Aprili

Dîsen re: ‘ǁNamasa ta mati ra ūǃoa? Ti dīsāde ta ǃhaese ra mûǂan? Tamas ka io ta ra ǀhapio kaisen? Nau ǃgâsana ta ǃhaese ra ǀhapimā?’ ǂGomǂgomsa ǃoaba-aon Jehovab din xa du ra khomai khami dîsen re, ǁîna hōǃân gere ǃgomsina mâ ǀgaugu ǃnâ gere sîsenǂamsa? Mâ mâsib hoab ǃnâ dîsen re: ‘Nē ǂgomǂgomsa ǃoaba-ao-i Jehovab di-i khami ta tita tsîna mati a dī ǁkhā?’ Sada ǀhaohâb ǃnâ hâ ǂkhaman tsî kairan aiǁgaude xu da ge ǃgâiba a hōǁkhā. Aiǁgause du ǀhaohâb ǃnâ hâ ǃgâsa-i, ǃgomsin ǃnâ ra mâǀgai i di aiǁgaus xa a ǂâi ǁkhā? ǂKhamkhoen ǀnîsi ra hōǃâ ǁgâib, omaris ǁanin xa mâǃoahes tsî ǂurusib ǃgomsiba ūhâs. Nē ǃgâsa-i ǃnâ du ǃgâi ǀgauba ra mû, ǁgae ǂgao du ra ba? Nē ǃgâsa-i di ǃgâi aiǁgaus, ge ǀnîsi a hui du ǁkhā ǃgomsina du ra hōǃâ ǁaeb ai. Nē ǃgâsan ra ǁgau, ǂgomǂgomsasiba da ge, kaise ra ǃgôaǃgâ. Tsîs ge nēsa kai ǂkhîba ra mā da.—Heb. 13:7 w22.04 13 ¶13-14

ǃGomsina da ga sada ûib ǃnâ ūhâ, o da ge tsâbaǁhaoxa ǀhaohâb ǃûi-aob ǁaeba ū tsî ra ǃgâ tsî a ǁkhoaǂgaoxaba kaise ra ǃgôaǃgâ. Elobmîs ǁkhāǁkhās ǀkha da ga ǃgomsiba ūhâ, o da ge ra ǂkhî ǂansa ūhâ ǁnaetisa aimâba-ao i ga ǂnûǂgâ tsî hui da o. Nē ǃgâsan hoa ge a ǂkhî sida huisa. Nē ǂkhîba da ge a hōǃâ ǁkhā māsenxase da ga sada ǃgâsana ǃoaba o. Jehovaba du ga nē ǀgaugu tamas ka io ǀnî hâ gu ǃnâ ǃoaba ǂgao o. Tae-e nî hui du īdu nēsa sīǃnâ? ǃGāsa tama mîǁguiba tā dī re. Aiǁgause du ge ǀnîsi a ǂâi ǁkhā. ‘ǃNāsase ta ge ǀhaohâb ǃnâ ra dī ǂgao. Xawe i ge a ǃgom ǁkhā nē mîǁguiba sīǃnâsa.’ Tsî du ge nēsa du go sīǃnâ ǃkhaisa ǂanǂui tide. ǁNā-amaga ǃgāsa mîǁguiga ǁhûi re. ǀNîsi du ge ǁnā mîǁguiba a xoaǁnâ ǁkhā. Tsî mati du a sīǃnâbi ǁkhās tsîna. w22.04 25 ¶12-13

Jehovab ge nēsi “kai ǂnubis” khoena ra ǀhaoǀhao. ǁÎb ge ra ǁkhāǁkhā nî în ǁîb Gaosib ǂhanub ǃnāga ûi. (J.ǂHa. 7:​9, 10) ǂGui khoen ga nē ǃhūbaib ǃnâ ǃaob tsî torob tsîn xa ǀgorahe. Xawen ge kai ǂnubis khoena ǃgarise ra sîsen în ǁîn ǁaeguba xu, hoa ǀgaugu ǃhuigub diba ūbē. ǁÎn dīga xūn ge ra ǁgau ǁîn gôaga ǃhūǃgao-ūdadi ǃnâ kuruǃkhunisa. (Mix. 4:3) Torogu hîna kai ǁōga ra ǃaromagu ǃnâ ǁhaos xan ge ǂgui khoena ra hui în ‘ama ûiba’ hō. ǁÎna ama Elob tsî ǁîb ǂâibasens xa ǁkhāǁkhās ǃnâ-ū. (1Tim. 6:19) Omaris khoen ge a mâǃoa nî ǁkhā tamas ka ion ge mari-e a ǂoaǃnâ ǁkhā, Elob Gaosiban ra ǂkhâǃnâ ǃkhais ǃaroma. Xaweb ge Jehovaba ǂhân hâ xūna ra mā nî. (Mat. 6:​25, 30-33; Luk. 18:​29, 30) ǁNā amab ge ra ǂgomǃgâ kai da Elob Gaosib a amasa. Tsî i nî aiǃgûsa Jehovab ǂâibasensa dīǀoaǀoas ǃnâ. w22.12 5 ¶13

ǀOadisi [1 000] kurigu ǀams ain ge hoa khoen, hîna ǃhūbaib ai ûi hâna ǀoasa kurusa nî ūhâ. Tsîn ge Adamma xu da ge ǀumi ǁoreb xa tsâǀkhāhe tide. (Rom. 5:12) Adammi ge ǃaroma ǁoreb ge hoase nî ūbēhe. ǁNā ǀgaub ain ge ǃhūbaib ai hâna ‘ǁkhawa nî ûi kaihe,” ǀoasa kurusan ūhâse, 1 000 kurigu ǀams ai. (J.ǂHa. 20:5) ǂAn da ge a Jesub ge ǂgomǂgomsase Elob ǃoa-ai a hâsa, ǁGâuab gere ǃâitsâbi o. Xawe hoa khoen hîna ǀoasa kurusa ūhâna, ǂgomǂgomsase nî hâ ǁGâuab ga ǃâitsâ nî o? ǁGâuab ga 1 000 kurigu ǀams ai tronkhesa xu orehe o, i ge mâ khoe-i hoa-e, nē dîsa aitsama nî ǃeream. (J.ǂHa. 20:7) ǁNān hîna ǀuniga ǃâitsâb ǃnâ ǂgomǂgomsan ge ǀamo ûib tsî ǃnorasasib tsîna nî hō. (Rom. 8:21) ǁNān hîna Jehovaba ra mâǃoan ge ǀamosib kōse nî dīkākāhe.—J.ǂHa. 20:​8-10. w22.05 19 ¶18-19

