ǃGamme ǁkhāts a khoe-ets hō ǁkhā ǀgaub

1-2. (a) ǃGamme tama Xristeǁîna tae-e ǂâis ǃnâ nî ūhâ, nau khoe-e i nî dî-ams aiǃâ? (b) “Dî-amgusa” tae-e ra ǂâibasen? (“ǁGuiǃāhe ra mîs” ti hâ ǃâba khomai re.)

ǃGAMME ǂgao its ra? ǃGammets ga o ǀguits ge ǃgâiaǂgaoba ûib ǃnâ ūhâ tama. ǃGamme tama Xristeǁîn, ǂkhaman tsî kairan hoan ge ǀguitsē ra mûǂui ǃgammesa. ǂAnguro nîs aiǃâ i ge aibe khoe-i hoa-e Jehovab ǀkha ǀgaisa ǀhōsagusisa omkhâi, ǃgâise ǂansen tsî ǁkhāsiba nî ūhâ omarisa marisise ǃgâise kōǃgâsa.a (1Kor. 7:36) ǁNānats ga dī ots ge ǂkhîsa ǃgammeba ūhâ ǁkhā.

² Hoaǁae i ge supu tama ǂhanu khoe-i ǃgamme ǂgaots ra-e hōsa. (ǂKhm. 31:10) ǂAngu-ū ǂgaots ra khoe-ets ga ǀhao-ū xawe î ge a ǃgom ǁkhā ǁî-e dî-am tsoatoasa.b Nē ǁkhāǁkhāǃâs ǃnâ da ge nî ǃhoaǃgao tae-i ǃgamme tama Xristeǁîna a hui ǁkhāsa în ǃgâi khoe-i ǃgamme ǁkhān a-e ǀhao-ū tsî ǁî-e dî-am. Tsî da ge nî ǁkhāǁkhāsen matin naun ǀhaohâb ǃnâ hâna ǃgamme ǂgao ra ǃgâsana nî hui ǀgausa.

TAE-E A HUI TSI ǁKHĀ ÎTS ǃGÂI KHOE-I ǃGAMMETS NÎ-E HŌ?

3. Tae-en ǃgamme ǂgao ra Xristeǁîna ǂâis ǃnâ nî ūhâ, ǃgamme-ūn nî khoe-en ra ôa ǁaeb ai?

³ ǀGuitsēts ga ǃgamme ǂgao, o i ge a ǃgâi ǂansa mâ ǀgaugats ǃgamme ǂgaots ra khoe-i ǃnâ ra ôa ǃkhaisa. Tsî ǁnāsats ge ǀnai dî-amguro nîs aiǃâ nî ǂan. Nēsats ga dī tama i, o i ge a īǁkhā sats ǃaroma a ǃgâi khoe-e kō ǃkharusa. Tamas ka io satsa ǃgâiba tama khoe-i ǀkha ǃgamme sa. Xawe hoan ǂam ai, ǃgamme ǂgaots ra khoe-i ge nî ǁāǁnâsa Xristeǁî. (1Kor. 7:39) Xawe mâ ǁāǁnâsa Xristeǁî-i hoa-i ge sats ǃaroma ǃgâi tide. ǁNās ǀkha dîsen re: ‘Tita mâ mîǁguiga ti ûib ǃnâ ūhâ? Mâ ǀgauga ǃgamme ǂgao ta ra khoe-i ǃnâ a ǂhâǂhâsabate? ǃÂubasen ta ra xūna a ǁnâuǃāxa?’

