Julio

Jiova kiixtalij maj se tokniuj akin tajtakolchiuak kikalankixtikan itech nechikol, porin nejon kipaleuia yejua uan no kinpaleuia okseki tokniuan itech nechikol. Seki tokniuan xa kijtoskej ke tayekananij amo kuali tein kichiujkej, sayoj ke xikonelnamiki ke nejon tokniuan xa amo kinekiskej kijtoskej ke akin kikalankixtijkej kichiuak tein amo kuali. Tein melauj, amo tikmatij nochi tein panok. Yejua ika, maj titakuaujtamatikan ke tayekananij akin kimelaujkej tajtakolchiujkej mochikaujkej kitakamatiskej tein Biblia kijtoua uan tamelauaskej kemej Jiova kineki (2 Crón. 19:6). Komo tayekananij kiixtalijkej kikalankixtiskej itech nechikol se mochankauj uan tiontatakamati, xa uelis tikonpaleuis mochankauj maj mokepa iuan Jiova. Elizabeth kijtoua: “Semi ouij nechkisak senkis amo nitajtosok iuan nookichpil, akin ueyia katka. Sayoj ke keman mokepak iuan Jiova, kijtoj ke semi kipaleuij maj kikalankixtianij itech nechikol. Uan satepan kijtoj ke kimachtijka miak taman”. w21.09 28, 29 § 11, 12

Maj itech titanemilikan siuat. Yejua xa kiuelitaskia kimakas Jiova okachi ke tein kimakak. Maski ijkon, kichiuak tein uelik uan kimakak Jiova tein okachi kuali. Uan Jesús kimatia ke iTajtsin semi kipatiuitak tein kitemakak. Nejin techmachtia ke Jiova kiyolpaktia maj tikmakakan tein okachi kuali uan maj tiktekitilikan ika nochi toyolo (Mat. 22:37; Col. 3:23). Yejuatsin kiyolpaktia maj tikmakakan nochi tein tiuelij, hasta tiempo uan chikaualis tein tikuij keman tikueyichiuaj, kemej neskayot, keman titanojnotsaj uan keman tiouij nechikolmej. ¿Keniuj uelis tikchiuaskej tein techmachtia ineskayo siuat akin amo nemiaok inamik? Maj inintech titanemilikan tokniuan akin kinyolchikauas komo tikinelnamiktiaj ke Jiova kipatiuita tein kichiuaj. Uelis yeski se tokniuj siuat akin xiuejya, akin amo kuali momachilia oso kinemilia ke amo tapaleuiaok porin amo semi chikauakok uan yejua ika amo ueli tanojnotsaok kemej achto. w21.04 6 § 17, 19, 20

Jiova kimati kemanian uelisya kiixpolos tein amo kuali. Kemej ayamo kichiua, axkan moajsij millones taltikpakneminij akin kitekitiliaj uan kiueyichiuaj. Yejuan kitasojkamatij maj Jiova taxikojto, porin ijkon uelikok yolkej, uelik kiixmatkej uan peuak kitasojtaj uan uelik motemaktijkej iuan. Senkis moitas ke semi kuali maj Jiova taxikouani keman techmakasya netetayokolil tein tikchixtokej porin titaxikojkej. Jiova techmachtia ke moneki titaxikoskej ika yolpakilis, porin maski Satanás kichiuani maj onka tayokol uan tajyouilis, yejuatsin kisentoka yolpaki (1 Tim. 1:11, TNM). Tejuan no uelis tiksentokaskej titaxikoskej ika yolpakilis hasta maj ejko tonal keman Jiova kichipauas itokay, keman kinextis ke sayoj yejuatsin kinamiki taixyekanas uan ke okachi kuali taixyekankej, uan keman kiixpolos tein amo kuali uan kuejmolmej tein tikpiaj. Techyolseuia tikmatiskej ke toTajtsin Jiova taxikojtok. Yejua ika maj tikixtalikan no tiksentokaskej titaxikoskej. w21.07 13 § 18, 19

Itech yekinika siglo miakej kiixtopeujkej Jesús. Kiixtopeujkej porin sayoj kiitakej ke katka iokichpil se koujxijxinkej. Uan no, katka kayot Nazaret. Miakej kinemiliayaj ke akin ompa nemiaj amo teyi chiuanimej katkaj. Hasta Natanael, akin satepan mochiuak imomachtijkauj Jesús, kijtojka: “¿Xe timoyolilia ke uelis ma aksa kisa yolkuali tech ne pueblo de Nazaret?”. Jesús nemia oso xa itech tanemilijtoya tein moijtojka itech Miqueas 5:2, ke Jesús yoliskia Belén, uan amo Nazaret. Tanauatijkej Isaías kijtojka ke akin kitauelitaskiaj Jesús amo kitemoskiaj kimatiskej itech katiyejua xolal uan itech katiyejua kalyetouanij ualeuaskia Mesías (Is. 53:8; nota). Komo kitemoskiaj kimatiskej kani ualeuaya Jesús, kimatiskiaj ke yolka Belén uan ke katka ichankauj tekiuaj David (Luc. 2:4-7). Ijkon kemej moijtojka itech Miqueas 5:2 Jesús kemaj yolik Belén. Komo ijkon, ¿keyej amo kineltokakej ke katka Mesías? Porin kemej miak taman amo kimatiaj, niman kinemilijkej ke Jesús amo katka Mesías uan kiixtopeujkej. w21.05 2, 3 § 4-6

