Jehová techpaleuia maj tiyolpakikan

1, 2. 1) ¿Keniuj momachiliaj miakej? 2) ¿Toni tikitaskej itech nejin tamachtilis?

AXKAN miakej kichiuaj miak taman para uelis yolpakiskej, sayoj ke ipa amo yolpakij. Miakej semi motayokoltiaj uan kinemiliaj ke amo keman uelis yolpakiskej. Uan xa sekin akin kitekitiliaj Jehová no ijkon momachiliaj. Kemej tinemij itech “tonalmej keman tatamitiya”, ipa tikpiaj ouijkayomej tein kichiua maj semi timotekipachokan uan maj titayokoyakan (2 Tim. 3:1).

² Itech nejin tamachtilis tikitaskej toni uelis kichiuas maj titayokoyakan uan toni moneki tikchiuaskej para oksepa tiyolpakiskej. Sayoj ke, achto tikitatij akoni uelis techpaleuis maj tiyolpakikan.

JEHOVÁ UELIS TECHPALEUIS MAJ TIYOLPAKIKAN

3. ¿Toni techmachtia tein Jehová kichijchiuak? (No xikita taixkopimej).

³ Jehová nochipa yolpaktok uan kineki maj tejuan no tiyolpakikan. Yejua ika kichiuani miak taman por tejuan. Tikuelitaj tikitaskej miak tataman colores, keniuj mauiltiaj tapialmej, uan semi tiyolpakij keman tikuaj tapalol tein okachi tikueliliaj. Nochi nejin kinextia ke Jehová techtasojta uan kineki maj tiyolpakikan.

Se elefantejkonet: Image © Romi Gamit/Shutterstock; pingüinojkonemej: Vladimir Seliverstov/500px via Getty Images; chivojkonemej: Rita Kochmarjova/stock.adobe.com; ome delfines: georgeclerk/E+ via Getty Images

4. 1) ¿Keyej Jehová kisentoka yolpaki maski kiita nochi tein amo kuali tein mochiua? 2) ¿Keniuj techpaleuia Jehová? (Salmo 16:11).

⁴ Jehová kiita keman titajyouiaj uan semi kitayokoltia, maski ijkon Biblia kijtoua ke yejua “Dios akin yolpaki” (1 Tim. 1:11). ¿Keyej Jehová kisentoka yolpaki? Porin kiixtalijya ke amo uejkaua kiixpolos nochi tein techtayokoltia uan techtajyouiltia. Sayoj ke axkan kimati keniuj timomachiliaj yejua ika amo techsenkaua. Keman titajyouijtokej, Jehová techyekpia uan techpaleuia. ¿Keniuj kichiua? Techpaleuia maj tiyolpaktokan (xiklero Salmo 16:11). Maj tikitakan keniuj Jehová kipaleuij Jesús maj yolpaki.

5, 6. ¿Keyej Jesús yolpaki?

⁵ De nochi tein Jehová kichijchiuak, Jesús yejua akin okachi yolpaki. ¿Keyej? Porin “yejua tamati kemej [iTajtsin] akin amo ueli tikitaj” (Col. 1:15; 1 Tim. 6:15). Uan no porin yejua okachi miak tiempo yetoni iuan Jehová akin kichiua maj tiyolpakikan.

⁶ Uan no, Jesús yolpaki porin nochipa kichiua tein iTajtsin kinauatia (Prov. 8:​30, 31; Juan 8:29). Nejon kichiua maj Jehová semi yolpaki (Mat. 3:17).

7. ¿Toni techpaleuis maj tiyolpakikan?

⁷ Tejuan no uelis tiyolpakiskej komo tiksentokaj tikixmatij Jehová. Komo okachi timomachtiaj keniuj tamati, okachi tikchiuaskej kemej Jehová uan okachi tiyolpakiskej. No semi tiyolpakij keman tiktakamatij uan keman tikmatij ke tikyolpaktijtokej (Sal. 33:12).a Sayoj ke xa ipa timotayokoltiskej seki tonalmej oso xa nochipa ijkon timomachiliskej. Komo ijkon, amo xiknemili ke amo tikyolpaktiaok Jehová. Yejua kimati ke kemansa ipa titajyouiskej uan timotayokoltiskej (Sal. 103:14). Maj tikitakan toni uelis kichiuas maj amo tiyolpakikanok uan keniuj uelis oksepa tiyolpakiskej.

