Octubre

Uan tein titamachtiaj uan tein tikneltokaj kisa itech iTajtol Dios. Maski ijkon, miakej amo kinekij kikakiskej tein tikteixmatiltiaj porin kinemiliaj ke amo kualtsin kemej tikueyichiuaj Dios uan porin tein titamachtiaj amo yejua tein kinekij kikakiskej. ¿Toni mitsonpaleuis amo xikonkaua tein tionmomachtia? Tatitanil Pablo kiniluij tokniuan akin nemiaj Roma: “Moneki ma se kiyekakili in tanojnotsalis de Cristo para ijkon uelis ya se takuautamatis” (Rom. 10:17). Mochikauas totakuaujtamatilis komo timomachtiaj iTajtol Dios, amo komo tikchiuaj tein momattokej kichiuaskej itech seki taneltokalismej, tein maski tiknemiliskej ke semi kualtsin itech Biblia amo moijtoua ke moneki se kichiuas. Moneki tikchikauaskej totakuaujtamatilis ika tein timomachtiaj itech Biblia, porin “komo se aksa amo takuautamatinemis iuan Dios, ijkuakon amo uelis kiyolpaktijtinemis” (Heb. 11:1, 6). Yejua ika, komo tiknekij tikneltokaskej ke tein timomachtijtokej yejua tein melauak, amo moneki tikitaskej uejueyi tachiualismej, ta sayoj moneki kuali timomachtiskej Biblia. Nejon techpaleuis maj mochikaua totakuaujtamatilis uan maj tikneltokakan ke tein timomachtiaj yejua tein melauak. w21.05 4, 5 § 11, 12

Tatitanil Pablo kipiak miak ouijkayomej. Okachiok monekik maj Jiova kimakani chikaualis keman kiuijuitekkej, keman kitetenkej uan keman kitsakkej (2 Cor. 11:23-25). Amo pinauak kijtos ke kemansa monekik mochikauas amo mosenkauas (Rom. 7:18, 19, 24). Uan no, kipiaya se ouijkayot tein kijtoj ke ‘keme yeskia se uitsti kalakiskia itech inakayo’, uan semi kitataujtiaya Dios maj kiajchiuiliani (2 Cor. 12:7, 8). Jiova kimakak Pablo chikaualis tein kipaleuij maj kisentokani tanojnotsani maski kipiaya ouijkayomej. Maj tiknemilikan nochi tein kichiuak Pablo. Kemej neskayot, keman tsaktoya itech se kali ompa Roma kinnojnotsak miakej taltikpakneminij, xa hasta seki tekiuanij (Hech. 28:17; Filip. 4:21, 22). No kinnojnotsak tateuianij romanos uan nochin akin kikalpanouayaj (Hech. 28:30, 31; Filip. 1:13). No ijkuak Dios kichiuak maj kijkuilouani seki amamej tein kinpaleuij tokniuan itech nejon tonalmej uan tein no techpaleuia tejuan. w21.05 21 § 4, 5

Uzías, semej akin tekiuajtik Judá, moueyimatik uan yejua ika amo kikakik tein kiyolmajxitijkej uan kinekik kichiuas tein amo yejua kinamikia. Achto kichiujka miak taman tein kuali. Tatanik itech miak neteuilismej, kinchijchiuak miak xolalmej uan tatokak itech miak talmej. “Dios akin melauak kichiuak maj kuali kiyani” (2 Crón. 26:3-7, 10). Sayoj ke Biblia kijtoua ke “niman keman kipiak chikaualis, peuak moueyimati uan nejon kiualkuilij tein amo kuali”. Jiova kijtojka ke sayoj tiopixkamej ueliskia kichichinoskej kopal itech templo. Sayoj ke yejua nejon tein kinekik kichiuas Uzías. Yejua ika Jiova kichiuak maj kikuini lepra (2 Crón. 26:16-21). Tejuan no uelis timoueyimatiskej kemej Uzías uan nejon uelis kichiuas maj titajtakolchiuakan. Kemaj, ueliskia panos komo semi totech titanemiliaj. Maj nochipa tikelnamikikan ke tein ueli tikchiuaj uan tekimej tein tikpiaj Jiova techmakatok (1 Cor. 4:7). Komo timoueyimatij, Jiova amo techmakas tekimej. w21.06 16 § 7, 8

Jesús kimatia ke amo nochipa kuali kinyaskia imomachtijkauan itech tanojnotsalis. Tein melauj, amo tikmatij kanachimej akin kinkakkej nejon tonal satepan mochiujkej itatojtokakauan Cristo. Imomachtijkauan Jesús monekia yolpakiskej porin Jiova kiyolpaktiaya tein kichiuayaj, uan amo sayoj porin taltikpakneminij kuali kinkakiaj. Komo tiksentokaj titanojnotsaj, uelis tinemiskej nochipaya. Keman timochikauaj tikteixmatiltiskej iTajtol Dios uan titamachtiskej, no timoyekanaj ika espíritu porin tikauaj maj iyektikatsin espíritu Dios techpaleui itech tonemilis. “Komo amo tisiouij”, Jiova kijtoua ke tinemiskej nochipaya, hasta komo amo ueli tikpaleuiaj nion se taltikpaknenkej maj moaui (Gál. 6:7-9, TNM). w21.10 26 § 8, 9

