Jehovab ǃgamǃgamsenxasiba ǁgae

1. Jehovab ǃgamǃgamsenxasiba tae-i ǃaroma ra mâǂoaba du?

NĒ ǃHŪBAIB ǂgaeǂgui-aogu xa du ga ǂâi, o du nî mî ǃgamǃgamsenxa gu a ti? ǀNîsi du ge hî-i ti nî mî. Xawe Jehovab Hoaǀgaixab ge a ǃgamǃgamsenxa. (Psa. 113:5-8) Khoe-i xare-i ge Jehovab khami ǃgamǃgamsenxa tama. ǁÎb ge tātsē ǀgapiǂâixa tama. Nē ǁkhāǁkhāǃâs ǃnâ da ge Jehovab haka ǀgauga nî ǃhoaǃgao. Tsî da ge nî mû nē haka ǀgaugu mati ǁîba ǃgamǃgamsenxasiba ra ǁgau ǀgausa. Jesub ge mati ǁîb ǁGûb ǃgamǃgamsenxasiba ǁgae ǀgaus tsîna da ge nî ǃhoaǃgao. Nē da nî ǃhoaǃgao ǀgaugu ge nî hui da, î da Jehovaba ǃoa ǀgū tsî ǁkhāǁkhāsen mati da ǁîb khami nî ǃgamǃgamsenxasa.

JEHOVAB GE RA ǂHÂBA Î DA ǁÎBA ǃOA HĀ

2. Psalmdi 62:8 sa tae-e Jehovab xa ra mîba da? (Aisǀkhāb ai hâ ai-īsiba mû re.)

² ǀGapiǂâixa khoe-i ǀkha ǃhoas ge supu tama. ǀGapiǂâixa khoen ge nau khoena ǃgâi tamase ra hâ-ū. ǁÎn ge nau khoen xan a ǀgapi ti ra ǂâi, ǁnā-amagan ge khoena ǁîna xu ra hâbē. Jehovab ge ǁnāti ī tama. Sida ǀhomsi ǁGûb ǃgamǃgamsenxa amagab ge ge supu kai ba da, î da ǁîba ǃoa ǀgore tsîb ge ra ǂhâba î da ǂâiǂhansen kai da ra xūna mîba bi. (Khomai re Psalmdi 62:8 sa.) ǁÎ-i ǀgôa-i ǀkha ǁae hâ ǁgû-i khamib ge Jehovaba ra ǂanǂgao, ǁîb ǀgôan tae-e ǂâi tsî ra tsâsa. Jehovab ge sida ǀgorede ra ǁnâu ǂgao. ǁÎb ge nēti ī ǀgorede Elobmîs ǃnâ ge xoa kai, ǁnās ge ra ǁgau ǁîb sida ǀgorede ra ǁnâu ǂgaosa. (Jos. 10:12-14; 1Sam. 1:10-18) ǀNî ǁaegu ai da ge ra tsâ Jehovaba ǃoa da ǀgore ǁoasa dī ta ge dīsān ǃaroma.

