Julio

Uan no, ika tein Jesús kijtoj, ika tein kichiuak uan ika milagros kinextij tein kimachilia uan tein kinemilia iTajtsin (Juan 14:9). ¿Toni techmachtia milagros tein kichiuak Jesús? Yekinika, Jesús uan iTajtsin semi techtasojtaj. Keman Jesús yetoya nikan taltikpak, ika ichikaualis kinpajtij akin tajyouijtoyaj porin semi kintasojtaya. Se tonal, ome takamej akin amo tachiayaj kitsajtsilijkej maj kinpaleui (Mat. 20:​30-34). Biblia kijtoua ke Jesús “semi kinyoliknelij” uan kichiuak maj oksepa tachiakan. Keman Biblia kijtoua “semi kinyoliknelij”, itech tajtol griego kijtosneki teisa tein no se kimachilia uan hasta no tekokoua. Kemej Jesús semi teiknelij kinextij ke semi tetasojta, yejua ika no kintamakak akin mayanayaj uan kipajtij se takat akin kipiaya se pitsotik kokolis tein kiluiaj lepra (Mat. 15:32; Mar. 1:41). Tikmatij ke Jehová, Dios akin “teyoliknelia” uan iKonetsin semi techtasojtaj uan kinyolkokoua keman kiitaj ke titajyouiaj (Luc. 1:78; 1 Ped. 5:7). Yejuan semi kinekij kiixpoloskej nochi ouijkayomej tein tikpiaj. w23.04 3 § 4, 5

Moneki timochikauaskej amo tikixtajtoltiskej, nion tikakiskej tein amo kuali tein kichiuaj akin mokauaj maj kinixyekana Satanás. Moneki tikixtajtoltiskej uan timomachtiskej Biblia, tiyaskej nechikolmej uan titanojnotsaskej para timoyekpiaskej uan amo tiknemiliskej tein amo kuali. Jehová motenkaua ke amo techkauas maj tikixnamikikan se kuejmol tein amo uelis tikxikoskej (1 Cor. 10:​12, 13). Itech nejin tonalmej tein ouijkej, tisejsemej moneki okachi tiktataujtiskej Jehová para amo tikauaskej. Jehová kineki maj ‘iixpan yejuatsin tiktapokan toyolo’ (Sal. 62:8). Xikonueyitali uan xikontasojkamatili nochi tein kichiua. Xikonilui maj mitsonpaleui amo xionmoui keman tiontanojnotsas, maj mitsonpaleui xikonxiko ouijkayomej uan maj ueli xikonixtopeua tein amo kuali. Amo xikonkaua maj nion akin uan nion teyi mitsontsakuili xikontataujti Jehová. w23.05 7 § 17, 18

¿Keyej tiouij nechikolmej? Porin tiknekij tikueyichiuaskej Jehová uan yejua nejon tein okachi moneki (Sal. 26:12; 111:1). Kemej tinemij itech tonalmej tein semi ouijkej, nechikolmej no techpaleuiaj maj timosenyolchikauakan (1 Tes. 5:11). Keman titanankiliaj tikchiuaj nejin ome taman. Sayoj ke onkak seki taman tein uelis techtsakuilis: xa titelmouiskej uan amo tiknekiskej titanankiliskej, oso miakpa timomaajokuiskej sayoj ke amo techmakaskej nochi tanankililmej tein tiknekiskiaj. ¿Toni uelis techpaleuis? Tein tatitanil Pablo kijtoj toni okachi moneki maj tikchiuakan: “Maj timoyolchikauakan se iuan okse”. Amo semi timouiskej timomaajokuiskej komo tikelnamikij ke tikinyolchikauaskej tokniuan, maski amo miak taman tikijtoskej keman titanankiliskej tein ika tiknextiskej ke titaneltokaj. Uan komo amo ueli titanankiliaj kemej tiknekiskiaj, tiyolpakiskej keman tikitaskej ke oksekin ueli kichiuaj (1 Ped. 3:8). w23.04 20 § 1-3

¡Tekiuaj tanauatijkaya! Judíos akin yetoyaj temako 70 xiujmej ompa Babilonia ueliskiaj kisaskiajya uan mokepaskiaj Israel kampa achto nemiaj (Esd. 1:​2-4). Sayoj Jehová ueliskia kichiuaskia teisa kemej nejon. Porin ompa Babilonia amo kinkajkauayajok akin moinaxkatiliayaj (Is. 14:​4, 17). Sayoj ke Babilonia kiteuijkej uan kitankej, uan yankuik tekiuaj kijtoj ke judíos ueliskiaj yaskej. Nochin judíos, uan okachiok akin kinixyekanayaj ininchankauan, monekiaj kiixtaliskej ox kisaskej de Babilonia oso ompa mokauaskej. Sayoj ke xa sekin ouij kinkisak kiixtaliskej toni kichiuaskej. Miakej katkaj tel xiuejkejya uan amo ueliskiajok yaskej porin tel uejka katka. Uan kemej miakej judíos yolkaj Babilonia, amo ixmatiaj okseki altepemej, yejuan amo kiitayaj Israel kemej ininchan, ta sayoj kemej se altepet kampa nenkej ininuejkaujtatuan. Uan sekin judíos motomintijkajya ompa Babilonia. Yejua ika xa ouij kinkisak kikauaskej ininchan kampa kualtsin nemiaj oso kampa tanamakayaj uan nemitiuij kampa amo ixmatiaj. w23.05 14 § 1, 2

