¿Tapaleuia yankuik teposmej tein kichijchiuaj oso amo? | ¿Toni kijtoua Biblia?

Yankuixtok taixyekananij itech taltikpak, científicos uan okseki taixmatinij kijtouaj ke semi tapaleuia yankuik teposmej tein kichijchiuaj tamatinij. Maski kijtouaj ke semi tapaleuia, no kintekipachoua porin uelis mokuis para mochiuas tein amo kuali.

• “Yankuik teposmej tein kichijchiuaj moita ke uelis kinpaleuis miakej maj okachi kuali nemikan. [...] Sayoj ke no uelis kichiuas maj okachi ijsiujka tetachtekikan, maj amo tikpiakanok seki taman, maj ijsiujka kimatikan tein se kichiua uan maj amo se takuaujtamatiok ke yetos tekiuaj akin kiixpejpenkej” (Kamala Harris, vicepresidenta de Estados Unidos, 4 de mayo de 2023).

• “Maski yankuik teposmej tein kichijchiuaj axkan moita ke semi tapaleuis itech tapajtilis, no moita ke uelis kinkokolispeualtis oso kichiuas maj amo kuali yetokan” (Grupo internacional de médicos y profesionales de la salud dirigido por el doctor Frederik Federspiel, BMJ Global Health, 9 de mayo de 2023).a

• “Axkan ika nejin yankuik teposmej uelis tematiltiskej tein amo melauj. No uelis kichiuas maj miakej amo kipiakanok tekit. Uan sekin akin kuali kiixmatij keniuj kinchijchiuaj yankuik teposmej, kijtouaj ke ajsis tonal keman uelis kinijtakos akin nemij nikan taltikpak” (The New York Times, 1 de mayo de 2023).

Moitasok ox yankuik teposmej mokuis kemej kinamiki oso amo. ¿Toni kijtoua Biblia?

¿Keyej tein kichijchiua takat kichiua maj se monemili ox tapaleuis?

Biblia kinextia keyej takat amo ueli kichiua maj nochipa mokui kemej kinamiki yankuik teposmej tein kichijchiua.

1. 1. Maski takat kinejneki kichiuas tein kuali, amo ueli kiita ox taijtakos tein kichijchiua.

   • “Moajsi se ojti tein takat kinemilia ke kuali yetok sayoj ke teuika kampa se mikis” (Proverbios 14:12).

2. 2. Takat amo ueli kichiua maj nochipa sayoj mokui kemej kinamiki tein kichijchiua.

   • “Moneki nikauilijteuas [notekiuj] takat akin ualas satepan de nejua. ¿Uan amo se kimati ox yeski tamatkej oso amo tamatkej? Sayoj ke ipa yejua imako panos tein ika semi nimotekitiltij uan semi niktemoj nikualtilis” (Eclesiastés 2:18, 19).

Nejin kinextia ke moneki maj techixyekana akin techchijchiuak.

Akoni iuan uelis titakuaujtamatiskej

Akin techchijchiuak kiyekijtoua ke amo kikauas maj takat, oso teposmej tein kichijchiua takat, kiixpolo taltikpak oso akin nemij nikan taltikpak.

• “Taltikpak nochipa yetos” (Eclesiastés 1:4).

• “Akin yolmelaujkej ininaxkatis taltikpak uan ompa nemiskej nochipaya” (Salmo 37:29).

Akin techchijchiuak techmatiltia ika Biblia keniuj uelis tiajsiskej itech tonalmej keman nochin kualtsin nemiskej. Para tikonmatis tein kijtoua Biblia, xikonlero tamachtilis “¿Toni uelis techpaleuis maj tikchiakan kuali tinemiskej?” uan “La esperanza real de un mañana mejor”.