Itech Biblia no tikajsij ininneskayo akin kikakkej tein kinyolmajxitijkej, uan Dios kintatiochiuij. Maj tikitakan tein kichiuak Job. Maski kinekia kiyolpaktis Dios, katka tajtakolej. Yejua ika, keman semi tajyouijtoya kijtoj miak taman tein amo melauj katka, yejua ika Elihú uan Jiova kiyolmajxitijkej. ¿Toni kichiuak Job? Yejua kijtoj: “Ika nitajtoj tein amo nikajsikamatia [...] niknemilia maj amo nikijtouani tein nikijtoj uan nitokotsyetok itech talnex uan koujnex para niknextis ke nimoyolnonotsa” (Job 42:3-6, 12-17). Kinextij yolyemanilis uan kikakik tein kiyolmajxitij Elihú maski okachi xiuejya katka ke yejua (Job 32:6, 7). Jiova kitatiochiuij Job porin katka yolyemanik. Yolyemanilis no techpaleuia maj tikakikan tein techyolmajxitiaj maski tiknemiliaj ke amo monekia techyolmajxitiskej oso maski tikyekanaj akin techyolmajxitij. Tinochin moneki tiksentokaskej tiknextiskej kualneskayomej tein kipia itakilo espíritu, uan timochikaujtiaskej okachi kuali titamachtiskej. w22.02 11 § 8; 12 § 12

Tinochin moneki titapaleuiskej maj onka yolseuilis uan netasojtalis itech nechikol. Nejon tapaleuis maj amo akin kimachili ke iselti yetok. Tein tikchiuaskej uan tein tikijtoskej uelis semi kinyolchikauas oksekin. ¿Keniuj uelis tikinpaleuiskej akin ininchankauan amo itaixpantijkauan Jiova maj kimachilikan ke tokniuan kintasojtaj? Maj tejuan tiktemokan kuali timouikaskej iniuan. Yekinika uelis kuali tikinseliskej akin yankuikej itech nechikol, kemej akin yankuixtok peuak youij nechikolmej, tokniuan akin yankuixtok panokej itech tonechikol oso akin yankuixtok moauijkej (Rom. 15:7). Sayoj ke maj amo sayoj tikintajpalokan, ta maj tikchiuakan okseki taman porin tiktemouaj kuali timouikaskej iniuan. Yejua ika maj tikualtakamej uan maj tikinnextilikan ke ininka timotekipachouaj. Maj tiktemokan tikinixmatiskej uan tikajsikamatiskej kuejmolmej tein kipiaj, sayoj ke maj amo tikinchiuilikan netajtanilmej tein kichiuas maj mopinaujmatikan. Kemej sekin xa ouij kinkisa kijtoskej keniuj momachiliaj, maj amo tikchiuakan maj kimachilikan ke moneki technankiliskej. Okachi kuali maj tikinchiuilikan netajtanilmej tein amo kichiuas maj mopinaujmatikan uan maj kuali tikinkakikan. Kemej neskayot, uelis tikintajtaniskej keniuj kiixmatkej Jiova. w21.06 11 § 13, 14

¡Semi tiktasojkamatij tatiochiualis tein tikpiaj maj ueli tiktekitilikan Jiova iniuan tokniuan kemej ‘sayo se sen oloch yetolis de ichkamej’ akin techixyekana “se tapixke san”! Amatajkuilol Organizados para hacer la voluntad de Jehová itech página 165, kijtoua: “Moneki titapaleuiskej maj ueli tiksentokakan tisentekitikan”. Uan no kijtoua: “Nochipa kuali timouikaskej iniuan tokniuan komo timochikauaj tikinitaskej kemej Jiova kinita”. Yejuatsin techita tinochin kemej ‘ikonetsitsin’ uan semi techtasojta. Uan tejuan no moneki tikinitaskej tokniuan kemej Jiova kinita. Yejuatsin kiita uan kipatiuita nochi tein tikchiuaj porin tiknekij tikinpaleuiskej tokniuan uan tikinyekpiaskej (Mat. 10:42). Kemej tikintasojtaj tokniuan tikixtalijtokej tiktakamatiskej nejin tajtolmej: “Amo xikintepotamikan ok namokniuan taneltokani [...]. Uan amo no xikintopeuakan ma uetsitij tech in tajtakol” (Rom. 14:13). Tiknemiliaj ke tokniuan okachi ueyichiuanimej uan tiknekij tikintapojpoluiskej. Maj amo tikauakan maj techyolkokojto tein oksekin kichiuaj, ta okachi kuali “ma tiksentokakan ne ojtsin [...] ten kualkui yolseuilis [...] para ijkon timoyekyolmajxitijtiyoue tech totakuautamatilis” (Rom. 14:19). w21.06 24 § 16, 17