¿TONI TECHPALEUIS MAJ OKSEPA TIYOLPAKIKAN?

8. ¿Keniuj xa timomachiliaj keman tikpiaj ouijkayomej?

⁸ Tein techpanoua uelis kichiuas maj amo tiyolpakikanok. Xa titajyouijtokej porin techixnamikij, panok se tetsauit kampa tinemij, amo tikpiaj tomin, timokokouaj oso tixiuejkejya. Nochi nejin xa kichiuas maj semi timotayokoltikan, okachiok komo amo ueli tikpataj tein techpanotok. Biblia kijtoua ke xa semi timotayokoltiskej uan hasta tikmachiliskej ke amo keman oksepa tiyolpakiskej (Prov. 15:13). Ijkon kipanok se tayekankej akin monotsa Babis. Itech sayoj seki xiujmej, iikniuj uan itatuan momikilijkej. Yejua kijtoua: “Nimomachiliaya noselti uan niknemiliaya ke amo akin ueliskia nechpaleuis. Achto ke momikiliskiaj notatuan uan nokniuj, kemansa tel amo kuali nimomachiliaya porin niknekia okachi nietos iniuan, sayoj ke amo niuelia”. Kemansa tein techpanoua no uelis kichiuas maj semi tisiouikan uan maj tel amo kuali timomachilikan.

9. ¿Toni uelis tikchiuaskej para oksepa tiyolpakiskej? (Jeremías 29:​4-7, 10).

⁹ ¿Toni techpaleuis maj oksepa tiyolpakikan? Uelis okachi tiyolpakiskej komo amo ika timotekipachouaj tein amo ueli tikpataj uan komo tiktasojkamatij tein tikpiaj. Axkan miakej kinemiliaj ke amo tiyolpakiskej komo amo tinemij kemej tikuelitaskiaj, sayoj ke nejon amo melauj. Ne uejkauj, Jehová kiniluij judíos akin kinuikakaj Babilonia maj kitemouanij yolpakiskej kampa kinuikakaj (xiklero Jeremías 29:​4-7, 10). ¿Toni techmachtia nejin? Xikita tein kuali tein tikpia uan ximotasojkamati. Xikelnamiki ke Jehová amo mitssenkauas uan nochipa mitspaleuis (Sal. 63:7; 146:5). Se tokniuj siuat akin monotsa Efi semi motasojkamati porin Jehová kipaleuij. Se tonal semi mokokoj uan amo uelikok nejnemik, yejua kijtoua: “Jehová, nochankauan uan tokniuan semi nechpaleuijkej uan nechyolchikaujkej. Nikneki nikinnextilis ke semi nikintasojkamatilia nochi tein kichiuanij. Yejua ika nimochikaua nochipa niyolpakis”.

10. ¿Keyej ueli tiksentokaj tiyolpakij maski tikpiaj ouijkayomej?

¹⁰ Ipa uelis tiyolpakiskej maski tochankauan oso tejuan amo tel kualtsin kemej tinemij oso techpanoua tein amo kuali (Sal. 126:5).b ¿Keyej? Porin ueli se yolpaki hasta keman amo kuali se yetok. Se precursora akin monotsa María, kijtoua: “Keman tikpiaj ouijkayomej, ueli tiksentokaj tiyolpakij porin tikelnamikij tein Jehová motenkaua kichiuas. Nejon amo kijtosneki ke amo uelis tichokaskej oso tikijtoskej keniuj timomachiliaj. Sayoj ke maski ijkon techpanos, toTajtsin nochipa techpaleuis maj ueli tiyolpakikan maski titajyouiaj”. Maj tikelnamikikan ke maski tikpanotoskej tein tel amo kuali, amo nochipa ijkon yeski. Amo uejkaua, Jehová kiixpolos nochi tein techtajyouiltia uan tein techtayokoltia.

