Jehovab ge hui tsi ǁkhā ǂkhabuǂâits gao

1-2. Apostel Pauluba ǀnî ǁaegu ai mati gere tsâ tsî mâǀgaugu ǃnâ i ǁîb mâsiba sida dib ǀkha a ǀgui? (Romeǁîn 7:​21-24)

APOSTEL Paulub xa da ga ǂâio da ge ra ǂâi-oa, matib ge ǂgui ǃhūgu ǃnā aoǁnâ, Elobmîs ǂkhanide xoa tsî ǃgâi ǁgâuǃnâ-ao isa. ǁÎb ge ǁkhoaǂgaoxa tsî ge ǂgomǂgomsa khoe-i. Xaweb ge ǀnî ǁaegu ai tsûaǂgao, ǂkhabuǂâi tamas ka io gere ǂâiǂhansen. Paulub ge sida nētsē ra hōǃâ ǃgomsin tsîna gere hōǃâ.

² Khomai re Romeǁîn 7:​21-24 sa. Romeǁîna ǃoab ge xoa sîǂkhanis ǃnâb ge Pauluba tsâsigu xa ra ǃhoa. ǂGui da ge Paulub gere hōǃâ ǃgomsiga ra hōǃâ. Paulub ge ǂgomǂgomsa Xristeǁîb Eloba ge ǂgaoba xū gere ǁnâuǀnama. Xawe ǀoasaoǃnâ kurusab ge ūhâ i amagab ge ge ǃgombahe-i hoaǁae Eloba ra ǂkhîǂkhî xū-e dīsa. Paulub ge Xristeǁî kaib nîs aiǃâb gere dī xūn xab ge ǂâio gere ǀhapitsâsen. Tsî ǀnî ǁaegu aib ge ǁîb ûib ǃnâ ge hâ-i ǃgomsin xa gere ǂkhabuǂâi kaihe.

3. Tae-e da nē ǁkhāǁkhāǃâs ǃnâ nî ǃhoaǃgao? (Mû re “ǁguiǃāhe ra mîs” ti hâ ǃâba.)

³ Paulub ge ǀnî ǁaegu ai gere tsûaǂgao xaweb ge ǃgarise ge sîsen îb tā ǁnā xūn xa ǂâiǀgara.a Nē ǁkhāǁkhāǃâs ǃnâ da ge saora dîde nî ǃhoaǃgao: Pauluba tae-i ǃaroma ǀnî ǁaegu ai gere tsûaǂgao? Matib ge nē tsâsiga sîsenǂam? Tae-e da dī ǁkhā tsûaǂgao da gao?

PAULUB GE ǀNÎ ǁAEGU AI GERE TSÛAǂGAO

4. Pauluba tae-i ǃaroma ǁgai ǂâide ge ūhâ i?

⁴ Paulub ge Xristeǁî kaib nîs aiǃâ ǁgai xūna gere dī. Paulub, Saulub ase ge ǂansa îb ge ēgab ge ǃhausen xūna ge dī. Aiǁgause ǁîb ge ǂgomǂgomsa aob Stefanub ge ǃgamhe o gere mûǂam. Saulub ge ge ǂâi hâ-i ǂhanu xū-eb ra dī ti. (ǃNǃkh. 7:58; 8:1) ǁÎb ge ǂgui Xristeǁîna saoǃgon tsî ǁgai xūna gere dī.—ǃNǃkh. 8:3; 26:​9-11.

