¶14-16

Toro ǃkham-aob ge toroǀgapasa ra ǂnûi îb ǁîb danasa ǁkhauba. Sida gagasi torob ǃnâ da ge sida ǁnâuǃāba nî ǁkhauba, ǁGâuab di ǁnāǂamde xu. ǁÎb ge ǂgui ǃkharagagu xūna ra sîsenū, îb sida ǃâitsâ tsî sida ǂâi ǀgauga ǁgaiǁgai. Toroǀgapas toro ǃkham-aob danasa ra ǁkhauba khamis ge ǃâubasensa, sida ǂâiǀgauga ra ǁkhauba, î da Jehovab ǃoagu ǂgomǂgomsase hâ ǀgara. Sida ǃâubasens ǃnâ da ga ǂkhabu tsî sada di turagu xa ǀgui ǂâi tsoatsoa o, o da ge sida ǀamo ûib ǃâubasens xa a ǀuru ǁkhā. Kō re ǃkharuge ǁaeb Korintes ǃnâ ge hâ i Xristeǁîn mâsiba. Elob di ǂhâǂhâsa mîmâis ǃnân ge ge ǂgom ǀû, ǃâubasens ǁō hân khâis dīsa. (1Kor. 15:12) Paulub ge ge mî, ǁnān hîna ǁōhân di khâis ǃnâ ǂgom tama hân ge ǁîn di turaga dīǀoaǀoas ǀguisa ra ûiba. (1Kor. 15:32) Nēsin ge ǂgui khoen hîna Elob mîmâis ǃnâ ǃâubasen-e ūhâ tamana, ǁaerob di ǁkhoab ǀguiba ra ûiba. Xawe da ge sida ǂgomǃgâsiba hānîǁaeb, Elob mîmâis dib ǃnâ ūhâ. w22.10 25-26 ¶8-9

Jehovab ge ra ǁkhau du, î du ǁîba ǃoa ǀgore ǁîb ge ra mû mâ ǃgomsina du ūhâsa. Tsîb ge ra mîba du, sadu ǀgoredeb mâ ǁaeb hoab ai nî ǃgâsa. ǁÎb ǃoaba-aon ǀgorede ǃgâs xab ge a ǃgâibahe. (ǂKhm. 15:8) Tae-i xa du a ǀgore ǁkhā ǀguritsâsen du ga o? Jehovab ai du sadu ǂgaoba ǁhōǂui re. (Psa. 62:8) Jehovaba sadu ǃgomsina mîba tsî matin ra tsâ kai dusa. ǂGan re îb hui du, î du ǂan tae-e du ǁnā tsâsigu ǀkha a dī ǁkhāsa. Tsîb ǁkhoaǂgaosiba mā du, î du ǃgâise ǁguiǃāsen ǁkhā. ǁÎba du ge a ǂgan ǁkhā îb gā-aisiba mā du, î du gā-ai ǀgaub ǃnâ sadu ǂgomsa ǁgûiǃā. (Luk. 21:​14, 15) ǃGâi tama tsâsigu ǀkha du ga ǃgomsiba ūhâ o. Jehovaba ǂgan re, îb hui du, î du gagasise ǀgaisa Xristeǁî-i ǀkha ǃhoa. Tsî du ge Jehovaba a ǂgan ǁkhā, îb sado ra ǃgâ khoe-e hui î-i ǁnâuǃā du. Mû re matib sadu ǀgorede nî ǃeream ǀgausa. Tsî naun di huiba ūǃoa re, o du ge ǀorose nî ǀguritsâsen. w22.08 10 ¶6