Se tonal, Jesús uan imomachtijkauan semi sioujtoyaj porin tanojnotskaj nochin tonal, yejua ika yajkej kampa ueliskia moseuiskej. Sayoj ke miakej taltikpakneminij ompa kinchixtoyajya. Jesús kiniknelij nejon taltikpakneminij uan “peuak kinmachtia ika miak tataman tamachtilisme”. Porin kimatia keniuj momachiliayaj uan kinekia kinpaleuis. Kimatia ke semi tajyouijtoyaj uan ke monekia kikakiskej tein kinyolseuiskia. Axkan, taltikpakneminij no moneki kikakiskej tein kinyolseuis maski moitas ke yolpakij. Yejuan kemej yeskiaj ichkamej akin poliujkej, akin amo akin kinyekpia uan amo akin kinixyekana. Tatitanil Pablo kijtoj ke amo kiixmatij Dios uan ke amo kimatij ke satepan okachi kuali tinemiskej (Efes. 2:12). Keman tiknemiliaj ke akin nemij kampa titanojnotsaj semi kinpaleuis komo kiixmatij Dios, netasojtalis uan teiknelilis techolinis maj tikinpaleuikan. Uan uelis tikinpaleuiskej komo tikiniluiaj ox kiuelitaskiaj momachtiskej Biblia. w21.07 5 § 8

Akin sayoj itech tanemilia moueyimati uan sayoj kitayekanaltia itanejnekilis. Akin tenexikoluia amo sayoj kinejneki tein okse taltikpaknenkej kipia, ta no kineki kikuilis. Keman se taltikpaknenkej kinexikoluia okse, tein melauj kitauelita. Keman sayoj totech titanemiliaj oso titenexikoluiaj kemej yeskia se okuiltsin tein kikuajtiuj kouit tein ika chijchiujtok se kali. Maski kali semi kualtsin moitas, ejkos tonal keman uetsis. No ijkon, se tokniuj xa uejkaujya kitekitilijtok Jiova, sayoj ke komo moueyimati oso tenexikoluia, ejkos tonal keman uetsis (Prov. 16:18). Amo kitekitilisok Jiova uan kiualkuilis tein amo kuali yejua uan oksekin. Techpaleuis maj amo sayoj totech titanemilikan komo tikchiuaj tein tatitanil Pablo kinyolmajxitij tokniuan: “Amo ximoaxkatilijtiyakan de namejuan namopanolis san. Uan amo no teyi xikchiuakan tech namonemilis tenika nanmoueyichiuaske san. Ta [...] xinentinemikan ika ne yolyemanalis. Uan [...] xikpouakan in oksekin tokniuan taneltokani ke yejuan kachi ueyi chiuanime” (Filip. 2:3). w21.07 15, 16 § 6-8

Sekin kinemiliaj ke itech taneltokalis tein melauak monekiskia monankilis nochi netajtanilmej tein se kipia, hasta netajtanilmej tein amo monankiliaj itech Biblia. ¿Taixejekol maj tiknemilikan nejon? Maj tikitakan ineskayo tatitanil Pablo. Maski kiniluij tokniuan “Ximoyekixejekoltijtiyakan ika in tanextililisme ten namechmakaj”, no kijtoj ke moajsia miak taman tein yejua amo kiajsikamatia (1 Tes. 5:21). Pablo kijtoj ke tikajsikamatij “seki san tamachilis de Dios” uan ke “tepitsin san tikyekajsikaixmatij in tamachilisme” (1 Cor. 13:9, 12). Pablo amo nochi kimatia, uan tejuan amo no. Sayoj ke kiajsikamatia tamachtilismej tein tayekantokej. Kimatia miak taman tein kipaleuiaya maj takuaujtamati ke tein kineltokaya yejua tein melauak. ¿Toni techpaleuis maj titakuaujtamatikan ke tein tikneltokaj yejua tein melauak? Se taman, komo tikitaj keniuj Jesús kiueyichiuak Dios uan keniuj tikueyichiujtokej tiitaixpantijkauan Jiova. w21.10 18, 19 § 2-4

Tokniuantsitsin akin nanxiuejkejya, komo nankitekitilijtokej Jiova miak tonalmej oso amo, uelis semi nankinpaleuiskej oksekin. ¿Keniuj? Ximochikauakan nanyolpakiskej ika tekit tein axkan nankipiaj, xikixtalikan nankichiuaskej okseki taman uan itech xitanemilikan tein kemaj ueli nankichiuaj. Keman kinekia kichijchiuilis Jiova se kali, yejuatsin kiluij ke kiixtalijka maj telpoch Salomón kichijchiuiliskia. David kitakamatik uan peuak kichiua miak taman tein tapaleuiskia keman peuaskia tekit (1 Crón. 17:4; 22:5). Amo kinemilij ke yejua kinamikia kichiuas nejon tekit porin Salomón telpochok katka uan ayamo kimatia miak taman (1 Crón. 29:1). David kimatia ke xiujmej tein kipiaskiaj akin kiixyekanaskiaj tekit oso tein kimatiaj kichiuaskej amo yejua tein tapaleuiskia maj kuali kisani tekit, ta kimatia ke kuali kisaskia porin Jiova kintatiochiuijtoya. Ijkon kemej David, tokniuan takamej akin xiuejkejya kisentokaj kitekitiliaj Jiova maski mopatas tekit tein kichiuayaj. Uan kimatij ke Jiova kintatiochiuis tokniuan takamej akin axkan kichiuaj tekimej tein achto yejuan kichiuayaj. w21.09 9 § 4; 10 § 5, 8