3. Tae-i ǃaroma du ǂgomǃgâsiba ūhâ Jehovab ra ǂhâbasa î du ǁîba ǃoa ǀgore?

³ Jehovaba ǃoa da ge nî ǀgore, mati ǀgui da ga tsâ xawe. Tae-i ǃaroma da ti ra mî? Jesub ge gā hâ ǀgôab ǂkhōs ǃnâ hâ khoexaǃnâ ǁgûba, Jehovaba ǃoa gere ǁnaeǁgau. Nē ǀgôab ge ǁîb ǁgûb, ǂgui dīsānab dī hâ amaga omaris ǃnâ ūǃoa bi tide ti gere tsâ. Nē ǁgûba tae-e ge dī ǁîb ǀgôab ge omsa ǃoa oaǀkhīo? Jesub ge ra mî ǁgûb ge ǀgôaba mû ob ge “khoeǃoa bi, ǁnam bi tsî ge ǁoa bi.” (Luk. 15:17-20) Jehovab ge ǁnā ǁGûb khami ī. ǁÎba ǃoa da ga dī ta ge ǁoren xa ra ǃaromahe tsûaǂgaob tamas ka io ǂâiǂhansendi xa ǀgore, ob ge ǂōrisase ra ǃgâ. (ǃG.am. 3:19, 20) Jehovab ge ǀkhomxaǃnâsiba ūba da hâ ǁgûb, hîna ra ǃkhoesib khamib ge ra ǂâiǂâiǃnâ da ǀnam tsîb nî ǁkhaeǂgao dasa. (Jes. 57:15) Jehovaba nētsē mati sida ǃoa ra “ǃkhoe”? ǁÎb ge ǀhaohâb ǃûi-aogu, omaris ǁanin tsî ǃgâsan tsîna ra sîsenū îb ǂkhâǃnâ da. (Jak. 5:14, 15) Jehovab ge ǁîba da nî ǀgū amaga nē huiba ra mā da.

4. Tae-i ǃaroma i ge khoena supuba-i Jesuba ǃoa hāsa?

⁴ Jesub ge ǃgamǃgamsenxa. Jesub ge ǁîb dadasab khami ǃgamǃgamsenxa. ǁNās xa ǃaromahe hâsen ge khoena ǁîba ǃoa gere sī. Khoen ge ge ǃao tama hâ i ǁîba dîde dîsa. (Mrk. 4:10, 11) ǁÎb ge ǁîna dîde gere dî on ge tsân gere ǀgauba ǁîba gere mîba. (Mat. 16:13-16) Tsî dīsān gere on ge ge ǃao tama hâ i Jesub ǁîn ǀkha nî ǁaixasa. ǁÎn ge ge ǂan-i Jesub khoexaǃnâ, ǀkhomxaǃnâ tsî a ǃnūǃnâxasa. (Mat. 17:24-27) Jesub ge ǁîb dadasaba ǃamkuse gere ǁgae ǃkhais ǃaroman ge ǁîb saosabena Jehovaba ǃamkuse ge ǂan. (Jhn. 14:9) Jesuba xun ge ge mû Jehovab a ǃgamǃgamsenxasa tsîb ge ǁîna gere ǀgū ǂgaosa. Tsîb ge ǁîba ǀnî ǂgomdi ǂgaeǂgui-aogu khami ī tama isa hîna ge ǃgariǂgaoxa tsî ǀgapiǂâixa-i ga.

5. ǃGamǃgamsenxasiba mati hui da ǁkhā în nauna sida ǀkha harase ǃhoa?

⁵ Mati da Jehovaba ǁgae ǁkhā? ǃGamǃgamsenxasiba da ga ǁkhāǁkhāsen, oi ge khoena nî supuba în harase sida ǀkha ǃhoa. ǃGamǃgamsenxa tama da ga io da ge surixa nî tsî ǀgapiǂâixa. Nēs tsîn ge a ǃaroma ǁkhā î da tsûtsûhe da ga o da tā nauna ǀûba. Nēti da ga tanisen on ge khoen sida ǃoa hā tide. ǃGamǃgamsenxasib ge nî hui da î da khoexaǃnâ, ǃnūǃnâxa tsî nauna māsenxase ǀûba. Nēs ge nî īǁkhā kai în ǁîna sida ǀhōsa kai. (Kol. 3:12-14) ǀHaohâb ǃûi-aogu ge nî dītsâ în ǃgâsana harase ǁîgu ǀkha ǃhoa. Nēsa gu ga ǀhaohâb ǃûi-aoga dī ǂgao, o gu ge nî dītsâ ǃgâsan ǀkha hoaǁae hâ ǀhaosa. Īǁkhāsib ga hâ, o gu ge ǀhaohâb ǃûi-aoga ǀhaode Sali tawa nî hâǃnâ zooms ǃnâ-ūs ose. Mâsib ga mā-am o gu ge omsa xu oms ǀkha ǃgâsan ǀkha nî aoǁnâ. ǁNān ǀhaohâb ǃnâ hân ge ǀhaohâb ǃûi-aoga ǃgâise ǂan tsî harase nî tsâ ǁîgu ǀkha ǃhoasa huiban ga ǂhâo.

