Kaise i ge a ǃgâi î da ‘Elob ǀgūse hâ’

1-2. (a) Khoen ǀkha da ga ǀgū ǀhōsa ǂgao o da tae-e nî dī? (b) Tae-e da nē ǁkhāǁkhāǃâs ǃnâ nî ǃhoaǃgao?

ǀGŪ ǀhōsa-e du ūhâ? Tae-e du ge dī î du ǀhōsa kai? ǀGuiba hâ ǀhaos ǃnâ-ū du ge ǀnîsi ge ǁkhāǁkhāsen ǁî-i ûib ǃnâ i ge tae-e a īsa tsî ǁî-i tae-i xa ǃgâibahe tsî tae-i xa ǃgâibahe tamasa. ǁÎ-i îxa ǀgauga du ge ge ǂan tsî ǁîga ra ǁgae ǂgao. Nēna du ge ǂan, o du ge ǁî-e ge ǀnam tsoatsoa.

² Khoe-i ǀkha du ga ǀgū ǀhōsa ǂgao o du ge ǁaeba nî ǁamaǂui ǁî-i ǀkha hâsa. Sada tsîn ge ǁkhā xū-e nî dī Jehovaba da ga ǂan ǂgao tsî ǁîb ūba da hâ ǀnamma ǀgaiǀgai ǂgao o. Nē ǁkhāǁkhāǃâs ǃnâ da ge nî ǃhoaǃgao mati da Jehovab ǀgūse a hâ ǁkhāsa tsî mati da ǁnāsa xu ǃgâiba nî ǀama ǀgausa. ǂGurose da ge nî ǃhoaǃgao tae-i ǃaroma i a ǃgâisa î da sida ǀhōsab Jehovab ǀgūse hâ.

3. Tae-i ǃaroma i a ǂhâǂhâsa î da Jehovab ǀgūse da ga hâ o nî ī ǃgâi xūn xa ǂâiǃgâ?

³ Amase du ge a ǂanǃgâ ǁkhā Jehovaba ǃoa ǀgūs kaise a ǃgâisa. Xawe nēs matikōse a ǃgâis xa ǂâiǃgâs ge nî ǂkhâǃnâ da î da ǁîba ǃoa ǀgū. (Psa. 63:​6-8) Aiǁgause da ge a ǂan ǃgâi ǂûna ǂû, sorosise kōǃgâsen, ǂâunase sâ tsî da ga ǂâuna ǁgamme ā, os nēsa sida ǃgao a ǃgâisa. Xawen ge ǂguina noxopa nē xūn ǀkha ǁae tama tsî ǁîn ǂurusiba kōǃgâ tama hâ. Sida ǂurusiba kōǃgâsa xu ra hā ǃgâi xūn xa da ga ǂâiǃgâ, o i ge nî hui da î da ǁnāsa dī ǀgara. ǁNās ǁkhās khami i ge kaise a ǃgâi ǂōrisase ǂâiǃgâsa tae-i ǃaroma da ra Jehovab ǀhōsa kai ǂgaosa tsî ǁîb ǀgūse ra hâ ǀgara ǂgaosa.—Psalmdi 119:​27-30.

4. Psalmdi 73:28 xoa-aoba mati gere tsâ?

⁴ Khomai re Psalmdi 73:28 sa. Psalmdi 73 xoa-aob ge ge Leviǁî i tsî Jehovab tempeli tawa ǁnae-aob ase gere ǃoaba. Īǁkhā i ge ge ī ǁîb ge Jehovaba ǂgomǂgomsase ǂgui kuriga a ǃoabasa. ǁÎb ge ge ǂan i ǂhâǂhâsa ī asa îb ǂâis ǃnâ ūhâ “Elob ǀgūse hâs” ǁîb tsî naun ǃaroma a ǃgâisa. Tsîb ge gere ǂhâba în naun tsîna ǂan ǀhōsagusisa Jehovab ǀkha ūhâs a ǃgâisa. Tae-i ǃaroma i a ǃgâi Jehovaba ǃgâise ǂansa tsî sada ǀhōsagusisa ǁîb ǀkha ǀgaiǀgaisa?

