Jiova amo tekaua uan ika miak pakilis tetapojpoluia

1, 2. 1) ¿Keyej tiknekij tikinpiaskej tasojiknimej akin amo tekauaj uan ika miak pakilis tetapojpoluiaj? 2) ¿Katiyejua netajtanilmej tiknankilitij?

¿TONI tikonijtoskia ke kinextia se akin yekmelauj tetasojikniuj? Se tokniuj siuat akin itokay Ashley kijtoua: “Se yekmelauj tetasojikniuj, yejua akin nochipa tepaleuia uan tetapojpoluia keman timopolouaj”. Tinochin tikneki tikinpiaskej totasojikniuan akin amo tekauaj uan ika miak pakilis tetapojpoluiaj. Kichiuaj maj tikmachilikan ke techtasojtaj uan kuali timomachiliaj (Prov. 17:17).

² Jiova yejua se teTasojikniuj akin okachi amo tekaua uan ika miak pakilis tetapojpoluia. Akin kijkuiloj Salmo kijtoj: “Tejua Jiova tiyolkuali uan niman titetapojpoluia; tel ueyi monetasojtalis tein amo tami tikinnextilia nochin akin mitsnotsaj” (Sal. 86:5). ¿Toni kijtosneki maj amo se tekaua uan maj se tetapojpolui? ¿Keniuj kinextia Jiova nejon kualneskayomej? ¿Keniuj uelis no ijkon tikchiuaskej kemej yejuatsin? Itanankililuan nejin netajtanilmej techpaleuis maj okachi tiktasojtakan Jiova, akin okachi kuali toTasojikniuj, uan no okachi kuali timouikaskej iniuan tokniuan itech nechikol (1  Juan 4:7, 8).

JIOVA AMO TEKAUA

3. ¿Toni kijtosneki amo se tekauas?

³ Akin amo tekaua kijtosneki ke kinextia se ueyi netasojtalis uan nochipa ompa moajsi. Se akin kinextia nejon kualneskayot nion tepitsin kemansa tekaua, ta nochipa ika netasojtalis moajsi iuan aksa (oso teisa), uan amo kisekokaua nejon taltikpaknenkej oso teisa nion keman onkak ouijkayomej. Jiova yejuatsin akin okachi “amo Tekaua” (Rev. 16:5, TNM).

4, 5. 1) ¿Keniuj kinextia Jiova ke amo tekaua? 2) ¿Keniuj techyolchikaua titanemiliskej itech nochi tein kichiuani Jiova tein kinextia ke amo tekaua?

⁴ ¿Keniuj kinextia Jiova ke amo tekaua? Yejuatsin nochipa moajsi iniuan itekitikauan akin amo kikauaj. Semej, tekiuaj David, ijkon kijtoj (xikonixtajtolti 2 Samuel 22:26). Yejua kiitak ke Jiova amo sayoj kijtoua ke amo tekaua, ta yejuatsin kinextij nejon keman kiixyekanak, kiyekpiak uan kimakixtij ijkuak kipiak tayejyekolis (2  Sam. 22:1). ¿Keyej Jiova amo kikauak David? Porin yejua no kinextiaya ke “amo tekaua[ya]”. Dios kuali kinita itekitikauan akin amo kikauaj uan yejua ika nochipa iniuan moajsi (Prov. 2:6-8).

⁵ Titanemiliskej itech nochi tein kichiuani Jiova tein kinextia ke amo tekaua, semi techyolchikaua. Se tokniuj akin itokay Reed uan amo kikaua Dios, kijtoua: “Semi nechyolchikaua nikixtajtoltis keniuj Jiova kipaleuij David keman kipiak ouijkayomej. Nochipa kipaleuij hasta keman cholojtinemia uan monekia motatis itech tepekoyokmej. ¡Nejon semi nechyolchikaua! Nechelnamiktia ke maski semi ueyi ouijkayot tein nikpias, Jiova nouan yetos komo nejua amo nikaua”. Tikyekmatij ke tinochin ijkon timomachiliaj (Rom. 8:38, 39).

6. 1) ¿Itech toni okseki taman kinextia Jiova ke amo tekaua? 2) ¿Keniuj techpaleuia nejon akin tiktekitiliaj?

⁶ ¿Itech toni okseki taman kinextia Jiova ke amo tekaua? Yejuatsin amo kipata itanauatiluan. Dios techyekiluia: “Maski hasta keman se xiuejya, nejua amo niMopata” (Is. 46:4). Tein kiixtalia kichiuas nochipa moyekana ika itanauatiluan tein amo mopata uan kijtoua toni kuali uan toni amo (Mal. 3:6). Uan no, amo kipata tein kijtoua, tein kijtosneki ke kichiua tein motenkaua (Is. 55:11). Nejon kualneskayot techpaleuia tinochin tiitekitikauan akin amo tikauaj, porin keman timochikauaj tiktakamatiskej itanauatiluan, uelis tikyekmatiskej ke techtatiochiuis ijkon kemej motenkaua kichiuas (Is. 48:17, 18).