Tesalonikas ǃnâ ge hâ i ǀasa ǀhaohâb ge mâǃoasa gere hōǃâ. Mâǃoa-aon ge ‘ǀnî ǂgomsaben ǁnāpa ge hâ-ina ǃkharaǂoaxa tsî ǃās di dana ǂgaeǂguis tawa ge sī-ū.’ (ǃNǃkh. 17:6) Mûnanai ǁkhā i du a, matin ge ǀasa Xristeǁîna ǃkhuri hâ īsa? ǁÎn ge ǁnā ǁaeb ai Jehovaba ǃoabas ǃnâ ǀorose ga dī hâ. Xaweb ge Pauluba ǁnāsa ge ǂgao tama hâ i. ǁÎb ge ge dītsâ î-î nē ǀasa ǀhaohâba ǃgâise kōǃgâhe. Paulub ge Tesalonikaǁîna ge hōhōǃnâ: “Tsî khom ge Timoteub sikhom di ǃgâsaba ge sî . . . , ǁîb nî sado ǀgaiǀgaiǃnâ tsî ǁnamase sadu ǂgoms ǃaroma. ǀGui-i âdu tsîn nē ǃgôaǃgondi xa ǃaromahe hâse ǁnobeǁnobehe tidega.” (1Tes. 3:​2, 3) Timoteub tsîn ge ge mû matib ge Pauluba, Lystras ǃnâ ge hâ i ǃgâsana gere ǀgaiǀgai ǀgausa. Jehovab ra mā ǀamǂoasab ge mû amagab ge, Timoteuba ǀasa ǃgâsana ge ǂkhâǃnâ ǁkhā i hoa xūn nî ǃgâi ǃkhaisa.—ǃNǃkh. 14:​8, 19-22; Heb. 12:2. w22.08 21 ¶4

19ǁÎ kurigu ǃnâ i ge Elobmîs ǁkhāǁkhāsen-aon di groeps. Hîna ge Charles Taze Russelli xa gere daoǁgauhena Elobmîsa ǃgamse ge ôaǃnâ tsoatsoa. ǁÎn ge Jesub ǁguibas di ǂhâǂhâsasib xa gere ǂan ǂgao tsî ǁîb ǁōb mati nî ǂâiǂâisenhe ǀgaub tsîna. Nētsē da ge ǁnā ôaǃnâsaxu ǃgâiba ra hō. Mâ ǀgaub ǃnâ? Sida mû di ge ǁkhopamsa tsî da ge nēsisa mû ǁkhā Jesub di ǁguibas tae-e ra ǂâibasensa. Tsî i tae-e khoesib hoaba nî dībasa. (1Jhn. 2:​1, 2) Tsî da ge ge ǁkhāǁkhāsen, Elobmîs ǀgam ǃâubasende khoen hîna Eloba ra ǂkhîǂkhîna ra māsa. ǀNîn ge ǀhommi ǃnâ ǁkhawa ǁō tidese nî ûi tsî nauna ǃhūbaib ai ǀamosib kōse. Jehovab kōse da ge ra ǀgū, ǁîb matikōse a ǀnam dasa da ga ǂâiǃgâ o. Tsî matikō ǃgâiba da ra hōsa, Jesub di ǁguibasa xu. (1Pet. 3:18) Sida ǃgâsagu ge ǃkharu ge ǁae gere dī khami da ge sida tsîna. Nau khoena ra ǁkhau în Jesub di ǁōb ǂâiǂâisensa hâǃnâ. Tsî ǁîb ge ǁgau da khami dī. w23.01 21 ¶6-7