ǁNā kēbos ge ǁGâuab ge Jodeǁîn tsî Romeǁîn tsîna Elob di ǀgôaba a ǃgam kai o, ge dīǀoaǀoahe. (Luk. 23:​13, 20-24) Ama ǀhapis hîna ǃnôas ai hâs, ǁaeroba khoe-e a tsûtsû ǁkhā khami i ge Jesub tsîna xū-e ge dīǁoa i, ǀhobas ǃnâb ge hâ i amaga. (Mat. 16:21) Genesis 3:15 ǃnâ hâ kēbos nî dīǀoaǀoahes ga o, ob ge Jesuba ǀhobas ǃnâ ga hâ ǀgara ǁoa hâ. Tae-i ǃaroma? Kēbos ǃoagu i ge ra mî, ǁnā surib nî ǀaob di danasa ǂkhūǂkhū ti. Nēs ge gere ǂâibasen Jesub nî khâisa māhe ǃkhaisa. Tsîs ge ǁnāsa ge ī. ǃNonaǁî tsē, ǁō toab hâs khaoǃgâb ge Jesuba gagasi soros ǀkha khâisa ge māhe. Elob di ǂhanu ǁaeb aib ge Jesuba ǁGâuba ǀamose nî dīkākā. (Heb. 2:14) Xristub tsî ǁnān hîna ǁîb ǀkha nî ǂgaeǂguin ge, Elob khākhoen tsî ǀaob di surib tsîna nî dīkākā.—J.ǂHa. 17:14; 20:​4, 10. w22.07 16 ¶11-12

ǁGûdo, sadu ǀgôana hui în ǃgâi ǀhōsana ǁhûi. Elobmîs ge ǃgāsase ra mî sida ǀhōsan ǃgâi tamas ka io ǁgai sîsenǂuiba sida ai a ūhâ ǁkhāsa. ǁGûdo, sadu ǀgôan di ǀhōsana ǂan i du a? Tae-e du a dī ǁkhā î du ǀgôana hui, în Jehovaba a ǀnam ǀhōsana ǁhûi? (1Kor. 15:33) Jehovab ǀkha ǃgâi ǀhōsagusisa ūhâ, khoena du ge a ǁkhau ǁkhā, în ǀgôan ǀkha ǃgâi ǀhōsagusisa kuru. Tsî du ge nēs ǃnâ-ū ǀgôana ra hui, în ǃgâi ǀhōsana uhâ. (Psa. 119:63) Tony ti ǀon hâ ǁgûb ge ra ǁguiǃā: “ǂGui kurigam ge tita tsî ti kaikhoes tsîna. ǃKharagagu khaoǃhūga ūhâ ǃgâsana, ǂkhaman tsî kairan tsîna sida omsa ǃoa gere ǁkhau. Tsîn ge sida ǀkha ǂûǀhao tsî omaris ǃoabas tsîna gere hâǃnâ. Nēb ge ǃgâi ǀgauba, î da ǁnān hîna Jehovaba ǀnam tsî ra ǃoabana ǂan tsî Jehovaba ǃgâiaǂgaob ǀkha ǃoaba. ǁÎn ge ǃkharu ǃnâ xūn, ǁîn di ôasasib tsî Jehovaban ge dība xūn ge sîm ǀgôana ge hui în Jehovaba ǃoa ǀgū.” w22.05 29-30 ¶14-15

ǀHaohâb ǃûi-aogu ga ǁoreba go dī khoe-i ǀkha ǀhao o. O gu ge ǀhommi ǃnâ ge dīhe mîǁguib tsîna ǃhūbaib ai nî dī. Nē mîǁguiba mati ǀhaohâba ra tsâǀkhā? ǀHaohâb ra ǁkhaubahe amaga i ge ǃhobasen ǂgao tama hâ ǁore-ao-e ǀhaohâba xu ra ūǂuihe ,î-i tā Jehovab di gūna tsûtsû. (1Kor. 5:​6, 7, 11-13; Tit. 3:​10, 11) Tsî nēs ge ǁore-ao-i tsîna a hui ǁkhā î-i ǃhobasen tsî ǃgâiba Jehovab di ǀûbasa xu hō. (Luk. 5:32) ǀHaohâb ǃûi-aogu ge Jehovaba ǃoa ra ǀgore îb ǃhobasen go khoe-e hui î-i ǀhōsagusisa ǁkhawa ǁîb ǀkha ǀgaiǀgai. (Jak. 5:15) ǀNîsi i ge khoe-e ǀhaohâb ǃûi-aogu ǀkha i ǀhao hâs khaoǃgâ, ǃhobasen tama. ǁNāti i mâsib ǃnâ i ge ǁî-e ǀhaohâba xu nî ǂnûiǂuihe. Xawe i ga ǁî-e mûǂan o, dī i go xū-i ǃgâi tama hâsa. Tsî i ga ǁî-i ǂâi ǀgaub tsî dīga ǀkharaǀkhara, ob ge Jehovaba a māsenxa ǁî-e ǀûbasa. (Luk. 15:​17-24) Tsî ǁnās ge a ama ǁî-i ga tsū ǁoreba dīs tsîna.—2Kro. 33:​9, 12, 13; 1Tim. 1:15. w22.06 9 ¶5-6

Jehovab huib ǀkhan ge ǃhūbaib ǂhabase hâ Xristeǁîna, ǃgom mâsiga ge ǃkharuǃnâ tsî ǁGâuaba ge mâǃoa. (1Pet. 5:9) ǀGūǁaeb ge Jehovaba, Jesub tsî ǂkhauhesan tsîna nî daoǁgau în ‘ǁGâuab di sîsenga hîkākā.’ (1Jhn. 3:8) ǁNās khaoǃgâ i ge Elob khoen hîna ǃhūbaib ai ra ǃgauna, khoe-i xa ǃaoǃaohe tide. (Jes. 54:14; Mix. 4:4) ǁNā ǁaeb kōse da ge ǃgarise nî sîsen, î da sida di ǃaoba dansa hōba. Aiǃgû tsî da ge ǂgomǃgâsiba nî ūhâ, Jehovab ǀnam dasa. Tsîn ǁîb ǃoaba-aona ǂgomǃgâsiba a ūhâ ǁkhāsa ǁîb ra sâu nî ǂgaosa. Jehovab ge ǁîb ǃoaba-aona ǃkharu ge ǁaeb ǃnâ huis xa ǂâiǃgâs tsî ǁnās xa ǃhoas ge nî hui da. Tsî da ge ǂâis ǃnâ nî ūhâ matib ge ǃgom mâsigu ǃnâ, sida a huisa. Jehovab di huib ǀkha da ge nē ǃaoba dansa a hōba ǁkhā.—Psa. 34:4. w22.06 19 ¶19-20

