Jehovab ǃommi ge ǃnubu tama

1. Moseba mati ge ǁgau Jehovabab ra ǂgomǃgâ ǃkhaisa lsraelǁînab ge Egipteba xu ǂgaeǂgui ǁaeb ǃnâ?

HEBREǁÎN ǂkhanis ge ǂgui khoen Jehovab ǃnâ gere ǂgoman xa ra ǃhoa. Nēn di ǀguib ge Moseba, ǁîb ge mâǂoa ra ǂgomsa ge ūhâ ī. (Heb. 3:​2-5; 11:​23-25) ǁÎb ge ǂgomsa ge ǁgau lsraelǁînab ge Egipteba xu ǂgaeǂgui o. ǁÎb ge ge mā-am tama hâ i, î-i Egipteb gao-aob tsî ǁîb toroǂnubis tsîna ǁîba ǃaoǃao. Moseb ge ǀoasase Jehovab ǃnâ ge ǂgomǃgâ tsî lsraelǁaesa ǀapa hurib ǃnâ-ū ge ǂgaeǂgui tsî ega ǃgaro ǃhūb ǃnâ. (Heb. 11:​27-29) ǃNāsa lsraelǁîn ge Jehovab nî koǃgâ ni ǃkhais ǃnâ ge ǂgomǃgâ ǀû xaweb ge Moseba aiǃgû tsî Elob ǃnâ gere ǂgomǃgâ. ǁNās ge ge ǂhanu xū-i dīsa Jehovab ge lsraeǁîna ǂûn tsî ǁgammi tsîna ǃgaro ǃhūb ǃnâ gere mā xui-ao.a—Eks. 15:​22-25; Psa. 78:​23-25.

2. Eloba tae-i ǃaroma Moseba ge dî “ob kha ǃKhūb di ǃomma ge ǃnubu”? (Numeri 11:​21-23)

² Moseb ge ǀgaisa ǂgomsa ge ūhâ ī, xaweb ge ǀgui kuriba Jehovab ge lsraelǁîna Egipteba xu ǂgaeǂgui ǂûis khaoǃgâ ge îganǀgē tsoatsoas, Jehovab ǁaesa ǁgan-e nî mā ǃkhais xa. ǁÎn ge ǁnātikōse ge ǂgui i, 600 000 xa ǃnāsa aogu, taradi tsî ǀgôan tsîna tsî i ge ǂû-i xare-e ǃgāro ǃhūb ǃnâ ge ǀkhai-i. Jehovaba mati ǁîn hôana ǂâuna ǁgan-e ga mā hâ? ǃEream tsîb ge Jehovaba Moseba ge dî “Ob kha ǃKhūb di ǃomma ge ǃnubu?” (Khomai re Numeri 11:​21-23 sa.) Nē mîs “ǃKhūb di ǃomma” ti hâs ge Jehovab ǃanu gāgāba ǃoa ra ǁnaeǁgau. Tamas ka io ǁîb ra sîsen-ū ǀgaib îb ǁîb ǂâisa dī. ǀNî mîdi ǃnâb ge Jehovaba, Moseba gere mîba ‘tita ge mî ta hâ xū-i hoa-e a dī ǁkhā.’

3. Tae-i ǃaroma i a ǂhâǂhâsa î da Jehovab ge Moseba a dî dîs xa ǂaiǃgâ? (Numeri 11:23)

³ Îganǀgē î du ra Jehovab sadu tsî sadu omaris tsîna ǂhâ du hâ xūna nî mā ǃkhaisa? Îganǀgē tamas ka i o du ga îganǀgē tama i xawes tsîn hoan ǃnâ da ge nî ǁkhāǁkhāsen, î da mû Moseb tsî lsraelǁîn tsîn ge tae-i ǃaroma Jehovab nî koǃgâ nî ǃkhaisa ǂgomǃgâ tama hâ îsa. Tsî da ge ǀnî xoade nî kō sida ǂgomǃgâsib Jehovab ǃnâ da ūhâba nî ǀgaiǀgaina, ǁîb hoaǁae nî kōǃgâ dasa.

MOSEB TSÎ ISRAELǁÎNA XU ǁKHĀǁKHĀSEN

4. ǃNāsa Israelǁîna tae-i ǃaroma gere îganǀgē Jehovab ǁîna nî kōǃgâ ǃkhaisa?