Jesub ge khoena, Elob Gaosib nî hau ǀkhaegu xa ge ǁkhāǁkhā. Xoremarib ǃaroma da ge kaise ra gangan. Daoba i ra ǁkhowa-amba da amaga, î da Jehovab tsî Jesub ǀkha ǀgū ǀhōsagusisa ūhâ ǁkhā. ǁNān hîna Jesub ǃnâ ǂgomsa ra ǁgaun ge ǃâubasensa ūhâ în ǀamosib kōse ûi. Tsî ǁîn di ǀnamsaben ǁō ge na ǁkhawa mû. (Jhn. 5:​28, 29; Rom. 6:23) Sida ge xū-e nē ǀkhaega hōs ǃaroma dī tama. Tamas ka io da ge Elob tsî Xristub tsîna sida kha ge dība xūn ǃaroma tātsē madawa-am hō ǁkhā tide. (Rom. 5:​8, 20, 21) Xawe da ge sida di ǃgôaǃgâsiba a ǁgau ǁkhā. Mati? Ū da hâ xūna sîsenus ǃnâ-ū. Aiǁgause da ge ǀnîsi Gaosib omga oms ǀkha a hui ǁkhā tamas ka io ǁîga kōǃgâs ǀkha. w23.01 26 ¶3; 28 ¶5

ǁNān hîna Elob gaosiba Jesub ǀkha nî ǂgaeǂguin ge biliuns di khoena ǃhūbaib ǂhawase nî kōǃgâ. Jesub khamin ge 144 000 na, gao tsî pristerse nî ǃoaba. (J.ǂHa. 5:10) Moseb ǂhanub ǃnāga gu ge pristerga ǁnā ǃereamsa ge ūhâ i, î gu Elob khoena ǁkhauba în sorosise tsî gagasise ǃanuse hâ. Nē ǂhanub ge “hā nî ǃgâi xūn di soms ǀguisa i.” ǁNās ǃaroma da ge a mî ǁkhā Jesub ǀkha ra ǂgaeǂguin Elob khoena sorosise kōǃgâ. Tsî ǁîna nî huisa în ǁîn di gagasi ǂhâsiba dīǀoaǀoa. (Heb. 10:1) Tsî ǀū da ge a ǁnā gao-aon tsî pristeran tsîn mati Elob ǂgaeǂguis ǃnāga hâ khoen ǀkha, nî ǃhoa ǀgausa ǃhūbaib ai. ǂGomǃgâsiba da ge a ūhâ ǁkhā, Paradais ǃnâb ǁîba ǁnān ǃhūbaib ai hâna ǂhanu ǀgaub ǃnâ nî daoǁgausa.—J.ǂHa. 21:​3, 4. w22.12 11 ¶11-13

ǀGui ǃaromas hîna da nauna Jesub di ǁōb ǂâiǂâisensa ǃoa ra ǁkhauǂuis ge, ǂhâba da ra amaga în ǁnān hîna ǂguro ǃnās ase ra hâǃnâna Jehovab tsî Jesub ge dība da xūna ǁkhāǁkhāsen. (Jhn. 3:16) ǃÂubasen da ge ra Jesub di ǁōb ǂâiǂâisens tawan ǁnâu tsî ra mû xūn nî ǂkhâǃnâ nîsa, în Jehovab di ǃoaba-aon di ǀgui kai. ǁNān hîna ge Jehovaba a ǃoaba ǀûn tsîna da ge ra ǁkhau. ǁNāsa dīs ǃnâ-ū da ge ǁîna ra ǂâiǂâiǃnâ, Elob ǁîna a ǀnam ǃkhaisa. ǂGuin ge sida ǁkhauǂuisa ra ǃkhōǃoa tsî da ge kaise ra ǂkhî ǁîna da ga mû o. Jesub di ǁōb ǂâiǂâisensa hâǃnâs ge ǁîna ra ǂâiǂâiǃnâ, mātikōsen ge ǃgâiba gere hōsa Jehovaba ǃkharuge ǁaeb ǃnâ ǃoabasa xu. (Psa. 103:​1-4) Khoen ga sida ǁkhauǂuisa ǃkhōǃoa tamas ka ion ga ǂkhā xawes tsîna da ge ǃgarise nî sîsen, î da khoena ǁkhauǂui khoen ǃnâ da ǃgâiǃgâibasensa ūhâ amaga.—Luk. 15:7. w23.01 20 ¶1; 22-23 ¶9-11