MAJ AMO TITEKAUAKAN IJKON KEMEJ JIOVA

7. Xikonijto se taman keniuj uelis tiknextiskej ke amo titekauaj ijkon kemej Dios.

⁷ ¿Keniuj uelis tiknextiskej ke amo titekauaj ijkon kemej Jiova? Se taman komo tikinpaleuiaj akin kipanouaj ouijkayomej (Prov. 3:27). Xa tikmatij ke se tokniuj tayokoxtok porin mokokoua, kiixnamikij ichankauan oso porin kipiak nepololmej. ¿Keyej amo tiktemouaj keniuj tikyolchikauaskej “ika kuali tajtolmej, tajtolmej tein teyolseuiaj”? (Zac. 1:13.)a Ijkon tiknextiskej ke yekmelauj titetasojiknimej, “akin okachi amo tekaua ke se toikniuj” (Prov. 18:24).

8. ¿Keniuj uelis tiknextiskej ke amo titekauaj ijkon kemej Jiova itech tonenamiktilis uan itech okseki taman?

⁸ No tiknextiaj ke tikchiuaj kemej Jiova komo amo tikinkauaj akin tikintasojtaj. Komo tikpiaj tonamik, tikmatij ke moneki amo tikajkayauaskej iuan okse (Prov. 5:15-18). Yejua ika, nion tepitsin tikchiuaskej se taman tein uelis techuikas maj tiauilnemikan (Mat. 5:28). Uan no, amo tikinkauaj tokniuan itech nechikol keman amo titetapouiaj tein amo moneki oso amo tikintakajkayauiliaj uan nion no tikakij nejon tajtolmej tein amo tapaleuiaj (Prov. 12:18).

9, 10. 1) ¿Akoni okachi amo tiknekij tikauaskej maski tikpiaskej ouijkayomej? 2) ¿Keyej kemansa techouijmakas tiktakamatiskej itanauatiluan Jiova?

⁹ Sayoj ke, akin okachi amo tiknekij tikauaskej yejua Jiova. Yejua ika, moneki timochikauaskej tikitaskej teisa kemej yejuatsin kiita, tein kijtosneki ke moneki tiktasojtaskej tein kitasojta uan tiktauelitaskej tein kitauelita, uan tinemiskej kemej kipaktia (xikonixtajtolti Salmo 97:10). Ijkon kemej okachi titanemiliskej uan tikmachiliskej tein Jiova kimachilia, okachi amo ouij tiktakamatiskej itanauatiluan (Sal. 119:104).

¹⁰ Tein melauj, kemansa techouijmakas tiktakamatiskej itanauatiluan Jiova. Xa monekis tikchiuaskej se chikaujkayot uan ijkon amo tikauaskej Dios. Yejua nejon tein kinpanoua seki tokniuan akin ininselti. Kinekiskiaj monamiktiskej sayoj ke amo kiajsinij akin ueliskia yeski se kuali ininnamik akin kitekitilia Dios (1 Cor. 7:39). Se tokniuj siuat akin iselti xa kimachilia ke kichikaujkauiaj akin iniuan tekiti uan amo kineltokaj Jiova, porin nochipa kitemolijtokej akoni iuan monamiktis. Maski kiuelitaskia monamiktis, senkis kiixtalia amo kikauas Dios. ¿Melauj ke tiktasojkamatij nejon kuali neskayomej tein kinextiaj ke amo kikauaj Dios? Tikyekmatij ke yejuatsin kintatiochiuis nochin akin amo kikauaj maski kipiaskej ouijkayomej (Heb. 11:6).

JIOVA IKA MIAK PAKILIS TETAPOJPOLUIA

11. ¿Toni kijtosneki maj Jiova ika miak pakilis tetapojpolui?

¹¹ Jiova no ika miak pakilis tetapojpoluia uan yejua nejon semej kualneskayomej tein okachi iuan techtokia. ¿Toni kijtosneki nejon? Kijtosneki ke aksa ueli kitapojpoluia akin kiyolxokolij keman yekmelauj moyolnonotsa. Amo kijtosneki ke kiita ke kuali yetok tein kichiuak nion kiteajsikamatiltia ke amo teyi mochiuak, ta kiixpejpena amo kisentokas kualantos iuan. ITajtol Dios techmachtia ke Jiova ‘niman kintapojpoluia’ akin yekmelauj moyolnonotsaj (Sal. 86:5).