⁴ Tae-i ǃaroman ge ǂgui lsraelǁîna îganǀgē tsoatsoa Jehovab nî kōǃgâ nî ǃkhaisa? lsraelǁîn tsî “kai ǂnubis di khoen ǀnîn” Egipteba xu ge īn ge lsraeǁîn ǀkha ǂgui kuriga ǃgaro ǃhūb ǃnâ gere ǃgû mîmâisa ǃhūba ǃhoa. (Eks. 12:38; Deu. 8:15) ǂNubis khoen tsî lsraelǁîn tsîn ge ge tsau manna-e ǂûsa tsîn ge ega Moseb tawa sī ge ǃgae tsoatsoa. (Num. 11:​4-6) Khoen ge ǁgan-e ǂûsa ge ǁkhore tsoatsoa. Tsî hoaǁae Egipte ǃhūb ǃnân gere ǂû, ǂûn xa gere ǂâi. Nē khoen ge Moseb ai ǃgae amagab ge ǁîba ge ǂâi, nē khoen hoan ǃaromab ǁgan-e nî ôasa. Xaweb ge ge ǀū-i mâpab ǁgan-e nî hōsa.—Num. 11:​13, 14.

5-6. Tae-e da ǂgui Israelǁîn ge ǂnubis khoen xa ǂgaeǂhapuhe ǀgauba xu nî ǁkhāǁkhāsen?

⁵ ǂNubis khoen ge Jehovab xan gere dībahe xūn hoana ge ǃgôaǃgâ tama hâ i. Tsîn ge ǁnās ǀkha ǁîn khami ge ǂâi tsoatsoa. Nēti ī xū-i ge sida ǀkhas tsîna a īǁkhā, sida ǂnamipe hâ khoen ga ǃgôaǃgâsiba ǁgau tama io da ge sida tsîna ǁkhā ǂâiǀgauba omkhâi ǁkhā. ǃKharuge ǁaeb ǃnâ da ge ūhâ i xūna da ge a tura tsoatsoa ǁkhā tamas ka io nau khoen ūhâ xūna a suri ǁkhā. Xawe da ge kaise nî ǂkhî, ū da hân ǀkha da ga ǂâu o.

⁶ Israelǁîn ge ǂâis ǃnâ ga ūhâ mîmâisa ǃhūb ǃnân ga sī, on ǂgui ǃgâi xūna nî ūhâsa. Israelǁîn ge tae-en ge Jehovab xa mîmâibahesa ga ǂâiǃgâ hâ. Jehovab ge ge mîmâi ǁînab ǂhân hâs xa ǃnāsase nî māsa mîmâisa ǃhūb ǃnân ga sī o. ǁNās ǁkhās khami da ge sida tsîna nî ǂkhî ūhâ tama da hâ xūn xa da ga ǂâi tama io. Xawe da ge Jehovab ǀasa ǃhūbaib ǃgao mîmâiba da hân xa nî ǂâi. Elobmîs ǃnâ hâ xoadi ge sida ǂgoms Jehovab ǃnâ da ūhâsa nî ǀgaiǀgai.

7. Tae-i ǃaroma da nî ǂgomǃgâ Jehovab hoaǁae nî hui dasa?

⁷ ǀNîsi du ge ra ǂâi tae-i ǃaromab ge Eloba Moseba dî: “Ob kha ǃKhūb di ǃomma ge ǃnubu?” Jehovab ge ǀnîsi Moseba gere hui îb ǂâihō, ǁîb ǀgaib tātsē ǂkhariro tamasa xaweb hoaǁae a ǀgaisasa. ǃGarob ǃnân ge hâ i xaweb ge Jehovaba ǁîna ǂgui ǁgan-e ga mā hâ. ǃKhūb ge ǁîb “ǀgaisa ǃommi tsî ǀhōǂuisa ǁôab” ǀkha ǁîb di ǀgaiba ge ǁgau. (Psa. 136:​11, 12) ǁNā-amaga da ge ǃgomsiga da ga hōǃâ, o ǂgomǃgâsiba nî ūhâ Jehovab nî hui dasa mâpa ǀgui da ga hâ xawe.—Psa. 138:​6, 7.