JEHOVAB GE ǁNÂUǃĀXA

6-7. Aiǁgaude mā re, matib ge Jehovaba ǁîb ǃoaba-aon ǀgoredi ǃoagu gere dawasa.

⁶ ǀGapiǂâixa khoen ge ǃnāsa ǁaeba ra ǂâi ǁîn a ǃgâisa tsîn ge ǁîn ǂâiǀgauba dawa tama. Jehovab ge ti ī tama ha, ǁîb ge ǃgamǃgamsenxa tsî hoaǁae naun ra mî xū-e ra ǃgâ ǂgao. ǁÎb ge ǀnî ǁaegu ais tsîna ǁîn ǃaroma ǁîb mîǁguiba a dawa ǁkhā. Aiǁgause Miriams tsî Aronni tsîn ge Moseb ǃoagu ge ǃgae. Xawe nēs ge ge ǂhanu tama hâ-i Moseb ge Jehovaba gere ǂnûǁkhaeba amaga. ǀNî mîdi ǃnâs ge Miriamsa Jehovaba ǃgôasiba ge ǁgau tama hâ-i. Nēs ǀkhab ge Jehovaba kaise ge ǁaixa hâ-i tsî Miriamsa khōb ǀaeb ǀkha ge ǁkhara. Xawe Aronni ge Moseba ge ǀkhoma îb ǁîsa hui tsîb ge Moseba Jehovaba ge ǀkhoma îb Miriamsa ǂgauǂgau. Jehovaba tae-e nēs xa ge dī? ǀGapiǂâixa khoe-i ge ǁî-i ǀgauba ga dawa tama hâ xawe Jehovab ge ge ǁnâuǃāxa-i. Jehovab ge ge ǃgamǃgamsenxa-i tsî Moseba ǃgâ tsî Miriamsa ge ǂgauǂgau.—Num. 12:1-15.

⁷ Mû da ge ra matikōseb ge Jehovaba ǃgamǃgamsenxa isa, Gaob Hiskiabab ge ǃgâo. Jehovab ge kēbo-aoba Hiskiab ǃoa ge sî, îb sī gaoba mîba ǁōb nîsa. Hiskiab ge ā rase Jehovaba ge ǀkhoma îb ǂgauǂgauhe. Jehovab ge Hiskiab ǀgoresa ǁnâu-am tsî ǁîba ge mîba 15 kurigab nî ǀaroba bisa. (2Gao. 20:1, 5, 6) Jehovab ge khoena ra tsâba tsî ǃgamǃgamsenxasib xa ra hui-e îb khoena māsenxase ǃgâ.

8. Mâ aiǁgaude ra ǁgau Jesub a ǁnâuǃāxasa? (Markub 3:1-6)

⁸ Jesub ge ǁnâuǃāxa. Jesub ge ǃhūbaib aib ge hâ io mâsib gere mā-am, o nau khoena ǃgâi xūna gere dība. Aiǁgause, Jesub ge Sâtsēs tsēs ai khoena gere ǂgauǂgau ǂgomdi ǂgaeǂgui-aogu ge nēs dīhe tide ti gere mî xawe. (Khomai re Markub 3:1-6 sa.) Jesub ge a ǁnâuǃāxa tsî ǀkhomxaǃnâse nētsē ǀhaohâba ra daoǁgau. Aiǁgause khoe-i ga ǀhaohâb ǃnâ ǀgaisa ǁoreba dī, ob ge ǁî-i ǃoagu ǃnūǃnâxa tsî ǁî-e ǃēsa ra mā î-i ǁî-i ǀgauba dawa.—J.ǂHa. 2:2-5.