ǁŌb nî ǃoes aiǃâb ge Jesuba ǀō-aisa ǂgansa, ǁîb ǀhomsi ǁGûb tawa ge ǂgan. Jehovabab ge ge ǂgan îb, ǁîb saosabena ǁkhauba. (Jhn. 17:​15, 20) Jehovab ge hoaǁae ǁîb khoena ǁkhauba tsî ra kōǃgâ. Xaweb ge Jesuba ge ǂan î, ǁGâuab ǁîb saosabena nî mâǃoa ǃkhaisa. Jesub ge ge ǂan i, ǁîn Jehovab di huiba ǂhâba hâsa, în ǁGâuab di ǁnāǂamde mâǃoa. ǁGâuab ǂgaeǂguis ge nētsē ǂgui ǃgomsina ama Xristeǁîna ra ǃaromaba. Nē ǃgomsin hîna da ra hōǃân ge ra ǂkhabuǂâi kai da. Tsî sida ǂhauǃnâsib Jehovab ǃoagu da ūhâba ra ǃâitsâ. Xawe î ge ǃao da nî xū-e a ǀkhai. Jehovab ge ǃgomsin hîna da ūhâna ra mû tsî ra hui da ǂgao. Îo, Jehovab ge ǁîba ra ‘ǃaoǃgâna ra kōǃgâ . . . tsî ǁōba xu ra sâu.’—Psa. 33:​18-20. w22.08 8 ¶1-2

Kurib hoaba da ge Jesub di ǁōb ǂâiǂâisens ǃnâ ǃgôaǃgâsiba Jesub ge dībada xūna ra ǁgau. Tsî da ge ǁaeba ǁamaǂui tsî ǁîb ǁōb xa ǀgore hâse ra ǂâiǂâisens. Aoǁnâ sîsenni ǃnâ da ge nauna ra ǂkhâǃnâ, în ǁîn tsîna nē ǀō-aisa tsēsa hâǃnâ. Tsî ǂan da ase da ge xū-i xare-e mā-am tide, î-i tā sida Jesub di ǁōb ǂâiǂâisensa hâǃnâsa xu ǁkhae. Jesub di ǁōb ǂâiǂâisens tawa da ge ra ǁkhāǁkhāsen tae-i ǃaroma i khoesiba xoremariba ǂhâhâsa. Tsî matib ǀgui khoeba ǂgui khoen di ǁorena a matare ǁkhāsa. ǂÂiǂâiǃnâhes tsîna da ge nî dī, xûi-i tsî pere-i tae-e ra ǂâibasensa. Tsî ham-i ǁî-e xu ǂû tsî ā ǁkhāsa. (Luk. 22:​19, 20) ǁNān hîna ǃhūbaib ai nî ûin di ǃâubasens xas tsîna da ge nî ǂâiǂâisen. (Jes. 35:​5, 6; 65:​17, 21-23) ǁNā-amaga da ge nē amaba ǂhâǂhâsa xū-i ase nî mû. w23.01 20 ¶2; 21 ¶4

ǁÎb ǀGôabab ge xoremarib ase ge mā, sida ǁorena ǃgū-ais ǃaroma. Elob ge ge īǁkhā kai î da ǀamo ûiba hō. (Mat. 20:28) Apostel Paulub ge ge xoa: ‘ǁŌb ge khoe-i ǃnâ-u ge hā, amagas ge ǁkhāti ǁō hân khâisa khoeb ǃnâ-u ra hāsa. Adammi khami da a khoe, xui-ao da ge hoada ra ǁō, ǁnās ǁkhās khamin ge hoana Xristub ǃnâ nî ûi-ûihe.’ (1Kor. 15:​21, 22) Jesub ge ǁîb di saosabena ge ǁkhāǁkhā în ǀgore îb Elob Gaosiba hā tsî Elob ǂâisa ǃhūbaib ai ī. (Mat. 6:​9, 10) ǀNî ǃâb Elob ǂâibasens dib ge khoen ǃhūbaib ai ǀamose nî ûisa. Nēsa dīǀoaǀoas ǃaromab ge Jehovaba ǁîb di ǀgôaba Mesiab Gaosib di Gaose ge ǁgaumâi. Elob ge ǁnā ǁaeba xu, 144 000 khoena ǃhūbaiba xu ra ǀhaoǀhao. Jesub ǀkhan nî sîsenǀhaose, în Elob ǂâisa dīǀoaǀoa.—J.ǂHa. 5:​9, 10. w22.12 5 ¶11-12