ITajtol Dios techpaleuia maj okachi titaxikokan, titeiknelikan uan maj titetasojtakan. Lucas 21:19 kijtoua: “Komo nantaxikouaj namakisaskej”. Colosenses 3:12 techyolmajxitia maj ‘titeyoliknelikan’. Uan 1 Tesalonicenses 4:​9, 10 kijtoua: “Dios namechmachtijtok ximotasojtakan se iuan okse. […] Sayoj ke nokniuan, tamechyoleuaj okachi xitetasojtakan”. Nochi nejin kiniluijkaj akin ipa taxikojtoyajya, teiknelijtoyajya uan tetasojtayajya. Sayoj ke monekia kisentokaskej okachi kinextiskej. Uan tejuan no moneki ijkon tikchiuaskej, ¿toni uelis techpaleuis? Itech nejin tamachtilis tikitaskej toni kinpaleuij yekinika imomachtijkauan Jesús maj kinextikan nejin eyi taman, uan keniuj no uelis ijkon tikchiuaskej para tiknextiskej ke tikchixtokejya tetsaujkatajyouilis. Keman peuas tetsaujkatajyouilis, tikonmatisya keniuj tiontaxikos uan tikonixtalis tikonsentokas tiontaxikojtos. w23.07 3 § 4, 8

Uan maj amo uejkaua tikselikan tein Jehová touan motenkaua itech iTaixyekanalis. Yejua ika, tokniuan taixpejpenalmej uan “okseki ichkamej” moneki ompa tiksentokaskej (Juan 10:16). Desde xiuit 1919, millones takamej, siuamej uan konemej kisanij de Ueyi Babilonia oso de nochi taneltokalismej tein takajkayauaj, uan kemej yeskia peua nejnemij itech nejin ojti tein chipauak. Jehová amo kikauak maj nion teyi kintsakuiliani judíos keman kiskej de Babilonia (Is. 57:14). Uan “Ojti tein Chipauak” tein axkan yetok, ¿no ijkon kichiua? Kemaj. Miak xiujmej achto ke ajsiskia xiuit 1919, Jehová kichiuak maj sekin takamej akin kitasojtayaj kemej yeskia kichipauanij ojti (no xikonita Isaías 40:3). Kichiujkej tein monekia para maj xiujmej satepan akin yolkualmej uelinij kikauanij taneltokalismej tein amo melaujkej uan maj kiueyichiuanij Jehová iuan ixolal, kampa oksepa kiueyichiuayaj kemej kiyolpaktiaya. w23.05 15, 16 § 8, 9

Jehová kineki maj tiknekikan tiktekitiliskej uan maj techyolpakti (2 Cor. 9:7). ¿Keyej moneki timochikauaskej tiktekitiliskej Jehová komo amo tiknejnekij? Maj tiknemilikan tein kichiuak tatitanil Pablo. Yejua kijtoj: “Niktatsakuiltia nonakayo uan nikchiua kemej notakeual” (1 Cor. 9:​25-27, nota). Pablo mochikauak kichiuas tein Jehová kiyolpaktia maski yejua amo semi kinejnekia. ¿Kiyolpaktiaya Jehová tein kichiuaya Pablo? Kemaj. Uan Jehová kitatiochiuij porin semi kitekitilij (2 Tim. 4:​7, 8). Jehová no yolpaki keman kiita ke timochikauaj okachi tiktekitiliskej maski amo semi tiknejnekij. ¿Keyej? Porin kimati ke maski amo nochipa tikuelitaj tein tikixtalijkej, tikchiuaj porin tiktasojtaj yejuatsin. Jehová kitatiochiuij Pablo uan tejuan no techtatiochiuis porin timochikauaj (Sal. 126:5). Uan keman tikitaskej ke Jehová techtatiochiuia, xa okachi tiknejnekiskej tikchiuaskej. w23.05 29 § 9, 10

Tatitanil Pablo kijtoj ke akin kemej yeskia kochtokej yejuan akin amo makisaskej. Keman aksa kochi amo kimati toni mochiujtok kampa yetok uan keniuj ijsiujka panoua tiempo. Uan amo kimati keman mochiua teisa tein uelis kipaleuis oso kijtakos. Axkan, miakej no kemej yeskia kochtokej, amo kinekij mouikaskej iuan Dios (Rom. 11:8). Amo kineltokaj tein kinextia ke tinemijya itech “tonalmej keman tatamitiya” uan ke amo uejkaua mochiuasya tetsaujkatajyouilis (2 Ped. 3:​3, 4). Sayoj ke tejuan tikmatij ke ijkon kemej panotiuj tonalmej, okachi moneki maj titachixtokan kemej tayolmajxitia Biblia (1 Tes. 5:6). Sayoj ke, ¿keyej moneki tiyolseujtoskej uan kuali titanemiliskej? Porin nejon techpaleuis maj amo timokalakikan itech política uan itech nochi taman tein kichiuaj. Uan no, ijkon kemej okachi motokijtiuj itonal Jehová, okachi techchikaujkauiskej maj no titapaleuikan. Sayoj ke maj amo techtekipacho toni tikchiuaskej, porin ichikaualis Dios techpaleuis maj tiyolseujtokan uan maj kuali titanemilikan, uan techpaleuis maj kuali tikixpejpenakan toni tikchiuaskej (Luc. 12:​11, 12). w23.06 10 § 6, 7

