Jehovab ge nî ǁkhaeǂgao du

1. Jodeǁîn ge hâ ǃnâ i mâsiba ǁguiǃā re.

MÛNAN-AI re matin ge Babilons ǃnâ ge hâ i Jodeǁîna gere tsâ ǀgausa. ǂGui kurigan ge Jodeǁîna Jehovaba ge ǁnâuǀnam tama hâ i, ǁnās xa ǃaromahe hâseb ge ge mā-am în Babilonǁîna ǁîn ǃāsa ǁgaiǁgai tsî ǁîna ǃkhōsabese ū. ǁNāpa hâsa mati ge tsâ i? (2Kro. 36:​15, 16, 20, 21) Babilons ǃnâ ge hâ i ǃkhōsaben ge ǀnî ǃnorasasiba ge ūhâ i, în ǁnaetisasen gere dī xūna dī. (Jer. 29:​4-7) Ûib ge ge supu tama hâ i tsîn ge ǁnāpa ge hâ ǂgao tama hâ i. Matin ge ǁîn mâsib xa gere tsâ? ǀNî ǃkhōsabe-i ge nēti ge mî: “Babilons ǃāgu tawa ǁnāpa da ge ǂnû tsî gere ā Sions xa da gere ǂâio.” (Psa. 137:1) Jodeǁîn ge ǁkhaeǂgaohesa ge ǂhâ hâ i, xawe ham-e ga ǁkhaeǂgao nî hâ?

2-3. (a) Jehovaba tae-e Jode Xristeǁîna ge dība? (b) Tae-e da nē ǁkhāǁkhāǃâs ǃnâ nî ǃhoaǃgao?

² Jehova Elob ge hoan di ‘ǁkhaeǂgao-aoba.’ (2Kor. 1:3) Jehovab ge ǁîb di ǃoaba-aona a ǀnam tsî ǁîna ra ǁkhaeǂgao ǂgao. Jehovab ge ge ǂan-i ǀnî ǃkhōsaben ǁîb ǁnamasa ūǃoa tsî ǁîba ǃoa nî oaǀkhīsa. (Jes. 59:20) Jehovab ge Jesajaba ǁnā Jodeǁîn ǃaroma haisi-amsa ge mā, 100 kuriga Babilons ǃkhōsis ǃnân nî ūhes aiǃâ. Jesajab ǂkhanisa mati ga hui nî hâ? Jesajab ge ra mî: “‘ǁKhaeǂgao re, ǁkhaeǂgao re ti ǁaesa,’ tib ge sadu Eloba ra mî!” (Jes. 40:1) Jesajab ǂkhanis ǃnâb ge Jehovaba ǃkhōsis ǃnâ ge hâ i Jodeǁîna ǁkhaeǂgaosa ge mā.

³ ǁNā Jodeǁî ǃkhōsaben khami da ge sada tsîna ǁaeba xu ǁaeb ǀkha ǁkhaeǂgaohesa ǂhâ hâ. Nē ǁkhāǁkhāǃâs ǃnâ da ge ǃnona ǀgaugu Jehovab ge ǃkhōsabena a ǁkhaeǂgao ǀgaub xa nî ǃhoa: (1) ǃHobasen ra nâb nî ǀûbasab ge ge mîmâi, (2) ǁîb khoenab ge ǃâubasensa ge mā tsî (3) ǁînab ge ge hui în tā ǃao. Tsî da ge nî ǃhoaǃgao, matib Jehovaba ǁkhā ǀgaub ǃnâ nētsē ra ǁkhaeǂgao dasa.

