Septiembre

Sayoj ke ¿tikonitak ke Pedro tepitsin kipatak seki tajtolmej tein kijtojka Joel? (Hech. 2:16, 17.) Jiova kichiuak maj Pedro amo kijtouani tajtol “satepan”, ta maj kijtouani “ne takuitapan [oso itamian] tonalme”. Nikan Pedro ika tajtojtoya tonalmej achto ke kiixpoloskiaj Jerusalén uan templo. Ijkuak, Dios kintitaniliskia iespíritu “nochi tagayot”. Nejin kinextia ke panokej miak xiujmej hasta ke mochiuak tein kijtojka Joel. Satepan ke tokniuan itech yekinika siglo kiselijkej iespíritu Dios, semi kinpaleuij itech tanojnotsalis. Keman tatitanil Pablo kinijkuilouilij amat tokniuan akin nemiaj Colosas, kemej itech xiuit 61, uelik kijtoj ke kuali tanauatilmej moteixmatiltijkajya “tech nochi in senmanauak” (Col. 1:23). Itech nejin tonalmej, ika inepaleuil iyektikatsin espíritu Jiova okachi miakkan motanojnotsani, hasta itech “nochi senmanauak” (Hech. 13:47). w20.04 6, 7 § 15, 16

Jiova techtasojta tinochin, hasta itekitikauan akin mouejkatilijkej (Mat. 18:12-14). Dios kijtoj ke kintemoskia itekitikauan akin mouejkatilijkej uan kinpaleuiskia maj oksepa kuali mouikakan iuan. Kichiuaskia tein se ichkatajpixkej israelita kichiuaya keman kipolouaya se ichkatsin (Ezeq. 34:12-16). Yekinika, ichkatajpixkej kitemouaya iichkatsin, maski xa monekia miak tonalmej uan chikaualis. Ompa, keman kiajsia kiuikaya iniuan okseki ichkamej. Uan no, komo ichkatsin mokokojka oso mayanaya, ika netasojtalis kipaleuiaya, kipajtiaya, kinapalojtiyaya uan kitamakaya. Tayekananij, akin kemej yeskia ichkatajpianij itech nechikol, no moneki kichiuaskej nochi nejin keman kinpaleuiskej akin mouejkatilijkej (1 Ped. 5:2, 3). Tayekananij kintemouaj, kinpaleuiaj maj mokepakan itech nechikol uan kinnextiliaj ke kintasojtaj keman kinpaleuiaj maj oksepa kuali mouikakan iuan Jiova. w20.06 20 § 10

¿Kijtoj Jesús ke ueliskiaya “kajokuiske in tatokme” porin kichiaya maj miakej mochiuanij itatojtokakauan? Amo. Biblia kijtojkaya ke amo miakej iuan takuaujtamatiskiaj (Juan 12:37, 38). Uan Jesús uelia kimatia tein kinemiliayaj taltikpakneminij, yejua ika kimatia ke miakej amo kinekiskiaj kikakiskej (Mat. 9:4). Maski ijkon, kitemoj nochin kinnojnotsas, sayoj ke okachi kinpaleuij akin iuan takuaujtamatiaj akin amo miakej katkaj. Kemej tejuan amo ueli tikmatij tein kinemiliaj taltikpakneminij, maj amo tikijtokan ke se taltikpaknenkej oso nochin akin nemij kampa titanojnotsaj amo keman mochiuaskej itatojtokakauan Jesús. Okachi kuali, maj tikinitakan kemej akin uelis mochiuaskej itatojtokakauan Jesús. Maj tikelnamikikan tein Jesús kiniluij itatojtokakauan: “Takilome [...] peuak ya kosaui ya. Uan nojon kijtosneki ke ma amo uejkauas ok para kajokuiske in tatokme”. Taltikpakneminij uelis mopataskej uan mochiuaskej itatojtokakauan Jesús. Jiova kinpatiuita (Ageo 2:7). Komo tikinitaj kemej Jiova uan Jesús kinitaj, timochikauaskej tikinajsikamatiskej uan tikmatiskej toni kinyolnotsa. Uan tikinitaskej kemej akin uelis mochiuaskej itatojtokakauan Jesús. w20.04 13 § 18, 19

Biblia senkis kijtoua ke komo tiknekij tikyolpaktiskej Jiova moneki tiktasojtaskej Jesús. Se taman tein techpaleuis maj timochiuakan tiitasojikniuan Jesús yejua maj tikixmatikan. Yejua ika, moneki tikixtajtoltiskej amatajkuilolmej Mateo, Marcos, Lucas uan Juan, tein ika tajtouaj inemilis Jesús. Keman itech titanemiliskej uan tikitaskej ke Jesús kiniknelij taltikpakneminij, tiktasojtaskej uan tikpoujkaitaskej oso tikmouiskaitaskej. Kemej neskayot, maski katka ininTeko imomachtijkauan, amo kinitak kemej itakeualuan, ta kemej itasojikniuan uan kintapouij tein kinemiliaya uan kimachiliaya. No motayokoltiaya keman imomachtijkauan tayokoxtoyaj uan iniuan chokaya (Juan 11:32-36). Hasta akin kitauelitayaj kiitakej ke kuali mouikaya iniuan akin kikakiaj (Mat. 11:19). Komo tikinitaj oksekin kemej Jesús kinitak imomachtijkauan, okachi kuali timouikaskej iniuan, okachi tiyolpakiskej uan okachi tiktasojtaskej uan tikpoujkaitaskej Cristo. w20.04 22 § 9, 10