Komo kuali timomachtiaj uan tikchiuaj tein techyolmajxitia iTajtol Dios uan inechikol, yolik tiknextijtiaskej ikualneskayouan Cristo uan okachi tikixmatiskej Dios. Itech se neskayot, Jesús kijtoj ke tein tikteixmatiltiaj ke kichiuas iTekiuajyo Dios kemej yeskia se tatet tein yolik moskaltijtiuj itech ininyolo taltikpakneminij. Kijtoj: “In xinach ixua, moskaltia uan xochioua, pero in tagat [akin tatokak] amo kemati kiniu mochiutok. Porin ika ichikaualis den tal mochiua ne takilot, achto in xiuit, niman ichikaualoni, uan satepan in xinach mochikaualtia” (Mar. 4:27, 28). Ke akin kineltoka tein Biblia tamachtia yolik mopatatiuj ijkon kemej se tatok yolik moskaltijtiuj. Kemej neskayot, keman akin tikinmachtiaj ika Biblia peua motokiaj iuan Jiova, peua tikitaj ke kipatatiuijya seki taman (Efes. 4:22-24). Sayoj ke moneki tikelnamikiskej ke Jiova kichiua maj moskalti nejon tatet. w21.08 8, 9 § 4, 5

Akin ‘yolpaki ika tein kiita’ kuali momachilia ika tein kipia uan ika tein ueli kichiua. Sayoj ke akin kisentoka kineki tein amo ueli kipia, amo keman yolpakis. Nejin techmachtia ke komo tiknekij tiyolpakiskej moneki tikitaskej tein tikpiaj uan amo tein amo ueli tikpiaj. ¿Uelis tiyolpakiskej ika tein tikpiajya oso ika tein tikchiuaj? Miakej kinemiliaj ke amo porin tinochin tikuelitaj timomachtiskej keniuj tikchiuaskej okseki taman. Sayoj ke kemaj uelis tiyolpakiskej ika tein tikpiajya oso ika tein tikchiuaj. ¿Keniuj? Techpaleuis maj tikmatikan nejin, neskayot kampa Jesús ika tajtoj talentos, tein moajsi itech Mateo 25:14-30 uan keniuj uelis tiyolpakiskej ika tein tikpiaj oso ika tein tikchiuaj, uan hasta keniuj uelis okachiok tiyolpakiskej. w21.08 21 § 5, 6

Jiova ininka motekipachoua “akin yolkuetaujtokej”. Tinochin, amo sayoj tokniuan tayekananij, uelis tikinyolchikauaskej tokniuan akin ijkon momachiliaj. Uelis tikchiuaskej nejin komo tikinnextiliaj ke ininka timotekipachouaj. Jiova kineki maj tikinnextilikan ke semi kintasojta (Prov. 19:17). No uelis tikinyolchikauaskej komo tiknextiaj yolyemanilis. Maj amo tiktemokan tikchiuaskej maj oksekin kiitakan tein tiuelij oso tein tikmatij, porin nejon uelis kichiuas maj peua tenexikoluikan. Okachi kuali, maj tikijtokan uan maj tikchiuakan tein kinyolchikauas tokniuan (1 Ped. 4:10, 11). Tein Jesús kichiuak keman yetoya iniuan imomachtijkauan uelis techpaleuis maj tikmatikan keniuj moneki tiyeskij iniuan tokniuan. Maski amo moajsini okse takat akin okachi ueyichiujkej ke yejua, katka ‘yolyemankatagat; uan yolkualtagat’ (Mat. 11:28-30). Yejua kinmachtiaya taltikpakneminij akin teikneltijkej katkaj kemej amo ouij kinkisaskia kiajsikamatiskej, uan kintaliliaya neskayomej tein amo ouijkej tein kinpaleuiskia maj kiajsikamatinij tamachtilis (Luc. 10:21). w21.07 23 § 11, 12

Maj tejuan tiktemokan titajtoskej iniuan tokniuan akin xiuejkejya. Maski xa amo semi tachiajok, yolika ojtokaj uan amo semi chikauakok tajtouaj, amo mosenkauaj, ta kisentokaj tekitij uan iixpan Jiova kipiaj “se kuali tokayit” (Ecl. 7:1, nota). Maj tikelnamikikan keyej Jiova kinpatiuita uan maj tiksentokakan tikinpatiuitakan. Maj tikchiuakan kemej Eliseo. Itech tonal keman Elías kikauaskiaya, Eliseo amo kinekik kikauas iselti, ta expa kiluij: “Amo nimitskauas” (2 Rey. 2:2, 4, 6). Maj tikinnextilikan tokniuan akin xiuejkejya ke yekmelauj ininka timotekipachouaj keman tikinchiuiliskej seki netajtanilmej, sayoj ke maj achto kuali tiknemilikan toni tikintajtaniskej (Prov. 1:5; 20:5). Kemej neskayot, ueliskia tikintajtaniskej: “¿Toni kichiuak xikonneltoka ke tein tionmomachtijtoya yejua tein melauak?”, “¿Toni tein tikonpanouani kichiuani okachi xionmotoki iuan Jiova?”, “¿Toni mitsonpaleuiani xikonsentoka xikontekitili Jiova ika yolpakilis?” (1 Tim. 6:6-8). Ompa, maj kuali tikakikan tein technankiliskej. w21.09 5 § 14; 7 § 15