¿Toni tikonnemilia keman oksekin ika tajtouaj Sansón? Xa ke semi chikauak katka, uan nejon melauj, sayoj ke no mopoloj uan yejua ika semi tajyouij. Maski ijkon, Jehová kiitak nochi tein kichiujka Sansón para kitekitilis uan kiixtalij maj moijkuilo itech Biblia nochi tein kipanok para maj techmachti teisa. Jehová kiixpejpenak Sansón para maj kichiua miak taman tein ika kipaleuiskia xolal Israel. Miak xiujmej satepan ke momikilij, Jehová kichiuak maj tatitanil Pablo kijkuilouani itokay Sansón iniuan oksekin akin kinextijkej ke semi takuaujtamatiaj (Heb. 11:​32-34). Sansón kitemoj maj Jehová kipaleui hasta keman semi tajyouijtoya. Nejin semi techyolchikaua uan techmachtia miak taman. w23.09 2 § 1, 2

No tikxikoskej ouijkayomej komo nochipa tikiluiaj Jehová keniuj timomachiliaj (1 Tes. 5:17). Xa axkan tejuatsin amo tikonpanotok se ouijkayot. Sayoj ke, ¿tikontajtaniani Jehová maj mitsonpaleui keman tionyolkualantok, tiontayokoxtok oso amo tikonmati toni tikonchiuas? Komo nochipa tikontajtania maj mitsonpaleui xikonxiko ouijkayomej tein tikonpia mojmostaj, no ijkon tikonchiuas keman tikonpias uejueyi ouijkayomej. Tikonneltokas ke yejuatsin kimati kemanian mitsonpaleuis uan keniuj kichiuas (Sal. 27:​1, 3). Komo tikxikouaj ouijkayomej tein tikpiaj axkan, okachi uelis titaxikoskej keman ualas tetsaujkatajyouilis (Rom. 5:3). ¿Keyej ijkon tikijtouaj? Miakej tokniuan kijtouaj ke keman kixikouaj se ouijkayot, nejon kinpaleuia maj kixikokan tein yeski ouijkayot tein kipiaskej satepan. Keman kiitaj keniuj Jehová kinpaleuiani, okachi takuaujtamatij ke yejuatsin nochipa ijkon kichiuas. Uan kemej takuaujtamatij, kinpaleuia maj kisentokakan taxikokan (Sant. 1:​2-4). w23.07 3 § 7, 8

Jehová teajsikamati porin yolyemanik uan teiknelia. Kinextij ke katka yolyemanik keman yaya kinixpoloti akin nemiaj Sodoma. Kintitanik seki ángeles maj kiluitij Lot maj cholo hasta kampa yetokej tepemej, sayoj ke Lot mouia yas ompa. Yejua ika motataujtij maj yejua uan ichankauan yanij Zóar, se xolal tein Dios no yaya kiixpoloti. Jehová amo kichikaujkauij Lot maj kitakamati tein kinauatijka uan kikauak maj youi Zóar maski amo kiixpoloskiaok nejon xolal (Gén. 19:​18-22). Miak xiujmej satepan, Jehová no kinextij ke kinikneliaya akin nemiaj ompa Nínive. Kititanik tanauatijkej Jonás para maj kiniluiani ke Jehová yaya kinixpoloti porin kichiujtoyaj tein amo kuali. Sayoj ke keman ninivitas moyolpatakej, Jehová kintapojpoluij uan amo kinixpoloj (Jon. 3:​1, 10; 4:​10, 11). w23.07 21 § 5

¿Toni techmachtia tein kipanok Jehoás? Yejua katka kemej se kouit tein amo yektoktoya uan para amo uetsis monekia maj kikoujkechikan. Keman momikilij tayekankatiopixkat Jehoiadá, akin kemej yeskia kikoujkechijtoya oso kipaleuiaya Jehoás, yejua peuak kinkaki akin kinekepilijkaj Jehová uan no kinekepilij. Nejin techmachtia teisa tein motelneki: amo sayoj moneki tikmojkatokaskej Jehová porin tochankauan ijkon kichiuaj uan techpaleuiaj, ta moneki tikchiujtoskej tein techpaleuis maj okachi tiktasojtakan uan tikpoujkaitakan Jehová. Yejua ika moneki nochipa timomachtiskej, itech titanemiliskej tein timomachtiaj uan timotataujtiskej (Jer. 17:​7, 8; Col. 2:​6, 7). Jehová amo techtajtania maj tikchiuakan tein amo tiuelij. Uan Eclesiastés 12:13 kijtoua tein kineki maj tikchiuakan, ompa kijtoua: “Xikmojkatoka Dios akin melauak uan xiktakamati itanauatiluan, porin yejua nejin nochi tein moneki maj se kichiua”. Komo tikmojkatokaj Jehová, uelis tikxikoskej tein yeski ouijkayot. Nion teyi uelis kichiuas maj amo timouikakanok iuan yejuatsin. w23.06 19 § 17-19