Itech xiuit 1870, tekiuajyot tein moajsia Gran Bretaña taixyekanaya okachi miakkan ke okseki altepemej uan kinpiaya miakej tateuianij. Daniel ika tajtoj se tsikitsin kuaomit tein kintanik okseki eyi kuaomimej. Kuaomit tein tsikitsin kiixnextiaya Gran Bretaña uan okseki eyi kuaomimej kinixnextiayaj Francia, España uan Países Bajos (Dan. 7:7, 8). Gran Bretaña katka tekiuaj akin taixyekana sur hasta xiuit 1917. Ijkuak, Estados Unidos de América mochiujka altepet kampa okachi kipiayaj tomin uan akin ompa tekiuajtiaj peuak tekitij iniuan akin tekiuajtiaj Gran Bretaña. Itech Yekinika Ueyi Neteuilis, akin taixyekanayaj Estados Unidos uan Gran Bretaña sentateuijkej. Ijkon peuak sentekitij uan mochiujkej altepemej tein okachi chikaujkej itech nochi taltikpak. Ijkon kemej kijtoj Daniel, tekiuaj akin taixyekana sur kinsentilij “miakej tateuianij akin semi chikaujkej”. Itech itamian tonalmej, tekiuaj akin taixyekana sur yejua Gran Bretaña uan Estados Unidos. w20.05 4 § 7, 8

Onkak at porin Taltikpak amo semi uejka yetok iuan Tonaltsin nion semi inakastan. Komo semi inakastan yetoskia, amo onkaskia at porin semi tonaskia uan nejon kichiuaskia maj tauakto. Sayoj ke komo uejka yetoskia, nochi at takuauayaskia, uan sayoj onkaskia sekti. Kemej Jiova kitalij Taltikpak kampa moneki, nochipa onkak at uan ijkon taltikpakneminij uan tapialmej ueli yoltokej. Tonaltsin kikauantia oso kitotonia uejueyi amej uan tein tsikitsitsin, uan at pankisa kemej yeskia pokti uan ika mochijchiua mixti. Nejon mixti mokaua itech iluikak kemej majtakti tonalmej. Satepan kioui oso uetsi sekti, uan nejon at mokaua itech uejueyi amej uan tein tsikitsitsin. Ompa oksepa pankisa. Jiova kichiuak maj pano nejin uan ijkon nochipa onkas at itech taltikpak. Nejin kinextia ke semi tamatkej uan nochi ueli kichiua (Job 36:27, 28). w20.05 22 § 6

Jesús techyolchikauak maj tiksentokakan tiktajtanikan Dios iyektikatsin espíritu (Luc. 11:9, 13). Ika iespíritu, Jiova techmaka “chikaukauelilis [tein] ualeutok imako” (2 Cor. 4:7). Iespíritu techpaleuia maj ueli tikxikokan tein yeski ouijkayot tein tikpiaskej. Yektikatsin espíritu no techpaleuia maj kuali tikchiuakan tekimej tein tikseliaj itech itekiyo Dios uan uelis techpaleuis maj okachi kuali tikchiuakan tein ipa tiuelijya. Tein melauj, tikmatij ke amo tejuan tikchiuaj maj kuali kisa tekimej tein tikpiaj itech itekiyo Jiova, ta sayoj iespíritu ueli kichiua maj kuali kisa. Okse taman kemej tiknextiaj ke tikpatiuitaj yektikatsin espíritu, yejua keman tiktajtaniaj Jiova maj techpaleui maj tikitakan ox tiknemiliaj oso tiknejnekij tein amo kuali (Sal. 139:23, 24). Keman tiktataujtiskej, Jiova uelis techpaleuis ika iespíritu maj tikitakan ox tikpiaj se amo kuali tanemilil oso tanejnekilis. Maj tiktajtanikan maj iyektikatsin espíritu techmaka chikaualis tein techpaleuis maj timoijkuanilikan nejon amo kuali tanemilil oso tanejnekilis. Ijkon tiknextiskej ke amo tiknekij tikchiuaskej nion teyi tein uelis kichiuas maj yejuatsin amo techpaleuiok ika iespíritu (Efes. 4:30). w20.05 28, 29 § 10-12

Keman tiktajtouiaj itokay Jiova, tikchiuaj kemej Jesucristo. Jesús kiteixmatiltij itokay iTajtsin amo sayoj keman kikuik, ta no keman tamachtij keniuj yekmelauj tanemilia uan toni kichiua. Kemej neskayot, keman fariseos kichiujkej maj taltikpakneminij kiitanij Jiova kemej se Dios akin kintajtaniaya miak taman, akin amo kipataya tein kiixtaliaya uan akin tetajyouiltiaya, Jesús kinpaleuij maj kiitanij ke iTajtsin teajsikamati, amo yolijsiui, tetasojta uan teiknelia. Jesús nochipa kinextij ikualneskayouan iTajtsin uan ijkon no kinpaleuij taltikpakneminij maj kiixmatinij Jiova (Juan 14:9). Ijkon kemej Jesús, uelis tikinpaleuiskej oksekin maj kiixmatikan Jiova uan tikintapouiskej ke yejuatsin semi tetasojta uan kualtakat. Ijkon tiknextiaj ke amo melauak tein kijtouiliaj akin kitauelitaj. Ika tein tikijtouaj uan tein tikchiuaj kinnextilia taltikpakneminij keniuj yekmelauj tanemilia Jiova uan toni kichiua. Titapaleuiaj maj kuali ika motajto keman tikinpaleuiaj taltikpakneminij maj kiixmatikan tein melauak (Job 27:5). w20.06 6 § 17, 18