JEHOVAB GE RA ǀÛBA DA

4. Jehovaba mati ge ǁgau ǀkhomxaǂgaosib Elob asa? (Jesajab 55:7)

⁴ Jehovab ge “ǁGûb ǀkhomxaǂgaosigu” diba. (2Kor. 1:3) Jesajab ǃnâ-ūb ge Jehovaba ge mîmâi Jodeǁînab nî ǀûbasa. (Khomai re Jesajab 55:7 sa.) ǁÎb ge ge mî: “Xawe ta ge ǀamo ǀnammi ǀkha ǀkhomxaǂgaosiba nî ūhâba” tsi. (Jes. 54:8) Jehovaba mati ǁîb ǀkhomxaǂgaosiba ga ǁgau hâ? Jodeǁîn Babilons ǃnâ ǁnâuǀnamoǃnâsib ǃaroma ǁnāpa nî hâse ǁkharahe hâ xaweb ge Jehovaba ge mîmâiba nî ǁnāpan hâhâ tidesa. (Jes. 40:2) Nē mîdi ge ǀnîsi ǃhobasen ge Jodeǁîn Jehovaba gere ǂkhîǂkhîna ge ǁkhaeǂgao.

5. Jode ǃkhōsaben xa da tae-i ǃaroma ǃnāsa ǂgomǃgâsiba ūhâ Jehovab sida ǁorena nî ǀûbasa?

⁵ Tae-e da ra ǁkhāǁkhāsen? Jehovab ge ǁîb ǃoaba-aona māsenxase kai ǀgaub ǃnâ ra ǀûba. Babilons ǃnâ ge hâ i Jode ǃkhōsaben xa da ge ǃnāsa ǂgomǃgâsiba ūhâ Jehovab sida ǁorena nî ǀûbasa. Tae-i ǃaroma? ǂAn da a amaga tae-eb ge Jehovaba dīsa î-i sida ǁorena ǀûbahe. ǂGui kuriga Jesajab kēbos khaoǃgâb ge Jehovaba ǁîb ǀnamǀnamsa ǀgôaba ǃhūbaiba ǃoa ge sî, îb ǁîb ûiba ǁguibas ase mā ǃhobasen hâ ǁore-aon ǃaroma. Nē ǁguibas ǃaromab ge Jehovaba sida ǁorena hoase a “ǀariǂui” ǁkhā. (ǃNǃkh. 3:19; Jes. 1:18; Efe. 1:7) Jehovab ge ama ǀûbaǀnamxa Eloba.

6. Mati da ǃgâiba nî ǀama Jehovab ǀkhomxaǂgaosib ai da ga ǂâisa ǂnûio? (Ai-īsiba mû re.)

⁶ Jehovab haisi-ams Jesajab 55:7 ǃnâb ge Jodeǁîna ǃoa a mîs ge ra ǁkhaeǂgao da. ǃHobasen da hâs khaoǃgâ da ga ǃkharuge ǁaeb ǃnâ da ge dī dīsān xa ǀhapitsâseno. ǀNîsi da ge noxopa ǀhapitsâsen ǁkhā, sida dīsādi xa ǃaromahe hâse da ga ǃgoma tsâo. Sida ǁorena ǂanǃgâ tsî da ga tsū xūna dī ǀûo da ge ǂgomǃgâsiba ūhâ Jehovab ǀûba da hâsa. Jehovab ga ǀûba da ob ge ra ǁhûi sida ǁorena ǀurusa. (ǀGopeǀnō re Jeremiab 31:34 sa.) Jehovab ga ǃkharuge ǁaeb ǃnâ da ge dī ǁoren xa ǂâi ǀgara tama io da ge sida tsîna tā ǁnāsa nî dī. Jehovab ge nēsi da ra dī xūn xa ǂhâǂhâsaba-e, ǃkharuge ǁaeb ǃnâ da ge dīsān ose. (Ese. 33:​14-16) ǀGūǁaeb ge sida ǁGûb ǀkhomxaǂgaosigu diba, ǀamose sida dīsān xa ǃaromahe hâ ǃgomsina nî ūbē.