ǃHūbaib di ǀgaigu, hîna ‘ǀuri-i tsî ǂgoa-i’ xa ra ǂnûǁkhaebahe ra ge ǀnai ǂgaeǂgui tsoatsoa hâ. Tsî nē ǂgaeǂguis ge ǂguro torob ǃnâ ge tsoatsoa. Britaini tsî Amerikab ge ǀguiba a sîsen tsoatsoa o. Nebukadnesari di ǁhapos ge nē ǃhūbaisi ǀgaib xa hâ ǃkharagagusib nî ūǂuina ra mî, ǀnai ge hâ i gaosiga xu. ǀNai ge hâ i ǃhūbaisi ǂhanugu khamib ge Anglo-Amerikaba ǃhuniǀuri-i tsî ǀhaiǀuri-i xa ǂnûǁkhaebahe tama hâ. Xawe ǂgoa-i tsî ǀuri-i hîna hapasa i xa ra ǂnûǁkhaebahe. Nē ǂgoa i ge “khoena” ra ǂnûǁkhaeba. (Dan. 2:43) Nētsē i ǃgāsase a mûhe ǁkhā khami ǁhûidi, khoesi ǂhanugu tsî sîsen ra khoena ra ǂnûǁkhaeba ǃnandi ge ǃhūbaib di ǂgaeǂgui-aoga ra ǃgomǃgomba, î gu ǂhâbagu ra xūna tā dīho. w22.07 4-5 ¶9-10

ǁĀǁnâhe ǂgao du ra xawe du ra îganǀgē? Xawe î ge nî hui dîsen du ga o, ‘tae-i ǃaroma ta nî ǁāǁnâhe?’ (ǃNǃkh. 8:36) Jesub ge ge ǂan-i Jehovab ra ǂgan da xūn hoan sida ǃaroma a ǃgâisa. Jehovab ge ǂgao tama hâ, tsûtsûda nî xūna da nî dīsa. Jehovab ǂâisa ǁāǁnâhe du nîsa ǃkhōǂgā hâ? Îo. (ǃNǃkh. 2:38) O du ge a ǂgomǃgâ ǁkhā, nē mîmās sadu ǃaroma a ǃgâisa. ǁKhoaxa ǂû-e ǂûsa du ga îganǀgē tama io, tae-i ǃaroma du ǁāǁnâhesa nî îganǀgēba? Tae-i ǃaroman ǀnîna ra ǃâu? ǂGuin ge ǀnîsi nē ǀgaub ǃnâ nî ǃeream, “ǂhomisa tama ta ge hâ.” Amab hîna hâb ge, Jehovab ai mâǁnâsen tsî ǁǀāǁnâ kaisens ge ǂhâǂhâsa mîǁguib hîna du nî dība. ǂŌrisase du ge nē mîǁguib xa nî ǂâi, nēs ǁaeb tsî ǁguiǂgāsens tsîna ǂhâhâ amaga. w23.03 7 ¶18-20

ǁÎb di ǁgaumâis tawab ge Jesuba ge ǂguro suri kai taras diba. Jesub di ǁōb tsî khâis khaoǃgâb ge Eloba ǁîba “ǂkhaisib tsî ǃgôasib ǀkha ge ǀgapa.” Tsî ǁnās ǀkha “hoa ǁkhāsiba ǀhommi ǃnâ tsî ǃhūbaib ai” ge mābi. Tsî nēs ge ‘ǁGâuab di sîsenga dīkākās’ di ǁkhāsib tsîna ǃkhōǂgā hâ. (Heb. 2:7; Mat. 28:18; 1Jhn. 3:8) Jesub xōǀkhā i ge ǀnî hâ surib tsîna noxoba nî hâ. Apostel Paulub ge ǁnāsa Jodeǁîn tsî Grikeǁî ǂkhauhesa Xristeǁîn tsîna saorase ge mîba: “Xristub didu a xui-ao, du ge a Abrahammi di suri tsî du ge hoaraga ǀkhaegu Elob diga nî ǀumi, Elob ge Abrahammi ǀkha dī mîmâis ǃaroma.” (Gal. 3:​28, 29) Jehovab ga Xristeǁî-e ǃanu gagab ǀkha ǁgaumâi, o i ge ǁnā khoe-e ra taras di suri kai. ǁNās ǃaroma i ge nē suriba Jesu Xristub tsî 144 000 ǂgaeǂgui-aona xu a kuruǂuisa. (J.ǂHa. 14:1) Nēn hoan ge ǁîn ǁGûb Jehova Elob di ǀgauga ra ǁgae. w22.07 16 ¶8-9

ǀUniga tsēdi ǃnâ da, ǃgomsina nî hōǃâsa da ge ra ǃâubasen. (2Tim. 3:1) Nē xūn ge a ǂkhabuǂâi kai da ǁkhā. ǃNāsase da ga nē ǃgomsiba xu nau ǃgomsiba ǀgui ǁaeb ai ga hōǃâ o. Xawe ǂâis ǃnâ du ūhâ re, Jehovab ge ra kōǃgâ da. Tsî da ge ǁîb di huib ǀkha, hâ ga ǃgomsi-i hoa-e ǂgomǃgâsib ǀkha a mâǃkharu ǁkhā. ǂÂi re matib ge Jehovaba, ǂgomǂgomsa-aob Joba a hui ǀgauba. ǁÎb ge kaise ǁkhōǁkhōsa ǃgomsiga ǃnubu ǁaerob ǃnâ ge hōǃâ. ǀGuitsēs ǃnâb ge Joba ge mîbahe, ǁîb xamanin ge ǃgamhe tsî ǃnarihesa. Tsîn ge ǁîb ǃgān tsî ǀgôana ǃgamhesa. (Job. 1:​13-19) Noxobab ra ǃoa hînab ge Joba tsûtsûsa ǀaeba ge hō. (Job. 2:7) Jehovab ge Joba gere kōǃgâ. Jehovab Joba a ǀnam amagab ge, ǂhâb hâ xūn hoana gere mā bi, îb ǂgomǂgomsase ǃâitsâgu ǃnâ mâǀgai. w22.08 11 ¶8-10