9. Mati da ǁnâuǃāxa ǀgaub ǃnâ ǂâi tsî tanisen ǁkhā? (Ai-īsiga mû re.)

⁹ Mati da Jehovaba nî ǁgae? Jehovaba xu da ge mati da ǁnâuǃāxa ǀgaub ǃnâ ǂâi tsî nî tanisen ǀgauba nî ǁkhāǁkhāsen. (Jak. 3:17) Jehovaba ra ǁgae ǁgûn ge ǃâubasen tama hâ în ǀgôana tā dī hō taman hâ xū-e dī. Jakob aiǁgaus ge kaise ǃgâi, ǁîb ǀgôan ǀkhab ge kaise ge ǁgae hâ-i. (Gen. 33:12-14) ǃGamǃgamsenxa tsî ǁnâuǃāxa ǁgûn ge nî ǂgōsen în ta ǀgôana ǀgopeǀnō. ǀHaohâb ǃûi-aogu tsîn ge nî ǁnâuǃāxa. Aiǁgause ǀhaohâb ǃûi-aob ge ǁîb ra ǂhâba-i ai ǀgui mâ tide. Xawe nau ǀhaohâb ǃûi-aogu ra mî-i ǀkha nî ǃgûǀhao, nēs ga Elobmîs ǁgaragu ǃoagu hâ tama io. (1Tim. 3:2, 3) Hoa da ge dītsâ tsî naun ra ǂâi tamas ka io ra tsâǀgauba nî ǁnâuǃā, sida ǂâiǀgaub ǀkha i ga ǀgui tama ī xawe. (Rom. 14:1) Hoa khoen ge ǀhaohâb ǃnâ dītsâ tsî ‘khoexaǃnâsiba’ nî ǁgau.—Fil. 4:5.

JEHOVAB GE ǃNŪǃNÂXA

10. Mâǀgaugu ǃnâb ge Jehovaba ǃnūǃnâxasiba ǁgau?

¹⁰ ǀNîsi du ge ǃgaoǃgâ hâ ǀgapiǂâixa khoen nau khoen xa ǃâu kaihes xa ǃgâibahe tama hâsa. ǁÎn ge ǃnūǃnâxa tama xawe Jehovab ge ti ī tama, ǁîb ge hoa khoen xa ǃnūǃnâxa. Aiǁgause, Jehovab ge Noaxi tsēdi ǃnâ ge mî ǁîb 120 kuriga nî ǃâusa eloxoresanab nî hîkakas aiǃâ. (Gen. 6:3) Noaxi ge ǁaeba ge ūhâ-i ǁîb ǀgôana kaikai tsî arka omaris ase omsa. Jehovab ge ega ǃnūǃnâxase ge ǃgâ, Abrahammi ge Sodoms tsî Gomorras dīkakas xa dîo. ǀGapiǂâixa khoe-i ge ga mî hâ, ‘tā tita ǁnā dîde dî.” Xawe Jehovab ge ǃgamǃgamsenxab a amaga Abrahamma ǃnūǃnâxase ge ǃgâ.—Gen. 18:20-33.

11. 2 Petrub 3:9 ǃoagu Jehovaba tae-i ǃaroma ǃnūǃnâxasiba ra ǁgau?

¹¹ Jehovab ge nētsē ǃgamǃgamsenxase ǃnūǃnâxasiba ra ǁgau. ǁÎb ge nē eloxoresa ǃhūbaibab nî hîkakahe ǁaeba ǃâu hâ. Tae-i ǃaromab a ǃnūǃnâxa? ǁÎb ge “khoe-i nî kāǁō ǃkhaisa ǂgao tama hâ, xawe hoan nî ǃhobasensa.” (Khomai re 2 Petrub 3:9 sa.) Jehovab a ǃnūǃnâxa amaga i ge miliundi khoena ge ǁîb ǀhōsa kai. Jehovab ge ǃnūǃnâxase hâhâ tide. Jehovab ge khoena a ǀnam xaweb ge hoaǁae mā-am tide în ǂgaon ra xū-e dī. ǁÎb ge eloxoresana nî dîkākā.—Hab. 2:3.