Jesús tanauatij maj se kiteixmatilti iTajtol Dios uan maj se kinpaleui oksekin maj mochiuakan itatojtokakauan. Keman timochikauaj tiktakamatiskej nejon tanauatil tiknextiaj ke tiktasojtaj Dios (1 Juan 5:3). Maj tiknemilikan nejin: kemej tiktasojtaj Jiova, tikinmatiltiaj oksekin tein Biblia tamachtia. Xa ouij techkisak tikchiuaskej nejin. Xa semi timouiaj keman yekinika tikiskej tanojnotsalis, sayoj ke tikchiujkej porin tikmatiaj ke yejua nejon kineki Jesús maj tikchiuakan. Uan axkan xa amo ouijok techkisa titanojnotsaskej, sayoj ke ¿ouij techkisa titamachtiskej ika Biblia? Xa timotekipachouaj keman itech titanemiliaj nejin. Sayoj ke komo tiktajtaniaj Jiova maj techpaleui maj amo timouikan uan maj timoyolchikauakan tikiluiskej se taltikpaknenkej ox kiuelitaskia momachtis Biblia, yejuatsin uelis techpaleuis maj tiknekikan tikinpaleuiskej oksekin maj mochiuakan itatojtokakauan Cristo. w21.07 3 § 7

Ne uejkauj, takeualmej kintaliliayaj se neskayot oso marca tein kinextiaya akoni kitekitiliayaj. No ijkon, itech totonaluan taltikpakneminij kichiaskej maj nochin kemej yeskia kipiakan se neskayot ininmako oso ininixkuako. Ika okseki tajtolmej, kichiaskej maj nochin kinextikan ika tein kichiuaj uan ika tein kinemiliaj ke kinpaleuiaj tekiuajyomej. ¿Toni tikchiuaskej tejuan? ¿Tikauaskej maj kemej yeskia techtalilikan tomako oso toixkuako tein kinextis ke tikinpaleuiaj tekiuajyomej? Akin amo mokauaskej, kipiaskej ouijkayomej uan uelis kinpanos tein amo kuali. Amatajkuilol Apocalipsis kijtoua ke “amo aken ueliskia takouas uan nion no ueliskia tanamakas, komo amo kipia nojon neskayot” (Apoc. 13:17). Sayoj ke itekitikauan Dios kimatij toni kinchiuilis yejuatsin akin kipiaskej nejon neskayot (Apoc. 14:9, 10). Yejua ika amo kikauaskej maj kintalilikan, ta ininmako kemej yeskia ijkuiliujtos: “Niiaxka Jiova” (Is. 44:5). Axkan moneki tikchiuaskej tein techpaleuis maj amo tikauakan Jiova. Komo amo tikauaj, ika yolpakilis yejuatsin kijtos ke tiiaxkauan. w21.09 18 § 15, 16

Kuali tikchiuaskej totekiuj, komo tikseliaj ininnepaleuil okseki tokniuan. Tatitanil Pablo kinextilij Timoteo keniuj tanojnotsas uan keniuj tamachtis, uan kiyolchikauak maj nejon no kinnextiliani okseki tokniuan (1 Cor. 4:17). Kemej tanojnotsaj uan kemej tamachtiaj tokniuan uelis semi techpaleuis, ijkon kemej Timoteo semi kipaleuij tein Pablo kimachtij. Uan no, maj tiktajtanikan Jiova maj techpaleui. Nochipa keman titanojnotsatiuij, maj tiktataujtikan Jiova maj techixyekana. Uelis tikchiuaskej tekit tein tikpiaj komo iyektikatsin espíritu techpaleuia (Sal. 127:1; Luc. 11:13). Keman tiktataujtiskej Jiova, maj tikiluikan keniuj tiknekij maj techpaleui. Kemej neskayot, maj tiktajtanikan maj techpaleui maj ueli tikajsikan se taltikpaknenkej akin kineki kiixmatis uan maj kineki techkakis. No monekia maj timomachtikan. ITajtol Dios kijtoua: “Nankiyekajsikamatitiue [...] ten kuali; uan no nankajsikamatiske de keniu nankiyolpaktijtiyaske Dios; uan no nankajsikamatiske de keniu nankiyekajsikachiuaske ne tekit ten Dios kimonekiltia xikchiuakan” (Rom. 12:2). Keman timomachtiaj, okachi tikixmatij Dios uan nejon techpaleuia keman iniuan titajtouaj taltikpakneminij porin ueli kiitaj ke tikneltokaj tein tikiniluiaj. w21.05 18 § 14-16

Maj tiknemilikan ke tikmachtiaj ika Biblia se taltikpaknenkej, sayoj ke maski semi timochikauaj uan tiktataujtiaj Jiova maj kipaleui, amo kichiua tein momachtia uan yejua ika moneki tikauaskej, oso maj tiknemilikan ke amo tikpaleuianij nion akin maj moaui, ¿kijtosneki ke amo tikyekchiujtokej totekiuj uan ke Jiova xa amo techtatiochiuijtok? Maj tikitakan keniuj Jiova kiita tein tikchiujtokej. Jiova kiita ke timochikauaj titanojnotsaskej uan ke amo timosenkauaj. Yejuatsin kiita ke tikchiujtokej se kuali tekit komo tiksentokaj titanojnotsaj uan tikchiuaj ika netasojtalis, maski taltikpakneminij amo techkakiskej. Pablo kijkuiloj: “Dios Yejuatsin Yolmelauaktsin. lka ya nojon Yejuatsin amo keman kelkauatiu de keniu namejuan nanmotekitiltijke para Dios. Uan [...] keniu nankitasojtajtinemij Dios kuak namejuan nankinpaleuijtiualayaj in taneltokani yolchipauke. Uan namejuan nankinpaleuijtiyoue ok” (Heb. 6:10). Jiova amo kielkaua tekit tein tikchiuaj uan netasojtalis tein tiknextiaj, hasta komo amo tikpaleuianij nion se taltikpaknenkej maj moaui. Yejua ika, maj tikelnamikikan tein Pablo kijtoj itech tajkuilol tein axkan timomachtiaj. w21.10 25 § 4-6