5. Xristeǁî kaib nîs aiǃâb gere dī xūn xab ge Pauluba mati gere tsâ?

⁵ Xristeǁî kaib ges khaoǃgâb ge Pauluba ǃkharu ge ǁaeb ǃnâb ge dī xūn xa gere ǀhapitsâsen. Xristeǁînab gere mâǃoa amaga gu ge ǁnā tsâsiga kurigu ra ī khami ǁîba gere ǂhani. Aiǁgauseb ge 55ǁî kuri Korinteǁîna ǃoa sîǂkhanisa xoa ob ge ge mî: ‘Tita ge . . . . apostelse ǂgaihesa anu tama hâ, Elob di ǀhaohâba ta gere ǃgôaǃgon amaga.’ (1Kor. 15:9) Efeseǁîna ǃoab ge koro kuriga ǃkharu tsî xoa sîǂkhanis ǃnâb ge ‘tita Elob di khoen hoan xa ǂkham ta ge nē ǀkhoma ge māhe’ ti ge mî. (Efe. 3:8) Paulub ge Timoteub tsîna ge mîba, ‘tita ǁîb di ǀonsa ǂkhabase ǂgā-am, ǃgôaǃgon tsî gere ǁîba ǃkhāǃkhā ta.’ (1Tim. 1:13) Paulub ge ǀhaohâga sī gere sari îb ǃgâsana ǂkhâǃnâ. ǁNās ge ǁîba kaise ge ǃgomba i, ǃgôaǃgon tamas ka iob ge ǁgaise a hâ-ū khoen omdeb gere sari amaga.

6. Mâ xū-i ǃaromas tsînab ge Pauluba gere ǂâiǂhansen? (ǀGamirosa mû re.)

⁶ Paulub ge tsûba gere hōǃâ kaibi ǃgomsiba ge ūhâ i. ǁÎb ge ge mî nēb ge ‘tsûsa sorosi ǃgomsiba.’ (2Kor. 12:7) ǁÎb ge ge mî tama hâ i tae-i nē ǃgomsiba ra ǃaromasa, īǁkhāsib ga hâ ob ge ǀaeb tamas ka io ǀnî hâ ǃgomsiba ge ūhâ i ǁîba gere ǂâiǂhansen kaiba.b

7. Tae-i ǃaroma i ge hoaǁae Pauluba ǃgomba i ǂhanu xūna dīsa? (Romeǁîn. 7:​18, 19)

⁷ ǁÎb ǀoasaoǃnâ kurus. Paulub ge dīsāb ge o gere ǂkhabuǂâi. ǁÎb ge dītsâ tsî ǁîb ǀgauga gere ǀkharaǀkhara. (Khomai re Romeǁîn 7:​18, 19 sa.) Xaweb ge ge mî ǀnî ǁaegu aib ge dī ǂgaob ra ǃgâi xū-e ge dī ǁoa isa. Tsî nau ǁaegu ai dīb tide xū-e gere dī. Paulub tsîn ge ge mûǂan dītsâb gere sa îb ta ǁgai ǁnaedigu ǃnâ māǁnâsen xawe ǂhanu xūna dī. (1Kor. 9:27) Xaweb ge noxopa aiǃgû tsî gere dīsā. Mûnan-ai re matikōseb ge Pauluba gere ǂkhabuǂâisa, ǃgarise dītsâ tsîb ge ǁnāxu xūnab ge mî tamas ka io gere dīo.

TAE-E PAULUBA GE HUI?

8. Mâ xūna Pauluba ge hui îb ǁîb ǀgauga ǃgâiǃgâi?

⁸ Paulub ge ge ǂanǃgâ matib Elob ǃanu gagaba Xristeǁî-e a hui ǁkhāsa, î-i ǁgai turaga xu tsî ǁî-i ǀgauga ǃgâiǃgâi. Nēsa da ge ǁîb ǂkhanide da ga khomai o ra mû. (Rom. 8:13; Gal. 5:​16, 17) Paulub ge ge ǃgāsa kai Xristeǁîn mâ turagu tsî ǀgauga xu nî ǂgōsensa Jehovaban ga ǂkhîǂkhî ǂgao o. (Gal. 5:​19-21, 26) Nēs ge ra ǁgau Paulub gere ǂâiǃgâsa matib ǀkharaǀkharana nî dīsa. ǁÎb ge īǁkhāsib ga hâ o, xoade gere ôaǃnâ, îb ǀapemāde mû hui bi ǁkhāte matib ǀkharaǀkharana dī ǁkhāsa. ǂGomǃgâ ǁkhā da ge a Paulub ge Xristeǁîna mā ǀapemādi, Eloba a ǂkhîǂkhî ǁkhādi ǂûdeb ge ǁîba a sîsenūsa.

