Hebreos

11 Akin takuaujtamati kiyekmati ke mochiuas tein kichia, kiyekneltoka ke yekmelauj onkak tein amo moita. 2 Kemej akin nenkej ne uejkauj* takuaujtamatkej, Dios kinmatiltij* ke yolpaktoya iniuan.

3 Kemej titakuaujtamatij, tikitaj ke tein onkak ne iluikak uan nikan taltikpak moixtalij* porin Dios ijkon kijtoj, yejua ika Dios kikuik tein amo ueli tikitaj para kichijchiuas tein ueli tikitaj.

4 Kemej Abel takuaujtamatik, kimaktilij Dios se taman tein okachi kuali ke tein kitemakak Caín. Kemej takuaujtamatik, Dios kimatiltij ke katka yolmelauak porin kiyolpaktij tein kimaktilij. Uan porin takuaujtamatik, maski momikilij, kisentoka techmachtia.

5 Kemej Enoc takuaujtamatik, Dios kiuikak okseko para maj amo tajyouiani keman momikiliskia, yejua ika amo akin kiajsik. Uan achto ke Dios kiuikaskia okseko, kimatiltij ke kiyolpaktiaya. 6 Uan no, komo aksa* amo takuaujtamati amo keman uelis kiyolpaktis Dios, porin akin iuan motokia moneki kineltokas ke Dios yekmelauj nemi uan ke kintaxtauia akin semi kitemouaj kiueyichiuaskej.

7 Kemej Noé takuaujtamatik, satepan ke Dios kinejmachtij ke mochiuaskia tein ayamo moitaya, kimojkatokak Dios uan kichijchiuak se arca para kinmakixtis ichankauan. Kemej takuaujtamatik, kinextij ke akin ijkuak nemiaj kinnamikia maj kintatsakuiltikan uan Dios kiitak ke yolmelauak porin takuaujtamatik.

8 Kemej Abrahán takuaujtamatik, tatakamatik keman Dios kinotsak, uan yajki itech se tal tein Dios motenkaujka ke kimakaskia. Kisteuak maski amo kimatia kani yaya. 9 Kemej takuaujtamatik, nemik kemej analtekoj itech tal tein Dios motenkaujka kimakas. Nemik itech takenkalmej iuan Isaac uan Jacob, akin Dios no iniuan motenkauak ke kinmakaskia nejon tal. 10 Porin Abrahán kichiaya ueyi xolal tein kipia yekmelauj tatsineualonimej, tein Dios kinemilij keniuj kichijchiuas uan kichijchiuak.

11 Kemej Sara takuaujtamatik, uelik mokokoxkatalij maski katka semi nanajtsinya, porin kineltokak ke akin iuan motenkauak nochipa kichiua tein kijtoua.* 12 Yejua ika, itechkopa se takat akin moitaya ke amo ueliskiaok kinpias konemej,* yolkej miakej, tel miakej ijkon kemej sitalimej uan amo ueli se kinpoua ijkon kemej xal tein onkak ueyiatenoj.

13 Nochin yejuan kisentokakej takuaujtamatkej hasta keman momikilijkej, maski tein Dios motenkauak amo mochiuak keman yoltoyaj. Sayoj ke kemej yeskia kiuejkaitakej uan yolpakkej uan kijtojkej senteixtenoj ke katkaj analtekos uan sayoj tepalyetoyaj itech nejon tal. 14 Uan akin ijkon tajtouaj kiyeknextiaj ke mochikaujtokej kitemoskej kani nemiskej. 15 Maski ijkon, komo kisentokaskiaj tanemilijtoskiaj itech tal kampa kiskaj, kitemoskiaj keniuj ueliskiaj mokepaskej. 16 Sayoj ke, axkan mochikauaj kiajsiskej kampa okachi kuali nemiskej, tein poui ne iluikak. Yejua ika, Dios amo ininka mopinaujmati nion mopinaujmati maj kiluikan ke yejua ininDios, ta hasta kinchijchiuilij se ueyi xolal.

17 Kemej Abrahán takuaujtamatik, yaya kitemaktiti Isaac keman Dios kiyejyekoj, 18 maski kiluijka: “Mokoneuan ualaskej itechkopa Isaac”. Kemaj, takat akin ika pakilis kiselij tein Dios iuan motenkauak, kitemoj kitemaktis ikoneuj akin ipa setsin katka. 19 Sayoj ke yejua kineltokak ke Dios ueliskia kichiuas maj oksepa nemi* Isaac uan ijkon kiselij kemej yeskia momikilijkaya uan oksepa nemik. Nejin kinextij tein mochiuaskia satepan.