ǁŌb ǃnâ da ga ǀnamsabe-e ǂoaǃnâ, o da ge ǁnā khoe-e kaise ra ǁkhore. ǂGurose da ge tsûb ǀguiba nî tsâ, ǃgōsase i ga kaise tsūba tsâ o, ǁō-i nîs aiǃâ. Xawe ǁaeb ra ī khami da ge ǃgâiaǂgaoba ra hōǃâ tsoatsoa. ǁNā khoe-i ge ǁkhāǁkhā da, dī xū-i tamas ka io ǂkhâǃnâs ǃaroma a mî xū-i. Tsî a ǀnom kai da xū-i xa da ga ǂâi oa o. ǁKhā ǀgaub ǃnâ i ge kaise ra tsûtsû da. Jesub ge mati a tsâ tsî a ǁō ǀgaub xa da ga khomai o. Jesub di ǁōb ǂâiǂâisens ǁaeb ǃnâ da ge ǁaeba ra ǁamaǂui î da xoremarib ǀō-aisasib xa ǂâi. (1Kor. 11:​24, 25) Xawe da ge kai ǃgâiaǂgaoba ra hō, Jesub ge ǃhūbaib aib ge hâ io gere mî tsî dī xūn xa da ga ǂâi o. ǂKhâǃnâhes tsîna da ge ra di, nēsib sida ǃaroma ra dī xūn. Tsî hānîǁaeb ǃnâb nî dī xūn xa da ga ǂâi o. w23.01 26 ¶1-2

ǁKhāǁkhāsabegu ge kaise ge tsûaǂgao hâ i, Jesub ge ǁō o. ǁÎgu ǀhōsab ǀguiba gu ge ge ǂoaǃnâ tama hâ i. Xawe gu ge ǁîgu ǃâubasens tsîna gu ge ǂoaǃnâ khami gere tsâ. (Luk. 24:​17-21) Xawe Jesub ge ǁîgu aiǃâ a ǂhai, ob ge ǁaeba ū tsî ǁîga ge hui, î gu ǁnâuǃā ǁîb Elobmîs kēbode ra dīǀoaǀoasa. ǁÎb ge ǂhâǂhâsa sîsenni, hîna gu nî dī-e ge mā gu. (Luk. 24:​26, 27, 45-48) Jesub ge ǀhomma ǃoa a oa ǁaeb ǃnâ, î ge ǁkhāǁkhāsabegu di tsûaǂgaoba kai ǃgâiaǂgaob ǃnâ ge dawa. ǁÎgu ǀhōnkhoeb a ûitsâmasa gu ge ge ǂan i tsîb ǁîga ǀasa ǁgaumâisa dīǀoaǀoas ǃnâ nî huis ge kaise ge ǃgâiaǂgao kai gu. ǁÎgu ǃgâiaǂgaob ge ge ǂkhâǃnâ gu, î gu Jehovaba ǀûsen tamase ǃoaba ǀgara. (Luk. 24:​52, 53; ǃNǃkh. 5:42) Jesub ǁkhāǁkhāsabega ǁgaes ge Elob Gaosiba ǂgurose sida ûib ǃnâ mâisa ǃkhōǂgā hâ. Mâǀgaisa da Jehovaba ǃoaba ǀgaras ǃnâ ǂhâǂhâ, xaweb ge ra mîmâiba da ǀkhaedab nîsa ǁnāsa da ga dī, o.—ǂKhm. 10:22. w23.01 30-31 ¶15-16