9-10. Tae-e Pauluba ge hui ǂkhabuǂâib gereo? (Efeseǁîn 1:7) (Ai-īsiba mû re.)

⁹ Paulub gere ǂkhabuǂâi xawen ge ǀnî xūna ǁîba gere hui îb ǃgâiaǂgao. Aiǁgause ǁîb ge kaise gere ǃgâiaǂgao ǃnūse hâ ǀhaohâgu xab ge ǃgâi xūna gere ǁnâuo. (2Kor. 7:​6, 7) ǁÎb ǃgâsan ǀkhab ūhâ ǀhōsagusis tsîn ge ǁîba gere ǃgâiaǂgao kai. (2Tim. 1:4) Paulub ge Jehovab ǀkhab ūhâ ǀgū ǀhōsagusis tsî ǁîb xab gere ūǃoahe amagas tsîna gere ǃgâiaǂgao. (2Tim. 1:3) Paulub ge Romes ǃkhōsis ǃnâ hâ-i ob ge ǃgâsana gere ǂkhâǃnâ în ǃKhub ǃnâ ǃgâiaǂgao. (Fil. 4:4) Paulub mîde da ga khomai, o da ge ra mûǂan ǁîb ge hoaǁae ǁîb ǃgomsin tsî dīsādi xa ǂâi tama hâ-isa. ǁÎb ge ǂkhabuǂâi kaibi ra xūn xab gere ǂâi tsoatsoa, o ǃhaese ǁîba ǃgâiaǂgaoba ra mā xūn xa gere ǂâi tsoatsoa.

¹⁰ ǀNî xū-i Pauluba ge ǃgâiaǂgaoba gere mā i ge xoremariba. ǁÎb ge gere ǂâihō Jehovab ǁîba a ǀnam tsî ǁîb ǃaromas tsîna xoremariba a māsa. (Gal. 2:20; khomai re Efeseǁîn 1:7 sa.) ǁNās ǀkhāb ge ǂgomǃgâsiba ge ūhâ i, Jesub ǁguibas ǃaromab Jehovaba ǁîb ǁorena nî ǀûbasa. (Rom. 7:​24, 25) Nēn hoan ge Pauluba ge hui îb aiǃgû tsî ǂkhîb ǀkha Jehovaba ǃoaba ǀgara.—Heb. 9:​12-14.

11. Paulub aiǁgausa tae-i ǃaroma ra ǂkhâǃnâ da?

¹¹ Paulub khami da ge ǀnîsi ra tsâ ǃgarise da nî sîsensa, î da tā Jehovaba nî ǂkhîoǃnâ kai xū-e mî tsî dī. Jehovaba da hoaǁae a ǃgâiaǂgao kai ǁoa amaga da ge ǀnî ǁaegu ai ǂkhabuǂâi ǁkhā. ǃGâsas Elisasc ge ra ǁguiǃā matis ra tsâsa: “Paulub aiǁgaus xa ǂâis ge tita ra ǂkhâǃnâ. ǃGâise ta ge ra tsâ ǂansa Paulub tsîn ge ǀkharaǀkharana dīsa tita ra dīs ǁkhās khami. Nēs tsîn ge ra hōhōǃnâte Jehovab ǁîb khoen taena ra ǃkharuǃnâsa a ǂansa.” ǂKhabuǂâi da ga xawe da tae-e dī ǁkhā î da Jehovaba ǂkhîǂkhî tsî ǃgâiaǂgaoba hō?