7. Tae-e nî ǂkhâǃnâ da, î da ǀhaohâb ǃûi-aogu ǀkha ǃhoa kai ǁoreba da ga dīo?

⁷ Tae-e da nî dī kai ǁorena dī tsî da ga nauna xu sâus xa ǀhapitsâseno? Elobmîs ge ra ǂkhâǃnâ da, î da ǀhaohâb ǃûi-aogu ai huiba ǂgan. (Jak. 5:​14, 15) Xawe i ge ǀnîsi supu tide ǁîga mîbasa tae-e da go dīsāsa. ǂÂis ǃnâ da ge nî ūhâ, Jehovab ǁnā aoga ra sîsenūsa î gu ǀnamxaǃnâ tsî ǀkhomxaǃnâsib ǀkha hui da. Nēsa da ga ǂâis ǃnâ ūhâ tsî ǃhobaseno da ge turaba nî ūhâ ǁîgu ǀkha ǃhoasa. ǃGaoǃgâ re mati i ge Arthura ti ǀon hâ ǃgâsaba a ǁkhaeǂgaohe ǀgausa. ǁÎb ge kaise gere ǀhapitsâsen dīsāb ge xū-i ǃgao. Arthuri ge ra mî: “Kuriba ta ge ǁgoe-ūgub vidion tsî ǀōǀkhā khoen ai-īsiga gere kō. Xawe ǃanu ǃgâiǂâis xa hâ ǃhoasa ta ge ǁnâus khaoǃgâ ta ge ti ǀhaohâb ǃûi-aogu tsî ti taras tsîna ge mîba. ǁÎn ǀkha ta ge ǃhoa toas khaoǃgâ ta ge ǃgâise gere tsâ xawe ta ge noxopa dī ta ge xūn xa ǁgaise gere tsâ. ǀHaohâb ǃûi-aogu ge ge hōhōǃnâte, Jehovab noxopa ra ti ǀhōsa kai ǂgaosa. ǁÎb ge ǀnam dab a amaga ra ǁnama da. ǁÎgu ǃgâi mîdi ge ge ǂgomǃgâ kaite tsî ge huite i ta mûǂan Jehovab ge ama ǀûbatesa.” Arthuri ge nētsē ǁnaetisa aimâba-ao tsî ǀhaoǀhâb ǃûi-aob ase ra ǃoaba. Kaise i ge ra ǂkhâǃnâ da ǂansa, sida dīsān ǃaroma da ga ama ǃhobasen, ob Jehovaba hoaǁae nî ǀûba da ǃkhaisa.

JEHOVAB GE ǃÂUBASENSA RA MĀ DA

8. (a) Mâ ǃâubasensab ge Jehovaba ǃkhōsabena mā? (b) Jesajab 40:​29-31 ǃoagu i ge ǃhobasen hâ Jodeǁîna mati gere tsâ Jehovab ge mā nî ǃâubasens xa?

⁸ Jodeǁîn ge ǀnîsi gere ǂâi, ǁîn ge ǃnae ǃnâ ǃāsa ǃoa oas ge īǁoa isa. Babilonǁîn ge ge ǂansa i ǁîn ǃkhōsabenan tātsē ǃnora kai tamasa. (Jes. 14:17) Xaweb ge Jehovaba ǁîb khoena ǃâubasensa ge mā. ǁÎb khoenab nî ǃnora kaisab ge ge mîmâi tsîn ǁîn di ǃāsa ǃoa nî oasa. Tsî i ge xū-e ge ǀkhai i ǁîba nî ǂkhā-e, ǁnā mîmâisa ama kaisa. (Jes. 44:26; 55:12) Jehovab mûǁae i ge Babilonǁîna tsarab khami ge ǂkhabusa i. (Jes. 40:15) Tsaraba du ga ǃgombē-o i ge nî bē. Nēti i ge Jehovaba nî supuba ǁîb khoena Babilonsa xu ǃnora kaisa. Nē ǃâubasensa mati Jodeǁîna ge tsâǀkhā? ǁÎna ǁkhaeǂgao tsî i ge ǁnās xa ǃnāsa-e ga dī hâ. Jesajab ge ge xoa: “Xawe ǁnān ǃKhūb ai ra ǂgomaiǂnûin ge ǀasa ǀgaiba nî hō.” (Khomai re Jesajab 40:​29-31 sa.) “ǁÎn ge kai-anidi ǁgabogu ǀkhas khami nî ǁkhana,” ǁîn ǃâubasens ǀasa ǀgaiba nî mā nî amaga.