JEHOVABA ǀGŪS GE RA ǃGÂIAǂGAO KAI DA

5. (a) Jehovab ǀgūse hâsa tae-i ǃaroma ra ǃgâiaǂgao kai da? (b) Jehovab ra mā gā-aisiba mati hui tsî ra ǁkhauba tsi? (ǂKhoamîdi 2:​6-16)

⁵ Jehovaba da ra ǀgū khami da ge ǃgâiaǂgaoba nî hōǃâ. (Psa. 65:4) ǂGui ǃaroma di hâ ǃgâiaǂgao kai da ǁkhāde. Aiǁgause Elobmîsa da ga khomai tsî ǁîb mîsa a ǁnâuǀnam o da ge nî gā-ai. Jehovab sida ra ǁkhāǁkhā xūn ge tsū xūna xu ra ǁkhauba da. (Khomai re ǂKhoamîdi 2:​6-16 sa.) ǁNā-amagas ge Elobmîsa ra mî: “Gā-aisiba ra hōbasen khoeb ge a ǃgâiǃgâxa, ǁnāb ǁnâuǃāba ra hōba.”—ǂKhoamîdi 3:13.

6. Tae-e ge ǃaroma îb Psalmdi xoa-aoba ǁîb ǂkhîba ǂoaǃnâ?

⁶ Ama-as ge Jehovab ǀhōsan tsîn ge tsûaǂgaoba ra hōǃâ. Psalmdi 73 xoa-aob ge ǁîb ǃgâiaǂgaoba ge ǂoaǃnâ, ǂhanuoǃnâ xūn xab ge ǂâi tsoatsoa o. ǁÎb ge ge ǂâi tsoatsoa tae-i ǃaroman Eloba ǃoaba tama khoena ǃgâi ûiba ra ûisa. Elob ǀkhan ǁae tama hâ tamas ka ion ǁnâuǀnam bi tama hâ hîna. Nēs ge Psalmdi xoa-aoba kaise ge ǁaixa kai. ǁÎb ge ǁîn ge ūhâ i xūna gere ǂhâba. ǁÎb ge gere ǂâi, eloxoresa tsî ǀgapiǂâixa khoen ǂhâban hâ xūn hoana gere hōsa. Tsîn ǃgâi ǂurusiba ūhâ tsî ǃgomsina ūhâ tama hâsa. (Psa. 73:​3-7, 12) ǁÎb ge ǂhanuoǃnâsibab ge mûo ge ǂâi Jehovaba ǃoabas ǂhâbasa tamasa. ǁÎb ge kaise ge tsûaǂgao hâ ī tsî ge mî: “Amase ta ge ǁause ti ǂgaoba ǃanuse ge ūhâ tsî ti ǃomkha ǀhapiosib ǃnâ ge ǁā.”—Psa. 73:13.

7. Tsûaǂgao da gao da tae-e nî dī? (Tsoatsoas ai hâ ai-īsiba mû re.)

⁷ Psalmdi xoa-aob ge ge mā-am tama hâ ī îb tsûaǂgaoba gaoǂam bi. ǁÎb ge ǁîb ǂâiǀgauba ge dawa. ǁÎb ge “Elob tempeli” ǃnâ ge ǂgâ tsîb ge Jehovaba ge hui bi îb ǁîb ǂâiǀgauba dawa. (Psa. 73:​17-19) Sida ga tsûaǂgao, ob ge sada ǀhōsab Jehovaba ǁnāsa a ǂan. Tsûaǂgao da gao da ge Jehovaba ǃoa nî ǀgore. Tsî nî ǂgan îb hui da î da ǂan tae-e da nî dīsa. ǁÎb mîsa xu ra hā ǀapemādi tsî ǃgâsan di ǂkhâǃnâs tsîn ge ǀgaiba nî mā da. Î da aiǃgû tsî ǁîba ǃoaba ǀgara tsûaǂgao da ga xawe. ǂÂiǂhansen da ga ǁaeb aib ge Jehovaba nî ǁkhaeǂgaoda î da ǃnomsase tsâ.—Psa. 94:19.a

