Itech ueyi nechikolmej tein uejkaua eyi tonal, tikueyichiuaj Jiova ika yolpakilis
1. ¿Keniuj iluimej tein kipiayaj israelitas no ijkon tamati toueyi nechikol tein uejkaua eyi tonal?
1 José, María, imin koneuan uan oksekin taneltokanij, nochipa yayaj itech iluimej tein mochiuayaj xijxiujtika ompa Jerusalén. Itech nejon tonalmej amo tanemiliayaj itech netekipacholmej tein kipiayaj mojmostaj, ta itech taueyichiualis tein kimakayaj Dios porin kiitayaj tel tayekantok. Itech nejon iluimej ueliaj ika tanemiliayaj uan ika tajtouayaj tein Jiova kinmakaya, uan momachtiayaj tein kijtoua Tanauatil. No ijkon axkan, itech toueyi nechikol tein amo uejkaua tikpiatij, uelis tikueyichiuaskej Jiova ika yolpakilis.
2. ¿Toni moneki tikchiuaskej uan ijkon uelis tiyetoskej itech eyi tonal tein uejkauas ueyi nechikol?
2 Maj tikitakan toni moneki tikchiuaskej. Keman ichankauan Jesús kisayaj Nazaret uan mokuepayaj, monekia nejnemiskej kemej 200 kilómetros. Uan maski amo tikmatij kanachi ikniuan kipiaya Jesús, ueli timonemiliaj nochi tein monekia kichiuaskej José uan María uan ijkon ueliaj yetoyaj itech iluit. ¿Tikitakejya toni moneki tikchiuaskej uan ijkon uelis tiyetoskej itech eyi tonal tein uejkauas ueyi nechikol? Xa monekis tikuiskej vacaciones tein techmakaj totekipan, titajtoskej iuan toteko, oso tikiluiskej tamachtijkej maj kinkaua tokoneuan nejon tonalmej. Komo monekis timokauaskej itech se hotel, ¿tikxelojkejya? ¿Uelis tikpaleuiskej se tokniuj tein mokokoua maj youi itech ueyi nechikol? (1 Juan 3:17, 18.)
3. ¿Toni ueliaj kichiuayaj itech iluit tein kipiayaj israelitas?
3 Ueli timonojnotsaj imiuan oksekin. Itech iluimej tein kipiayaj judíos, ueliaj monojnotsayaj imiuan oksekin itekitikauan Dios uan moyolchikauayaj. Senkis tikneltokaj ke ichankauan Jesús kitelnekiaj oksepa mosentiliskej iuan imin uejkauj tasojikniuan. No kinixmatiaj miakej taneltokanij judíos uan tein amo judíos tein moitayaj Jerusalén, oso itech ojti keman yayaj oso mokuepayaj.
4. ¿Keniuj uelis tiknextiskej ke tiknekij titajtoskej imiuan tokniuan tein touan taueyichiuaj?
4 Takeual takuaujtamach uan tamatkej amo techmaka nejon tanojnotsmej itech amat, ta kichiua maj timosentilikan uan maj tikakikan. ¿Keyej? Se taman, porin ueli timoyolchikauaj se iuan okse (Heb. 10:24, 25). Yejika, moneki tiajsiskej kualkan nochi tonalmej, ijkon uelis timonojnotsaskej imiuan oksekin, achto ke tokniuj tein techtapeualtilis kijtos maj tikakikan tatsotson tein kinextia ke monekisya timotaliskej. Tamechyoleuaj amo xitakouatij itech tajko tonal, ta xikuikakan takual tein nankimajseuaskej, ijkon uelis namokauaskej ompa uan namonojnotsaskej imiuan oksekin. Nochin tokniuan tein touan taueyichiuaj, se netetayokolil tein Jiova techmaka, uan yejika moneki imiuan titajtoskej (Miq. 2:12).
5. ¿Toni techpaleuis maj okachi timomachtikan itech ueyi nechikol?