Jesús katka kualtakat iniuan imomachtijkauan uan kinnextilij ke kintasojtaya. Kimatia ke tataman tein uelia kichiuayaj uan ke tataman tein kipanouayaj. Yejua ika amo nochin ueliskia kiseliskej sayoj se taman tekit, uan itech tanojnotsalis amo nochin ueliskia kinpaleuiskej taltikpakneminij maj mochiuanij itatojtokakauan. Sayoj ke Jesús kipatiuitaya chikaujkayot tein sejsemej kichiuayaj. Ueli tikitaj ke kinajsikamatia itech neskayot kampa ika tajtoj se takat akin kinmakak itakeualuan se tekit “ijkon keme kinitak de cada se den kipiayaj uelilis para tekitiske”. Ome takeualmej kichiujkej tekit tein kinmakakaj, uan maski se kitanik okachi tomin, takat kiniluij nochin ome takeualmej nejin tajtolmej: “Kuali yetok, tejuatsin, titakeual den semi tiyolkuali uan kuali titekitike” (Mat. 25:14-23). Jesús no kualtakat touan uan technextilia ke techtasojta. Kimati ke tataman tein ueli tikchiuaj uan ke tataman tein tikpanouaj, uan yolpaki ika tein timochikauaj tikchiuaskej. w21.07 23 § 12-14

Tekiuaj David amo nochipa teiknelij. Kemej neskayot, keman Nabal, se takat akin amo yolkuali katka, kiuijuikaltij David uan amo kinekik kinmakas tein kikuaskiaj yejua uan takamej akin iuan yajtinemiaj, David semi kualanik uan kijtoj ke kimiktiskia Nabal uan nochin takamej akin nemiaj ichan. Sayoj ke kemej Abigaíl, inamik Nabal, katka kualtakat uan amo yolijsiuia, niman kinuikilij tein kikuaskiaj. Yejua ika David amo kimiktijok Nabal nion takamej akin nemiaj ichan (1 Sam. 25:9-22, 32-35). Maj tikelnamikikan ke keman David semi kualanik kijtoj ke Nabal uan nochin takamej akin nemiaj ichan monekia mikiskej. Uan satepan kijtoj ke kinamikia mikis takat akin Natán ika tajtoj. David semi yolkuali katka. Komo ijkon, ¿keyej kijtoj ke takat akin Natán ika tajtoj kinamikia mikis? Maj tiknemilikan keniuj moajsia David itech nejon tonalmej. Ijkuak, amo kuali momachiliaya porin kichiujka tein amo kuali. Keman se tokniuj nochipa amo kuali ininka tajtoua oksekin, kinextia ke amo semi kuali mouikaok iuan Jiova. w21.10 12 § 17, 18; 13 § 20

¿Toni techmachtia tein kijtoj Pedro itech tajkuilol tein axkan timomachtiaj? Ke uelis yeski tiyektikej kemej Jiova, akin semi yektik, uan moneki ijkon tiyeskij. Xa tiknemiliskej ke amo uelis porin titajtakolejkej. Tatitanil Pedro miakpa mopoloj, sayoj ke tein kichiuak kinextia ke uelis tiyeskij tiyektikej. Keman moijtoua ke aksa yektik, miakej itech tanemiliaj aksa akin amo ixuetska uan kemej motakentia kinextia ke taneltoka. Sayoj ke nejon amo melauj, ta Jiova yektik uan Biblia kijtoua ke yejuatsin “Dios akin yolpaki” (1 Tim. 1:11, TNM). No kijtoua ke akin kiueyichiuaj yolpakij (Sal. 144:15). Jesús kinextij ke amo kuali tein kichiuayaj akin motaliliayaj “tilma ten kuilantinemij” uan kichiuayaj tein kuali porin kinekiaj maj oksekin kinitanij (Mat. 6:1; Mar. 12:38). Akin tikchiuaj kemej Cristo tikmatij ika tein Biblia kijtoua toni kijtosneki maj se yektik. Uan tikmatij ke toDios techtasojta amo keman techtajtaniskia maj tikchiuakan teisa tein amo tiueliskej. w21.12 2 § 1, 3

Jiova techmakani miak netetayokolilmej porin semi techtasojta, sayoj ke maj ueli tikueyichiuakan yejua okachi ueyi netetayokolil tein techmakak. Keman tiktakamatij itanauatiluan tiknextiliaj ke tiktasojtaj (1 Juan 5:3). Se tanauatil yejua tein Jesús techmakak. Yejua kijtoj ke moneki tikinpaleuiskej oksekin maj mochiuakan itatojtokakauan uan maj moauikan (Mat. 28:19). Jesús no technauatij maj timotasojtakan (Juan 13:35). Jiova kinselis kemej ichankauan akin kitakamatij, uan kiueyichiuaskej iniuan ichankauan akin moajsij itech nochi taltikpak (Sal. 15:1, 2). Maj tikintasojtakan oksekin. Netasojtalis yejua kualneskayot tein Jiova okachi kinextia (1 Juan 4:8). Achto ke tikixmatiskiaj, yejuatsin ipa techtasojtayaya (1 Juan 4:9, 10). Keman tikintasojtaj oksekin, tikchiuaj kemej yejuatsin (Efes. 5:1). Okachi uelis tiknextiskej ke tikintasojtaj taltikpakneminij komo tikinpaleuiaj maj kiixmatikan Jiova axkan ke ueliok (Mat. 9:36-38). Keman tikchiuaj nejin, tikinpaleuiaj maj kimatikan keniuj uelis mochiuaskej ichankauan Dios. w21.08 5, 6 § 13, 14