4. Tae-en ge ǀnîna ǀgoreba, ǃgamme ǁkhān a khoe-en gere ôa ǁaeb ai?

⁴ Ama-as ge ǀgorets ge sa its ǃgâi ǃgamme-ūts nî khoe-e hō, ǁnāsats ga ǁkhorebasen o. (Fil. 4:6) Ī a ǃkhais ge Jehovab mîmâi tamasa, mâ khoe-i hoa-eb ǃgamme-i nî khoe-e nî māsa. Xaweb ge sa ǂhâsib tsîna a ǂan tsî nî hui tsi its ǃgâi ǃgamme khoe-e hō. ǁNās ǀkha aiǃgû tsî sa ǁkhoreb tsî tsâts ra ǀgaub tsîna Jehovaba mîba re. (Psa. 62:8) ǃNūǃnâxasib tsî gā-aisib tsîna ǀgores ǃnâ ǂgan. (Jak. 1:5) Johnc ti ǀon hâ ǃgamme tama ǃgâsab Amerikab ǃnâ ra hâb ge ra ǁguiǃā tae-eb ǁîb ǀgores ǃnâ ra ǃkhōǂgāsa. ǁÎb ge ra mî: “Tita ge Jehovaba ǃgamme tani khoe-i ǃnâ ta ra ǂhâba ǀgauga ra mîba. ǀGore ta ge ra îb Jehovaba huite î ta ǃēde hō ǃgamme ǁkhā ta a khoe-e ǀhao-ūsa. Jehovab tsîna ta ge ra ǂgan îb huite î ta ǃgâi ǃgamme-aob nî ūhâ ǀgauga omkhâi.” Tania ti ǀon hâ ǃgâsas, Sri Lankab ǃnâ ra hâs ge ra mî: “ǃGamme ǁkhā ta a khoe-e ta ga ôa ǁaeb ai ta ge Jehovaba ra ǂgan îb huite î ta ǂgomǂgomsa tsî ǃgâiaǂgaob ǀkha ǁîba ǃoaba ǀkhara.” ǃGamme ǁkhāts a khoe-e ǀhao-ū sats ga gaixuse ǃâu xawe ǂâis ǃnâ ūhâ re Jehovab ge ra mîmâi ǀnammi tsî ǂhâts hâ xūn tsînab nî mātsisa.—Psa. 55:22.

5. Mâ ǃēnan ǃgamme tama ǃgâsana ūhâ, Jehovaba ǀnam khoe-i ǀkha ǀhaosa? (1 Korinteǁîn 15:58) (Ai-īsiba mû re.)

⁵ Elobmîs ge ra ǂkhâǃnâ da î da “ǃaruǀîǀgui ǃKhūb di sîsenni ǃnâ ǀaro.” (Khomai re 1 Korinteǁîn 15:58 sa.) Jehovab di sîsenni ǃnâts a ǀhape khamits ge ǃkharagagu ǃgâsan ǀkha ǂâusa ǁaeba ra ūhâ. Omkhâi tsi nî ǀhōsagusis ǀguisats ge ǁîn ǀkha ūhâ tide, xawets ge ǃēsa nî ūhâ sats khami ǃgamme tama ǃgâsan Elob ai ǂâisa ǂnûi hân ǀkha ǀhaosa. ǁKhāts a-e dī tsîts Jehovaba ra ǂkhîǂkhî khamits ge ama ǃgâiaǂgaoba nî hōǃâ.

6. ǃGammen nî khoe-en ra ôa ǁaeb ǃnân ǃgamme tama Xristeǁîna tae-e ǂâis ǃnâ nî ūhâ?

⁶ ǂAnbasen re î-i tā ǃgamme ǂgaots ra khoe-e ôasa ǂhâǂhâsa xūse sa ûib ǃnâ ī. (Fil. 1:10) Ama ǃgâiaǂgaob ge Jehovab ǀkhats ūhâ ǀhōsagusisa xu ra hā. Tsî ǃgammets hâ tamas ka io ǃgamme tamats hâsa xu hâ tama. (Mat. 5:3) ǃGamme tamats hâ ǁaeb ǃnâts ge ǃnorasasiba ūhâ its ǃnāsase Jehovab ǃoabas ǃnâ dī ǁkhā. (1Kor. 7:​32, 33) Nēts ūhâ ǁaeba ǃgâise sîsenū re. Jessicas Amerikab ǃnâ ra hâs, 40 kurin aiǃâ ge ǃgammes ge ra mî, “ǃgamme ta nîs aiǃâ ta ge Jehovab di sîsenni ǃnâ ge ǀhape i, ǁnās ge ge huite î ta ǂkhîb ǀkha sîsen ǀgara ǃgamme ǂgao ta gere xawe.”