ǁNamahe da ga, o î ge kaise a tsûaǂgao kai da ǁkhā. ǁNamas a ǂhanuoǃnâ tamas ka io sida ǃaroma hâ tama ti da ge a tsâ ǁkhā. Nēs ge a ǁkhae da ǁkhā kaise a ǂhâǂhâsa xū-e ǁnâuǃāsa. ǁNās ge Jehovab ra ǁnama dasa ǀnam dab a amaga. (Heb. 12:​5, 11) ǁNamasa ūǃoa tsî ǀkharaǀkharana dī re. ǀGuis xa ǃnāsa ǃnādeb ge Jesuba, Petruba nau apostelgu ais ai ge ǁnama. (Mrk. 8:33; Luk. 22:​31-34) ǁNās ge ǀnîsi Petruba kaise ge tao kai. Xawe Petrub ge Jesub ǃoagu ǂgomǂgomsase ge hâ ǀgara. ǁÎb ge ǁnamasa ge ūǃoa tsî ǁîb dīsana xu ge ǁkhāǁkhāsen. Jehovab ge Petruba ǁîb di ǂgomǂgomsasib ǃaroma ge mādawa-am. Tsî ǂhâǂhâsa ǁgaumâide ge mā bi ǀhaohâb ǃnâ. (Jhn. 21:​15-17; ǃNǃkh. 10:​24-33; 1Pet. 1:1) Sada tsî naun tsîn ge ǃgâiba ra hō, ǂâisa da ga taob ai mâi tama i tsî ǁnamasa ūǃoa tsî ǂhâbasa ǀkharaǀkharana ga dī o. ǁNāsa da ga dī o, da ge Jehovab tsî sada ǃgâsan tsîn xa a sîsenūhe ǁkhā. w22.11 21-22 ¶6-7

Abrahammi ge ge ǂan i, Jehovab ǁîb di ǀnamǀnamsa ǀgôab Isaka ǁōba xu khâisa nî māsa. (Heb. 11:​17-19) Nēn hoan ǂamaib ge Jehovaba ge mîmâi hâ i, Isaki nî ǃhaos di ǁgû kai ǃkhaisa. Xawe ǁnā ǁaeb aib ge Isaka ǀgôa-e ge ūhâ tama hâ i. Abrahammi ge Jehovaba kaise ge ǀnam i. Tsî ǂgomǃgâsiba ge ūhâ i ǁîb di ǁGûb hoaǁae ǂhanu xū-e nî dīsa. ǃGom i ge ī xaweb ge, ǂgoms xa ǃaromahe hâse ge ǁnâuǀnam. (Gen. 22:​1-12) Mati da Abrahamma a ǁgae ǁkhā? ǁÎb khami da ge sida tsîna nî aiǃgû, î da Jehovab xa ǃnāsase ǁkhāǁkhāsen. ǁNāsa da ga dī, o da ge ǁîba nî ǀgū tsî ǃnāsase nî ǀnam. (Psa. 73:28) Sida ǃgâiǂâis ge nî ǁkhāǁkhāhe, îs ǁnās ǀkha Jehovab ǂâiǀgauba ūhâ. (Heb. 5:14) Tsî da ge ǁnās xa ǃaromahe hâse khoe-i ga ǃâitsâ da o, î da tsū xū-e dī o nî ǂkhā. ǂÂis tsîna da ge dī tide î da xū-e dī, hîna tsûba sida di ǁGûb ai nî ǀkhī-ūhe. Tsî ǁnās ǀkha sida ǀhōsagusis hîna da ǁîb ǀkhā ūhâsa nî khôa-e. w22.08 28-29 ¶11-12

ǁÎkha ge Listras, Ikoniums tsî Antioxiasa ǃoa oaǀkhī ǁaeb aikha ge apostel Paulub tsî Barnabab tsîkha, ǀhaohâb ǃûi-aoga mâ ǀhaohâb ‘hoab ǃnâ ge ǁgaumâi.’ (ǃNǃkh. 14:​21-23) ǂGomǃgâ ǁkhā da ge a, ǁnā ǀhaohâb ǃûi-aogu ge ǁkhaeǂgaos ase ǁnā ǀhaohâga ība īsa, nētsēs digu khami. ǀHaohâb ǃûi-aogu ge hoaǁae nî ǃgaoǃgâ ham-i ‘ǃgâi mîde’ ǂhâ hâsa ǁkhaeǂgaos ǃaroma. Paulub ge ǃgâsana ge ǂkhaǃnâ ‘kai ǂnubis di ǃkhō-amaon’ ǃgomsin ǃnâ nî mâ ǃkharusa. Jehovab ge ǁîna ǀgaiba mā ǃkhais ǃaroma. (Heb. 12:1) Paulub ge ge ǁnâuǃā, ǃkharuge ǁae ge ûi hâ i khoen ge ǁîn di ǃgomsina mâ ǃkharu, ǀgaub ǃgâsana nî ǂkhâǃnâsa în ǁîn tsîna ǁkhoaǂgaoxa tsî ǁnās xa huihe. Tsî ǁîn di ǂâisa “ûitsama Elob di ǃās” ai mâi. (Heb. 12:22) ǁNās ge nētsēs tsîna a ama. Kaise da ge ra ǂkhâǃnâhe khomai da ga o, matib ge Jehovaba Gideonni, Baraki, Davidi, Samueli tsî ǀnîn tsîna a hui ǀgaus xa.—Heb. 11:​32-35. w22.08 21-22 ¶5-6