11. ¿Keniuj mitsyolchikaua tein kipanok tatitanil Pablo?

¹¹ Kemansa xa tiknemiliskej ke tikpiaj ouijkayomej porin Jehová amo techtatiochiuijtok. Komo ijkon timomachiliaj, maj inintech titanemilikan seki itekitikauan Dios akin no kipiakej ouijkayomej, kemej tein kipanok tatitanil Pablo. Jesús kiixpejpenak para maj kinixmatilti kuali tanauatilmej ‘akin amo katkaj judíos, tekiuanij uan israelitas’ (Hech. 9:15). Maski ijkon, Pablo kipanok miak taman tein amo kuali (2 Cor. 11:​23-27). Sayoj ke nejon amo kijtosnekia ke Jehová amo kitatiochiuijtoya, ta Pablo taxikojtoya porin Dios kisentokaya kipaleuiaya (Rom. 5:​3-5). Axkan itech xitanemili tein mitspanotok. Tejua tiksentoka tiktekitilia Jehová maski tikpia ouijkayomej, yejua ika uelis tikneltokas ke mitspaleuijtok porin tikyolpaktia.

12. ¿Keyej xa amo tiyolpakiskejok komo amo ueli tikchiuaj tein tiknekiskiaj?

¹² Xa amo ueli tikchiuaj nochi tein tiknekiskiaj para tiktekitiliskej Jehová (Prov. 13:12). Semi tiktasojtaj Jehová uan tiktasojkamatiliaj nochi tein kichiua por tejuan, yejua ika tikixtaliaj tikchiuaskej miak taman para tiktekitiliskej. Sayoj ke komo tiktelnekij tikchiuaskej tein amo tiuelij, xa timoyolkokoskej (Prov. 17:22). Se precursora akin monotsa Holly, kijtoua: “Niknekia nikselis Tamachtilis para akin kiteixmatiltiaj iTaixyekanalis Dios, no niknekia nitapaleuitiuj okse altepet oso nitapaleuis maj kichijchiuakan Betel de Ramapo. Sayoj ke mopatak kemej ninemia uan amo uelikok nikchiuak nion teyi tein nikixtalijtoya. Yejua ika semi nimotayokoltij”. Miakej akin kitekitiliaj Jehová no ijkon momachiliaj keman amo ueli kichiuaj tein kinekiskiaj para kitekitiliskej.

13. ¿Keniuj uelis titapaleuiskej komo amo ueli tikchiuaj nochi tein tiknekiskiaj?

¹³ ¿Toni techpaleuis maj oksepa tiyolpakikan? Maj tikelnamikikan ke Jehová amo techiluia maj tikchiuakan tein amo tiuelij. Jehová techpatiuita maski amo ueli tikchiuaj nochi tein oksekin kichiuaj. Yejua kineki maj tiyolyemankej uan maj amo tikauakan (Miq. 6:8; 1 Cor. 4:2). Jehová okachi kiyolpaktia keman kiita ke tiknemiliaj uan tikchiuaj tein kuali maski amo ueli tikchiuaj nochi tein tiknekiskiaj. Yejua ika, amo moneki timochiualtiskej okachi ke tein Jehová techtajtania. Komo amo ueli tikchiua tein tikneki para tiktekitilis Jehová, xiknemili tein kemaj uelis tikchiuas. Xa ueliskia tikpaleuis se tokniuj okichpil oso tikinyolchikauas tokniuan akin xiuejkejya. Xa uelis tikalpanos aksa, tiknotsas oso tiktajkuilouilis. Jehová yolpaki keman kiita ke tikchiua tein tiueli uan mitspaleuis xiyolpaki. Xikelnamiki ke itech xochital uelis okachi tiktekitiliskej Jehová. Holly, akin ika titajtojkej itech okse párrafo, kijtoua: “Keman nimotayokoltia, nimoelnamiktia ke ninemis nochipaya. Uan itech xochital uelis nikchiuas miak taman para niktekitilis Jehová uan yejua nechpaleuis”.

14. ¿Toni okse taman uelis kichiuas maj amo tiyolpakikanok?