Keman tikixtaliaj tikchiuaskej seki taman tein ika tiktekitiliskej Jiova, techpaleuia maj tiyolpakikan uan maj tikmattokan toni tikchiuaskej. Sayoj ke moneki tikixtaliskej tein tejuan uelis tikchiuaskej. Maj amo tiknekikan tikchiuaskej tein oksekin kiixtaliaj porin komo amo ueli tikchiuaj, amo kuali timomachiliskej uan timotayokoltiskej (Luc. 14:28).Tiitekitikauan Jiova titatamamej, sayoj ke yejuatsin techpatiuita tisejsemej. Jiova amo kichiuak maj iuan timotokikan porin okachi tiuelij oso okachi titamatinij ke oksekin, ta porin techitak uan kiitak ke tiyolyemankej uan ke tiknekiaj maj techmachti uan maj techpaleuiani maj timopatakan. Uelis titakuaujtamatiskej ke yolpaki keman timochikauaj kuali tiktekitiliskej. Kemej titaxikouanij uan amo tikauanij tiknextiaj ke tiyolmelaujkej uan ke tiyolkualmej (Luc. 8:15). Yejua ika maj tiksentokakan tikmakakan Jiova tein okachi kuali. Komo ijkon tikchiuaj, tiyolpakiskej ika tein tejuan uelik tikchiujkej (Gál. 6:4). w21.07 24 § 15; 25 § 20

Keman amo mochiua tein melauak. Kemej neskayot, keman tokniuan tayekananij kimatij ke se tokniuj tajtakolchiuak kitajtaniaj Jiova maj kinmaka ‘itamachilis’ porin kinekij maj kinpaleui maj kiitakan tein panok kemej yejuatsin kiita (Sant. 3:17). Kinekij kipaleuiskej tokniuj maj amo kisentokaok kichiua tein amo kuali (Sant. 5:19). No kinekij kinyekpiaskej nochin tokniuan itech nechikol uan kinyolseuiskej akin kinyolkokoj tokniuj akin tajtakolchiuak (2 Cor. 1:3, 4). Uan keman tokniuan tayekananij kimatij ke se tokniuj tajtakolchiuak, yekinika moneki kimatiskej toni yekmelauj panok uan nejon xa uejkauas. Ompa, moneki kichiuaskej netataujtil, moneki kiyolmajxitiskej ika Biblia ika nejmachkayot uan moneki kimelauaskej “kemej kinamikis” (Jer. 30:11). Tayekananij amo ijsiujka kiixtaliskej keniuj kimelauaskej tokniuj. Okachi tapaleuia itech nechikol keman tayekananij mokauaj maj Jiova kinixyekana. w21.08 11 § 12, 13

Amatajkuilol Rut ika tajtoua Noemí, Rut, akin katka isiuamon, uan se takat akin monotsaya Boaz, akin kitasojtaya Dios uan katka ichankauj inamik Noemí. Kemej ompa Israel amo onkayaok toni kikuaskej, Noemí, inamik uan ome ininokichpipiluan mokaltalitoj Moab. Keman ompa nemiaj, inamik momikilij. Ompa, iokichpipiluan monamiktijkej, sayoj ke satepan no momikilijkej (Rut 1:3-5). Nochi nejon kichiuak maj Noemí semi motayokoltiani. Yejua ika kinemilij ke Jiova kitajyouiltijtoya. Maj tikitakan toni kinemiliaya: “Jiova nechixtopeuak”. “Akin kipia nochi uelilis kichiuani maj nikpia ueyi tayokol”. No kijtoj: “Jiova nechixtopeuak. Akin kipia nochi uelilis kichiuani maj semi nitajyoui” (Rut 1:13, nota, 20, 21). Jiova kiajsikamati ke tayokol uelis kichiuas maj akin tamatkej amo yektanemili (Ecl. 7:7). Kichiuak maj Rut kinextiliani netasojtalis tein amo tami. Rut kipaleuij ika netasojtalis maj amo kisentokani motayokoltiani uan maj kiitani ke Jiova kitasojtayaok. w21.11 9 § 9; 10 § 10, 13

Komo timochikaujtokejya kuali tikchiuaskej tekit tein tikpiaj, ¿kijtosneki ke amo moneki tiktemoskej okachi tiktekitiliskej Jiova? Amo. Moneki tikixtaliskej tikchiuaskej tein techpaleuis maj okachi kuali titanojnotsakan uan maj okachi kuali titamachtikan, uan tein uelis ika tikinpaleuiskej tokniuan. Uelis tikchiuaskej tein tikixtaliskej komo tiknextiaj tamatilis uan yolyemanilis uan amo sayoj totech titanemiliaj, ta tiktayekanaltiaj tikinpaleuiskej oksekin (Prov. 11:2; Hech. 20:35). ¿Toni uelis tikixtaliskej tikchiuaskej? Maj tiktajtanikan Jiova maj techpaleui maj tikmatikan toni kemaj uelis tikchiuaskej (Prov. 16:3). ¿Uelis tikixtaliskej timochiuaskej precursores auxiliares oso regulares, titapaleuitiuij Betel oso itech kalchiualis? ¿Uelis timomachtiskej okse tajtol oso titapaleuitiuij kampa monekij okachi tanojnotsanij? w21.08 23 § 14, 15