12. 1) ¿Keniuj kinextia Jiova ke ika miak pakilis tetapojpoluia? 2) ¿Toni kijtosneki maj itajtakoluan aksa ‘kitapojpoluikan’?

¹² ¿Keniuj kinextia Jiova ke ika miak pakilis tetapojpoluia? Yejuatsin kinextia “ueyi” netapojpoluilis, tein kijtosneki ke ajsitok uan senkis tetapojpoluia (Is. 55:7). ¿Toni kijtosneki maj Jiova ajsitok tetapojpolui? Maj titanemilikan itech netenkaualis tein moajsi itech Hechos 3:19 (xikonixtajtolti). Tatitanil Pedro kiniluij akin kikakiaj: “Ximoyolnemilikan de namotajtakoluan uan ximokuepakan”. Keman se tajtakojkej yekmelauj moyolnonotsa, kitelyolkokoua itajtakol uan senkis kiixtalia amo oksepa kichiuas (2 Cor. 7:10, 11). Uan no, kiolinia maj mokepa, tein kijtosneki ke kikaua tajtakolnemilis uan peua kichiua tein kiyolpaktia Dios. Komo akin kikakiaj Pedro moyolnonotsayaj, ¿toni ueliskiaj kiseliskej? Tatitanil kiniluij: “Dios namechtapojpoluilis”. Nejin tajtol ualeujtok itech se tajtol griego tein kijtosneki “kixiluasuiaj”. Yejua ika, keman Jiova tetapojpoluia, senkis kipojpoloua totajtakoluan. Ajsitok tetapojpoluia (Heb. 10:22; 1 Juan 1:7).

13. ¿Toni senkis techmatiltia tajtolmej “amo nikelnamikisok inintajtakol”?

¹³ ¿Toni kinextia ke Jiova senkis tetapojpoluia? Maj tikitakan tein Jeremías achtook ika tajtojka yankuik netenkaualis tein mochiuak iniuan tokniuan taixpejpenalmej, tein kichiua maj ueli kintapojpoluikan inintajtakoluan akin takuaujtamatij itech inemilis Jesús tein kitemakak (xikonixtajtolti Jeremías 31:34). Jiova motenkauak: “Nikintapojpoluis ininnepololuan, uan amo nikelnamikisok inintajtakol”. Kemej tikitaj, yejuatsin techyekiluia ke satepan ke techtapojpoluia teisa, amo sepaok kielnamiki totajtakol uan amo techteluilia ika nejon nion kisentoka techtatsakuiltia, ta techtapojpoluia uan senkis kielkaua (Rom. 4:7, 8).

14. ¿Keniuj techyolseuia titanemiliskej itech inetapojpoluilis Jiova? Xikonijto se neskayot.

¹⁴ Semi techyolseuia titanemiliskej itech inetapojpoluilis Jiova. Miak xiujmej achto, se tokniuj siuat akin tiktokaytiskej Elena kikixtijkej itech nechikol, uan seki xiujmej satepan oksepa kiselijkej. Yejua kielnamiki: “Niknemiliaya nejua uan nikiniluiaya oksekin ke nikyekneltokaya ke Jiova nechtapojpoluijka, sayoj ke tein melauj nikmachiliaya ke amo semi nechtasojtaya, uan niknemiliaya ke iniuan oksekin okachi amo uejka moajsia uan kiitayaj ke yekmelauj nemi”. Sayoj ke, Elena kiyolseuij kiixtajtoltis uan momachtis seki neskayomej itech Biblia tein kinextia keniuj Jiova tetapojpoluia. Yejua kijtoj: “Nikmachilij inetasojtalis uan iteiknelilis kemej amo keman”. Uan semi kiyololinij nejin tanemilil: “Maj amo tikneltokakan ke nochipa tikuikatinemiskej tonepololuan tein Jiova techtapojpoluijya”.b Elena kijtoua tein ika tami: “Nikajsikamatik ke tein melauj amo nikneltokaya ke yejuatsin ueliskia senkis nechtapojpoluis; niknemiliaya ke nochipa nechkuejmoloskia notajtakol. Nikmati ke yolik nikchiujtiyas, sayoj ke axkan peua nikmachilia ke ueli nimotokia iuan Jiova. Nikmachilia kemej yeskia nimoajchiuilij teisa tein tel etik”. ¡Semi tetasojtakej uan teiknelijkej Dios akin tiktekitiliaj! (Sal. 103:9.)

MAJ TITETAPOJPOLUIKAN KEMEJ JIOVA KICHIUA

15. ¿Keniuj uelis titetapojpoluiskej kemej Jiova kichiua?

