¿Toni moneki tikchiuaskej para tinemiskej itech yankuik taltikpak?

Timomachtijkejya ke amo uejkaua mochiuas ixpoliuilis, tein kijtosneki ke Dios niman kiixpolos nochi tein amo kuali uan akin amo yolkualmej. ¿Keyej titakuaujtamatij ke ijkon mochiuas? Porin iTajtol Dios ijkon kijtoua:

“Taltikpak panotiuj” (1 JUAN 2:17, TNM).

Sayoj ke senkis tikneltokaj ke miakej makisaskej porin nejin texto no kijtoua:

“Akin kichiua itanejnekilis Dios mokaua sennochipaya”.

Yejua ika, timakisaskej komo tiktakamatij Dios. Sayoj ke para tiktakamatiskej moneki kuali tikixmatiskej.

MAJ TIKIXMATIKAN DIOS PARA TIMAKISASKEJ

Taixkopimej: 1. Itech se tapajtiloyan, se enfermera akin semi sioujtok uan motekipachoua motalia talpan. 2. Keman moseuia kiita se akin iuan tekiti yolpaki keman kileroua se amaix. 3. Akin iuan tekiti kinextilia se texto itech Biblia uan kimaka se tarjeta tein ika tikteixmatiltiaj jw.org.

Jesús kijtoj: “Nachipa nemilis kijtosneki yejua nijin: [...] ma mitsonixmatikan [...] ke [...] sayo Tejuatsin tion Dios” (Juan 17:3). Para timakisaskej keman ixpoliuis nochi tein amo kuali uan tinemiskej nochipaya moneki tikixmatiskej Dios, nejin kijtosneki ke amo sayoj moneki tikneltokaskej ke Dios nemi oso tikmatiskej seki taman de yejuatsin, ta moneki kuali iuan timouikaskej. Komo tiknekij okachi kuali timouikaskej iuan aksa moneki tiempo para iuan tiyetoskej, no ijkon iuan Dios. Maj tikitakan toni tamachtia Biblia tein techpaleuis maj nochipa kuali timouikakan iuan Dios.

Tein Biblia tamachtia

Dios nochipa kinekini maj tinemikan kampa takualtsinkan.

Dios kinchijchiuak Adán uan Eva uan kintalijka kampa semi takualtsinkan, itech xochital tein motokaytiaya Edén. Amo katkaj tajtakolejkej uan Dios kinmakak nochi tein monekia para yolpakiskej. Ueliskia nemiskej nochipaya komo kisentokaskiaj kuali mouikaskiaj iuan Dios. Sayoj ke kiixtalijkej amo kitakamatiskej se tanauatil tein Dios kinmakaka.

Keyej titajyouiaj uan tikpiaj kuejmolmej.

Kemej Adán amo kitakamatik Dios amo uelikok nemik nochipaya. Yejua ika kipoloj se taman tein semi kipia ipatiuj, uan amo sayoj yejua ta no tinochin. Biblia kimelaua: “Itechkakopaka ne achtopa tagat Adán ten motajtakolmakak in tajtakol momauak ya tech nochi senmanauak. Uan [...] ongak mikilis [...] por ne tajtakol [...] mosouako [...] inpan nochi[n]” (Romanos 5:12). Ijkon kemej tetatmej uelis kinpanoltiliskej tein amo kuali ininkoneuan, Adán techpanoltilij tajtakol porin tiikoneuan uan yejua ika tiueuentsintiaj uan timikij.

Dios kichiuak se taman tein ika techpaleuia.

Biblia kijtoua: “Dios semi kintasojtak in taltikpakuani. Ika ya nojon [...] kualtitanik Iyojtsin Ikonetsin [...] para ma nochi ne ten iuantsin takuautamatiske, [...] amo ixpoliuikan. Ta, ma kipiakan ne yek nemilis nachipa” (Juan 3:16). Dios kiualtitanik ikonetsin para maj toka momikiliki. Prabhakar, akin nemi ompa India uan kipia 86 xiujmej, keman ika tanemilia tein Dios kichiuak, kijtoua: “Nejin nechmachtia ke Jiovaa semi nechtasojta uan yejua ika nikchia ninemis nochipaya”.

Uelis tiktasojkamatiliskej Dios tein toka kichiuak.

Biblia kijtoua ke uelis tiktasojkamatiliskej tein Dios toka kichiuak komo “tikintakamatinemij in tanauatilme de Dios” (1 Juan 2:3). Ika netasojtalis, Jiova Dios techmachtia keniuj uelis tiyolpakiskej axkan (Isaías 48:17, 18, nota). Dios amo kineki maj titajyouikan, yejua ika techmachtia ke komo tiktakamatij tiyolpakiskej axkan uan tinemiskej nochipaya.

MAJ TIKLEROKAN BIBLIA MOJMOSTAJ

Keman enfermera moseuia para almasalos kileroua Biblia uan ajko tachia. — Timakisaskej keman ixpoliuis tein amo kuali komo tiktajtaniaj Dios maj techpaleui uan tikchiuaj tein kiyolpaktia.

Para tiyoltoskej moneki mojmostaj titakuaskej, sayoj ke Jesús kijtoj: “In taka ma nemikan amo sayo ika in takualis san. Ta, no [...] ika nochi in tajtolme ten Dios techmaktilijtinemi” (Mateo 4:4).

Axkan tikajsij itajtoluan Jiova itech Biblia. Ijkon kemej timomachtijtiouij nejin amatajkuilol, tikitaj tein Dios kichiuak ne uejkauj, tein kichiujtok axkan uan tein kichiuatiok.

MAJ TIKTAJTANIKAN DIOS MAJ TECHPALEUI

Komo tiknekij tiktakamatiskej Dios sayoj ke techouijmaka amo tikchiuaskejok tein yejuatsin kijtoua ke amo kuali, ¿toni uelis tikchiuaskej? Semi techpaleuis komo tikixmatij Dios.

Maj tikitakan tein kipanok se siuat akin tiktokaytiskej Sakura. Yejua auilnemia, sayoj ke keman peuak momachtia Biblia kiitak ke Dios tanauatia: “Xikcholouilikan [...] ne auilnemilis” (1 Corintios 6:18). Sakura kitajtanij Dios maj kipaleui uan uelik kikauak tein kichiuaya. Sayoj ke moneki kisentokas kiixtopeuas tein amo kuali. Yejua kijtoj: “Keman ika nitanemilia auilnemilis nikiluia Jiova keniuj nimomachilia porin nikmattok ke amo uelis noselti nikixnamikis. Netataujtil okachi nechtokiani iuan Jiova. Kemej Sakura, millones momachtijtokej akoni Dios uan yejuatsin kinpaleuijtok maj kipatakan tein moneki para kiyolpaktiskej (Filipenses 4:13).

Komo okachi tikixmatij Dios, yejuatsin okachi kuali techixmatis uan kuali mouikas touan (Gálatas 4:9; Salmo 25:14). Ijkon timakisaskej keman ixpoliuis nochi tein amo kuali uan uelis tinemiskej itech yankuik taltikpak tein Dios kichiuas. ¿Keniuj yeski nejin taltikpak? Okse tamachtilis kimelauas.

a Biblia kijtoua ke itokay Dios Jiova.