Redes sociales uelis semi tapaleuiskej, kemej neskayot, uelis tikuiskej keman titajtoskej iniuan tochankauan uan totasojikniuan. Sayoj ke, ¿tikitanij ke miak taman tein miakej kitaliaj itech redes sociales sayoj ika kitemouaj maj oksekin kinitakan? Nesi ke kinekij maj oksekin nochipa kimatikan toni kichiuaj. Sekin hasta kijkuilouaj seki taman tein pitsotik ika taixkopimej tein yejuan kitaliaj oso taixkopimej tein kitaliaj oksekin. Nejin amo mouika ika kualneskayomej tein moneki tiknextiskej tiitekitikauan Dios, kemej yolyemanilis uan netasojtalis (1 Ped. 3:8). Komo tikuij redes sociales, maj timotajtanikan: “Ika taixkopimej, videos tein niktalia uan tein nikijkuiloua, ¿uelis niknextis ke nimoueyimati? ¿Ueliskia kichiuas maj oksekin nechnexikoluikan?”. Akin tikchiuaj kemej Cristo amo tiktemouaj maj oksekin techitakan, ta tikchiuaj kemej kijtoua itech tajkuilol tein axkan timomachtiaj. Komo tiyolyemankej, amo timoueyimatiskej kemej kichiuaj akin amo kitekitiliaj Jiova (1 Juan 2:16). w20.07 6 § 14, 15

Achto ke mochiuaskia imomachtijkauj Cristo, tatitanil Pablo, akin ijkuak kiixmatiaj kemej Saulo, katka se telpoch akin amo tapoujkaitaya uan kintajyouiltiaya itatojtokakauan Jesús (Hech. 7:58). Sayoj ke keman Jesús yetoyaya iluikak kiualpannojnotsak, kichiuak maj amo ueli tachia uan amo kikauak maj kisentoka kintajyouilti itatojtokakauan. Pablo monekik kitemos ininnepaleuil akin kintajyouiltijka uan ijkon ueliskia oksepa tachias. Kinextij yolyemanilis uan kiselij inepaleuil Ananías, se imomachtijkauj Jesús, akin kipaleuij maj oksepa tachia (Hech. 9:3-9, 17, 18). Satepan, Pablo mochiuak itatojtokakauj Cristo uan semi tapaleuij, sayoj ke amo keman kielkauak tein Jesús kimachtij keman kiualpannojnotsak. Kisentokak kinextij yolyemanilis uan kuali kiselij ininnepaleuil tokniuan. Kijtoj ke yejuan semi kipaleuijkaj uan kiyolchikaujkaj (Col. 4:10, 11). w20.07 18, 19 § 16, 17

Maski Jiova nochi ueli kichiua, kinmaka oksekin seki tekimej. Kemej neskayot, kiixtalij Jesús kemej Tekiuaj itech iTekiuajyo uan kinmakas tanauatil 144,000 taltikpakneminij akin iuan tekiuajtiskej. Melauj ke achto kimachtij Jesús keniuj kichiuas tekit kemej Tekiuaj uan Tayekankatiopixkat (Heb. 5:8, 9). No kinmachtia akin iuan tekiuajtiskej iKonetsin. Sayoj ke maski kinmakas nejin tekit, amo nochipa kiniluijtos keniuj moneki kichiuaskej, ta takuaujtamatis ke kichiuaskej tein yejuatsin kineki (Apoc. 5:10). Komo toTajtsin Jiova kinmaka oksekin seki tekimej maski amo moneki maj kipaleuikan, okachiok tejuan moneki ijkon tikchiuaskej. Kemej neskayot, ¿keniuj uelis kichiuaskej kemej yejuatsin tokniuan takamej akin kipiaj ininnamik uan tayekananij itech nechikol? Keman kinmakaj tekimej oksekin uan amo nochipa kiniluijtokej keniuj moneki kichiuaskej. Ijkon, amo sayoj tapaleuiskej maj mochiua tekit, ta no kinmachtiskej oksekin uan kinpaleuiskej maj okachi takuaujtamatikan ke uelis kichiuaskej (Is. 41:10). w20.08 9 § 5, 6