TAE-E A ǂKHÂǃNÂ DA ǁKHĀ?

12. Tae-e da hoaǁae nî dī î da ǃgâiaǂgao?

¹² Jehovaba ǃoa ra ǀgū kai da xūna da ge nî dī. Nēs xa ǂâi re ǃgâi ǂûna ǂû, sorosise ǃâisen tsî da ga ǂâusase ǁom, o da ge ǃgâise ra tsâ. ǁKhā ǀgaub ǃnâ da ge Elobmîsa da ga tsēs hoasa khomai, aoǁnâ, ǀhaodi ǃgao aiǂhomîsen, ǀhaode hâǃnâ tsî a ǃereamo nî ǂkhâǃnâhe. Nē xūna da ga dī ǀgara o da ge nî ǂkhâǃnâhe, î da tā ǂkhabuǂâi kai da ra xūn xa ǂâi xawe ǂkhâǃnâ da ra xūn xa. Nēs tsîn ge nî ǃgâiaǂgao kai da.—Rom. 12:​11, 12.

13-14. Gagasi xūna dīsa mati ǀnî ǃgâsana ge hui?

¹³ ǃGâsab Johaneb aiǁgausa ǃgaoǃgâ re, ǁîb ge 39 kurixab a hîna kankersa ge hōǃnâhe. ǁÎb ge ǃao tsî gere ǂâiǂhânsen. ǂKhamsis ǃnâb ge ǀaesen amagab ge nēs ge īsa ge ǂgom tama hâ-i. ǁÎb ǀgôarob ge ge 3 kurixa-i. Tae-e Johaneba ge hui îb ǃgâi xun xa ǂâi? Johaneb ge ra mî: “Tsau ta gere xawe ta ge hoaǁae gere dītsâ, î da omaris ase ǀhaode hâǃnâ, aoǁnâ sîsen-e dī tsî mâ wekheb hoaba omaris ǃoabasa ūhâ. ǃGom i ge ī xawe da ge nē xūna gere dī. ǃGom mâsib ǃnâ da ge ǂgurose ra ǂkhabuǂâi. Xawe ta ge ge ǁkhāǁkhāsen, Jehovab ǂhâ da hâ ǀgaiba ra mā da tsî kaise a ǀnam dasa. Jehovab ge titab ge hui khami sats tsîna a hui ǁkhā.”

¹⁴ ǃKharu go ǁkhāǁkhāǃâs ǃnâ da go ǃhoaǃgao ǃgâsas Elisas ge ra mî: “ǀHaode hâǃnâ tsî ta ga Elobmîsa aitsama ôaǃnâ, o ta ge ra hōhōǃnâ-e ǁîb tita ra ǁnâu tsî kaise a ǀnamsa. Nēs ge kai ǃgâiaǂgaoba ra māte.” ǃGâsab Nolanni tsî ǁîb taras Dianas, Akrikab ǃnâ ǃnarimâra ǃoaba-aob ase ra ǃoabab ge ra ǁguiǃā tae-i ǁîra ra huisa: “Sîm ge ǀgore, Elobmîsa ôaǃnâ, ǀhaode hâǃnâ tsî aoǁnâ sîsenni tsîna ra dī ǂkhabuǂâim gao. Nēs ǃnâ-ūb ge Jehovaba hoaǁae ǃgâiaǂgaob tsâsiba sîma ra mā. ǂKhabuǂâim ga om ge ra ǂâi-oa matib Jehovaba sîma hui tsî nî mādawa-amsa. Nē xūna b mati nî dīsam ge a ǀu xawem ge a ǂan dīb nîsa.”

