Tamachtilis 14
Keniuj oloch tekitij itaixpantijkauan Jiova
¿Kemanian peuak tekitij itaixpantijkauan Jiova? (1)
¿Keniuj kichiuaj imin nechikoluan itaixpantijkauan Jiova? (2)
¿Kani ualeua tomin tein mokui? (3)
¿Akoni kinixyekana oloch tokniuan tein monechikouaj? (4)
¿Katiyejua oksekin uejueyi nechikolmej kichiuaj xijxiujtika? (5)
¿Toni mochiua itech kaltekitiloyan kampa kinixyekanaj itaixpantijkauan Jiova uan itech oksekin kaltekitiloyamej? (6)
1. Tekit tein axkan kichiuaj itaixpantijkauan Jiova peuak kemej itech xiuit 1870. Keman peujkej, moixmatiaj kemej Momachtianij ika Biblia, sayoj ika itech xiuit 1931 kikuikej tokayit itaixpantijkauan Jiova kemej ixnesi itech Biblia (Isaías 43:10, NM). Keman peujkej itaixpantijkauan Jiova amo miakej katkaj, sayoj ika yolik peuak momiakiliaj uan axkan yetokej millones, uan panoua 230 uejueyi altepemej kampa kitetapouiaj iTekiuajyo Dios.
2. Miakej itaixpantijkauan Jiova monechikouaj expa semana. Timitsyoleuaj xiouj semej nechikolmej (Hebreos 10:24, 25). Tamachtilis tein ompa motemaka uitse itech Biblia. Nechikolmej peuaj uan tamij ika se netataujtilis, uan itech seki mokuikatiaj ika nochi imiyolo uan ika kiueyichiuaj Jiova (Efesios 5:18, 19). Uelis yas akiyeski uan amo kitaxtaualtiskej (Mateo 10:8).
3. Miakej kichiuaj imin nechikoluan itech se Kali kampa monechikouaj itaixpantijkauan Jiova. Miak Kalmej kampa monechikouaj chijchiujtokej kemej uelisaj, uan Taixpantinij motemakaj kichijchiuaskej ika nochi imiyolo maski amo kintaxtauiaj. Ompa amo tikinitas tiotsitsin niono kolotsitsin oso okse taman tein ijkuitik. Nochi motaxtaua ika tomin tein taltikpakneminij kitetayokoliaj ika nochi imiyolo. Akin kinekis kitetayokolis tomin uelis kitalis itech se kaxontsin kampa nochin kitaliaj ika nochi imiyolo (2 Corintios 9:7).
4. Itech sejse kalnechikoloyan moajsij ueuentsitsin, oso tein kiitaj tekit, yejuan taixyekanaj ika tamachtilis (1 Timoteo 3:1-7; 5:17, NM). Yejuan tekitij imiuan tapaleuianij (1 Timoteo 3:8-10, 12, 13). Niose okachi ueyichiujkej iminpan oloch tokniuan tein monechikouaj (2 Corintios 1:24). Amo kintaliliaj se tokayit maj kinexti ika okachi ueyichiuanimej (Mateo 23:8-10). Amo taman motakentiaj, niono kintaxtauiaj tekit tein kichiuaj. Kinpaleuiaj ika miak pakilis oloch tokniuan maj mochikaua imin takuaujtamatilis. Kiniyolchikauaj uan kinpaleuiaj keman kipiaj nekuejmololmej (Santiago 5:14-16; 1 Pedro 5:2, 3).
5. Itaixpantijkauan Jiova no kichiuaj xijxiujtika uejueyi nechikolmej. Itech nejon tonalmej tein motelneki, ompa youij miakej tokniuan tein monechikouaj itech tataman kalnechikolmej uan kikakitij tamachtilis tein ualeujtok itech Biblia. Itech nejon uejueyi nechikolmej nochipa moauiaj tein yankuikej momachtianij (Mateo 3:13-17; 28:19, 20).
6. Nueva York moajsi kaltekitiloyan kampa kinixyekanaj itaixpantijkauan Jiova. Ompa yetok Oloch Taojtokaltianij, nejin se oloch ueuentsitsin tein kipiaj miak nemachtil uan kiitaj tekit tein kichiuaj itaixpantijkauan Jiova semanauak taltikpak. No panoua se ciento kaltekitiloyamej tein yetokej semanauak taltikpak. Tein ompa tekitij maski amo kintaxtauiaj, motemakaj ika nochi imiyolo tapaleuiskej maj mochijchiua uan maj motitani amaixtajkuilolmej tein motaksaltia itech Biblia. Ompa no kiitaj keniuj maj motetapoui iTekiuajyo Dios. ¿Keyej amo tikixtalia se tonal uan tiouj tikalpanoti kaltekitiloyan tein okachi achkatsin?