Kemej Jesús semi kitasojta Jiova motemakak kichiuas seki taman maski ouij katka, porin kinekia kiyolpaktis uan kinekia techpaleuis (Juan 14:31). Uan kinextij ke semi kintasojtaya taltikpakneminij ika tein kichiuak keman yetoya nikan taltikpak. Nochipa kintasojtak uan kiniknelij taltikpakneminij, hasta akin kiixnamikiaj. Okachi kinextij ke kintasojtaya keman kinnojnotsak ika iTekiuajyo Dios (Luc. 4:43, 44). No senkis kinextij ke semi kitasojtaya Dios uan taltikpakneminij, keman motemakak maj kitajyouiltianij uan maj kimiktianij taltikpakneminij tajtakolejkej. Ijkon techpaleuij maj ueli tikchiakan tinemiskej nochipaya. Kemej tiktasojtaj Jiova, iuan timotemaktijkej uan timoauijkej. Yejua ika, ijkon kemej Jesús, monekiskia tikintasojtaskej oksekin uan ijkon tiknextiskej ke tiktasojtaj Jiova. Tatitanil Juan kijkuiloj: “Komo tejuan amo tikinyektasojtaj in tokniuan taneltokani ten tikinyekitstokke ya, [...] amo no uelis tiktasojtaske Totajtsin Dios porin Yejuatsin amo [...] tikitstinemij” (1 Juan 4:20). w22.03 10 § 8, 9

Maski tikuelitaj tiktataujtiskej Jiova uan timomachtiskej Biblia, kemansa ouij techkisa tikchiuaskej. Tikpiaj miak tekit, yejua ika xa ouij techkisa tikxeloskej tiempo uan tikueyichiuaskej Jiova. Kemej moneki titekitiskej, tikinyekpiaskej tochankauan uan tikchiuaskej okseki taman, xa tiknemiliaj ke amo ueliok tiktataujtiaj Jiova, timomachtiaj oso itech titanemiliaj tein timomachtiaj. Sayoj ke no moneki timoyekpiaskej itech okseki taman tein tikchiuaj, porin maski kuali yetok maj tikchiuakan, uelis techkuilis miak tiempo uan amo uelisok tikueyichiuaskej Jiova. Kemej neskayot, kemansa tinochin moneki tepitsin timoseuiskej uan timoixpetaniskej, sayoj ke komo uejkauak tikchiujtokej nejon, amo tikpiaskejok tiempo tikueyichiuaskej Jiova. Moneki tikelnamikiskej ke neixpetanilis amo tayekantok (Prov. 25:27; 1 Tim. 4:8). w22.01 26 § 2, 3

Keman Jiova kinnauatij israelitas maj kintasojtanij oksekin, amo sayoj kijtosnekia maj kintasojtanij okseki israelitas, ta no kinnauatij maj kintasojtanij akin amo katkaj israelitas uan iniuan nemiaj. Ijkon kijtoua Levítico 19:33, 34. Israelitas monekia kiitaskej akin okseko kayot kemej aksa akin no ompa kayot katka, uan monekia kitasojtaskej kemej yejuan motasojtayaj. Kemej neskayot, monekia kinkauaskej yejuan uan akin kipanouayaj tatasojtilis maj kiololouanij tein kikaujtiayaj keman kitekiaj tatok (Lev. 19:9, 10). Tiitekitikauan Dios itech nejin tonalmej no moneki tikintasojtaskej akin okseko kayomej (Luc. 10:30-37). ¿Keniuj? Itech nochi taltikpak moajsij millones taltikpakneminij akin okseko kayomej, uan sekin xa nemij kampa ika tejuan tinemij. Moneki tikinpoujkaitaskej nejon takamej, siuamej uan konemej. w21.12 12 § 16

Komo axkan nochipa tiktemouaj inepaleuil Jiova, okachi titakuaujtamatiskej ke techpaleuis satepan. Kemej neskayot, moneki titakuaujtamatiskej iuan Jiova komo moneki tikiluiskej akin tiktekitiliaj maj techkaua maj amo titekitikan seki tonalmej porin tiknekij tiaskej toueyi nechikol, oso komo moneki tikiluiskej maj techpatili horas tein titekitij uan ijkon uelis tiaskej nechikolmej uan okachi titanojnotsaskej. Maj tiknemilikan ke techiluia ke amo uan techkuilia totekiuj. ¿Titakuaujtamatij ke Jiova amo keman techkauas uan nochipa techmakas tein ika timoixpanoltiskej? (Heb. 13:5). Miakej tokniuan akin kitekitiliaj Jiova miak tonalmej kiitanij keniuj yejuatsin kinpaleuiani keman okachi monekia. Jiova amo keman tekaua. Kemej Jiova techpaleuia, amo moneki tikmouiliskej tein panos satepan. Komo tiktayekanaltiaj tiktekitiliskej, yejuatsin amo keman techkauas. w22.01 7 § 16, 17