Mâ ‘xūn’ ǃoagun khâisa ra hōna nî ǀgoraǃgâhe? ǁŌn nîs aiǃân gere dī xūn ǃoagusa? Hî-î. ǂÂis ǃnâ ūhâ re, ǀnain gere dī ǁoren ge ǁōn ge o ge ǀariǂuihe. Nēn ge ǀnain ge ūhâ i “dī” tamana. Xawe ǁîn dīgu ge ǀasa ǃhūbaib ǃnân ra hō, ǁkhāǁkhāsan mati ra ūbasensa ǃoa ra ǁnaeǁgau. ǁNā ǂgomǂgomsa aogu Noaxi, Samueli, Davib tsî Danieli tsîgu ge Jesu Xristub xa nî ǁkhāǁkhāsen. Tsî ǁîb ǁguibas ǃnâ nî ǂgom. Matikō ǃnāsasen ǂhanuoǃnâna nî ǁkhāǁkhāsen! Tae-e nî ī, ǁnān hîna nē ǀō-aisa ǃēsa ūǃoa ǂgao taman ǀkha? ǂHaiǂhais 20:15 ge ra mîba da: “ǁNān ǀondi ân ûib di ǂkhanis ǃnâ xoamâisa taman hoan ge hurib khami ī ǀaeb ǃnâ ge aoǂgāhe.” Îo, ǁîn ge ǀamosib kōse nî dīkākāhe. ǁNās ǃaroma i ge a ǂhâǂhâsa dītsâsa, î-î sida ǀonde ûib ǂkhanis ǃnâ xoamâihe tsî ǁnāpa hâ ǀgara ǁkhā. w22.09 19 ¶17-19

Sida ǂurusib tsî ǀaeǃkhōs ǃaroma da ra ū sōǀoana, da ge Elobmîsa xu da ge ǁkhāǁkhāsen ǀapemādi ai ra ǃgaoǃgao. (1Tim. 3:9) Mîǁguiga da ga dī tsî naun ǀkha ǀgoragu, o da ge ǁnâ hâ ǀapemāsa ra sao ǂgao, mî rasa: “Hoa khoen ǃoagu khoexaǃnâ re.” Khoexaǃnâ tamas ka io da ga ǀnōsa mûǂuiba ūhâ, o da ge ǁnātikōse sada di sorosi ǂurusib xa ǀgui kaise ǂâi tama hâ. Tsî da ge nauna ǁgari tama hâ în sida mûǂuiba ūhâ. Sida ǃgâsana da ge a ǀnam tsî ra ǃgôa, ǁîn ra dī mîǁguigu ga sida diga xu ǀkharas tsîna. (Rom. 14:​10-12) Ûib ge Jehovaba xu hâ ǀkhaeba tsî da ge sida ǃgôaǃgâsiba ǁîba nî ǁgau. Sida ûiba ǁkhauba tsî da ga ǁkhā da a-i hoa-e a dī o. (J.ǂHa. 4:11) Xawe da ge nēsi ǀaegu tsî tsūkēǃgâgu tsîna ra hōǃâ. Jehovab ge ǂgao tama hâ î da nē ǀgaub ǃnâ ûi. ǀGūǁaeb ge ǀamosib kōse ûis ǁkhāsiba nî māda tsûb tsî ǁōb ōse hâba. (J.ǂHa. 21:4) Xawe nēsi matikōse i a ǃgâi ûitsama tsî ǀnamxaǃnâ ǁGûb Jehovaba ǃoabasa. w23.02 25 ¶17-18

Jehovab ge ǃgāsase ge ǁgau ǁîb “ǂamkhoegu,” ǂama a ǀgapi ǃkhaisa. (Rom. 13:1) ǃNona aiǁgaudi xa ǂâi re. Egipteǁîn gao-aob Faraob ge Jehovab khoena ǃgāse ge ūhâ i tsî ǁîna ī kaisa ǃnās hoasa gere ǂkhā. Xaweb ge Eloba ge ore nî tsî Faraoba ǀapahurib ǃnâ ge ā ǁō kai. (Eks. 14:​26-28; Psa. 136:15) Babilons di Gao-aob Belsasari ge ǁâudība ge ūhâ i. Tsî ‘ǃKhūb ǀhommi dib ǃoagu ǀgapiǀgapisen tsîb ge ǃhuniǀurib tsî ǀhaiǀurib tsîn ǀkha kurusa eloga, gere koa.’ (Dan. 5:​22, 23) Xawe Elob ge ǁnā ǀgapiǂâixa khoeba ge ǃgamǃgam. Tsî ǁnā “tsuxub ǂûb ǃnâb ge” Belsasara ge ǃgamhe. Tsî ǁîb di gaosiba Persiaǁîn tsî Medeǁîn tsîna ge mā. (Dan. 5:​28, 30, 31) Filisteǁîn Gao-aob Herodeb, Agripab ǂgurob ge apostel Jakobuba ge ǃgam kai tsî apostel Petruba ǃkhō-oms ǃnâ ge ǂgā, ǁîba ǃgams ǂâis ǀkha. Xaweb ge Jehovaba Herodeba ǀapeb ge hâ i xū-e dīsa xu ge ǁkhae. Tsîb ge “ǀhomǃgāb ǃKhūb dib xa ǁnātimîsi ǂnauǁguihe” tsî ge ǁō.—ǃNǃkh. 12:​1-5, 21-23. w22.10 15 ¶12

Eloba da ge a ǃgâ ǁkhā, ǁîb mîsa khomai tsî ǂâiǃgâs ǃnâ-ū. ǃKharuge ǁaeb ǃnâb ge Jehovaba mati, ǁîb ǃoagu ge ǂgomǂgomsa ina gere kōǃgâ ǀgausa da ga khomai. Os ge sida ǃâubasensa nî ǀgai ǀgara. Hoa xūn Elobmîs ǃnâ xoahe hân ge “sada ǁkhāǁkhās ǃaroma xoahe hâ, tanixasib tsî ǀgaiǀgaiǃnâs tsîra Xoade xu hâra ǃnâ-u da nî ǃâubasensa ūhâse.” (Rom. 15:4) Jehovab ge ǁîb mîmâide dīǀoaǀoa ǀgaub xa ǂâiǃgâ re. Kō re, tae-eb ge Jehovaba Abrahammi tsî Sara hâra dībasa. ǁÎra ge kaise ge kaira i, ǀgôana hōs ǃaroma. Xaweb ge Eloba ge mîmâiba ra ǀgôa-e ra nî hōsa. (Gen. 18:10) Abrahamma mati ge tanisen? Elobmîs ge ra mî: ǁÎb ge ‘ǃâubasens tsî ǂgomsa ge ūhâ i, ǂgui ǁaedeb ǁgûse nî ībasa.’ (Rom. 4:18) Abrahammi ge ge ǀū-i matib Eloba ǁîb mîmâisa nî ama kaisa. Xaweb ge Jehovab ǃnâ ǂgomǃgâsiba ge ūhâ i, ǁîb mîmâisab nî dīǀoaǀoasa. ǁNā ǂgomǂgomsa-aob ge ge ǂkhabuǂâi tama hâ i. (Rom. 4:​19-21) Nēti i ǃnaeǃkhaidi ge ra ǁkhāǁkhāda, hoaǁae da Jehovab ai a ǂgomǃgâ ǁkhā ǃkhaisa, ǁîb mîmâideb nî dīǀoaǀoasa. w22.10 27 ¶13-14

