¿Keyej Jesús kiita ke moneki iTekiuajyo Dios?

Kemej tikitakej itech yekinika tamachtilis, Jesús kitayekanaltij kiteixmatiltis “kuali tanauatilmej ika iTekiuajyo Dios” (Lucas 8:1, TNM). Senkis mochikauak uan nentinemik itech nochi altepet Israel uan ijkon kiteixmatiltij nejin taixyekanalis. Uan no, naui Evangelios, kampa ika tajtoua tekit tein kichiuak, panoua cien ika tajtoua iTekiuajyo Dios, uan ompa akin okachi ika tajtoj yejua Jesús. Nejon sayoj tepitsin kinextia nochi tein tamachtij ika nejon taixyekanalis (Juan 21:25).

¿Keyej kiitaya ke iTekiuajyo Dios motelneki? Se taman, porin Dios kiixpejpenak maj kiixyekana nejon Tekiuajyot (Isaías 9:6; Lucas 22:28-30). Sayoj ke yejua amo kitemouaya kipias tanauatil uan maj kiueyichiuakan (Mateo 11:29; Marcos 10:17, 18). Onkaya okseki taman keyej monekia kiteixmatiltis nejon Tekiuajyot. Yejua kimatia, uan kimati, ke nejon taixyekanalis kinualkuilis tein kuali akin kintasojta: iPopaj uan itatojtokakauan.a

TEIN ITEKIUAJYO DIOS KIUALKUILIS IPOPAJ JESÚS

Jesús kitasojta iPopaj ika nochi iyolo (Proverbios 8:30; Juan 14:31). Kimoujkaita nochi tein kinextia, kemej netasojtalis, teiknelilis uan melaujkayot (Deuteronomio 32:4; Isaías 49:15; 1 Juan 4:8). Yejua ika senkis kitauelita nochi tein kijtouilianij. Kemej neskayot, kijtouanij ke Dios amo kitekipachoua tajyouilis tein onkak nikan taltikpak, oso tein okachi amo kuali, ke yejuatsin kichiua maj titajyouikan. Yejua nejon se taman keyej Jesús senkis kitemoj kiteixmatiltis kuali tanauatilmej ika iTekiuajyo Dios: porin Tekiuajyot kichiuas maj mochipaua itokay iPopaj (Mateo 4:23; 6:9, 10) ¿Keniuj kichiuas?

Kipatas miak taman tein tapaleuis maj kuali tinemikan. Ika Tekiuajyot, Jiova “kinelkaualtis de ninchokilisuan” akin tajyouiaj. Kiixpolos nochi tein techchoktia, “uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok” (Apocalipsis [Revelación] 21:3, 4). ITekiuajyo Dios kichiuas maj senkis ixpoliui tajyouilis nikan taltikpak.b

Amo tikmoujkaitaj maj Jesús kitemouani kiteixmatiltis nejon Tekiuajyot, porin nejon taixyekanalis kinextis ke iPopaj yekmelauj se Dios akin teiknelia uan ke semi chikauak (Santiago 5:11). Sayoj ke iTekiuajyo Dios amo sayoj kichipauas itokay Dios. No kinualkuilis tein kuali oksekin akin Jesús kintasojta: itatojtokakauan.

TEIN ITEKIUAJYO DIOS KINUALKUILIS ITATOJTOKAKAUAN JESÚS

Achto ke ualaskia Jesús nikan taltikpak, nemik tel miak xiujmej ompa iluikak iuan iPopaj. Kipaleuij maj kichijchiua nochi tein onkak: sitalimej tein amo ueli se kinpoua uan galaxias tein tel miakej, taltikpak tein kualtsin uan nochi tein yoltok (Colosenses 1:15, 16). Sayoj ke Jesús okachi kintasojtak taltikpakneminij (Proverbios 8:31).

Nejon netasojtalis yejua tein okachi kioliniaya maj tanojnotsa. Ijkuak peuak kichiua itekiyo Dios yejua kijtoj ke ualaj kinixmatiltiko “yankuik Tajtoltsin de Dios” akin kinekiaj kiixmatiskej yejuatsin (Lucas 4:18). Sayoj ke Jesús amo sayoj kijtouaya toni monekia mochiuas, ta no kichiuaya. Kemej neskayot, keman miakej monechikojkej uan ijkon kikakiskiaj, “kinyoliknelij uan kinpajtij in kokoyani” (Mateo 14:14). Okse tonal, se takat akin tajyouiaya porin kipiaya se pitsotik kokolis kiluij: “Komo tikonmonekiltia, kuali tionuelis tinechonchipauas”. Jesús kiiknelij uan ika netasojtalis kinankilij: “Nikneki ma tejua xionchipauak ya de mokokolis”, uan kipajtij (Lucas 5:12, 13). Uan keman kiitak ke María, akin kuali iuan mouikaya, chokatoya porin momikilijka iikniuj, Lázaro, Jesús “yoltajyouiaya”, “moyoltayokoltiaya” uan hasta peuak “mochojchoktia” (Juan 11:32-36). Ompa kichiuak se teisa tein se kimoujkaita: maski panokaya naui tonal ke Lázaro momikilijka, kimakak oksepa nemilis (Juan 11:38-44).

