¿Akonimej kichiujtokej itanejnekilis Jiova itech nejin tonalmej?
1. ¿Keniuj techpaleuis nemachtil ika amaix Itanejnekilis Jiova?
1 Itech Nemachtil ika Biblia itech Nechikol timomachtiskej amaix ¿Akonimej kichiujtokej itanejnekilis Jiova itech nejin tonalmej? Nejin yankuik amaix, tein motemakak itech ueyi nechikol tein uejkaua eyi tonal “Maj tikyekpiakan toyolo”, mochijchiuak maj ika tiuelikan tikinpaleuikan akin tikinmachtiaj ika Biblia maj pouikan itech inechikol Jiova. Nemachtil tein tikpiaskej techpaleuis maj okachi tikpatiuitakan tatiochiualis tein tikpiaj porin tipouij itech nejin nechikol uan no techpaleuis maj okachi tikixmatikan nejin amaix tein tiktekitiltiaj itech tanojnotsalis (Sal. 48:13).
2. ¿Keniuj timomachtiskej amaix itech nechikol?
2 Keniuj timomachtiskej. Akin kiixyekanaskej nemachtil monekis kuali kixejxeloskej tiempo itech nochi tamachtilismej. Amaix kipia 28 tamachtilismej. Keman peuaskej se tamachtilis moneki kiixtajtoltiskej netajtanil tein kipia itech itokay. Keman taixtajtoltijkej kitamiixtajtoltis párrafo tein moajsi ipeujyan, akin kiixyekanas nemachtil kichiuas se netajtanil tein yejua kiixtalis. Satepan, nochi párrafos tein peua ika tijtiltik tajkuilol moneki moixtajtoltis sejse uan ompa titanankiliskej, satepan moixtajtoltis okse párrafo uan oksepa titanankiliskej. Akin kiixyekanas nemachtil tajtanis keniuj párrafo kinankilia netajtanil tein moajsi itech itokay tamachtilis. Komo ajsi tiempo, moixtajtoltis textos tein tayekantokej. Uan no, amaix kipia miak taixkopimej tein uelis ika titanankiliskej. Achto ke tipanoskej itech okse tamachtilis, akin kiixyekanas nemachtil kikuis netajtanilmej tein moajsi tatsintan uan ijkon techpaleuis maj tikelnamikikan tein timomachtijkej. Komo onkak se taxelol “Okseki taman tein uelis tikonmatis”, kiiluis taixtajtoltijkej maj kiixtajtolti uan kiniluis takakinij maj kijtokan keniuj uelis kipaleuis akin momachtijtok komo kichiua tein ompa kijtoua. Komo ajsi tiempo, uelis oksepa kijtos netajtanilmej tein moajsi itech itokay sejse tamachtilis. Sayoj ke moneki tikelnamikiskej ke amo monekis ijkon tikchiuaskej iniuan akin tikinmachtiaj ika Biblia.
3. ¿Keniuj uelis tikseliskej okachi nepaleuil itech nemachtil ika nejin amaix?
3 Tikseliskej okachi nepaleuil itech nechikol komo kuali timomachtiaj achto uan timochikauaj titanankiliskej. Keman mochiujtos nemachtil, maj tiknemilikan keyej nejon uelis kinpaleuis akin momachtijtokej ika Biblia. Nemachtil tein tikpiaskej ika nejin yankuik amaix technextilis keniuj tikinpaleuiskej oksekin maj kichiuakan itanejnekilis Dios uan maj uelikan nemikan nochipaya (1 Juan 2:17).