Jiova kiita ke netasojtalis tein amo tami oso tein amo tekaua semi moneki (Os. 6:6). ToDios kiluij tanauatijkej Miqueas maj tanauatiani maj tikpatiuitakan netasojtalis tein amo tami (Miq. 6:8, nota). Sayoj ke achto moneki tikmatiskej toni netasojtalis tein amo tami. La Biblia. Traducción del Nuevo Mundo kipia tajtolmej “netasojtalis tein amo tami” kemej doscientos treintajpa. ¿Uan toni netasojtalis tein amo tami? Itech glosario tein kipia nejin Biblia moijtoua: “Yejua netasojtalis tein tikpialiaj aksa porin ijkon tikiluijkej, porin amo tiknekij tikauaskej uan porin tiknekij tiksentokaskej tiktasojtaskej. Miakpa, yejua netasojtalis tein Dios kinpialia taltikpakneminij, sayoj ke kemansa se taltikpaknenkej no kinextilia nejin netasojtalis okse taltikpaknenkej”. Jiova yejuatsin akin okachi kinextia nejin netasojtalis. Yejua ika tekiuaj David kijtoj: “Jiova, monetasojtalis tein amo tami ajsi iluikak [...]. NoDios, ¡semi kipia ipatiuj monetasojtalis tein amo tami!”. Kemej David, ¿tikpatiuitaj inetasojtalis Dios tein amo tami? (Sal. 36:5, 7). w21.11 2 § 1, 2; 3 § 4

Jiova kinpia itekitikauan akin kiueyichiuaj uan kinita kemej ichankauan. Se yejua Jesús, akin “ipa yetinemi [...] achtopa ke mochiuaskia nochi ten ongak”, uan miakej ángeles (Col. 1:15; Sal. 103:20). Keman Jesús yetoya nikan taltikpak, kinextij ke taltikpakneminij akin tatakamatij no uelis kiitaskej Jiova kemej ininTajtsin. Se tonal keman iniuan tajtojtoya imomachtijkauan kinextij keniuj kiitaya Jiova keman kijtoj “noTajtsin uan namoTajtsin” (Juan 20:17, TNM). Uan no, keman timotemaktiaj iuan Jiova uan timoauiaj, miakej tokniuan takamej uan siuamej mochiuaj kemej tochankauan uan semi techtasojtaj (Mar. 10:29, 30). Jiova se tePopaj tetasojtakej, uan Jesús kineki maj tikitakan kemej yejua kiita: kemej se tepopaj tetasojtakej akin uelis tiknojnotsaskej keman yeski. Amo kineki maj tiknemilikan ke sayoj technauatia toni tikchiuaskej uan ke amo tetasojta. Itech netataujtil yekinika kijtoj: “Toueyitajtsin”. Jesús ueliskia techmachtis maj tikiluikan Jiova ‘Akin tikpia nochi chikaualis’, ‘toTachijchiujkauj’ oso “Totayekankau [akin] nachipa yoltinemis”, porin nejin tokaymej semi kinamikij uan moajsij itech Biblia (Gén. 49:25; Is. 40:28; 1 Tim. 1:17). Sayoj ke techmachtij maj tikiluikan “Toueyitajtsin”. w21.09 20 § 1, 3

Tekiuaj Manasés amo kinekik kinkakis tanauatianij akin Jiova kintitanka maj kinejmachtitij. Yejua ika “Jiova kichiuak maj akin kinixyekanayaj itateuijkauan akin tekiuajtia Asiria kinteuikij [akin nemiaj Judá]. Kikitskijkej Manasés ika garfios, kijilpijkej ika ome teposmej tein chijchiujtoyaj ika cobre uan kiuikakej Babilonia”. Nesi ke keman tsaktoya ompa Babilonia itech tanemilij nochi tein kichiujka. “Kisentokak moyolyemanij iixpan ininDios iuejkaujtatuan”. Sayoj ke no kichiuak okse taman: “Kitataujtij Jiova iDios maj kitapojpolui” uan “kisentokak kitataujtij” (2 Crón. 33:10-12). Jiova kinankilij Manasés. Kiitak ke yekmelauj mopatakaya ika tein kijtouaya itech inetataujtiluan. Jiova semi kiiknelij uan kikauak maj oksepa tekiuajti. Manasés mochikauak kinextis ke yekmelauj moyolnonotska. w21.10 4 § 10, 11