Jesús kimatia ke nejon tein kichiuak ika ichikaualis Dios amo uejkauaskia. Ejkoskia tonal keman akin kinpajtij oso oksepa kinmakaka nemilis oksepa kokolispeuaskiaj uan momikiliskiaj. Sayoj ke, no kimatia ke tein kiualkuis iTekiuajyo Dios uejkauas nochipaya. Yejua ika, amo sayoj kitemoj kichiuas miak taman ika ichikaualis Dios, ta senkis motemakak kiteixmatiltis kuali tanauatilmej ika iTekiuajyo Dios (Mateo 9:35). Tein kichiuak ika ichikaualis Dios sayoj tepitsin kinextij tein kichiuas Tekiuajyot itech nochi taltikpak amo uejkaua. ¿Toni panos? Biblia technankilia.

• 

  Amo onkasok kokolismej.

  “Itech nejon tonalmej ininixtololouan ixpopoyomej tapouiskej, uan ininnakasuan akin amo takakij tapouiskej. Itech nejon tonalmej koxoj ajkotsikuinis ijkon kemej kichiua masat, uan inenepil akin amo ueli tajtoua, yolpakkatsajtsis.” Uan no, “nion se taltikpaknenkej kijtos: ‘Nimokokoua’” (Isaías 33:24; 35:5, 6).

• 

  Amo akinok momikilis.

  “Akin yolmelaujkej ininaxkatis taltikpak, uan ompa nemiskej nochipaya.” (Salmo 37:29.)

  “[Dios] kitamis mikilis nochipaya, uan toTajtsin Jiova akin okachi Ueyi Taixyekankej yekmelauj kinuachilis ininixayo nochin.” (Isaías 25:8.)

• Oksepa nemiskej akin momikilijkejya.

  “Nochi in animajme [...] kuak Nejuatsin nikinnotsas, [...] ual kisaske kampa ne animajtekochme.” (Juan 5:28, 29.)

  “Totajtsin Dios kinpankixtis yoltokke nochi in animajme.” (Hechos 24:15.)

• 

  Nochin kipiaskej ininchan uan tekit.

  “Kinchijchiuaskej kalmej uan ompa chanchiuaskej, uan kitokaskej uvajmekat uan kikuaskej itakilo. Amo kalchiuaskej uan okse kikuis, amo tatokaskej uan oksekin kikuaskej [...;] tekit tein kichiuaskej ika ininmauan notaixpejpenaluan senkis kinyolpaktis.” (Isaías 65:21, 22.)

• 

  Amo onkasok neteuilismej.

  “[Dios] kitamia neteuilismej hasta kampa tami taltikpak.” (Salmo 46:9.)

  “Amo momiktiskejok se ueyi altepet iuan okse, nion momachtiskejok neteuilis.” (Isaías 2:4.)

• 

  Nochin kipiaskej tein kikuaskej.

  “Itech taltikpak moteltachiuas; Dios, toDios, techtatiochiuis.” (Salmo 67:6.)

  “Onkas tel miak tatet nikan taltikpak; uan ininkuapan tepemej onkas okachi miak.” (Salmo 72:16.)

• Amo akinok kipanos tatasojtilis.

  “Amo [...] kielkauaskej akin amo teyi kipia.” (Salmo 9:18.)

  “Yejuatsin kimakixtis akin moajsi itech tatasojtilis uan tajtani maj kipaleuikan, no akin tayokoxtok uan akin amo kipia akoni kipaleuis. Kiiknelis akin amo kipia keniuj moixpanoltis uan akin moajsi itech tatasojtilis, uan ininnemilis akin moajsij itech tatasojtilis kinmakixtis.” (Salmo 72:12, 13.)

Axkan ke tikitakejya nejin tein Dios motenkaua kichiuas, ¿tikonajsikamati keyej Jesús kiitaya ke motelnekia iTekiuajyo Dios? Yejua kinixmatiltij Tekiuajyot nochin akin kinekiaj kikakiskej, porin kimatia ke sayoj nejon taixyekanalis kijkuanis tokuejmoluan.

¿Mitsonpaktia nejin tein Dios motenkaujtok kichiuas? Komo ijkon, ¿keniuj uelis okachi tikonmatis toni iTekiuajyo Dios? ¿Toni uelis tikonchiuas tein mitsonpaleuis xikonseli itatiochiualis? Okse tamachtilis mitsonnankilis.