Itech versículo 5 ijkon peua kijtoua: “Akin tokotsyetoya itech ueyi silla kijtoj” (Apoc. 21:5a). Itech amatajkuilol Apocalipsis moajsi sayoj exkan kampa tajtoua Jehová, yejua ika nejin tajtolmej amo kemej okseki. Nejin kijtosneki ke yejua Jehová akin motenkauak tein kichiuaskia uan amo se ángel nion Jesús. Nejin techpaleuia maj okachi tikneltokakan tein satepan ika tajtoua Apocalipsis porin Jehová “amo ueli takajkayaua” (Tito 1:2). Yejua ika uelis tikneltokaskej tein kijtoua Apocalipsis 21:​5, 6. Maj ika titajtokan tajtol “¡Xikita!”. Itech tajtol griego, miakpa mokuik tajtol “¡Xikita!” itech amatajkuilol Apocalipsis. ¿Uan toni kijtoua satepan? Dios kijtoua: “Nikchijchiujtok nochi yankuik”. Maski ayamo mochiua tein Jehová motenkaua, yejuatsin kijtoua ke kichiujtokya porin kimati ke yekmelauj kichiuas (Is. 46:10). w23.11 3, 4 § 7, 8

Tatitanil Pedro monekik kisentokas mochikauas amo kichiuas tein amo kuali. Maj tikitakan seki taman. Keman Jesús kijtoj ke monekia tajyouis uan mikis para mochiuas tein Biblia achto kijtojka, Pedro kichikaujkanojnotsak (Mar. 8:​31-33). Pedro uan okseki tatitanilmej kemansa motajtolteuiayaj para kijtoskej akoni katka okachi ueyichiujkej (Mar. 9:​33, 34). Se youak achto ke kimiktiskiaj Jesús, Pedro ijsiujka kinakaskotonak se takat (Juan 18:10). Uan nejon youak Pedro expa kijtoj ke amo kiixmatia itasojikniuj, Jesús, porin semi kimojmoujtij tein kijtojkej oksekin (Mar. 14:​66-72). Keman kipanok nejon peuak tayokolchoka. Jesús amo kisenkauak itatitanil akin semi motayokoltijtoya. Satepan ke oksepa nemik, kikauak maj nejin tatitanil kinextili ke kitasojtaya. Kiyoleuak maj kinyekpia iichkauan (Juan 21:​15-17). Pedro niman peuak kichiua tein Jesús kiluij. Yejua ika yetoya Jerusalén itech Pentecostés uan yejua semej akin kiixpejpenkej ika ichikaualis Dios. w23.09 22 § 6, 7

Tatitanil Pedro kiniluij oksekin tokniuan akin no katkaj tayekananij: “Kemej [...] ichkatajpianij, xikinyekpiakan iichkauan Dios” (1 Ped. 5:​1-4). Tikmatij ke tayekananij kintasojtaj tokniuan uan kinekij kinyekpiaskej. Sayoj ke kemansa xa kimachiliskej ke amo uelis kichiuaskej nejon tekit porin tel sioujtokej oso moneki kichiuaskej okseki taman. ¿Toni uelis tikonchiuas komo ijkon mitsonpanoua? Xikonilui Jehová keniuj tionmomachilia. Pedro kijkuiloj: “Komo aksa kinpaleuia oksekin, maj takuaujtamati itech chikaualis tein Dios kitemaka” (1 Ped. 4:11). Xa tokniuan kipiaskej ouijkayomej tein amo moyektaliskej hasta keman mochiuas xochital. Sayoj ke xikonelnamiki ke Jesucristo, akin “okachi ueyi ichkatajpixkej”, uelis okachi kinpaleuis tokniuan axkan uan no itech xochital. Jehová kineki maj tayekananij kintasojtakan tokniuan, maj kinyekpiakan uan maj kichiuakan tein kuali para maj yejuan no ijkon kichiuakan. w23.09 29, 30 § 13, 14

Tejuan moneki amo titanemiliskej kemej tanemiliaj akin amo kiueyichiuaj Dios. Komo titanemiliaj kemej akin amo kitakamatij Jehová, no peuas tikixtopeuaskej yejuatsin uan itanauatiluan (1 Cor. 3:19). “Inintamatilis akin nemij nikan taltikpak” kichiua maj tikchiuakan tein tejuan tiknejnekij. Maj tikitakan tein panok itech nechikolmej ompa Pérgamo uan Tiatira. Miakej tokniuan no peuak auilnemij uan kinueyichiuaj tatadiosmej kemej kichiuayaj akin ompaka nemiaj. Jesús kiniluij nejon ome nechikolmej ke tel amo kuali tein kichiujtoyaj porin amo kiitayaj ke tajtakol maj se auilnemi (Apoc. 2:​14, 20). Axkan, miakej akin nemij kampa tejuan tinemij kinekij maj no titanemilikan kemej yejuan. Xa tochankauan oso akin tikinixmatij, techyolchikauaskej maj tikchiuakan tein tiknekij uan maj tiktapanauilikan itanauatiluan Jehová. Xa techiluiskej ke kuali yetok maj tikchiuakan tein tiknekij uan ke tein Biblia tanauatia amo tapaleuiaok axkan. Kemansa xa tiknemiliskej ke seki taman tein Jehová technauatia moneki okachi techmelauilis. Xa hasta tiknekiskej ‘tikchiuaskej seki taman tein amo ijkuiliujtok’ (1 Cor. 4:6). w23.07 16 § 10, 11