5 Ueli timomachtiaj. Maski Jesús katka konetsinok, yaya itech iluimej tein kipiayaj judíos uan momachtiaya tein kijtoua iTajtol Dios (Luc. 2:41-49). ¿Keniuj uelis tejuan uan tochankauan okachi timomachtiskej itech ueyi nechikol? Keman panotos tanojnotsmej, maj titokotsyetokan uan maj amo titajtokan komo amo moneki. Toteléfono oso okseki teposmej maj amo techpojpolo tejuan oso oksekin. Maj tikixitakan tanojnotskej uan maj tikijkuilokan se ome eyi tanemililmej. Kalyetouanij moneki mosentaliskej, ijkon tetatmej uelis kinitaskej imin koneuan maj takakikan. Uan itech youak, uelis tikxeloskej tiempo uan ika titajtoskej tamachtilis tein tikuelitakej.
6. ¿Keniuj moneki eski totaken uan toneketsalis?
6 Totaken uan toneketsalis. Tanamakanij uejka kayomej tein ojtokayaj, niman ueliaj kinixmatiaj ichankauan Jesús uan oksekin taueyichiuanij judíos tein yayaj itech iluit oso mokuepayaj. ¿Keyej? Porin taken tein kikuiaj tenxitintoya uan kipiaya tepitsin ajko se hilo azul tamalinal (Núm. 15:37-41). Maski tein tikchiuaj kemej Cristo amo tikuikaj se taman taken tein ika timoteixmatiltiaj, timoixmatij ke timotakentiaj chipauak, ika kuali taixejekolis uan tikpiaj kuali toneketsalis. Moneki tikitaskej maj kuali toneketsalis keman tiyouij, timokuepaj oso tiyetokej itech altepet kampa mochiua ueyi nechikol. Uan maski tikpataskej totaken keman tatamis, moneki maj kisentoka kuali nesi uan maj tikuikakan totarjeta tein ompa se motalilia. Komo ijkon tikchiuaj, niman nesis ke tiitaixpantijkauan Jiova uan kuali tajtoskej akin techitaskej.
7. ¿Keyej moneki titapaleuiskej itech tekit tein onkak keman mochiua se ueyi nechikol?
7 Monekij tapaleuianij. Monekij miakej tekitinij, ta ijkon nochi kuali kisas itech ueyi nechikol. ¿Uelis titapaleuiskej? (Sal. 110:3.) Tekit tein mochiua itech ueyi nechikol, no ika tikueyichiuaj Dios uan tapaleuia maj kuali ika tajtokan Jiova. Se takat tein tekiti kampa mochiuak se ueyi nechikol, kitelmoujkaitak keniuj tekitinij kichipaujkej kali. Yejua kijkuiloj: “Nikneki niktasojkamatis nochi tein nankichiujkej itech nejin ueyi nechikol tein amo keman ijkon nikitstoya. Ipa nechiluijkajya ke itaixpantijkauan Jiova tel tamamej. Itech totekipan namoixmatij ke nankikauaj kali okachi chipauak ke ijkuak nankiseliaj. Namejuan uan namoorganización nankichiuaj maj tel kuali nesi nejin kali itech toxolal, uan nejon tekit nankichiuaj ika imin nepaleuil kuali taltikpakneminij tein amo akin ijkon nikinixmatia”.
8. ¿Keniuj uelis titematiltiskej iTajtol Dios itech altepet kampa mochiua ueyi nechikol?
8 Ueli titematiltiaj iTajtol Dios. Miakej tein nemij itech altepet kampa mochiua ueyi nechikol, kinitaskej takalpanouanij ke kuali takentokej uan kuali neketsalis kipiaj. Uan no kiuikaj tarjeta tein ompa kikuij. Nejon uelis kinolinis maj tajtanikan keyej, uan uelis ika titajtoskej ueyi nechikol. Se konet naui xiujkayot, kiuikak itech restaurante se yankuik amaix tein motemakak itech ueyi nechikol uan kinextilij akin ompa tekitia. Nejon tapaleuij maj tetatmej kiyoleuakan maj youi itech ueyi nechikol.