ǁNā mîdi ge ge dīǀoaǀoahe Jehovab ge Jodeǁîna, ǃkhōsisa xu a ǃnora kai o. Jehovab ge ge ǁgau ǁîb a ǁîn di ǁGauǃnâ-aosa. ǁÎb di daoǁgaus ǃnāgan ge ǁîb di khoena ge dīhō, ǁkhapa ǃanu ǃoabasa hau-oasa. ǀKhaehe da ge hâ, Jehovaba nētsē sida ǁGauǃnâ-aob ase ūhâsa. Jesajab ge Jehovab ra ǁkhāǁkhā da ǀgaub xa ra mî: ‘Tsî di ge sadu mûde ǁGauǃnâ-aoba nî mû.’ Nē aiǁgaus ǃnâb ge Jesajaba ra mî, ǁGauǃnâ-aob ge ǁîb ra ǁkhāǁkhā khoe-i ais ai mâ. Kai aiǂhanub ge nētsē Elob xa ǁkhāǁkhāhesa. Jehovaba mati ra ǁkhāǁkhāda? ǁÎb ǀapeǂhumis ǃnâ-ūb ge nēsa ra dī. Kaise da ge ra gangan ǃgāsa daoǁgaudi, hîna da Jehovab ǀapeǂhumisa xu ra hō di ǃaroma. Nē daoǁgaude da ge ǀhaodi ,ǂkhanin, broadcastings tsî ǀnî hâ ǀgaugu ǃnâs tsîna ra hō. Hîna ra hui da na î da ǃgomǁaegu ǃnâ ǃgâiaǂgaob ǀkha mâǀgai. w22.11 10 ¶8-9

ǁÎb ǃereams ǃnâb ge Jesuba Jerusalems tsî ǁîs tempeli dīkākās xa ǀgui ge ǃhoa tama hâ i. Xawe nēsi da ‘ûiǃnâ hâ ǃhūbaib di ǀams’ xas tsîna. ǀAms nî hā ǁaeb xab ge Jesuba ge mî: “Xawe khoe-i xare-i ge tsēs tamas ka io īri nē xūn nî ība a ǀū. ǀHomǃgān tamas ka io ǀGôab tsîn ge ǂan tama hâ, ǁGûb ǀguib ge a ǂan.” ǁNāpaxūb ge hoa ǁkhāǁkhāsabega ge ǃkhâikhom, î gu “ǂkhaikari hâ.” (Mrk. 13:​32-37) ǃKharuge ǁaeb Jode Xristeǁîn ge ǂkhaikharise nî hâ ǀgaras ge ge ī, în ǁîn di ûiga sâuhe ǁkhā. Jesub ge ǁîb saosabena ge mîba, tae-en nî kōsa în ǂan mâǁaes Jerusalems tsî ǁîs tempeli ǀamsa nî hāsa. ǁÎb ge ge mî: “Jerusalems toroǂnubidi xa xāǂgāhe hâ ǃkhaisa du ga mûo, o du ge nî ǂan hîkākās âs a ǀgū ǃkhaisa.” ǁNā ǁaeb ǃnân Jesub di ǃkhâikhomsa nî ǁnâuǀnam tsî ‘ǃhomgu ǃoa nî ǃkhoeni.’ (Luk. 21:​20, 21) ǁNān hîna ge ǁîb di ǃkhâikhomsa ǁnâuǀnaman ge Romeǁîn ge Jerusalemsa a dīkākā, o ge ûiǃkharu. w23.02 14 ¶1-2; 16 ¶3

Jehovab ge ǁîb di ǁkhāǁkhā-aona ra ǁkhāǁkhā, în ǂhauǃnâ tsî ǂhanu-ai. Nēs ge ra hui nî, în tā ǃgôaǁnâsen xawe ǂkhîba ūhâ. (ǂKhm. 13:​5, 6) ǁNāsab ge sado dība, Elobmîsa du gere ǁkhāǁkhāsen hîna? ǁKhāǁkhāsen du ge ge Jehovab ǀgaugu, hoa khoen tsî sadu ǃaromas tsîna a ǃgâisa. (Psa. 77:13) ǁNā-amaga du ge Jehovab ǂhanu-a di ra mî xūna ra dī. (Mat. 6:33) Tsî du ge amaba ra ǂanǂan ǂgao Elob xa, î du ǁgau ǁGâuab ge sada Elob Jehovab xa a mî xūn a ǂhûmisa. ǁNāsa du mati a dī ǁkhā? Sadu ra ûi ǀgaub ǃnâ-ū du ge a ǁgau ǁkhā: ‘ǁGâuab di ǂhûmiba du ūǃoa tama tsî du amaba ra ǂkhâǃnâ ǃkhaisa. Jehovab a sadu ǂgaeǂgui-aosa du ge a ǁgau ǁkhā tsî ǁîb ǂhanu-a di ra mî xūna du ra dī ǂgaosa.’ ǁNāsa du mati a dī ǁkhā? Jehovaba du ge ǀgores ǃnâ-ū a mîmâiba ǁkhā, ǁîba du ǀamose nî ǃoabasa. Tsî ǁnāpaxu nî ǁāǁnâ kaisen. Tae-i a ama tsî ǂhanusa ǀnams ge nî hui du mîǁgui tsî ǁāǁnâhesa. w23.03 3 ¶4-5