20 Kemej Isaac takuaujtamatik, no kintiochiuak Jacob uan Esaú uan kiniluij tein mochiuaskia satepan.

21 Kemej Jacob takuaujtamatik, keman yaya momikilitiya, motakitskilij itech itopil, kintiochiuak sejse ikoneuan José uan kiueyichiuak Dios.

22 Kemej José takuaujtamatik, keman yaya momikilitiya, kijtoj ke israelitas kisaskiaj Egipto uan tanauatij maj kiuikakan iomiyouan.*

23 Kemej itatuan Moisés takuaujtamatkej, kicholtijkej eyi metsti keman yolik porin kiitakej ke katka kuakualtsin uan amo kimouilijkej tekiuaj akin tanauatijka maj kimiktikan. 24 Kemej Moisés takuaujtamatik, keman katka takatya, amo kinekik maj kiixmatikan kemej iixuiuj* akin tekiuajtia Egipto. 25 Kinekik maj kitajyouiltikan iniuan israelitas, akin katkaj ixolal Dios, uan amo kinekik moyolpaktis ika tajtakol porin nejon sayoj panotikisa, 26 porin kiitaya ke tajyouis kemej itaijital Dios* okachi kipiaya ipatiuj ke nochi tein onkaya Egipto, porin kichiaya ika nochi iyolo maj kitatiochiuikan. 27 Kemej takuaujtamatik, kisteuak de Egipto uan amo kimouilij maj tekiuaj semi kualani, porin kisentokak taxikoj kemej yeskia kiitstoskia akin amo ueli moita. 28 Kemej takuaujtamatik, kichiuak iluit tein monotsa Pascua uan kiajtseluilij esti inajnakastan puertas, ijkon iángel Dios amo kinmiktiskia* inintayekankakoneuan.

29 Kemej israelitas takuaujtamatkej, kipanauijkej mar Rojo kemej yeskia nejnentoskiaj kampa tauaktok. Sayoj ke, keman akin kayomej Egipto no ijkon kinekiaj panoskej, moaeltsimijkej.

30 Kemej israelitas takuaujtamatkej, kimalakachojtinenkej chikome tonal tepamit tein kiyoualouaya Jericó uan xitinik. 31 Kemej siuaauilnenkej Rahab takuaujtamatik, amo mikik iniuan akin amo tatakamatkej, porin kuali kinselij akin tapijpiatoj.

32 ¿Uan toniok nikijtos? Porin amo nihorajtis ika namechnojnotsas Gedeón, Barac, Sansón, Jefté, David, Samuel uan okseki tanauatianij.* 33 Kemej takuaujtamatkej kintankej tekiuanij, kichiujkej maj mochiua tein kuali yetok, Dios iniuan motenkauak ke kintatiochiuiskia, kintentsakkej tekuanimej, 34 kiseuijkej ichikaualis tit,* momakixtijkej keman kinekiaj kinmiktiskej ika machete tein ojkan tenej,* keman kuetaujtoyaj mochikaujkej, amo moujkej keman monekia tateuiskej uan kichiujkej maj cholokan soldados akin kinteuisnekiaj. 35 Ininchankauan seki siuamej oksepa nenkej. Okseki itekitikauan Dios amo kinekkej kikauaskej Dios sayoj para maj amo kintajyouiltikanok, porin kimatiaj ke oksepa nemiskiaj uan okachi kuali yetoskiaj. 36 Kemaj, oksekin kinkejkelojkej uan kinuijuitekkej uan amo sayoj nejon, ta kinilpijkej* ika cadena uan kintsakkej. 37 Kintetenkej,* kitemojkej maj motajtakolmakakan, kintajkotekkej* ika sierra uan kinmiktijkej ika machete,* nentinemiaj nikan uan nepa ika inintaken tachijchiuj ika ikuetaxyo ichkat* uan chivo, amo kipiayaj tein ika moixpanoltiskej, tajyouijtinemiaj uan kintajyouiltiayaj, 38 uan akin ijkuak nemiaj amo kinnamikia maj iniuan yetokan. Yajtinenkej itech taluakyan, itech tepemej, tepekoyokmej uan uejueyi taltekochmej.

39 Uan maski Dios nochin kinmatiltij ke kiyolpaktiayaj porin takuaujtamatkej, amo kiitakej ke mochiuak tein motenkaujka, 40 porin Dios ipa kinemilijtoyaya techmakas tein okachi kuali, uan ijkon yejuan amo kinkixtiliskiaj tajtakol achto ke tejuan.