Kema se tlenijki techtlasojsoljuilia

“Kema techpanok nopa, tlauel timoyolkokojkej. Nopa miak atl tlen uetski uan sokitl tlen uelonki tlen se tepetl kisojsolok nochi tlen tijpixtoyaj” (Andrew, Sierra Leona).

“Kema ya panotoya nopa huracán uan titlakuepilijkej tochaj, tikitatoj ayokmo tleno eltoya. Noichpoka motlankuaketski uan pejki choka” (David, islas Vírgenes).

¿NOJKIA mitspanotok ni tlaouijkayotl? Tlaj kena, uajka uelis tijkuamachilia kenijkatsa kiyolmatij katli tlaijiyouiaj pampa kinpanok se tlaouijkayotl: motekipachouaj, mokuesouaj, amo kimatij tlake kichiuasej uan amo uelij kochij pampa kitemikij tlen amo kuali. Miakej maseualmej nelia tlauel mokuesouaj uan motekipachouaj, yeka ayokmo kinekij itstosej.

Tlaj tijpolok nochi tlen tijpixtoya pampa se tlenijki mitstlasojsoljuilik, uelis nojkia tijmati ayokmo tikijiyouis. Maske uelis timoiljuia san tlapik tiitstok, Biblia kiijtoua amo san tlapik tiitstok pampa kena uelis tiitstos ika pakilistli uan onka miak tlamantli tlen kichiua ma timotemachikaj teipa kuali tiitstosej.

TLEN BIBLIA TLAMACHTIA TECHPALEUIA MA TIJNEKIKAJ TIITSTOSEJ

Eclesiastés 7:8 kiijtoua: “Más yejyektsi kema tijtlamiltis se [tlenijki] uan axkema tijpeualtis”. Tlaj mitstlasojsoljuilik se tlenijki uan sampa moneki tikitas kenijkatsa tiitstos, uelis timoiljuia san tlapik tijchiuas nopa. Maske kiampa timoiljuia, moneki tijchiuas kampeka uan tijpias moyolo, pampa teipa uelis sampa kuali tiitstos.

Biblia kiijtoua asis se tonali kema “ayok kema onkas chokistli, niyon tlaijiyouilistli” (Isaías 65:19). Nochi ni tlajtoli moaxitis kema toTeotsij iTlanauatijkayo kichiuas Tlaltipaktli ma eli se xochimili (Salmo 37:11, 29). Ayokmo kema se chikauak ajakatl o seyok tlamantli techtlasojsoljuilis. Nochi tlen techpanok uan tlen techyolkokoua ayokmo kema tikilnamikisej. ToTeotsij, katli kipia miak chikaualistli, kiijtoua: “Axaka moiljuis tlen nopa [...] Tlaltipaktli tlen eltoya” (Isaías 65:17).

Ximoiljui ipan ni tlamantli: toTeotsij, katli techchijchijki, kichijtok miak tlamantli tlen techpaleuis teipa kuali ma tiitstokaj uan ma tijselikaj tlen tijchiaj. Ya kineki ma tiitstokaj ika tlaseuilistli kema iTlanauatijkayo tekichijtos (Jeremías 29:11). ¿Uelis ni tlamantli techpaleuis ma tijnekikaj nojua tiitstosej? Sally, katli tikijtojkej ipan achtoui tlamachtili, kiijtoua: “Tlaj timoiljuis teipa kuali tiitstos kema toTeotsij iTlanauatijkayo tekichijtos, mitspaleuis ayokmo timosentlalijtos ipan tlen mitspanok uan tikijiyouis kuesoli tlen nama tijpia”.

¿Tlake sekinok tlamantli kichiuas toTeotsij iTlanauatijkayo? Tijnekiskiaj nojua xikita tlake kichiuas. Kiampa tikitas kena uelis tiitstos ika pakilistli maske mitspanok tlen amo kuali uan tijmatis teipa yon se tlenijki tetlasojsoljuilis. Uajka, tlen Biblia tetlajtolmaka mitspaleuis tikijiyouis nopa tlaouijkayotl tlen mitspanok.

Textos tlen uelis mitspaleuis

Kuali xikochi

“Tlauel kuali tlaj timosiajketsas se kentsi uan amo tlaj tlauel titekitis pampa san tlapik” (Eclesiastés 4:6).

Ixtlamatinij kiijtouaj kema se akajya kipano tlen amo kuali uan “amo uejkaua o amo kuali kochi, kichiua nojua tlauel amo kuali ma kiyolmati ika tlen kipanok, uan yeka amo ueli mosentlalia ipan sekinok tlamantli”. Yeka, tlauel tepaleuia kema kuali tikochij.

Xikijto tlen tijyolmati

“Se tlakatl tlen moyolkuesoua nelia tlaijiyouia, pero se kuali tlajtoli kimakas pakilistli ipan iyolo” (Proverbios 12:25).

Xikiljui se akajya katli ipan timotemachia, kej se tlen mochampoyouaj o se kuali mouampo. Inijuantij kuali mitstlakakilisej uan nojkia mitsyolchikauasej uan mitspaleuisej.a

Ximoiljui teipa kuali tiitstos

“Tijchiaj nopa yankuik iluikaktli uan Tlaltipaktli yankuik tlen toTeko techtenkauilijtok kampa nochi kichiuasej san tlen xitlauak” (2 Pedro 3:13).

a Tlaj se akajya tlauel motekipachoua miak tonali, uelis moneki kiitas se tepajtijketl.