Priscila uan Áquila monekik kikauaskej nochi tein kiixmatiaj, monekik kitemoskej kani nemiskej uan peuas tekitiskej ompa. Keman nemiajya Corinto peuak tapaleuiaj itech nechikol, uan kinyolchikaujkej tokniuan iuan tatitanil Pablo. Satepan tapaleuitoj itech okseki xolalmej kampa monekiaj okachi tanojnotsanij (Hech. 18:18-21; Rom. 16:3-5). ¡Priscila uan Áquila kipiayaj miak tekit uan semi yolpakiaj! Tokniuan akin kipiaj ininnamik uelis kitayekanaltiskej kitekitiliskej Jiova kemej kichiujkej Priscila uan Áquila. Semi kuali maj ika tajtokan achto ke monamiktiskej keniuj kinekij kitekitiliskej Jiova. Keman kiixtaliaj nejin uan mochikauaj ijkon kichiuaskej, uelis okachi kiitaskej keniuj kinpaleuia yektikatsin espíritu (Ecl. 4:9, 12). w21.11 17 § 11, 12

Nejin senkis kinextia ke moneki tikinpoujkaitaskej totatuan kemej Jiova tanauatia. Maj tikelnamikikan ke tajtolmej “Moneki nanyeskij nanyektikej porin nejua, Jiova nanmoDios, niyektik” moijtoua achto ke tanauatil “moneki nankipoujkaitaskej nanmomomaj uan nanmopopaj” tein moajsi itech Levítico 19:2. Keman itech titanemiliaj tanauatil tein Jiova techmakak, ueliskia timotajtaniskej: “¿Nikinpoujkaita notatuan?”. Komo tikitaj ke amo tikchiuanij kemej moneki, maj tikixtalikan okachi tikinpoujkaitaskej. Melauj ke amo uelis tikpataskej tein achto tikchiujkej, sayoj ke axkan uelis timochikauaskej okachi tikinpaleuiskej totatuan uan tikchiuaskej seki taman iniuan. Xa uelis okachi iniuan tietoskej, uelis okachi tikinpaleuiskej ika tomin, uelis okachi tikinpaleuiskej maj kisentokakan kitekitilikan Jiova oso okachi tikinyolchikauaskej. Komo tikchiuaj nejin, tiktakamattoskej tanauatil tein moajsi itech Levítico 19:3. w21.12 4, 5 § 10-12

Tekiuaj David, akin miakpa ueyi tajtakoj. Kemej neskayot, auilnemik iuan Bat-Seba uan hasta kichiuak maj kimiktianij inamik (2 Sam. 11:2-4, 14, 15, 24). Ika tein kichiuak amo sayoj yejua motajyouiltij, ta no kintajyouiltij ichankauan, kemej siuamej akin no iniuan monamiktijka (2 Sam. 12:10, 11). Se tonal, tanauatij maj kinpouanij kanachin tateuianij moajsiaj itech xolal Israel. Ijkon kinextij ke amo senkis takuaujtamatia iuan Jiova. Xa moueyimatik uan yejua ika takuaujtamatik itech itateuijkauan. Nejin kichiuak maj se ueyi kokolis oso kokoxkayot kinmiktiani 70,000 israelitas (2 Sam. 24:1-4, 10-15). ¿Keniuj tikitaskiaj tein kichiuak David? ¿Amo kuali ika titajtoskiaj uan tikijtoskiaj ke amo kinamikia maj Dios kiikneli? Jiova amo ijkon kiitak, ta itech tanemilij ke David miakpa kichiujka tein kuali uan ke satepan ke tajtakoj yekmelauj moyolnonotsak. Yejua ika kitapojpoluij. Kimatia ke David semi kitasojtaya uan ke kinekia kichiuas tein kuali. ¿Melauj ke semi tiktasojkamatij maj Dios kiita tokualneskayouan uan tein kuali tein tikchiuaj? (1 Rey. 9:4; 1 Crón. 29:10, 17). w21.12 19 § 11-13

Jesús kiniknelij akin mokokouayaj. Maj tikelnamikikan tein tanauatij maj kimatiltianij Juan Taauijkej: “In ixpojpoyome Nejuatsin nikintachialtij ya. Uan in koxojme axkan nikinnejnemiltij ya. Uan in nekokoyani ten kokotokatoya ninakayo, axkan Nejuatsin nikinchipauak ya uan nikinpajtij ya. Uan naken amo takakia, yejuan axkan nikintakakiltij ya. Uan in taka ten momikilijkaj ya, axkan nikinpankixtij ya yoltokke”. Uan keman kiitakej tein Jesús kichiuaya, “in pueblojuani [...] peuke kimouistiliayaj Totajtsin Dios” (Luc. 7:20-22). Tiitekitikauan Dios tikchiuaj kemej Jesús, yejua ika tikualtakamej iniuan akin mokokouaj, tikinikneliaj uan amo tiyolijsiuij iniuan. Melauj ke Jiova amo techmakak chikaualis tein uelis ika titapajtiskej, sayoj ke kemaj techmakak tatiochiualis maj ueli tikinmatiltikan se taman tein semi kualtsin akin amo tachiaj porin mokokouaj oso akin kemej yeskia amo tachiaj porin amo kiixmatij yejuatsin. Tikinmatiltiaj ke amo uejkaua tinemiskej itech se xochital kampa amo onkas kokolismej oso kokoxkayot uan kampa tinochin kuali timouikaskej iuan Dios (Luc. 4:18). Nejin tein tikteixmatiltiaj kichiujtokya maj miakej kiueyichiuakan Dios. w21.12 9 § 5