JEHOVABA ǃOA ǀGŪS GE ǃÂUBASENSA RA MĀ DA

8. Mâ ǀnî ǀgauga a ǂhâǂhâsa Jehovaba ǃoa ǀgūsa?

⁸ Jehovaba ǀgūs ge kaise a ǃgâiba da, ǀgam ǂhâǂhâsa ǀgaugu ǃnâ. ǂGurose, ǀgū ǀhōsagusisa da ga Jehovab ǀkha ūhâ, o da ge ǃgâi ûiba nî ūhâ. ǀGamǁîse, da ge ǃâubasensa hānîǁaeb ǃaroma nî ūhâ ama ī nîsa. (Jer. 29:11) Hā re î da nē ǀgauga ǃhoaǃgao.

9. Jehovaba ǀgūsa mati sida ra ǃgâiaǂgao kai?

⁹ Jehovab ga sida ǀgū ǀhōsa, o da ge ǃgâi ûiba nî ūhâ. ǃNāsa khoen ge nētsē ra mî Elo-i a ǀkhaisa. Tsîn ge a ǀū ûib di ǂâibasens a taesa. ǁÎn ge ra ǂgom hānîǁaeb ǃnân khoena ǃhūbaib ai ûi tidesa. Sida Elobmîs ǁkhāǁkhās ǃnâ da ge ra ǂgomǃgâ Jehovab hâsa. Tsîb ‘ǁnān ǁîba ra ôana ra mādawa-amsa.’ (Heb. 11:6) Jehovab ge ǁîba da nî ǃoaba ǀgaub ǃnâ ge kuru da. ǁÎba da ga ǃoaba o da ge ama ǃgâiaǂgaoba ra hōǃâ.—Deu. 10:​12, 13.

10. Jehovaba tae-e Psalmdi 37:29 ǃnâ ǁîba ra ǂgomǃgâna mîmâiba hâ?

¹⁰ ǂGui khoen ge nētsē ama ǃâubasen-e ūhâ tama hānîǁaeb ǃaroma. ǁÎn ge sîsen, ǃgamme, ǀgôana hō tsî ra aiǂhumisen kairasib ǃaroma. ǁÎn ge a ǀū tae-eb Jehovaba hānîǁaeb xa mîmâi hâsa. Xawe da ge a ǂan Jehovab ǁîb ǃoaba-aona ra kōǃgâsa. (Psa. 25:​3-5; 1Tim. 6:17) Sida Eloba da ge ra ǂgomǃgâ tsî da ge a ǂan ǁîb mîmâi hânab nî dīǀoaǀoasa. ǂGui ǃgâi xūna ǃoa da ge ra mûǂui, ǃgōsase ǁîba ǀamosib kōse Paradais ǃnâ ǃoabasa.—Khomai re Psalmdi 37:29 sa.

11. Tae-e ra ī Jehovab di ǀhōsa kai da gao tsî ǁîba ǁnās xa mati ra tsâ?

¹¹ Jehovaba ǀgūs ge sida a ǃgâiba ǂgui ǀgaugu ǃnâ. Aiǁgause, Jehovab ge ra mîmâi sida ǁorenab nî ǀûbasa ǃhōbasen da gao. (Jes. 1:18) ǃKharu ge ǁaeb ǃnâ da ge dī ǁoren xa da ge tā nî ǂâiǂhansen. (Psa. 32:​1-5) ǃGâiaǂgao da ge ra Jehovaba da ga ǂkhî kaio. (ǂKhm. 23:15) Jehovab a sida ama ǀhōsa amaga da ge ǂgui ǁkhoaxa xūna ra ūhâ. Hā re î da nēsi ǃhoaǃgao tae-e da nî dīsa î da Jehovab ǀgūse hâ.