Khîb ge hâ, nē ǃhūbaib ǃnâ hâ khoen a ǀūba, nēb ge ‘ǂkhîb Elob diba.’ Tsî nēb ge sida ǀhomsi ǁGûb ǀkha da ūhâ ǀō-aisa ǀhōsagusisa xu ra hā ǃnomsasiba. Elob ǂkhîba ūhâs ge ǁkhaubahe hâse ra tsâ kai da. (Fil. 4:​6, 7) ǁÎba a ǀnaman ǀkhas tsîna da ge ǃgâi ǀhōsaguside ra ūhâ tsî da ge ǀgū ǀhōsagusis tsîna ‘ǂkhîb di Elob’ ǀkha ra ūhâ. (1Tes. 5:23) Sida ǁGûba da ga ǂan, ǂgomǃgâsiba ǁgau tsî ǁîba ga ra ǁnâuǀnam, o i ge ǁîb di ǂkhîba sida di ǂgaob hîna ǃgomǁaegu ǃnâ ra ǂâiǂhansena sâsa tsî ǃnomsase nî tsâ kai. ǃGomsina da ga hōǃâ ǁaeb ai Elob di ǂkhîba ūhâsa īǁkhā-e? Nē ǃgomsigu ge a ǃao kai da ǁkhā. ǃGâiaǂgaoxasen ge ǃgâsana Jesub di ǀapemāsa ge sao. Tsî Jehovab huib ǀkhan ge ǂkhîba ge hōǃâ, nē ǃgomsin ǃnân ra mâǀgai hîna. w22.12 16 ¶1-2

Sida ûib ǃnâ ra ī xūn hoana da ge a ǁkhae ǁoa. ǁNā-amaga i ge ǂhâǂhâsa î da tā ǂâi. Sada ǁgaumâi di ǃaroma ǀgui da Jehovaba a ǂhâǂhâsaba di. Tsî tā ǃgâsan hîna sada ǂhâba hâ ǁgâumâide ūhân ǀkha nî ǀgopeǀnōsen. (Gal. 6:4) ǂHâǂhâsa i ge a î da ǀgauna ôa, nauna hui tsî Jehovaba ǃoabasa. ǃNāsa-e Jehovab ǃoabas ǃnâ dīs ge nî īǁkhā, supu ûiba ūhâ tsî du ga surude ga xu ǂgōsen o. ǂKhari mîǁguiga dī re hîna ra hui du ga î du kai mîǁguiga sīǃnâ. Aiǁgause, ǁnaetisa aimâba-ao kai ǂgao du ga o, nēsisa xu huiǃnâ ra aimâba-aose xoaǂgāsen re. ǀHaohâb di hui-ao kai ǂgao du ga o, ǃnāsa ǁaeba aoǁnâ sîsenni ǃnâ ǁhao re. Nēsi du ra ǀhaoǀhaobasen ǂans ge nî hui du, ǀasa dao-amde ǁkhawa ambasens ǀkha. Tsî du ge hānîǁaeb ǃnâ ǀnî hâ ǁgaumâide nî ǃhōǃoa. ǁGuiǂgāsen re î du māhe du raǁgaumâis hoas ǃnâ ǁkhā du a-e dī. w22.04 26 ¶16-17

Jehovab ge sadu ûib ǃnâ du ūhâ ǃgomsin ǀkha hui du ǁkhā. Tsîb ge nî hui î du, ǃgâiaǂgaob ǀkha ǁîba ǃoaba. Jehovaba ǃoa da ga ǀgore. Tsî da ga ǁîba ǂâiǂhansen kai da ra xū-i xa mîba, ob ge Jehovaba ǂgurose ǂhâ da hâ ǀgaiba nî mā da, î da ǁnā mâsib ǃnâ mâǀgai ǁkhā. Tsî i ga sida ǃgomsina ǃkhaese ǀam tama i, o i ge nî ǂhâbasa Jehovab ai da ǂguiǃnāde, ǀgaiba nî ǂansa ǁî-i ǃnâ mâǀgaisa. ǁÎb ge ra ǁkhau da ti dīsa. Nēs ge Jesajab mîdi ǃnâ ra ǁnâuǃāhe: “Tā [Jehovaba] sâ kai.” (Jes. 62:7) Nēsa tae-e ra ǂâibasen? Jehovaba ǃoa da ge ǀûs ose nî ǀgore, î da tā mā-am sâb nîsa. Jesajab di mîdi ge Jesub di aiǁgaus ǀgores dis Lukab 11:​8-10, 13 ǃnâ ra hōhes xa ra hōhōǃnâda. Nēpab ge Jesuba ra ǂkhâǃnâ da î da ǀgore. Tsî ǃanu gagaba “tao tamase” tsî ‘ǀûs ose ǂgan.’ Jehovab tsîna da ge a ǀkhoma ǁkhā, îb daoǁgauda î da ǃgâi mîǁguiga dī. w22.11 8 ¶1; 9 ¶6-7

Sadu tsî sadu omaris tsîn ge nēsi ǃgôaǃgonhesa a ǂhumisenba ǁkhā. Tā īǁkhā a ǁgai xūn hoan xa ǂâi tsâ re. Xawe sadu ǀhōsagusis Jehovab ǀkha du ūhâsa ǀgaiǀgai re. Tsî sadu ǀgôana hui re, în ǁkhā xū-e dī. ǀNî ǁaegu ai du ga ra ǂâiǂhansen o, Jehovaba mîba re mati du ra tsâsa. (Psa. 62:​7, 8) Omaris ase ǃhoaǃgao re hoa ǃaromadi hîna du ǁîba a ǂgomǃgâ ǁkhā di xa. Tsūkēǃgâb ǁaeb ǃnâ i ge sadu di aiǂhumisens tsî Jehovab ǃnâ du ūhâ ǂgomǃgâsiba, sadu ǀgôan ǃnâ ǁkhoaǂgaosib tsî ǂkhîb tsîna nî omkhâi. Elob di ǂkhîb ge ǃnorasase ra tsâ kai da. (Fil. 4:​6, 7) ǁNās ǃnâ-ūb ge Jehovaba sida ǂgaoba ra ǃnomsa kai ǀaeb, tsūkēǃgâb tsî ǃgôaǃgonhes ga nētsē tsâǀkhā da xawe. ǁÎb ge ǃgarise ra sîsen ǀhaohâb ǃûi-aoga ra sîsenū, îb sida ǂkhâǃnâ ǁkhā. Tsîb ge huigus di aiǂhanuba hoada ra mā. Nēsi da ra hōǃâ ǂkhîb ge nî hui da, î da kai ǃgomsigu ǃaroma aiǂhumisen ‘kai ǂōǂōsiba’ ǃkhōǂgā hâse.—Mat. 24:21. w22.12 27 ¶17-18