9. ¿Keniuj uelis tiknextiskej ke tiknekij timomachtiskej tein kijtoua Jiova ijkon kemej kichiuayaj ichankauan Jesús?
9 Judíos akin kitelnekiaj momachtiskej tein kijtoua Dios, kichiayaj ika miak pakilis nejon iluimej (Deu. 16:15). Ichankauan Jesús tel yolpakiaj yaskej maski kipanoskiaj ouijkayomej uan kuali momachtiayaj ompa. Tejuan no tiktelnekij tiyaskej itech ueyi nechikol tein uejkaua eyi tonal, porin tikitaj kemej se netetayokolil tein techmaka toDios tetasojtakej (Sant. 1:17). Yejika, ¡maj tikchiuakan nochi taman tein monekis, uan ijkon uelis tiyetoskej itech nejon tonalmej kampa tikueyichiuaj Jiova ika yolpakilis!
Tein techelnamiktiaj keman tiyaskej ueyi nechikol tein uejkaua eyi tonal
◼ Hora keman peuas uan tamis. Nochi eyi tonalmej ueyi nechikol peuas 9:20 kualkan. Tataposkej a las 7:00. Keman moijtos maj tikakikan tatsotson tein kinextia ke peuatia ueyi nechikol, tinochin moneki timotaliskej, ijkon nechikol peuas ika poujkaitalis. Viernes uan sábado tatamis 4:55 tiotak uan domingo 3:40.
◼ Kampa tiketsaj teposmej. Komo techtakauiliaj, amo techtaxtaualtiskej kampa tiketsaskej totepos, uan tiktekpantiyaskej ijkon kemej tiajsitiyaskej. Kampa kinxelouiliaj akin amo ueli nejnemij, sayoj kikauaskej akin itepos kipias letrero oso placa tein tekiuanij kimakaj. Kemej amo nochipa taueyika kampa tiketsaskej teposmej, yejika, komo ueli maj tiyakan itech itepos okse tokniuj, ijkon amo semi miakiaskej.
◼ Ikpalmej. Uelis tikinxelouiliskej sayoj akin touan youij itech tepos, tochankauan oso akin tikinmachtijtokej ika Biblia (1 Cor. 13:5).
◼ Takualis. Maj tikuikakan totakual, ijkon amo monekis tikouatiuij tajkotonal. Tein ika tikuikaskej totakual moneki maj amo ueyi, ta se tein akis tatampa kampa timoseuiaj. Uan maj amo tikuikakan tapalkamej tachijchiuj ika teskat.
◼ Totapaleuil ika tomin. Uelis tiknextiskej ke tiktasojkamatij ueyi nechikol, komo ika totomin tikpaleuiaj itekiyo Dios tein mochiua itech nochi taltikpak. Nejin uelis tiktemakaskej itech Kalnechikol oso itech ueyi nechikol. Tapaleuil ika cheque tein motemakas itech ueyi nechikol, nikan México moneki motalis itokaykopa “La Torre del Vigía A.R.”.
◼ Accidentes uan ijsiujkayot tein mochiua. Komo mochiua teisa itech ueyi nechikol tein moneki kiitas ijsiujka se tapajtijkej, maj tikiluikan se tayektalijkej tein okachi achka yetos uan yejua niman kitematiltis Kampa kiitaj se Ijsiujkayot. Ijkon yejuan kiitaskej ox yekmelauj moneki mochiuas ijsiujka uan kiitaskej nejon ouijkayot.
◼ Tekakmej. Nochi xiujmej miakej moxokoliaj porin imin tekak amo kuali kiixpejpenaj. Okachi kuali maj tikuikakan tein kinamikis nejon tonalmej, tein amo techtsakuilis uan tein amo ika tiuetsiskej keman tipanoskej itech escalera uan kampa yeski.
◼ Akin amo uelij yektakakij. Itech seki ueyi nechikolmej, tanojnotsmej kipanoltiskej itech frecuencia modulada (FM) ompa taijtik. Sayoj monekis tikuikaskej se radio tsikitsin tein tekiti ika baterías uan seki audífonos.