15. Tae-i tsîna da dī ǁkhā ǂkhabuǂâi da ga ǁaeb ai? Aiǁgau-e mā re.

¹⁵ Aiǃgû tsî da ga ǂkhabuǂâis tsâsiga hōǃâ, on ge ǀnî xūna hui da ǁkhā î da nēsa ǃkhamǃoa. Aiǁgause saora mâsib xa ǂâi re, ǀnîsi du ge ǁâtsûba ūhâ. Tsēs hoasa ǃgûs ǃnâ-ū du ge ǀnîsi nē tsûba a mâ kai ǁkhā. Xaweb ga tsûba mâ tama io du ge ǁnās xa ǃnāsa-e nî dī. ǀNîsi du ge ǂgurose nî ǂanǂui ǂgao tae-i nē tsûba ra ǃaromasa, î du ǁnāpaxu ǀaeǃkhō-aob ǀkha sī ǃhoa. ǁKhā ǀgaub ai da ge Elobmîs ai ǃgaoǃgaosa ǂkhanin ǃnâ ôaǃnâsa a dī ǁkhā, î da ǁnâuǃā tae-i ǃaroma da nēti ra tsâsa tsî tae-i a hui da ǁkhāsa î da ǃgâise tsâ. ǀNîsis tsîna da ge ǃgâsa-i ǀkhā a ǃhoa ǁkhā, ǃgâi ǀapemāsa sida mâsib xa mā da ǁkhā-e. ǀNî hâ xun tsîn ge hâ hui da ǁkhā ana.

16. ǂÂiǂhansen da ga ǁaeb ai da tae-e a dī ǁkhā? (Psalmdi 139:​1-4, 23, 24)

¹⁶ Jehovaba ǃoa ǀgore tsî da ge ǂgan ǁkhā îb hui da ǁnâuǃāsa tae-e da ǂhâhâsa. Gao-aob Davidi ge ge ǂanǃgâ Jehovab ǁîba ǃgâise a ǂansa. ǁNās ǀkhab ge Davida Jehovaba ge ǂan îb hui-e ǁnâuǃāsa tae-i ǃaromab gere ǂâiǂhansensa. (Khomai re Psalmdi 139:​1-4, 23, 24 sa.) Sada tsîn ge ǁkhā ǀgaub ǃnâ Jehovaba a ǂan ǁkhā, îb hui da ǁnâuǃāsa tae-i ǃaroma da ra ǂâiǂhansens tsî tae-i hui da ǁkhāsa î da nē tsâsiga hōǃâ ǀû. Saora dîde da ge a ǀnîsi dîsen ǁkhā: Aiǁgause, ‘tae-e amabes ǃnâ ra ǂâiǂhansen kaite? Hoaǁae ra ǂâiǂhansen kai te xū-e hâ? Tsûaǂgao kai te ra xūn xa ta ga ǂâi tsoatsoa, o ta ra dītsâ ti ǂâiǀgauba dawasa?

17. Mâ xoaǂamde da a ôaǃnâ ǁkhā î-i hui da omkhâi ra xūn xa ǂâisa? (Ai-īsiba mû re.)

¹⁷ Sa mâsib ǃnâ hui tsi ǁkhā xoaǂamsa ôaǃnâ. ǀNî ǁaegu ai i ge nî hui da ǀgui ǀgaub Jehovab dība da ga ôaǃnâ o, nēs nî ǂkhâǃnâ da xui-ao. Aiǁgause apostel Paulub ge ǀnamhe tsîb ra ǃgôaǃgâhe khami gere tsâ Jehovab ǀûbaǀnamxasib xab gere ǂâiǃgâo. Sada tsîn ge Paulub aiǁgausa ǁgae tsî ǂhâ da hâ xu-i xa ǁkhāǁkhāsen ǁkhā. Sida ǂkhanin Elobmîs ai ǃgaoǃgaohe hân ǃnâ da ge ôaǃnâsa a dī ǁkhā Elob ǀgaugu xa. Aiǁgause, ǁîb ǀkhomxaǂgaosib, ǀûbaǀnamxasib tsî ǂgomǂgomsa ǀnammi xas tsîna. ǀNîsi da ge hui da ǁkhā khomaiǃâde xoamâi ǁkhā. Supusets a hō ǁkhā ǃkhai-i aits ge nē xūna a ǂaomâi ǁkhā. Tsî ǂâiǂhansens tsâsigats ga hōǃâ, o ǁkhawa nē khomaiǃâde khomai ǁkhā.—Fil. 4:8.

