Eyi taman tein techpaleuis maj okachi kuali titamachtikan
1. ¿Keyej moneki tiktemoskej okachi kuali titamachtiskej?
1 Nochi tanojnotsanij tamachtianij. Keman titanojnotsaj, oksepa titakalpanouaj oso titamachtiaj ika Biblia, tiktemouaj tiktematiltiskej tamachtilis tein motelneki. Ijkuak tikinnextiliaj taltikpakneminij “Tajkuilolamatsin de Dios”, tikinpaleuiaj maj ‘kiajsikan ne nemakixtilis’ (2 Tim. 3:15). ¡Se ueyi tatiochiualis! Maj tikitakan eyi taman tein techpaleuis maj okachi kuali titamachtikan.
2. ¿Keniuj uelis titamachtiskej kemej amo ouij moajsikamatis?
2 Maj amo ouij titamachtikan. Uelis panos ke tiktelixmatij se tamachtilis uan kuali tikmelauaj uan tikelkauaskej ke akin techkaki kiouijitas. Yejua ika, keman tikmachtijtoskej aksa ika Biblia, maj amo tikiluikan tel miak taman itech se tamachtilis. Okachi kuali maj tikiluikan sayoj tanemililmej tein tayekantokej. Se kuali tamachtilis amo motemaka ika tel miak tajtolmej (Pro. 10:19). Miakpa sayoj moneki tikixtajtoltiskej textos tein kipaleuiaj tamachtilis. Satepan ijkuak tikixtajtoltiskej maj tikitakan sayoj tajtolmej tein mouika iuan tamachtilis tein tikitstoskej. Itech amatajkuilol Mateo, capítulo 5 hasta 7, kipia miak uejueyi tamachtilis tein Jesús kitemakak itech se tepet, uan maski ijkon amo tel miak tajtolmej kikuik uan tajtoj kemej amo ouij moajsikamatiskia.
3. ¿Toni nepaleuil kitemakaj neskayomej, uan katiyejuan okachi tapaleuiaj?
3 Maj tiktekitiltikan neskayomej. Neskayomej kichiuaj maj se tanemili, maj se kimachili teisa uan techpaleuia maj amo niman tikelkauakan se taman. Amo moneki tiyeskij kuali titetapouianij uan tiktemakaskej kuali neskayomej. Jesús kijtouaya miak tein amo uejueyi uan tein amo ouijkej (Mat. 7:3-5; 18:2-4). Dibujo tein amo ouij tein tikchijchiuaskej itech se amat, no se taman tein uelis techpaleuis. Komo achto timomachtiaj uelis tikajsiskej tel kuali neskayomej.
4. ¿Keniuj uelis kuali tiktekitiltiskej netajtanilmej?
4 Maj kuali tiktekitiltikan netajtanilmej. Netajtanilmej tapaleuiaj maj tanemili akin tikmachtiaj. Yejua ika, keman tikchiuaskej se netajtanil maj tikakikan tanankilil ika nejmachkayot. Komo tejuan ijsiujka tiktemakaj tanankilil, amo tikmatiskej tein kiajsikamati akin tikmachtiaj. Uan komo amo kitemaka se kuali tanankilil, maj amo niman tikiluikan, okachi kuali maj tikpaleuikan maj kiajsi tanankilil ika okseki netajtanilmej (Mat. 17:24-27). Tein melauj, amo akin se tel kuali tamachtijkej. Yejua ika, Biblia techyolchikaua maj tikyekpixtinemikan keniuj titamachtiaj, ta komo ijkon tikchiuaj techualkuilis tein kuali uan no akin techkakiskej (1 Tim. 4:16).