9. Tae-i ǃaroman ge Jodeǁîna ǂgomǃgâsiba ūhâ i Jehovab Babilonsa xu nî ǃnora kai nî ǃkhaisa?

⁹ Jehovab ge Jodeǁîna ǂgomǃgâsiba ge mā, tae-i ǃaroman ǁîb mîmâidi ǃnâ nî ǂgomsa. Mâ ǂgomǃgâsibab ge ǁîna mā? ǀNai ge dīǀoaǀoahe kēbodi xa ǂâiǃgâ re. Aiǁgausen ge ge ǂan i Jehovab ge mîmâisa, Asiriab nî nordes di gaosis Israels diba gaoǂam tsî khoena ǃkhōsis ǃnâ nî ūsa. (Jes. 8:4) ǁÎn ge ge mû, Babilonǁîn Jerusalemsa hîkākā tsî ǁîs ǁanǂgāsabena ǃkhōsis ǃnâ ra ūsa. (Jes. 39:​5-7) ǁÎn ge ge ǂan-i Babilons gao-aob ge Gaob Sedekiab di mûde xoroǂui tsî ǁîba Babilonsa ǃoa a ī-ū ǃkhaisa. (Jer. 39:7; Ese. 12:​12, 13) Jehovab ge mîmâi xūn hoan ge ge ama kai. (Jes. 42:9; 46:10) Nē xūn hoan ge ǁîn ǂgomsa ǀnîsi ge ǀgai kai, Jehovab ǁîna ǃnora kais mîmâisa nî dīǀoaǀoahe amaga.

10. Tae-e a hui da ǁkhā î da sida ǃâubasensa ǀgaisase ūhâ ǀgara?

¹⁰ Tae-e da ra ǁkhāǁkhāsen? ǂKhabuǂâi da ga, o i ge ǃâubasensa ǁkhaeǂgao da tsî ǀgaiba ra mā da. Kaise a ǃgom ǁaegu ǃnâ da ge ûi hâ tsîn ge ǀgaisa khākhoen Elob dina ra mâǃoa da. Xawe da ge tā nî ǂkhabuǂâi. Jehovab ge mîmâiba da hâ ǀamosib kōse da paradais ǃnâ nî ûisa. ǁNāpa da ge ǂkhîb tsî ǃnorasasib ǃnâ nî ûi. Sida ǂâisa da ge ǁnā ǃâubasens ai nî ǂnûi. ǁNāsa da ga dī tama io, i ge sida di ǃâubasensa ǀurixa mûǂuidaos [vensters] ǃnâ-ū da ra kō khami a mûsen ǁkhā. Mati da “mûǂuidaosa ǃanu ǁkhā” î-i sida ǃâubasensa ǀgai? ǁAeba xu ǁaeb ǀkha da ge mûǂui ǁkhā, matib sida ûiba ǀasa ǃhūbaib ǃnâ nî îxa ǀgausa. Khomaiǃâde khomai, vidioga kō tsî da ge ǃâubasens xa hâ amde a ǃgâ ǁkhā. ǀGores ǃnâ da ge Jehovaba, paradais ǃnâ nî dīǀoaǀoahe xūn mû ǂgao da ran xa a mîba ǁkhā.

11. Tae-e ǃgâsas ǂurusib ǃgomsiba ge ūhâ īsa ge hui is ǁîs ǀgaiba hō oa?

¹¹ ǃGaoǃgâ re matis ge Joy ti ǀon hâ ǃgâsasa, ǃâubasens tsî ǁkhaeǂgaos tsîn xa ǂurusib ǃgomsib ǃnâ a ǀgaiǀgaihe ǀgausa. ǁÎs ge ra mî: “Ti ǃgomsin ga kaise ǂkhabuǂâi kai te, ota ge Jehovaba hoa xūna ra mîba tsî ta ge ǁîb ra ǁnâuǃāte ǃkhaisa a ǂan. Tsî ǁnāti ī ǁaeb ai ta ge ra hōǃâ, nē ‘kai ǀgaib’ a Elob di tsî ti tama ǃkhaisa.” (2Kor. 4:7) Joys tsîn ge ra mûnan-aisen, ǁnā ǁaeb ǀgui ǁanǂgāsabe-i tsîn: “Tita ge ǀaesen hâ” ti mî tideba ǃoa. (Jes. 33:24) Sida tsîn ge Jehovaba tsâ da ra ǀgaub xa nî mîba tsî sida ǃâubasens ai ǂâisa nî ǂnûi. ǁNāsa da ga dīo da ge ǀgaiba nî ūhâ ǃgom mâsigu ǃnâ mâǀgaisa.