¿Keniuj kineki Jiova maj tikinitakan itekitikauan akin mouejkatilijkej? Jesús technextilij keniuj. Yejua kimatia ke Dios semi kinpatiuita nochin itekitikauan. Yejua ika, mochikauak kinpaleuis maj mokepanij iuan Jiova “ichkame ten poliutokke, yejuan ten pouij iuan in pueblojuani de Israel” (Mat. 15:24). Kemej Jesús kuali ichkatajpixkej, no semi mochikauak kinpaleuis iichkauan iTajtsin maj mokepanij iuan (Juan 6:39). Tatitanil Pablo kiniluij tayekananij akin moajsiaj itech nechikol ompa Éfeso ke monekia kichiuaskej kemej Jesús uan kinpaleuiskej akin amo chikauak inintakuaujtamatilis. Uan no kiniluij: “Kachi yolpaktok in tagat ten tapaleuijtinemi [...] ke ne tagat ten sayo kiselia tapaleuilis” (Hech. 20:17, 35). Kemej tikitaj, tayekananij moneki kinyekpiaskej itekitikauan Jiova. Salvador, se tayekankej ompa España, kijtoua: “Keman niknemilia ke Jiova semi kintasojta iichkauan akin poliujkej, nejon kichiua maj semi nimochikaua nikinpaleuis. Senkis nikmati ke Jiova kineki maj nikinyekpia”. w20.06 23 § 15, 16

Jiova amo yolijsiuis uan kisentokas techtapojpoluis totajtakoluan hasta keman tamis mil xiujmej. Satepan amo tikpiaskejok tajtakol. Yejua ika, maj tikitakan ininkualneskayouan oksekin uan maj amo tiyolijsiuikan, ijkon kemej kichiua yejuatsin. Jesús uan ángeles semi yolpakkej keman Jiova kichijchiuak taltikpak. Maj tiknemilikan keniuj semi yolpakiskej keman kiitaskej ke itech nochi taltikpak moajsij taltikpakneminij akin amo tajtakolejkej, akin kitasojtaj Jiova uan kitekitiliaj. Uan maj tiknemilikan keniuj semi yolpakiskej akin tekiuajtiskej iuan Cristo ompa iluikak keman kiitaskej ke tekit tein kichiuaj kinpaleuia taltikpakneminij (Apoc. 4:4, 9-11; 5:9, 10). No maj tiknemilikan keniuj yeski tonemilis keman tichokaskej porin tiyolpakij uan amo porin titayokoyaj, keman amo akinok kokolispeuas, tayokoyas nion momikilis. Hasta maj ejko nejon tonal, maj tikixtalikan tikchiuaskej kemej toTajtsin uan maj tiknextikan netasojtalis, tamatilis uan maj amo tiyolijsiuikan. Ijkon, tiksentokaskej tiyolpakiskej maski tikpanoskej tein yeski ouijkayot (Sant. 1:2-4). Semi tiktasojkamatij maj Jiova kijto ke “kinpankixtis yoltokke nochi in animajme [oso mikemej]” (Hech. 24:15). w20.08 19 § 18, 19

Biblia se netetayokolil tein kinextia ke toTajtsin Dios techtasojta. Yejua ika, ika iespíritu kichiuak maj takamej akin nenkej ne uejkauj kijkuilouanij. Itech iTajtol, Jiova kinankilia netajtanilmej tein okachi monekij, kemej keniuj peuak tinemij, keyej tinemij uan toni panos satepan. Kemej Jiova kineki maj tinochin tikmatikan itanankililuan nejin netajtanilmej, ijkon kemej panouanij xiujmej kichiuani maj Biblia motajtolkepa itech miak tataman tajtolmej. Itech nejin tonalmej, nochi Biblia oso sayoj seki amatajkuilolmej moajsi itech panoua tres mil tataman tajtolmej. Tein melauj, yejua amatajkuilol tein okachi motajtolkepani uan momoyauani. ¿Keniuj ueli tiknextiaj ke tikpatiuitaj Biblia? Keman mojmostaj tikixtajtoltiaj, itech titanemiliaj uan timochikauaj tikchiuaskej tein timomachtiaj. Uan no, tiktasojkamatiliaj Dios maj techmakani Biblia keman timochikauaj tikinmatiltiskej miakej taltikpakneminij tein ompa kijtoua (Sal. 1:1-3; Mat. 28:19, 20). w20.05 24, 25 § 15, 16

Tanauatijkej Jeremías monekia kinnojnotsas taltikpakneminij akin amo kinekiaj kikakiskej. Semi motayokoltij uan hasta amo kinekiaok tanojnotsas. Sayoj ke amo mosenkauak. ¿Keyej amo? Kijtoj ke kimachiliaya “itajtoluan Jiova” kemej se tit oso tekol tein amo uelia kitsakuiliaya (Jer. 20:9). Uan no ijkon tikmachiliskej komo mojmostaj timomachtiaj Biblia uan itech titanemiliaj. Nejon kichiuas maj okachi tiyolpakikan itech tanojnotsalis uan xa hasta okachi kuali techyas (Jer. 15:16). Yejua ika, keman teisa kichiuas maj timotayokoltikan, maj tiktapouikan Jiova keniuj timomachiliaj uan maj tiktajtanikan maj techpaleui. Yejuatsin techpaleuis keman timochikauaj tikchiuaskej tein kuali uan amo timopoloskej, techpaleuis komo timokokouaj, no techpaleuis maj tikitakan tekimej itech nechikol kemej moneki uan maj tiyolpakikan itech tanojnotsalis. Jiova techpaleuis maj amo timotayokoltikanok. w20.12 27 § 20, 21