María, imomaj Jesús monekia moyolchikauas para kichiuas tein Jehová kinauatijka. María kipiaskia se konetsin maski ayamo monamiktiaya. Yejua amo kimatia keniuj kiiskaltis se konetsin, sayoj ke yaya kiiskaltiti Mesías. Amo motektoya iuan se takat, sayoj ke monekia kiluis José akin yaya iuan monamiktiti ke kipiaskia se konetsin, xa tel ouij tein monekia kichiuas (Luc. 1:​26-33). ¿Keniuj moyolchikauak María? Kitemoj maj oksekin kipaleuikan. Kitajtanij ángel Gabriel toni okseki taman monekia para kichiuas tein Jehová kinauatijka (Luc. 1:34). Satepan uejka yajki uan panok “kampa tepeyoj” para kikalpanotiuj ichankauj Elisabet ompa Judá. Elisabet kiluij María ke kuali tein kichiujtoya, ika ichikaualis Dios, yejua kijtoj tein kualtsin tein kipanoskia konetsin tein yaya kipiati María (Luc. 1:​39-45). María kinankilij ke Jehová “ika imay kinextij ke chikauak” (Luc. 1:​46-51). Jehová kichiuak maj ángel Gabriel uan Elisabet kiyolchikauanij María. w23.10 14-15 § 10-12

Moajsij 144 mil tokniuan akin Dios kinixpejpenak ika ichikaualis uan akin tel kualtsin iuan mouikaj. Yejuan tekitiskej kemej tiopixkamej ompa iluikak iuan Jesús (Apoc. 14:1). Keman yetokejok nikan taltikpak, Dios kinixpejpena ika ichikaualis uan kinselia kemej ikoneuan, cuarto kampa Yektik tein kipia takenkal, kiixnextia keniuj tel kualtsin mouikaj iuan Dios (Rom. 8:​15-17). Cuarto kampa Okachi Yektik kiixnextia iluikak kampa nemi Jehová. “Ueyi tasal” tein kixelouaya tein Yektik uan tein Okachi Yektik kiixnextia inakayo Jesús keman yetoya nikan taltikpak. Keman Jesús kipiaya inakayo, amo uelia yaya iluikak para mochiuas toueyi Tayekankatiopixkat itech itemplo Jehová. Keman Jesús momikilij para techmakixtis kichiuak maj tokniuan taijitalmej uelikan yakan iluikak. Sayoj ke yejuan amo uelis yaskej iluikak ika ininnakayo uan ininomiyo (Heb. 10:​19, 20; 1 Cor. 15:50). w23.10 28 § 13

Keman Gedeón kijijtojkej seki takamej akin pouiaj iniuan ichankauan Efraín, amo yolijsiuik (Juec. 8:​1-3). Yejua amo kintauelnankilij, ta kinextij ke katka yolyemanik keman kuali kinkakik uan kinyolseuij keman kichiuak maj amo kualanikanok. Tayekananij akin tamatinij kichiuaj kemej Gedeón. Keman aksa kinijijtoua, kuali kikakij uan kinankiliaj ika nejmachkayot (Sant. 3:13). Keman kichiuaj nejin, tapaleuiaj maj tokniuan itech nechikol kuali mouikakan. Keman kiueyitalijkej Gedeón porin kintanik madianitas, yejua kichiuak maj xolal kiueyitaliani Jehová (Juec. 8:​22, 23). ¿Keniuj tayekananij no uelis ijkon kichiuaskej? Komo kiueyitaliaj Jehová ika tein kichiuaj (1 Cor. 4:​6, 7). Xa keman se tayekankej kiluiaj ke kualtsin kemej tamachtia, uelis kijtos ke kikixtij itech iTajtol Dios uan ke tinochin timomachtiaj porin techpaleuia inechikol Jehová. Semi kuali maj tayekananij motajtanikan ox kiueyitalia Jehová kemej tamachtiaj oso sayoj yejuan moueyitaliaj. w23.06 4 § 7, 8

