KENIUJ TIKCHIUASKEJ MAJ MOTSAKUILI NETAUELITALIS

2 | Amo xionmomakepa

Biblia kijtoua:

“Amo ximomakepakan [...]. Komo ueli uan namomako yetok, xiyolseujkanemikan iniuan nochin. Nokniuantsitsin, amo ximomakepakan [...]. Porin ijkuiliujtok: “Jiova kijtoua: ‘Nejua nimomakepas; nejua nikinmakas tein kinnamiki’” (ROMANOS 12:17-19, TNM).

¿Toni kijtosneki?

Maski tikualanij keman aksa techchiuilia tein amo kuali, Dios amo kineki maj timomakepakan, ta techyolchikaua maj timochiakan porin kijtoua ke amo uejkaua kiixpolos nochi tein amo kuali (Salmo 37:7, 10).

Uelis tikonchiuas nejin:

Keman timomakepaj tikchiuaj maj netauelitalis amo keman tami. Yejua ika, komo aksa mitsonyolkokoj amo xikontemo tionmomakepas. Amo xionyolijsiui. Okachi kuali xikonkaua (Proverbios 19:11). Sayoj ke kemansa xa monekis tikonixnamikis. Kemej neskayot, komo aksa mitsonchiuilij tein amo kuali xa uelis tikonteluilis iniuan tekiuanij.

Komo timomakepaj kichiua maj titajyouikan

¿Uan komo amo ueli moyektalia kuejmol? ¿Oso tikonchiuakya nochi sayoj ke amo ueli moyektalia ika yolseuilis? Maski ijkon, amo xionmomakepa porin nejon kichiuas maj okachi ueyia kuejmol. Xionmochikaua amo tiontetauelitasok. Xiontakuaujtamati ke Dios kiyektalis kuejmol. Itech Salmo 37:3-5 kijtoua: “Xitakuaujtamati iuan uan yejuatsin mitspaleuis”.

Tein sekin kinpanouani: ADRIÁN

Mochikauak amo momakepasok

Keman katka telpoch, Adrián mouikaya iniuan akin tateuiayaj, tetauelitayaj uan momakepayaj. Yejua kijtoua: “Miakpa akin iniuan nimoteuiaya, nechtatoponiliayaj, necheskixtiayaj uan hasta nechkauayaj itech ojti porin moluiayaj ke nimomikilijya”.

Keman kipiaya 16 xiujmej, Adrián peuak momachtia Biblia. Yejua kielnamiki: “Ijkon kemej nimomachtijtiaya Biblia nikitak ke monekia nikpatas tein nikchiuaya”. Adrián amo monekiaok tetauelitas nion tateuis. Se texto tein semi kipaleuij yejua Romanos 12:17-19, tein kijtoua maj amo se momakepa. Yejua kijtoua: “Nechpaleuij nikitas ke Jiova, kiyektalis keman techchiuiliaj tein amo kuali keman monekis. Satepan nikaujtiaj tein amo kuali tein nikchiuaya”.

Kemej achto semi moteuiaya, se youak kiteuijkej akin kitauelitayaj. Akin kinixyekanaya tateuianij kitsajtsilij: “¡Ximopaleui!”. Adrián kijtoua ke no kinekia kimaas. Sayoj ke amo kichiuak, ta ijsiujka kitataujtij Jiova uan choloj.

Adrián no kijtoua: “Mostika nikajsik akin kinixyekanaya tateuianij, sayoj ke yaya iselti. Semi nikualantoya uan niknekia nimomakepas. Oksepa ichtakatsin niktataujtij Jiova maj nimotsakuiliani uan maj amo nikmaani. Semi nikmoujkaitak keman motokij nouan uan nechiluij: ‘Xinechtapojpolui ika tein nimitschiuilij tayouak. Tein melauj no nikneki nikchiuas kemej tejua uan nimomachtis Biblia’. ¡Semi kuali ke niktsakuilij nokualanyot! Nejon semi tapaleuij uan no peuak momachtia Biblia”.