Seki tokniuan siuamej sayoj ueli yetokej iniuan tokniuan itech nechikolmej. Yejua ika, maj kuali tikinselikan, maj iniuan titajtokan uan maj tikinnextilikan ke ininka timotekipachouaj. Maj tikchiuakan kemej Jesús uan maj tikxelokan tiempo iniuan tietoskej tokniuan siuamej (Luc. 10:38-42). Xa uelis tikinyoleuaskej maj takuatij tochan oso iniuan timoixpetaniskej. Ijkuak, maj ika titajtokan tein kinyolchikauas (Rom. 1:11, 12). Jesús kimatia ke sekin akin amo kipiaj ininnamik momachiliaj ininselti. Sayoj ke senkis kinextij ke se monamiktis oso se kinpias konemej amo yejua tein kichiuas maj se yolpaki nochipaya, ta komo se kiixtalia se kitekitilis Jiova (Mat. 19:12; Luc. 11:27, 28). Okachi moneki maj tokniuan tayekananij kinitakan tokniuan siuamej kemej yeskiaj ininmomauan oso ininikniuan. w20.09 21, 22 § 7-9

Ompa Israel, tatokayaj keman peuaya kiouia, kemej itajkotian octubre, uan kitekiaj takilot satepan ke amo semi kiouiaok, kemej itajkotian abril (Mar. 4:28). Tiknextiskej tamatilis komo amo tiyolijsiuij ijkon kemej se akin tatoka. Sayoj ke nejin xa ouij yeski. Kemej titajtakolejkej, niman tiknekij maj moita tein uelik tikchiujkej. Sayoj ke komo se taltikpaknenkej kineki maj motemaka takilot kampa tatoka, moneki kichiuas miak taman: moneki tachkuas, tatokas, tameuas uan kiatekis itatok. No ijkon panoua keman titamachtiaj. Xa monekis tikchiuaskej miak taman uan ijkon uelis tikinpaleuiskej akin tikinmachtiaj maj tetasojtakan uan maj amo tachikoitakanok. Komo amo tiyolijsiuij, amo timosenkauaskej keman taltikpakneminij amo techkakiskej. Sayoj ke no moneki amo tiyolijsiuiskej keman kuali techkakij uan kinekij kimatiskej okachi. Amo ueli tikchikaujkauiaj akin tikmachtiaj maj takuaujtamati. Kemansa, hasta itatojtokakauan Jesús amo niman kiajsikamatkej tein kinmachtiaya (Juan 14:9). Maj tikelnamikikan ke maski ueli titanojnotsaj uan titamachtiaj, sayoj Dios ueli kinpaleuia taltikpakneminij maj takuaujtamatikan (1 Cor. 3:6). w20.09 11 § 10, 11

Tinochin tiknekij maj moauikan akin tikinmachtiaj. Uelis tikinpaleuiskej maj kichiuakan nejon komo tikinyolchikauaj maj yakan nechikolmej. Miakpa akin niman peua youij nechikolmej yejuan akin okachi niman moauiaj (Sal. 111:1). Sekin kiniluiaj akin kinmachtiaj ke kimatiskej seki taman itech nemachtil tein kiseliskej nochi semanas uan okseki taman itech nechikolmej. Maj tikixtajtoltilikan Hebreos 10:24, 25 akin tikmachtiaj uan maj tikiluikan keyej semi kipaleuis komo youi nechikolmej. Maj tiktapouikan ika yolpakilis teisa tein timomachtijkej itech se nechikol tein yankuixtok tikpiakej. Nejin okachi tapaleuis ke sayoj tikyoleuaskej maj youi. Tein kiitas uan tein kikakis itech yekinika nechikol tein yas, okachi kuali yeski ke tein kiitak uan tein kikakik itech okse nechikol tein achto yajka itech okse taneltokalis (1 Cor. 14:24, 25). Ompa kinixmatis okseki tokniuan akin kikauaj se kuali neskayot uan akin kipaleuiskej maj moaui. w20.10 10, 11 § 14, 15

Yektikatsin espíritu techpaleuis maj tikchiuakan tein tikixtajtoltiaj uan tein timomachtiaj itech iTajtol Dios. Maj tiktajtanikan Jiova tein tajtanik salmista: “Xinechmachti Jiova moojtsin. Ninentinemis itech moojtsin tein melauak. Xikchiua maj nikmoujkatoka motokay ika nochi noyolo” (Sal. 86:11). Yejua ika, maj tiksentokakan tikixtajtoltikan uan maj timomachtikan Biblia uan amaixmej tein techmaka inechikol Jiova. Sayoj ke, amo sayoj tiknekij tikpiaskej taixmatilis, ta tiknekij tikneltokaskej ke tein timomachtiaj yejua tein melauak uan tikchiuaskej, uan Jiova techpaleuis ika iespíritu. Maj no tikinyolchikauakan tokniuan, porin yejuan kemej yeskiaj tochankauan (Heb. 10:24, 25). Maj tiktataujtikan Jiova maj techpaleui ika iespíritu maj titanankilikan itech nechikolmej tein tayolchikauas uan maj timochikauakan kuali timomachtiskej keman tikpanoltiskej se tamachtilis itech nechikol. Komo tikchiuaj nochi nejin, tiknextiliskej Jiova uan iKonetsin ke tikintasojtaj tokniuan, akin kinitaj kemej ininichkauan (Juan 21:15-17).Yejua ika, maj tikakikan toueyi Tamachtijkauj uan maj kuali tikuikan nochi tamachtilis tein techmaka. w20.10 24, 25 § 15-17