Komo Jehová amo techmaka tein tiktajtanijkej, uelis timotajtaniskej, “¿kuali yetok tein nitajtani?”. Kemansa tiknemiliaj ke tikmatij toni okachi techpaleuis. Sayoj ke tein titajtanij xa amo yejua tein techpaleuis satepan. Xa tiktataujtiaj Jehová keniuj tiknekij maj moyektali se kuejmol, sayoj ke xa onkas okse taman kemej uelis okachi kuali moyektalis. Uan xa kemansa tein titajtanij amo yejua tein Jehová kineki (1 Juan 5:14). Maj oksepa ininka titanemilikan tetatmej yejuan kitajtanijkej Jehová maj kichiuani maj ininkoneuj kisentokani kitekitiliani. Xa ueliskia nesis ke kuali yetok tein kitajtanijkej. Sayoj ke Jehová amo akin kichikaujkauia maj kitekitili. Yejuatsin kineki maj tinochin, tejuan uan tokoneuan, tikueyichiuakan porin tisejsemej ijkon tikixpejpenaj (Deut. 10:​12, 13; 30:​19, 20). Komo ijkon, ¿toni ueliskia kitajtaniskej Jehová nejon tetatmej? Ueliskia kitajtaniskej maj kinpaleui maj kimatikan keniuj kipaleuiskej ininkoneuj para maj kitasojta yejuatsin uan maj kineki kuali iuan mouikas (Prov. 22:6; Efes. 6:4). w23.11 21 § 5; 23 § 12

¿Keyej keman tikinyolseuiaj oksekin tikinnextiliaj ke tikintasojtaj? Se amatajkuilol tein ika tajtoua Biblia, kijtoua ke tajtol griego tein Pablo kikuik para kijtos ‘ximoyolseuijtiakan’ kijtosneki “se ijkatos inakastan aksa para se kiyolchikauas keman kipia ouijkayomej”. Yejua ika keman tikyolseuiaj se tokniuj akin tajyouijtok, tikpaleuiaj maj kisentoka kitekitili Jehová uan maj amo kikaua. Nochipa keman tikyolseuiaj se tokniuj tiknextiaj ke tiktasojtaj (2 Cor. 7:​6, 7, 13). Keman tikikneliaj aksa no tiknekij tikyolseuiskej. ¿Keyej? Porin keman aksa kiiknelia akin tajyouijtok, kineki kiyolseuis uan kitemoua keniuj kipaleuis. Yejua ika, achto tikikneliaj aksa uan nejon techpaleuia maj tiknekikan tikyolseuiskej. Pablo kijtoj ke Jehová techyolseuia porin techiknelia. Kijtoj ke Jehová yejua “toTajtsin akin semi teiknelia uan Dios akin nochipa teyolseuia” (2 Cor. 1:3). w23.11 9, 10 § 8-10

Tejuan tikmatij ke tinochin akin tiktekitiliaj Jehová tikpiaskej ouijkayomej. Maj itech titanemilikan tein tatitanil Pablo kiniluij tokniuan de Tesalónica: “Keman namouan tietoyaj, miakpa tamechiluiayaj ke tikixnamikiskiaj ouijkayomej, uan kemej nankimatij, ijkon mochiuani” (1 Tes. 3:4). Uan tokniuan de Corinto kinijkuilouilij: “Tiknekij xikmatikan kuejmolmej tein tikpiakej [...] amo tikmatiaj ox timakisaskiaj” (2 Cor. 1:8; 11:​23-27). Akin tiktekitiliaj Jehová tikmatij ke no titajyouiskej (2 Tim. 3:12). Keman peuak tiontakuaujtamati iuan Jesús , xa mochankauan oso motasojikniuan mitsonkejkelouaj oso mitsonchiuiliaj tein amo kuali. ¿Mitsonixnamiki akin tikontekitilia oso akin iuan tiontekiti porin amo keman tiontakajkayaua? (Heb. 13:18). ¿Mitsonixnamiki tekiuaj porin tikoniluia oksekin tein Dios kichiuati? Maski tikpiaskej tein yeski ouijkayot, Pablo kijtoua ke moneki tiyolpakiskej. w23.12 10, 11 § 9, 10

Jacob no kipiak miak ouijkayomej. Uan ome ikoneuan Jacob, Simeón uan Leví, kipinaujtijkej ichankauan uan kichiujkej maj amo kuali ika tajtokan Jehová. Uan isiuatsin Raquel, akin semi kitasojtaya, momikilij keman kipiak ojpatika ikonetsin. Uan keman miak xiujmej amo onkaya toni kikuaskej, Jacob monekik nemitiuj Egipto keman xiuejya katka (Gén. 35:​16-19; 37:28; 45:​9-11, 28). Maski Jacob kipiak nochi nejin ouijkayomej, nochipa takuaujtamatik iuan Jehová uan kineltokaya ke kichiuaskia tein motenkaujka. Uan Jehová kimatiltij ke kiyolpaktiaya. Jacob kipiak miak taman porin Jehová kitatiochiuij. Uan Jacob xa semi kitasojkamatilij iDios keman miak xiujmej satepan oksepa moajsik iuan José, akin kinemilijka ke momikilijkaya. Jacob uelik kixikoj nochi nejin ouijkayomej porin kuali mouikaya iuan Jehová (Gén. 30:43; 32:​9, 10; 46:​28-30). Tejuan no uelis tikixnamikiskej ouijkayomej tein tikpiaskej komo kuali timouikaj iuan Jehová. w23.04 15 § 6, 7