8. Tae-e nî hui da î da tā ǃgarob ǃnâ ge hâ i khoen ge dī dīsāde dī? (Ai-īsiba mû re.)

⁸ Jehovab ge mîmâib ge khami dī tsî ǁîna ǂgui anina ge sîba. Xawen ge Israelǁîna ǃKhūba ge gangan tama hâ i ǁîb di buruxa dīb ǃaroma. ǁÎn ge ūn ge hâ îs xa ǃnāsa-e gere ǂhâba. Hoa tsēsan ge ǂgui anina gere ǀhaoǀhao. Jehovab ge kaise ǁaixa tsî ǁnān “kai ǁganturaba ge ūhâ” īna ge ǁkhara. (Num. 11:​31-34) Sida ge ǁnā aiǁgausa xu ǁkhāǁkhāsen ǁkhā. ǂAnbasen da ge nî î da tā ū da hâs xa ǃnāsa-e ǂhâba. ǃKhū tamas ka io da ga ǀgâsa xawe da ge ǂgurose “ǁuiba ǀhommi ǃnâ” nî mâi. Nēsa da ga dī, o da ge Jehovab tsî Jesub ǀkha da ūhâ ǀhōsagusis ai nî sîsen ǀkhara î da ǁîga ǀgū ǁkhā. (Mat. 6:​19, 20; Luk. 16:9) Jehovab nî kōǃgâ dasa da ge ra ǁgau ǁîba ǂgomǃgâs ǃnâ-ū.

9. Elob mati nî kōǃgâ das ǃnâ da mâ ǂgomǃgâsiba nî ūhâ?

⁹ Jehovab ge nētsēs tsîna māsenxase ǁîb khoena ra hui. Xawe nēs ge ǂâibasen tama hâ mari-i tamas ka io ǂû-i ǂhâsiba da ūhâ tidesa.b Jehovab ǁnāxuǃnâ da hâ khami da ge tātsē tsâ tide. ǁÎb ge hoaǁae nî hui da matikōse î ga sida ǃgomsina kai xawe. Mati da ra ǁgau Jehovab nî kōǃgâ dasa da ra ǂgomǃgâ ǃkhaisa? Hā re î da ǀgam mâsiga ǃhoaǃgao: (1) Mari ǃgomsiga da ga ūhâs tsî (2) ǂâuna mari-e da hānîǁaeb ǃnâ nî ūhâs tsîna.

MARIN ǃGOMSINA DA GA ŪHÂS

10. Mâ mari ǃgomsiga da hōǃâ ǁkhā?

¹⁰ Nē ǃhūbaib ǀams ra ǀgū khami î ge mari ǃgomsiga nî ǁgai ǂoa. ǀNîsi da ge sida sîsenni tsî ūda hâ xūn tsîna a ǂoaǃnâ ǁkhā. ǀNîsi da ge hâ da ra ǃkhaisa xu doe ǁkhā. Tsîs ge nēsa a ǃgomba da ǁkhā sida ǂhâsiga kōǃgâs ǃnâ. ǁAn ǃnâ da hâ ǃās ǃnâ da ge ǀnîsi sîsen-e a ôa ǁkhā tamas ka io da ge sida omaris ǀkha ǀnî hâ ǃāsa ǃoa a doe ǁkhā, î da ǁnāpa ǁîn ǂhâsiga kōǃgâ. Tae-e nî hui da mîǁguiga da ga dī o, ǁgausa Jehovab ǃnâ da ra ǂgomǃgâsa?

11. Tae-e nî hui tsi mari ǃgomsigats ga ūhâ o? (Luk. 12:​29-31)

¹¹ Kaise î ge a ǂhâǂhâsa î da sida ǂhâsigu xa Jehovab ǀkha ǃhoa. Nēs kaise nî hui da amaga. (ǂKhm. 16:3) ǁÎba ǂgan îb gā-aisiba mā du, î du ǃgâi mîǁguiga dī, ǃnomsase hâ tsî tā “ǂâiǂhansen” sadu mâsigu ǃnâ. (Khomai re Lukab 12:​29-31 sa.) Aiǃgû re ǁîba ǀkhomasa î du huihe tsî ū du hân ǀkha ǂâu. (1Tim. 6:​7, 8) Mari ǃgomsin ǀkha a hui du ǁkhā khomaiǃâde ôaǃnâ re. ǂGuin ge ra mî vidion tsî jw.orgs ai hâ khomaiǃâdi ge ǁîna a huisa mari ǃgomsin ǀkha.