MATI DA ‘ELOB ǀGŪSE HÂ’ ǀGARA ǁKHĀ ǀGAUS

12. Tae-e du ge dī î du Eloba ǀgū?

¹² Jehovab ǃoaba-ao kai da nîs aiǃâ da ge ǂgui xūna ge dī, î da ǁîb di ǀhōsa kai. Sadu ge Jehovab tsî Jesub xa hâ amaba ǁkhāǁkhāsen, ǃhōbasen, ǀgaisa ǂgomsa Elob ǃnâ omkhâi tsî ra dītsâ ǁîb ǂâis ǃoagu ûisa. Jehovab di ǀgū ǀhōsa kai ǂgao da gao da ge aiǃgû tsî ǁnā xūna nî dī.—Kol. 2:6.

13. Mâ ǃnona xūna nî hui da î da aiǃgû tsî Jehovab ǀgūse hâ ǀgara?

¹³ Tae-e nî hui da î da aiǃgû tsî Jehovab ǀgūse hâ ǀgara? (1) Aiǃgû tsî da ge Elobmîsa khomai tsî nî ǁkhāǁkhāsen. Elobmîsa da ga khomaio da ge ǁkhāǁkhāsens xa ǃnāsa-e nî dī. Jehovab ra ǂâi ǀgauba da ge nî ǁnâuǃā tsâ. Tsî tae-e da nî dīsab ra ǂgaoǀkhā dasa. Tsî da ge ǁîb ǂâis ǃoagu nî ûi. (Efe. 5:​15-17) (2) Jehovab ge ǂgui ǀgaugu ǃnâ ǀnamma ra ǁgau da. ǁNās xa ǂâiǃgâs ge sida ǂgomsa nî ǀgaiǀgai. (3) Jehovab ǃhui hâ xūna xu da ge nî ǂgōsen tsî ǁnā ǁgai xūna ra dī khoen ǀkha tā ǀguiba nî hâ.—Psa. 1:1; 101:3.

14. Tae-e da tsēs hoasa a dī ǁkhā î da Jehovaba ǂkhîǂkhî? (1 Korinteǁîn 10:31) (Ai-īsiga mû re.)

¹⁴ Khomai re 1 Korinteǁîn 10:31 sa. Kaise i ge a ǂhâǂhâsa î da Jehovaba nî ǂkhî kai xū-e dī. Aoǁnâ sîsenni ǃnâ ǂoa tsî ǀhaode hâǃnâs xa da ge ǃnāsa-e nî dī. Tsēs hoasa da ra dī xūn ge Jehovaba nî ǂkhîǂkhî. Aiǁgause da ge Jehovaba ra ǂkhî kai, hoa xūn ǃnâ da ga ǂhauǃnâo tsî ū da hâ xūna nau khoen ǀkha ǀgoraguo. (2Kor. 8:21; 9:7) Jehovab ge ra ǂhâba î da ǃgôaǃgâsiba ūhâ ǁîb ge mā da ûib ǃaroma. Kōǃgâsen da ge nî matikōse da ǂû, ā tsî sida ǂurusib ǀkha nî hui da xūna nî dīsa. Jehovab ge kaise nî ǀnam da mûb kao dītsâ da ra sa hoa xūn ǃnâ ǁîba ǂkhîǂkhîsa.—Luk. 16:10.

15. Jehovaba mati da nauna nî hâ-ūsa ra ǂhâba?

¹⁵ Jehovab ge ǁîba ra ǃoaba khoen tsî ǁîba ǃoaba taman ǃoagu a ǃgâi. (Mat. 5:45) Tsîb ge ra ǂhâba î da sida tsîna nau khoen ǀkha ǃgâise hâ. Aiǁgause da ge ‘khoe-i xare i xa ǂkhabase ǃhoa tamas ka io ǂnoagu tide.’ Mâ khoe-i hoa-i ǃoagu da ge “tsamtsiǃnâ tsî nî khoexaǃnâ.” (Tit. 3:2) Khoen ga Jehovab ǃnâ ǂgom tama io, i ge ǂâibasen tama hâ sida ǁîn xa ǀgapisa. (2Tim. 2:​23-25) Jehovab ǀgūse da ge nî hâ ǃgâi ǀgaub ǃnâ da ga naun ǀkha hâ o.