Tikitaj ke Santiago kikuik iTajtol Dios keman tamachtij uan ika kinpaleuij taltikpakneminij maj kiitanij ke Jiova nochipa kintatiochiuia akin amo kikauaj, kemej Job. Santiago tamachtij nejon ika tajtolmej uan tanemililmej tein amo ouijkej. Ijkon, amo yejua moueyitalij, ta kiueyitalij Jiova. Tein techmachtia: Maj titamachtikan kemej amo ouij moajsikamatis uan maj tikuikan iTajtol Dios. Maj amo tiktemokan tiknextiskej ke tikmatij miak taman, ta maj tiktemokan tikinpaleuiskej taltikpakneminij maj kiitakan ke Jiova kimati miak taman uan ke semi ininka motekipachoua (Rom. 11:33). Uelis tikchiuaskej nejon komo nochipa tikuij Biblia. Kemej neskayot, maj amo tikiniluikan akin tikinmachtiaj toni tikchiuaskiaj tejuan komo tikpanotoskiaj tein yejuan kipanotokej, ta maj tikinpaleuikan maj itech tanemilikan tein kichiujkej sekin akin ininka motajtoua itech Biblia, uan maj tikinpaleuikan maj kiajsikamatikan keniuj tanemilia Jiova uan tein kimachilia. Ijkon, kichiuaskej tein momachtiaj porin kinekij kiyolpaktiskej Jiova uan amo tejuan. w22.01 11 § 9, 10

Xikintasojta oksekin kemej tejua timotasojta. Komo se tokniuj kineki kiyolpaktis Dios, moneki kichiuas nejin. Maj tikitakan keniuj kinextij Jesús ke semi moneki tanauatil tein moajsi itech Levítico 19:18. Se tonal, se fariseo kitajtanij: “¿Katiyejua in tanauatiltsin in kachi ueyi de nochi?”. Jesús kinankilij: “Xiktasojta moueyitekotsin Totajtsin Dios ika nochi moyolo, uan ika nochi motanejnekilis, uan ika nochi motanemililis. Yejua ya nijin in kachi ueyi tanauatil uan de kachi kuika ueyi chikaualis”. Uan ompa, no ika tajtoj tein kijtoua Levítico 19:18: “Ika ome tanauatil moneuilia keme ne achtopa tanauatil uan no kijtoa ijkuin: ‘Xiktasojta moknitsin ijkon keme tejuatsin timotasojta’” (Mat. 22:35-40). Onkak miak taman kemej uelis tikinnextiliskej oksekin ke tikintasojtaj. Komo tikchiuaj tein kijtoua Levítico 19:18, nejon se taman kemej tikinnextiliaj oksekin ke tikintasojtaj. Ompa kijtoua: “Amo ximomakepa nion xikualanto iniuan ikoneuan moxolal”. w21.12 10, 11 § 11-13

Keman Pedro kiitstoya Jesús uelik nejnemik aixko, sayoj ke keman kiitak chikaujkakiouit, mouik uan peuak pankalaki (Mat. 14:24-31). Tein kipanok Pedro techmachtia se taman. Keman temok uan peuak nejnemi aixko, amo kinemilij ke teisa kitapololtiskia uan ke peuaskia pankalakis itech at. Yejua kinekia ajsis hasta kampa yetoya Jesús, sayoj ke amo uelik porin peuak kiita chikaujkakiouit. Melauj ke tejuan amo ueli tinejnemij aixko, sayoj ke tikpanouaj ouijkayomej tein kichiuaj maj monexti ox chikauak totakuaujtamatilis. Komo amo tikelnamikij Jiova uan tein kijtoua ke kichiuas, totakuaujtamatilis peuas kaxanis kemej yeskia tipankalakiskiaj itech at. Yejua ika, maski tikpiaskej uejueyi ouijkayomej, maj tikelnamikikan ke Jiova uelis techpaleuis. w21.12 17, 18 § 6, 7

Tikueyichiuaj Jiova keman tiktataujtiaj, timomachtiaj uan itech titanemiliaj tein timomachtiaj. Keman tikchiuaj netataujtil titajtouaj iuan toTajtsin Jiova akin semi techtasojta. Keman timomachtiaj Biblia, tikseliaj “itaixmatilis Dios”, akin okachi tamatkej (Prov. 2:1-5). Uan keman itech titanemiliaj tein timomachtiaj, titanemiliaj itech ikualneskayouan Jiova uan tatiochiualismej tein kineki techmakas tejuan uan nochin taltikpakneminij. Komo tikchiuaj nejin, kuali tikuitoskej totiempo. Sayoj ke kemej amo tikpiaj miak tiempo, ¿toni techpaleuis maj kuali tikuikan? Komo ueli, maj tiakan kampa taseujtok. Maj itech titanemilikan tein kichiuak Jesús. Achto ke peuaskia itanojnotsalis, yajka taluakyan 40 tonalmej (Luc. 4:1, 2). Ompa uelik kitataujtij iTajtsin uan uelik itech tanemilij tein yejuatsin kinekia maj kichiua. Nejon kipaleuij porin satepan kipanoskia ouijkayomej. w22.01 27, 28 § 7, 8

