Tamatilis tein kipia Biblia nochipa tapaleuia

XIKONNEMILI ke tikonkalpanojtok se museo kampa onkak miak tsotsokolmej tein uejkauj kayomej. Miakej kojkoyoktikejya uan soltikejya. Sekin amo ajsitokejok. Sayoj ke, yetok se tein amo teyi kipoloua. Moita ke tel kuali chijchiujtok. Uan tikontajtania akin ompa tetaixmatiltia: “¿Nejin yejua tein okachi yankuik?”. Yejua mitsonnankilia: “Amo, ta yejua tein okachi uejkauj kayot uan amo keman kiyekchijchiuanij”. Oksepa tikontajtania: “¿Nochipa moajsini kampa amo teyi kipanos?”. Yejua mitsonnankilia: “Amo, ta kixikouani chikauak ejekat uan kiouit uan miakpa kitemouanij kiixpoloskej”. Ompa xa tejuatsin tikonnemilia: “¿Toni ika chijchiujtok?”.

Biblia tamati kemej nejon tsotsokol. Yejua amatajkuilol tein okachi uejkauj kayot. Tein melauj moajsij okseki uejkauj amatajkuilolmej, sayoj ke ijkon kemej nejon tsotsokolmej tein soltikej, moijtakouanij ijkon kemej panouanij xiujmej. Keman nejin uejkauj amatajkuilolmej ika tajtouaj inintamachtilis tamatinij, moixnamiki ika tein yankuixtok momatini tein monextiani ke melauak. Miakpa kemej tayolmajxitiaj maj se mopajti nesi ke okachi teijtakoua. Uan miak nejon uejkauj amatajkuilolmej amo ajsitokejok porin seki taman tein kipiayaj poliuini oso semi moijtakouanij.

Biblia senkis taman. Kipia panoua tres mil quinientos xiujmej, sayoj ke kisentoka ajsitok. Uan maski miak xiujmejya kitemouanij kiixpoloskej keman kichichinouanij, kichiuanij maj amo momoyaua uan amo kuali ika tajtouanij, tein kijtoua senkis monextiani ke melauak. Maski moijtoua ke Biblia amo tapaleuiaok porin axkan momati miak taman, ika tajtoua tein momatik miak xiujmej satepan (xikonita recuadro “¿Uejkauj kayot, oso kijtoj tein momatik satepan?”).

KEMEJ MONEKI TIMONEJNEMILTISKEJ AXKAN

Maski ijkon, xa tionmotajtania: “¿Yekmelauj kisentoka tapaleuia tein Biblia tayolmajxitia?”. Xiontanemili itech uejueyi kuejmolmej tein tikixnamikij, ¿katiyejua tein okachi tetajyouiltiaj? Xa tiontanemilis itech neteuilismej, keniuj kijtakojtokej taltikpak, tateuilis oso teikamauiltilis. Axkan xikonita seki tamachtilismej tein kipia Biblia uan ijkuak tikonchiuas, xionmotajtani: “¿Okachi kuali tinemiskiaj komo ijkon timonejnemiltiskiaj?”.

TIKNEKISKEJ TIYOLSEUJKANEMISKEJ

“Yolpakij akin yolseujkanemij, porin yejuan kinnotsaskej ‘ikoneuan Dios’.” (Mateo 5:9, TNM.) “Ximofuerzajuijtiyakan [...] nannentinemiske ika yolseuilis uan ika yolyemanalis iuan nochi taltikpakuani.” (Romanos 12:18.)

TITEIKNELISKEJ UAN TITETAPOJPOLUISKEJ

“Tatiochiualme de Dios ne taneltokani ten teyolikneliaj. Porin [...] yejuan Dios no kinyoliknelis.” (Mateo 5:7.) “Xiksentokakan ximoxikojtiyakan se iuan okse uan ximotapojpoluikan ika pakilis se iuan okse komo aksa kiyolxokolijkej. Kemej Jiovaa ika miak pakilis namechtapojpoluij namejuan, no ijkon xikchiuakan namejuan.” (Colosenses 3:13, TNM.)

AMO TITECHIKOITASKEJ

Dios “kichijchiuak sanse tagat san uan nojon tagat nochi tejuan timochiuakoj tiixuiuan. Uan Yejuatsin kitalij ke ma tikalyetokan [...] nochi senmanauak” (Hechos 17:26). “Dios amo kinchichikojtasojta in tagayot. Ta, Yejuatsin kiniknelia tagayot tech nochi in senmanauak komo yejuan kimouistiliaj Yejuatsin uan chipaukanentinemij.” (Hechos 10:34, 35.)

TIKYEKPIASKEJ TALTIKPAK

“Jiova kikuik takat uan kitalij maj yeto itech xochital Edén uan ijkon tatokaskia uan kiyekpiaskia.” (Génesis 2:15.) Dios kinixpolos “nekes ten taijtakojtinenke nikan taltikpak” (Apocalipsis [Revelación] 11:18).