¿Toni kichiuak Jesús? Tepitsin satepan ke Jiova oksepa kimakak inemilis, kintitanik seki siuamej maj kinnauatitij itatitaniluan ke oksepa nemia. Kiniluij: “Amo ximomoutikan. Ta, xiyakan xikinnejmachtitij nokniuan” (Mat. 28:10a). Maski kikaujkaj, Jesús amo kinixtopeuak, ta kisentokaya kiniluiaya “nokniuan”. Jesús kichiuak kemej Jiova keman kiniknelij uan kintapojpoluij itatitaniluan (2 Rey. 13:23). Tejuan no ininka timotekipachouaj akin amo tanojnotsajok. Tiksentokaj tikinitaj kemej tokniuan uan tikintasojtaj. Amo tikelkauaj ke semi kitekitilijkej Jiova, sekin semi miak xiujmej (Heb. 6:10). Tikuelitaskiaj maj touan yetokan (Luc. 15:4-7). Moneki tikinyolchikauaskej akin amo youijok nechikolmej maj oksepa yakan. Uan keman tikitaj ke ajsi itech nechikol se tokniuj akin amo yayaok nechikolmej, moneki timotokiskej uan tiktajpaloskej. w20.11 6 § 14-17

Santiago uan Juan, iuan ininmomaj, kitajtanijkej maj yejuan omen motalianij se iyekmakopaka uan okse iopochmakopaka itech iTekiuajyo Dios. Jesús niman kinnankilij ke sayoj iTajtsin kinamikia kiixtalis akoni kiseliskia nejon tatiochiualis (Mat. 20:20-23). Ijkon kinextij ke kiajsikamatia ke seki taman amo yejua kinamikia kichiuas. Kinextij yolyemanilis uan sayoj kichiuak tein Jiova kinauatijka (Juan 12:49). ¿Keniuj uelis tikchiuaskej kemej yejua? Ijkon kemej Jesús, tiknextiaj ke tikajsikamatij ke seki taman amo tejuan technamiki tikchiuaskej keman tiktakamatij tanauatil tein moajsij itech tajkuilol tein axkan timomachtiaj. Yejua ika, keman se tokniuj techtajtanis maj tikyolmajxitikan, maj amo tikchikaujkauikan maj kichiua tein tejuan tiknemiliaj nion maj niman tiknankilikan komo amo achto tiknemilijkej toni tikiluiskej. Okachi kuali, maj tikiluikan tein Biblia uan toamaixuan tayolmajxitiaj. Ijkon tiknextiskej ke tikajsikamatij ke amo nochi tikmatij uan ke tiyolyemankej porin tikajsikamatij ke tein Jiova tayolmajxitia okachi kuali (Apoc. 15:3, 4). w20.08 11, 12 § 14, 15

Komo se tonal tiknemiliaj ke moneki tikyolmajxitiskej se akin kuali iuan timouikaj, ¿toni moneki tikelnamikiskej? Achto ke titajtoskej iuan, maj timotajtanikan: “¿Yekmelauj kichiuak tein amo kuali oso ipa niknemilia ke amo moneki se mopolos?”. Akin kinemilia ke nion tepitsin moneki se mopolos amo kitojtoka itanauatiluan Jiova, ta kemej yejua kiita ke moneki mochiuas teisa, uan yejua ika kinemilia ke oksekin kichiuaj tein amo kuali uan amo teiknelia. Komo satepan ke itech titanemilijkejya nejin, tiksentokaj tiknemiliaj ke moneki iuan titajtoskej akin kuali iuan timouikaj, maj tikyekiluikan toni tikitaj ke amo kiyekchiujtok uan maj tikchiuilikan netajtanilmej tein ika tikpaleuiskej maj kiita ke mopolojtok. Tein tikiluiskej moneki kisas itech Biblia, uan maj tikelnamikikan ke amo tejuan technamiki tikmelauaskej, ta tikpaleuiskej maj kiajsikamati keniuj momachilia Jiova ika tein kichiujtok (Rom. 14:10). Maj tikuikan iTajtol Dios tein kipia miak tamatilis. Uan keman titayolmajxitiskej, maj titeiknelikan kemej Jesús (Prov. 3:5; Mat. 12:20). ¿Keyej? Porin tein tejuan tikchiuaskej iniuan oksekin, Jiova no ijkon kichiuas touan (Sant. 2:13). w20.11 21 § 13