ǁAEBA Ū TSÎ NAU KHOE-I DI ǀGAUGA KŌ RE

7. Tae-i ǃaroma i a ǁnâuǃāxa ǃgamme ǂgaots ra khoe-e aibe ǃnūseba xu kōsa? (ǂKhoamîdi 13:16)

⁷ Tae-ets nî dī, nē î ge ǃgâi ǃgamme ū ǀhōsa-e tits ga ǂâi o? ǁKhā ǁaeb aits ǁî-e nî mîba ǁî-i ǃnâts ǃgâiǃgâibasensa ūhâsa? Elobmîs ge ra mî ǁnâuǃāxa khoe-i ge ǁî-i ǂansa ra sîsenū xū-e i nî dīs aiǃâ. (Khomai re ǂKhoamîdi 13:16 sa.) ǁNâuǃāxa khoe-i ge ǁnā khoe-i ǀgauga ǃnūseba xu ra kō, ǁî-e i nî mîbas aiǃâ mati-i ǁî-i xa ra tsâsa. Aiǁgaus ase khoe-i mati ǀhaohâb ǀhaodi, ǁaxasigu tsî khoen ǁaegu ra tanisen ǀgaub tsîna î ge ra ǃgaoǃgâ. Aschwin ti ǀon hâ ǃgâsab Nederlands tib ge ra mî: “Tsâsigu ge ǃkhaese omkhâisen tsî ǃkhaeses tsîna a bē ǁkhā. ǁNās ǃaromats ge ǃkhaese nî bē tsâsin ǃaroma khoe-e dî-am tide.” ǃGâisets nē khoe-e kō toa hâs khoaǃgâts ge a mûǂan ǁkhā ǁî-i ǃgâi ǃgamme ǀhōsa ǁkhā tidesa.

8. ǃGamme tama Xristeǁî-e mati ǃgamme ǂgao i ra khoe-e a ǃgaoǃgâ ǁkhā? (Ai-īsiba mû re.)

⁸ Matits ǃgamme ǂgaots ra khoe-i ǂan tamase ǁî-e ǃnūseba xu nî ǃgaoǃgâ? ǀHaohâb ǀhaodi tamas ka io ǁaxasigu tawa da ge a mûǃā ǁkhā ǁnā khoe-i di gagasi ǀgaub, ǂûb tsî tanisen ǀgaub tsîna. ǁÎ-i ǀhōsana a ham tsî taen xan ra ǃhoa? (Luk. 6:45) ǁÎ-i di mîǁguib ûib diba tib ǀkha a ǀgui? ǁÎ-i ǀhaohâb ǃûi-aogu tamas ka io ǀnî Xristeǁî-i ǁnā khoe-e ǃgâise a ǂan-ets ge a dî ǁkhā. (ǂKhm. 20:18) ǁÎ-i dībasen hâ ǀons tsî ǀnî hâ xūn tsînats ge a dî ǁkhā. (Rut. 2:11) Nē khoe-ets ra ǃgaoǃgâ tsî kō ǁaeb ai tā ǁnā khoe-e ǃgâi tamase tsâ kai. Nēsats ra dīsets ge ǁnā khoe-e ǃgôasiba nî ǁgau. Tsîts ge tā hoaǁae ǁî-i ǂnamipe nî hâ tsî hoa xūna ǁî-i xa nî ǂan ǂgao.