Kemansa xa se tokniuj tayekankej oso okse tokniuj techyolmajxitia porin kiita ke moneki tikpataskej teisa. Komo aksa techyolmajxitia ika Biblia, kinextia ke semi techtasojta, yejua ika maj tikakikan uan maj tikchiuakan tein techiluia. Tein melauj, keman se tokniuj techyolmajxitia xa okachi ouij techkisa tikakiskej uan xa hasta tikualanij. ¿Keyej? Maski tikmatij ke titajtakolejkej, keman aksa techiluia ke timopolojtokej oso ke teisa amo kuali tikchiujtokej xa ouij techkisa tikakiskej (Ecl. 7:9). Xa timotenpaleuiskej, tikijtoskej ke tokniuj ipa amo techyekita oso tikualaniskej porin amo tikuelitakej kemej technojnotsak. Oso xa hasta tiknemiliskej: “¿Keyej nechyolmajxitia, ta yejua no mopoloua?”. Uan komo amo tikuelitaj tein techyolmajxitij, xa amo tikakiskej uan hasta titajtoskej iuan okse tokniuj porin tiknekij maj techilui tein tiknekij tikakiskej. w22.02 8, 9 § 2-4

¿Tikpanoskej seki taman itech yankuik taltikpak tein kichiuas maj ouij techkisa titakuaujtamatiskej ke Jiova nochipa kichiua tein kinamiki? Maj tiknemilikan tein panok tepitsin satepan ke Jiova kinkixtij israelitas ompa Egipto. Sekin peuak kualanij porin kinekiaj kikuaskej tein ompa kikuayaj uan kiixtopeujkej maná tein yejuatsin kinmakaya (Núm. 11:4-6; 21:5). ¿No uelis techpanos nejon satepan ke panos okachi ueyi tajyouilis? Amo tikmatij ox monekis semi titekitiskej keman titachipauaskej uan tikchiujtiaskej nejin taltikpak se xochital. Xa onkas miak tekit uan yekinika xa tikpanoskej seki ouijkayomej. ¿Amo no tikuelitaskej tein Jiova techmakas ijkuak? Komo axkan semi tiktasojkamatij tein Jiova techmaka, satepan no semi tiktasojkamatiskej. w22.02 7 § 18, 19

Itech Zacarías 8:23 tikajsij nejin tajtolmej tein kijtoua “se judío” uan “namouan” ininka tajtojtok tokniuan taixpejpenalmej akin yetokejok nikan taltikpak (Rom. 2:28, 29). “Majtakti takamej akin tajtouaj tataman tajtolmej” kinixnextiaj okseki ichkamej. Yejuan kemej yeskia mokitskiaj inintech tokniuan taixpejpenalmej porin nochipa kinpaleuiaj uan iniuan kiueyichiuaj Jiova. No ijkon, tajtolmej tein kijtoj Ezequiel 37:15-19, 24, 25, Jiova kichiuani tein kijtouaj nejin tajkuilolmej porin tokniuan taixpejpenalmej uan okseki ichkamej kualtsin sentekitij. Nejin tajkuilolmej ika tajtouaj ome koujmej. Akin kichiaj nemiskej iluikak kemej yeskiaj kouit “tein iaxka Judá” (kalyetouanij kampa kinixpejpenayaj akin tekiuajtiskiaj Israel). Uan akin kichiaj nemiskej nikan taltikpak kemej yeskiaj kouit “tein iaxka Efraín”. Jiova kinsentiliskia uan mochiuaskiaj “sayoj se kouit”. Nejin kijtosneki ke sentekitiskiaj ika itaixyekanalis inintekiuaj, Cristo Jesús (Juan 10:16). w22.01 22 § 9, 10

Jesús ika tajtoj akin kinpaleuiayaj akin tajtantinemiaj tomin porin kipanouayaj tatasojtilis, sayoj ke kitemouayaj maj oksekin kimatikan tein kichiuayaj. Maski tein kichiuayaj kuali yetoya Jiova amo kiyolpaktij (Mat. 6:2-4). Sayoj uelis yeski yekmelauj tiyolkualmej komo keman tikinpaleuiaj oksekin inintech titanemiliaj yejuan uan amo tejuan. Monekiskia timotajtaniskej: “¿Ueliskia nikijtos ke amo sayoj nikmati toni tein kuali, ta no nikchiua? ¿Keyej nikchiua tein kuali?”. Porin Jiova se Dios akin nochipa tekititok uan iespíritu no ijkon (Gén. 1:2). Nejin kijtosneki ke nochi kualneskayomej tein iespíritu Dios techpaleuia maj tikpiakan, uelis kichiuas uan moneki techolinis maj tikchiuakan teisa. Kemej neskayot, tatitanil Santiago kijkuiloj: “Se itakuautamatilis amo teyi ipatiu komo amo [se] kinextijtinemi […] ika ne kuali tatakamatilis” (Sant. 2:26). Uan no ijkon uelis tikijtoskej ika okseki kualneskayomej tein iespíritu Dios techpaleuia maj tikpiakan. Nochipa keman tiknextiaj se kualneskayot, tiknextiaj ke iespíritu Dios techpaleuijtok. w22.03 11, 12 § 14-16