¹⁴ Komo tiktemouaj sayoj tein techyolpaktia. Itech internet tikinitaj miakej akin moita ke nochipa yolpakij porin kichiuaj tein kiuelitaj. Uan ueliskia tiknemiliskej ke no semi tiyolpakiskej komo tikchiuaj kemej yejuan, komo timokouiliaj tein tiknekij uan miakkan timoixpetanitij. Kuali yetok komo tikchiuaj tein tikuelitaj, Jehová kineki maj ika timoyolpaktikan tein kichijchiuak. Sayoj ke miakej akin sayoj kinekij moyolpaktiskej, kiitaj ke amo yekmelauj yolpakij kemej kinemiliayaj. Se precursora akin monotsa Eva, kijtoua: “Keman sayoj tiktemojtok timoyolpaktis, nochipa tiknejnektok ijkon tikchiuas”. Komo nochipa tiktemojtokej tikchiuaskej tein tiknejnekij, timotayokoltiskej uan amo kuali timomachiliskej.

15. ¿Toni techmachtia tein kipanok tekiuaj Salomón?

¹⁵ Maj itech titanemilikan tekiuaj Salomón. Yejua kinekik kiitas ox yekmelauj yolpakiskia komo sayoj kichiuaya tein kinekia. Yejua ika kiyekoj miak tataman tapalol, kikakik kualtsin tatsotson uan kikouak miak taman tein patioj, sayoj ke nejon amo kipaleuij maj yolpaki. Yejua kijkuiloj: “Se iixtololo nochipa kinektok tachias uan se inakas nochipa kinektok takakis” (Ecl. 1:8; 2:​1-11). Sekin kinemiliaj ke komo kipiaj miak tomin uan kichiuaj tein kinekij, uelis yolpakiskej. Sayoj ke nejon amo melauj, porin amo keman techpaleuis maj tiyolpakikan.

16. ¿Keyej tiyolpakij keman tikinpaleuiaj oksekin? (No xikita taixkopimej).

¹⁶ ¿Toni techpaleuis maj oksepa tiyolpakikan? Jesús techmachtij ke “okachi se yolpaki keman se kitemaka ke ijkuak temakaj” (Hech. 20:35). Alekos, se tokniuj tayekankej, kijtoua: “Nikchiua seki taman tein amo ouij para nikinpaleuis oksekin. Keman okachi ininka nitanemilia oksekin nechpaleuia maj amo sayoj noka nitanemili, uan yejua ika semi niyolpaki”. ¿Keniuj uelis tikinpaleuis oksekin? Komo tikita ke aksa tayokoxtok, iuan xitajto uan xikyolchikaua. Xa amo tikpatas tein kipanotok, sayoj ke semi kipaleuis komo kuali tikaki, tikiknelia uan tikelnamiktia ke uelis kitapouis Jehová nochi tein kipanoua (Sal. 55:22; 68:19). No uelis tikelnamiktis ke Jehová amo kisenkaua (Sal. 37:28; Is. 59:1). Xa hasta uelis tikchijchiuilis teisa tein kikuas oso uelis nanyaskej nannemitiuij. Xikyoleua maj mouan tanojnotsa, komo ijkon tikchiua xa semi kipaleuis maj yolpaki. Komo ininka titanemilia oksekin, Jehová uelis kichiuas xikinyolchikaua. Keman tikxelouaj tiempo para tikinpaleuiskej oksekin, semi tiyolpakij (Prov. 11:25).

17. ¿Toni moneki tikchiuaskej komo tiknekij tiyolpakiskej? (Salmo 43:4).

¹⁷ Komo tiksentokaj tikixmatij Jehová uan tikchiuaj tein kineki, uelis semi tiyolpakiskej. Biblia kijtoua ke Jehová uelis techpaleuis maj tiyolpakikan (xiklero Salmo 43:4). Yejua ika uelis tiyolseujtoskej maski tikpiaskej miak ouijkayomej. Jehová techpaleuis maj nochipa tiyolpakikan komo kuali iuan timouikaj (Sal. 144:15).