Komo akin kikalankixtiaj itech nechikol amo se totasojikniuj oso amo tochankauj, xa niman tiktakamatij tein kiixtaliaj tokniuan tayekananij. Sayoj ke, komo kikalankixtiaj se tochankauj oso se totasojikniuj. Xa timotajtaniskej ox kiitakej nochi tein panok oso ox kimelaujkej kemej Jiova kineki. ¿Toni techpaleuis maj tikitakan kemej kinamiki tein kiixtaliaj tokniuan tayekananij? Moneki tikelnamikiskej ke Jiova kiixtalij maj kikalankixtikan itech nechikol akin tajtakolchiua porin nejon kinpaleuia okseki tokniuan uan no kipaleuia yejua. Komo amo kikalankixtiskiaj akin amo moyolnonotsa ueliskia kichiuas maj okseki tokniuan no tajtakolchiuakan (Gál. 5:9). Uan no, xa amo kiita ke kichiuak se ueyi tajtakol uan ke moneki kipatas kemej tanemilia uan tein kichiua komo kineki oksepa kuali mouikas iuan Jiova (Ecl. 8:11). Uelis titakuaujtamatiskej ke tokniuan tayekananij kiitaj ke semi moneki kuali kiixejekoskej ox kikalankixtiskej itech nechikol se tokniuj. w22.02 5, 6 § 13, 14

Okachiok moneki nejin keman se tokniuj yekinika amo kineki kichiuas tein Biblia tayolmajxitia. Tokniuan tayekananij amo moneki kualaniskej, ta moneki kichiuaskej kemej Jesús. Yejua ika tokniuj tayekankej uelis kitajtanis Jiova maj kipaleui tokniuj akin kiyolmajxitij, maj kiita keyej monekia kiyolmajxitiskej uan maj kichiua. Xa tokniuj moneki itech tanemilisok tein kiluijkej. Komo tokniuj tayekankej amo yolijsiui uan kinextia netasojtalis, akin kiyolmajxitij okachi amo ouij kikisas kichiuas tein kiluij. Tein melauj, tayolmajxitilis nochipa moneki kisas itech iTajtol Dios. Maj tikelnamikikan ke tiktemouaj titayolmajxitiskej kemej tapaleuis uan teyolpaktis (Prov. 27:9). w22.02 18 § 17; 19 § 19

Komo tiktajtaniaj maj titaxikokan keman tikpiaj se ouijkayot oso maj amo tikchiuakanok tein amo kuali xa tiknemiliskej ke amo niman technankilia. ¿Keyej Jiova amo nochipa niman technankilia? Kiita ke ijkon tiknextiaj ke iuan titakuaujtamatij (Heb. 11:6). Uan no, keman tiktajtaniaj maj techpaleui maj tikchiuakan tein kiyolpaktia, yejuatsin kineki kiitas ox yekmelauj tiknekij tikchiuaskej tein kineki (1 Juan 3:22). Yejua ika, komo tiktajtaniaj maj techpaleui maj amo tikchiuakanok teisa tein amo kiyolpaktia, maj amo tiyolijsiuikan uan maj timochikauakan tikaujtiaskej nejon tein amo kuali. Jesús kiteajsikamatiltij ke Dios xa amo nochipa niman technankilis keman tiktataujtiaj. Yejua kijtoj: “Xitajtanilikan Dios uan namechmaktis ne ten moneki. Ijkon keme tensa se kiyektemoa de se kipoloa, no ijkon xiktatatautilikan Dios uan Yejuatsin namechseliltis. Uan no ijkon kuak se takakalatsa ma tatapoukan, no ijkon xiksentokakan xikilikan Dios ten moneki uan Dios namechmakas. Porin nochi tokniuan ten tajtaniliske, yejuan nojonkes Dios kinseliltis. Uan nochi tokniuan ten kitemoske tensa tatiochiualis, yejuan nojonkes Dios kinpaleuis para ma kajsikan. Uan nochi tokniuan ten tanotsaske, yejuan nojonkes Dios kintatapouilis” (Mat. 7:7, 8). w21.08 8 § 1; 10 § 9, 10

Moneki tiksentokaskej timomachtiskej porin nejon techpaleuis maj mochikaua totakuaujtamatilis itech toTachijchiujkauj (Jos. 1:8). Seki taman tein kijtojka ke mochiuaskia mochiuakya uan ke maski miakej kijkuilojkej, tein kijtoua amo mopapata. Nejin techpaleuis maj okachi titakuaujtamatikan ke techchijchiujkej uan ke Akin techchijchiuak semi tamatkej uan tetasojtakej, uan ke yejuatsin kichiuak maj moijkuilo Biblia (2 Tim. 3:14; 2 Ped. 1:21). Keman timomachtiskej iTajtol Dios, maj tikitakan ke tein tayolmajxitia semi tepaleuia. Kemej neskayot, Biblia uejkaujya tanejmachtijka ke semi se kipatiuitas tomin amo tepaleuia uan ke teualkuilia “miak tataman ouijkayome” (1 Tim. 6:9, 10; Prov. 28:20; Mat. 6:24). Nejin kinextia ke semi tapaleuia maj Biblia tayolmajxiti maj amo semi se kipatiuita tomin. ¿Tikelnamikij okseki tajkuilolmej tein semi techpaleuianij? Keman itech titanemiliaj kuali tayolmajxitilis tein kitemaka Biblia, tikitaj ke toTachijchiujkauj akin semi techtasojta kimati toni okachi techpaleuis, uan yejua ika nochipa tiktemoskej maj yejuatsin techyolmajxiti (Sant. 1:5). Nejon kichiuas maj okachi tiyolpakikan (Is. 48:17, 18). w21.08 17, 18 § 12, 13