9. Khoe-i ǃnâts ǃgâiǃgâibasensa nî ǁgaus aiǃâts tae-e ǂâis ǃnâ nî ūhâ?

⁹ Matikō gaixusets nî ǃâu khoe-ets, ǁî-i ǃnâts ǃgâiǃgâibasensa ūhâ ti nî mîbas aiǃâ? ǃKhae ǁaeb ǃnâts ga ǁî-e tsâts ra ǀgauba mîba, o i ge ǁî-e ǀnîsi a ǂâi ǁkhā hoa ǁaets ǂâi tamase mîǁguiga ra dīsa. (ǂKhm. 29:20) Xawets ga gaxuse ū khoe-e ǁî-i xats a ǃgâibahesa mîbasa, o i ge a ǁgau ǁkhā sats mîǁguiga a ū ǁoasa, ǃgōsase i ga ǁnā khoe-e a ǂan o sats ǁî-i xa a ǃgâibahesa. Khoe-i ga ǁî-i xats ra tsâ ǀgauba a ǂan hînats ga xū-e mî tama i, o i ge ǁî-e a tsâ ǁkhā sats mîǁguiga dīs xa a ǃgombahe ti. (Aoǁn. 11:4) ǂÂis ǃnâ ūhâ re khoe-i ǃnâts ǃgâiǃgâibasensa ra ǁgaus ge ǂâibasen tama ǁî-i ǀkhats nî ǃgammesa. Xawets ge nî ǂansen aiǂhumisents hâsa ǃgammeb ǃaroma tsî i nau khoe-e īǁkhā î ga o, a sa ǃgamme-aob tamas ka io tarasa.

10. Tae-ets nî dī khoe-i ga sats xa ǃgâibahe o sats ǁî-i ǃnâ ǃgâiǃgâibasensa ūhâ tama hîna?

¹⁰ Tae-ets a dī ǁkhā mûǂants ga o khoe-i satsa ǃnāsase ra ǂan ǂgaosa? Sats ga ǁî-i ǀkha ǂangusa dī ǂgao tama io, ǃgāsase sa dīgu ǃnâ-ū ǁnāsa ǁgau re. Khoexaǃnâsiba i ge ǁgau tide sats ga khoe-i ǀkhats ra ǂangu ǂgao khami tanisen o tits tsâ tama hâ hîna.—1Kor. 10:24; Efe. 4:25.

11. Khoe-i xats ga ǂganhe o its ǃgamme ǁkhā i a khoe-e ôa, ots tae-e ǂâis ǃnâ nî ūhâ?

¹¹ ǀNî ǃhūgu ǃnân ge ǁgûn tamas ka io ǀnî hâ kai khoena sats ham-e nî ǃgammesa ra ǁhûiba tsi. ǀNî ǃhūgu ǃnâ i ge omaris ǁanin tamas ka io ǀhōsana ǃgamme tama khoe-e ǃgamme i nî khoe-e ra hōba tsî ra ge ǁîra ǀhao tsî a kō ǁkhā ǃgâiba gu ra asa. Khoe-i xats ga ǂganhe its ǃgamme ǁkhā i-a khoe-e ôa, o hoa khoera ra ǂhâsigu tsî ǂgao ra ra xūna ǃhoaǃgao re. ǁNā khoe-i di ǂûgu, ǀgaugu tsî Jehovab ǀkha i ǀgū ǀhōsagusisa i ūhâsa ǂanǂui re. Jehovab ǀkha ǀgū ǀhōsagusisa ūhâs ge mari-i, ǁkhāǁkhāsens tamas ka io khoen xats a ǂanhe ǀgaub xa ǃnāsase a ǂhâǂhâsa. ǂÂis ǃnâ ūhâ nē khoera ge ǀuniga mîǁguiba nî dī ǃgamme ra nîsa.—Gal. 6:5.