Tiitekitikauan Dios tikchiuaj miak taman tein ika tikueyichiuaj yejuatsin uan no tikinpaleuiaj oksekin. Sayoj ke Pedro kinyolchikauak tokniuan maj kichiuanij se taman tein semi moneki. Achto ke kijtoskia ke moneki tiyeskij tiyektikej itech nochi tein tikchiuaj, kijtoj: “Kuali xiknemilikan toni nankichiuatij” (1 Ped. 1:13). ¿Toni kijtosnekia? Pedro kijtoj ke tokniuan taixpejpenalmej kiteixmatiltiskiaj noyampa “in uelilisme de Totajtsin Dios” (1 Ped. 2:9). Itech nejin tonalmej, tiitekitikauan Dios tikpiaj tatiochiualis tikchiuaskej nejin tekit tein semi moneki uan tein semi kinpaleuia taltikpakneminij. Uan se ueyi tatiochiualis kipiaj itekitikauan Dios akin yektikej porin ueli kiteixmatiltiaj iTajtol uan ueli tamachtiaj (Mar. 13:10). Yejua ika maj timochikauakan tiknextiskej ke tiktasojtaj Dios uan ke tikintasojtaj oksekin, uan no tiknextiskej ke tiknekij tiyeskij tiyektikej itech nochi tein tikchiuaj. w21.12 13 § 18

Tatitanil Pablo Yejua nochipa kiitaya tein kuali tein kichiuayaj tokniuan. Sayoj ke kimatia ke keman aksa mopolouaya, amo kijtosnekia ke amo yolkuali katka. Kintasojtaya tokniuan uan okachi kiitaya ininkualneskayouan. Uan komo kiitaya ke ouij kikisaya kichiuas tein kuali, niman kinemiliaya ke yekmelauj kinekia kichiuas tein kuali uan ke sayoj monekia maj tepitsin kipaleuikan. Maj tikitakan keniuj Pablo kinpaleuij ome tokniuan siuamej itech nechikol ompa Filipos (Filip. 4:1-3). Nesi ke Evodia uan Síntique amo kuali mouikayaj xa porin panoka teisa tein kichiujka maj mokualantianij. Pablo amo kinajuak nion kinijijtoj, ta okachi kiitak ininkualneskayouan uan ke miak xiujmejya kitekitilijtoyaj Jiova. Kimatia ke Jiova kintasojtaya. Kemej kiitaya tein kuali tein kichiuayaj, kinyolchikauak maj kiyektalianij kuejmol tein kipiayaj uan maj oksepa kuali mouikanij. Kemej Pablo nochipa kiitaya ininkualneskayouan tokniuan, kipaleuij maj kisentokani yolpakini uan maj kisentokani kuali mouikani iniuan tokniuan itech nejon nechikol. w22.03 30 § 16-18

Yolseuilis tein Jiova techmaka techyolseuia uan techpaleuia maj kuali titanemilikan. Yejua nejon kimachilij se tokniuj siuat akin monotsa Luz. Yejua kijtoua: “Kemansa nikmachilia ke noselti, uan nejon kichiua maj niknemili ke Jiova amo nechtasojta. Sayoj ke ijkuak, niman niktapouia Jiova keniuj nimomachilia. Netataujtil nechpaleuia maj kuali nimomachili”. Tein kipanok Luz kinextia ke netataujtil techpaleuia maj tiyolseuikan (Filip. 4:6, 7). Tejuan tikmatij ke Jiova uan Jesús techpaleuiskej keman momikilis aksa akin tiktasojtaj. No techolinia maj titanojnotsakan uan maj titamachtikan ika teiknelilis porin Jiova uan Jesús kinextiaj nejin kualneskayot. Uan techyolseuia porin kinextia ke Jiova uan iKonetsin kiajsikamatij tein tikmachiliaj, tein ouij techkisa tikchiuaskej uan ke kinekij techpaleuiskej maj titaxikokan. Tejuan tikchiaj tonal keman Jiova “kinelkaualtis de ninchokilisuan de nochi itaneltokakauan” (Apoc. 21:4). w22.01 15 § 7; 19 § 19, 20

Jesús kijtoj ke onkak ome puertas tein teuikaj itech tataman ojti, se ojti “patauak” uan okse “amo patauak” (Mat. 7:14). Sayoj onkak nejin ome ojti, uan tisejsemej moneki tikixpejpenaskej itech katiyejua tiaskej. Moneki kuali titaixpejpenaskej, porin sayoj ijkon uelis tinemiskej nochipaya. Taltikpakneminij okachi kiixpejpenaj ojti tein “patauak” porin okachi amo ouij kinkisa ompa yaskej. Uan kemej semi miakej ompa youij, miakej kiixtaliaj ompa kisentokaskej. Amo kiajsikamatij ke yejua Satanás akin kineki maj yakan itech nejin ojti tein teuika itech mikilis (1 Cor. 6:9, 10; 1 Juan 5:19). Okse ojti “amo patauak”, uan Jesús kijtoj ke amo miakej kiajsij. ¿Keyej? Itech versículo 15 Jesús technejmachtij maj timoyekpiakan porin onkakej tamachtianij akin takajkayauaj (Mat. 7:15). w21.12 22, 23 § 3-5