12. Jesuba mati Jehovab ǃnûǃnâxasiba ra ǁgae?

¹² Jesub ge a ǃnūǃnâxa. Jesub ge ǂgui kuriga Jehovab ǃnūǃnâxasiba ge ǁgae. Jesub ge ǁGâuab ge Jehovab tsî ǁîb ǃoaba-aon xa mî ǂhumi ǂhôana ge mû. (Gen. 3:4, 5; Job. 1:11; J.ǂHa. 12:10) Jesub tsîn ge ge mû, matin ge khoena ǁgai xūna gere ǃkharuǃnâ ǀgausa. Mûnan-ai re matikōseb Jesuba ra ǁkhoresa îb ‘ǁGâuab sîsenga hîkākā.’ (1Jhn. 3:8) Jesuba tae-i ǃaroma ǃnūǃnâxase ra ǃâu, Jehovab nî mîba bis kōse îb ǁGâuab ǁgai sîsena hîkākā? ǀGui ǃaromas ge Jesub ge ǃgamǃgamsenxa tsîb ge a ǂan Jehovab ǀguib nî mîǁguisa mâǁae i ǀamsa nî hāsa.—ǃNǃkh. 1:7.

13. Jesuba mati tsî tae-i ǃaroma ǁîb apostelgu ǀkha ge ǃnūǃnâxa-i?

¹³ ǃHūbaib aib ge hâ iob ge Jesuba ǁîb apostelga ǃnūǃnâxasiba ge ǁgau. Aiǁgause apostelgu ge ham-i a kais xa gere ǂnôagu, ob ge Jesuba ge ǁaixa tama hâ i. Xaweb ge aiǃgû tsî ǃnūǃnâxasiba ge ǁgau. (Luk. 9:46; 22:24-27) ǁÎb ge ǂgomǃgâsiba ge ūhâ i apostelgu ǀguitsē nî ǃnūǃnâxasa. Sadu tsîna ǀgui xū-e ǂguiǃnāde dīsā hâ? ǁNās ǀkha du ge ra ǃgôaǃgâ ǃgamǃgamsenxa tsî ǃnūǃnâxa Gaoba du ūhâsa.

14. Mati da ǃnūǃnâxasiba nî omkhâi?

¹⁴ Mati da Jehovaba nî ǁgae? Jehovab khami da ga ǂâi tsî tanisen, o da ge Jesub ǂâiǀgauba nî ǁkhāǁkhāsen. (1Kor. 2:16) Tae-e nî hui da î da Xristub khami ǂâi? ǀGui ǂhâǂhâsa ǀgaub Jesub ǂâiǀgauba da ǁkhāǁkhāsen ǁkhāb ge ǁîb ûib xa hâ ǃnaeǃkhaide Elobmîs ǃnâ khomaisa. Tsî da ge ǁaeba ū tsî nî ǂâiǃgâ, Jesub ge tae-e dīs tsî tae-i ǃaroma ǁnā xū-e a dīsa. Jehovaba da ge nî ǂgan îb hui da î da Jesub khami ǃgamǃgamsenxa tsî ǃnūǃnâxa. Jesub ǂâiǀgauba da ga ǁgae, o da ge Jehovaba ǁgae hō tsî sada tsî naun ǀkha nî ǃnūǃnâxa.—Mat. 18:26-30, 35.