Komo tionxiuejya uelis tiontakuaujtamatis ke Jiova kielnamiki nochi tein tikonchiuani. Tionmochikauani tikonteixmatiltis iTajtol. Tiontaxikouani keman tikonpanouani ouijkayomej, uan kemansa semi uejueyi. Tikontakamatini tein Biblia tanauatia uan tiontapaleuiani maj oksekin amo kitapanauilikan, tikonchiuani uejueyi tekimej tein tikonseliani uan tikonmachtiani oksekin. Tionmochikauani tikonchiuas tein inechikol Jiova yankuixtok kiixtaliani, uan no tikonpaleuiani uan tikonyolchikauani akin kitekitiliaj Jiova miak tonalmej. Jiova semi mitsontasojta porin amo tikonkaua, uan kijtoua ke “amo kinkauas akin amo kikauaj” (Sal. 37:28). No kijtoua: “Hasta keman tikuapochinias nejua niksentokas nimitspaleuijtos” (Is. 46:4). Yejua ika amo xikonnemili ke kemej tionxiuejya amo tiontapaleuiaok itech inechikol Jiova, porin kemaj tiontapaleuia. w21.09 3 § 4

Porin semi tamatkej. Jiova nochipa kiixtalia kichiuas tein tapaleuia. Biblia kijtoua ke “tamachilis ten ualeutok de Dios” kipia teiknelilis uan kichiua tein kuali (Sant. 3:17). Ijkon kemej se tepopaj tetasojtakej, Jiova kimati ke iteiknelilis nochipa kinpaleuia ikoneuan (Is. 49:15). Kinpaleuia maj ueli kichiakan tein kuali maski tajtakolejkej. Kemej semi tamatkej, kinnextilia teiknelilis nochipa keman kiita ke kinamiki, sayoj ke no kimati kemanian amo kinamiki maj kinnextili. Yejuatsin amo kinextia teiknelilis komo ijkon tapaleuijtoskia maj mochiua tein amo kuali. Maj tiknemilikan ke se tokniuj auilnemi maski kimati ke amo kuali. ¿Toni monekiskia tikchiuaskej? Tatitanil Pablo kijkuiloj: “Amo iuan ximouikatinemikan” (1 Cor. 5:11). Akin tajtakolchiuaj uan amo moyolnonotsaj kinkalankixtiaj itech nechikol. Ijkon moneki mochiuas porin nejon kinyekpia okseki tokniuan, uan no se kinextia ke se kitakamati itanauatiluan Dios. w21.10 9, 10 § 7, 8

Tikueyichiuaj Jiova keman titapaleuiaj ika totomin itech itekiyo Dios. Keman israelitas yaskiaj iixpan Jiova monekia kiuikiliskej se netetayokolil (Deut. 16:16). Monekia kimaktiliskej teisa ijkon kemej ueliskiaj, ijkon kinextiayaj ke kitasojkamatiaj nochi tamachtilis tein kiseliayaj. Uan tejuan, ¿keniuj uelis tiknextiskej ke tiktasojtaj Jiova uan ke tiktasojkamatij nochi tamachtilis tein techmaka? Se taman yejua komo titapaleuiaj ika totomin itech tonechikol uan itech tekit tein mochiujtok itech nochi taltikpak ijkon kemej tiueliskej. Tatitanil Pablo kijtoj nejin: “Tein aksa kitemaka ika nochi iyolo kiyolpaktia Dios, keman kitemaka tein kipia uan amo tein amo kipia” (2 Cor. 8:4, 12, TNM). Jiova kipatiuita tomin tein titemakaj ika nochi toyolo maski amo miak (Mar. 12:42-44). w22.03 24 § 13

Tokniuan tayekananij amo uelis kichiuaskej maj amo tikpiakanok ouijkayomej. Sayoj ke Jiova kineki maj mochikauakan kinyekpiaskej uan kinyolchikauaskej itekitikauan. ¿Keniuj tayekananij uelis kinpaleuiskej tokniuan maski kipiaj miak tekit? Maj tikchiuakan tein kichiuak tatitanil Pablo. Yejua nochipa kitemouaya kiniluis tokniuan tein kuali tein kichiuayaj uan kinyolchikauaya. Semi kuali komo tokniuan tayekananij no ijkon kichiuaj uan kinnextiliaj tokniuan ke kintasojtaj (1 Tes. 2:7). Pablo senkis kiniluij tokniuan ke Jiova uan yejua semi kintasojtayaj (2 Cor. 2:4; Efes. 2:4, 5). Kinitaya kemej itasojikniuan uan kixelouaya tiempo iniuan yetos. Kinextiaya ke iniuan takuaujtamatia keman kiniluiaya tein kitekipachouaya uan tein ouij kikisaya kichiuas (2 Cor. 7:5; 1 Tim. 1:15). Pablo amo sayoj itech tanemilijtoya kuejmolmej tein yejua kipiaya, ta kitemouaya keniuj kinpaleuis tokniuan. w22.03 28 § 9, 10