12. Mâ dîde Xristeǁî-e a hui ǁkhā î-i ǃgâi mîǁguiga ǁî-i omaris ǃgao dī?

¹² ǀNîn ge ǁîn omaride xū tsî ge doe sîsenni ǃgao xawe ega ge mûǂan nēs ge gā-ai tama hâ îsa. ǀAsa sîsen-e du nî ūǃoas aiǃâ tā matikō mari-e du nî hōs xa ǀgui ǂâi. Xawe ǂâi re nēs mati sadu tsî sadu omaris tsîna nî huisa î du Jehovab ǀgūse hâ. (Luk. 14:28) Dîsen re: ‘Ī ta ga os nēsa mati ti ǃgammeba tsâǀkhā ǁkhā ? Hoa ǀhaodi tsî aoǁnâ sîsenni tsîna ta nî hâǃnâ ǁkhā? Ti ǃgâsan ǀkha ta ǀguiba ǁkhoaxa ǁae-e nî ūhâ ǁkhā?’ ǀGôana du ga ūhâ, o sao ra ǂhâǂhâsa dîsa dîsen re: ‘Ti ǀgôana ta a hui ǁkhā în Jehovab ǀgūse hâ tsî ǁîba ǁnâuǀnam?’ (Efe. 6:4) Mîǁguiba du ga dī, ob Jehovaba nēs xa ra tsâ ǀgauba ǂâiǃgâ re. Tā Elobmîs ǃnâ ǂgom tama ǀaokhoen tamas ka io ǀhōsan xa mîbahe nē mîǁguiga dīs ǃnâ.c Tonib Asias Westes ǃnâ ra hâb ge ǀnî hâ ǃhūgu ǃnâ ǃgâise ra matare sîsen-e ge hō. ǀGore toab ges khaoǃgâb ge ǁîb di kaikhoes ǀkha ǃhoa tsî ge mîǁgui ǁnā sîsen-eb ū tidesa. Tonib ge ra mî: “Nē mîǁguibam ge dī ǃkhais ge ǂgui khoena ge hui în Jehovaba ǂan tsî sîm ǀgôan tsîn ge Jehovaba kaise a ǀnam. Omaris ase da ge ge ǁkhāǁkhāsen Mateub 6:33 ǃoagu da ga ûi ob Jehovaba nî kōǃgâ da ǃkhaisa.”

ǂÂUNA MARI-E HĀNÎǁAEB ǃNÂ ŪHÂS

13. Mâ xūna nēsi a hui da ǁkhā î da hānîǁaeb ǃnâ ǂâuna mari-e ūhâ?

¹³ Jehovab ǃommi ǃnâ da ūhâ ǂgomǃgâsib ge a ǃâitsâhe ǁkhā kairasis ǃnâb ûiba mati nî īs xa da ga ǂâi tsoatsoa o. Elobmîs ge ra ǂkhâǃnâ da î da ǃgarise sîsen, î da ǂâuna mari-e hānîǁaeb ǃnâ ūhâ sida ǂhâsiga kōǃgâs ǃaroma. (ǂKhm. 6:​6-11) Īǁkhā î ga o i ge nî ǃgâi mari-e ǂnûibesa hānîǁaeb ǃaroma. Ama as ge mari-i ge ǃgomǁaegu ǃnâ a hui da ǁkhā. (Aoǁn. 7:12) Xawe da ge ǂgao tama hâ î-i mari-e ǂhâǂhâsa xūse ī sida ûib ǃnâ.