Sida ge tātsē Adammi tsî Eva hâra ge dīsā, dīsāde dī ǂgao tama hâ. ǁNā ǀamǂoasa xu da ge a ǂgōsen ǁkhā, aiǃgû tsî da ga Jehovab xa ǁkhāǁkhāsen, ǁîb di ǁgaraga ǃgôaǃgâ. Tsî ǁnās ǀkhas tsîna ǁîb di ǂâiǀgauba ǁnâuǃā o. ǁNāsa da ra dī khami i ge sida ǀnammi hîna da ǁîba ūba hâba nî kai. Abrahammi xa ǂâi re. ǁÎb ge amabes ǃnâ Jehovaba ge ǀnam i. Jehovab di mîǁguibab ge ǁnâuǃā tama hâ i xawes tsînab ge Abramma ge mâǃoa tama hâ i. ǁÎb ge dītsâ tsî Jehovaba ǃgâise gere ǂan. Aiǁgauseb ge ǂanǂui o, Jehovab di mîǁguib Sodoms tsî Gomorasa dīkākās xa. Ob ge Abramma aibe ge ǃao. “Hoaraga ǃhūbaib di ǀGoraǃgâ-aob” ra ǂhanu-aina, ǂhanu-ōǃnân ǀkha dīkākāsa. Abrammi ǃaroma i ge ge ǃgâi ǂâi tama hâ i. ǁNā-amagab ge ǃgamǃgamsenxase Jehovaba, ǃkharagagu dîna ge dî. Jehovab ge ǃnūǃnâxase ǁîba ge ǃeream. ǀAms aib ge Abrahammi ge mûǂan, Jehovab hoa khoen di ǂgaoga ra ôaǃnâsa. Tsîb tātsē ǂhanu-aina, ǂhanu-ōǃnân ǀkha ǁkhara tidesa.—Gen. 18:​20-32. w22.08 28 ¶9-10

Jesub ǃnaes aiǃâ 455ǁî kurib ge ǂgaeǂgui-aob Nehemiaba, Jerusalems di mirgab omkhâi toa hâs khaoǃgâ ǂgomǂgomsa khoeba gere ôa, ǃgâise ǃāsa nî kōǃgâba. Nehemiab ge nau khoegu ǁaegu, omǂnamisaǃkhais di ǂamkhoeb Hananjaba ge ǁhûi. Elobmîs ge ra mî “Hananjab ge hoagu ǂamai ge ǂgomǂgomsa tsî eloǃaoǃgâxa i aoba.” (Neh. 7:2) Jehovaba ǀnams tsî ǁîbab nî ǂkhîoǃnâ kais ǃaob ge Hananjaba ge ǂkhâǃnâ, îb ǃgarise māheb ra ǁgaumâi-i hoa-i ǃnâ sîsen. ǁNā ǀgaugu tsîn ge sida nî hui, î da ǂgomǂgomsase Jehovab di ǃoabas ǃnâ hâ. ǃGaoǃgâ re Tixikub aiǁgausa, apostel Paulub ge nē ǃgâsaba ge ǂgomǃgâ hâ î. Paulub ge Tixikub ai ge ǂgomǃgâ hâ i tsî ge mî ǁîb a “ǂgomǂgomsa ǃoaba-ao” ti. (Efe. 6:​21, 22) Paulub ge ǁîba ǂgomǃgâs ǀguisa ge hî tama hâ i, îb sîǂkhanide Efeseǁîn tsî Koloseǁî ǃgâsana ǃoa ī-ū. Xaweb ǁîna ǁkhaeǂgao tsî ǂkhâǃnâs tsîna nî māsa. Tixikub ge ra ǂâiǂâiǃnâ da sida di ǂgomǂgomsa tsî ǂgomǃgâxa-aogu hîna nētsē sida di gagasi ǂhâsigu ǃnâ ra kōǃgâ da gu xa.—Kol. 4:​7-9. w22.09 9-10 ¶5-6