Miakpa, keman taltikpakneminij kiitaj se taltikpaknenkej kinemiliaj ke kiixmatijya sayoj porin kiitaj kemej moita tapani. ¿Melauj ke amo tikuelitaj maj ijkon tanemilikan? Techyolseuia tikmatiskej ke Jiova amo kichiua nejon. Kemej neskayot, keman Samuel kinitak itelpochuan Jesé, amo kiitak tein Jiova kiitak. Dios kiluijka ke semej itelpochuan Jesé mochiuaskia tekiuaj itech xolal Israel. Sayoj ke, ¿katiyejua yeskia? Keman kiitak Eliab, akin tayekanaya, Samuel kijtoj: “Niknemilia ke Jiova yejua nejin kiixpejpenak”. Eliab moitaya kemej se tekiuaj. Sayoj ke Jiova kiluij Samuel: “Amo xikita keniuj moita nion ke uejkapantik, porin amo yejua nikixpejpenak”. ¿Toni techmachtia nejon? Dios no kijtoj: “Taltikpaknenkej kiita sayoj tein moita tapani, sayoj ke Jiova kiita iyolo taltikpaknenkej” (1 Sam. 16:1, 6, 7). Tikchiuaj tein kuali iniuan tokniuan keman tikchiuaj ijkon kemej Jiova. w20.04 14 § 1; 15 § 3

Jesús panok kampa toktoya miak cebada tein ayamo uelia kitekiaj porin yekin moskaltijtoya (Juan 4:3-6). Poliuiaok kemej naui metsti achto ke ueliskia kitekiskej. Yejua ika itatojtokakauan Jesús amo kiajsikamatkej keman kiniluij: “Xikitakan [...] takilome ten peuak ya kosaui ya. Uan nojon kijtosneki ke ma amo uejkauas ok para kajokuiske in tatokme” (Juan 4:36). ¿Toni kijtosnekia? Nesi ke Jesús amo ika tajtojtoya se kisentilis tatet, ta se kinsentilis taltikpakneminij. Maj tiknemilikan tein panok. Maski judíos amo kuali mouikayaj iniuan samaritanos, Jesús kinojnotsak se siuat samaritana akin kuali kikakik. Tein melauj, keman Jesús kijtoj ke “amo uejkauas ok para kajokuiske in tatokme”, miakej samaritanos akin siuat kinnojnotska kiajsitoj Jesús porin kinekiaj maj okachi kinmachti (Juan 4:9, 39-42). Itech se amatajkuilol ika motajtoua nejin tein panok: “Kemej samaritanos niman kiajsitoj Jesús uan kikakkej [...] kinextij ke katkaj kemej tatet tein ueliskiaya se kitekis”. w20.04 8 § 1, 2

Nechikolmej no techpaleuiaj maj okachi kuali titanojnotsakan uan maj okachi kuali titamachtikan. Kemej neskayot, techmachtiaj keniuj kuali tiktekitiltiskej amaixmej uan videos tein moajsij itech nepaleuilmej tein ika titamachtiaj. Yejua ika, maj kuali timomachtikan tein moitas itech nechikolmej, maj kuali tikakikan tein ompa moijtoua uan satepan maj tikchiuakan. Komo tikchiuaj nochi nejin, uelis tikixnamikiskej Satanás uan tiyeskij kuali itateuijkauan Cristo Jesús (2 Tim. 2:3). No techpaleuiaj miakej ángeles akin kipiaj miak chikaualis. Tikmatijya toni ueli kichiua sayoj se ángel. Yejua ika, ¿ueli tiknemiliaj toni ueliskia kichiuaskej millones ángeles? (Is. 37:36). Nion se takat uan nion se amokuali ejekat uelis kintanis nejin itateuijkauan Jiova. Yejuatsin semi chikauak. Yejua ika, komo touan yetok nochipa tikpiaskej okachi chikaualis ke akin techixnamikij, maski semi miakej yeskij (Juec. 6:16). ¡Nejin semi melauak! Yejua ika, maj nochipa tikelnamikikan keman tikmachiliskej ke amo tikpiajok chikaualis porin se akin iuan titekitij, se akin iuan timomachtiaj oso se tochankauj akin amo itaixpantijkauj Jiova techiluia oso techchiuilia teisa tein amo kuali. Maj tikelnamikikan ke amo toselti timoixnamikij iuan Satanás, ta kemej tikaujtokej maj Jiova techixyekana, yejuatsin techpaleuia. w21.03 29 § 13, 14

Tein melauj, tatitanil Pablo xa ika tajtojtoya Isaías 22:13, kampa moijtoua ke israelitas sayoj kitayekanaltiayaj moyolpaktiskej uan amo kitemouayaj kuali mouikaskej iuan Dios. Nejon israelitas kinemiliayaj ke kemej amo se kimati kemanian se momikilis, okachi kuali maj se moyolpakti. Uan miakej no ijkon tanemiliaj axkan. Kemej tikneltokaj ke mikemej oksepa nemiskej no moneki kuali tikitaskej akoni iuan timouikaj. Tokniuan akin nemiaj Corinto monekia amo mouikaskej iniuan akin amo kineltokayaj ke mikemej oksepa nemiskej. ¿Toni techmachtia nejin? Ke komo kuali timouikaj iniuan akin sayoj kitemouaj moyolpaktiskej amo techpaleuis. Uelis kichiuaskej maj tikpatakan totanemilil uan tein kuali tein timomattokej tikchiuaskej. Tein melauj, hasta uelis tikchiuaskej tein Dios kitauelita. Yejua ika Pablo tayolmajxitij: “Xichipaukanentinemikan uan amo ximotajtakolmakatinemikan” (1 Cor. 15:33, 34). w20.12 9 § 3, 5, 6

