Tein sekin kineltokaj

Hinduismo

Akin kineltokaj Hinduismo kinemiliaj ke titajyouiaj porin tikchiujkej tein amo kuali. No kijtouaj ke achto ipa tinemiajya uan xa ijkuak tikchiujkej tein amo kuali. Yejuan kijtouaj ke amo tajyouiajok akin kinpanoua moksha. Nejon kijtosneki ke amo tajyouiskejok satepan ke miakpa yolkej. Yejua ika, kineltokaj ke amo tajyouiskejok komo amo motekipachouajok ika tein mochiua nikan taltikpak.

Islam

Akin kineltokaj Islam kinemiliaj ke titajyouiaj porin tikchiuaj tein amo kuali uan yejua ika techtatsakuiltiaj. No kinemiliaj ke ika kinyejyekouaj akin taneltokaj. Se takat akin motokaytia Sayyid Syeed, kiixyekana se nechikol tein moixmati kemej Sociedad Islámica de América del Norte. Yejua kijtoua ke keman titajyouiaj techelnamiktia ke nochipa moneki tiktasojkamatiliskej Dios nochi tein kuali tein techmaka, uan ke moneki tikinpaleuiskej akin kinpoloua.

Judaísmo

Judíos kinemiliaj ke titajyouiaj porin tikchiuaj seki taman. Okseki judíos kijtouaj ke satepan oksepa tinemiskej uan ke ijkuak kintaxtauiskej akin tajyouijkej maski amo kinnamikia. Uan no, seki judíos kinemiliaj ke oksepa tiyolij itech okse taman satepan ke timomikiliaj uan ijkuak amo tikpiajok tajtakol.

Budismo

Akin kineltokaj budismo kinemiliaj ke miakpa tiyolij. Kijtouaj ke amo titajyouiskejok komo amo tikchiuajok, tiknejnekijok nion tikmachiliajok tein amo kuali. No kijtouaj ke amo titajyouiskejok komo kuali titanemiliaj, tikchiuaj tein kuali uan amo tiknemiliaj tein amo kuali.

Confucionismo

Itech Diccionario de religiones comparadas, moijtoua ke akin kitojtokaj Confucio kinemiliaj ke titajyouiaj porin timopolouaj. Yejuan kineltokaj ke komo se kichiua tein kuali, amo semi se tajyouis. Sayoj ke no kineltokaj ke miakpa keman titajyouiaj kichiuaj seki espíritus akin okachi chikaujkej ke tejuan. Kinemiliaj ke moneki titajyouiskej porin ijkon ixyetokya.

Okseki taneltokalismej

Itech seki taneltokalismej tamachtiaj ke titajyouiaj porin technaualuiaj. Sekin kinemiliaj ke naualmej kichiuaj maj techpano tein kuali oso tein amo kuali. Yejuan kinemiliaj ke uelis kiixnamikiskej tein ika kinnaualuijkej komo kichiuaj seki taman. Yejua ika, keman kokolispeuaj, kiitatij akin tapajtia ika naualot uan ijkon amo semi kinijtakos tein ika kinnaualuijkej.

Akin kijtouaj ke kitojtokaj Cristo

Akin kijtouaj ke kitojtokaj Cristo kineltokaj ke titajyouiaj porin tajtakojkej yekinika takat uan yekinika siuat, ijkon kemej kijtoua amatajkuilol Génesis. Sayoj ke, miakej kinemiliaj okseki taman. Seki católicos kineltokaj ke komo motajyouiltiaj, Dios kitiochiuas inintaneltokalis oso kinmakixtis oksekin.