JEHOVAB GE ǃGAMǃGAMSENXANA RA ǃGAOǃGÂ

15. Aiǁgaude mā re ǁgau ra de Jehovab ǃgamǃgamsenxana ra ǀgapiǃgôa ǀgauba?

¹⁵ Khomai re Psalmdi 138:6 sa. ǂÂi re Jehovab ǃhūbaib hoab ǃnâ a ǀgapib ge ǃgamǃgamsenxa khoena ra ǀgapiǃgôa. ǂGui kurigan ge ǀnî khoena gere ǃgôaǁnâ-e. Xaweb ge Jehovaba ǁîna ge ǃgaoǃgâ. ǀNîna da ge ǃgâise ǂan tama xaweb ge Jehovaba ǁîn ǀonde Elobmîs ǃnâ ge xoamâi kai. Aiǁgause, Deboras ge 125 kuriga Isaki tsî Jakob tsîkha di omaris ǃnâ ge ǃgā-i. ǂGui xūna da nē ǂgomǂgomsa taras xa a ǀū xaweb ge Jehovaba ge īǁkhā kai îb Moseba ǁîs xa xoa. (Gen. 24:59; 35:8) ǂGui kurigu khaoǃgâb ge Jehovaba, ǂkham gū ǃui-aob Davida ge ǁhûi îb Israels gao-ao kai. (2Sam. 22:1, 36) Jesub ge ǃnae-e tsēs aib ge Eloba, ǀhomǃgāga gū ǃui-aoga ǃoa ge sî, î gu sī gū ǃui-aoga mîba Mesiab go Betlehems ǃnâ ǃnaesa. (Luk. 2:8-11) Josefi tsî Marias tsîn ge Jesuba tempeli tawa sī ū, ob ge Jehovaba Simeonni tsî Anna hâra aiǂhanuba ge mā îra ǁîb ǀGôaba mû. (Luk. 2:25-30, 36-38) Amase, ‘ǃKhūb ge a ǀgapi, xaweb ge ǃgamǃgamsenxana ra mû.’

16. Jesuba mati ǁîb ǁGûb khoena ra hâ-ū ǀgauba ge ǁgae?

¹⁶ Jesub ge ǁîb ǁGûba ge ǁgae. ǁÎb dadasab khamib ge Jesuba ǃgôaǁnâ-e gere khoena ge ǀgapiǃgôa. ǁÎb ge “kai ǁkhāǁkhāsen-e ūhâ tama ǁnaetisa” khoena Elob Gaosib xa ge ǁkhāǁkhā. (ǃNǃkh. 4:13; Mat. 11:25) Jesub ge ǀae hâna ǀnam-i tsî ǃgôasib ǃnâ ge ǂgauǂgau. (Luk. 5:13) Jesub ge ǁōb nîs aiǃâ ǁîb apostelgu ǂaide ge ǁā, nē sîsen-i ge ǃgān xa ǀgui gere dī-e. (Jhn. 13:5) ǀHomǃgābab nîs aiǃâb ge Jesuba ǁîb saosaben, sida ǃkhōǂgā hâse ǂhâǂhâsa sîsen-e ge mā î da khoena hui în ǀamo ûiba hō.—Mat. 28:19, 20.

17. Mati da nauna ǀnammi tsî ǃgôasib tsîna ǁgau ǁkhā? (Ai-īsiba mū re.)

¹⁷ Mati da Jehovaba ǁgae ǁkhā? ǀNammi tsî ǃgôasib tsîna da ge khoena ra ǁgau, mâpa xu ǀguin ga hā xawe da ga ǁîna aoǁnâbao. Aiǁgause, mûsenan ra ǀgaub tsî ūn hâ skoli ǂans tsîna. ǀHaohâb ǃnâ da ga aiǂhanuga ūhâ tamas ka io ǂansa sida ǃgâsan xa ūhâ xawe da ge ǁîna ǀnammi tsî ǃgôasib tsîn ǀkha nî hâ-ū. (Fil. 2:3) Jehovab ge ra ǂkhî nē ǀgaugu tsî ǀnî hâ ǀgaugu ǃnâ da ga ǂgurose ǃgôasiba ǁgaugu o.—Rom. 12:10.

18. Tae-i ǃaroma da Jehovab ǃgamǃgamsenxasiba ra ǁgae ǂgao?

¹⁸ ǃGarise dītsâ tsî da ga sida ǀnamxaǃnâ ǁGûb ǃgamǃgamsenxasiba ǁgae, on ge khoena harase sida ǀkha nî ǃhoa. Sada tsîn ge khoena ǀnammi tsî ǃgôasiba nî ǁgau Jehovab khami. ǂÂis ǃnâ ūhâ dī ǁkhā da an hoana dī tsî da ga sida ǃgamǃgamsenxa Elob khami io da ge ǁîb aiǃâ nî ǀō-aisa.—Jes. 43:4.