TIKTAUELITASKEJ XIJXIKUIYOT UAN AUILNEMILIS

“Xiktalikan cuidado uan ximoyekpiakan de nochi tataman yolnejxikolot. Porin Totajtsin Dios amo kipoua ke kipia semi ipatiu se tagat ika por nochi iricojyo ten kipixtinemi.” (Lucas 12:15.) “Keme namejuan nanpoutinemij iuan Dios, amo namechnamiki ok de nanmonojnotsaske de nojon auilnemilis uan de ne nemilis ten temajmaua ika tajtakol. Uan amo no xikelnamiktinemikan de ne xijxikuinyot.” (Efesios 5:3.)

TIMELAUJKANEMISKEJ UAN CHIKAUAK TITEKITISKEJ

“Tiknekij timonejnemiltiskej timelaujkej itech nochi.” (Hebreos 13:18, TNM.) “Naken tachtektinemia, [...] ma kikautiu ya nitachtekilis. Uan kachi kuali ma motekitilti ka imauan.” (Efesios 4:28.)

TIKINPALEUISKEJ OKSEKIN

“Xikinyolchikauakan nekes ten yolkuetautinemij ika ouijkayot. Uan xikinpaleuijtiyakan nekes ten amo kipiaj ueyi takuautamatilis. Uan no xikinijyouilijtiyakan [...] ten ne tokniuan kichiuaj.” (1 Tesalonicenses 5:14.) Moneki tikinpaleuiskej “in mikkakaualme uan [...] in siuakaualme” (Santiago 1:27).

Biblia amo sayoj techmatiltia nejin, ta techmachtia maj tikpatiuitakan uan maj nochipa ika timoixyekanakan. Komo okachi miakej ijkon monejnemiltiskiaj, ¿melauak ke semi tapaleuiskia maj moyektalikan uejueyi kuejmolmej tein tikpiaj? Tein melauj, tein Biblia tayolmajxitia okachi tapaleuia axkan. Sayoj ke, ¿keniuj uelis mitsonpaleuis Biblia?

¿KENIUJ UELIS AXKAN MITSONPALEUIS BIBLIA?

Takat akin okachi tamatkej kijtoj: “Tamatilis moita ke tapaleuia ika tein teualkuilia” (Mateo 11:19, TNM). ¿Melauj ke taixejekol nejon? Uelis tikmatiskej ox se tayolmajxitilis tapaleuia komo tikchiuaj uan tikitaj tein techualkuilia. Yejua ika, taixejekol xionmotajtani: “Komo Biblia yekmelauj tapaleuia, ¿monekiskia moitas ke yekmelauj nechpaleuia? ¿Yekmelauj uelis nechpaleuis ika kuejmolmej tein axkan nikpia?”. Maj tikitakan.

Dianab kichiuaya miak taman uan yolpakia, sayoj ke, ijsiujka mopatak inemilis ijkuak kipanok seki taman tein semi kitajyouiltij: isiuapil akin katka ichpochok momikilij, inamik kikauak uan amo kiajsiaok tomin. Yejua kimelaua: “Amo nikmatia keyej ninemia; momikilij nosiuapil, nonamik nechkauak uan nikpoloj nochan. Nikpoloj nochi: tein nikyolnejnekia, nochikaualis uan tein nikchiaya satepan”.

Diana senkis kiajsikamatik ke nejin tajtolmej melaujkej: “Tonemilis uejkaua setenta xiujmej oso ochenta xiujmej komo okachi se chikauak. Sayoj ke tiktelpiaj kuejmolmej uan tekokojkayot; porin ijsiujka panouaj, uan titamij” (Salmo 90:10).

Keman Diana kiixnamikik nochi nejon ouijkayomej, kitemoj tein Biblia tayolmajxitia uan se kimoujkaita keniuj kipaleuij. Kemej tikitaskej itech oksekin eyi tamachtilismej, miakej kiitanij ke kichiuaskej tein Biblia tayolmajxitia, uan ika kiyektaliskej kuejmolmej, yejua tein okachi kinpaleuiani. Kiitanij ke Biblia tamati kemej nejon tsotsokol tein ika titajtojkej ipeujyan nejin tamachtilis. Nion tepitsin tamati kemej miak amatajkuilolmej tein ijkon kemej panouaj xiujmej, amo tapaleuiajok. ¿Xa porin Biblia semi taman? ¿Xa akin kichijchiuak yejua Dios uan amo takamej? (1 Tesalonicenses 2:13.)

Xa tejuatsin no tikonnemilia ke tonemilis amo uejkaua uan ke tikpiaj miak ouijkayomej. ¿Akoni tikontemoua maj mitsonyolseui, maj mitsonpaleui uan maj mitsonyolmajxiti keman tikonpia kuejmolmej?

Maj tikitakan eyi taman keniuj Biblia uelis mitsonpaleuis. Uelis mitsonmachtis:

1. Amo xionmokuejmolkalaki itech seki taman.

2. Xikonyektali kuejmolmej keman tikonpias.

3. Xikonxiko ouijkayomej tein amo uelis tikonpatas.

Itech okseki tamachtilismej tikitaskej nejin eyi taman.