18. ǀNî Xristeǁîna mâ xoaǂamde ge ôaǃnâ?

¹⁸ ǃKharugo ǁkhāǁkhāǃâs ǃnâ da go ǃhoaǃgao ǃgâsas Elisas ge ôaǃnâsa Jobi xa ge dī. ǁÎs ge ra mî: “Jobi gere hōǃâ ǃgomsina da ge tita tsîna ra hōǃâ. ǁÎb ǃgomsigu ge ge ǀam tama hâ i. Xaweb ge Joba ǂkhabuǂâib gere ǁaeb ai Jehovaba ǃoa gere kō ǁîb ǃgomsin mâpa xu gere hāsab ge ǀū-i xawe.” (Job. 42:​1-6) ǃKharugo ǁkhāǁkhāǃâs ǃnâ da go ǃhoaǃgao ǃgâsas Dianas ge ra mî: “Tita tsî ti aob tsîm ge Kom nader aan Jehovah ti hâ ǂkhanisa ǀguiba ra ǃhoaǃgao. Nē ǂkhanis ǃnâm ge Jehovab ǀgauga ra ôaǃnâ tsî kaise ra ǃgôaǃgâ Jehovab sîma ra huisa îm ǁîb khami ī. Sîm dīsādi xam ga ǂkhabuǂâi om ge ra hōhōǃnâsen, Jehovab sîma ǁkhāǁkhā tsî ra huisa îm ǃgâi khoe kai. Nēs ge ǁîb ǀkham ūhâ ǀhōsagusisa ra ǀgaiǀgai.”—Jes. 64:8.

ǂGOMǃGÂ ǁKHĀ DA GE A JEHOVAB HUI TSÎ NÎ MĀDAWA-AMDASA

19. ǀNî ǁaegu ai da mati nî tsâ xawe da mâ ǂgomǃgâsiba ūhâ?

¹⁹ Nē ǁkhāǁkhāǃâs ǃnâ go hâ-i ǀapemādi hoade da ga sîsenu xawe da ge noxopa ǀnî ǁaegu ai tsûaǂgao tamas ka io ǂâiǂhansen ǁkhā. Xawe Jehovab huib ǀkhā da ge ǂâiǂhansen kai da ra xūna ǂâi ǀû tsî ǃnomsase a tsâ ǁkhā. ǂGomǃgâ ǁkhā da ge a ǃnāsa ǁaeba Jehovab ǀkha da ǀgū ǀhōsagusisa ūhâ amaga da ǃgâiaǂgao tsî ǁkhoaxa ûiba nî ūhâsa. ǂÂis ǃnâs tsîna da ge nî ūhâ Jehovab ge ǁîba da ra dība xūn ǀkha a ǂkhîǂâixa.

20. Tae-e dīsats ra mîǁgui?

²⁰ Hā re î da mîǁgui î-i sida ǃgomsin, ǃkharu ge ǁaeb ǃnâ da ge dī xun tamas ka io sida dīsāde tā ǁkhae da ǁkhoaxa ûiba ūhâsa. ǂÂiǂhânsen da ga ǁaeb aib ge Jehovaba a hui da ǁkhā î da ǃnomsase tsâ. (Psa. 143:10) ǀAsa ǃhūbaiba ǃoa da ge hoa da a mûǂui ǁkhā ǂgui xūn nî ǃgâiaǂgao kai da ba. ǁNā ǁaeb ai i ge xū-e ǂâiǂhansen kai da tide. Tsēs hoasa da ge khâimâ tsî sida ǀnamxaǃnâ ǁGûb Jehovaba nî ǃoaba.