¹⁵ Uelis tikchiuaskej kemej Jiova ijkuak tikixtaliaj timotapojpoluiskej se uan okse keman yekmelauj timoyolnonotsaj (xikonixtajtolti Lucas 17:3, 4). Maj tikelnamikikan ke ijkuak Jiova tetapojpoluia, kielkaua totajtakoluan tein kijtosneki, ke amo keman oksepa ika techkui. Tejuan no uelis tikelkauaskej ininnepololuan oksekin komo tikitaj kemej teisa tein panokya uan amo oksepa tikelnamikij.

16. 1) Xikonmelaua keyej se tetapojpoluis ika miak pakilis amo kijtosneki ke kuali tikitaj tein kichiujkej nion tikauaj maj toka mauiltikan. 2) ¿Toni moneki tikchiuaskej komo tiknekij maj Dios techtapojpolui?

¹⁶ Titetapojpoluiskej ika miak pakilis amo kijtosneki ke kuali tikitaj tein kichiujkej oso tikauaj maj aksa toka mauilti. Ta kijtosneki ke tikixtaliaj amo tikualantoskej iuan. Uan moneki tikelnamikiskej ke komo tiknekij maj Dios techtapojpolui, moneki tikintapojpoluiskej oksekin keman techyolxokoliaj (Mat. 6:14, 15). Jiova teajsikamati uan kielnamiki ke “tichijchiujtokej ika talnex” (Sal. 103:14). ¿Amo monekiskia tejuan no titeajsikamatiskej keman oksekin mopolouaj uan ika nochi toyolo tikintapojpoluiskej? (Efe. 4:32; Col. 3:13.)

17. Komo se tokniuj techyolxokolia, ¿toni techpaleuis maj amo tikualantokan iuan?

¹⁷ Kemansa teouijmaka se tetapojpoluis. Hasta sekin tokniuan taixpejpenalmej itech yekinika siglo kinouijmakak motapojpoluiskej (Filip. 4:2). Komo se tokniuj techyolxokolia, ¿toni techpaleuis maj amo tikualantokan iuan? Maj tikitakan tein kipanok Job. Yejua motelyolxokolij keman Elifaz, Bildad uan Zofar kijtouilijkej ke kichiujtoya tein amo kuali (Job 10:1; 19:2). Satepan, Jiova kinmelauak nejon akin kijtouayaj ke katkaj kuali tasojiknimej, uan kinnauatij maj yakan kampa moajsia Job uan maj kitemakanij tapialmej kemej netetayokolil uan ijkon Dios kintapojpoluiskia (Job 42:7-9). Sayoj ke no tajtanik maj Job kichiua teisa: monekia kitataujtis Dios maj kinpaleuiani. Keman Job kichiuak, Jiova kitatiochiuij porin ika miak pakilis kintapojpoluij (xikonixtajtolti Job 42:10, 12, 16, 17). ¿Toni techmachtia nejon? Komo tiktataujtiaj Dios maj kipaleui aksa akin techyolxokolij, techpaleuis maj amo tiksentokakan tikualantokan iuan.

MAJ NOCHIPA TIKTELTASOJKAMATIKAN IKUALNESKAYOUAN JIOVA

18, 19. ¿Keniuj uelis okachi tiktasojkamatiskej ikualneskayouan Jiova tein iuan techtokia?

¹⁸ Tikyekmatij ke techtelyolchikauak timomachtiskej miak ikualneskayouan Jiova. Tikitakej ke kichiua maj amo teouijmaka se motokis iuan, amo techikotasojta, kiuelita kitemakas teisa, motemaka kipatas tein kiixtalia, amo tekaua uan tetapojpoluia. Tein melauj, sayoj tepitsin timomachtijkej. Uelis nochipaya tiksentokaskej tikixmatiskej Dios tein semi techyolpaktis (Ecl. 3:11). Timomachiliaj kemej Pablo akin kijkuiloj: “Semi ueyi iteiknelilis de Dios, uan [...] nochi kajsikamati uan nochi momatiltijtinemi”. Uan no, netasojtalis uan okseki chikuasen kualneskayomej tein timomachtijkej semi techtokia iuan (Rom. 11:33).

¹⁹ Maj okachi tiksentokakan tiktasojkamatikan ikualneskayouan Jiova tein iuan techtokia. Uelis tikchiuaskej nejon komo timomachtiaj ikualneskayouan, itech titanemiliaj uan satepan tiknextiaj itech tonemilis (Efes. 5:1). Ijkon okachi tiksentokaskej titanemiliskej kemej akin kijkuiloj Salmo uan mokuikatij: “Semi kuali maj nimotoki iuan Dios” (Sal. 73:28).