Josefi ge 13 kuriga kaise ǁgai ǃgomsina gere hōǃâ. Josefi ge ge dîsen ǁkhā i, amabes ǃnâb Jehovab xa a ǀnamhesa, ǂhâsib ǃnâb ge hâ i ǁaeb ǃnâ. Xaweb ge Josefa ge ǁaixa tama hâ i. ǃNomsase hâs ǃnâ-ūb ge ǁîb ǁnâuǃāxa ǂâisa ge ūhâ ǀgara. ǁÎb ǃgâsaga dīǃoas ǃēsab ge ūhâ i xaweb ge ǁnāsa ge dī tama hâ i. Tsîb ge ǀnamma ǁgaugu tsî ge ǀûbagu. (Gen. 45:​4, 5) Josefi ge nē ǀgaub ai ge tanisen ǃgāsaseb ge ǂâi ǁkhā i amaga. ǁÎb ge ǁîb ǃgomsin xa ge ǂâi tama hâ i. Xawe tae-eb ge Jehovaba gere ǂhâbas xa gere ǂâi ǀgara. (Gen. 50:​19-21) Tae-e da ra ǁkhāǁkhāsen? Tsūdīhe du ga o, tā Jehovab ǃoagu ǁaixa tamas ka io ǂâi ǁnāxu ǃgâhe du go di. Xawe ǂâiǃâ re matib ra huidu sa, î du nē ǃgomsin ǃnâ mâǀgai. ǁNās ǂamai nau khoen xa du ga tsūdīhe o, ǁîn ǃnubusiga ǀnammi ǀkha ǃgū-ai re. w22.11 21 ¶4

Kēbo-aob Danieli ge ǁhapos ǃnâ ge mû, ǃgāsase i ra ǁgausa Jehovab hoa ǂhanugu ǂam-ai a ǀgapi ǃkhaisa. ǂGurob ge Daniela haka ǀguruga ge mû, ǃkharuge ǁaeb tsî nēsis di ǀgaisa ǃhūbaib ǂgaeǂgui-aoga ra ǂnûǁkhaeba ga. ǁNā gu ge Babilons, Medo-Persiab, Grikeb, Romes. Tsî ǃhūbaib di ǀgaisa ǂgaeǂgui-aob nētsē ra ǂgaeǂguib, Anglo-Amerikab tsîna. (Dan. 7:​1-3, 17) ǁNāpaxub ge Daniela, Jehovaba ǁîb di trons aib ǀhommi di ǀgoraǃgâ ǃkhais aib ǂnôase ge mû. (Dan. 7:​9, 10) Jehovab ge ǂgaeǂguisa khoesi ǂhanuga xu-ū. Tsî ǀkhara i hîna ǃnāsase anu hâ tsî kai ǀgaiba ūhâ-e ra mā. Ham-e ǃoa? “Khoen Ôab khami īb” Jesu Xristub tsî “hoan xa ǀgapib di ǃanu khoen” 144 000 hîna ‘ǀamosib kōse’ nî ǂgaeǂguina ǃoa. (Dan. 7:​13, 14, 18) ǃGāsa î ge a Jehovab ‘hoan xa a ǀgapi’ ǃkhaisa. ǁÎb ǀguib ge ǀguri ǁnā ǁkhāsiba ūhâ, ǁnāti-i xū-e dīs diba. Danieli ge ǁhapos ǃnâ a mû xū-i ge ǂgurob ge mû xū-e ra ǁapoǁapo. Danieli ge ra mî, ‘ǀHommi di Elob’ ge “gao-aoga ūǁnâ tsî gao-aoga ra mâi.”—Dan. 2:​19-21. w22.10 14-15 ¶9-11