Maj timomachtikan kemej tanojnotsaj akin kuali uelij tanojnotsaj
Se tatiochiualis maj touan moajsikan tokniuan akin kuali uelij tanojnotsaj. Sekin kiuikajya miak xiujmej kitekitilijtokej Jiova. Oksekin xa amo, sayoj ke kuali kichiuaj nejon tekit. Nochin kiitanij ke Jesucristo kiixyekantok nechikol itech nejin itamian tonalmej uan tapaleuijtok maj motanojnotsa uan maj motamachti (Mat. 28:19, 20). Kemej kiuikajya miak xiujmej itech tanojnotsalis, kiselianij “chikaukauelilis [tein] ualeutok imako Dios”, uan nejon kinpaleuia maj kiixnamikikan ouijkayomej (2 Cor. 4:7). Yejuan kinpaktia kinmachtiskej oksekin tein kimatij uan tejuan uelis techpaleuis taixmatilis tein kipiaj (Sal. 71:18). ¿Toni moneki tikchiuaskej uan ijkon tikseliskej?
Itech tanojnotsalis. Tokniuan akin kuali uelij tanojnotsaj, moneki kinmachtiskej akin yankuikej uan ijkon mochiuaskej kuali tanojnotsanij. Uelis timomachtiskej miak taman komo tikitaj keniuj kiteixmatiltiaj iTajtol Dios tokniuan akin kuali uelij tanojnotsaj. (Xikonita párrafo 3, itech taxelol “Xikonpaleui tanojnotsanij akin yankuikej”, itech tamachtilis “Toni techpaleuis maj kisentoka techyolpakti titanojnotsaskej”, tein mokixtij itech amaix Tanejmachtijkej 15 metsti febrero xiuit 2015.) ¿Keniuj mitsonpaleuiani tiontanojnotsas iniuan tokniuan akin kuali uelij tanojnotsaj?
¿Keyej amo tikonyoleua semej nejon tokniuan maj mouan tanojnotsa? Komo tanojnotskej mokokoua, kemansa ueliskia tikonuikas ichan semej akin tikonmachtia Biblia uan ompa nanmomachtiskej. Satepan keman tamis nemachtil, xikontajtani nejon tokniuj keniuj kiita momachtijkej uan xikontajtani seki tayolmajxitilismej.
Xikontemo iniuan tionyetos. Xionmochikaua tikonixmatis nejin tokniuan. Xikonyoleua semej keman nantaueyichiuaskej kemej kalyetouanij uan xikonchiuili netajtanilmej. Xikontajtani keniuj kiixmatik tamachtilis tein melauak, keniuj kitatiochiuiani Jiova, kanachin mosentiliayaj itech nechikol keman yejua mochiuak itaixpantijkauj Jiova uan keniuj momiakilianij hasta axkan uan toni taman tein kuali kipanouani itech itekiyo Dios. Komo tokniuj mokokoua, xa tejuatsin uelis tionyas ichan uan ompa nantaueyichiuaskej kemej kalyetouanij.
Xikonajsikamati tein kipanouaj uan amo xiontajtani okachi ke tein yejuan uelij kichiuaj. Ijkon kemej tejuan, akin miak xiujmejya kitekitilijtokej Dios no uelij kichiuaj miak taman itech tanojnotsalis (Rom. 12:6-8). Kemej sekin xiuejkejya, xa amo uelis yetoskej touan miak tiempo. Maski ijkon, uelis techpaleuis tein yejuan kimatij uan tein kinpaleuiani maj amo kikauakan Jiova.