DĪSĀ DA GA XAWE DA GE JEHOVABA ǀGŪ ǁKHĀ

16. Psalmdi 73 xoa-aoba ǁaero-i khaoǃgâ mati gere tsâ?

¹⁶ Dīsānats ga dī, ots ge Jehovab sa ǀgūse hâ tama khami a tsâ ǁkhā. ǃHoaǃgao da go khami i ge Psalmdi 73 xoa-aob ǀkha ǁkhā xū-e ge ī. ǁÎb ge ra mî: “Ti ǂaira ge ge ǃnôa ǁga; ti dāǃharodi ge ge dāsā ǁga.” (Psa. 73:2) ǂAnǃgâb ge ge “au-ausen,” “ǁnâuǃāoǃnâ” “ǀguru-i” khamib ge tanisensa. (Psa. 73:​21, 22) Dīb ge dīsādi ǃaromab ge Jehovab ǀnam bi tama tsî ǀûba bi tide khami gere tsâ?

17. (a) Kaiseb gere ǂkhabuǂâi xaweb ge Psalms xoa-aoba tae-e dī? (b) Tae-e da ra ǁkhāǁkhāsen ǁîb ǀkha ge ī xū-e xu? (Ai-īsiba mû re.)

¹⁷ Psalms xoa-aob ge Jehovab xab ǁnāxūhe hâ khami gere tsâ. Xaweb ge ǀnîsi ǃnubu ǁaerob ǀguiba ti ge tsâ. ǁGaiseb gere tsâ xaweb ge ge ǂan i Jehovab ǀgūseb nî hâsa. ǁÎb ge ge xoa: “Tita ge hugaǀgui sats ǀkha nî hâ sats ge amǀkhāb ǃommi ai ǃkhō te hâ. Sa gā-ai ǀapemādi ǀkhats ge ra ǂgaeǂgui te, ǁnās khaoǃgâts ge ǃgôasib ǀkha nî ǃkhōǃoa te.” (Psa. 73:​23, 24) Sida tsîn ge Jehovaba nî ǂgan îb ǀgaiǀgai da, sida ǂgoms ga ǂkhabu tamas ka io da ga dīsā da ra xūn xa tsūse tsâo. (Psa. 73:26; 94:18) Tsū ǁorena da ga dī xawes tsîna da ge Jehovaba ǃoa a oasī ǁkhā tsî a ǂgomǃgâ ǁkhā ǁîb a “ǀûbaǀnam” ǃkhaisa. (Psa. 86:5) ǂKhabuǂâi da gao, i ge a ǂhâbasa Jehovaba da nî ǀgūsa.—Psa. 103:​13, 14.

ǀAMOSE ELOB ǀGŪSE HÂ

18. Tae-i ǃaroma da Jehovaba ǀamosib kōse a ǀgū ǁkhā?

¹⁸ ǀAmosib kōse da ge Jehovaba ǀgū ǁkhā. ǁÎb xa da ge ǁkhāǁkhāsen ǀû hō tide. Elobmîs ge ra mî, Jehovab ǀgaugu, ǁîb gā-aisib tsî ǁîb ǂans tsîn ge a “ǂanǂuihe” ǁoa.—Rom. 11:33.

19. Psalmde mâ ǂgomǃgâsiba ra mā da?

¹⁹ Psalmdi 79:13 ge ra khomai: “O da ge sida, sa khoeda, sa ǃû-ais di gūda ǀamose nî gangan tsi tsî ǃhaosa xu ǃhaos kōse satsa nî koa.” Sadu tsîn ge ǂgomǃgâsiba a ūhâ ǁkhā Jehovaba du ǀamose ǀgū tsî ǁîb xa ǀamose nî ǀkhaehesa. Sadu tsîn ge Psalmdi xoa-aob khami a mî ǁkhā: “Elob ge ti ǂgaob di ǃgareǀui tsî amǃnâ, ǀamos kōse.”—Psa. 73:26.