DÎ-AMGU TSOATSOAS

12. Matits khoe-i dî-am ǂgaots ra-e nî mîba ǁî-i ǀkhats ra ǂangu ǂgaosa?

¹² Khoe-ets ga dî-am ǂgao, ots ǁî-i ǃnâts ǃgâiǃgâibasensa ūhâsa mati a mîba ǁkhâ? d ǁÎ-i ǀkhats ge ǂgui khoen ra ǀhao ǃkhai-i ai ǀhao tsî a ǃhoa ǁkhā tamas ka io selfonni ǃnâ-ū. ǃGāsase ǁî-e mîba re ǀnammi tsâsibats ūba i hâsa tsîts ǁî-e ǃnāsase ra ǂan ǂgao ǃkhaisa. (1Kor. 14:9) ǂHâbasa i ga o ǁî-e ǁaeba mā re î-i ǂâiǃgâ ǃereamsa i nî mās aiǃâ. (ǂKhm. 15:28) ǁNā khoe-i ga sats ǃnâ ǃgâiǃgâibasensa ūhâ tama i, o ǁî-i ra tsâ ǀgauba ǃgôasiba ǁgau.

13. Khoe-i ga sats ǃnâ ǃgâiǃgâibasensa ǁgau, ots tae-e dī ǁkhā? (Koloseǁîn 4:6)

¹³ Tae-ets nî dī khoe-i ga mîba tsi o sats ǃnâ i ǃgâiǃgâibasensa ūhâ ti? ǁNā khoe-i ge ǁkhoaǂgaosiba omkhâi tsî tsâ i ra ǀgauba satsa go mîba. ǁNās ǀkha ǁî-e khoexaǃnâse hâ-ū tsî ǃgôasiba ǁgau. (Khomai re Koloseǁîn 4:6 sa.) ǁAebats ga ǂhâba ǁnā khoe-e ǃereamsa māsa î ro dî-amgu tsoatsoa, o ǁî-e ti mîba re. ǁNātits ga mî o tā gaixuse ū ǁî-e ǃereamsa māsa. (ǂKhm. 13:12) ǁÎ-i ǃnâts ga ǃgâiǃgâibasensa ūhâ tama io ǃgāsa tsî khoexaǃnâ ǀgaub ǃnâ ǁî-e mîba. ǃGaoǃgâ re Hans ti ǀon hâ ǃgâsab Austriab tib ge tae-e a mîsa ǃgâsas ge ǁîba tsâs ra ǀgauba a mîba o: “Tita ge ti mîǁguiba ǁîsa khoexaǃnâ xawe ǃgāsa ǀgaub ǃnâ ge mîǃāba. ǁÎsa ta ge ge ǂâi kai ǂgao tama hâ i ǁîs ǀkha ta ra ǂangu ǂgao ǃkhaisa. ǁNās ǃaroma ta ge mî tsî ta gere dī xūn ǃnâ gere ǁgau ti mîǁguiba ta dawa tamasa.” Xawe ǁî-ets ga dî-am ǂgao, o ǀhao tsî tsâ ro ra ǀgaub tsî nēsa xu ro tae-e ra ǃâubasensa ǃhoaǃgao. Saro ra ǂgaoǀkhāgu xūn ge a ǀkhara ǁkhā, ǃhaoǃnâbe dī xūn tamas ka io ǀnî hâ xūn xa ra ǃaromahese.

NAUNA MATI ǃGAMME TAMA XRISTEǁÎNA A HUI ǁKHĀ?

14. Mati da ǃgamme tama Xristeǁîna sida mîdi ǀkha a hui ǁkhā?

¹⁴ Mati da hoase ǃgamme ǂgao ra Xristeǁîna ǂkhâǃnâ tsî a hui ǁkhā? ǀGui ǀgaub ge mî ta ra xūna da ge ǂōrisase nî ǃgaoǃgâ. (Efe. 4:29) Dîsen ǁkhā da ge a: ‘ǁNān ǃgamme ǂgao rana ta ra ǂoeǂoe? ǃGamme tama ǃgâsab tsî ǃgâsas ra ǃhoa ǃkhaisa ta ga mû, o ta ǁîra ra dî-amgu ti ra ǂâi?’ (1Tim. 5:13) ǁNās ǂam-ai da ge tā ǃgamme tama Xristeǁîna nî ǂâi kai xū-i ǁîn ǀkha a tsūsa, ǃgamme taman hâ ǃkhais ǃaroma. Aiǃâ go ro ǃhoaǃgaohe ǃgâsab Hans i ge ra mî: “ǀNî ǃgâsan ge ra dî ‘tae-i ǃaromats ǃgamme tama, kairats ge ra ti?’ ǁNā ǃhoa ǀgaub ge ǃgamme tama ǃgâsana ǃgôahen ra khami tsâ kai tama tsî ǁnās ǂam-ai ǃgamme ǂgaos ǁgâiba ǁîn ai ra mâi.” Kaise i ge nî ǃgâi î da ǃēde ôa tsî ǃgamme tama Xristeǁîna koa.—1Tes. 5:11.