Nejin tajkuilol kinextia keniuj kiixtalij Jiova maj moajsikan ichankauan ompa iluikak uan nikan taltikpak. Kemej Jiova ‘tayekantinemi’, yejuatsin kipia okachi ueyi tanauatil. Uan kemej kiixtalij maj moajsikan taixyekananij, sekin kinmakak tanauatil. Sayoj ke kichia maj kuali kikuikan tanauatil tein kinmakak (Rom. 14:10; Efes. 3:14, 15). Jiova kimakak Jesús tanauatil itech nechikol, sayoj ke Jesús tanankilis iixpan Jiova komo amo kuali techixyekana (1 Cor. 15:27). Jiova no kiixtalij maj takat kiixyekana inamik uan ikoneuan. ¿Keniuj momachtis kuali kinixyekanas ikalyetouanij? Yekinika moneki kiajsikamatis tein Jiova kinekia maj kichiua. No moneki kiajsikamatis keyej Jiova kiixtalij taixyekanalis, uan tein okachi moneki, kichiuas ijkon kemej Jiova uan Jesús. ¿Keyej semi moneki? Porin Jiova kinmakani takamej tanauatil, uan kineki maj kuali kikuikan keman kinixyekanaskej ininchankauan (Luc. 12:48b). w21.02 2 § 1-3

No semi kuali komo tikchiuaj kemej Jiova uan tikelkauaj seki taman. Kemej neskayot, maski yejuatsin nochi ueli kielnamiki, techtapojpoluia uan kielkaua totajtakoluan komo timoyolnonotsaj oso timoyolnemiliaj (Sal. 25:7; 130:3, 4). Uan yejuatsin no kineki maj tikintapojpoluikan akin techyolkokouaj uan maj tikelkauakan tein techchiuilijkej (Mat. 6:14; Luc. 17:3, 4). Uelis tiknextiskej ke tiktasojkamatij tokuatixyo keman ika tikueyitaliaj akin techtayokolij. Sekin amo kuali kikuij nejin netetayokolil uan ininselti kiixtaliaj toni kuali uan toni amo kuali. Sayoj ke kemej Jiova techchijchiuak, taixejekol maj itanauatiluan okachi techpaleuikan ke tein tejuan tiknemiliaj ke kuali yetok (Rom. 12:1, 2). Keman tiktakamatij itanauatiluan, ueli tiyolseujtokej (Is. 48:18). Uan tikajsikamatij tein Jiova kineki maj tikchiuakan: maj tikueyitalikan uan maj tikyolpaktikan toTachijchiujkauj uan toTajtsin (Prov. 27:11). w20.05 23, 24 § 13, 14

¿Toni techpaleuis maj tikintasojtakan tokniuan? Komo timochikauaj okachi tikinixmatiskej. Nejon techpaleuis maj amo ouij techkisa tikinajsikamatiskej uan tikintasojtaskej. Uelis kuali timouikaskej iniuan maski xiuejkejya oso telpochmejok oso okseko kayomej. Maj tikelnamikikan ke Jonatán semi kuali mouikak iuan David maski kiyekanaya kemej 30 xiujmej. ¿Moajsi itech monechikol se tokniuj akin xiuejya oso telpochok akin ueliskia tikonixtalis kuali iuan tionmouikas? Komo tikonchiua, tikonnextijtos ke tikontasojta “nochi in tokniuan taneltokani” (1 Ped. 2:17). Sayoj ke, tikintasojtaskej tokniuan amo kijtosneki ke nochin semi kuali iniuan timouikaskej. Nejon amo ueli panoua. Ipa okachi kuali timomachiliaj iniuan seki tokniuan porin kiuelitaj tein tejuan tikuelitaj. Tein melauj, Jesús kiniluij nochi itatitaniluan: “Namejuan nannotasojikniuan”, sayoj ke okachi “kiyoltasojtaya” Juan (Juan 13:23; 15:15; 20:2). Maski ijkon, Jesús amo okachi kitakachiuak (Mar. 10:35-40). w21.01 23 § 12, 13

Tatitanil Pablo amo kinnojnotsak akin amo katkaj judíos ompa Atenas kemej kinnojnotsak judíos itech sinagoga. Kiitak tein kichiuayaj itech inintaneltokalis uan tein onkaya itech altepet (Hech. 17:23). Satepan, keman ika tajtoj tein iTajtol Dios tamachtia, peuak kinnojnotsa ika tein kineltokayajya. Nejin kinextia ke tatitanil Pablo kipatak kemej kinnojnotsak akin nemiaj Atenas. Kiniluij ke tein tamachtiaya katka itamachtilis “tatadios ten amo se kixmati” akin yejuan kinekiaj kiueyichiuaskej. Maski akin amo katkaj judíos amo kiixmatiaj iTajtol Dios, Pablo amo kinemilij ke amo keman mochiuaskiaj itatojtokakauan Cristo, ta kinitak kemej yeskiaj tatet tein ueliskiaya se kitekis. Yejua ika kinnojnotsak kemej kiajsikamatiskiaj. Kemej Pablo, maj tikitakan tein techpaleuis maj tikmatikan toni kinyolnotsa akin tikinnojnotsaj. ¿Teisa kitalijtokej ininkaltenoj? ¿Kinextia inintokay, kemej motakentiaj uan kemej mochijchiuaj oso hasta kemej tajtouaj toni kineltokaj? w20.04 9, 10 § 7, 8