◼ Grabación. Amo uelis tiktentakuiltiskej nion se tepos tein kichiua grabación itech electricidad niono itech sonido tein ompa mokuis. Teposmej tein ika tikchiuaskej grabación sayoj uelis tikuiskej komo amo ika titakuejmolouaj.
◼ Coches uan sillas tein ika kinuikaj konemej. Itech ueyi nechikol maj amo tikuikakan coches uan sillas tein ika se kinuika konemej. Uelis se kiuikas konet ika se silla, sayoj komo aki itech ikpal tein yetos imin nakastan tetatmej.
◼ Perfumes. Itech miak kalmej kampa mochiua ueyi nechikolmej, nochi tatsaktok uan moneki taejekauiltiskej ika teposmej. Yejika moneki titeajsikamatiskej uan amo tiktelkuiskej perfumes uan okseki taman tein tel chikauak ajuiyak, ta nejon uelis kinijtakos oksekin (1 Cor. 10:24).
◼ Amat tein itokay Sírvase visitar. Moneki tikuikaskej se oso ome amat Sírvase visitar (S-43-S) kampa uelis tikijkuiloskej itokay akin tiknojnotsaskej uan kinekis kimatis okachi. Uelis tiktemakaskej amat Kampa Kitemakaj Amaixmej, oso tikmakaskej tajkuilojkej itech tonechikol keman timokuepaskej (xikonita Nuestro Ministerio del Reino noviembre de 2009, página 4).
◼ Restaurantes. Keman kuali timonejnemiltiaj itech restaurantes kiueyitalia itokay Jiova. Itech miak altepemej moneki se kikauas 10 oso 15% kemej propina.
◼ Hoteles. 1) Maj tikxelokan kampa timokauaskej sayoj tein yekmelauj tikuiskej, uan tein timokauaskej itech se cuarto moneki eski sayoj tein ixyetok. 2) Komo amo tikuiskejok, maj niman titanauatikan itech hotel. 3) Maj tikuikan carrito tein ika se kiuika teisa, sayoj keman niman tiktekitiltiskej uan maj niman tikuepakan, ijkon uelis kikuiskej oksekin. 4) Kampa timokauaj, maj amo titakualchiuakan komo techiluiaj ke amo uelis. 5) Maj mojmostaj tikauilikan propina akin ompa tekiti. 6) Maj tikuikan almasal, café uan hielo sayoj tein ixyetok kinmakaskej sejse tein mokauaj ompa. 7) Maj nochipa tiknextikan itakilo espíritu keman imiuan titajtoskej akin tekitij itech hotel. Maj tikelnamikikan ke yejuan kinitaj miakej tein ompa mokauaj, uan yejika kitasojkamatij maj tikinajsikamatikan, maj tikuikan yemanik tajtolmej uan maj amo tiyolijsiuikan. 8) Ipatiuj cuarto tein ixnesi itech Lista de hoteles recomendados, kijtosneki sayoj se tonal, uan amo iuantia impuestos. Komo techtaxtaualtiaj okachi patiyoj, oso techmakaj se factura kampa ixnesi ke titauikaj ika tein amo titajtankej oso amo tikuikej, maj amo tikselikan uan maj niman titanauatikan Kampa kiitaj kani se Mokauas ompa itech ueyi nechikol. 9) Komo tikpiaj se kuejmol ika tocuarto kampa timokauaj, maj niman titanauatikan Kampa kiitaj kani se Mokauas keman tiyetoskej itech ueyi nechikol.
◼ Tapaleuianij. Okachi tiyolpakiskej keman tiyaskej itech ueyi nechikol, komo titapaleuiaj itech tekit tein ompa onkak (Hech. 20:35). Nochin akin kinekiskej tapaleuiskej uelis yaskej Kampa Moijkuilouaj Tapaleuianij. Tein ayamo kiajxitiaj 16 xiujmej, no uelis tekitiskej komo moajsi semej itatuan oso aksa akin yejuan takuaujtamatij ke uelis kiitas.