12. Mâ ǃaromade da ūhâ Jehovab mîmâidi ǃnâ ǂgomǃgâsa? (Ai-īsiba mû re.)

¹² Babilons ǃnâ ge hâ i ǃkhōsabenab ge ǂgui ǃaromade a mā în ǁîb mîmâidi ǃnâ ǂgomǃgâ, khamib ge sida tsîna nētsē ǂgui ǃaromade ra mā. Dīǀoaǀoahe ge kēbodi xa ǂâiǃgâ re. Aiǁgause da ge ǃhūbaisi ǀgaib, “ǃkharese ǀgaisa tsî ǃkharese a ǂkhabusa” ba ra mû. (Dan. 2:​42, 43) “ǂGui ǃkhain ǃhūbaib din ai gu ge. . . ǃhūǂgubiga nî hōǃâhe” tsî da ge ‘hoa ǁaede’ ra aoǁnâba. (Mat. 24:​7, 14) Nē kēbodi tsî ǀnî hân tsîn ra dīǀoaǀoahesa da ra mû, amaga i ge ǀoasa ǂgomǃgâsiba ra mā da, hoa ǃgâi xūn Jehovab mîmâi hân nî ama ī ǃkhaisa.

JEHOVAB GE RA HUI DA Î DA TĀ ǃAO

13. (a) Mâ ǃgomsinan ga Jodeǁîna ǃnoraǃnorahen nîs aiǃâ hōǃâ hâ? (b) Jesajab 41:​10-13 ǃnâ ra ǁguiǃāhe khamib ge Jehovaba mati Jodeǁîna ǁkhaeǂgao?

¹³ Jehovab ge Jode ǃkhōsabena ǁnā ǃâubasensa a mā xaweb ge ge ǂan i ǁîn ǃgomsina nî hōǃâsa ǃnoraǃnorahen gao. ǀGaisa gao-aob ǁîna ǁnāǂam tsî Babilons tsî ǁîs ǂnamipe hâ ǁaede nî ǁnāǂam amaga. (Jes. 41:​2-5) Jodeǁîna nēs xa gere ǃao? Jehovab ge aiǃâ ǀnai ǁîb khoena ge ǁkhaeǂgao, ǁîb ge ge mî: “Tā ǃao, tita sats ǀkha hâ xuige, tā ǃaoǃaohe, tita a sa Elo xuige!” (Khomai re Jesajab 41:​10-13 sa.) “Tita a sa Elo xuige!” tib ge mî, ob ge tae-e gere ǂâibasen? ǁÎb ge Jodeǁîna ge hōhōǃnâ tama hâ i în ǁîba ǃoaba, ǀnain ge ǁîna nēsa ǂan i tsî gere dī amaga. Xaweb ge ǁîna gere hōhōǃnâ ǁîn ǀkhāb aib hâsa.—Psa. 118:6.

14. Jehovaba tae-i tsîna ge dī îb ǃao gere Jodeǁîna hui?

¹⁴ Jehovab ge Jodeǁîna ge hui în tā ǃao, ǁîna ǁîb di buruxa ǀgaib tsî ǂans xa ǂâiǂâis ǃnâ-ū. ǁÎnab ge ge ǂgan în ǀgamirode ǃoa kō. Jehovab ge ǁîna ge mîba ǀgamirodi ǀguiteb kuru tamasa xaweb mâs hoasa ǀons ai a ǂansa. (Jes. 40:​25-28) Jehovab ga mâ ǀgamiros hoasa ǀons ai ǂan, ob ge amase ǁîb ǃoaba-aon di ǀon di hoade a ǂan. Jehovab ga ǀgaiba ūhâ ǀgamirode kurusa, ob ge amase ǀgaiba ūhâ ǁîb ǃoaba-aona huisa. Amasen ge Jodeǁî ǃkhōsabena ǃaon nî xū-e ge ūhâ tama hâ i.