15. (a) Romeǁîn 15:2 Elobmîs daoǁgaudi ǃoagu da tae-e ǂâis ǃnâ nî ūhâ, khoe-e da ga ǃgamme ǁkhā i a khoe-e ôas ǀkha hui o? (Ai-īsiba mû re.) (b) Tae-e nē vidioba xu go mâǂoaba du?

¹⁵ Mati i nî hā ǀnîsi da ga ǂâi o ǀnî ǃgâsab tsî ǃgâsas tsîn nî ǃgâi ǃgamme khoe-aogu kaisa? Elobmîs ge ra mîba da, î da nau khoen tsâsigu tsîna ǂâis ǃnâ ūhâ. (Khomai re Romeǁîn 15:2 sa.) ǂGui ǃgamme tama khoen ge ǂgao tama, în ǃgamme tama khoen ai tā mâi-aiǃâ-e ǀnîsin ǂangu tsî nî ǃgammese. ǁNātin ga ǂgao, o da ge ǁîn mîǁguiga ǃgôasiba nî ǁgau. (2Tes. 3:11) ǀNîn ge naun ai mâi-aiǃâhes di huiba a ǃgôaǃgâ ǁkhā, xawe da ge ǂganhe tama da hâ hîna nēsa dī tide.e (ǂKhm. 3:27) ǀNî hâ ǃgamme tama ǃgâsan ge ǂgao tama ǃoaǃgū khoe-i ai mâi-aiǃâhesa. Lidia ti ǀon hâ ǃgâsas ǃgamme tamas, Duitsǃhūb ǃnâ ra hâs ge ra mî: “ǀNîsits ge īǁkhā î ga o nē ǃgâsab tsî ǃgâsas tsîna ǂgui ǃgâsan hâ ǁaxasiba ǃoa a ǁkhau ǁkhā. ǁNā ǃgâsara ǃē-e kuruba re î ra ǀhao tsî ǃgâise ǂangu tsî ǁnās khaoǃgâ mîǁgui tae-e ra ra dī ǂgaosa.”

16. ǃGamme tama Xristeǁîna tae-e ǂâis ǃnâ nî ūhâ?

¹⁶ ǃGamme hân tsî ǃgamme taman hoan ge ǂkhîsa ûiba a ūhâ ǁkhā. (Psa. 128:1) ǃGamme ǂgaots ga xawets ga noxopa khoe-e hō tama io aiǃgû tsî Jehovaba ǃoabas ai sa ǂâisa ǂnûi. Sin Yi ti ǀon hâ ǃgâsas Makaoba xu hâs ge ra mî: “Paradais ǃnâts ǃgammets hâ khoe-i ǀkha nî hâ ǁaebats ga ǀgopeǀnō, ob ge ǃgamme tamase nē ǃhūbaib ǃnâ hâs ǁaeba kaise ǃnubu. Nēts ūhâ ǁaeba ǃgôaǃgâ tsî ǃgâise sîsenu re.” ǃGamme ǁkhāts a khoe-e ǀhao-ū tsîro ga ǂangu tsoatsoa ots tae-e nî dī? Saora ǁkhāǁkhāǃâs ǃnâ da ge nî ǃhoaǃgao matiro dî-amgu tsî ǃgâi mîǁguiba a dī ǁkhāsa.