Majtaktika chauis

Moisés kiyekiluij faraón ke amo kitemoskia oksepa kiitas. Sayoj ke achto ke kisaskia, kiluij: “Tajkoyouan, okichpil akin tayekana itech nochi kalyetouanij akin nemij Egipto momikilis, iokichpil faraón hasta ininokichpipiluan takeualmej”.

Jiova kiniluij israelitas maj kichijchiuakan se takual tein amo keman kichijchiujtoyaj. Kiniluij: “Xikmiktikan se ichkat oso se chivo tein kipia se xiuit, uan tepitsin iesyo xikuijkuiltikan kaltenkouit. Xiktipauatsakan nakat uan xikuakan ika pantsin tein amo kipia tein ika xokoyas. Ximotakuijkuilikan, ximotilmajtikan uan ximotekaktikan kemej uelis niman nanyaskej. Nejin youak namechmakixtis”. ¿Tiknemilia keniuj semi yolpakkej israelitas?

Tajkoyouan, iángel Jiova yajki itech nochi kalmej ompa Egipto. Kampa amo kiitak esti itech kaltenkouit, okichpil akin tayekanaya momikilij. Sayoj ke itech kalmej tein kemaj kipiayaj esti, ángel amo teyi kinchiuilij okichpipil. Itech nochi kalyetouanij ompa Egipto, akin tominpiayaj uan akin amo, momikilij se ininokichpil. Sayoj ke nion se ininokichpil israelitas momikilij.

Iokichpil faraón akin tayekanaya no momikilij. Faraón amo taxikojok uan kiniluij Moisés uan Aarón: “¡Xiyakan! ¡Xikisakan uan xikueyichiuakan nanmoDios! ¡Xikinuikakan nanmotapialuan uan xiyakan!”.

Nejon youak metstonatoya. Israelitas kinsejsentilijkej kemej kalyetouanij uan ijkon kiskej Egipto. Moajsiaj 600,000 takamej, uan no tel miakej siuamej uan konemej. Miakej akin amo katkaj israelitas no yajkej iniuan porin kinekiaj kiueyichiuaskej Jiova. ¡Egipcios amo kintajyouiltiskiajok israelitas!

Xijxiujtika, israelitas monekia kichijchiuaskej takual tein kichijchiujkaj achto ke kisaskiaj, uan ijkon kielnamikiskiaj ke Jiova kinmakixtijka. Kitokaytijkej Pascua.