14. Hebreǁîn 13:5 sa mati a hui da ǁkhā î da ǀnōsa mûǂuiba ūhâ?

¹⁴ Jesub ge ǂkhōs ǃnâ ge mî khoe-i mari-e ra sâubasen î xawe “Elob ǃnâ ǃkhū tama-i” a gâre ǃkhaisa. (Luk. 12:​16-21) Sida ûib ǁari tsî aetsē nî ī ǀgauba da ge a ǀū. (ǂKhm. 23:​4, 5; Jak. 4:​13-15) Xristub saosaben ase da ge ǃgomsiba ra hōǃâ. Jesub ge ge mî, î da ǂhumisen ǃhûbaib xūna “ǁnāxu” tsî ǁîb ǁkhāǁkhāsabe kai. (Luk. 14:33) Nēs ge Judab ǃnâ ge hâ i Xristeǁîn ǀkha ge ī, ǁîn ge ǃhūbaib xūna ǂkhîb ǀkha ge ǁnāxū. (Heb. 10:34) ǂGui ǃgâsan ge ǁîn di xūna ge ǂoaǃnâ ǂgīǂgōsi xūn ǃnân ge ǃâ tama hâ i ǃkhais ǃaroma. (J.ǂHa. 13:​16, 17) Tae-e ǁîna ge hui ǁnāsa dīsa? ǁÎn ge sao ra mîmâis Jehovab dis ǃnâ ǀgaisa ǂgomǃgâsiba ge ūhâ i: “Tita ge tātsē ǁnāxū tsi tsî ǃharaxū tsi tide.” (Khomai re Hebreǁîn 13:5 sa.) ǁNā-amaga da ge ǁkhā da a na nî dī, î da ǂâuna mari-e ūhâ kairasis ǃaroma. ǀGaisa ǂgomǃgâsiba da ge Jehovab ǃnâ nî ūhâ ǃâubasen tama da hâ xū-i ga ī o, ǁîb nî kōǃgâ dasa.

15. Mâ mûǂui ǀgauban ǁgûna ǀgôan xa nî ūhâ? (Ai-īsiba mû re.)

¹⁵ ǀNî ǃhaodi ǃnân ge ǃgamme hâ khoena ǃgôana ra hō, în kaisis ǃnâ ǁnā ǀgôan xa kōǃgâhe. Elobmîs ge ra mî ǁgûn ge ǁîn ǀgôan di ǂhâsiga nî kōǃgâ. (2 Kor. 12:14) Ama as ge ǁgûn kairan ga o huiba ǀgôana xu nî ǂhâsa tsî ǂgui ǀgôan ge ǁnāsa ra dī. (1 Tim. 5:4) Jehovab ǃnâ ra ǂgom ǁgûn ge ra ǁnâuǃā, kaise î ǁîna ra ǂkhî kaisa ǁîn ǀgôanan ga hui o în Jehovab di ǃoaba-ao kai. ǂGui mari-e kuru tsîn ǁîna nî kōǃgâs xa.—3Jhn. 4.

16. ǁGûna mati ǀgôana a hui ǁkhā în marisise kōǃgâsen? (Efeseǁîn 4:28)

¹⁶ Sadu aiǁgaude xu ǀgôana ǁgau re matin Jehovab ǃnâ nî ǂgomǃgâsa, marisise kōǃgâsensan ra aiǂhumisen ǁaeb ǃnâ. ǂKhaman a ǁaeb ǃnâ ǁîna ǁkhāǁkhā în ǃgarise sîsens a ǃgâisa mûǂan. (ǂKhm. 29:21; khomai re Efeseǁîn 4:28 sa.) Kain ra khami ǁîna hui în ǃgâise skoli ai ǁkhāǁkhāsen. ǁGûn ge Elobmîs tsoatsoade a ôaǃnâ ǁkhā în ǀgôana gā-ai mîǁguiba skoli xa dī. ǁGûn ge ǀgôana nî hui în aitsama kōǃgâsensa ǂan tsî gagasi ǁaxasigu ǃnâ ǁhao.

17. Mâ ǂgomǃgâsiba da nî ūhâ?

¹⁷ Jehovab ǃnâ ra ǂgomǃgân ge a ǂan ǁîb ǁîn ǂhâsiga nî kōǃgâsa. Nē ǃhūbaib ǀams ai ra hās kōse da ge nî ǃâubasen, sida ǂgomǃgâsib Jehovab ǃnâ da ūhâb nî ǃâitsâhesa. Tae-i ǀgui î ga ī xawe da ge nî mîǁgui ǂgomǃgâ da rasa, Jehovab ǁîb huib ǀkha nî hui da sa î da ǂhâ da hâ xūna ūhâ. ǂGomǃgâ da ge nî Jehovab ǁîb di ǀgaisa ǃommi ǀkha nî hui dasa mâpa ǀgui da ga hâ xawe.