15. Jehovaba mati Jodeǁîna ge aiǂhumi ǁaeb aiǃâ?

¹⁵ Jehovab ge ǁîb khoena ge aiǂhumi, ǃnorakaihen nî ǁaeb nî hās aiǃâ. Jesajab ǂkhanis tsoatsoas ǃnâb ge Eloba ǁîb ǁaesa ra mîba: “Ti khoedo, sadu omdi ǃnâ ǂgâ, î dao-amde sadu ǃgâb ai ǂganam. ǁAero-e gaugausen, ǃKhūb ǁaib nî toas kōse.” (Jes. 26:20) Jodeǁîn ge ǀnîsi nē daoǁgausa ge sîsenū Koraxi ge Babilonsa ǁnāǂamo. Grike khoeb ǃkharuge ǁaeb ǂhôana gere ôaǃnâb ge ra mî: “Koraxi ge Babilons ǃnâ ǂgâ ob ge ǁîb soldaga ge mîba î gu ǃauga gu ra hō khoen hoana ǃgam.” Mûnan-ai re matin ge Babilons ǃnâ gere hâ khoena gere ǃao ǀgausa. Xawen ge Jode Xristeǁîna ǀnîsi ge sâuhe, Jehovab daoǁgausan ge ǁnâuǀnam amaga.

16. Tae-i ǃaroma da kai ǁgâiǀāb ǃnâ nî ī xūn xa ǂâiǂhansen tide? (Ai-īsiba mû re.)

¹⁶ Tae-e da ra ǁkhāǁkhāsen? ǀGūǁae i ge kai ǁgâiǀāba nî tsoatsoa. Kai ǁgâiǀāb ga tsoatsoa on ge khoena ǂâiǂhansen tsî nî ǃao. Xawe Jehovab khoen ge ǃao tide. ǂAn da ge a Jehovab a sida Elo ǃkhaisa. ǂGomǃgâsiba da ge ūhâ ǂan da a amaga sida “ores go ǀgū” xui-ao. (Luk. 21:28) ǀHao hâ ǁaes Gogi dis ga ǁnāǂam da, o da ge aiǃgû tsî Jehovab ai nî ǂgomaiǂnûi. (Ese. 38:18) Jehovab ge ǀhomǃgāna sîsenū tsî sida ûiga nî sâu daoǁgaute nî mā. Matib ǁnā daoǁgaute nî mā da? ǁNāsa da ge a ǀū. Xawe ǀnîsi da ge ǁnā daoǁgaude sida ǀhaohâgu ǃnâ-ū nî hō. Nē di ge ǀnîsi sida ‘omdi’ ǃnorasase da nî hâǃnâde. Mati da hānîǁaeb ǃaroma a aiǂhumisen ǁkhā? Sida ǃgâsan ǀgūse hâ tsî da ge māsenxase Jehovab ǀapeǂhumis daoǁgaude nî ǁnâuǀnam. Tsî ǂgomǃgâsiba nî ūhâ Jehovab sida ǀapeǂhumisa ra daoǁgau ǃkhaisa.—Heb. 10:​24, 25; 13:17.

17. Mati da ǁkhaeǂgaos ǃaroma Jehovaba ǃoa nî kō?

¹⁷ Babilons ǃnâ ge hâ i Jodeǁîn ǃaromab ge ûiba ge supu tama hâ i xaweb ge Jehovaba ǁîna ǂhân ge hâ i ǁkhaeǂgaosa ge mā. ǁNās ǁkhās khamib ge sida tsîna nî dība. Hānîǁaeb ǃnâ i ga tae-i ǀgui-e ī xawe aiǃgû tsî ǁkhaeǂgaos ǃaroma Jehovaba ǃoa kō. ǁÎb ǀkhomxaǂgaosib ǃnâ ǂgomǃgâsiba ūhâ. Sadu ǃâubasensa ǀgaisase ūhâ. Tā Jehovab a sada Elo ǃkhaisa ǀuru, ǃao da nî xū-i ge a ǀkhai.