Itech Salmo 23, David kijtoj ke kimatia ke Jehová kitasojtaya uan ke kuali kiyekpiaya. Kijtoj ke Jehová katka Itajpixkauj, uan no kijtoj keniuj mouikaya iuan. David kuali momachiliaya porin kimatia ke Jehová kiixyekanaya uan yejua nochipa kitemouaya maj kipaleui. Kimatia ke Jehová nochipa kitasojtaskia. Maj tikitakan keyej David kijtoj ke semi takuaujtamatia iuan Jehová. David kimachiliaya ke Jehová kuali kiyekpiaya porin nochipa kimakaya tein kipolouaya. No kimatia ke nochipa kuali iuan mouikaskia uan ke kiyolpaktiaya. Yejua ika David kuali kimatia ke keman kipanoskia teisa, Jehová kimakaskia tein kipoloskia. Kemej David kineltokaya ke Jehová kitasojtaya uan kiyekpiaya, amo motekipachouaya uan uelia yolpakia (Sal. 16:11). w24.01 29 § 12, 13

Desde ke tamik Ojpatika Ueyi Neteuilis, itekitikauan Jehová uelini tanojnotsanij miakkan. Miakej kiixmatinij Jehová, uan axkan motanojnotsa itech nochi taltikpak. Axkan, tokniuan akin pouij iniuan Oloch Taojtokaltianij kisentokaj kitemouaj maj Cristo kinixyekana. Tein technauatiaj maj tikchiuakan, achto kuali kiitaj ox yejua tein Jehová uan Jesús kinekij. Uan satepan yejuan kinnauatiaj takalpanouanij itech circuito uan tayekananij maj kinmatiltikan nechikolmej. Tokniuan tayekananij akin taijitalmej uan nochin tayekananij itech nechikolmej yetokej “iyekmakopa” Cristo (Apoc. 2:1). Kemej yejuan tajtakolejkej kemansa mopolouaj, ijkon kemej kinpanok Moisés, Josué uan tatitanilmej (Núm. 20:12; Jos. 9:​14, 15; Rom. 3:23). Sayoj ke tikmatij ke Jesús senkis kiixyekana takeual takuaujtamach uan tamatkej uan no kinixyekana tayekananij, uan kisentokas ijkon kichiuas. Yejua ika uelis titakuaujtamatiskej ke yejuatsin kinkui nejon takamej para techixyekanas. w24.02 23, 24 § 13, 14

Tejuan uelis tikueyitaliskej Jehová keman ika titajtoskej, uan keman tiknextiskej ke tiktasojtaj uan tiktasojkamatiliaj. Keman titanojnotsaj tiktemouaj maj oksekin kinekikan iuan motokiskej uan maj kitasojtakan ijkon kemej tejuan tiktasojtaj (Sant. 4:8). Semi tikuelitaj tikinmachtiskej ika Biblia keniuj tamati Jehová, ke tetasojta, kichiua tein kuali yetok, tamatkej uan semi chikauak. No tikueyitaliaj uan tikyolpaktiaj keman timochikauaj tikchiuaskej kemej yejuatsin. Keman ijkon tikchiuaj, oksekin xa kiitaj ke titamamej uan motajtaniaj keyej (Mat. 5:​14-16). Keman uelis iniuan titajtoskej, maj tikinmelauilikan keyej ijkon tikchiuaj. Ijkon, akin yolkualmej kinekiskej iuan motokiskej toDios. Keman ijkon tikueyitaliaj Jehová semi tikyolpaktiaj (1 Tim. 2:​3, 4). w24.02 10 § 7

Para okachi kuali tiktekitilis Dios moneki timomachtis tikchiuas seki taman. Nejin mitspaleuis keman tikpias se tekit itech nechikol, ueli xikajsi se tekit uan xiksentoka ompa xitekiti para timoixpanoltis oso tikinixpanoltis mochankauan, uan no mitspaleuis kuali ximouika iniuan oksekin. Kemej neskayot, ximomachti okachi kuali titaixtajtoltis uan titajkuilos. Biblia kijtoua ke takat akin mojmostaj kiixtajtoltia Biblia uan itech tanemilia, yolpaki uan kuali kisa tein kichiua (Sal. 1:​1-3). Ijkon kuali kimati keniuj tanemilia Jehová, uan nejon kipaleuia maj kuali tanemili uan maj kichiua tein Biblia kijtoua (Prov. 1:​3, 4). Tokniuan takamej uan siuamej moneki maj kinmachtikan ika Biblia uan maj kinyolmajxitikan, uan nejin uelis kichiuaskej takamej akin kuali kitekitilijtokej Dios. Komo tiueli titaixtajtoltia uan kuali titajkuiloua, tikmatis keniuj titamachtis itech nechikol uan titanankilis kemej kinpaleuis oksekin uan kinyolchikauas. Uan no, uelis tikijkuilos tein mitspaleuis okachi xitakuaujtamati uan mitspaleuis xikinyolchikaua tokniuan. w23.12 26, 27 § 9-11