Dītsâ da ge nî, î da tā ǃkharuge ǁaeb ǃnâ da ge tsūdī xūn xa ǀhapixase tsâ. Xawe hâ as ge xoremariba da ge tā, ‘ǂanapega ǁoreb ǀkha aiǃgûs’ ǃnâ nî sîsenū. (Heb. 10:​26-31) Tsî ǂâis ǃnâ da nî ūhâs ge, ǂgaoba xu da ga, dī da ge ǁoreb ǃaroma ǃhâusen tsî Jehovab huiba ūǃoa o. Tsî da ga sida tanisen ǀgauba ǀkharaǀkhara o, ob ge ǁîba sida kaiǃgâ ǀgaub ǃnâ nî ǀûba. (Jes. 55:7; ǃNǃkh. 3:19) Xoremarib ǀkhaeb ge sida ǁoren hoana ra ǃgū-ai tsî paradais ûiba nî īǁkhā kai. Ûib ge paradais ǃnâ ǁhoa-o tide. ǃGâi tamas ka io ǂan ǂgao da ra ǀgauga ūhâ khoen ǀkha da ge nî ǀhao. Tsî ǂâibasensa ūhâ sîsen-i tsîna nî dī. Nēn hoan xa da ge sida ǀhomsi ǁGûba tsēs hoasa ǃgâise nî ǂan. Tsî ǁîb māda hâna xu ǃgâiba nî hō. Tsēs hoasa da ge ǁîb xa xū-e nî ǁkhāǁkhāsen tsî ǂgûi xūn tsîna ǁîb kurusa xu w22.12 13 ¶17, 19

“Taras” ge a Eva ǁoa. Kēbos ge ra mî, taras surib nî ǀaob di danasa “ǂkhūǂkhūsa.” ǀAoba ge a gagasi kurusabe Satan. Tsî i ge tātsē ǀoasa kurusa ūhâ tama surib Evas diba, ǁîba a ǂkhūǂkhū ǁoa. ǁNās ǃaroma matib Satanna nî dīkākāhe? Genesis 3:15 ǃnâ i ge taras a hamsa, ǀuniga ǂkhanis Elobmîs dis ǃnâ ra mîhe. (J.ǂHa. 12:​1, 2, 5, 10) Nēs ge ǃhūbaib ai hâ tara tamasa. ǁÎs ge ǁkhâba ǁîs di ǂaidi tawa ūhâ tsî krons tsîna 12 ǀgammirodi ǀkha ǁîs danas ai. ǁÎs ge ǂanǂansa tama hâ ǀgôa-e ra ǃnae. ǁNāb ge Elob Gaosiba. Gaosib ge ǀhommi ǃnâ hâ, ǁnās ǃaroma i ge taras tsîna ǀhomma xu nî hâs ge, ǁîs ge ǀhomsi ǃâb Jehovab ǀapeǂhumis diba ra ǂnûǁkhaeba. Hîna ǂgomǂgomsa ǀhomǃgāgu xa kuruǂuihe hâsa. (Gal. 4: 26) Elobmîs tsîn ge ra hui da, î da ǂguro surib taras diba ǂanǂui. Nē surib ge Abrahammi suriba xu nî ǂoaxas ge. —Gen. 22:​15-18. w22.07 15-16 ¶6-8

Jehovab ge Elobmîsa ǀkhaeb ase māda hâ. ǁÎb ge māda Elobmîs ge ǁîb di gā-aisib xa ǀoa hâ. Tsî Elobmîs di ǀapemādi ge ǂgui khoen ai ǃgâi sîsenǂuiba ūhâ. Elobmîs ge ûiga ra dawa. Elobmîs di ǂguro ǂkhanidi ge xoahe, ob ge Moseba Israelǁaesa ge mîba: “Nēdi ge ǁau mî tamade, xawe a sadu di ûi.” (Deu. 32:47) Nē xoade ge ǁnâuǀnam khoen ge ǃgâiǃgâb tsî ǃgâiaǂgaob tsîna ǁîn ûigu ǃnâ ge ūhâ i. (Psa. 1:​2, 3) Elobmîs ge ǂgui kuriga ǃkharu hâse a xoahe xawes ge nēsi noxoba ǀgaiba ūhâ khoen ûiga dawasa. ǁNā ǃanu ǂkhanisa da khomai tsî khomai da go xūna ra ǂâiǃnâ khamib ge ǁîs di Xoa-aoba. ǁÎb ǃanu gagab ǀkha ra hui da mûsa, mati da Elobmîs ǀapemāde sida ûib ǃnâ a sîsenū ǁkhāsa. (Psa. 119:27; Mal. 3:16; Heb. 4:12) Amase Elobmîs di Xoa-aob ge ra tura sado huisa. Nēs ge Elobmîsa khomai ǂgaos di turaba sada ǃnâ nî omkhâi. w23.02 3 ¶5-6

ǂHaiǂhais 13ǁî danaǃâs, ge ra mîba da Anglo-Amerikan World Powers, 7 danadi tis ‘ǀgam ǁnâkha ǁkhaob dikha’ khami īkha ūhâs khami ra tanisensa. Nē ǀgurub ge ‘kai saode ra dī tsîb ge ǁkhāti ǀae-e ǀhomma xu ra ǁnāǁgôaxa kai khoen aiǃâ.’ (JǂHa. 13:​11-15) ǂHaiǂhais 16ǁî danaǃâs tsî 19ǁî danaǃâs ge, ǀguruba ‘ǂkhaba kēbo-aob’ ase ra ǁguiǃā. (J.ǂHa. 16:13; 19:20) Danieli tsîn ge ǁnā xū-e ra mî. Britaini [Brittanjeb] tsî Amerikab nî ‘ǁgai ǂhôaba’ ǃaromasa. (Dan. 8:​19, 23, 24) Tsî ǁnās ge 2ǁî torob ǃnâ ge i ǃkhaisa. Bomdi hîna ge nē toroba a ǀam kai di ge Britaini [Brittanjeb] tsî Amerikab khoegu hîna, ǂansa ūhâgu xa ge kuruhe. Britaini [Brittanjeb] tsî Amerikab tsîn ge ‘ǀae-e ǀhomma xu ge ǁnāǁgôaxa kai.’ w22.05 10 ¶9