Keman tionmouis, itech xiontanemili nochi tein Jehová kichiuas satepan keman Satanás ixpoliuis. Itech xiuit 2014, itech ueyi nechikol tein uejkaua eyi tonal, ompa monextij ke se tokniuj takat uan ichankauan ika monojnotsaj tein kijtoskia 2 Timoteo 3:​1-5 komo ika tajtoskia xochital: “Itech yankuik taltikpak semi tiyolpakiskej. Porin miakej motasojtaskej, semi kinekiskej kichiuaskej tein itajtol Dios kijtoua, amo moueyichiuaskej nion moueyimatiskej, kiueyitaliskej Dios, kintakamatiskej inintatuan, motasojkamatiskej uan amo tekauaskej, kintasojtaskej ininchankauan, kinekiskej moyektenkauaskej iniuan oksekin, amo tetakajkayauiliskej, motsakuiliskej, kichiuaskej tein kuali, kitasojtaskej tein kuali, kinchiuiliskej tein kuali inintasojikniuan uan takakiskej, nion tepitsin moueyimatiskej, kitasojtaskej Dios uan amo sayoj yejuan moyolpaktiskej uan yekmelauj taneltokaskej. Iniuan ximouika”. ¿Uan tejuan? ¿Timomattokej ika titajtoskej tein mochiuas itech yankuik taltikpak iniuan tochankauan oso iniuan tokniuan? w24.01 6 § 13, 14

¡Semi kualtsin tikmatiskej ke “Jehová kiyolpaktia tein kichiuaj itekitikauan”! (Sal. 149:4). Sayoj ke, kemansa xa sekin moyolkokouaj uan motajtaniaj: “Nikmati ke Jehová yolpaki ika tein kichiua ixolal, sayoj ke ¿no yolpaki ika tein nejua nikchiua?”. Ne uejkauj miakej itekitikauan Jehová no kinouijmakaya kineltokaskej ke kiyolpaktiayaj toDios (1 Sam. 1:​6-10; Job 29:​2, 4; Sal. 51:11). Biblia kiyekijtoua ke maski titajtakolejkej uelis tikyolpaktiskej Jehová. ¿Toni moneki tikchiuaskej? Moneki tiknextiskej ke titakuaujtamatij iuan Jesucristo uan timoauiskej (Juan 3:16). Ijkon tiknextiskej ke timoyolpatakej uan ke timotenkaujkej iuan Dios ke tikchiuaskej tein kiyolpaktia (Hech. 2:38; 3:19). Jehová semi yolpaki keman tikchiuaj nejin para kuali timouikaskej iuan. Komo timochikauaj tikchiuaskej tein timotenkaujkej keman timotemaktijkej, tikyolpaktiskej Jehová uan kuali iuan timouikaskej (Sal. 25:14). w24.03 26 § 1, 2

Uelis tikchiuaskej kemej imomachtijkauan Jesús keman tekiuanij technauatiskej maj amo titanojnotsakanok. Maj titakuaujtamatikan ke Jehová techpaleuis maj tikchiuakan tein technauatia uan uelis tiktajtaniskej maj amo timouikan uan maj timochiuakan titamatinij uan maj tiktajtanikan inepaleuil Jehová keman tikpiaskej ouijkayomej. Miakej titajyouijtokej porin momikilij se akin tiktasojtaj, techtajyouiltiaj, timokokouaj, amo kuali timomachiliaj oso tikpiaj ouijkayomej iniuan tochankauan. Uan uejueyi kokolismej tein momoyauaj uan neteuilismej kichiuaj maj okachi titajyouikan. Yejua ika xikonilui Jehová nochi tein tikonmachilia. Xikonilui tein tikonpanotok ijkon kemej tikoniluiskia se motasojikniuj. Uelis tikonmatis ke yejuatsin mitsonpaleuis (Sal. 37:​3, 5). Komo nochipa tiktataujtiaj Jehová techpaleuis maj titaxikokan keman tikpiaskej ouijkayomej (Rom. 12:12). Jehová kimati nochi tein kinpanoua itekitikauan uan “kinkaki keman kitsajtsiliaj maj kinpaleui, uan kinmakixtia” (Sal. 145:​18, 19). w23.05 5, 6 § 12-15

Keman tikixpejpenaskej teisa tein motelneki, moneki tikajsikamatiskej “toni kineki Jehová” uan ijkon tikchiuaskej (Efes. 5:17). Keman tikpiaj se kuejmol uan tiktemouaj itech Biblia toni uelis techpaleuis, tein melauj tiktemojtokej tein Jehová kinemilia. Komo tikchiuaj tein timomachtiaj, techpaleuis maj kuali titaixpejpenakan. “Amokuali” Satanás kinekiskia maj tikchiujtokan miak taman uan maj amo tiuelikanok tiktekitilikan Dios (1 Juan 5:19). Uelis sayoj tiktemojtoskej tomin, timomachtiskej oso titeltekitiskej uan amo tiktemoskej tiktekitiliskej Jehová. Komo ijkon tikchiuaskiaj tiknextiskiaj ke no peuaya titanemiliaj kemej oksekin. Maski nejin amo tajtakol, amo yejua tein okachi moneki tiktemoskej tikchiuaskej. w24.03 24 § 16, 17